ଚେନ୍ନାଇ: ଆଇପିଏଲରେ ଆଜି ଖେଳାଯିବ ଦ୍ବିତୀୟ କ୍ବାଲିଫାୟାର ମ୍ୟାଚ । ମୁହାଁମୁହିଁ ହେବେ ରାଜସ୍ଥାନ ରୟାଲ୍ସ ଓ ସନରାଇଜର୍ସ ହାଇଦ୍ରାବାଦ । ଚେନ୍ନାଇରେ ସଂଧ୍ଯା ୭ଟା ୩୦ରେ ଖେଳାଯିବ ମ୍ଯାଚ । ଏଲିମିନେଟରରେ ରୟାଲ ଚାଲେଞ୍ଜର୍ସ ବେଙ୍ଗଲୁରୁକୁ ହରାଇ କ୍ବାଲିଫାଇ କରିଛି ରାଜସ୍ଥାନ ।
ବୁଧବାର ଖେଳାଯାଇଥିବା ଏଲିମିନେଟରରେ ୪ ୱିକେଟରେ ହରାଇ ଆରସିବିର ଆଇପିଏଲ କପ ଆଶାକୁ ଧୂଳିସାତ କରିଛି ରାଜସ୍ଥାନ । ପ୍ରଥମ କ୍ଲାଲିଫାୟାରରେ ହାଇଦ୍ରାବାଦକୁ ହରାଇ ଫାଇନଲରେ ପ୍ରବେଶ କରିଛି କୋଲକାତା ନାଇଟ ରାଇଡର୍ସ । ଆଜିର ମ୍ଯାଚରେ ବିଜୟୀ ଦଳ ସହ ରବିବାର ଚେନ୍ନାଇରେ କୋଲକାତାକୁ ଭେଟିବ ।
ଭୁବନେଶ୍ବର: ବଳ ଗୋଟାଉଛି ଲଘୁଚାପ । ଆଜି ଅଧିକ ଘନୀଭୂତ ହୋଇ ଅବପାତରେ ପରିଣତ ହେବ । ପରେ ଉତ୍ତର ପୂର୍ବ ଦିଗକୁ ଗତି କରିବା ସହ ତୀବ୍ରତା ବଢିବା ସହ ଆସନ୍ତାକାଲି ସୁଦ୍ଧା ପୂର୍ବ କେନ୍ଦ୍ରୀୟ ବଙ୍ଗୋପସାଗରରେ ବାତ୍ୟାରେ ପରିଣତ ହେବାର ସମ୍ଭାବନା ରହିଛି । ଏହା ଉତ୍ତର ଦିଗକୁ ଗତି କରିବା ସହ ୨୬ ସନ୍ଧ୍ୟା ସୁଦ୍ଧା ଭୀଷଣ ବାତ୍ୟାର ରୂପ ନେଇ ବାଂଲାଦେଶ ପାର୍ଶ୍ବବର୍ତ୍ତୀ ପଶ୍ଚିମବଙ୍ଗ ଉପକୂଳ ନିକଟରେ ସମୁଦ୍ର ମଧ୍ୟରେ ପହଞ୍ଚିବା ସମ୍ଭାବନା ରହିଛି ।
ରାଜ୍ଯରେ ଏହାର ବିଶେଷ ପ୍ରଭାବ ନଥିଲେ ସୁଦ୍ଧା ରବିବାର ଠାରୁ ଆରମ୍ଭ ହେବ ବର୍ଷା । ସାମୁଦ୍ରିକ ଝଡ଼ ପ୍ରଭାବରେ ସମୁଦ୍ର ଅଶାନ୍ତ ଥିବାରୁ ୨୭ ତାରିଖ ଯାଏଁ ମତ୍ସ୍ଯଜୀବୀଙ୍କୁ ସମୁଦ୍ର ଭିତରକୁ ଯିବାକୁ ବାରଣ କରାଯାଇଛି ।
