ସମ୍ୱଲପୁର : ହୀରାକୁଦର ଖୋଲିଲା ୧୦ ଗେଟ। ପୂର୍ବରୁ ୬ଟି ଗେଟ୍ ଖୋଲିଥିବାବେଳେ ଆଜି ଆଉ ୪ଟି ଗେଟ ଖୋଲିଛି। ଉପରମୁଣ୍ଡରେ ବର୍ଷା ହୋଇଥିବାରୁ ହୀରାକୁଦ ଜଳଭଣ୍ଡାରକୁ ବନ୍ୟା ଜଳ ପ୍ରବେଶର ମାତ୍ରା ମଧ୍ୟ କ୍ରମାଗତ ଭାବେ ବଢ଼ିବାରେ ଲାଗିଛି। ବର୍ତ୍ତମାନ ପ୍ରତି ସେକେଣ୍ଡରେ ଜଳ ଭଣ୍ଡାର ଭିତରକୁ ପ୍ରବେଶ କରୁଛି ୧ ଲକ୍ଷ ୮୧ ହଜାର ୧୩ ଘନଫୁଟ ବନ୍ୟାଜଳ। ସେପଟେ ୬ଟି ଗେଟ୍ ଦେଇ ବନ୍ୟାଜଳ ନିଷ୍କାସନ ଚାଲିଛି। ୬ଟି ଗେଟ୍ ମାଧ୍ୟମରେ ୧ ଲକ୍ଷ ୨୬ ହଜାର ୫୭୧ ଘନଫୁଟ ବନ୍ୟାଜଳ ନିଷ୍କାସନ ହେଉଛି। ୬୦୯.୪୩ ଫୁଟରେ ପହଞ୍ଚିଲା ଜଳସ୍ତର।
ଇସ୍ରାଏଲ ବିରୋଧରେ ମେଣ୍ଟ ବାନ୍ଧିଲେ ଇରାନ, ହମାସ ଓ ହେଜବୁଲ୍ଲା
ନନ୍ଦିଘୋଷ ବ୍ୟୁରୋ : ମଧ୍ଯପ୍ରାଚ୍ଯରେ ଅବଶମ୍ଭାବୀ ଯୁଦ୍ଧ । ବଢିପାରେ କଳେବର । ଇସ୍ରାଏଲ ବିରୋଧରେ ମେଣ୍ଟ ବାନ୍ଧିଲେ ଇରାନ, ହମାସ ଓ ହେଜବୁଲ୍ଲା । ଆଞ୍ଚଳିକ ସ୍ତରରେ ଏକ ବଡ ଧରଣର ଯୁଦ୍ଧମୁହାଁ ମଧ୍ଯପ୍ରାଚ୍ୟ । ହମାସ ମୁଖ୍ଯ ଇସମାଇଲ ହାନିୟେ ଓ ହେଜବୁଲ୍ଲା ସାମରିକ ମୁଖ୍ଯ ଫାଉଦ ଶୁକରଙ୍କୁ ହତ୍ଯା ପରେ ରକ୍ତମୁଖା ହୋଇଛନ୍ତି ଇରାନ ଓ ସହଯୋଗୀ । ଇସ୍ରାଏଲ ଉପରେ କାତ୍ୟୁଷ ରକେଟ ମାଡ କରିଛି ହେଜବୁଲ୍ଲା ।
ତେବେ ଇସ୍ରାଏଲର କେବଳ ସାମରିକ ସ୍ଥଳୀ ନୁହେଁ ବରଂ ଦେଶ ଭିତରକୁ ଏହି ହମଲା କରିବା ଲାଗି ହେଜବୁଲ୍ଲାକୁ କହିଛି ଇରାନ । ହେଜବୁଲ୍ଲା ଆକ୍ରମଣରେ କିଛି ଲୋକ ମୃତାହତ ହୋଇଥିବାବେଳେ ଇସ୍ରାଏଲର ଡ୍ରୋନ ସିଷ୍ଟମ ଅନେକ ମିସାଇଲ ଓ ରକେଟକୁ ଧ୍ବଂସ କରିବାରେ ସମର୍ଥ ହୋଇଛି । ତେଣେ ଲେବାନନର ବାଜୁରିଏରେ ଇସ୍ରାଏଲ ଡ୍ରୋନ ହମଲାରେ ପ୍ରାଣ ହରିଛନ୍ତି ହେଜବୁଲ୍ଲାର