ନନ୍ଦିଘୋଷ ବ୍ୟୁରୋ: କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କୁ ବିଜେଡି ସାଙ୍ଗଠନିକ ସମ୍ପାଦକ ପ୍ରଣବ ପ୍ରକାଶ ଦାସଙ୍କ ଟାର୍ଗେଟ । ତିନି ଚତୁର୍ଥାଂଶ ସଂଖ୍ୟା ଗରିଷ୍ଠତା ସହ ବିଜେଡି ନିର୍ବାଚନ ଜିତୁଥିବା ଜାଣିସାରିଲେଣି ଧର୍ମେନ୍ଦ୍ର ପ୍ରଧାନ । ଏନେଇ ତାଙ୍କ ମୁଣ୍ଡ କାମ କରୁନଥିବା କହି ଧର୍ମେନ୍ଦ୍ରଙ୍କୁ ତାତ୍ସଲ୍ୟ କରିଛନ୍ତି ପ୍ରଣବ । ମୁଖ୍ୟମନ୍ତ୍ରୀଙ୍କ ବିରୋଧରେ ଅଶାଳୀନ ଭାଷା ପ୍ରୟୋଗ, ଅପମାନସୂଚକ ମନ୍ତବ୍ୟ ଦେବା ପରେ ଶେଷରେ ମଞ୍ଚ ଉପରୁ ନିଜ ଭାଷଣରେ ଲୋକଙ୍କୁ ପ୍ରତ୍ୟକ୍ଷ ଭାବେ ଧମକ ଦେବାକୁ ମଧ୍ୟ ପଛାଇ ନାହାନ୍ତି ଧର୍ମେନ୍ଦ୍ର। ଆଉ ଏବେ ଶେଷରେ ଟଙ୍କା ବାଣ୍ଟିବାର ଅଭିଯୋଗ ଆଣୁଛନ୍ତି । ଏଥିରୁ ସ୍ପଷ୍ଟ ଭାବେ ବାରି ହୋଇ ପଡୁଛି ଧର୍ମେନ୍ଦ୍ର ଭାରି ହତାଶା ଓ ନିରାଶା ମଧ୍ୟରେ ଅଛନ୍ତି । କାରଣ ଓଡ଼ିଶା ବିଜେପି ଏହି ନିର୍ବାଚନ ବହୁତ ଖରାପ ଭାବେ ହାରୁଥିବା ନିଜ ସୋସିଆଲ ସାଇଡରେ ଉଳ୍ଲେଖ କରିଛନ୍ତି ବିଜେଡି ସାଙ୍ଗଠନିକ ସମ୍ପାଦକ ପ୍ରଣବ ପ୍ରକାଶ ଦାସ।
ମଡର୍ଣ୍ଣ ବୁକ୍ ଡିପୋରୁ ୨ଟି ବହି କିଣିଲେ ନବୀନ
ଭୁବନେଶ୍ବର: ବୁକ୍ ଷ୍ଟୋରରେ ପୁସ୍ତକପ୍ରେମୀ ନବୀନ। ମାସେ ଧରି ମାରାଥନ୍ କ୍ଯାମ୍ପେନ୍ ପରେ ଆଜି ନିର୍ବାଚନୀ ଟେନସନର ଓହ୍ଲାଇଥିଲେ ମୁଖ୍ଯମନ୍ତ୍ରୀ ନବୀନ। ରାତି ପାହିଲେ ଭୋଟ୍ ଦେବେ ୬ ଲୋକସଭା କ୍ଷେତ୍ରର ଭୋଟର। ଆଉ ନେତାଙ୍କର କିଛି ଭୂମିକା ନାହିଁ। ରେଜଲ୍ଟ ପର୍ଯ୍ଯନ୍ତ ଏବେ ରିଲାକ୍ସ ପାଇଁ ଫୁରୁସତ ମିଳିଛି। ତେଣୁ ଏହି ସମୟକୁ ହାତଛଡ଼ା କରି ନାହାଁନ୍ତି ମୁଖ୍ଯମନ୍ତ୍ରୀ ନବୀନ ପଟ୍ଟନାୟକ। ସନ୍ଧ୍ଯା ସାଢେ ସାତଟା ବେଳେ ମାଷ୍ଟରକ୍ଯାଣ୍ଟିନ ସ୍ଥିତ ମଡର୍ଣ୍ଣ ବୁକ ଡିପୋରେ ପହଞ୍ଚିଥିଲେ ନବୀନ। ସାଥୀରେ ଥିଲେ ବିଜେଡିର ବରିଷ୍ଠ ନେତା କାର୍ତ୍ତିକ ପାଣ୍ଡିଆନ୍। ଗାଡ଼ିରୁ ଓହ୍ଲାଇ କମନମ୍ଯାନ୍ ଷ୍ଟାଇଲରେ ବୁକ ଷ୍ଟୋର ଭିତରକୁ ଯାଇଥିଲେ ମୁଖ୍ଯମନ୍ତ୍ରୀ।
