ନନ୍ଦିଘୋଷ ବ୍ୟୁରୋ: ଗଜପତି ଜିଲ୍ଲା କାଶୀନଗର ରେଳଷ୍ଟେସନ ଠାରେ ପୁରୀ-ଗୁଣୁପୁର ଏକ୍ସପ୍ରେସ ଟ୍ରେନର ଏସି ବଗିର ବ୍ରେକ ଚ୍ୟାମ୍ବରରେ ଲାଗିଲା ନିଆଁ । ପ୍ରବଳ ଗରମ ଯୋଗୁ ନିଆଁ ଲାଗିବା ସହ ଧୂଆଁ ବାହାରିଥିଲା । ନିଆଁ ଦେଖି ରେଳ କର୍ମଚାରୀ ମାନେ ସଙ୍ଗେସଙ୍ଗେ ନିଆଁ ଲିଭାଇଥିଲେ । ପୁରୀରୁ ଗୁଣୁପୁର ଅଭିମୁଖେ ଆସୁଥିବା ଏକ୍ସପ୍ରେସ ଟ୍ରେନ କାଶୀନଗର ରେଳଷ୍ଟେସନ ଠାରେ ପହଞ୍ଚି ରହିଥିବା ବେଳେ ଏସି ବଗିର ବ୍ରେକ ଚ୍ୟାମ୍ବରରୁ ଧୂଆଁ ଦେଖିଥିଲେ ଯାତ୍ରୀ । ରେଳ କର୍ମଚାରୀମାନେ ନିଆଁ ଲାଗିଥିବା ବଗି ପାଖରେ ପହଞ୍ଚି ନିଆଁକୁ ଆୟତ କରିଥିଲେ । ଘଟଣାରେ ରେଳ କିମ୍ବା ଯାତ୍ରୀଙ୍କ କୌଣସି କ୍ଷତି ହୋଇନଥିବା ସୂଚନା ।
ବିଜେପି ଟିକେଟ ପ୍ରଦାନକୁ ନେଇ ଜି-ଉଦୟଗିରିରେ ତେଜୁଛି ଅସନ୍ତୋଷ
ନନ୍ଦିଘୋଷ ବ୍ୟୁରୋ: ବିଜେପି ଟିକେଟ ପ୍ରଦାନକୁ ନେଇ ଜି-ଉଦୟଗିରିରେ ତେଜୁଛି ଅସନ୍ତୋଷ । ବିଜେପି ଦଳରୁ ଇସ୍ତପା ଦେଇଛନ୍ତି କୃଷକ ମୋର୍ଚ୍ଚା ଜିଲ୍ଲା ସଭାପତି ଅବନେଶ୍ଵର ପ୍ରଧାନ। ଜି.ଉଦୟଗିରି ନିର୍ବାଚନ ମଣ୍ଡଳିର ବିଧାୟକ ପ୍ରାର୍ଥୀ ମାନଗୋବିନ୍ଦ ପ୍ରଧାନଙ୍କ ଟିକେଟ ପ୍ରତ୍ୟାହାର କରିବା ପାଇଁ ଗତ ୩ ତାରିଖରେ ବିଜେପି କର୍ମ କର୍ତ୍ତା ଦାବି କରିଥିଲେ । ହେଲେ ଭାରତୀୟ ଜନତା ପାର୍ଟି ମାନଗୋବିନ୍ଦ ପ୍ରଧାନଙ୍କ ପ୍ରତି କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରି ନଥିବାରୁ ଆଜି କୃଷକ ମୋର୍ଚ୍ଚା ଜିଲ୍ଲା ସଭାପତି ଅବନେଶ୍ଵର ପ୍ରଧାନ ଭାରତୀୟ ଜନତା ପାର୍ଟିରୁ ପ୍ରାଥମିକ ସଭ୍ୟ ପଦରୁ ଇସ୍ତପା ଦେଇଛନ୍ତି। ଯଦି ମାନ ଗୋବିନ୍ଦ ପ୍ରଧାନଙ୍କ ଟିକେଟ ଭାରତୀୟ ଜନତା ପାର୍ଟି ପ୍ରତ୍ୟାହାର ନ କରେ ତେବେ ଆଗାମୀ ଦିନରେ ଘୁ.ଉଦୟଗିରି ନିର୍ବାଚନ ମଣ୍ଡଳୀର ଶତାଧିକ ବିଜେପି କର୍ମ କର୍ତ୍ତା ଦଳ ଛାଡ଼ିବା ପାଇଁ ନିଷ୍ପତ୍ତି ନେଇଛନ୍ତି।
ମଦୁରମା ଯାତ୍ରାବେଳେ ଓଲଟିଲା ଠାକୁରଙ୍କ ରଥ
