ଭୁବନେଶ୍ୱର : ଶଙ୍ଖ ଭବନରେ ବିଜେଡିର ମିଶ୍ରଣ ପର୍ବ । ବିଜୁ ଜନତା ଦଳରେ ସାମିଲ ହେଲେ ଦଶପଲ୍ଲା ଏନଏସି ଅଧ୍ୟକ୍ଷା ଇଂଜିନିୟର ପୁନମ ପ୍ରିୟଦର୍ଶିନୀ । ରାଜ୍ୟସଭା ସାଂସଦ ସସ୍ମିତ ପାତ୍ର, ପୂର୍ବତନ ମନ୍ତ୍ରୀ ଅରୁଣ କୁମାର ସାହୁ, ଦଶପଲ୍ଲା ବିଧାୟକ ରମେଶ ଚନ୍ଦ୍ର ବେହେରା, ବିଜେଡି ମୁଖପାତ୍ର ପ୍ରିୟବ୍ରତ ମାଝୀଙ୍କ ଉପସ୍ଥିତିରେ ପୂନମ ବିଜୁଜନତା ଦଳରେ ଯୋଗ ଦେବା ସହ ଏକାଧିକ ସମର୍ଥକ ସାମିଲ ହୋଇଛନ୍ତି । ସାଂସଦ ସସ୍ମିତ ପାତ୍ର ପୁନମଙ୍କୁ ଦଳକୁ ସ୍ୱାଗତ କରିଥିଲେ । ପୁନମ ପ୍ରିୟଦର୍ଶିନୀ ଦଳରେ ସାମିଲ ହେବା ପରେ ମୁଖ୍ୟମନ୍ତ୍ରୀଙ୍କୁ କୃତଜ୍ଞତା ଜଣାଇଛନ୍ତି ଏବଂ ସାଂଗଠନିକ ସଂପାଦକ ପ୍ରଣବ ପ୍ରକାଶ ଦାସ, ରାଜ୍ୟସଭା ସାଂସଦ ସସ୍ମିତ ପାତ୍ର , ବିଧାୟକ ଅରୁଣ ସାହୁଙ୍କୁ ଧନ୍ୟବାଦ ଜଣାଇଛନ୍ତି । ଓଡ଼ିଶାର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଆଦର୍ଶ ଓ ନେତୃତ୍ୱ ପ୍ରତି ଆକର୍ଷିତ ହୋଇ ବିଜେଡିରେ ପୁନମ ପ୍ରିୟଦର୍ଶୀ ଯୋଗ ଦେଇଛନ୍ତି। ସେ ସ୍ବାଧୀନ ଭାବରେ ଦଶପଲ୍ଲା ଏନ୍ ଏ ସି ର ଚେୟାରମେନ୍ ଭାବେ ନିର୍ବାଚିତ ହୋଇ କାର୍ଯ୍ୟ କରୁଥିଲେ । ସମସ୍ତଙ୍କ ସହଯୋଗରେ ଦଶପଲ୍ଲାର ବିକାଶ ହେବ ବୋଲି ସେ କହିଛନ୍ତି। ଦିନକୁ ଦିନ ବିଜୁଜନତା ଦଳ ଶକ୍ତିଶାଳୀ ହେଉଛି । ଆଗକୁ ଏଇ ଧାରା ଜାରି ରହିବ ବୋଲି ଅରୁଣ କୁମାର ସାହୁ ଦମ୍ଭୋକ୍ତି କରିଛନ୍ତି।
ନିର୍ବାଚନ ପୂର୍ବରୁ ଷ୍ଟ୍ରଙ୍ଗ ରୁମକୁ ଆସିଲା ଇଭିଏମ
ଖୋର୍ଦ୍ଧା : ନିର୍ବାଚନ ପୂର୍ବରୁ ଷ୍ଟ୍ରଙ୍ଗ ରୁମକୁ ଆସିଛି ଇଭିଏମ । କଡା ସୁରକ୍ଷା ବଳୟରେ ଖୋର୍ଦ୍ଧା ସ୍ଥିତ ପଣ୍ୟଗାରରୁ ବିଜେବି ସ୍ୱୟଂଶାସିତ ମହାବିଦ୍ୟାଳୟକୁ ଆସିଛି ଇଭିଏମ। ଭୁବନେଶ୍ୱର ଲୋକସଭା କ୍ଷେତ୍ରର ୫ଟି ନିର୍ବାଚନ ମଣ୍ଡଳୀ ତଥା ଜଟଣୀ, ଉତ୍ତର, ମଧ୍ୟ, ଏକାମ୍ର ଓ ଜୟଦେବ ନିର୍ବାଚନ ଲାଗି ଇଭିଏମ ଆସି ପହଞ୍ଚିଛି । ପାଞ୍ଚଟି ଫ୍ଲୋରରେ ଗୋଟିଏ ବିଧାନସଭା ଓ ନିର୍ବାଚନ ମଣ୍ଡଳୀର ଉଭୟ ଲୋକସଭା ଓ ବିଧାନସଭା ଲାଗି ଇଭିଏମ ରହିବା ବ୍ୟବସ୍ଥା ହୋଇଛି । ମୋଟ ୨୩୩୨ଟି ଇଭିଏମ ଆସିଛି। ଏହା ବାଦ ୨୫ ପ୍ରତିଶତ ଇଭିଏମ ସଂରକ୍ଷିତ ରହିବ । ଧଳା ରଙ୍ଗ ଗେଟ ଚିହ୍ନ ଥିବା ରୁମ ଗୁଡିକରେ ଲୋକସଭା କ୍ଷେତ୍ର ଲାଗି ଇଭିଏମ ରହିବ ଓ ଗୋଲାପୀ ରଙ୍ଗ ଗେଟ ରୁମରେ ବିଧାନସଭା କ୍ଷେତ୍ର ଲାଗି ଇଭିଏମ ରହିବ। ସିସିଟିଭି ବଳୟରେ ଷ୍ଟ୍ରଙ୍ଗ ରୁମ ରହିଛି । ଏ ନେଇ ବ୍ୟାପକ ପୋଲିସ ଫୋର୍ସ ମୁତୟନ କରାଯାଇଛି ।
ବିଲେଇକୁ ବଞ୍ଚାଇବାକୁ ଯାଇ ଗଲା ୫ ଜୀବନ
ମୁମ୍ବାଇ: ମହାରାଷ୍ଟ୍ରରେ ଘଟିଯାଇଛି ଅଭାବନୀୟ ଘଟଣା। ବିଲେଇକୁ ଉଦ୍ଧାର କରିବାକୁ ଯାଇ ୫ ଜଣଙ୍କର ମୃତ୍ୟୁ ହୋଇଛି । ଏହି ଘଟଣା ଅହମ୍ମଦ ନଗର ଜିଲ୍ଲାର ବୋଲି ଜଣାପଡିଛି।
ରିପୋର୍ଟ ଅନୁସାରେ, ଜିଲ୍ଲାର ନେବାସା ତହସିଲ ଅନ୍ତର୍ଗତ ଏକ ବିଲେଇ ବାୟୋଗ୍ୟାସ୍ ଭର୍ତ୍ତି କୂଅରେ ପଡ଼ିଯାଇଥିଲା। ତାକୁ ବଞ୍ଚାଇବାକୁ ଯାଇଥିବା ଜଣେ ପିଲା ବାହାରକୁ ନଆସିବାରୁ ଅନ୍ୟମାନେ ତଳକୁ ଓହ୍ଲାଇଥିଲେ । ଏମିତି ଭାବେ ପ୍ରାୟ ୬ ଜଣକ କୂଅକୁ ଓହ୍ଲାଇଥିଲେ। ତେବେ ବହୁ କଷ୍ଟରେ ଜଣକୁ ଜୀବନ୍ତ ଉଦ୍ଧାର କରାଯାଇଥିଲା ।
ଗୋବର ଭର୍ତ୍ତି ବାୟୋଗ୍ୟାସ୍ କୂଅରେ ଫସିବା ପରେ ସମସ୍ତେ ମୃତ୍ୟୁ ବରଣ କରିଛନ୍ତି। ପୋଲିସ ଏବଂ ତହସିଲଦାର ଘଟଣାସ୍ଥଳରେ ପହଞ୍ଚି ଆବଶ୍ୟକୀୟ ପଦକ୍ଷେପ ଗ୍ରହଣ କରିଥିଲେ । ଜଣେ ଅଧିକାରୀଙ୍କ କହିବାନୁଯାୟୀ, ଘଟଣାସ୍ଥଳରେ ଉଦ୍ଧାରକାରୀ ଦଳ ପହଞ୍ଚିବା ପରେ ଜଣେ ବ୍ୟକ୍ତିଙ୍କୁ ଉଦ୍ଧାର କରାଯାଇଥିଲା।
ପତଞ୍ଜଳି ମାମଲାର ଶୁଣାଣି; ରାମଦେବଙ୍କ ଉପରେ ବର୍ଷିଲେ ସୁପ୍ରିମକୋର୍ଟ
ନୂଆଦିଲ୍ଲୀ: ବିଜ୍ଞାପନ ଜରିଆରେ ଲୋକଙ୍କୁ ବିଭ୍ରାନ୍ତ କରାଯାଉଥିବା ଅଭିଯୋଗ ମାମଲା। ସୁପ୍ରିମକୋର୍ଟରେ ଉତ୍ତର ରଖିଲେ କେନ୍ଦ୍ର ସରକାର। ଆୟୁଷ କିମ୍ବା ଆଲୋପାଥିକ ଔଷଧ ମଧ୍ଯରୁ କେଉଁଟିକୁ ବାଛିବେ ତାହା ଜଣେ ବ୍ଯକ୍ତିଙ୍କର ନିଜସ୍ବ ଇଚ୍ଛା। ଏନେଇ ଲୋକଙ୍କୁ ପ୍ରଭାବିତ କରିବା ଅନୁଚିତ ବୋଲି ସୁପ୍ରିମକୋର୍ଟ ରେ କହିଛନ୍ତି କେନ୍ଦ୍ର ସରକାର।