ସ୍ମିତହାସ୍ଯ ସହ ବେଶ ଫୁର୍ତ୍ତି ଥିଲେ ମୁଖ୍ଯମନ୍ତ୍ରୀ। ପ୍ରାୟ ଏକ ମାସର ବ୍ଯସ୍ତବହୁଳ ନିର୍ବାଚନ ପ୍ରଚାର ଲାଗି ୪୦ ଡିଗ୍ରୀ ତାପମାତ୍ରାକୁ ଭୃକ୍ଷେପ କରି ନଥିବା ନବୀନ ଆଜି ବହି ଲାଗି ସମୟ ବାହାର କରିବା ସମସ୍ତଙ୍କ ଲାଗି ଚର୍ଚ୍ଚାର କାରଣ ସୃଷ୍ଟି କରିଥିଲା। ବୁକ ଷ୍ଟଲରୁ ମୁଖ୍ଯମନ୍ତ୍ରୀ କିଣିଥିଲେ ଦେବବ୍ରତ ସ୍ବାଇଁଙ୍କ ଦ୍ବାରା ରଚିତ ସିକ୍ରେଟ୍ସ ଅଫ୍ ଶିମିଳିପାଳ ଏବଂ ଚାର୍ଲ୍ସ ଆଲେନଙ୍କ ଲିଖିତ ପୁସ୍ତକ ଆରିୟନ୍ସ। ପ୍ରକୃତିପ୍ରେମୀ ଭାବେ ଜଣାଶୁଣା ନବୀନ ବି ପ୍ରମାଣିତ କରିଥିଲେ ପୁସ୍ତକକୁ ସେ କେତେ ଭଲ ପାଆନ୍ତି। ନବୀନ କେବଳ ଜଣେ ରାଜନେତା ନୁହନ୍ତି ଜଣେ ଆନ୍ତର୍ଜାତିକ ଖ୍ଯାତି ସମ୍ପନ୍ନ ଲେଖକ। ଦ ଗାର୍ଡନ ଅଫ ଲାଇଫ, ଏ ସେକଣ୍ଡ ପାରାଡାଇଜ ଓ ଏ ଡେଜର୍ଟ କିଙ୍ଗଡମ ପୁସ୍ତକ ଲେଖି ବିଶ୍ବ ସାହିତ୍ଯରେ ସୃଷ୍ଟି କରିଛନ୍ତି ସ୍ବତନ୍ତ୍ର ପରିଚୟ।
ସେପଟେ ବୁକ ଷ୍ଟୋର କର୍ତ୍ତୃପକ୍ଷ କହିଛନ୍ତି ବିଜୁ ବାବୁ ମଧ୍ଯ ତାଙ୍କ ବହି ଦୋକାନକୁ ଆସୁଥିଲେ। ବହି କିଣା ସାଙ୍ଗକୁ ସେଠାରେ ଉପସ୍ଥିତ ଲୋକଙ୍କ ସହ କଥା ହୋଇଥିଲେ ନବୀନ। ପିଲାଙ୍କ ସହ ସେଲଫି ନେବା ପରେ ପୁଣି ଫେରିଯାଇଥିଲେ ନବୀନ ନିବାସ। ସେପଟେ ଦୋକାନ ମାଲିକ କହିଛନ୍ତି- ପୂର୍ବରୁ ବିଜୁ ପଟ୍ଟନାୟକ ବି ଏହି ଷ୍ଟୋରକୁ ଆସିଥିଲେ। ମୁଖ୍ଯମନ୍ତ୍ରୀ ନବୀନ ଅଢେଇ ହଜାର ଟଙ୍କାର ପୁସ୍ତକ କିଣିଥିଲେ। ମୁଖ୍ଯମନ୍ତ୍ରୀ ସମ୍ପୂର୍ଣ୍ଣ ଫିଟ ଅଛନ୍ତି ବୋଲି ସେ କହିଛନ୍ତି।
ପ୍ରଶାନ୍ତ ଜଗଦ୍ଦେବଙ୍କ ଜାମିନ ଖାରଜ ପରେ ପୀତାମ୍ବରଙ୍କ ପ୍ରଳାପ!