ଜଣେ କମାଣ୍ଡର ଅଲି ଆବିଦ ଅଲି । ଲେବାନନରେ ବିଦେଶୀ ନାଗରିକଙ୍କ ଜୀବନ ବିପନ୍ନ ଥିବାରୁ ନିଜ ଦେଶର ନାଗରିକମାନଙ୍କୁ ତୁରନ୍ତ ଲେବାନନ ଛାଡିବା ଲାଗି ପରାମର୍ଶ ଦେଇଛନ୍ତି ଆମେରିକା, ବ୍ରିଟେନ ଓ ଫ୍ରାନ୍ସ ।
ଲେବାନନ ନ ଯିବାକୁ ନାଗରିକଙ୍କୁ ପରାମର୍ଶ ଦେଇଛି କାନଡା । ସ୍ଥିତି ପ୍ରତି ସତର୍କ ରହିବାକୁ ଭାରତୀୟମାନଙ୍କୁ ବି ଦିଆଯାଇଛି ପରାମର୍ଶ । ସେପଟେ ସ୍ଥିତିର ସମାଧାନ ଲାଗି ଉଦ୍ୟମ ଆରମ୍ଭ କରିଛନ୍ତି କାତାର, ଇଜିପ୍ଟ ଓ ଆମେରିକା । ଏହି ପରିସ୍ଥିତିରେ ଇରାନ ନୀରବ ରହିବାକୁ ଆହ୍ବାନ ଦେଇଛନ୍ତି ଆମେରିକା ରାଷ୍ଟ୍ରପତି ଜୋ ବାଇଡେନ । ତେଣେ ଇରାନର ସମ୍ଭାବ୍ଯ ବିରୋଧରେ ସହଯୋଗର ହାତ ବଢାଇବା ଲାଗି ଆମେରିକା ଓ ବ୍ରିଟେନକୁ ଅନୁରୋଧ କରିଛି ଇସ୍ରାଏଲ । ମଧ୍ଯପ୍ରାଚ୍ଯରେ ନିଜ ସ୍ଥିତି ଜାହିର ଲାଗି ୟୁଏସଏସ ଆବ୍ରାହମ ଲିଙ୍କନ ଏୟାରକ୍ରାଫ୍ଟ କ୍ଯାରିଅରକୁ ପଠାଇବା ଲାଗି ନିର୍ଦ୍ଦେଶ ଦେଇସାରିଛି ଆମେରିକା । ସେପଟେ ହେଜବୁଲ୍ଲା ପରି ୟେମେନ, ଇରାକ ଓ ସିରିଆର ବହୁ ବିଦ୍ରୋହୀ ସଂଗଠନ ଇରାନ ସମର୍ଥନରେ ବାହାରିଛନ୍ତି ।
ପ୍ରକୃତିର ତାଣ୍ଡବ ପରେ ସରୁନି ଦୁର୍ଦ୍ଦଶା, କେରଳ ୱାୟନାଡରେ ମୃତ୍ଯୁ ସଂଖ୍ଯା ୩୫୮
ନନ୍ଦିଘୋଷ ବ୍ୟୁରୋ : କେରଳ, ହିମାଚଳ ପ୍ରଦେଶ, ଉତ୍ତରାଖଣ୍ଡରେ ସରୁନି ବିଭୀଷିକ ପରର କରୁଣ କାହାଣୀ। ସବୁଠି ବଢିବାରେ ଲାଗିଛି ମୃତକଙ୍କ ସଂଖ୍ଯା। ୱାୟନାଡରେ ମାଟି ତଳୁ ପ୍ରିୟଜନଙ୍କୁ ଖୋଜିବାରେ ଲାଗିଛନ୍ତି ଯବାନ ଓ ରେସ୍କ୍ଯୁ ଟିମ। ୱାୟନାଡ ବିଭୀଷିକାରେ ମୃତ୍ଯୁ ସଂଖ୍ଯା ୩୫୮ ହୋଇଛି। ଏବେ ବି ୩ ଶହରୁ ଅଧିକ ଲୋକ ପୋତି ହୋଇ ରହିଥିବା ଆଶଙ୍କା କରାଯାଉଛି।
ବିପନ୍ନଙ୍କୁ ଉଦ୍ଧାର ଲାଗି ପ୍ରାଣମୂର୍ଚ୍ଛା ସଂଗ୍ରାମ କରୁଛନ୍ତି ଯାବନ। ଡ୍ରୋନଭିତ୍ତିକ ରାଡାର ଜରିଆରେ ଚାଲିଛି ସର୍ଚ୍ଚ ଅପରେସନ। ବାୟୁସେନା ସମେତ ବିଭିନ୍ନ ବାହିନୀର ଯବାନ ଚଳାଇଛନ୍ତି ଉଦ୍ଧାର କାର୍ଯ୍ୟ। ସେପଟେ ଉତ୍ତରାଖଣ୍ଡ ଓ ହିମାଚଳ ପ୍ରଦେଶରେ ଜାରି ରହିଛି ଉଦ୍ଧାର କାର୍ଯ୍ୟ। ଯୋଗାଯୋଗ ବିଚ୍ଛିନ୍ନ ହୋଇଥିବାରୁ ଉଦ୍ଧାର କାର୍ଯ୍ୟରେ ବାଧା ଉପୁଜିଛି। ଶହ ଶହ ପର୍ଯ୍ୟଟକ ଓ ଶ୍ରଦ୍ଧାଳୁ ବିଭିନ୍ନ ସ୍ଥାନରେ ଫସି ରହିଛନ୍ତି। ଉତ୍ତରାଖଣ୍ଡରେ ମୃତ୍ଯୁ ସଂଖ୍ଯା ୨୩ ହୋଇଥିବାବେଳେ ୪୭ ଜଣ ନିଖୋଜ ଅଛନ୍ତି। ହିମାଚଳ ପ୍ରଦେଶରେ ମୃତ୍ଯୁ ସଂଖ୍ଯା ୮ ହୋଇଥିବାବେଳେ ନିଖୋଜ ଅଛନ୍ତି ପ୍ରାୟ ୫୦ ଜଣ।
ଧାର୍ମିକ ଉତ୍ସବ ବେଳେ ମନ୍ଦିର କାନ୍ଥ ଭୁଶୁଡି ଚାଲିଗଲା ୯ ଶିଶୁଙ୍କ ଜୀବନ
ଭୋପାଲ : ମଧ୍ଯପ୍ରଦେଶ ସାଗର ଜିଲ୍ଲାରେ ଅଘଟଣ। ଏକ ମନ୍ଦିର ନିକଟରେ ଥିବା କାନ୍ଥ ଭୁଶୁଡି ୯ ଶିଶୁଙ୍କ ମୃତ୍ଯୁ। ଏହି ଘଟଣାରେ କିଛି ଶିଶୁ ଆହତ ହୋଇଥିବା ସୂଚନା ମିଳିଛି। ଏକ ଧାର୍ମିକ ଉତ୍ସବ ଚାଲିଥିବାବେଳେ କାନ୍ଥ ଭୁଶୁଡ଼ି ଯିବାରୁ ଏହି ଅଘଟଣ ଘଟିଥିଲା। ଶାହାପୁରର ହରଦୌଲ ବାବା ମନ୍ଦିର ନିକଟରେ ଘଟିଥିଲା ଅଘଟଣ। ଆହତ ଶିଶୁଙ୍କୁ ସ୍ଥାନୀୟ ହସ୍ପିଟାଲରେ ଭର୍ତ୍ତି କରାଯାଇଛି।
ମୃତ ଶିଶୁଙ୍କ ବୟସ ୧୦ରୁ ୧୫ ବର୍ଷ ମଧ୍ଯରେ ଥିବା ସୂଚନା ମିଳିଛି। ଘଟଣାସ୍ଥଳରେ ଉଦ୍ଧାର କାର୍ଯ୍ୟ ଜାରି ରହିଛି। ଉଦ୍ଧାର କାର୍ଯ୍ଯରେ ସାମିଲ ହୋଇଛନ୍ତି ସ୍ଥାନୀୟ ଲୋକ। ମୁଖ୍ଯମନ୍ତ୍ରୀ ମୋହନ ଯାଦବ ଏହି ଘଟଣାରେ ଶୋକ ପ୍ରକାଶ କରିଛନ୍ତି। ମୃତ ଶିଶୁଙ୍କ ପରିବାରକୁ ୪ ଲକ୍ଷ ଲେଖାଏ ଟଙ୍କା ସହାୟତା ଦେବାକୁ ସେ ଘୋଷଣା କରିଛନ୍ତି। କିଛି ଦିନ ତଳେ ରେୱା ଜିଲ୍ଲାରେ କାନ୍ଥ ଭୁଶୁଡି ପ୍ରାଣ ହରାଇଥିଲେ ୪ ଶିଶୁ। ଏକ ସ୍କୁଲର କାନ୍ଥ ଭୁଶୁଡିଯିବାରୁ ପ୍ରାଣ ହରାଇଥିଲେ ୫ରୁ ୭ ବର୍ଷ ବୟସର ୪ ଶିଶୁ। ଚଳିତ ବର୍ଷ ବର୍ଷାଜନିତ କାନ୍ଥ ଭୁଶୁଡି ୨୦୦ରୁ ଅଧିକ ଲୋକଙ୍କ ମୃତ୍ଯୁ ଘଟିଲାଣି।
ଆମେରିକାର ନିଜ ନାଗରିକଙ୍କୁ ଅପିଲ,ଉଧାରରେ ଟିକେଟ୍ କରି ଲେବାନନ ଛାଡ଼
ନୂଆଦିଲ୍ଲୀ : ମିଡିଲ ଇଷ୍ଟର ଏବେ ବି ଜାରି ରହିଛି ଯୁଦ୍ଧ ଉତ୍ତେଜନା । ମହାଯୁଦ୍ଧ ଭୟରେ ଥରୁଛି ଦୁନିଆ । ଏହା ମଧ୍ୟରେ ବ୍ରିଟେନରେ ଜାରି ହେଲା ହାଇ ଆଲର୍ଟ । ଇସ୍ରାଏଲ ଏବଂ ହମାସ ଯୁଦ୍ଧରେ ନେଇ ଅନେକ ଦେଶ ଧ୍ୱଂସ ହୋଇଗଲାଣି । ଏହା ମଧ୍ୟରେ ଲେବାନନରୁ ଆରମ୍ଭ କରି ଇରାନ ପର୍ଯ୍ୟନ୍ତ ଯୁଦ୍ଧର ଗତି ବଢିବାରେ ଲାଗିଛି । ଏହି ପରିସ୍ଥିତିକୁ ଦୃଷ୍ଟିରେ ରଖି ଲେବାନାନର ରାଜଧାନୀ ବେରୁଟରେ ଥିବା ଆମେରିକା ଦୂତାବାସ ନିଜ ନାଗରିକମାନଙ୍କୁ ଯେକୌଣସୀ ଉପଲବ୍ଧ ଟିକଟରେ ଯଥାଶୀଘ୍ର ଲେବାନନ ଛାଡିବାକୁ ପରାମର୍ଶ ଦେଇଛି।
ଆମେରିକାର ଦୂତାବାସ ଏହାର ନାଗରିକମାନଙ୍କୁ ଦେଇଥିବା ପରାମର୍ଶରେ କହିଛି ଯେ ଯୁଦ୍ଧ କାରଣରୁ ଅନେକ ବିମାନରେ ଉଡ଼ାଣ ସ୍ଥଗିତ ରଖିଛି ଏବଂ ଅନେକ ବିମାନର ଟିକେଟ ବିକ୍ରି ହୋଇସାରିଛି। ତେବେ, ଲିବାନାନ ଛାଡିବାକୁ ବ୍ୟବସାୟିକ ପରିବହନ ବିମାନର ହିଁ ଏବେ ଉପଲବ୍ଧ ରହିଛି | ବେରୁତ-ରାଫିକ୍ ହରିରି ଅନ୍ତର୍ଜାତୀୟ ବିମାନବନ୍ଦରରେ ଉପଲବ୍ଧ ବିମାନ ବିକଳ୍ପଗୁଡିକରେ ଯଥା ଶୀଘ୍ର ଲେବାନନ ଛାଡ଼ିବାକୁ ସେ ପରାମର୍ଶ ଦେଇଛନ୍ତି ।
ସୂଚନା ରହିଛି ଯେ, ଏହା ପୂର୍ବରୁ ବିଦେଶ ମନ୍ତ୍ରୀ ଡେବିଡ୍ ଲୌମୀ ବିଟ୍ରେନରେ ଏହି ପରି ଚେତାବନୀ ଜାରି କରିଥିଲେ । ବୁଧବାର ଦିନ ତେହେରାନରେ ହାମାସ ନେତା ଇସମାଇଲ ହାନିଆଙ୍କ ହତ୍ୟା ପରେ ଇରାନ ଇସ୍ରାଏଲ ଠାରୁ ପ୍ରତିଶୋଧ ନେବାକୁ କହିଛି।
କୋର୍ବା-ବିଶାଖପାଟଣା ଏକ୍ସପ୍ରେସରେ ଅଗ୍ନିକାଣ୍ଡ, ସମସ୍ତ ଯାତ୍ରୀ ସୁରକ୍ଷିତ ଉଦ୍ଧାର
ବିଶାଖପାଟଣା : କୋର୍ବା-ବିଶାଖପାଟଣା ଏକ୍ସପ୍ରେସରେ ଅଗ୍ନିକାଣ୍ଡ। ଏକ୍ସପ୍ରେସର ୩ଟି ଏସି କୋଚରେ ଘଟିଛି ଅଗ୍ନିକାଣ୍ଡ। ବିଶାଖପାଟଣା ରେଳ ଷ୍ଟେସନରେ ଟ୍ରେନ ପହଞ୍ଚିବା ମାତ୍ରେ ଘଟିଥିଲା ଅଗ୍ନିକାଣ୍ଡ। ପ୍ରଥମ ଏ-୧ କୋଚରୁ ନିଆଁ ବାହାରି ଅନ୍ଯ ବଗିକୁ ବ୍ଯାପିଯାଇଥିଲା। ପରେ ପରେ ଅନ୍ଯ ତିନି ବଗିକୁ ନିଆଁ ବ୍ଯାପିଥିଲା। ଘଟଣାସ୍ଥଳରେ ନିଆଁଲିଭା କାର୍ଯ୍ୟ ଜାରି ରହିଛି। ସମସ୍ତ ଯାତ୍ରୀଙ୍କୁ ସରୁକ୍ଷିତ ଉଦ୍ଧାର କରାଯାଇଛି। କୋର୍ବାଠାରୁ ଆସିଥିବା ଟ୍ରେନ ତିରୁପତି ଯିବାର ଥିଲା।
ନିଟ୍ ପେପର ଲିକ୍ ମାମଲାରେ ଆଉ ଜଣେ ଗିରଫ
ନୂଆଦିଲ୍ଲୀ : ନିଟ୍ ପେପର୍ ଲିକ୍ ମାମଲାରେ ଦିନକୁ ଦିନ ଧରା ପଡୁଛନ୍ତି ଜଣକ ପରେ ଜଣେ ଅଭିଯୁକ୍ତ। ଏହି ମାମଲାରେ ଏବେ ସିବିଆଇ ଆଉ ଜଣେ ବ୍ୟକ୍ତିଙ୍କୁ ଗିରଫ କରିଛି। ଉକ୍ତ ବ୍ୟକ୍ତି ଜଣକ ହେଉଛନ୍ତି ଜଣେ ସଲଭର୍ ତଥା ସମାଧାନକାରୀ। ଶନିବାର ସିବିଆଇ ଭିଲଓ୍ୱାଡା ସ୍ଥିତ ମେଡିକାଲ କଲେଜରେ ଏମ୍ବିବିଏସ୍ ପଢ଼ୁଥିବା ସନ୍ଦୀପକୁ ପଚରାଉଚରା କରିଥିଲା। ଏହା ପରେ ତାଙ୍କୁ ଗିରଫ କରାଯାଇ ସ୍ୱତନ୍ତ୍ର କୋର୍ଟରେ ହାଜର କରାଯାଇଥିଲା। ଏଠାରେ କୋର୍ଟ ସନ୍ଦୀପଙ୍କୁ ୫ ଦିନ ପାଇଁ ସିବିଆଇ ରିମାଣ୍ଡରେ ପଠାଇଛନ୍ତି।