ବିଶେଷକରି ବାଲେଶ୍ୱର ଭଦ୍ରକ ଓ କେନ୍ଦ୍ରାପଡା ଜିଲ୍ଲାରେ ପ୍ରବଳରୁ ଅତିପ୍ରବଳ ବର୍ଷା ହେବା ସମ୍ଭାବନା ରହିଛି । ସେପଟେ ରାଜ୍ୟରେ ବର୍ତ୍ତମାନ କାଳବୈଶାଖୀ ବର୍ଷା ଜାରି ରହିଛି । ଆଜି ଓ କାଳବୈଶାଖୀ ବର୍ଷାର ପ୍ରଭାବ ରହିବ। ୪୦ ରୁ ୫୦ କିଲୋମିଟର ବେଗରେ ପବନ ବହିବାର ସମ୍ଭାବନା ଥିବା ପାଣିପାଗ କେନ୍ଦ୍ର ଆକଳନ କରିଛି ।
ଭୁବନେଶ୍ବର: ଆସନ୍ତାକାଲି ଓଡ଼ିଶାରେ ତୃତୀୟ ପର୍ଯ୍ୟାୟ ନିର୍ବାଚନ। ଏହି ପର୍ଯ୍ୟାୟରେ ସବୁଠୁ ଚର୍ଚ୍ଚିତ ଆସନରେ ଭୋଟିଂ ହେବ । ୬ଟି ଲୋକସଭା କ୍ଷେତ୍ର ସମ୍ବଲପୁର, କେନ୍ଦୁଝର, ଢ଼େଙ୍କାନାଳ, କଟକ, ପୁରୀ, ଭୁବନେଶ୍ବରରେ ଭୋଟ୍ ଗ୍ରହଣ ହେବ । ଏହି ୬ ଲୋକସଭା ଆସନ ଅନ୍ତର୍ଗତ ୪୨ ବିଧାନସଭା ଆସନରେ ବି ନିର୍ବାଚନ ଅନୁଷ୍ଠିତ ହେବ।
ମୋଟ ୪୪୭ ଜଣ ପ୍ରାର୍ଥୀଙ୍କ ଭାଗ୍ୟ ନିର୍ଦ୍ଧାରଣ କରିବେ ୯୪ ଲକ୍ଷ ୪୮ ହଜାର ଭୋଟର୍ । ପୁରୁଷ ଭୋଟରଙ୍କ ସଂଖ୍ୟା ୪୮ଲକ୍ଷ ୩୦ହଜାର ଥିବାବେଳେ ୪୬ ଲକ୍ଷ ୧୮ ହଜାର ମହିଳା ଭୋଟର ମତଦାନ ସାବ୍ଯସ୍ତ କରିବେ । ଏହି ପର୍ଯ୍ୟାୟରେ ୨୧ ପ୍ରତିଶତ ଯୁବ ଭୋଟର ଥିବାବେଳେ ୩ହଜାର ୮୫ ବର୍ଷରୁ ଅଧିକ ବୟସ୍କ ଭୋଟର ଘରୁ ମତଦାନ କରିଛନ୍ତି । ୬୪ ଜଣ ସାଂସଦ ପ୍ରାର୍ଥୀ ରହିଥିବାବେଳେ ୩୮୩ ବିଧାୟକ ପ୍ରାର୍ଥୀ ମୈଦାନରେ ପରସ୍ପରକୁ ଟକ୍କର ଦେଉଛନ୍ତି ।
ଏହି ପର୍ଯ୍ୟାୟରେ ମୋଟ ବୁଥ୍ ସଂଖ୍ୟା ୧୦ ହଜାର ୫୫୧ । ୨ ହଜାର ମଡେଲ ବୁଥ ରହିଛି । ସୁରକ୍ଷା ପାଇଁ ସର୍ବାଧିକ ୧୨୧ କମ୍ପାନୀ CAPF ମୁତୟନ ହୋଇଛନ୍ତି । ଅନ୍ଧାରୀ ବିଜେ ରୋକିବାକୁ ସାଇଲେଣ୍ଟ ଆୱାର ଆରମ୍ଭ ହେବା କ୍ଷଣି ସବୁ ହୋଟେଲ, ଗେଷ୍ଟ ହାଉସ ଯାଞ୍ଚ ହେବ। ଯେଭଳି କେହି ବାହାର ଲୋକ ରହିବନି । ଖିଲାପ ହେଲେ ଦୃଢ଼ କାର୍ଯ୍ୟାନୁଷ୍ଠାନ ନିଆଯିବ। ସେପଟେ କେନ୍ଦୁଝର ହିଂସା ସମ୍ପର୍କରେ ପ୍ରତିକ୍ରିୟା ରଖି ସିଇଓ କହିଛନ୍ତି, ସେଠାରେ ଅଧିକ ଫୋର୍ସ ମୁତୟନ ହୋଇଛନ୍ତି।
