ନୂଆଦିଲ୍ଲୀ: ପୂର୍ବତନ ବୈଦେଶିକ ମନ୍ତ୍ରୀ କେ. ନଟୱର ସିଂଙ୍କ ଦେହାନ୍ତ । ଗୁରଗ୍ରାମ୍‌ର ଏକ ଘରୋଇ ହସ୍ପିଟାଲରେ ସେ ଶେଷ ନିଶ୍ୱାସ ତ୍ୟାଗ କରିଛନ୍ତି। ମନମୋହନ ସିଂହ ସରକାରରେ ସେ କ୍ୟାବିନେଟ ମନ୍ତ୍ରୀ ଥିଲେ ନଟୱର ସିଂ। ମୃତ୍ୟୁ ବେଳକୁ ତାଙ୍କୁ ୯୫ ବର୍ଷ ବୟସ ହୋଇଥିଲା। ତାଙ୍କ ପରିବାର ପକ୍ଷରୁ ଏହି ସୂଚନା ପ୍ରଦାନ କରାଯାଇଛି।

ଆଜି ଦିଲ୍ଲୀରେ ତାଙ୍କର ଅନ୍ତିମ ସଂସ୍କାର ଅନୁଷ୍ଠିତ ହେବ ବୋଲି ପରିବାର ପକ୍ଷରୁ ସୂଚନା ମିଳିଛି। ନଟୱର ସିଂଙ୍କ ସମ୍ପୂର୍ଣ୍ଣ ନାମ କୁୱଁର ନଟୱର ସିଂ। ପୂର୍ବତନ କଂଗ୍ରେସ ସାଂସଦ ତଥା ରାଜ୍ୟସଭା ସଦସ୍ୟ ନଟୱର ସିଂ ୨୦୦୪-୦୫ ମସିହାରେ ତତ୍କାଳୀନ ପ୍ରଧାନମନ୍ତ୍ରୀ ମନମୋହନ ସିଂଙ୍କ ୟୁପିଏ ସରକାରରେ ଭାରତର ବୈଦେଶିକ ବ୍ୟାପାର ମନ୍ତ୍ରୀ ଥିଲେ।

ସେ ୧୯୬୬ରୁ ୧୯୭୧ ପର୍ଯ୍ୟନ୍ତ ପ୍ରଧାନମନ୍ତ୍ରୀ ଇନ୍ଦିରା ଗାନ୍ଧୀଙ୍କ କାର୍ଯ୍ୟାଳୟ ସହିତ ଜଡିତ ଥିଲେ। ଏହି ଘଟଣାରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ସମେତ ଅନେକ ବରିଷ୍ଠ ନେତା ମନ୍ତ୍ରୀ ଦୁଃଖ ପ୍ରକାଶ କରିଛନ୍ତି। ବରିଷ୍ଠ କଂଗ୍ରେସ ନେତା ରଣଦୀପ ସୁରଜେୱାଲା ନଟୱର ସିଂଙ୍କ ଦେହାନ୍ତରେ ଦୁଃଖ ପ୍ରକାଶ କରିଛନ୍ତି।

କୂଟନୀତିଜ୍ଞଙ୍କ ଠାରୁ ରାଜନେତା ପର୍ଯ୍ୟନ୍ତ ଯାତ୍ରା: ନଟୱର ସିଂ ଜଣେ ଭାରତୀୟ କୂଟନୀତିଜ୍ଞ ତଥା ଦକ୍ଷ ରାଜନେତା ଥିଲେ । ସେ ୧୯୫୩ରେ ଭାରତୀୟ ବୈଦେଶିକ ସେବାରେ ଯୋଗ ଦେଇଥିଲେ । ୟୁନିସେଫର କାର୍ଯ୍ୟନିର୍ବାହୀ ବୋର୍ଡରେ ଭାରତର ପ୍ରତିନିଧି ଭାବରେ କାର୍ଯ୍ୟ କରିଥିଲେ । ୧୯୬୩ରୁ ୧୯୬୬ ମଧ୍ୟରେ ମିଳିତ ଜାତିସଂଘର ଅନେକ କମିଟିରେ କାର୍ଯ୍ୟ କରିଥିଲେ । ୧୯୬୬ ମସିହାରେ ଇନ୍ଦିରା ଗାନ୍ଧୀଙ୍କ ଶାସନ ସମୟରେ ତାଙ୍କୁ ପ୍ରଧାନମନ୍ତ୍ରୀଙ୍କ ସଚିବାଳୟରେ ନିୟୋଜିତ କରାଯାଇଥିଲା । ୧୯୭୧ରୁ ୧୯୭୩ ପର୍ଯ୍ୟନ୍ତ ପୋଲାଣ୍ଡଓ ୧୯୮୦ରୁ ୧୯୮୨ ପର୍ଯ୍ୟନ୍ତପାକିସ୍ତାନରେ ଭାରତର ରାଷ୍ଟ୍ରଦୂତ ଭାବରେ କାର୍ଯ୍ୟ କରିଥିଲେ ନଟୱର ସିଂ । ବୈଦେଶିକ ବ୍ୟାପାର ମନ୍ତ୍ରଣାଳୟରେ ମଧ୍ୟ ସେ ସଚିବ ରହିଥିଲେ । ୧୯୮୪ ମସିହାରେ ନଟୱର ସିଂଙ୍କୁ ପଦ୍ମ ଭୂଷଣ ପୁରସ୍କାରରେ ସମ୍ମାନିତ କରାଯାଇଥିଲା ।

