କାକଟପୁର : କାକଟପୁରରେ ଜୁଏଲାରୀ ଦୋକାନୀଙ୍କୁ ଗୁଳି । କୁଣ୍ଢେଇ ବଜାର ସାହୁ ଜୁଏଲାରୀ ମାଲିକ ନିରଞ୍ଜନ ସାହୁଙ୍କୁ ଦୁଇ ରାଉଣ୍ଡ ଗୁଳିମାଡ଼ ହୋଇଛି । ନିରଞ୍ଜନଙ୍କ ପିଠିରେ ଗୁଳି ବାଜିଥିବା ସୂଚନା ମିଳିଛି । ତାଙ୍କୁ ଗୁରୁତର ଅବସ୍ଥାରେ ଡାକ୍ତରଖାନାରେ ଭର୍ତ୍ତି କରାଯାଇଥିବାବେଳେ ଅଭିଯୁକ୍ତ ଘଟଣାସ୍ଥଳରୁ ଫେରାର ହୋଇଯାଇଛନ୍ତି । ଗୁରୁତର ନିରଞ୍ଜନଙ୍କ କହିବା ଅନୁସାରେ, ଦୁଇ ମୁଖା ପିନ୍ଧା ଦୁର୍ବୃତ୍ତ ଆସି ଫାୟାରିଂ କରି ବାଇକ ଛାଡ଼ି ପଳାଇଯାଇଛନ୍ତି । ସୁନା ଲୁଟ ଉଦ୍ଦେଶ୍ଯରେ ଗୁଳିମାଡ଼ ହୋଇଥିବା ସନ୍ଦେହ କରାଯାଉଛି । ପୋଲିସ ଘଟଣାସ୍ଥଳରେ ପହଞ୍ଚି ସିସିଟିଭି ଯାଞ୍ଚ କରି ତଦନ୍ତ କରୁଛି ।
ଜାମ୍ମୁ ଓ କାଶ୍ମୀରରେ କିଏ କରିବେ ସରକାର ?
ଜାମ୍ମୁ କାଶ୍ମୀର : ଜାମୁ କାଶ୍ମୀର ବିଧାନସଭା ନିର୍ବାଚନ। ଆସନ୍ତା ୧୮ ତାରିଖରେ ପ୍ରଥମ ପ୍ରର୍ଯ୍ୟାୟ ଭୋଟଗ୍ରହଣ । ଆଜି ସରିଛି ପ୍ରଥମପର୍ଯ୍ୟାୟ ଭୋଟ ଲାଗି ନିର୍ବାଚନୀ ପ୍ରଚାର । ପ୍ରଥମ ପର୍ଯ୍ୟାୟରେ ମୋଟ ୨୪ ଆସନରେ ଭୋଟ ଗ୍ରହଣ ହେବ । କାଶ୍ମୀର ୧୬ ଆସନ ଥିବାବେଳେ ଜାମୁ ଅଂଚଳର ୪ ଆସନ ରହିଛି। ଅନନ୍ତନାଗ, କୁଲଗାମ, ସୋପିଆନ ଏବଂ ପୁଲୱାମା ଜିଲ୍ଲାରେ ଭୋଟଗ୍ରହଣ ହେବ । ପ୍ରଥମ ପର୍ଯ୍ୟାୟରେ ମୋଟ ୨୩ ଲକ୍ଷ ୨୭ ହଜାର ଭୋଟର ସେମାନଙ୍କ ମତ ସାବ୍ୟସ୍ତ କରିବେ। ସେମାନଙ୍କ ମଧ୍ଯରେ ୫ ଲକ୍ଷ ୬୬ ହଜାରରୁ ଅଧିକ ଯୁବ ଭୋଟର ରହିଛନ୍ତି ।
ପ୍ରଥମ ପର୍ଯ୍ୟାୟ ନିର୍ବାଚନ ରଣାଙ୍ଗନରେ ମୋଟ ୨୧୯ ପ୍ରାର୍ଥୀ ରହିଛନ୍ତି । ଚଳିତ ନିର୍ବାଚନରେ କଂଗ୍ରେସ, ନ୍ଯାସନାଲ କନଫରେନ୍ସ, ବିଜେପି, ପିପୁଲ୍ସ ଡେମୋକ୍ରାଟିକ ପାର୍ଟି, ଆପନି ପାର୍ଟି, ସିପିଏମ, ଜେକେ ପିପୁଲ୍ସ କନଫରେନ୍ସ, ଡେମୋକ୍ରାଟିକ ପ୍ରୋଗ୍ରେସିଭ ଆଜାଦ ପାର୍ଟି, ଜେକେ ଆଓ୍ବାମି ଇତେହାଦ ପାର୍ଟି ଲାଗି ହେବ ଅଗ୍ନି ପରୀକ୍ଷା। ଜାମୁ କାଶ୍ମୀରରେ ଧାରା ୩୭୦ ଉଚ୍ଛେଦ ପ୍ରସଙ୍ଗ ନିର୍ବାଚନରେ ହୋଇଛି ମୁଖ୍ଯ ପ୍ରସଙ୍ଗ। ବିଜେପି ଲାଗି ଧକ୍କା ସାଜିପାରେ ଧାରା ୩୭୦ ଉଚ୍ଛେଦ । ଗତ ୩୧ ଅକ୍ଟୋବର ୨୦୧୯ରେ ଜାମ୍ମୁ ଓ କାଶ୍ମୀରକୁ ଦୁଇଟି କେନ୍ଦ୍ରଶାସିତ ଅଞ୍ଚଳରେ ଭାଙ୍ଗି