ସନ୍ଦୀପଙ୍କ ପୂର୍ବରୁ ସିବିଆଇ ରାଜସ୍ଥାନରୁ କୁମାର ମଙ୍ଗଲମ ବିଷ୍ଣୁ ଏବଂ ଦୀପେନ୍ଦ୍ର ଶର୍ମାଙ୍କୁ ଗିରଫ କରିଥିଲା।ବର୍ତ୍ତମାନ ସୁଦ୍ଧା ଏହି ମାମଲାରେ ପାଟନା AIIMS ର ଚାରିଜଣ ଛାତ୍ରଙ୍କ ସମେତ ସମାଧାନକାରୀ ଭାବରେ କାର୍ଯ୍ୟ କରିଥିବା ମୋଟ ୯ଜଣ ଡାକ୍ତରୀ ଛାତ୍ରଙ୍କୁ ଗିରଫ କରିଛି।ନିଟ୍ ପେପର୍ ଲିକ୍ ମାମଲାରେ ଗୁରୁବାର ସିବିଆଇ ଚାର୍ଜସିଟ୍ ଦାଖଲ କରିଥିଲା। ଏହି ଚାର୍ଜସିଟରେ ୧୩ ଜଣଙ୍କ ନାଁ ଦେଇଛି ସିବିଆଇ। ଚାରିଜଣ ପ୍ରାର୍ଥୀ, ଜଣେ ଜୁନିୟର ଇଞ୍ଜିନିୟର ଏବଂ ଦୁଇ କିଙ୍ଗପିନଙ୍କ ନାମ ରହିଛି। ଏହି ଘଟଣାରେ କିଛି ଛାତ୍ରଙ୍କ ବାପା-ମା’ଙ୍କ ନାମ ମଧ୍ୟ ସାମିଲ ଅଛି।
‘ସାରେଗାମା ଓଡ଼ିଆ‘ର ଶୁଭାରମ୍ଭ : ଓଡ଼ିଆ ସଙ୍ଗୀତ ପ୍ରେମୀଙ୍କ ପାଇଁ ହେବ ‘ୱାନ୍ ଷ୍ଟପ୍ ଡେଷ୍ଟିନେସନ’
ଭୁବନେଶ୍ୱର : ଭୁବନେଶ୍ୱର ମେଫେୟାର ହୋଟେଲରେ ଭାରତର ପ୍ରତିଷ୍ଠିତ ମ୍ୟୁଜିକ ଲେବଲ୍ ସାରେଗାମା ପକ୍ଷରୁ ଏକ ନୂଆ ଓଡ଼ିଆ ୟୁଟ୍ୟୁବ୍ ଚ୍ୟାନେଲ “ସାରେଗାମା ଓଡ଼ିଆ”ର ଶୁଭାରମ୍ଭ ହୋଇଯାଇଛି ।ଏହି ନୂଆ ଓଡ଼ିଆ ଚ୍ୟାନେଲ ଦ୍ବାରା ବିବିଧ କ୍ଷେତ୍ରରେ ସଙ୍ଗୀତର ଆବଶ୍ୟକତାକୁ ପୂରଣ କରାଯାଇପାରିବ। ‘ସାରେଗାମା ଓଡ଼ିଆ’ରେ ବିବିଧ, ମନଲୋଭା ଏବଂ ଆକର୍ଷଣୀୟ ସଙ୍ଗୀତ ବିଷୟବସ୍ତୁ ସ୍ଥାନ ପାଇବ । ଯେଉଁଥିରେ ଓଡ଼ିଆ ସଙ୍ଗୀତର ଅପାର ପ୍ରତିଭା ଓ ଐତିହାସିକ ଐତିହ୍ୟ ପ୍ରଦର୍ଶିତ ହେବ। ଏହି ଚ୍ୟାନେଲରେ ରୁଚି ଅନୁଯାୟୀ ପାରମ୍ପରିକ ଲୋକଗୀତ ଠାରୁ ଆରମ୍ଭ କରି ଆଧୁନିକ ଗୀତକୁ ନେଇ ସଙ୍ଗୀତ ପରିବେଷଣ କରାଯିବ। ଓଡ଼ିଶା ବଜାରରେ ପ୍ରବେଶ କରି, ସାରେଗାମା ନୂତନ ସଙ୍ଗୀତ ସହ ଓଡ଼ିଶାରେ ନିଜର ଏକ ଦୃଢ଼ ଉପସ୍ଥିତି ସୃଷ୍ଟି କରି ଦର୍ଶକଙ୍କ ଆବଶ୍ୟକତା ପୂରଣ କରିବାକୁ ଲକ୍ଷ୍ୟ ରଖିଛି। ଏହି ଚ୍ୟାନେଲର ଶୁଭାରମ୍ଭରେ ଓଡ଼ିଶାର କେତେକ ଆକର୍ଷଣୀୟ ଗୀତମାନ ପ୍ରଦର୍ଶିତ କରାଯାଇଥିଲା।