ପତଞ୍ଜଳି ଆୟୁର୍ବେଦ ଓ ଏହାର ପ୍ରତିଷ୍ଠାତା ତଥା ଯୋଗଗୁରୁ ରାମଦେବ ଓ ତାଙ୍କ ସହଯୋଗୀ ବାଲକ୍ରିଷ୍ଣାଙ୍କ ବିରୋଧରେ ହୋଇଥିବା ମାମଲାର ଶୁଣାଣି କରିଛନ୍ତି ସୁପ୍ରିମକୋର୍ଟ। ଆଜି ମାମଲାର ଶୁଣାଣି ବେଳେ କୋର୍ଟରେ ହାଜର ହୋଇଥିଲେ ବାବା ରାମଦେବ। ଲୋକଙ୍କୁ ବିଜ୍ଞାପନ ଜରିଆରେ ବିଭ୍ରାନ୍ତ କରୁଥିବା ଅଭିଯୋଗ କ୍ରମେ ଯୋଗଗୁରୁଙ୍କୁ ଭର୍ତ୍ସନା କରିଥିଲେ ସର୍ବୋଚ୍ଚ ଅଦାଲତ। ଏହା ସହ ଉପଯୁକ୍ତ ସତ୍ଯପାଠ ଦାଖଲ କରି ନଥିବାରୁ ରାମଦେବ ଓ ବାଲକ୍ରିଷ୍ଣାଙ୍କ ଉପରେ କ୍ଷୁବ୍ଧ ହୋଇଛନ୍ତି ଅଦାଲତ।
ସେପଟେ ପତଞ୍ଜଳି ପ୍ରସଙ୍ଗରେ କେନ୍ଦ୍ର ଉପରେ ମଧ୍ୟ ବର୍ଷିଛନ୍ତି ସୁପ୍ରିମକୋର୍ଟ। ଏନେଇ ସୁପ୍ରିମକୋର୍ଟ କହିଛନ୍ତି ଯେ, ଏସବୁ ଦିଗରେ କେନ୍ଦ୍ର ସରକାର କିପରି ଆଖି ବନ୍ଦ କରି ବସିଛନ୍ତି। କେନ୍ଦ୍ର ସରକାର ନିଜ ସଫେଇରେ କହିଛନ୍ତି, ତଥାକଥିତ ମ୍ଯାଜିକ ମେଡିସିନଗୁଡିକର ବିଜ୍ଞାପନ ବିରୋଧରେ ପଦକ୍ଷେପ ନେବା ଲାଗି ରାଜ୍ଯଗୁଡିକୁ ନିର୍ଦ୍ଦେଶ ଦିଆଯାଇଛି। କୋଭିଡରୁ କୋରୋନିଲ ଔଷଧ ଉପଶମ ଦେଉଥିବା ନେଇ ପତଞ୍ଜଳି ପକ୍ଷରୁ ଯେଉ ବିଜ୍ଞାପନ ପ୍ରକାଶ କରାଯାଉଥିଲା ତାହାକୁ ସ୍ଥଗିତ କରିବା ଲାଗି ନିର୍ଦ୍ଦେଶ ଦେଇଛି ଆୟୁଷ ମନ୍ତ୍ରାଳୟ।
ବିଜେଡିରେ ମିଶିଲେ ବିଜେପି ଓ କଂଗ୍ରେସ ନେତା
ଭୁବନେଶ୍ୱର: ବିଜେଡିରେ ମିଶିଲେ ପ୍ରଭାସ ପାଣିଗ୍ରାହୀ। ଗତକାଲି ବଲାଙ୍ଗୀର ଜିଲ୍ଲା ବିଜେପି ସଭାପତି ପଦରୁ ଇସ୍ତଫା ଦେଇଥିଲେ ପ୍ରଭାସ। ପେଶାରେ ଜଣେ ଶିକ୍ଷାବିତ ଭାବେ ପରିଚିତ ପ୍ରଭାସ ବଲାଙ୍ଗୀରରେ ବିଜେପିକୁ ସୁଦୃଢ କରିବାରେ ମୁଖ୍ୟ ଭୂମିକା ଗ୍ରହଣ କରିଥିଲେ ।