ନନ୍ଦିଘୋଷ ବ୍ୟୁରୋ: ବିଜେପିର ବାହୁବଳୀ ବିଧାୟକ ପ୍ରାର୍ଥୀ ପ୍ରଶାନ୍ତ ଜଗଦେବଙ୍କ ଜାମିନ୍ ଆବେଦନ ଖାରଜ ହୋଇଯିବା ପରେ ହିତାହିତ ଜ୍ଞାନ ଭୁଲିଗଲେ ତାଙ୍କ ଓକିଲ ତଥା ବିଜେପିର ବରିଷ୍ଠ ନେତା ପୀତାମ୍ବର ଆଚାର୍ଯ୍ଯ। ସେ କହୁଛନ୍ତି ଚାପରେ ପଡି ପୋଲିସ୍ ମିଛ କେସ କରିଛି। ପ୍ରଶ୍ନ ଉଠୁଛି କୋର୍ଟ ମଧ୍ଯ କଣ ଚାପରେ ପଡି ଜାମିନ୍ ନାକଚ କରି ଦେଲେ କି ? ଲୋକେ କହୁଛନ୍ତି ପ୍ରଶାନ୍ତଙ୍କ ଓକିଲ ପୀତାମ୍ବରଙ୍କ ଏହା କେବଳ ପ୍ରଳାପ। ଜଗଦେବଙ୍କ ଜାମିନ୍ ଆବେଦନ ଖାରଜ ହୋଇଯିବା ଖବର ଶୁଣିବା ପରେ ପ୍ରଳାପ କରୁଛନ୍ତି ପୀତାମ୍ବର। ଦୁଇଜଣ ଆଇପିଏସ ଅଫିସରଙ୍କ ପ୍ରତି ଅପଶବ୍ଦ ମଧ୍ଯ ପ୍ରୟୋଗ କରିଛନ୍ତି ପୀତାମ୍ବର। ଏହା ତାଙ୍କୁ କାଠଗଡ଼ାକୁ ଟାଣିପାରେ। ଜଣେ ବରିଷ୍ଠ ଆଇପିଏସ ଅଫିସରଙ୍କୁ କହିଲେ ଅଭ୍ଯାସଗତ ଅପରାଧୀ।
ସାଧାରଣରେ ପ୍ରଶ୍ନ, ପୀତାମ୍ବର ଆଚାର୍ଯ୍ଯ କହି ପାରିବେ କି ଏନେଇ ତାଙ୍କ ପାଖରେ କଣ ପ୍ରମାଣ ଅଛି ? ଅନ୍ଯଜଣେ ଆଇପିଏସ ଅଫିସରଙ୍କୁ କହିଲେ ସେ କୁଆଡ଼େ ବନ୍ଧୁକ ଦେଖାଇ ଲୋକଙ୍କୁ ଭୟଭୀତ କରୁଛନ୍ତି। ବିଧାୟକ ପ୍ରାର୍ଥୀଙ୍କ ପାଇଁ ପୋଲିସ୍ ଗାଡ଼ିରେ ଟଙ୍କା ବାଣ୍ଟୁଛନ୍ତି। ମୁଖ୍ଯମନ୍ତ୍ରୀଙ୍କୁ କହିଲେ ଗୋଇଠା ଖିଆ ମୁଖ୍ଯମନ୍ତ୍ରୀ । ଏ ତିନିଟି ଶବ୍ଦ ମହଙ୍ଗା ପଡିବ କି ପୀତାମ୍ବରଙ୍କୁ ? ପୀତାମ୍ବର ଜଣେ ରାଜନେତା ଓ ଆଇନଜୀବୀ। ପ୍ରଶ୍ନ ଉଠୁଛି ଜଣେ ଆଇନଜୀବୀ ହୋଇ କିଭଳି କହିଲେ ଆଇନ ଅସମ୍ମତ ଶବ୍ଦ ? ଏଭଳି ମାନହାନୀ କଲା ଭଳି ଶବ୍ଦ ବ୍ଯବହାରୀକାରୀଙ୍କ ବିରୋଧରେ ଆଇନରେ ରହିଛି ଦଣ୍ଡବିଧାନର ବ୍ଯବସ୍ଥା, ଏକଥା ଭୂଲି ଗଲେ କି ପୀତାମ୍ବର?
ଅତି ବୁଦ୍ଧିରେ ବାଇ ଭଳି ହୋଇଛି କି ପୀତାମ୍ବରଙ୍କ ପରିସ୍ଥିତି। ସଂପୃକ୍ତ ଆଇପିଏସ ଅଧିକାରୀମାନେ ଏହା ବିରୋଧରେ ନେବେ କି ଆଇନର ଆଶ୍ରୟ ? ଆସନ୍ତାକାଲି ଶେଷ ପର୍ଯ୍ଯାୟ ନିର୍ବାଚନ ଥିଲା ବେଳେ ଏବେ ଚାଲିଛି ସାଇଲେଣ୍ଟ ପିରିୟଡ। ପୀତାମ୍ବରଙ୍କ ସଂପୃକ୍ତ ବକ୍ତବ୍ୟ ଆଦର୍ଶ ଆଚରଣବିଧିର ଉଲଙ୍ଘନ କରୁ ନାହିଁ କି ? ପୀତମ୍ବରଙ୍କ ମିଡିଆ ପ୍ରତିକ୍ରିୟା ଭୋଟରଙ୍କ ଉପରେ ପ୍ରଭାବ ପକାଇବ ନାହିଁ କି ? ଆଇନଜୀବୀ ବୋଲି ପୀତାମ୍ବରଙ୍କ ପ୍ରଳାପକୁ ପ୍ରଶ୍ରୟ ଦେବ କି ଆଇନ୍ ?