୬ ସଂସଦୀୟ କ୍ଷେତ୍ର ଓ ତତସଂଲଗ୍ନ ବିଧାନସଭା କ୍ଷେତ୍ରରୁ ମୋଟ ୨୬୩.୫୫ କୋଟି ଟଙ୍କାର ସିଜ ହୋଇଛି । ସେହିପରି କେବଳ ୬ଟି ସଂସଦୀୟ କ୍ଷେତ୍ରରୁ ମୋଟ ୧୨ କୋଟି ୨୨ ଲକ୍ଷ ଟଙ୍କା ଜବତ ହୋଇଛି । ସେହିପରି ୧୨ କୋଟି ୮୩ ଲକ୍ଷ ଟଙ୍କାର ମଦ ଜବତ ହୋଇଥିବାବେଳେ ରାଜ୍ଯରେ ମୋଟ ୮୭ କୋଟି ଜବତ ହୋଇଛି । ଭୁବନେଶ୍ୱରରୁ ୯.୬୬କୋଟି ଟଙ୍କା ଜବତ ହୋଇଥିବାବେଳେ ପୁରୀରୁ ୨.୮୨ ଲକ୍ଷ ଟଙ୍କା ଜବତ ହୋଇଛି ।
ବାରିପଦା: ଆଜି ତିନି ଲୋକସଭା କ୍ଷେତ୍ରରେ ହେବ ନବୀନ ଶୋ । ମୟୂରଭଞ୍ଜ, ବାଲେଶ୍ବର ଓ ଯାଜପୁର ଲୋକସଭା କ୍ଷେତ୍ରର ୪ଟି ନିର୍ବାଚନମଣ୍ଡଳିରେ ପ୍ରଚାର କରିବେ ବିଜେଡି ସୁପ୍ରିମୋ ନବୀନ ପଟ୍ଟନାୟକ ।
ସକାଳ ସାଢେ ୧୧ଟାରେ ମୟୂରଭଞ୍ଜ ଲୋକସଭା କ୍ଷେତ୍ରର ରାଇରଙ୍ଗପୁରରେ ବିଶାଳ ଜନସଭାକୁ ନବୀନ ଉଦବୋଧନ ଦେବେ । ଦଳୀୟ ପ୍ରାର୍ଥୀଙ୍କ ପାଇଁ ପ୍ରଚାର କରି ବାରିପଦା ନିର୍ବାଚନମଣ୍ଡଳିରେ କ୍ଯାମ୍ପେନ କରିବେ । ଏହାପରେ ବାଲେଶ୍ବର ଓ ଶେଷରେ ଯାଜପୁର ଲୋକସଭା କ୍ଷେତ୍ରର କୋରେଇ ନିର୍ବାଚନମଣ୍ଡଳିରେ ଭୋଟ ଭିକ୍ଷା କରିବେ ।
ଚତୁର୍ଥ ପର୍ଯ୍ୟାରେ ରାଜ୍ଯର ଏହି ଲୋକସଭା କ୍ଷେତ୍ର ଗୁଡ଼ିକରେ ଜୁନ ଏକ ତାରିଖରେ ନିର୍ବାଚନ ଅନୁଷ୍ଠିତ ହେବ । ନବୀନଙ୍କ ଗସ୍ତକୁ ନେଇ ସବୁଠୁ ଉତ୍ସାହ ଦେଖିବାକୁ ମିଳିଛି ।
ଭୁବନେଶ୍ବର: ଆଠମଲ୍ଲିକ ବିଧାନସଭା ନିର୍ବାଚନ ମଣ୍ଡଳୀରେ ବିଜେପି ପ୍ରଚାରପତ୍ର ସହ ଖେଳ ସାମଗ୍ରୀ ଜବତ ଘଟଣା । ସିଇଓଙ୍କୁ ଫେରାଦ ହେଲା ବିଜେଡି । ବିଜେଡିର ଅଭିଯୋଗ ଅନୁସାରେ, କିଶୋର ନଗର ବ୍ଲକ ପରଶୁମାଳ ଗାଁରେ ଅଚ୍ଯୁତାନନ୍ଦ ସାହୁଙ୍କ ଘରେ ଦୁଇଟି ବ୍ଯାଗକୁ ଲୋକ ଠାବ କରିଥିଲେ । ଅଚ୍ଯୁତାନନ୍ଦ ବିଜେପି ବିଧାୟକ ପ୍ରାର୍ଥୀ ସଞ୍ଜୀବ ସାହୁଙ୍କ ଅତ୍ଯନ୍ତ ଘନିଷ୍ଠ । ଦୁଇଟି ବ୍ଯାଗରୁ ଗୋଟିଏ ବ୍ଯାଗକୁ ପୋଲିସ ଜବତ କରିଛି । ସେଥିରେ ଖେଳ ସାମଗ୍ରୀ ରହିଥିଲା । ଏହାକୁ ଯୁବକଙ୍କୁ ବାଣ୍ଟି ବିଜେପିକୁ ଭୋଟ ହାସଲ କରିବାକୁ ଉଦ୍ଯମ କରୁଥିଲା । ଅନ୍ଯ ଗୋଟିଏ ବ୍ଯାଗ ଜବତ ହୋଇପାରନି । ସେଥିରେ ବିପୁଳ ଟଙ୍କା ଥିବା ସନ୍ଦେହ କରାଯାଉଛି । ଏଣୁ ତୁରନ୍ତ ତଦନ୍ତ କରି କାର୍ଯ୍ୟାନୁଷ୍ଠାନ ପାଇଁ ଦାବି କରିଛି ବିଜେଡି ।
ସମ୍ବଲପୁର: ମହାନଦୀ ଓଡ଼ିଶାର ଲାଇଫଲାଇନ । ହେଲେ ମହାନଦୀ ସମସ୍ଯାକୁ ବରାଦିଆ କହିଲେ ଧର୍ମେନ୍ଦ୍ର ପ୍ରଧାନ । ସାମ୍ବାଦିକଙ୍କ ପ୍ରଶ୍ନର ଉତ୍ତର ଦେଇ ନପାରି ଏଡାଇ ଚାଲିଗଲେ ।
ସମ୍ବଲପୁରରେ ବିଜେପିର ସାମ୍ବାଦିକ ସମ୍ମିଳନୀ ଅବସରରେ ମହାନଦୀ ପ୍ରସଙ୍ଗକୁ ନେଇ ସାମ୍ବାଦିକ ଧର୍ମେନ୍ଦ୍ରଙ୍କୁ ପ୍ରଶ୍ନ କରିଥିଲେ । ହେଲେ ଧର୍ମେନ୍ଦ୍ର ଉତ୍ତର ଦେଇପାରି ନଥିଲେ । ସାମ୍ବାଦିକଙ୍କ ପ୍ରଶ୍ନରେ ତାଙ୍କ ପାଟି ଖନି ମାରି ଯାଇଥିଲା । ଯାହାକୁ ନେଇ ସବୁ ମହଲରେ ଚର୍ଚ୍ଚା ଜୋର ଧରିଛି । ରାଜ୍ଯ ସରକାର ମହାନଦୀ ପ୍ରସଙ୍ଗରେ ନ୍ଯାୟ ପାଇବାକୁ ଖୁବ ଧାଁ ଧଉଡ କରିଛନ୍ତି । କିନ୍ତୁ ବିଜେପି କେବଳ ରାଜନୀତି ହିଁ କରିଆସିଛି । ମହାନଦୀକୁ ଶୁଖାଇ ଚାଷୀଙ୍କୁ ହଇରାଣ କରିବାକୁ ଯୋଜନା କରିଥିଲେ ଓଡ଼ିଶାର ବିଜେପି ନେତା । କେନ୍ଦ୍ରର ବିଜେପି ସରକାର ଆଉ ଛତିଶଗଡ଼ ସରକାର ମିଶି ଓଡ଼ିଶା ବିରୋଧରେ ଲଢେଇ କରିଥିଲେ । କିପରି ଭାବେ ଟ୍ରିବ୍ଯୁନାଲ ଗଠନ ନହୋଇପାରିବ ସେଥିପାଇଁ ସୁପ୍ରିମକୋର୍ଟରେ ଷଡ଼ଯନ୍ତ୍ର କରିଥିଲେ । ଏଥିରେ ଓଡିଆ କେନ୍ଦ୍ରମନ୍ତ୍ରୀ ତଥା ବିଜେପିର ସମ୍ବଲପୁର ଲୋକସଭା ପ୍ରାର୍ଥୀ ଧର୍ମେନ୍ଦ୍ର ପ୍ରଧାନ ସମର୍ଥନ କରିଥିଲେ । ହେଲେ ମୁଖ୍ଯମନ୍ତ୍ରୀ ନବୀନ ପଟ୍ଟନାୟକଙ୍କ ଉଦ୍ଯମ ଯୋଗୁଁ ଓଡ଼ିଶା ସୁପ୍ରିମକୋର୍ଟରେ ବିଜୟୀ ହେବା ସହ ଟ୍ରିବ୍ଯୁନାଲ ଗଠନ ହୋଇଛି । ଆଗକୁ ଟ୍ରିବ୍ଯୁନାଲ ମାଧ୍ଯମରେ ଓଡିଶା ନ୍ଯାୟ ପାଇବ ବୋଲି ଆଶା କରିଛି ।
ସମ୍ବଲପୁର: ପୁଣି କେନ୍ଦ୍ରମନ୍ତ୍ରୀ ତଥା ସମ୍ବଲପୁର ସାଂସଦ ପ୍ରାର୍ଥୀ ଧର୍ମେନ୍ଦ୍ର ପ୍ରଧାନଙ୍କୁ ଶାଣିତ ସମାଲୋଚନା କଲେ ପ୍ରଣବ ପ୍ରକାଶ ଦାସ । କହିଲେ- ବାହାର ରାଜ୍ଯର ନେତାଙ୍କ ସହ ମିଶି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ବାବଦରେ ଅପମାନସୂଚକ ମନ୍ତବ୍ୟ ଦେଇଛନ୍ତି ଧର୍ମେନ୍ଦ୍ର । ଓଡ଼ିଶା ସଂସ୍କୃତି ବିରୋଧୀ କହି ଧର୍ମେନ୍ଦ୍ରଙ୍କୁ ଟାର୍ଗେଟ କରିଛନ୍ତି ପ୍ରଣବ ।
ସୋସିଆଲ ମିଡିଆ ଏକ୍ସରେ ପ୍ରଣବ କହିଛନ୍ତି, ୨୪ ବର୍ଷ ହେଲା ସାଢ଼େ ଚାରି କୋଟି ଓଡ଼ିଶାବାସୀ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଆଶୀର୍ବାଦ କରିଆସୁଛନ୍ତି । ଓଡ଼ିଶାବାସୀ ମୁଖ୍ୟମନ୍ତ୍ରୀଙ୍କୁ ଭାରି ଭଲ ପାଆନ୍ତି ଓ ନବୀନ ମଧ୍ଯ ଓଡ଼ିଶାବାସୀଙ୍କୁ ନିଜ ପରିବାର ସଦସ୍ୟ ଭଳି ଭାବି କାର୍ଯ୍ୟ କରିଥାନ୍ତି । ହେଲେ ବାହାର ରାଜ୍ୟରୁ ନେତାଙ୍କୁ ଆଣି ଓଡ଼ିଶାବାସୀ ଏବଂ ମୁଖ୍ୟମନ୍ତ୍ରୀଙ୍କ ବାବଦରେ ଅପମାନସୂଚକ ମନ୍ତବ୍ୟ ଦେଉଛି ବିଜେପି । ଅଶୋଭନୀୟ ଶବ୍ଦ ପ୍ରୟୋଗ କରିବା ଓଡ଼ିଶା ବିଜେପିକୁ ଆଦୌ ଶୋଭାଦେଉନି । ନିଜେ ଧର୍ମେନ୍ଦ୍ର ପ୍ରଧାନ ମଧ୍ଯ ସେମାନଙ୍କ ସହ ମିଶି ସମାନ ଭାଷା ବ୍ୟବହାର କରିବା ଓଡ଼ିଶା ସଂସ୍କୃତି ବିରୋଧୀ ।