ଦିଆଯାଇଥିଲା । ସେଗୁଡିକ ହେଲା- ଜାମ୍ମୁ ଓ କାଶ୍ମୀର ଏବଂ ଲଦାଖ। ଧାରା ୩୭୦ ଉଚ୍ଛେଦକୁ ସମର୍ଥନ କରିଥିଲେ ବିଜେପି, ଆପ, ଏଆଇଏଡିଏମକେ, ଟିଡିପି, ଓ୍ବାଇଏସଆର କଂଗ୍ରେସ, ଶିବସେନା। ସେହିପରି ଉଚ୍ଛେଦକୁ ବିରୋଧ କରିଥିଲେ କଂଗ୍ରେସ, ଏନସି, ଜେକେପିଡିପି, ସିପିଏମ, ଟିଏମସି।
ଜନ୍ମଦିନରେ ଓଡ଼ିଶା ଆସୁଛନ୍ତି ପ୍ରଧାନମନ୍ତ୍ରୀ ,ସୁଭଦ୍ରା ଯୋଜନାର କରିବେ ଶୁଭାରମ୍ଭ
ଭୁବନେଶ୍ବର : ମଙ୍ଗଳବାର ଓଡ଼ିଶା ଆସୁଛନ୍ତି ମୋଦି । ଜନ୍ମଦିନରେ ସୁଭଦ୍ରା ଯୋଜନାର କରିବେ ଶୁଭାରମ୍ଭ । ପ୍ରଧାନମନ୍ତ୍ରୀଙ୍କ କାର୍ଯ୍ୟକ୍ରମକୁ ସଫଳ କରିବାକୁ ଚଳଚଞ୍ଚଳ ରାଜ୍ୟ ପ୍ରଶାସନ। ସଜେଇ ହୋଇଛି ଜନତା ମଇଦାନ । ସହର ସାରା ସୁରକ୍ଷା ବ୍ୟବସ୍ଥା କଡ଼ାକଡ଼ି । ପୂର୍ବାହ୍ନ ୧୧ଟାରେ ବିଜୁ ପଟ୍ଟନାୟକ ବିମାନବନ୍ଦରରେ ପ୍ରଧାନମନ୍ତ୍ରୀ ଓହ୍ଲାଇବା ପରେ ବିଶାଳ କାରକେଡ଼ରେ ସିଧା ଗାଡ଼କଣ ଅଭିମୁଖେ ଯାତ୍ରା କରିବେ। ଆବାସ ଯୋଜନାର ୨୦ ହିତାଧିକାରୀଙ୍କ ସହ ସିଧାସଳଖ ଆଲୋଚନା କରିବେ ମୁଖ୍ୟମନ୍ତ୍ରୀ । ଗାଡ଼କଣରୁ ଜନତା ମଇଦାନ ଅଭିମୁଖେ ବାହାରି ପ୍ରଧାନମନ୍ତ୍ରୀ ମୁଖ୍ୟ କାର୍ଯ୍ୟକ୍ରମରେ ଯୋଗଦେବେ । ସୁଭଦ୍ରା ଯୋଜନାର ଶୁଭାରମ୍ଭ ସହିତ ହିତାଧିକାରୀଙ୍କୁ ଖାତାକୁ ଡ଼ିବିଟି ମାଧ୍ୟମରେ ସହାୟତା ରାଶି ବଣ୍ଟନ କାର୍ଯ୍ୟକ୍ରମ ଆରମ୍ଭ କରିବେ । କମିଶନରେଟ ପୋଲିସ ପକ୍ଷରୁ ଏସପିଜିଙ୍କ ଉପସ୍ଥିତିରେ ସୋମବାର କାରକେଡ଼ ରିହରସେଲ କରାଯାଇଛି ।
ଜନତା ମଇଦାନରେ ବିଶାଳ କାର୍ଯ୍ୟକ୍ରମ ପାଇଁ ସରକାରୀ ପ୍ରସ୍ତୁତି ଶେଷ ପର୍ଯ୍ୟାୟରେ ପହଞ୍ଚିଛି । ମହିଳା ଶିଶୁ ବିକାଶ ବିଭାଗ ସହିତ ପୂର୍ତ୍ତ ବିଭାଗ, ଇଡ଼କଲ, ଶକ୍ତି ବିଭାଗର ଅଧିକାରୀଙ୍କ ସହ ଅନ୍ୟ ବିଭାଗର ବରିଷ୍ଠ ଅଧିକାରୀମାନେ କାର୍ଯ୍ୟକ୍ରମକୁ ସଫଳ କରିବାକୁ ସବୁ ପ୍ରକାର ପ୍ରସ୍ତୁତି ସାରିଛନ୍ତି । ଜନତା ମଇଦାନରେ ପ୍ରାୟ ୪୦ହଜାର ଲୋକଙ୍କ ପାଇଁ ବସିବାର ବ୍ୟବସ୍ଥା କରାଯାଇଛି । ଏହା ବାଦ୍ ମଇଦାନ ବାହାରେ ଏବଂ ସହରର ବିଭିନ୍ନ ଜାଗାରେ ପ୍ରଧାନମନ୍ତ୍ରୀଙ୍କୁ ସ୍ବାଗତ କରିବାକୁ ହଜାର ହଜାର ମହିଳା ଏକାଠି ହେବେ । ଟ୍ରାଫିକ ବ୍ୟବସ୍ଥାକୁ ନିୟନ୍ତ୍ରଣ କରିବାକୁ ସ୍ବତନ୍ତ୍ର ପଦକ୍ଷେପ ନିଆଯାଇଛି। ସୁଭଦ୍ରା ଯୋଜନା ସହ ଆବାସ ଯୋଜନା ପାଇଁ ସ୍ବତନ୍ତ୍ର ପ୍ୟାକେଜ୍ ପ୍ରଧାନମନ୍ତ୍ରୀ ଘୋଷଣା କରିବାର କାର୍ଯ୍ୟକ୍ରମ ରହିଛି । ଏହା ସହିତ କଳିଙ୍ଗ ଷ୍ଟାଡ଼ିୟମରେ ନବ ନିର୍ମିତ ବ୍ୟାଡ଼ମିଣ୍ଟନ ହାଇ ପରଫର୍ମାନ୍ସ ସେଣ୍ଟର ମଧ୍ୟ ଲୋକାର୍ପଣ କରିବେ ପ୍ରଧାନମନ୍ତ୍ରୀ ।
ପ୍ରଧାନମନ୍ତ୍ରୀଙ୍କ ଗସ୍ତକୁ ନଜରରେ ରଖି ସହରରେ ୮୦ ପ୍ଲାଟୁନ ପୋଲିସ ଫୋର୍ସ ନିୟୋଜିତ ରହିବେ । ବିମାନବନ୍ଦର, ଜନତା ମଇଦାନ ଓ ଗାଡ଼କଣ କାର୍ଯ୍ୟକ୍ରମ ପାଇଁ ୩ ଆଇଜିଙ୍କୁ ଦାୟିତ୍ବ ଦିଆଯାଇଛି । ମୁଖ୍ୟମନ୍ତ୍ରୀ, ଉପମୁଖ୍ୟମନ୍ତ୍ରୀ, ମୁଖ୍ୟ ଶାସନ ସଚିବ ଓ ଅନ୍ୟ ବରିଷ୍ଠ ଅଧିକାରୀମାନେ ସଭାସ୍ଥଳ ପରିଦର୍ଶନ କରି ସ୍ଥିତି ସମୀକ୍ଷା କରିଛନ୍ତି ।
ପ୍ରଧାନମନ୍ତ୍ରୀଙ୍କ ଗସ୍ତ ପାଇଁ ସ୍କୁଲ ବନ୍ଦକୁ ଅଭିଭାବକ ମହାସଂଘର ନିନ୍ଦା
ଭୁବନେଶ୍ବର : ପ୍ରଧାନମନ୍ତ୍ରୀଙ୍କ ଗସ୍ତ ପାଇଁ ଭୁବନେଶ୍ବରରେ ସମସ୍ତ ସ୍କୁଲ ବନ୍ଦକୁ ଅଭିଭାବକ ମହାସଂଘର ନିନ୍ଦା । ନିଷ୍ପତ୍ତି ପ୍ରତ୍ୟାହାର କରିବା ପାଇଁ ପ୍ରଧାନମନ୍ତ୍ରୀ, ମୁଖ୍ୟମନ୍ତ୍ରୀ, ମୁଖ୍ୟ ଶାସନ ସଚିବ, ଗଣଶିକ୍ଷା ସଚିବଙ୍କୁ ଚିଠି ଲେଖିଛି ସଂଘ। ଛାତ୍ରଛାତ୍ରୀ ଙ୍କ ଭବିଷ୍ୟତ କଥା ଚିନ୍ତା ନକରି ଏଭଳି ସ୍କୁଲ ବନ୍ଦକୁ ମହାସଂଘ ତୀବ୍ର ନିନ୍ଦା କରିଛି। ସୁଭଦ୍ରା ଯୋଜନାର ଶୁଭାରମ୍ଭ ପାଇଁ କାଲି ଭୁବନେଶ୍ୱର ଆସୁଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ। ଏଥିପାଇଁ ଭୁବନେଶ୍ୱରର ସମସ୍ତ ସ୍କୁଲ କୁ ବନ୍ଦ ଘୋଷଣା କରିଛନ୍ତି ରାଜ୍ୟ ସରକାର। କିଛି ଘରୋଇ ସ୍କୁଲରେ କାଲି ପରୀକ୍ଷା ମଧ୍ୟ ରହିଛି। ଏଭଳି କାର୍ଯ୍ୟକ୍ରମ ପାଇଁ ସ୍କୁଲ ସହ ପରୀକ୍ଷା ବନ୍ଦ କରାଯିବା କୁ ନେଇ ତୀବ୍ର ସମାଲୋଚନା କରିଛି ଅଭିଭାବକ ମହାସଂଘ।
ଏନେଇ ମହାସଂଘ ର ଅଧ୍ୟକ୍ଷ ବାସୁଦେବ ଭଟ୍ଟ ପ୍ରଧାନମନ୍ତ୍ରୀ, ମୁଖ୍ୟମନ୍ତ୍ରୀ, ମୁଖ୍ୟ ଶାସନ ସଚିବ, ଗଣଶିକ୍ଷା ସଚିବ ଙ୍କୁ ମେଲ ଯୋଗେ ଚିଠି ପଠାଇଛନ୍ତି। ପିଲାମାନଙ୍କ ପାଠପଢା ବନ୍ଦ ନକରିବା ପାଇଁ ସେ ଦାବି କରିଛନ୍ତି। ଗୋଟିଏ କାର୍ଯ୍ୟକ୍ରମ ପାଇଁ ପ୍ରଧାନମନ୍ତ୍ରୀ ଆସୁଥିବା ବେଳେ ଛାତ୍ରଛାତ୍ରୀ ଙ୍କ ଭବିଷ୍ୟତ ପାଇଁ ଛୁଟି ଘୋଷଣାକୁ ପ୍ରତ୍ୟାହାର କରିବା ପାଇଁ ଦାବି କରିଛି ଅଭିଭାବକ ମହାସଂଘ । ଯଦି କୌଣସି ପ୍ରାକୃତିକ ବିପର୍ଯ୍ୟୟ ହୋଇଥାନ୍ତା ତେବେ ବନ୍ଦ ହୋଇଥିଲେ ଚଳିଥାନ୍ତା । କିନ୍ତୁ ଏହି ଯୋଜନାରେ ଶିକ୍ଷାନୁଷ୍ଠାନର କୌଣସି ସମ୍ପର୍କ ନାହିଁ। ସରକାର ରହିଲେ ବାରମ୍ବାର କାର୍ଯ୍ୟକ୍ରମ ହେବ । ଯୋଜନାର ଶୁଭାରମ୍ଭ ହେବ । କେନ୍ଦ୍ର ମନ୍ତ୍ରୀ ପ୍ରଧାନମନ୍ତ୍ରୀ ଆସିବେ । ସବୁବେଳେ କଣ ସ୍କୁଲ ବନ୍ଦ ହେବ କି ବୋଲି ପ୍ରଶ୍ନ କରିଛନ୍ତି ଅଭିଭାବକ।
ମଦ ପିଉଥିଲେ ସାବଧାନ ,ଲାଇସେନ୍ସ ପ୍ରାପ୍ତ ମଦ ଦୋକାନରେ ବି ନକଲି ମଦ
ଭୁବନେଶ୍ବର : ଗରାଖଙ୍କ ଆଖିରେ ଆଙ୍ଗୁଠି ଗେଞ୍ଜି ଚାଲିଥିଲା ମଦ କାରବାର । ବ୍ରାଣ୍ଡେଡ଼ ମଦ ନାଁରେ ବିକ୍ରି ହେଉଥିଲା ବିଷ । ଅବକାରୀ କମିଶନରଙ୍କ ନିର୍ଦ୍ଦେଶରେ ମାରାଥନ ରେଡ । ବିଷାକ୍ତ ମଦ ଉପରେ ଚଢ଼ିଲା ବୁଲଡୋଜର । ଆପଣ ଟଙ୍କା ଦେଇ ସରକାରୀ ସ୍ୱୀକୃତିପ୍ରାପ୍ତ ବିଦେଶୀ ମଦ ଦୋକାନରୁ କିଣୁଥିବା ମଦ ଅରିଜିନାଲ ନୁହେଁ । ଏଥିରେ ବି ମିଶିପାରିଥାଏ ବିଷାକ୍ତ କେମିକାଲ । ଡୁପ୍ଲିକେଟ ମଦ ତିଆରି ନେଇ ବିଶ୍ୱସ୍ତ ସୁତରୁ ଖବର ପାଇବା ପରେ ଅବକାରୀ ବିଭାଗ ପକ୍ଷରୁ ବରମୁଣ୍ଡା ଓଭରବ୍ରିଜ ନିକଟରେ ଥିବା ମଦ କାଉଣ୍ଟରରେ ଚଢ଼ାଉ କରାଯାଇଛି । ଚଢ଼ାଉ ବେଳେ ବିପୁଳ ପରିମାଣର ମଦ ଅପମିଶ୍ରଣ ହେଉଥିବା ଜଣାପଡିଛି । ଦୋକାନରେ କାମ କରୁଥିବା ସେଲସମ୍ୟାନ ମଦରେ ମିଶାଉଥିଲା ବିଷାକ୍ତ କେମିକାଲ । ନିଜେ ଅବକାରୀ କମିଶନର ଏଠାରେ ପହଞ୍ଚିବା ସହ ଦୃଢ଼ କାର୍ଯ୍ୟାନୁଷ୍ଠାନ ନେଇ ନିର୍ଦ୍ଦେଶ ଦେବା ପରେ ଅପମିଶ୍ରିତ ମଦ ବୋତଲ ଉପରେ ସର୍ବସମ୍ମୁଖରେ ଚଢ଼ିଛି ବୁଲଡୋଜର ।
ଲାଇସେନ୍ସପ୍ରାପ୍ତ ମାଲିକଙ୍କ ଘର ବିହାର ହୋଇଥିବା ବେଳେ ତାଙ୍କୁ ଧରିବା ପାଇଁ ଗଠନ ହୋଇଛି ଟିମ । ଏକ୍ସାଇଜ ଆକ୍ଟ ଅନୁଯାୟୀ ଦୋକାନକୁ ସିଲ କରାଯାଇଛି । ଲାଇସେନ୍ସ ରଦ୍ଦ ନେଇ ପ୍ରକ୍ରିୟା ଆରମ୍ଭ ହୋଇଛି । ଅଭିଯୁକ୍ତଙ୍କୁ ଆଜୀବନ କାରାଦଣ୍ଡ ରେ ଦଣ୍ଡିତ କରାଯିବା ଭଳି ପ୍ରବଧାନ ରହିଛି । ସିଲ କୋଲକତାରୁ ଆସୁଥିବା ବେଳେ ହୋଲୋଗ୍ରାମ କଲର ଜେରକ୍ସ ସାହାଯ୍ୟରେ ନକଲ ହେଉଥିବା ଜାଣିବାକୁ ପାଇଛି