ସ୍ବାଧିନ ପ୍ରାର୍ଥୀଙ୍କ ପାଇଁ ପ୍ରଚାର କରୁଥିବା କନଷ୍ଟେବଳ ସଞ୍ଜୟ କୁମାର ବଳଙ୍କ ବିରୋଧରେ ସିଇଓଙ୍କ ନିକଟରେ ଫେରାଦ ହେଲା ବିଜେଡି
ନନ୍ଦିଘୋଷ ବ୍ୟୁରୋ: ଭୁବନେଶ୍ୱର ସପ୍ତମ ବାଟାଲିଅନରେ କନଷ୍ଟେବଳ ଭାବେ କାର୍ଯ୍ୟରତ କଟକ ଜିଲ୍ଲା ମାହାଙ୍ଗା ଅଞ୍ଚଳର ସଞ୍ଜୟ କୁମାର ବଳଙ୍କ ବିରୋଧରେ ବିଜେଡି ସିଇଓଙ୍କ ନିକଟରେ ଫେରାଦ ହୋଇଛି । ନିଜ ପଦର ଅପବ୍ୟବହାର କରି ସଞ୍ଜୟ ମାହାଙ୍ଗାର ସ୍ୱାଧୀନ ପ୍ରାର୍ଥୀ ଶାରଦା ପ୍ରଧାନଙ୍କ ପାଇଁ ଖୋଲାଖୋଲି ପ୍ରଚାର କରୁଥିବା ଅଭିଯୋଗ ହୋଇଛି। ଯାହାକି ଆଦର୍ଶ ଆଚରଣ ବିଧିର ଖୋଲା ଉଲ୍ଲଙ୍ଘନ। ନିଜ କ୍ଷମତାର ଅପବ୍ୟବହାର କରି ସଞ୍ଜୟ ବଳ ସ୍ୱାଧୀନ ପ୍ରାର୍ଥୀ ଶାରଦାଙ୍କ ପାଇଁ ଭୋଟରଙ୍କୁ ଟଙ୍କା ବାଣ୍ଟିବା ତଥା ଭୋଟରଙ୍କୁ ଧମକାଇବା ଭଳି କାର୍ଯ୍ୟରେ ଲିପ୍ତ ରହୁଥିବା ସିଇଓଙ୍କୁ ବିଜେଡି ପକ୍ଷରୁ ଅଭିଯୋଗ କରାଯାଇଛି। ସଞ୍ଜୟ କୁମାର ବଳଙ୍କ ଏଭଳି କାଣ୍ଡ ନିର୍ବାଚନରେ ଆଇନଶୃଙ୍ଖଳା ପରିସ୍ଥିତି ସୃଷ୍ଟି କରିପାରେ ବୋଲି କୁହାଯାଇଛି । ତେଣୁ ସଞ୍ଜୟ କୁମାର ବଳଙ୍କ ବିରୋଧରେ କାର୍ଯ୍ୟାନୁଷ୍ଠାନ ପାଇଁ ବିଜେଡି ପକ୍ଷରୁ ଦାବି କରାଯାଇଛି।
ଚୋରି ଅଭିଯୋଗରେ ୧୧ ଜଣ ଗିରଫ
ନନ୍ଦିଘୋଷ ବ୍ୟୁରୋ: କୋଟିଏ ଟଙ୍କାର ପାଣି ପାଇପ୍ ଚୋରି ଅଭିଯୋଗରେ ୧୧ ଜଣ ଗିରଫ। ଚନ୍ଦକା ପୋଲିସ ସହାୟତାରେ ଗିରଫ କଲା ସ୍ପେଶାଲ ସ୍କ୍ୱାର୍ଡ । RWSSର ପାଣି ପାଇପ କାମ ଚାଲିଥିବା ବେଳେ ମୂଲ୍ୟବାନ ପାଇପ ଚୋରି ନେଇ ଆସିଥିଲା ଅଭିଯୋଗ। ଏକ ୧୫ ଜଣିଆ ଗ୍ୟାଙ୍ଗ ସାରା ଓଡିଶାରୁ ଏଭଳି ପାଣି ପାଇପ ଚୋରି କରୁଥିବା ଖବର ପାଇବା ପରେ ସେମାନଙ୍କ ମଧ୍ୟରୁ ୧୧ ଜଣଙ୍କୁ ଗିରଫ କରାଯାଇଛି। ଚୋରି କରିବା ପରେ ଅଭିଯୁକ୍ତ ମନେ ଫର୍ଜି ଡକ୍ୟୁମେଣ୍ଟ ଓ ଚାଲାଣ ତିଆରି କରି ରାୟପୁର, ଭିଲାଇକୁ ଏସବୁ ସପ୍ଲାଏ କରୁଥିଲେ। ସେଠାରେ ପହଁଚିବା ପରେ ପାଇପ ଗୁଡିକୁ ତରଳାଇ ମୋଟା ଅଙ୍କର ଟଙ୍କା ରୋଜଗାର କରୁଥିଲେ ଅଭିଯୁକ୍ତ। ଏହି ଗ୍ୟାଙ୍ଗର ମୁଖ୍ୟ ଅଭିଯୁକ୍ତ ଚନ୍ଦକା ଅଞ୍ଚଳର