ସେ କହିଛନ୍ତି, ବାହାରୁ ଆସୁଥିବା ନେତା ଆମ ଅତିଥି, ସେଥିପାଇଁ ଆମେ ବିଶେଷ କିଛି ପ୍ରତିକ୍ରିୟା ରଖୁ ନଥିଲୁ, କାରଣ ବିଜେଡି ସବୁବେଳେ ଓଡ଼ିଶାର ସଂସ୍କୃତିକୁ ପାଳନ କରେ । ଗତ ୧୦ ବର୍ଷ ହେଲା ଓଡ଼ିଶା ବିଜେପି ନେତା ସବୁବେଳେ ମୁଖ୍ୟମନ୍ତ୍ରୀଙ୍କ ସ୍ବାସ୍ଥ୍ୟାବସ୍ଥା ଉପରେ ମନ୍ତବ୍ୟ ଦେଇ ଆସୁଛନ୍ତି । କାରଣ ସେମାନଙ୍କ ନିକଟରେ ଆଉ କିଛି ମୁଦ୍ଦା ନାହିଁ ।
ଧର୍ମେନ୍ଦ୍ରଙ୍କ ଅପରାଗତା ପେଡ଼ି ଖୋଲି ପ୍ରଣବ କହିଛନ୍ତି, ଶ୍ରୀମନ୍ଦିର ପରିକ୍ରମା ଓ ସମଲେଇ ପ୍ରକଳ୍ପକୁ ବିରୋଧ କରିଥିବା ଧର୍ମେନ୍ଦ୍ର ପ୍ରଧାନ ଏନଏଚ-୫୫ କାମ କିଭଳି ଶୀଘ୍ର ସରିବ ସେନେଇ ତତ୍ପରତା ଦେଖାଇନାହାନ୍ତି । ଯେଉଁଥିପାଇଁ ହଜାର ହଜାର ଲୋକଙ୍କ ଜୀବନ ଯାଇଛି । ମହାନଦୀ ପ୍ରସଙ୍ଗରେ ଧର୍ମେନ୍ଦ୍ର ଛତିଶଗଡ଼ ପାଇଁ କରିଥିବା ଓକିଲାତି କାହାକୁ ଅଛପା ନାହିଁ । ସମ୍ବଲପୁର ସଭାରେ ବରିଷ୍ଠ ବିଜେଡି ନେତା କାର୍ତ୍ତିକ ପାଣ୍ଡିଆନ ପଚାରିଥିବା ପ୍ରଶ୍ନର ଗୋଟିଏ ବି ଉତ୍ତର ଦେଇପାରିଲେନି ଧର୍ମେନ୍ଦ୍ର । କାରଣ ସେ ଗତ ୧୦ ବର୍ଷ ମଧ୍ୟରେ କିଛି ବି କାମ କରିନାହାନ୍ତି । ମୁଖ୍ୟମନ୍ତ୍ରୀଙ୍କ ସ୍ବାସ୍ଥ୍ୟାବସ୍ଥା ନେଇ ମିଛ ପ୍ରଚାର ହେଉ ଅବା ଓଡ଼ିଶାର ବିକାଶକୁ ବିରୋଧ କରିବାର ମାନସିକତା, ବିଜେପିର ମିଛକୁ ଓଡ଼ିଶାବାସୀ ଜାଣି ସାରିଲେଣି । ଏଭଳି ଡାହା ମିଛକୁ ସେମାନେ ଆଦୌ ଗ୍ରହଣ କରୁନାହାନ୍ତି । ସାଢ଼େ ୪ କୋଟି ଓଡ଼ିଶାବାସୀଙ୍କ ଆଶୀର୍ବାଦରେ ତିନି ଚତୁର୍ଥାଂଶ ଆସନ ସହ ଜୁନ ୯ ତାରିଖରେ ଷଷ୍ଠ ଥର ପାଇଁ ନବୀନ ମୁଖ୍ୟମନ୍ତ୍ରୀ ଭାବେ ଶପଥ ନେବେ ବୋଲି ପ୍ରଣବ ଦୃଢୋକ୍ତି ପ୍ରକାଶ କରିଛନ୍ତି ।