ପ୍ଯାରିସ ଅଲିମ୍ପିକ୍ସରେ ଦମଦାର ହେବ ଟକ୍କର, କ୍ଵାର୍ଟର ଫାଇନାଲରେ ଗ୍ରେଟବ୍ରିଟେନକୁ ଭେଟିବ ଭାରତ
ନୂଆଦିଲ୍ଲୀ : ପ୍ଯାରିସ୍ ଅଲିମ୍ପିକସ କ୍ଵାର୍ଟର ଫାଇନାଲରେ ଆଜି ଭାରତ ଇଂଲଣ୍ଡ ଟକ୍କର। ଅଲିମ୍ପିକ୍ସରେ ସ୍ୱର୍ଣ୍ଣ ଜିତିବା ଲକ୍ଷ୍ୟ ରଖିଛି ଭାରତ। ଭାରତୀୟ ହକି ଟିମ କ୍ୱାର୍ଟର ଫାଇନାଲରେ ଗ୍ରେଟ ବ୍ରିଟେନକୁ ଭେଟିବ। ମଧ୍ୟାହ୍ନ ସାଢେ ୧ଟାରେ ସମୟରେ ଖେଲାଯିବ ଏହି ମ୍ୟାଚ। ଭାରତ ଶେଷ ଗ୍ରୁପ ପର୍ଯ୍ୟାୟରେ ଅଷ୍ଟ୍ରେଲିଆକୁ ୩-୨ ଗୋଲରେ ହରାଇଥିଲା। ଏହି ବିଜୟ ପରେ ଭାରତ ଗ୍ରୁପ ବିର ଦ୍ୱିତୀୟ ସ୍ଥାନରେ ନିଜର ଅଭିଯାନ ଶେଷ କରିଛି। ବେଲଜିୟମ ୧ନଂ ସ୍ଥାନରେ ରହିଥିବା ବେଳେ ଅଷ୍ଟ୍ରେଲିଆ ତୃତୀୟ ଓ ଆର୍ଜେଣ୍ଟିନା ଗ୍ରୁପ ବିରୁ ୪ର୍ଥ ଦଳ ଭାବେ କ୍ୱାର୍ଟର ଫାଇନାଲରେ ପ୍ରବେଶ କରିଛି।
ଗ୍ରୁପ ଏରୁ ଜର୍ମାନୀ, ନେଦରଲ୍ୟାଣ୍ଡ୍ସ, ଗ୍ରେଟ ବ୍ରିଟେନ ଓ ସ୍ପେନ କ୍ୱାର୍ଟରକୁ ଯୋଗ୍ୟତା ଅର୍ଜନ କରିଛନ୍ତି। ବେଲଜିୟମ କ୍ୱାର୍ଟର ଫାଇନାଲରେ ସ୍ପେନକୁ ଭେଟିବାକୁ ଥିବା ବେଳେ ଭାରତ ସହ ଗ୍ରେଟ ବ୍ରିଟେନର ଲଢ଼େଇ ହେବ। ସେହିପରି ନେଦରଲ୍ୟାଣ୍ଡ୍ସର ମୁକାବିଲା ଅଷ୍ଟ୍ରେଲିଆ ସହ ଓ ଜର୍ମାନୀ ଗ୍ରୁପ ବିର ୪ର୍ଥ ଦଳ ଆର୍ଜେଣ୍ଟିନାକୁ ଭେଟିବ।ଦୀର୍ଘ ୫୨ ବର୍ଷ ପରେ ଅଲିମ୍ପିକ୍ସରେ ଭାରତୀୟ ହକି ଟିମ ଅଷ୍ଟ୍ରେଲିଆକୁ ଶୁକ୍ରବାର ହରାଇଥିଲା। ଏହି ବିଜୟ ସହ ଦଳର ମନୋବଳ ଦୃଢ଼ ରହିଛି। ତେଣୁ ଦଳ ଆଜି ଦମଦାର ପ୍ରଦର୍ଶନ କରିବ ବୋଲି ସମସ୍ତେ ଆଶା କରିଛନ୍ତି। ଗ୍ରେଟ ବ୍ରିଟେନ ତା’ର ଶେଷ ଗ୍ରୁପ ପର୍ଯ୍ୟାୟ ମ୍ୟାଚରେ ଜର୍ମାନୀ ଠାରୁ ୦-୨ ଗୋଲରେ ପରାସ୍ତ ହୋଇଛି।