ସୁଧୀର ବେହେରାକୁ କାବୁ କରିବା ପରେ ପୋଲିସ ପୁରା ଗ୍ୟାଙ୍ଗ ସମ୍ପର୍କରେ ଖବର ପାଇଥିଲା । ରୋଚକ କଥା ହେଉଛି ଗତ କିଛି ଦିନ ତଳେ ଚର୍ଚ୍ଚାରେ ଥିବା ଟୁଙ୍ଗୁରୁ ଭୋଳ ଏହି କେସରେ ଅନ୍ୟତମ ଅଭିଯୁକ୍ତ ବୋଲି ସୂଚନା ଦେଇଛନ୍ତି ଭୁବନେଶ୍ୱର ଡିସିପି। ରାୟଗଡା, ଖୋର୍ଦ୍ଧା, କଟକ ଓ ଗଞ୍ଜାମ ରେ ମଧ୍ୟ ଏମାନଙ୍କ ନାଁ ରେ ଅନେକ କେସ ରହିଛି। ଅଧିକ ତଦନ୍ତ ପାଇଁ ଖୁବଶୀଘ୍ର ଏମାନଙ୍କୁ ରିମାଣ୍ଡରେ ଅଣାଯିବ ବୋଲି କହିଛନ୍ତି ଡିସିପି ।
ଆସନ୍ତାକାଲି ଶେଷ ପର୍ଯ୍ୟାୟ ନିର୍ବାଚନ
ନନ୍ଦିଘୋଷ ବ୍ୟୁରୋ: ଶନିବାର ଓଡ଼ିଶାରେ ଚତୁର୍ଥ ତଥା ଶେଷ ପର୍ଯ୍ୟାୟ ଭୋଟ୍ । ଶେଷ ପର୍ଯ୍ୟାୟ ନିର୍ବାଚନରେ ଓଡ଼ିଶାର ୬ ଲୋକସଭା ସମେତ ୪୨ ବିଧାନସଭା ଆସନରେ ନେତା ବାଛିବେ ଜନତା । ୬ ଲୋକସଭା ଯଥା ମୟୂରଭଞ୍ଜ, ବାଲେଶ୍ୱର, ଭଦ୍ରକ, ଯାଜପୁର, କେନ୍ଦ୍ରାପଡ଼ା ଓ ଜଗତସିଂହପୁର ପାଇଁ ମତଦାନ ହେବ । ଏହା ଅନ୍ତର୍ଗତ ୪୨ ବିଧାନସଭା ନିର୍ବାଚନମଣ୍ଡଳି ପାଇଁ ପାଇଁ ମତଦାନ କରାଯିବ । ଏଥିପାଇଁ ବୁଥ ଅଭିମୁଖେ ଯାଉଛନ୍ତି ପୋଲିଂ ପାର୍ଟି । ଏହି ପର୍ଯ୍ୟାୟରେ ମୋଟ ୪୬୦ ଜଣ ପ୍ରାର୍ଥୀଙ୍କ ଭାଗ୍ଯ ନିର୍ଦ୍ଧାରଣ କରିବେ ୯୯ ଲକ୍ଷରୁ ଅଧିକ ଭୋଟର । ୪୨ ବିଧାନସଭା ନିର୍ବାଚନମଣ୍ଡଳି ପାଇଁ ୩୯୪ ଜଣ ପ୍ରାର୍ଥୀ ରହିଥିବାବେଳେ ୬ ଲୋକସଭା କ୍ଷେତ୍ରରେ ୬୬ ଜଣ ସାଂସଦ ପ୍ରାର୍ଥୀ ରହିଛନ୍ତି । ୫୦.୮୮ ଲକ୍ଷ ପୁରୁଷ ଓ ୪୮.୭୨ ଲକ୍ଷ ମହିଳା ଭୋଟରଙ୍କ ସହ ମୋଟ ୯୯.୬୧ ଲକ୍ଷ ଭୋଟର ମତଦାନ ସାବ୍ଯସ୍ତ କରିବେ । ୧୦ ହଜାର ୮୮୨ଟି ମତଦାନ କେନ୍ଦ୍ରରେ ଭୋଟିଂ ହେବ । ୧୪୦୦ ବୁଥ ମହିଳାଙ୍କ ଦ୍ୱାରା ପରିଚାଳିତ ହେବ | ୨୦% ଆଦର୍ଶ ବୁଥ ରହିଛି । ୭୦ ହଜାରରୁ ଅଧିକ ପୋଲିଂ କର୍ମଚାରୀ ନିୟୋଜିତ ହେବେ । ସୁରକ୍ଷା ପାଇଁ ଭୋଟ କେନ୍ଦ୍ର ନିକଟରେ ୧୨୫ କମ୍ପାନୀ CAPF ମୃତୟନ ହୋଇଛନ୍ତି । ଏଜେଣ୍ଟ ଓ ଭୋଟର ବୁଥକୁ ମୋବାଇଲ ନେଇ ପାରିବେ ନାହିଁ । କେବଳ ପ୍ରିଜାଇଡିଙ୍ଗ ଅଫିସର ମୋବାଇଲ ନେଇପାରିବେ । 2019ରେ ଏହି ୬ଟି ସଂସଦୀୟ କ୍ଷେତ୍ରରେ 74% ମତଦାନ ହାର ରହିଥିଲା ।