ଅବକାରୀ ବିଭାଗ । ବିଗତ ୬ ମାସ ତଳୁ ବରମୁଣ୍ଡା କାଉଣ୍ଟରରେ ଚାଲିଥିଲା ନକଲି ମଦ ବିକ୍ରି। ଆଗକୁ ଗ୍ରାହକମାନଙ୍କ ପାଇଁ ଅସଲି ଓ ନକଲି ମଧ୍ୟରେ ଫରକ ଜାଣିବା ପାଇଁ ମାର୍ଗଦର୍ଶିକା ଜାରି ହେବ । ମଦ ପିଇବା ସ୍ୱାସ୍ଥ୍ୟ ପକ୍ଷେ ହାନିକାରକ । ଏହା ଜାଣି ମଧ୍ୟ ମଦ କିଣୁଥିବା ଗରାଖ QR code ସାହାଯ୍ୟରେ ପରଖି ନେବାର ଆବଶ୍ୟକତା ଥିବା କହିଛନ୍ତି ଅବକାରୀ ବିଭାଗର ବରିଷ୍ଠ ଅଧିକାରୀ ।
କିଛି ଦିନ ତଳେ ଚିକିଟି ମଦମୃତ୍ୟୁ ଘଟଣା ସାରା ରାଜ୍ୟରେ ଚହଳ ପକାଇଥିଲା । ଏକଥା ମନରୁ ନଲିଭୁଣୁ ପୁଣି ରାଜଧାନୀରେ ନକଲି ମଦ ବିକ୍ରି ହେବା ଘଟଣା ମାଫିଆଙ୍କ ମୁଖା ଖୋଲିଦେଇଛି ।
ହସୁଛି କାଶତଣ୍ଡୀ, ପାର୍ବଣ ପାଇଁ ସଜେଇ ହେଲାଣି ପ୍ରକୃତିରାଣୀ
ନନ୍ଦିଘୋଷ ବ୍ୟୁରୋ : ଧରଣୀ ଛାତିରେ ଫୁଟିଲାଣି ଦେଖ
ଧବଳ ରଙ୍ଗର ହୀରା
ବାସ ତାର ନାହିଁ , ବିମୋହିତ କରେ
ମନମୁଗ୍ଧ ତା ଚେହେରା
ନା ସେ ବଗିଚାରେ ଫୁଟେ , ନା ସେ ଘର ଅଗଣାରେ ଫୁଟେ , ବିଲ, ମାଳ, ନଈକୂଳ ଅପନ୍ତରା ଇଲାକାରେ ଫୁଟେ ଆଉ ଆକର୍ଷଣର ପେଣ୍ଠସ୍ଥଳ ପାଲଟେ । ସୁଲୁସୁଲିଆ ପବନରେ ଦୋଳି ଖେଳିଖେଳି ବାଟୋଇଙ୍କୁ ଆନମନା କରେ କାଶତଣ୍ଡୀ । ଏମିତି କିଛି ସୁନ୍ଦର ଦୃଶ୍ଯପଟ୍ଟ ଦେଖିବାକୁ ମିଳିଛି କଟକ ଜିଲ୍ଲା ବାଙ୍କୀ ଓ ବାରଙ୍ଗରେ । ରାସ୍ତା ପାର୍ଶ୍ବ ଠାରୁ ଆରମ୍ଭ କରି ପୋଖରୀ ହୁଡା ସବୁଠି ଦେଖିବାକୁ ମିଳୁଛି ମାଳମାଳ କାଶତଣ୍ଡିର ସମ୍ଭାର । ସୁଲୁସୁଲିଆ ପବନରେ ଦୋଳି ଖେଳି ଖେଳି ହସୁଛି କାଶତଣ୍ଡି। ଏହି ଅପୂର୍ବ ଦୃଶ୍ୟ ବାଟୋଇଙ୍କୁ ଅଟକାଇ ଘଡିଏ ଚାହିଁ ରହିବାକୁ ବାଧ୍ଯ କରୁଛି । କବିମାନେ ମଧ୍ଯ କାଶତଣ୍ଡିକୁ ଦେଖି ଆନମନା ହୋଇ ଉଠୁଛନ୍ତି । ଚଳଚଞ୍ଚଳ ହୋଇ ଉଠୁଛି କବିର କବିତା ।
ଶରତର ଆଗମନରେ ଧରଣୀ ବାନ୍ଧିଲାଣି କାଶତଣ୍ଡିର ବେଣି । ଓଡ଼ିଆ ସଂସ୍କୃତି ଓ କାଶତଣ୍ଡୀ ମଧ୍ୟରେ ରହିଛି ଅନେକ ନିବିଡ଼ତା। କାଶତଣ୍ଡୀ ମାଆ ଦୁର୍ଗାଙ୍କ ଆବାହନର ସଂକେତ ଦିଏ । ପାର୍ବଣ ଋତୁର ବନ୍ଦନା ଗାଇବା ପାଇଁ ସତେଯେମିତି ଆନମନା ହୋଇଉଠଛି ପ୍ରକୃତିରାଣୀ ।
ଲୁଚି ଛପି ବିବାହ କଲେ ଅଦିତି