ଭୁବନେଶ୍ବର: ଜୁନ ୧ ତାରିଖରେ ରାଜ୍ୟରେ ଚତୁର୍ଥ ତଥା ଶେଷ ପର୍ଯ୍ୟାୟ ନିର୍ବାଚନ । ଏହି ପର୍ଯ୍ୟାୟରେ ମୋଟ ୩୯୪ ଜଣ ପ୍ରାର୍ଥୀ ରହିଛନ୍ତି । ଏମାନଙ୍କ ମଧ୍ୟରୁ ୯୬ ଜଣଙ୍କ ନାଁରେ ରହିଛି ଅପରାଧିକ ମାମଲା । ଅଛନ୍ତି ୧୨୧ ଜଣ କୋଟିପତି ପ୍ରାର୍ଥୀ ।
ବିଜେଡିର ବସ୍ତା ପ୍ରାର୍ଥୀ ଶୁଭାଷିନୀ ଜେନା ସବୁଠାରୁ ଅଧିକ ଧନୀ । ଶୁଭାଷିନୀଙ୍କର ୧୩୫ କୋଟି ଟଙ୍କାର ସ୍ଥାବର ଓ ଅସ୍ଥାବର ସମ୍ପତ୍ତି ରହିଛି । ନିରଞ୍ଜନ ପଟ୍ଟନାୟକ ୩ ନମ୍ବର ଧନୀ ପ୍ରାର୍ଥୀ । ସେ ୮୬ କୋଟି ଟଙ୍କାର ସ୍ଥାବର ଓ ଅସ୍ଥାବର ସମ୍ପତ୍ତି ମାଲିକ । ମୟୂରଭଞ୍ଜ ଜିଲ୍ଲା ଉଦଳାର ସ୍ବାଧୀନ ପ୍ରାର୍ଥୀ ବେଣୁଧର ମହାପାତ୍ର ସବୁଠାରୁ ଗରିବ ପ୍ରାର୍ଥୀ । ତାଙ୍କ ପାଖରେ ରହିଛି ମାତ୍ର ୬୪୫ ଟଙ୍କା । ବିଜେଡିରେ ସର୍ବାଧିକ କୋଟିପତି ପ୍ରାର୍ଥୀ ଅଛନ୍ତି । ୩୭ ଜଣ କୋଟିପତି ପ୍ରାର୍ଥୀ ବିଜେଡିରେ ଅଛନ୍ତି । ବିଜେପିର ୩୦ ଜଣ କୋଟିପତି ନିର୍ବାଚନ ଲଢୁଛନ୍ତି । କଂଗ୍ରେସର ଅଛନ୍ତି ୨୧ ଜଣ କୋଟିପତି ପ୍ରାର୍ଥୀ । ୧୭ ଜଣ ପ୍ରାର୍ଥୀଙ୍କ ନାଁରେ ହତ୍ୟା ଉଦ୍ୟମ ମାମଲା ରହିଛି । ୨ ଜଣଙ୍କ ନାଁରେ ରହିଛି ବଳାତ୍କାର ମାମଲା ।
ଏଡିଆର ଓ ଓଡ଼ିଶା ଇଲେକ୍ସନ ୱାଚ ତରଫରୁ ନିର୍ବାଚନରେ ପ୍ରତିଦ୍ବନ୍ଦ୍ବିତା କରୁଥିବା ପ୍ରାର୍ଥୀଙ୍କ ସମ୍ପର୍କରେ ଏହି ତଥ୍ୟ ଦିଆଯାଇଛି ।
ଭୁବନେଶ୍ବର: ରାଜ୍ଯ ମୁଖ୍ୟ ନିର୍ବାଚନ ଅଧିକାରୀଙ୍କୁ ଭେଟିଲା ବିଜେଡି । ବିଜେଡିର ଜଣେ ମହିଳା ସମର୍ଥକଙ୍କୁ ବିଜେପି କର୍ମୀ ଆକ୍ରମଣ କରି ସୁନା ଚେନ୍ ଓ ମୋବାଇଲ ଛଡ଼ାଇ ନେଇଥିବା ନେଇ କଲା ଅଭିଯୋଗ ।