ଶଙ୍ଖ ଭବନରେ ପ୍ରଭାସଙ୍କ ସହ ସୌରମ୍ୟ ବବିଚ, ବିନୋଦ ବିହାରୀ ନାଗ ମଧ୍ୟ ଦଳରେ ସାମିଲ ହୋଇଛନ୍ତି। ସେମାନେ ବିଜେପି ଛାଡି ବିଜେଡିରେ ମିଶିବାପରେ ଦଳର ଶକ୍ତି ବୃଦ୍ଧି ହୋଇଥିବା ସାଂସଦ ସସ୍ମିତ ପାତ୍ର କହିଛନ୍ତି । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ, ସାଙ୍ଗଠନିକ ସମ୍ପାଦକ ପ୍ରଣବ ପ୍ରକାଶ ଦାସଙ୍କ ପକ୍ଷରୁ ସମସ୍ତଙ୍କୁ ଦଳକୁ ସ୍ୱାଗତ କରିଛନ୍ତି ସାଂସଦ ସସ୍ମିତ ପାତ୍ର ଓ ବଲାଙ୍ଗୀର ବିଜେଡି ବିଧାୟକ ପ୍ରାର୍ଥୀ କଳିକେଶ ନାରାୟଣ ସିଂଦେଓ।
ମୁଖ୍ଯମନ୍ତ୍ରୀଙ୍କ କାମରୁ ପ୍ରେରଣା ପାଇ ସେ ବିଜେଡିରେ ମିଶିଛନ୍ତି । ମିଶିକି ବଲାଙ୍ଗୀରର ବିକାଶ କରିବୁ ବୋଲି କହିଛନ୍ତି କଳିକେଶ ସିଂଦେଓ । ସେପଟେ ଦଳରେ ଭାଇ ପରି କାମ କରିବେ ବୋଲି କହିଛନ୍ତି ପ୍ରଭାସ ପାଣିଗ୍ରାହୀ । କେନ୍ଦ୍ର ବିଜେପି କଂଗ୍ରେସ ମୁକ୍ତ ଭାରତ ନାରା ଦେଉଥିବାବେଳେ ବଲାଙ୍ଗୀରରେ କଂଗ୍ରେସ ଯୁକ୍ତ ବିଜେପି ଚାଲିଛି । ଯେଉଁଥିପାଇଁ ସେ ବିଜେପି ଛାଡିଲେ। ବିଜେଡିରେ ରହି ସ୍ବାଭିମାନର ସହ ସହଭାଗିତା ନେଇ କାମ କରିବେ ବୋଲି କହିଛନ୍ତି ପ୍ରଭାସ।
ଅପରପକ୍ଷେ, ବିଜେଡିରେ ମିଶିଲେ ସୁନ୍ଦରଗଡ଼ ଜିଲ୍ଲା ରଘୁନାଥପାଲ୍ଲୀର ପ୍ରଫୁଲ୍ଲ ସୁନିଆନି। ସେ କଂଗ୍ରେସ ଛାଡି ବିଜେଡିରେ ସାମିଲ ହୋଇଛନ୍ତି। ୨୦୦୯ରେ ସେ କଂଗ୍ରେସ ଟିକେଟରୁ ରଘୁନାଥପାଲ୍ଲୀ ବିଧାନସଭାରୁ ନିର୍ବାଚନ ଲଢ଼ି ପରାସ୍ତ ହୋଇଥିଲେ। ସେ ସୁନ୍ଦରଗଡ଼ ଛାତ୍ର ଓ ଯୁବ କଂଗ୍ରେସର ସଭାପତି ଭାବେ କାର୍ଯ୍ୟ କରିଛନ୍ତି।
ମହଙ୍ଗା ପଡିଲା ରାଜନୈତିକ ସଭାରେ ଯୋଗଦେବା; ୧୦୬ ସରକାରୀ ଅଧିକାରୀ ନିଲମ୍ବିତ
ମେଡାକ: ମହଙ୍ଗା ପଡିଲା ରାଜନୈତିକ ସଭାରେ ଯୋଗଦାନ। ଭାରତ ରାଷ୍ଟ୍ର ସମିତିର ଏକ କାର୍ଯ୍ୟକ୍ରମରେ ଯୋଗ ଦେବା କାରଣରୁ ୧୦୬ ସରକାରୀ ଅଧିକାରୀଙ୍କୁ ସସପେଣ୍ଡ କରିଛନ୍ତି ନିର୍ବାଚନ କମିଶନ। ତେଲଙ୍ଗାନା ମେ଼ଡାକ ଆସନରୁ ବିଆରଏସ ପ୍ରାର୍ଥୀ ତଥା ପୂର୍ବତନ ଆଇଏଏସ ଅଧିକାରୀ ପି. ଭେଙ୍କଟରମଣ ରେଡ୍ଡୀଙ୍କ ଏକ ନିର୍ବାଚନୀ କାର୍ଯ୍ୟକ୍ରମରେ ଯୋଗଦେବା ଅଭିଯୋଗରେ ଇସିଆଇ ନେଇଛନ୍ତି କଡ଼ା ପଦକ୍ଷେପ।