ମନମୋହନ ସିଂ ସରକାରରେ ନଟୱର କ୍ୟାବିନେଟ ମନ୍ତ୍ରୀ ଥିଲେ:୧୯୮୪ରେ ସେ ସରକାରୀ ଚାକିରି ଛାଡି କଂଗ୍ରେସର ହାତ ଧରିଥିଲେ । ରାଜସ୍ଥାନର ଭରତପୁର ନିର୍ବାଚନମଣ୍ଡଳୀରୁ ଏମପି ଭାବେ ଲୋକସଭାକୁ ନିର୍ବାଚିତ ହୋଇଥିଲେ । ୧୯୮୫ରେ, ସେ କେନ୍ଦ୍ର ରାଷ୍ଟ୍ରମନ୍ତ୍ରୀ ଭାବେ ଶପଥ ନେଇଥିଲେ । ୧୯୮୬ରେ ସେ ବୈଦେଶିକ ରାଷ୍ଟ୍ରମନ୍ତ୍ରୀ ହୋଇଥିଲେ । ୧୯୯୧ରେ ସେ କଂଗ୍ରେସ ହାତ ଛାଡି ଅଲ ଇଣ୍ଡିଆ ଇନ୍ଦିରା କଂଗ୍ରେସ ଦଳ ଗଠନ କରିଥିଲେ । ପୁଣି ୧୯୯୮ରେ ସେ କଂଗ୍ରେସକୁ ଫେରିଥିଲେ । ୧୯୯୮ରେ ସାଧାରଣ ନିର୍ବାଚନ ଲଢି ଭରତପୁରରୁ ସାଂସଦ ଭାବେ ନିର୍ବାଚିତ ହୋଇଥିଲେ । ୨୦୦୨ରେ ସେ ରାଜ୍ୟସବାକୁ ନିର୍ବାଚିତ ହୋଇଥିଲେ । ୨୦୦୪ରେ ମନମୋହନ ସିଂ ତାଙ୍କୁ ବୈଦେଶିକ ବ୍ୟାପାର ମନ୍ତ୍ରୀ ଭାବରେ ନିଯୁକ୍ତ କରିଥିଲେ ।

ନିଜ ଲେଖନି ପୁସ୍ତକକୁ ନେଇ ଥିଲେ ଚର୍ଚ୍ଚାରେ: ଭାରତୀୟ ବୈଦେଶିକ ନୀତିରେ ନଟଓ୍ବର ସିଂଙ୍କ ଗଭୀର ଛାପ ଛାଡିଛନ୍ତି । ସେ ନେହେରୁ-ଗାନ୍ଧୀ ପରିବାରର ଘନିଷ୍ଠ ଥିଲେ । ଲେଖାଲେଖି ପ୍ରତି ନଟଓ୍ବର ବେଶ ଆଗ୍ରହୀ ଥିଲେ । ଏଥିପାଇଁ ସେ ନିଜକୁ ଜଣେ ଭଲ ଲେଖକ ଭାବେ ମଧ୍ୟ ପରିଚିତ କରାଇଥିଲେ । ସେ ଅନେକ ପୁସ୍ତକ ଲେଖିଛନ୍ତି, ତାଙ୍କ ଆତ୍ମଜୀବନୀ ‘ଓ୍ବାନ ଲାଇଫ ଇଜ ନଟ୍‌ ଏନଫ’ ପୁସ୍ତକକୁ ନେଇ ବିବାଦରେ ଥିଲେ ।