ରାଜ୍ୟରେ ଆଗାମୀ ୩ ଦିନ ଜାରି ରହିବ ଗ୍ରୀଷ୍ମ ପ୍ରବାହ
ନନ୍ଦିଘୋଷ ବ୍ୟୁରୋ: ରାଜ୍ୟରେ ଆଗାମୀ ୩ ଦିନ ଯାଏ ହିଟ ୱେଭ ବା ଗ୍ରୀଷ୍ମ ପ୍ରବାହ ଜାରି ରହିବ। ଆଭ୍ୟନ୍ତରୀଣରେ ତାତି ସହ ଉପକୂଳରେ ଅସହ୍ୟ ଗୁଳୁଗୁଳି ଅନୁଭୂତ ହେବ। ଆସନ୍ତା ୨୪ ଘଂଟାରେ ସୁନ୍ଦରଗଡ ଝାରସୁଗୁଡା ସମ୍ବଲପୁର ବରଗଡ଼ ସୋନପୁର ବୌଦ୍ଧ ବଲାଙ୍ଗୀର ନୂଆପଡା ମାଲକାନଗିରି କନ୍ଧମାଳ କଳାହାଣ୍ଡି ରେ ଭୀଷଣ ଗ୍ରୀଷ୍ମ ପ୍ରବାହକୁ ନେଇ ଅରେଞ୍ଜ ଓ୍ବାର୍ଣ୍ଣିଂ ଜାରି କରିଛି ପାଣିପାଗ ବିଭାଗ । ଉଷ୍ମ ରାତିର ସ୍ଥିତି ପାଇଁ ସମ୍ବଲପୁର କଳାହାଣ୍ଡି କନ୍ଧମାଳ ଓ ବଲାଙ୍ଗିରରେ ଅରେଞ୍ଜ ଓ୍ବାର୍ଣ୍ଣିଂ ଜାରିକରାଯାଇଛି । ୨ ଦିନ ଯାଇ ଗ୍ରୀଷ୍ମ ପ୍ରବାହ ଓ ଉଷ୍ମ ରାତିର ଅନୁଭୂତିକୁ ନେଇ ଅରେଞ୍ଜ ଓ୍ବାର୍ଣ୍ଣିଂ ଜାରି କରାଯାଇଥିବା ବେଳେ ଆଗାମୀ ୫ ଦିନ ଯାଏ ଉପକୂଳ ଓଡ଼ିଶାରେ ଗୁଳୁଗୁଳି ଲାଗିରହିବ ବୋଲି ପୂର୍ବାନୁମାନ କରିଛି ପାଣିପାଗ ବିଭାଗ। ଉପକୂଳ ଓଡ଼ିଶାରେ ୮୦ ପ୍ରତିଶତରୁ ଅଧିକ ଆଦ୍ରତା ରହୁଛି ଯେଉଁଥିପାଇଁ ଅସହ୍ୟ ଗୁଳୁଗୁଳି ଲାଗିରହିଛି । ଏଥିପାଇଁ ଉଷ୍ମ ଓ ସ୍ଥିତି ରାଜ୍ୟରେ ତିନିଦିନ ଯାଏ ଲାଗିରହିବ। ଏହାସହ ୩ ଦିନ ଯାଏ ଉପକୂଳ ଓ ଆଭ୍ୟନ୍ତରୀଣ ଓଡ଼ିଶାର କିଛି କିଛି ସ୍ଥାନରେ ବିଜୁଳି ଘଡଘଡି ସହ ବର୍ଷା ହେବାର ସମ୍ଭାବନା ରହିଛି ବୋଲି ବିଭାଗ ଆକଳନ କରିଛି। ଆସନ୍ତାକାଲି ରାଜ୍ୟରେ ଚତୁର୍ଥ ତଥା ଶେଷ ପର୍ଯ୍ୟାୟ ନିର୍ବାଚନ ଅନୁଷ୍ଠିତ ହେଉଥିବାବେଳେ ଖରା ଓ ଗରମ ରହିବ। ତେଣୁ ସତର୍କତା ସହ ଭୋଟ ଦେବାକୁ ପରାମର୍ଶ ଦେଇଛି ଆଞ୍ଚଳିକ ପାଣିପାଗ କେନ୍ଦ୍ର।
ରାଜଧାନୀରେ ବାର ଡାନ୍ସରଙ୍କ ସନ୍ଦେହଜନକ ମୃତ୍ୟୁ ଘଟଣା, ସାମ୍ନାକୁ ଆସିଲା ମୃତ ଯୁବତୀଙ୍କ ଭାଇରାଲ ରିଲ୍ସ