ନନ୍ଦିଘୋଷ ବ୍ୟୁରୋ: କର୍ଣ୍ଣାଟକ ହୁସକୁରରେ ଅଘଟଣ। ଓଲଟିଲା ମର୍ଦୁମା ମନ୍ଦିର ରଥଯାତ୍ରାବେଳେ ଓଲଟିଲା ରଥ। ବେଙ୍ଗାଲୁରୁ ନିକଟ ଅନେକଲ ନିକଟ ହୁସକୁରରେ ଥିବା ଏହି ମନ୍ଦିରରେ ପ୍ରତିବର୍ଷ ରଥୟାତ୍ରା ପାଳିତ ହୋଇଥାଏ। ଆଜି ମଧ୍ୟ ଚାଲିଥିଲା ମଦୁର୍ମା ରଥଯାତ୍ରା। ରଥର ଉଚ୍ଚତା ଥିଲା ଶହେ ଫୁଟ। ଶ୍ରଦ୍ଧାଳୁ ରଥକୁ ଟାଣୁଥିବାବେଳେ ଭାରସାମ୍ଯ ହରାଇ ରଥଟି ତଳେ ପଡିଯାଇଥିଲା। ରଥଯାତ୍ରା ସମୟରେ ଶତାଧିକ ସଂଖ୍ଯାରେ ଶ୍ରଦ୍ଧାଳୁଙ୍କ ସମାଗମ ହୋଇଥିଲା। ରଥକୁ ଟାଣୁଥିଲେ ଭକ୍ତ। ଏହି ସମୟରେ ରଥଟି ଓଲଟି ପଡିଥିଲା। ତେବେ ରଥ ପଡିବା ପୂର୍ବରୁ ସେଠାରେ ଥିବା ଲୋକ ସତର୍କ ହୋଇଯାଇଥିଲେ। ରଥ ପଡିବା ପୂର୍ବରୁ ସେଠାରୁ ହଟିଯାଇଥିଲେ ଶ୍ରଦ୍ଧାଳୁ। ଏହି ଅଘଟଣରେ କେହି ମୃତାହତ ହୋଇନଥିବା ଜଣାପଡ଼ିଛି। ରଥ ପଡ଼ିବାପେର ଆଖପାଖ ଅଂଚଳର ଧୂଳିମୟ ହୋଇଯାଉଛି। ଲୋକେ ବର୍ତ୍ତିବାକୁ ଏଣେତେଢେ ଦୌଡୁଛନ୍ତି ।
ଖଣ୍ଡପଡ଼ାରେ ବିଜେପି ପ୍ରାର୍ଥୀତ୍ବକୁ ନେଇ ଦଳରେ ବିଶୃଙ୍ଖଳା
ନୟାଗଡ଼: ବିଜେପିର ଟିକେଟ ଘୋଷଣା ପରେ ଆରମ୍ଭ ହୋଇଛି ବିଶୃଙ୍ଖଳ। ଖଣ୍ଡପଡା ନିର୍ବାଚନ ମଣ୍ଡଳିରେ ମଧ୍ୟ ଥମୁନି ବିଜେପି ବିବାଦ। ଦୀର୍ଘ ୭ ବର୍ଷ ଧରି ବିଜେପି ଦଳର ଜଣେ ଶୃଙ୍ଖଳିତ କର୍ମୀ ଭାବରେ ଖଣ୍ଡପଡା ନିର୍ବଚନୀ ମଣ୍ଡଳୀରେ କାର୍ଯ୍ୟ କରୁଥିଲେ ବିଜେପି ନେତ୍ରୀ ଅର୍ଚ୍ଚନା ଦାସ। ଯେତେବେଳେ ବିଜେପି ଖଣ୍ଡପଡାରେ ତାର ସତ୍ତା ହଜାଇ ଥିଲା ଏହାର ନେତୃତ୍ୱ ଭାର ସମ୍ଭାଳି ଥିଲେ ବିଜେପି ନେତ୍ରୀ ଅର୍ଚ୍ଚନା ଦାସ, ଗାଁକୁ ଗାଁ ବୁଲି ସଂଗଠନ ତିଆରି କରିବା ସହିତ ଦଳକୁ ମଜଭୁତ ସ୍ଥିତିରେ ପହଞ୍ଚାଇଥିଲେ। ୨୦୨୪ ନିର୍ବାଚନ ପାଇଁ ଆଶାୟୀ ଥିଲେ ଅର୍ଚ୍ଚନା କିନ୍ତୁ ତାହା ନହୋଇ ସ୍ବାଧୀନ ପାର୍ଟିରେ ଲଢୁଥିବା ଦୁଷ୍ମନ୍ତ ସ୍ୱାଇଁକୁ ଭାରତୀୟ ଜନତା ପାଟି ଟିକେଟ ଦେବା ପରେ ଖଣ୍ଡପଡା ବିଜେପି କାର୍ଯ୍ୟାଳୟରେ ବିଜେପି ନେତ୍ରୀ ଅର୍ଚ୍ଚନା ଦାଶଙ୍କ ସମେତ ତାଙ୍କ କର୍ମୀ ଅସନ୍ତୁଷ୍ଟ ପ୍ରକାଶ କରିବା ସହିତ ବିକ୍ଷୋଭ ପ୍ରଦର୍ଶନ କରିଛନ୍ତି।
ପ୍ରାର୍ଥୀ ଚୟନକୁ ନେଇ ବିଜେପିରେ ବଢ଼ୁଛି ଦଳୀୟ କନ୍ଦଳ
