ଆଠମଲ୍ଲିକ: ବିଜେଡିର ଲୋକସଭା ପ୍ରାର୍ଥୀ ପ୍ରଣବ ପ୍ରକାଶ ଦାସଙ୍କ ପ୍ରଚାର ଜୋରଦାର। ବିଜେଡି ପକ୍ଷରୁ ପ୍ରଣବ ପ୍ରକାଶ ଦାସ ପ୍ରଚାର ମଇଦାନକୁ ଓହ୍ଲାଇଛନ୍ତି। ମୁଖ୍ୟମନ୍ତ୍ରୀଙ୍କ ବିକାଶ ଧାରାକୁ ଆଗେଇ ନେବା ପାଇଁ ଅଣ୍ଟା ଭିଡିଛନ୍ତି ପ୍ରଣବ। ଆଜି ଆଠମଲ୍ଲିକ ବିଧାନସଭା ନିର୍ବାଚନମଣ୍ଡଳୀରେ ପହଞ୍ଚି ମା’ ମାହେଶ୍ୱରୀ ମନ୍ଦିରରେ ପୂଜାର୍ଚ୍ଚନା କରିବା ସହିତ ଆଠମଲ୍ଲିକରେ ନିର୍ବାଚନ ପ୍ରଚାର କରିଛନ୍ତି।  ସାଙ୍ଗରେ ଅଛନ୍ତି ଆଠମଲ୍ଲିକ ବିଧାୟକ ପ୍ରାର୍ଥୀ ନଳିନୀକାନ୍ତ ପ୍ରଧାନ। ଲୋକଙ୍କୁ ଭେଟି ସମର୍ଥନ ସାଉଣ୍ଟୁଛନ୍ତି ପ୍ରଣବ।

ବାଲେଶ୍ୱର: ବିଶ୍ୱ ପ୍ରସିଦ୍ଧ ଚନ୍ଦନେଶ୍ଵର ଚଡକ ଯାତ୍ରାର ଆଜି ତୃତୀୟ ଅର୍ଘ୍ୟ। ଆଜି ଯାତ୍ରାର ମହାନ ପର୍ବ କାମିନା ବିବାହ। ଆଜି ମହାଦେବ କାମିନା ନାମକ ରାକ୍ଷସୀକୁ ବିବାହ କରିବେ। ଶୈବ ପୀଠରୁ ବିରାଟକାୟ ପଟୁଆରେ ବାହାରି ଭଟ୍ଟପୁର ସ୍ଥିତ ଦୁର୍ଗା ମନ୍ଦିରକୁ ଯାଇ ନୀତିକାନ୍ତି ଅନୁସାରେ କାମିନା ନାମକ ରାକ୍ଷସୀକୁ ବିବାହ କରି ମନ୍ଦିରକୁ ଫେରିବେ ଦେବ ଦେବ ମହାଦେବ।

ଗତକାଲି ଚତୁର୍ଥ ଅର୍ଘ୍ୟରେ ଲକ୍ଷାଧିକ ଭକ୍ତଙ୍କ ସମାଗମ ହେଇଥିବା ବେଳେ ଆଜି ମହାଦେବଙ୍କ ବିବାହ ଏବଂ ତୃତୀୟ ଅର୍ଘ୍ୟ ଥିବାରୁ ଦୁଇଲକ୍ଷରୁ ଉର୍ଦ୍ଧ୍ବ ଭକ୍ତଙ୍କ ସମାଗମ ହେବାନେଇ ଅନୁମାନ କରାଯାଉଛି। ଚଡକ ଯାତ୍ରାର ଦୁଇଟି ମୁଖ୍ୟ ଉତ୍ସବ ରହିଛି ନୀଳପର୍ବ ଏବଂ ପାଟ ପର୍ବ। ଏହି ଦୁଇଟି ପ୍ରମୁଖ ଉତ୍ସବରେ ୧୦ ଲକ୍ଷରୁ ଉର୍ଦ୍ଧ୍ବ ଭକ୍ତଙ୍କ ସମାଗମ ହେବାର ଅନୁମାନ କରାଯାଇଛି। ପ୍ରଶାସନ ତରଫରୁ ବ୍ୟାପକ ବନ୍ଦୋବସ୍ତ କରାଯାଇଛି।

ଭୁବନେଶ୍ୱର: ଭୁବନେଶ୍ୱର ୱାର୍ଡ ନମ୍ବର ୧୫ ଏକାମ୍ର କାନନ ପାର୍କରେ ବିଜୁ ଜନତା ଦଳର ଜନ ସଂପର୍କ ପଦଯାତ୍ରା। ଭୁବନେଶ୍ୱର ଲୋକସଭା ସାଂସଦ ପ୍ରାର୍ଥୀ କ୍ୟାପଟେନ ମନ୍ମଥ ରାଉତରାୟ, ଉତ୍ତର ବିଧାୟକ ପ୍ରାର୍ଥୀ ସୁଶାନ୍ତ ରାଉତ ଓ ମେୟର ସୁଲୋଚନା ଦାସ ଏକାମ୍ର ପାର୍କରେ ବୁଲି ଲୋକଙ୍କ ସହ ସମ୍ପର୍କ ଯୋଡି ଆଶୀର୍ବାଦ ଲୋଡିଛନ୍ତି।

ଏହାସହ ଏକାମ୍ର କାନନ ପରିସରରେ ବୁଲି ଲୋକଙ୍କ ସହ କଥା ହୋଇ ସୁଖ ଦୁଃଖ ବୁଝୁଛନ୍ତି ମନ୍ମଥ ଓ ସୁଶାନ୍ତ। ମାଆ, ମାଉସୀ ଓ ବରିଷ୍ଠ ନାଗରିକମାନେ ମନ୍ମଥଙ୍କୁ କୋଳେଇ ନେଇ ଆର୍ଶୀବାଦ ଦେଉଛନ୍ତି। ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଓ ତାଙ୍କ ଟିମର ସଦସ୍ୟ ହୋଇଥିବାରୁ ଲୋକ ଭଲପାଇବା ଦେଉଛନ୍ତି । ଏହି ଆର୍ଶୀବାଦ ଓ ସ୍ନେହକୁ ନେଇ ନିର୍ବାଚନରେ ବିଜୟଲାଭ କରିବେ ବୋଲି କହିଛନ୍ତି ମନ୍ମଥ ରାଉତରାୟ।