ମୁମ୍ବାଇ : ନିକଟରେ ନେଟଫ୍ଲିକ୍ସରେ ରିଲିଜ୍ ହୋଇଥିବା ‘ହୀରାମଣ୍ଡି’ ଓ୍ବେବସିରିଜରେ ନିଜର ଚମକଦାର ଅଭିନୟରେ ଦର୍ଶକଙ୍କ ମନକୁ କିଣି ନେଇଥିବା ବଲିଉଡ୍ ଅଭିନେତ୍ରୀ ଅଦିତି ରାଓ ହେଦରୀ ବିବାହ ବନ୍ଧନରେ ବାନ୍ଧି ହୋଇଛନ୍ତି । ଅଦିତି ନିଜର ପ୍ରେମିକ ବଲିଉଡ ଅଭିନେତା ସିଦ୍ଧାର୍ଥଙ୍କ ସହ ବିବାହ କରିଛନ୍ତି । ଦୁହେଁ ବାନାପର୍ଥୀରେ ଥିବା ୪୦୦ ବର୍ଷ ପୁରୁଣା ଶ୍ରୀରଙ୍ଗ ମନ୍ଦିରରେ ଗୁପ୍ତ ଭାବରେ ବିବାହ କରିଛନ୍ତି । ଅଦିତି ନିଜର ବିବାହର ଫଟୋ ଇନଷ୍ଟାଗ୍ରାମରେ ସେୟାର୍ ମଧ୍ୟ କରିଛନ୍ତି । ଯେଉଁଥିରେ କି ସେ ନିଜକୁ ମିଷ୍ଟର ଏବଂ ମିସେସ୍ ଅଦୁ-ସିଦ୍ଧୁ ବୋଲି କହି ସମ୍ବୋଧନା କରିଛନ୍ତି ।
ଫଟୋ ସହ ଅଦିତି ଏକ ସୁନ୍ଦର ବାର୍ତ୍ତାରେ ଲେଖିଛନ୍ତି ଯେ ,“ତୁମେ ମୋର ଚନ୍ଦ୍ର, ସୂର୍ଯ୍ୟ ଏବଂ ତାରା । ପରୀ ରାଇଜର କାହାଣୀ ପରି ତୁମେ ସବୁବେଳେ ମୋ ସହ ରହିବ । ହସ, ଖୁସିରେ ରହିବା ,କେବେ ବି ବଡ ହେବା ନାହଁ । ସବୁବେଳେ ଭଲପାଇବା ,ଯାଦୁ ବନେଇ ରଖିବା “।
ସୂଚନା ଅନୁସାରେ ,ଦୁହିଁଙ୍କର ଏହା ଦ୍ବିତୀୟ ବିବାହ ଅଟେ । ଅଦିତିଙ୍କର ପ୍ରଥମ ବିବାହ ସତ୍ୟଦୀପ ମିଶ୍ରାଙ୍କ ସହ ହୋଇଥିଲା । ଯିଏ କି ଏବେ ଅଭିନେତ୍ରୀ ତଥା ଫେସନ୍ ଡିଜାଇନର ମସାବା ଗୁପ୍ତାଙ୍କର ସ୍ବାମୀ । ସେହିପରି ସିଦ୍ଧାର୍ଥଙ୍କର ମଧ୍ୟ ପ୍ରଥମ ବିବାହ ବେଶି ଦିନ ରହିପାରିନଥିଲା ।
ବର କନ୍ୟା ସାଜିଥିବା ସିଦ୍ଧାର୍ଥ ଏବଂ ଅଦିତିଙ୍କର ବିବାହ ଲୁକ୍ ଖୁବ୍ ସାଧାସିଧା ଥିଲା । କନ୍ୟା ସାଜିଥିବା ଅଦିତି ପୁରା ସାଧା ସିଧା ଗୋଲଡେନ୍ ରଙ୍ଗର ଲେହଙ୍ଗା ପିନ୍ଧିଥିଲେ । ଏହା ସହ ସାଉଥ୍ ଇଣ୍ଡିଆନ୍ ଲୁକକୁ ପୁରା କରିବା ପାଇଁ ସେ ଝୁମକା , ଚୁଡି, ବେକରେ ଚୋକର ସହ କେଶରେ ଗଜରା ମାଳ ଲଗାଇଥିଲେ । ସେହିପରି ସିଦ୍ଧାର୍ଥ ଧଳା ରଙ୍ଗର କୁର୍ତା ସହ ଗୋଲଡେନ୍ ବର୍ଡରର ଲୁଙ୍ଗି ପିନ୍ଧିଥିଲେ । ଏକ ଫଟୋରେ ଖୁବ୍ ସାରା ବିବାହର ପରମ୍ପରାରେ ଉଭୟଙ୍କୁ ବହୁତ ସ୍ତ୍ରୀ ଲୋକ ଆର୍ଶୀବାଦ ଦେଉଥିବାର ଅଦିତି ପୋଷ୍ଟ ମଧ୍ୟ କରିଛନ୍ତି । ଅଦିତି ଏବଂ ସିଦ୍ଧାର୍ଥଙ୍କର ଦେଖା ସାକ୍ଷାତ ଫିଲ୍ମ ‘ମହାସମୁଦ୍ରମ’ ର ସେଟରେ ୨୦୨୧ରେ ହୋଇଥିଲା ।
ଛୁଆକୁ ଛାଡି ପ୍ରେମିକ ସହ ଛୁ’ ମାରିଲା ମାଆ