ଭୁବନେଶ୍ବର: ବିଜେପିର ବିଧାନସଭା ପ୍ରାର୍ଥୀ ଘୋଷଣା ପରଠୁ ଥମୁନି ବିବାଦ। ଅସନ୍ତୋଷ ତେଜିବାରେ ଲାଗିଛି। ଦଳ ବିରୋଧରେ ବିଦ୍ରୋହ ବ୍ୟାପିବାରେ ଲାଗିଛି।ଦଳରୁ ନେତା ଓ କର୍ମୀଙ୍କ ଇସ୍ତଫାର ପର୍ବ ଚାଲିଛି। ଉପକୂଳ ଓଡ଼ିଶାରୁ ପଶ୍ଚିମ, ସବୁଠି ଦଳୀୟ ପ୍ରାର୍ଥୀଙ୍କୁ ବିରୋଧ। ଦଳର ପ୍ରତିଷ୍ଠା ଦିବସରେ ବି ଦଳ ଭିତରେ ଥିବା ଅସନ୍ତୋଷ ସ୍ପଷ୍ଟ ବାରି ହୋଇପଡିଥିଲା। ଭୁବନେଶ୍ବର ଜୟଦେବ, ବଡ଼ମ୍ବା, ରେମୁଣା ଓ ଖଣ୍ଡପଡ଼ା ନିର୍ବାଚନମଣ୍ଡଳୀରେ ପ୍ରାର୍ଥୀଙ୍କୁ ନେଇ ଥିବା ଅସନ୍ତୋଷ ରାଜ୍ୟ କାର୍ଯ୍ୟାଳୟରେ ପହଞ୍ଚିଛି। ଏପଟେ ଦଳୀୟ ପ୍ରାର୍ଥୀଙ୍କ ବିରୋଧରେ ତୀବ୍ର ପ୍ରତିବାଦକୁ ନଜରରେ ରଖି ପ୍ରାର୍ଥୀ ବଦଳ ସମ୍ଭାବନା ଥିବାରୁ ଟିକେଟ ପାଇଥିବା ନେତାମାନେ ନିଜ ନିଜର ଶକ୍ତି ପ୍ରଦର୍ଶନ କରିଛନ୍ତି।
ବଢୁଛି ଅସନ୍ତୋଷ, ବ୍ୟାପୁଛି ବିଦ୍ରୋହ। ପ୍ରାର୍ଥୀ ଚୟନକୁ ନେଇ ବିଜେପିରେ ତୀବ୍ର ହୋଇଛି କନ୍ଦଳ। ବିଭିନ୍ନ ଜିଲ୍ଲାରୁ ନେତା ଓ କର୍ମୀ ଛାଡୁଛନ୍ତି ଭାରତୀୟ ଜନତା ପାର୍ଟି। ପ୍ରାର୍ଥୀ ଘୋଷଣା ପରଠାରୁ ବ୍ୟାପିଥିବା ଅସନ୍ତୋଷ ଥମିବାର ନାଁ ଧରୁନାହିଁ। ଦଳୀୟ କାର୍ଯ୍ୟାଳୟରେ ରାଜ୍ୟର ତୁଙ୍ଗ ନେତା ବିଜେପିର ୪୪ତମ ପ୍ରତିଷ୍ଠା ଦିବସ ପାଳନ କରୁଥିବା ବେଳେ କାର୍ଯ୍ୟାଳୟ ବାହାରେ ଦଳ ବିରୋଧରେ ଶୁଭିଥିଲା ଜୋରଦାର ପ୍ରତିବାଦ। ବାଲେଶ୍ଵର ରେମୁଣା ଆସନରେ ଗୋବିନ୍ଦ ଦାସଙ୍କ ପ୍ରାର୍ଥିତ୍ଵକୁ ବିରୋଧ କରିବା ସହ ନୟାଗଡ଼ ଜିଲ୍ଲା ଖଣ୍ଡପଡ଼଼ାରେ ଦୁଷ୍ମନ୍ତ ସ୍ଵାଇଁଙ୍କ ପ୍ରାର୍ଥିତ୍ଵକୁ ବିରୋଧ କରିଥିଲେ ଦଳୀୟ କର୍ମୀ ଓ ନେତା। କଟକ ଜିଲ୍ଲା ବଡ଼ମ୍ବା ନିର୍ବାଚନମଣ୍ଡଳୀରେ ଦଳୀୟ ପ୍ରାର୍ଥୀ ସମ୍ବିତ ତ୍ରିପାଠୀଙ୍କୁ ବିରୋଧ କରି ଆଶାୟୀ ପ୍ରାର୍ଥୀ ବିଜୟ ଦଳବେହେରାଙ୍କ ନେତୃତ୍ବରେ ଶତାଧୀକ କର୍ମୀ ରାଜ୍ୟ ସଭାପତିଙ୍କୁ ସ୍ବାରକପତ୍ର ଦେଇଛନ୍ତି। ଏହା ସହ ଭୁବନେଶ୍ବର-ଜୟଦେବ ନିର୍ବାଚନମଣ୍ଡଳୀରେ ଗୋ ବ୍ୟାକ୍ ଅରବିନ୍ଦ ଢାଲି ସ୍ବର ରାଜ୍ୟ କାର୍ଯ୍ୟାଳୟରେ ପହଞ୍ଚିଛି।