ଭାରତ ତା’ର ଅଲିମ୍ପିକ୍ସ ଅଭିଯାନ ନ୍ୟୁଜିଲ୍ୟାଣ୍ଡ ବିପକ୍ଷ ୩-୨ ଗୋଲ ବିଜୟରୁ ଆରମ୍ଭ କରିଥିଲା। ଏହାପରେ ଦଳ ଆର୍ଜେଣ୍ଟିନା ସହ ମ୍ୟାଚ୍କୁ ୧-୧ରେ ଡ୍ର ରଖିଥିଲା। ତୃତୀୟ ମ୍ୟାଚ୍ରେ ଭାରତୀୟ ଟିମ ଅପେକ୍ଷାକୃତ ଦୁର୍ବଳ ଆୟର୍ଲ୍ୟାଣ୍ଡକୁ ୨-୦ ଗୋଲରେ ମାତ ଦେଇଥିଲା। କିନ୍ତୁ ୪ର୍ଥ ମ୍ୟାଚ୍ରେ ଶକ୍ତିଶାଳୀ ବେଲଜିୟମ ସହ କଡ଼ା ସଂଘର୍ଷ କରି ୧-୨ରେ ହାରି ଯାଇଥିଲା। କିନ୍ତୁ ଶେଷ ମ୍ୟାଚରେ ବିଶ୍ୱର ଅନ୍ୟତମ ଶକ୍ତିଶାଳୀ ଦଳ ଅଷ୍ଟ୍ରେଲିଆକୁ ହରମନପ୍ରୀତ ସିଂହଙ୍କ ଭାରତୀୟ ଟିମ ୩-୨ରେ ହରାଇ ଇତିହାସ ସୃଷ୍ଟି କରିଥିଲା।
ଉତ୍ତରପ୍ରଦେଶ ଇଟାୱାରେ ମର୍ମନ୍ତୁଦ ସଡ଼କ ଦୁର୍ଘଟଣା ; ୭ ଜଣଙ୍କ ମୃତ୍ଯୁ
ଲକ୍ଷ୍ନୌ : ଉତ୍ତରପ୍ରଦେଶ ଇଟାୱାରେ ମର୍ମନ୍ତୁଦ ସଡ଼କ ଦୁର୍ଘଟଣା। କାରକୁ ଧକ୍କା ଦେଲା ବସ। ଏଥିରେ ୭ ଜଣଙ୍କ ମୃତ୍ଯୁ ଘଟିଛି। ଇଟାୱା ନିକଟରେ ଘଟିଛି ଏହି ଦୁର୍ଘଟଣା। ୨୫ରୁ ଅଧିକ ଯାତ୍ରୀ ଗୁରୁତର ଆହତ ହୋଇଛନ୍ତି।
ରାଏବରେଲିରୁ ଦିଲ୍ଲୀ ଯାଉଥିବା ଏକ ଡବଲ ଡେକର ବସ୍ କାରକୁ ଧକ୍କା ଦେଇଥିଲା। ଆଗ୍ରା ଲକ୍ଷ୍ନୌ ଏକ୍ସପ୍ରେସ ୱେରେ କାରଟି ଡିଭାଇଡରକୁ ଧକ୍କା ଦେଇ ରଙ୍ଗ ରୁଟକୁ ଚାଲିଆସିଥିଲା। ଏହାପରେ ବସ ସହ ମୁହାଁମୁହିଁ ଧକ୍କା ହୋଇଥିଲା। ଫଳରେ ବସଟି ରାସ୍ତାର ୨୦ ଫୁଟ ତଳକୁ ଖସି ପଡିଥିଲା। ବସର ୪ ଜଣ ଯାତ୍ରୀଙ୍କ ମୃତ୍ଯୁ ଘଟିଥିବାବେଳେ କାରରେ ଥିବା ୩ ଜଣ ଯାତ୍ରୀଙ୍କ ମୃତ୍ଯୁ ଘଟିଛି। ଘଟଣାସ୍ଥଳରେ ଇଟାଓା ଏସପି ପହଞ୍ଚି ତଦନ୍ତ ଆରମ୍ଭ କରିଛି।