ବଡ଼ଚଣା ବିଧାନସଭ ନିର୍ବାଚନ ମଣ୍ଡଳୀରେ ଶକୁନ୍ତଳା ବେହେରା ନାମକ ଜଣେ ବିଜେଡି କର୍ମୀ ଘର ଘର ବୁଲି ପ୍ରଚାର କରୁଥିଲେ । ଏହି ସମୟରେ ବିଜେପି ବିଧାୟକ ପ୍ରାର୍ଥୀ ଅମର କୁମାର ନାୟକଙ୍କ ସମର୍ଥକ ତାଙ୍କୁ ଅଟକ ରଖି ଆକ୍ରମଣ କରିଥିବା ଅଭିଯୋଗ କରିଛି ବିଜେଡି । ଶକୁନ୍ତଳାଙ୍କୁ ବିଶ୍ୱଜିତ ବଳ, କୁମାର ରଞ୍ଜନ ବଳ ଓ ବିଟୁ ବଳ ମଝିପଡ଼ା ଗାଁରେ ଅଟକାଇ ସୁନା ଚେନ ଓ ମୋବାଇଲ ଛଡ଼ାଇ ନେଇଥିବା ବାଲିଚନ୍ଦ୍ରପୁର ଥାନାରେ ଏତଲା ଦିଆଯାଇଛି ।
ଶକୁନ୍ତଳାଙ୍କୁ ନ୍ୟାୟ ଦେବା ମୁଖ୍ଯ ନିର୍ବାଚନ ଅଧିକାରୀଙ୍କ ଦ୍ୱାରସ୍ଥ ହୋଇଛି ବିଜେଡି ଟିମ୍ । ବିଜୁ ଜନତା ଦଳରେ ମହିଳାଙ୍କୁ ପ୍ରାଧାନ୍ୟ ଓ ସମ୍ମାନ ମିଳୁଥିବା ବେଳେ ସେମାନଙ୍କ ଖୁସି ଦେଖି ବିଜେପି ହତୋତ୍ସାହିତ ହୋଇପଡ଼ିଥିବା ବିଜେଡି କହିଛି ।
ଭୁବନେଶ୍ବର: ରାଜ୍ୟରେ ୨୫ରେ ତୃତୀୟ ଓ ଜୁନ ୧ରେ ଚତୁର୍ଥ ତଥା ଶେଷ ପର୍ଯ୍ୟାୟ ନିର୍ବାଚନ । ହେଲେ ବିଜେପିକୁ ଝଟକା ଲାଗିବା ବନ୍ଦ ହେଉନି । ରାଜ୍ୟ ବିଜେପିର ଆଜି ଆଉ ଜଣେ ତୁଙ୍ଗ ନେତା ବିଜେପି ଡାଛି ବିଜେଡିରେ ମିଶିଛନ୍ତି । ସେ ହେଲେ ଭଦ୍ରକ ନିର୍ବାଚନ ମଣ୍ଡଳୀର ବିଜେପି ବିଧାୟକ ପ୍ରାର୍ଥୀ ଡାକ୍ତର ପ୍ରଦୀପ କୁମାର ନାୟକ ।
ରାଜ୍ୟସଭା ସାଂସଦ ସସ୍ମିତ ପାତ୍ର, ବିଜେଡି ମୁଖପାତ୍ର ପ୍ରିୟବ୍ରତ ମାଝୀ ପ୍ରଦୀପଙ୍କୁ ଦଳକୁ ସ୍ବାଗତ କରିଛନ୍ତି । ପ୍ରଦୀପଙ୍କ ଯୋଗଦାନ ଭଦ୍ରକ ଲୋକସଭା କ୍ଷେତ୍ରରେ ବିଜେଡିକୁ ଆହୁରି ଶକ୍ତିଶାଳୀ କରିବ ବୋଲି କହିଛନ୍ତି ସସ୍ମିତ । ବିଜେଡି ରାଜ୍ଯର ବିକାଶ ପାଇଁ ନିରନ୍ତର ପ୍ରଚେଷ୍ଟା କରୁଛି । ଏଣୁ ନବୀନଙ୍କୁ ଷଷ୍ଠ ଥର ମୁଖ୍ଯମନ୍ତ୍ରୀ କରିବାକୁ ସମସ୍ତେ ସଂକଳ୍ପ ନେଇଛନ୍ତି ବୋଲି ପ୍ରଦୀପ କହିଛନ୍ତି ।