ପ୍ରାର୍ଥୀ ଚୟନରେ ଘୋର ଅସନ୍ତୋଷ ଲମ୍ବି ଚାଲିଥିବାରୁ ବିଜେପିରେ ପ୍ରାର୍ଥୀ ପରିବର୍ତ୍ତନ ସମ୍ଭାବନାକୁ ଦେଖି ଟିକେଟ ପାଇଥିବା ନେତାମାନେ ନିଜ ଶକ୍ତି ପ୍ରଦର୍ଶନ କରିଛନ୍ତି। ଯାଜପୁର ଜିଲ୍ଲା ଧର୍ମଶାଳା ନିର୍ବାଚନମଣ୍ଡଳୀରେ ଦଳୀୟ ପ୍ରାର୍ଥୀ ସ୍ମତିରେଖା ପହିଙ୍କୁ ବିରୋଧ କରି ହିମାଂଶୁ ସାହୁଙ୍କ ସମର୍ଥକ ୨ ଦିନ ଧରି ଦଳୀୟ କାର୍ଯ୍ୟାଳୟରେ ପ୍ରତିବାଦ କରିଥିଲେ। ଏହାପରେ ରାଜ୍ୟ ସଭାପତି ନିଷ୍ପତି ପରିବର୍ତ୍ତନ ପାଇଁ ଅପେକ୍ଷା କରିବାକୁ କହିଲେ। ପ୍ରାର୍ଥୀ ପରିବର୍ତ୍ତନର ଆଭାସ ପାଇ ସ୍ମୃତିରେଖା ଦଳୀୟ ସମର୍ଥକଙ୍କ ସହ ରାଜ୍ୟ କାର୍ଯ୍ୟାଳୟରେ ପହଞ୍ଚି ନିଜ ସପକ୍ଷରେ ସଙ୍ଗଠନ ଥିବା ଦେଖାଇବାକୁ ଚେଷ୍ଟା କରିଛନ୍ତି। ବାଲେଶ୍ବର ଜିଲ୍ଲା ସୋର ନିର୍ବାଚନମଣ୍ଡଳୀରେ ଧାମନଗର ପୂର୍ବତନ ବିଧାୟକ ରାଜେନ୍ଦ୍ର ଦାସଙ୍କ ପ୍ରାର୍ଥିତ୍ବକୁ ଜୋରଦାର ବିରୋଧ ପରେ ରାଜୁ ଦାସ କହିଛନ୍ତି, ସମସ୍ତଙ୍କୁ ନେଇ ସାଙ୍ଗରେ ଚାଲିବି। ସମ୍ଭାବ୍ୟ ପ୍ରାର୍ଥୀ ପରିବର୍ତ୍ତନର ଭୟ ରାଜେନ୍ଦ୍ର ଦାସକୁ ବି ସଙ୍କଟରେ ପକାଇଛି ।
ଅନୁଗୁଳରୁ ମୟୁରଭଞ୍ଜ, ବରଗଡ଼ରୁ ବାଲେଶ୍ବର, ଯାଜପୁରରୁ ଜଗତସିଂହପୁର, କେନ୍ଦ୍ରାପଡ଼ାରୁ ନୂଆପଡ଼ା, ସବୁଠି ତେଜୁଛି ବିଜେପିର ଅନ୍ତଃକନ୍ଦଳ। ବିଧାନସଭା ପ୍ରାର୍ଥୀ ଚୟନକୁ ନେଇ ବଢୁଛି ଅସନ୍ତୋଷ। ନିର୍ବାଚନ ପର୍ବୂରୁ ଦଳ ଭିତରେ ବଢୁଥିବା ବିଦ୍ରୋହକୁ ମୁକାବିଲା ପାଇଁ ଚିନ୍ତାରେ ବିଜେପିର ରାଜ୍ୟ ନେତୃତ୍ବ ।
ସାଧାରଣ ନିର୍ବାଚନରେ ବିଜୟ ଲାଗି ନବୀନ ଦେଉଛନ୍ତି ଗୁରୁମନ୍ତ୍ର
ଭୁବନେଶ୍ବର: ସାଧାରଣ ନିର୍ବାଚନରେ ବିଜୟ ଲାଗି ମୁଖ୍ଯମନ୍ତ୍ରୀ ନବୀନ ପଟ୍ଟନାୟକ ଦେଉଛନ୍ତି ଗୁରୁମନ୍ତ୍ର। ଗତକାଲି ଆଉ ୯ ବିଧାନସଭା ପାଇଁ ପ୍ରାର୍ଥୀଙ୍କ ନାଁ ଘୋଷଣା କରିଛନ୍ତି ସୁପ୍ରିମୋ। ତାଲିକାରେ ଥିବା ଅଧିକାଂଶ ପ୍ରାର୍ଥୀ ପ୍ରଥମ ଥର ପାଇଁ ବିଜେଡି ଟିକେଟରୁ ନିର୍ବାଚନ ଲଢିବାକୁ ଯାଉଛନ୍ତି। ବୃହତ ବିଜୟର ଗୁରୁମନ୍ତ୍ର ନେବାକୁ ପହଞ୍ଚୁଛନ୍ତି ନବୀନ ନିବାସରେ। ବିକାଶର ବାର୍ତ୍ତାକୁ ଲୋକଙ୍କ ନିକଟରେ ପହଞ୍ଚାଇବା ଲାଗି ନିର୍ଦ୍ଦେଶ ଦେଉଛନ୍ତି ନବୀନ।