ବଲାଙ୍ଗୀର : ବଲାଙ୍ଗୀରରେ ଅଭାବନୀୟ ଘଟଣା। ବସ୍ ଟର୍ମିନାଲରେ ୪ ବର୍ଷର ଛୁଆକୁ ଛାଡ଼ି ଫେରାର ମାରିଛି ମାଆ। ଛୁଆକୁ ଜଣେ ଶ୍ରମିକ ପାଖରେ ଛାଡି ମହିଳା ଜଣକ ପ୍ରେମିକ ସହ ବସରେ ଫେରାର୍ ମାରିଥିଲେ । ଛୁଆଟି ବସଷ୍ଟାଣ୍ଡରେ କାନ୍ଦୁଥିବା ଦେଖି ପୋଲିସକୁ ଖବର ଦେଇଥିଲେ ସ୍ଥାନୀୟ ଲୋକେ। ଦୀର୍ଘ ୩ରୁ ୪ ଘଣ୍ଟା ଧରି ଛୁଆଟି ମାକୁ ନପାଇ କାନ୍ଦି କାନ୍ଦି ଖୋଜିବାକୁ ଲାଗିଥିଲା । ଶିଶୁଟି ଜଣେ ଶ୍ରମିକ ପାଖରେ ରହିଥିଲା।
ସୂଚନା ପାଇ ଟାଉନ ଥାନା ପୋଲିସ ପହଁଚି ଛୁଆକୁ ଉଦ୍ଧାର କରିବା ସହ ଶ୍ରମିକକୁ ଥାନାକୁ ଆଣି ପଚରାଉଚରା କରିଛି। ଫେରାର ମହିଳା ଜଣକ ଜଣେ ଶ୍ରମିକଙ୍କୁ ଫୋନ କରି ଡାକିବା ସହ ଶିଶୁକୁ ଦେଇ ଚାଲିଯାଇଥିବା ଶ୍ରମିକ ପୋଲିସକୁ କହିଛନ୍ତି। ତେବେ ପ୍ରେମିକ ସହ ବସରେ ଫେରାର ମାରୁଥିବାବେଳେ ଲୋଇସିଂହା ଥାନା ଅନ୍ତର୍ଗତ ଗାଇଖାଇ ନିକଟରୁ ବସ ଅଟକାଇ ମାଆକୁ ଧରି ଆଣିଥିଲା ପୋଲିସ । ପୋଲିସକୁ ଦେଖି ବସରୁ ଡେଇଁ ଫେରାର ମାରିଥିଲା ପ୍ରେମିକ। ମାକୁ ପୋଲିସ ଅଟକ ରଖି ପଚରାଉଚରା ଚଳାଇଛିI ମହିଳା ଜଣକ ପୁଇଁତଳା ଥାନା ଅଂଚଳର। ସେ ଦେଓଗାଁ ଥାନା ଅଞ୍ଚଳରେ ବିବାହ କରିଥିଲେ । କିଛି ମାସ ହେଲା ସ୍ୱାମୀକୁ ଛାଡି ପଳାଇ ଆସିଥିଲେ। ମହିଳାଙ୍କୁ ନେଇ ଯାଉଥିବା ବ୍ଯକ୍ତି ଜଣକ କିଏ ଖୋଳତାଡ଼ କରୁଛି ପୋଲିସ ।
ମଇଁଷି ଚରାଳୀଙ୍କୁ ଟାଣିନେଲା କୁମ୍ଭୀର
କେନ୍ଦ୍ରାପଡା: ପୁଣି ମାତିଛି ମଣିଷଖିଆ କୁମ୍ଭୀର । ମଇଁଷି ଚରାଇବା ବେଳେ ଟାଣିନେଲା କୁମ୍ଭୀର । କେନ୍ଦ୍ରାପଡ଼ା ଜିଲ୍ଲା ଆଳି ଥାନା କୋଲିଢିଅ ପଞ୍ଚାୟତ ଇଚ୍ଛାପୁର ଗାଁରେ ଅଭାବନୀୟ ଘଟଣା ଘଟିଛି । ଜୋର ପାର ହେବା ବେଳେ ଅଜାମ୍ବର ନାୟକଙ୍କୁ କୁମ୍ଭୀର ଟାଣିନେଇଛି । ଅଭିଯୋଗ ଅନୁସାରେ ଅଜାମ୍ବର ଓ ବାବୁରାମ ନାୟକ ମଇଁଷି ଚରାଇବାକୁ ଯାଇଥିଲେ । ଜୋର ପାର ହେବା ନିମନ୍ତେ ଡଙ୍ଗା ନିକଟକୁ ଯାଇଥିବା ବେଳେ ଏକ କୁମ୍ଭୀର ଅଜାମ୍ବରଙ୍କୁ ଭିଡ଼ିନେଇଥିଲା । ଏନେଇ ବାବୁରାମ ଗାଁରେ ଖବର ଦେବାପରେ ଅଗ୍ନିଶମ ବାହିନୀ, ପୋଲିସ ଓ ବନ ବିଭାଗ ମିଳିତ ଭାବେ ନିଖୋକ ଅଜାମ୍ବରଙ୍କୁ ଖୋଜାଖୋଜି କରୁଛନ୍ତି ।
ରାଜ୍ୟରେ ଚାଲିଛି ମୋଦାନୀ ସରକାର !