ଇସିଆଇର ଅଭିଯୋଗ ଥିଲା ଯେ, ଗତ ଏପ୍ରିଲ ୭ରେ ମେଡାକ ସଂସଦୀୟ କ୍ଷେତ୍ର ଅଧୀନସ୍ଥ ସିଦ୍ଦିପେଟ ବିଧାନସଭା ମଣ୍ଡଳୀରେ ଭେଙ୍କଟରମଣ ଏକ କାର୍ଯ୍ୟକ୍ରମ କରିଥିଲେ। ମାତ୍ର ସ୍ଥାନୀୟ ନିର୍ବାଚନ ଅଧିକାରୀଙ୍କଠାରୁ ସେ କୌଣସି ଅନୁମତି ନେଇନଥିଲେ। ଏହି ସଭାରେ ଭିଜୁଆଲ ସିସିଟିଭିରେ କଏଦ ହୋଇଥିଲା। ଆଚରଣ ସଂହିତାର ଗୁରୁତର ଉଲ୍ଲଂଘନ ହେତୁ ସଭାରେ ଯୋଗଦେଇଥିବା ୧୦୬ ସରକାରୀ କର୍ମଚାରୀଙ୍କ ବିରୋଧରେ ନିର୍ବାଚନ କମିଶନ କଡା ପଦକ୍ଷେପ ନେଇଛନ୍ତି।
ଏହି ଘଟଣାରେ ପ୍ରାର୍ଥୀ ଭେଙ୍କଟରମଣଙ୍କ ସମେତ ବିଆରଏସ ନେତାଙ୍କ ବିରୋଧରେ ଏଫଆଇଆର ରୁଜୁ ହୋଇଛି। ସସପେଣ୍ଡ ହୋଇଥିବା କର୍ମଚାରୀଙ୍କ ମଧ୍ୟରେ ଅଛନ୍ତି ଟେକନିକାଲ ଆସିଷ୍ଟାଣ୍ଟ, ଇଞ୍ଜିନିୟରିଂ କନସଲଟାଣ୍ଟ, କମ୍ପ୍ୟୁଟର ଅପରେଟର, କମ୍ୟୁନିଟି କୋଅର୍ଡିନେଟର, ଗ୍ରାମ୍ୟ ସଂଯୋଜକ, ଅଡିଟର ପ୍ରମୁଖ। ସେମାନଙ୍କ ମଧ୍ୟରୁ ଅଧିକାଂଶ ଥିଲେ ଡିଆରଡିଏର କର୍ମଚାରୀ। ଏହି ବେଆଇନ ସଭା ନେଇ ବିଜେପି ପ୍ରାର୍ଥୀ ରଘୁନନ୍ଦନ ରାଓ ସହକାରୀ ରିଟର୍ଣ୍ଣିଂ ଅଧିକାରୀ, ଆରଡିସି ଓ ଡିଆରଡିଏ କର୍ତ୍ତୃପକ୍ଷଙ୍କ ନିକଟରେ ଅଭିଯୋଗ କରିଥିଲେ। ଆସନ୍ତା ମେ ୧୩ରେ ଗୋଟିଏ ପର୍ଯ୍ୟାୟରେ ହେବ ତେଲଙ୍ଗାନାରେ ଲୋକସଭା ନିର୍ବାଚନ।ତା ପୂର୍ବରୁ ଏହି ଘଟଣା ରାଜନୈତିକ ସ୍ତରରେ ଚର୍ଚ୍ଚାର କାରଣ ହୋଇଛି।
ଓଆରଏଚଡିସି ଦୁର୍ନୀତି ମାମଲାରେ ମହମ୍ମଦ ମୋକିମଙ୍କୁ ହାଇକୋର୍ଟରୁ ଶକ୍ତ ଝଟକା
କଟକ: ବାରବାଟୀ କଟକ ବିଧାୟକ ମହମ୍ମଦ ମୋକିମଙ୍କୁ ହାଇକୋର୍ଟରୁ ଶକ୍ତ ଝଟକା। ଓଆରଏଚଡିସି ଦୁର୍ନୀତି ମାମଲାରେ ଭିଜିଲାନ୍ସ କୋର୍ଟ ଦେଇଥିବା ରାୟକୁ କାଏମ ରଖିଲେ ହାଇକୋର୍ଟ। ଭିଜିଲାନ୍ସ କୋର୍ଟରୁ ମୋକିମ ଦୋଷୀ ସାବ୍ୟସ୍ତ ହେବା ସହିତ ତାଙ୍କୁ ୩ ବର୍ଷ ଜେଲ ଦଣ୍ଡାଦେଶ ହୋଇଥଲା। ଏହାକୁ ଚ୍ୟାଲେଞ୍ଜ କରି ମୋକିମ ହାଇକୋର୍ଟଙ୍କ ଦ୍ଵାରସ୍ଥ ହୋଇଥିଲେ।