ଦିନେ ଥିଲେ ଚରମ ପ୍ରତିଦ୍ବନ୍ଦ୍ବୀ। ଆଜି ଗୋଟିଏ ଦଳରୁ ଲଢିବାକୁ ଯାଉଛନ୍ତି ନିର୍ବାଚନ। ନବୀନ ନିବାସ ବାହାରେ ହାତ ମିଶାଇ ପରସ୍ପରକୁ ଶୁଭେଚ୍ଛା ଜଣାଇଛନ୍ତି ପୂର୍ବତନ ସାଲେପୁର ବିଧାୟକ ପ୍ରକାଶ ବେହେରା ଓ ସାଲେପୁର ବିଜେଡି ବିଧାୟକ ପ୍ରାର୍ଥୀ ପ୍ରଶାନ୍ତ ବେହେରା। ତେବେ କିଛି ଦିନ ତଳେ ବିଜେଡିରେ ସାମିଲ ହୋଇଥିବା ପ୍ରକାଶ ବେହେରାଙ୍କୁ ଖାଲି ହାତରେ ଫେରାଇ ନାହିଁ ଦଳ। ତାଙ୍କୁ ଗୁରୁତ୍ବପୂର୍ଣ୍ଣ କଟକ-ବାରବାଟୀ ଆସନରୁ ପ୍ରାର୍ଥୀ କରିଛି ବିଜେଡି। ୨୦୧୪ରେ କଂଗ୍ରେସ ଟିକେଟରୁ ସାଲେପୁର ବିଧାୟକ ହୋଇଥିଲେ ପ୍ରକାଶ। ସେ ୨୦୧୯ରେ ବିଜେପି ଟିକେଟରୁ ପରାସ୍ତ ବି ହୋଇଥିଲେ। ଏବେ ବିଜେଡିରେ ମିଶିଛନ୍ତି। କଟକ ସଦର ବିଜେପି ସଭାପତି ଥିବା ସମୟରେ ସଂଗଠନ କରିଥିଲେ ପ୍ରକାଶ। ଯାହା ଚଳିତ ନିର୍ବାଚନରେ ତାଙ୍କ ପାଇଁ ବୁଷ୍ଟିଂ ଫ୍ୟାକ୍ଟର। ସମସ୍ତଙ୍କୁ ନେଇ ଚାଲିବା ସହ ମିଳିମିଶି କାମ କରିବାକୁ ନିର୍ଦ୍ଦେଶ ଦେଇଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ।
କିଛିଦିନ ମଧ୍ୟରେ ସାଧାରଣ ନିର୍ବାଚନ ହେବ। ସୁନ୍ଦରଗଡ଼ରେ ବିଜେଡିର ପ୍ରଦର୍ଶନ ସେତଟା ଭଲ ରହିନି। ଏଥର କିଛି ନୂଆ ଚେହେରା ସହ ଅଭିଜ୍ଞ ନେତାଙ୍କୁ ପ୍ରାର୍ଥୀ କରିଛି ବିଜେଡି। ଦଳ ପାଇଁ ପୁଞ୍ଜି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଜନ କଲ୍ୟାଣକାରୀ ଯୋଜନା। ଯାହାର ବାର୍ତ୍ତା ଘରେ ଘରେ ପହଞ୍ଚାଇ ବୃହତ ବିଜୟର ଗୁରୁମନ୍ତ୍ର ଦେଇଛନ୍ତି ବିଜେଡି ସୁପ୍ରିମୋ। ଲୋକଙ୍କ ପାଖକୁ ଯାଅ। ଲୋକଙ୍କ ସେବା କର। ବିଜୟର ଏହା ହିଁ ଏକ ମାତ୍ର ନବୀନ ମନ୍ତ୍ର। ଏହା ହିଁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଦୁଇ ଦଶନ୍ଧିରୁ ଅଧିକ ସମୟ ଧରି ନିରବଚ୍ଛିନ୍ନ ଭାବେ ଓଡ଼ିଶାବାସୀଙ୍କ ହୃଦୟରେ ଦେଇଛି ସ୍ଥାନ।
ମଇଦାନକୁ ଓହ୍ଲାଇଲେଣି ହେଭିଓ୍ବେଟ୍
ଭୁବନେଶ୍ବର: ଚବିଶ ମହାଲଢ଼େଇ ପାଇଁ ରାଜ୍ୟର ତିନି ପ୍ରମୁଖ ରାଜନୈତିକ ଦଳର ପ୍ରାର୍ଥୀ ଘୋଷଣା ଶେଷ ପର୍ଯ୍ୟାୟରେ ପହଞ୍ଚିଛି। ଯୁଦ୍ଧ ପାଇଁ ଯୋଦ୍ଧା ମଇଦାନରେ ସମରସଜ୍ଜା ଆରମ୍ଭ କରିଦେଇଛନ୍ତି । ଆଗରେ ଅଛି ବିଜେଡି। ହେଭିଓ୍ବେଟମାନେ ସମର୍ଥକଙ୍କ ସହ ଜୋରଦାର ପ୍ରଚାର କଲେଣି । ପ୍ରଥମ ରାଜନୈତିକ ଦଳ ଭାବେ ବିଜେଡି ପ୍ରାର୍ଥୀ ଘୋଷଣା କରିଥିବା ବେଳେ ବିଜେପି ଓ କଂଗ୍ରେସ ମଧ୍ୟ ଘୋଷଣା କରୁଛନ୍ତି । ଆଗକୁ ସବୁ ଦଳର ପ୍ରଚାର ଜମିବ।