ଭୁବନେଶ୍ବର : ସୁଭଦ୍ରା ଯୋଜନାରେ ମହିଳାଙ୍କୁ ଠକିଛନ୍ତି ମୋହନ ସରକାର । ସୁଭଦ୍ରା ଯୋଜନାରେ ରାଜ୍ୟ ସରକାର ମାସକୁ ୮୩୩ ଟଙ୍କା ମହିଳାଙ୍କୁ ଦେବେ । ୮୩୩ ଟଙ୍କାରେ ମହିଳା କିପରି ଉଦ୍ଯୋଗୀ ହେବେ । କେତେ ମହିଳା ସାମିଲ ହେବେ । ଏନେଇ ଶ୍ୱେତ ପତ୍ର ଦିଅନ୍ତୁ ପ୍ରଧାନମନ୍ତ୍ରୀ । ଏବେ କାହିଁକି ଏଥିରେ ପଛଘୁଞ୍ଚା ଦିଆଯାଉଛି । ଓଡିଶାକୁ ଲୁଟିବା ପାଇଁ ଷଡଯନ୍ତ୍ର କରୁଛି ବିଜେପି । ଆଦାନୀକୁ କାହିଁକି ଧାମରା ବନ୍ଦର ଦିଆଯିବ। ଏହା କଣ ଓଡିଆ ଅସ୍ମିତା । ଆଗକୁ ଭୁବନେଶ୍ବର ବିମାନ ବନ୍ଦର ଦିଆଯିବ। ପୁରା ଓଡ଼ିଶାକୁ ଗୁଜୁରାଟ ମଡେଲ କରିବାକୁ ଦିଆଯାଉଛି । ଓମଫେଡ ବି ଦଖଲ କରିବାକୁ ଷଡଯନ୍ତ୍ର କରିଛି ବିଜେପି ।
ରାଜ୍ୟରେ ମୋହନ ମାଝୀ ସରକାର ନୁହେଁ, ମୋଦାନି ସରକାର ଚାଲିଛି ବୋଲି କହିଛି କଂଗ୍ରେସ । ଗୋପାଳପୁର ଓ ଧାମରା ବନ୍ଦର ନାମ ପରିବର୍ତ୍ତନ କରି ଆଦାନି ପୋର୍ଟ କରାଗଲେ ବିରୋଧ ହେବ । ଏହାକୁ ଓଡିଶା ବାସୀ ଗ୍ରହଣ କରିବେନି । ଓଡିଆ ଅସ୍ମିତା ପାଇଁ କଂଗ୍ରେସ ଲଢେଇ ଜାରି ରଖିବ । ଲୋକଙ୍କ ଚିଟଫଣ୍ଡ ଟଙ୍କା କେବେ ଫେରିବ । ରାଜ୍ୟପାଳ ପୁଅ ମାଡ଼ ମାରିବା ଘଟଣାକୁ ନେଇ ବି ବର୍ଷିଲା କଂଗ୍ରେସ । କାହିଁକି ଓଡିଆ ସରକାରୀ ଅଧିକାରୀଙ୍କୁ ରାଜ୍ୟପାଳଙ୍କ ପୁଅ ମାଡ଼ ମାରିବା ପରେ କାହିଁକି ପୋଲିସ୍ ଚୁପ୍ । କେବେ ଏଏସଓ ପରିବାରକୁ ନ୍ୟାୟ ମିଳିବ । ଏ କଣ ଓଡିଆ ଅସ୍ମିତା ନା ଗୁଜୁରାଟ ମଡେଲ । ମୋହନ ମାଝୀ ସରକାରଙ୍କ ସମୟରେ ମହିଳା ଅତ୍ୟାଚାର ବଢ଼ିଛି ବୋଲି କହିଛି କଂଗ୍ରେସ ।