ଭୁବନେଶ୍ବର: ରାଜଧାନୀରେ ବାର ଡାନ୍ସରଙ୍କ ସନ୍ଦେହଜନକ ମୃତ୍ୟୁ ଘଟଣା । ସାମ୍ନାକୁ ଆସିଲା ମୃତ ଯୁବତୀଙ୍କ ଭାଇରାଲ ରିଲ୍ସ । ଆଜି ସକାଳୁ ବନ୍ଦ ଘରୁ ମିଳିଥିଲା ରକ୍ତାକ୍ତ ମୃତଦେହ । ପାହାଳ ଥାନା ଶିବଶକ୍ତି ନଗରରେ ଅଘଟଣ ଘଟିଛି । ମୃତ ଯୁବତୀଙ୍କ ଛଦ୍ମନାମ ଚାରୁ ଓ ତାଙ୍କ ଘର ଚଣ୍ଡୀଗଡ଼ ବୋଲି ଜଣାପଡିଛି । କଟକ ରୋଡର ଏକ ଡ୍ୟାନ୍ସ ବାରରେ ସେ କାମ କରୁଥିଲେ । ମିଳିଥିବା ସୂଚନା ମୁତାବକ, କଟକ ରୋଡରେ ଥିବା ଏକ ବାରର ଡିଜେଙ୍କ ସହ ମୃତ ଯୁବତୀଙ୍କର ପ୍ରେମ ସମ୍ପର୍କ ଗଢି ଉଠିଥିଲା । ସେହି ଯୁବକଙ୍କୁ ବିବାହ କରିବା ପାଇଁ ୫ ଦିନ ତଳେ ହାତ କାଟି ଦେଇଥିଲେ ଯୁବତୀ । ଖୁବଶୀଘ୍ର ତାଙ୍କୁ ମଧ୍ଯ ତଦନ୍ତପରିସରଭୁକ୍ତ କରିବ କମିଶନରେଟ ପୋଲିସ୍ । ସେପେଟେ ଘଟଣା ଘଟିଥିବା ବିଲ୍ଡିଂରେ ୨୫ ଜଣ ଯୁବତୀ ରହୁଛନ୍ତି । ପାହାଳ ଥାନା ପୋଲିସ ଓ ସାଇଣ୍ଟିଫିକ ଟିମ୍ ସରଜମିନ ଯାଞ୍ଚ କରିଛି । ପାରିପାର୍ଶ୍ବିକ ପରିସ୍ଥିତି ଦେଖି ପୋଲିସ ଏକ ଆତ୍ମହତ୍ୟା ମାମଲା ରୁଜୁ କରିଛି । ଯୁବତୀଙ୍କ ଟେଲିଫୋନ, ସୋସିଆଲ ମିଡିଆ ମେସେଜ ଆଧାରରେ ପ୍ରେମିକ ଜଣଙ୍କୁ ତଦନ୍ତ ପରିସରଭୁକ୍ତ ଖୁବଶୀଘ୍ର କରାଯିବ ବୋଲି ସୂଚନା ଦେଇଛି ପୋଲିସ।
ପ୍ରଶାନ୍ତ ଜଗଦ୍ଦେବଙ୍କ ଜାମିନ ଆବେଦନ ଖାରଜ
ନନ୍ଦିଘୋଷ ବ୍ୟୁରୋ: ଖୋର୍ଦ୍ଧାର ବିଜେପି ବିଧାୟକ ପ୍ରାର୍ଥୀ ପ୍ରଶାନ୍ତ ଜଗଦେବଙ୍କୁ ମିଳିଲାନି ଜାମିନ। ଜାମିନ ଆବେଦନକୁ ଖାରଜ କରିଦେଇଛନ୍ତି ଖୋର୍ଦ୍ଧା ଦ୍ବିତୀୟ ଅତିରିକ୍ତ ଜିଲ୍ଲା ଦୌରା ଜଜଙ୍କ କୋର୍ଟ । ଇଭିଏମ୍ ଭଙ୍ଗାରୁଜା ଅଭିଯୋଗରେ ସେ ଗିରଫ ହୋଇଥିଲେ। ଗତ ୨୫ ତାରିଖରେ ପ୍ରଶାନ୍ତ ଜଗଦ୍ଦେବ ବେଗୁନିଆ- ବୋଲଗଡ଼ ନିର୍ବାଚନମଣ୍ଡଳୀ ଅନ୍ତର୍ଗତ କାଉଁରିଆ ପାଟଣା ୧୧୪ ନମ୍ବର ବୁଥରେ ଗଣ୍ଡଗୋଳ କରିଥିବା ଅଭିଯୋଗ ହୋଇଥିଲା। ପୋଲିଂ କର୍ମଚାରୀଙ୍କୁ ଧମକ ଦେବା ଓ ଇଭିଏମ୍ ଭାଙ୍ଗିବା ଭଳି ଅଭିଯୋଗ ହୋଇଥିଲା । ଗଣ୍ଡଗୋଳ ପରେ ସାଂସଦ ଅପରାଜିତା ଷଡ଼ଙ୍ଗୀଙ୍କ ଗାଡ଼ିରେ ଫେରାର ହେବାକୁ ଉଦ୍ୟମ କରିବା ବେଳେ ପୋଲିସ ତାଙ୍କୁ ଅଟକ ରଖିଥିଲା। ପ୍ରିଜାଇଡିଂ ଅଫିସରଙ୍କ ଅଭିଯୋଗକ୍ରମେ ପ୍ରଶାନ୍ତ ଜଗଦ୍ଦେବଙ୍କୁ ପୋଲିସ ଗିରଫ କରି ଜେଲ ପଠାଇଥିଲା । ବର୍ତ୍ତମାନ ପ୍ରଶାନ୍ତ ଜଗଦ୍ଦେବ କଟକ ଏସସିବି ମେଡିକାଲରେ ଚିକିତ୍ସାଧୀନ ଅଛନ୍ତି ।