୨୪ ମହାଲଢ଼େଇ ଜୋରଦାର । ଗ୍ରାଉଣ୍ଡରେ ଜମିଲାଣି ପ୍ରଚାର। ମଇଦାନକୁ ଓହ୍ଲାଇଲେଣି ହେଭିଓ୍ବେଟ । ବିକାଶ ପାଇଁ ବିଜେଡି ନେତାଙ୍କୁ ମିଳୁଛି ବିପୁଳ ଆଶୀର୍ବାଦ । ମନ ଜିଣୁଛନ୍ତି ବିଧାୟକ ଓ ସାଂସଦ ପ୍ରାର୍ଥୀ। ଟିକେଟ ପାଇଥିବା ନେତାମାନେ ଗ୍ରାଉଣ୍ଡରେ ଲୋକଙ୍କ ନିକଟତର ହେଉଛନ୍ତି। ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଦୃଢ଼ ନେତୃତ୍ବ ଓ ବିକାଶମୂଳକ କାର୍ଯ୍ୟ ଫୋକସରେ ରହିଛି । ବିଜେଡିର ୨୦ ଜଣ ସାଂସଦ ପ୍ରାର୍ଥୀ ନିଜ ନିଜ ସଂସଦୀୟ କ୍ଷେତ୍ରରେ ବିଧାୟକ ପ୍ରାର୍ଥୀଙ୍କ ସହ ଜୋରଦାର ପ୍ରଚାର କରୁଛନ୍ତି । ସମ୍ବଲପୁରରେ ସାଂସଦ ପ୍ରାର୍ଥୀ ବିଜେଡିର ସାଂଗଠନିକ ସମ୍ପାଦକ ପ୍ରଣବ ପ୍ରକାଶ ଦାସ ଶୁକ୍ରବାର ଦେବଗଡ଼ରେ ପ୍ରଚାର କରିଥିଲେ। ସଭାରେ ଜନସମୁଦ୍ର ଦେଖିବାକୁ ମିଳିଥିଲା । ବିଶେଷକରି ମହିଳାମାନେ ପ୍ରଣବଙ୍କୁ ବିଜୟର ଆଶୀର୍ବାଦ ଦେଇଥିଲେ । ପୁରୀ ସଂସଦୀୟ କ୍ଷେତ୍ରରେ ବିଜେଡି ପ୍ରାର୍ଥୀ ଅରୂପ ପଟ୍ଟନାୟକ ଓ ବିଧାୟକ ପ୍ରାର୍ଥୀ ସୁନୀଲ ମହାନ୍ତି ଜୋରଦାର ପ୍ରଚାର କରୁଛନ୍ତି । ଭୁବେନଶ୍ବରରେ ଲୋକଙ୍କ ଆଶୀର୍ବାଦ ନେଉଛନ୍ତି ବିଜେଡି ସାଂସଦ ପ୍ରାର୍ଥୀ ମନ୍ମଥ ରାଉତରାୟ ।
୨୦୨୪, ବିଜେଡି ପାଇଁ ରେକର୍ଡର ବର୍ଷ ହେବ ବୋଲି ଦଳ କହିଛି । ଓଡ଼ିଶାବାସୀ ଉତ୍ସାହର ସହ ବିଜେଡିକୁ ଏକପାଖିଆ ବିଜୟ ଦେଇ ନବୀନଙ୍କୁ ଷଷ୍ଠଥର ମୁଖ୍ୟମନ୍ତ୍ରୀ କରିବାକୁ ମନସ୍ଥ କରିଛନ୍ତି ।ନବୀନ ପଟ୍ଟନାୟକଙ୍କ ନେତୃତ୍ବରେ ଓଡ଼ିଶାର ସବୁ କ୍ଷେତ୍ରରେ ବିକାଶ ମାଧ୍ୟମରେ ବୈପ୍ଲବିକ ପରିବତ୍ତର୍ନ ଆସିଛି। ଆଗକୁ ସେହିଧାରା ଜାରି ରହିବ। ଓଡ଼ିଶାକୁ ଶ୍ରେଷ୍ଠ ରାଜ୍ୟରେ ପରିଣତ କରାଯିବ । ଯେଉଁଥି ପାଇଁ ପ୍ରଚାର ସମୟରେ ବିଜେଡି ପ୍ରାର୍ଥୀଙ୍କ ପ୍ରତି ଆଶୀର୍ବାଦର ସୁଅ ଛୁଟିଛି ବୋଲି ବିଜେଡି ନେତା କହିଛନ୍ତି । ରାଜନୈତିକ ସମୀକ୍ଷକଙ୍କ ଆକଳନ ହେଲା, ନବୀନ ପଟ୍ଟନାୟକ ବିଜେଡି