ଏହି ମାମଲାରେ ମୋକିମ ହାଇକୋର୍ଟଙ୍କ ଦ୍ୱାରସ୍ଥ ହୋଇଥିବା ବେଳେ ତାଙ୍କ ଆବେଦନକୁ ଖାରଜ କରି ନିମ୍ନ ଅଦାଲତଙ୍କ ରାୟକୁ କାଏମ୍ ରଖିଛନ୍ତି ହାଇକୋର୍ଟ । ମୋକିମଙ୍କ ସହିତ ପୂର୍ବତନ ଆଇଏଏସ୍ ଅଫିସର ବିନୋଦ କୁମାର, କମ୍ପାନୀ ସେକ୍ରେଟାରୀ ସ୍ୱସ୍ତିରଂଜନ ମହାନ୍ତି ଓ ମେଟ୍ରୋ ବିଲଡର୍ସର ନିର୍ଦ୍ଦେଶକ ପୀୟୂଷ ମହାନ୍ତିଙ୍କୁ ମଧ୍ୟ ୩ ବର୍ଷ ଲେଖାଏଁ ଜେଲ୍ ଦଣ୍ଡାଦେଶ ଶୁଣାଇଥିଲେ କୋର୍ଟ। ସେମାନଙ୍କୁ ଜେଲ୍ ଦଣ୍ଡାଦେଶ ସହ ସମସ୍ତଙ୍କ ଉପରେ ୫୦ ହଜାର ଟଙ୍କା ଲେଖାଏଁ ଜରିମାନା ଲଗାଇଥିଲେ କୋର୍ଟ। ଜରିମାନା ଅନାଦେୟ ହେଲେ ଅଧିକ ୬ ମାସ ଜେଲରେ ରହିବେ ବୋଲି କୋର୍ଟ ତାଙ୍କ ରାୟରେ କହିଥିଲେ। ଏହି ମାମଲାରେ ତଳ କୋର୍ଟଙ୍କ ରାୟ ବିରୋଧରେ ହାଇକୋର୍ଟ ଯିବାକୁ କହିଥିବା ବେଳେ ଆଜି ମୋକିମଙ୍କୁ ଶକ୍ତ ଝଟକା ଲାଗିଛି।
ଗତ ୨୦୨୨ ସେପ୍ଟେମ୍ବର ୨୯ ତାରିଖରେ ସ୍ବତନ୍ତ୍ର ଭିଜିଲାନ୍ସ କୋର୍ଟ ମୋକିମଙ୍କ ବିରୋଧରେ ଦଣ୍ଡାଦେଶ ଶୁଣାଇଥିଲେ। ଏହା ବିରୋଧରେ ମୋକିମ ହାଇକୋର୍ଟରେ ଅପିଲ କରିଥିଲେ। ହାଇକୋର୍ଟ ୨୦୨୨ ଅକ୍ଟୋବର ୧୯ ତାରିଖରେ ମୋକିମଙ୍କ ଦଣ୍ଡାଦେଶ ଉପରେ ରହିତାଦେଶ ଦେବା ସହ ଶୁଣାଣୀ ଜାରି ରଖିଥିଲେ। ହାଇକୋର୍ଟଙ୍କ ଏହି ରାୟକୁ ଚ୍ଯାଲେଞ୍ଜ କରି ଭିଜିଲାନ୍ସ ସୁପ୍ରିମକୋର୍ଟଙ୍କ ଦ୍ବାରସ୍ଥ ହୋଇଥିଲେ। ସୁପ୍ରିମକୋର୍ଟ ଗତ ସେପ୍ଟେମ୍ବର ୨୨ ତାରିଖରେ ଏହି ମାମଲାର ଶୁଣାଣୀ କରି ୬ ମାସରେ ଶୁଣାଣୀ ସାରିବାକୁ ହାଇକୋର୍ଟଙ୍କୁ ନିର୍ଦ୍ଦେଶ ଦେଇଥିଲେ। ତଦନୁଯାୟୀ ହାଇକୋର୍ଟ ଆଜି ଏହି ମାମଲାର ଶୁଣାଣୀ ଶେଷ କରିବା ସହ ସ୍ବତନ୍ତ୍ର ଭିଜିଲାନ୍ସ କୋର୍ଟଙ୍କ ରାୟକୁ କାଏମ ରଖିଛନ୍ତି।
ମହାପ୍ରଭୁଙ୍କୁ ଦର୍ଶନ କଲେ ମଣିପୁର ରାଜ୍ୟପାଳ