ଚୁପ୍ ରଖିବା ଲାଗି ପର୍ଣ୍ଣଷ୍ଟାର ଷ୍ଟର୍ମି ଡାନିଏଲ୍ସଙ୍କୁ ବେଆଇନ ଅର୍ଥ ପ୍ରଦାନ, ଆମେରିକାର ପୂର୍ବତନ ରାଷ୍ଟ୍ରପତି ଡୋନାଲଡ ଟ୍ରମ୍ପ ଦୋଷୀ ସାବ୍ଯସ୍ତ
ନନ୍ଦିଘୋଷ ବ୍ୟୁରୋ: ଆମେରିକା ଇତିହାସରେ ପ୍ରଥମ ଥର ଲାଗି ଜଣେ ପୂର୍ବତନ ରାଷ୍ଟ୍ରପତି ଡୋନାଲଡ ଟ୍ରମ୍ପ ବିଭିନ୍ନ ଅପରାଧିକ ମାମଲାରେ ହୋଇଛନ୍ତି ଦୋଷୀ ସାବ୍ଯସ୍ତ। ୨୦୧୬ ନିର୍ବାଚନ କାଳରେ ପର୍ଣ୍ଣଷ୍ଟାର ଷ୍ଟର୍ମି ଡାନିଏଲସଙ୍କୁ ଚୁପ୍ କରିବା ଲାଗି ଯେଉଁ ବେଆଇନ ଅର୍ଥ ପ୍ରଦାନ କରିଥିଲେ ସେହି ମାମଲାରେ ତାଙ୍କୁ ଦୋଷୀ ସାବ୍ଯସ୍ତ କରିଛନ୍ତି ନ୍ୟୁୟର୍କ କୋର୍ଟ। କ୍ରମାଗତ ଦୁଇ ଦିନ ଧରି ଚାଲିଥିବା ଶୁଣାଣି ପ୍ରକ୍ରିୟାର ଅବସାନ ଘଟାଇ ୧୨ ଜଣିଆ ବିଚାରପତି ମଣ୍ଡଳୀ ଟ୍ରମ୍ପଙ୍କୁ ୩୪ଟି ମାମଲାରେ ଦୋଷୀ ସାବ୍ଯସ୍ତ କରିଛନ୍ତି। ଆସନ୍ତା ଜୁଲାଇ ୧୧ରେ ଟ୍ରମ୍ପଙ୍କ ବିରୋଧରେ ଦଣ୍ଡ ଧାର୍ଯ୍ୟ କରିବାକୁ ଘୋଷଣା କରିଛନ୍ତି ବିଚାରପତି। ତେବେ ଜୁଲାଇ ୧୫ରେ ରିପବ୍ଲିକାନ ନ୍ଯାସନାଲ କନଭେନସନ ହେବାକୁ ଯାଉଥିବାବେଳେ କୋର୍ଟଙ୍କ ଏହି ନିର୍ଦ୍ଦେଶ ଟ୍ରମ୍ପଙ୍କ ଲାଗି ସମସ୍ୟା ଠିଆ କରିବ ବୋଲି ସୂଚନା ମିଳିଛି। ଆସନ୍ତା ନଭେମ୍ବର ୫ରେ ଆମେରିକା ରାଷ୍ଟ୍ରପତି ନିର୍ବାଚନ ହେବାକୁ ଯାଉଥିବାବେଳେ ଟ୍ରମ୍ପଙ୍କୁ ଦୋଷୀ ସାବ୍ଯସ୍ତ କରାଯିବା ଘଟଣା ଜାତୀୟ ରାଜନୀତିର ହଟଚମଟ ସୃଷ୍ଟି କରିଛି। ଏହି ମାମଲା ଅନୁସାରେ ଟ୍ରମ୍ପଙ୍କୁ ୪ ବର୍ଷ ଜେଲଦଣ୍ଡ ମିଳିବା ସମ୍ଭାବନା ରହିଛି। ତେବେ ସେ ଜେଲଦଣ୍ଡ ଭୋଗିଲେ ବି ନିର୍ବାଚନ ପ୍ରଚାର କରିପାରିବେ ଏବଂ ଏପରିକି ଯଦି ବିଜୟୀ ହୁଅନ୍ତି ତେବେ ରାଷ୍ଟ୍ରପତି ପଦରେ ଅଭିଷିକ୍ତ ହୋଇପାରିବେ। ସେପଟେ ଟ୍ରମ୍ପ କହିଛନ୍ତି ସେ କିଛି ଭୁଲ କରିନାହାନ୍ତି ଏବଂ କୋର୍ଟ ରାୟ ବିରୋଧରେ ଅପିଲ କରିବେ। ଷ୍ଟର୍ମି ଡାନିଏଲସଙ୍କୁ ଟଙ୍କା ଦେବା ଲାଗି ଟ୍ରମ୍ପ ଅନେକ ଜାଲ୍ ପନ୍ଥା ଅବଲମ୍ବନ କରି ନଥି ପ୍ରସ୍ତୁତ କରିଥିଲେ ବୋଲି ଅଭିଯୋଗ ହୋଇଥିଲା।