ପ୍ରାର୍ଥୀଙ୍କ ପାଇଁ ପ୍ରଚାର ଆରମ୍ଭ କଲେ ମଇଦାନ ଆହୁରି ସରଗରମ ହେବ। ତାତିର ପାରଦ ଯେତେ ଉପର ମୁହାଁ ହେଉଛି, ନିର୍ବାଚନୀ ପ୍ରଚାର ତାତି ମଧ୍ୟ ସେତେ ଉଷ୍ମ ହେବାରେ ଲାଗଛି। ବିରୋଧୀ ଶିବିରରେ ପ୍ରାର୍ଥୀ ଚୟନ ବିବାଦ ଉଗ୍ରରୂପ ନେଉଥିବା ବେଳେ ଶାସକ ଦଳ ପ୍ରଚାରରେ ଆଗରେ ଅଛି ।
କାରରୁ ଜବତ ହେଲା ୫୫ ଲକ୍ଷ ୨୦ ହଜାର ଟଙ୍କା
ନନ୍ଦିଘୋଷ ବ୍ୟୁରୋ: ବିନିକା ପୋଲିକୁ ବଡ ସଫଳତା । କାରରୁ ଜବତ ହେଲା ୫୫ ଲକ୍ଷ ୨୦ ହଜାର ଟଙ୍କା । ନିର୍ବାଚନ ପାଇଁ ସୁବର୍ଣ୍ଣପୁର ଜିଲ୍ଲା ବିନିକା ପୋଲିସ ସହରର କଲେଜ ଛକରେ ନାକାବନ୍ଦି କରି ପ୍ରାଟ୍ରୋଲିଂ କରୁଥିବା ସମୟରେ AP05 TC-8181 ନମ୍ବର ଥିବା ଏକ ଇନୋଭା କାରରୁ ୫୫ ଲକ୍ଷ ୨୦ ହଜାର ଟଙ୍କା ଜବତ କରିଛି ପୋଲିସ୍ । ଜବତ ଟଙ୍କାକୁ ବ୍ୟାଙ୍କରେ ଜମା କରାଯାଇଛି I ଏହି ଟଙ୍କା ଆନ୍ଧ୍ର ପ୍ରଦେଶର କାକିନାଡା ଜିଲ୍ଲାକୁ ଯାଉଥିବା ପୋଲିସ ସୂଚନା ଦେଇଛି । କାରରେ ଥିବା ୬ ଜଣଙ୍କୁ ଗିରଫ କରି ଅଧିକ ତଦନ୍ତ ଜାରି ରଖିଛି ବିନିକା ପୋଲିସ ।
ଚାନ୍ଦପୁରରେ ଧୁମଧାମରେ ପାଳନ ହେଉଛି ଦଶ ଦୋଳ ମେଳଣ
ଟାଙ୍ଗୀ: ନୟାଗଡ ଜିଲ୍ଲା ଚାନ୍ଦପୁରରେ ଧୁମଧାମରେ ପାଳନ ହେଉଛି ଦଶ ଦୋଳ ମେଳଣ । ଚୈତ୍ର ମାସର ଦଶମୀ ତିଥିରେ ସ୍ଥାନୀୟ ଅଞ୍ଚଳର ପ୍ରତ୍ୟକ୍ଷ ଠାକୁରାଣୀ ମା ରାମଚଣ୍ଡୀଙ୍କୁ ପାଟ ପଟୁଆରରେ ରୋଷଣୀ କରି ଶୋଭାଯାତ୍ରାରେ ପାଛୋଟି ନିଆଯାଇଥାଏ ଦୋଳ ପଡିଆକୁ। ଦୋଳ ପଡିଆରେ ମା ରାମଚଣ୍ଡୀ ପ୍ରଥମେ ବୈଦିକ ରୀତି ନୀତିରେ ଉପବେଷନ ହେବା ପରେ କନ୍ଧ ନୟାଗଡ଼ର ଐସାନେଶ୍ୱର ଦେବ ପାଟ ପଟୁଆରାରେ ଆସି ଦୋଳ ପଡିଆରେ ବିରାଜ ମାନ କରନ୍ତି। ଏହା ପରେ ନିମନ୍ତ୍ରଣ କରାଯାଇଥିବା ୧୩ଟି ମୌଜାର ୨୨ ଠାକୁର ୨୧ ଟି ଦୋଳ ବିମାନରେ ଆସି ବିରାଜ ମାନ କରନ୍ତି । ମେଳଣ ଦେଖିବା ପାଇଁ ଭକ୍ତଙ୍କ ଲାଗିଛି ସୁଅ । ମେଳଣ ସାଙ୍ଗକୁ ମୀନା ବଜାରର ବେଶ ମଜା ନେଉଛନ୍ତି ଲୋକ । ରଣପୁର ତହସିଲ ପ୍ରଶାସନ ଓ ଦଶଦୋଳ କମିଟି ପକ୍ଷରୁ ପ୍ରତିବର୍ଷ ଏହି ଦୋଳଯାତ୍ରା ଆୟୋଜନ କରାଯାଉଛି।
ଶ୍ରୀକ୍ଷେତ୍ର ବିକାଶର କିଏ ସାଜିବ ସାରଥୀ ?