ପୁରୀ: ଶ୍ରୀମନ୍ଦିର ଯାଇ ମହାପ୍ରଭୁଙ୍କୁ ଦର୍ଶନ କରିଛନ୍ତି ମଣିପୁର ରାଜ୍ୟପାଳ ଅନୁସୟା ଉଇକି। କଡା ସୁରକ୍ଷା ମଧ୍ୟରେ ପୁରୀରେ ପହଞ୍ଚିବା ପରେ ପୁରୀ ପ୍ରଶାସନ ତରଫରୁ ରାଜ୍ୟପାଳଙ୍କୁ ଭବ୍ୟ ସ୍ବାଗତ କରାଯାଇଥିଲା। ଶ୍ରୀମନ୍ଦିରରେ ମହାପ୍ରଭୁଙ୍କୁ ଦର୍ଶନ କରିବା ସହିତ ପାର୍ଶ୍ବ ଦେବାଦେବୀଙ୍କୁ ଦର୍ଶନ କରି ଆଶିର୍ବାଦ ନେଇଥିଲେ।
ଶ୍ରୀମନ୍ଦିରରୁ ବାହାରିବା ପରେ ଶ୍ରୀମନ୍ଦିର ପ୍ରଶାସନ ତରଫରୁ ମହାପ୍ରଭୁଙ୍କ ଲାଗି ଖଣ୍ଡୁଆ ଓ ଜଗନ୍ନାଥଙ୍କ ଏକ ପୁସ୍ତକ ତାଙ୍କୁ ପ୍ରଦାନ କରାଯାଇଥିଲା। ମହାପ୍ରଭୁଙ୍କ ଦର୍ଶନ କରି ସେ ବେଶ୍ ଖୁସି ପ୍ରକଟ କରିବା ସହ ସମଗ୍ର ଦେଶରେ ଖୁସିର ବାତାବରଣ ରହୁ ଓ ବିଶେଷ କରି ମଣିପୁରରେ ଚାଲିଥିବା ହିଂସା ଦୂର ହୋଇ ଖୁସିର ବାତାବରଣ ଫେରିଆସୁ ବୋଲି ମହାପ୍ରଭୁଙ୍କୁ ପ୍ରାର୍ଥନା କରିଥିଲେ।
ବିଶ୍ବରେ ପ୍ରତିବର୍ଷ ପ୍ରାୟ ୧୩ ଲକ୍ଷ ଲୋକଙ୍କ ଜୀବନ ନେଉଛି ହେପାଟାଇଟିସ
ନୂଆଦିଲ୍ଲୀ: ବିଶ୍ବରେ ମାରାତ୍ମକ ରୂପ ନେଉଛି ହେପାଟାଇଟିସ। ବିଶ୍ବରେ ପ୍ରତିବର୍ଷ ପ୍ରାୟ ୧୩ ଲକ୍ଷ ଲୋକଙ୍କ ଜୀବନ ନେଉଛି ହେପାଟାଇଟିସ। ଯକ୍ଷ୍ମାରେ ପ୍ରତିବର୍ଷ ଯେତିକି ଜୀବନ ଯାଉଛି ହେପାଟାଇଟିସରେ ବି ସେତିକି ଜୀବନ ଯାଉଛି ବୋଲି କହିଛି ବିଶ୍ବ ସ୍ବାସ୍ଥ୍ୟ ସଂଗଠନ। ୧୮୭ଟି ରାଷ୍ଟ୍ରକୁ ନେଇ ପ୍ରସ୍ତୁତ ୨୦୨୪ ଗ୍ଲୋବାଲ ହେପାଟାଇଟିସ ରିପୋର୍ଟରେ କୁହାଯାଇଛି ଯେ, ଭାଇରାଲ ହେପାଟାଇଟିସ ୨୦୧୯ରେ ବିଶ୍ବରେ ପ୍ରାୟ ୧୧ ଲକ୍ଷ ଲୋକ ପ୍ରାଣ ହରାଇଥିଲେ। ୨୦୨୨ରେ ସେହି ସଂଖ୍ୟା ହୋଇଥିଲା ୧୩ ଲକ୍ଷ ।
ସେମାନଙ୍କ ମଧ୍ୟରୁ ହେପାଟାଇଟିସ-ବିରେ ୮୩ ପ୍ରତିଶତ ଓ ହେପାଟାଇଟିସ-ସିରେ ୧୭ ପ୍ରତିଶତ ଲୋକପ୍ରାଣ ହରାଇଥିଲେ। ହେପାଟାଇଟିସ-ବି ଓ ହେପାଟାଇଟିସି-ସି ଯୋଗୁ ଦୈନିକ ୩ ହଜାର ୫୦୦ ଲୋକ ପ୍ରାଣ ହରାଉଥିବା ରିପୋର୍ଟରେ ଦର୍ଶାଯାଇଛି। କେବଳ ଭାରତ, ବାଂଲାଦେଶ, ଚୀନ, ଇଥିଓପିଆ, ଇଣ୍ଡୋନେସିଆ, ନାଇଜେରିଆ, ପାକିସ୍ତାନ, ଫିଲିପାଇନସ, ରୁଷିଆ ଓ ଭିଏତନାମରେ ମୋଟ ମୃତ୍ୟୁ ସଂଖ୍ୟାର ଦୁଇ ତୃତୀୟାଂଶ ଘଟିଥାଏ। ଏହି ୧୦ଟି ରାଷ୍ଟ୍ରରେ ହେପାଟାଇଟିସର ନିରାକରଣ, ଚିକିତ୍ସା, ନିରୂପଣ ଆଦି ନିମନ୍ତେ ଗୁରୁତ୍ବ ଦିଆଯାଇଥିବା କହିଛି ବିଶ୍ବ ସ୍ବାସ୍ଥ୍ୟ ସଂଗଠନ।
ବିଶେଷ କରି ରୋଗ ନିରୂପଣ ଓ ଚିକିତ୍ସାରେ ଅବହେଳା ଯୋଗୁ ମୃତ୍ୟୁ ସଂଖ୍ଯା ଅଧିକ ହେଉଛି ବୋଲି ବିଶ୍ବ ସ୍ବାସ୍ଥ୍ୟ ସଂଗଠନର ନିର୍ଦ୍ଦେଶକ କହିଛନ୍ତି। ବିଶ୍ବରେ ୨୦୨୨ରେ ହେପାଟାଇଟିସ-ବିରେ ୨୫୪ନିୟୁତ ଲୋକ ଓ ହେପାଟାଇଟିସ-ସିରେ ୫୦ ନିୟୁତ ଲୋକ ଆକ୍ରାନ୍ତ ହୋଇଥିଲେ। ୧୮ ବର୍ଷରୁ କମ୍ ବୟସର ପିଲାଙ୍କ ସଂଖ୍ଯା ୧୨ ପ୍ରତିଶତ ବୋଲି ଜଣାଯାଇଛି। ହେପାଟାଇଟିସର ଲକ୍ଷଣଗୁଡ଼ିକ ହେଲା- ଜ୍ବର, ସ୍ଥାଣୁତା, କ୍ଷୁଧାହାନି, ବାନ୍ତି ବାନ୍ତି ଲାଗିବା, ବାନ୍ତି, ତଳିପେଟ ଯନ୍ତ୍ରଣା, କଳା ପରିସ୍ରା, ଆଣ୍ଠୁଗଣ୍ଠି ଯନ୍ତ୍ରଣା ଓ ଜଣ୍ଡିସ ।
ପ୍ରଦୀପ ପାଣିଗ୍ରାହୀଙ୍କ ବିରୋଧରେ CEOଙ୍କ ନିକଟରେ ଫେରାଦ ହେଲା ବିଜେଡି
ଭୁବନେଶ୍ୱର: ବ୍ରହ୍ମପୁର ଲୋକସଭା ଆସନରୁ ନିର୍ବାଚନ ଲଢୁଥିବା ବିଜେପି ପ୍ରାର୍ଥୀ ପ୍ରଦୀପ ପାଣିଗ୍ରାହୀଙ୍କ ବିରୋଧରେ ରାଜ୍ଯ ମୁଖ୍ଯ ନିର୍ବାଚନ ଅଧିକାରୀଙ୍କୁ ଭେଟି ଫେରାଦ ହେଲା ବିଜେଡି। ନିର୍ବାଚନରେ ନିୟୋଜିତ ସରକାରୀ ଅଧିକାରୀ ଓ କର୍ମଚାରୀଙ୍କୁ ନାଲି ଆଖି ଦେଖାଉଥିବା ନେଇ ବିଜେଡିର ଏକ ଟିମ ସିଇଓଙ୍କୁ ଭେଟି ଫେରାଦ ହୋଇଛି ।
ପ୍ରଦୀପଙ୍କ କଥା ନ ମାନିଲେ ତାଙ୍କୁ ବଦଳି କରିଦେବା ପାଇଁ ବ୍ରହ୍ମପୁରର ସରକାରୀ କର୍ମଚାରୀ ଓ ଅଧିକାରୀଙ୍କୁ ଧମକ ଦେଉଛନ୍ତି। ସେଥିପାଇଁ ପ୍ରଦୀପଙ୍କ ବିରୁଦ୍ଧରେ ସିଇଓଙ୍କୁ କାର୍ଯ୍ୟାନୁଷ୍ଠନ ପାଇଁ ଦାବି କରିଛି ବିଜେଡି। ବିଜେଡି ସବୁବେଳେ ଗଣତନ୍ତ୍ରରେ ବିଶ୍ବାସ କରିଆସିଛି । ନିର୍ବାଚନ କମିଶନଙ୍କ ଉପରେ ମଧ୍ଯ ବିଜେଡି ବିଶ୍ବାସ ରଖିଆସିଛି । ତେଣୁ ଜନବିରୋଧୀ ନେତାଙ୍କ ନାଲି ଆଖି ବିରୋଧରେ ସିଇଓ କାର୍ଯ୍ଯାନୁଷ୍ଠାନ ଗ୍ରହଣ କରିବେ ବୋଲି ବିଜେଡି ପ୍ରକାଶ କରିଛି।