ପୁରୀ: ରାଜ୍ୟର ଉପକୂଳବର୍ତ୍ତୀ ଲୋକସଭା ନିର୍ବାଚନ ମଣ୍ଡଳୀ ମଧ୍ୟରୁ ପୁରୀ ଲୋକସଭା କ୍ଷେତ୍ର ବେଶ ଗୁରୁତ୍ୱପୂର୍ଣ୍ଣ । ଦେଶର ଚାରି ଧାମ ମଧ୍ୟରୁ ଅନ୍ୟତମ ଧାମ ପୁରୀ । ଚଳିତ ନିର୍ବାଚନରେ ଏହି ପବିତ୍ରଧାମ ଉପରେ ରହିଛି ପ୍ରମୁଖ ଦଳର ନଜର । ବିଜେଡି ପାର୍ଥୀ ଅରୂପ ପଟ୍ଟନାୟକଙ୍କୁ ଏଠାରେ ପ୍ରାର୍ଥୀ କରିଛି ବିଜେଡି । ଟିକେଟ ପାଇବା ପରେ ମହାପ୍ରଭୁଙ୍କ ଆଶୀର୍ବାଦ ନେଇ ଏଠାରେ ପ୍ରଚାର ଅଭିଯାନ ଆରମ୍ଭ କରିଛନ୍ତି ବିଜେଡି ଲୋକସଭା ପ୍ରାର୍ଥୀ ଅରୂପ ପଟ୍ଟନାୟକ । ସେପଟେ ବିଜେପି ପ୍ରାର୍ଥୀ ସମ୍ବିତ ପାତ୍ର ମଧ୍ଯ ନିଜ ଅଭିଯାନକୁ ଜୋରଦାର କରିଛନ୍ତି । ଏବେ ଅପେକ୍ଷା କଂଗ୍ରେସର ପ୍ରାର୍ଥୀ ଘୋଷଣାକୁ ।
କିଏ ହାତେଇବ ପୁରୀ ? କାହାକୁ ଆଶୀର୍ବାଦ କରିବେ ମହାପ୍ରଭୁ ? ଶ୍ରୀକ୍ଷେତ୍ରର ବିକାଶର କିଏ ସାଜିବ ସାରଥୀ ? ଏପରି ଆଲୋଚନା ପର୍ଯ୍ଯାଲୋଚନା ଭିତରେ ଆରମ୍ଭ ହୋଇଛି ରାଜନୈତିକ ଗୋଟି ଚାଳନା । ଅରୂପ ପଟ୍ଟନାୟକଙ୍କୁ ବିଜେଡି ପ୍ରାର୍ଥୀ ଘୋଷଣା କରିବା ପରେ ଦଳୀୟ ମହଲରେ ଦେଖାଦେଇଛି ଉତ୍ସାହ। ମହାପ୍ରଭୁଙ୍କ ଆଶୀର୍ବାଦ ନେଇ ନିଜ ପ୍ରଚାର ଅଭିଯାନକୁ ଆରମ୍ଭ କରିଛନ୍ତି ବିଜେଡି ଲୋକସଭା ପ୍ରାର୍ଥୀ ଅରୂପ ପଟ୍ଟନାୟକ । ମହାପ୍ରଭୁଙ୍କ ଆଶୀର୍ବାଦ ଓ ଲୋକଙ୍କ ଭଲପାଇବା ବିଜେଡି ଓ ତାଙ୍କ ସପକ୍ଷରେ ଯିବା ନେଇ ସେ ବେଶ ଆଶାବାଦୀ । ତାଙ୍କ ପ୍ରତିଦ୍ବନ୍ଦ୍ବୀ ଙ୍କ ବିଷୟରେ ସେ କିଛି ଜାଣି ନଥିବା କରିଥିବାବେ ବେଳେ ସେ ଜଣେ ବହୁ ଚର୍ଚ୍ଚିତ ବ୍ୟକ୍ତିତ୍ୱ ଓ ତାଙ୍କ ସମ୍ପର୍କରେ ଅଧିକ କିଛି ନ କହିବା ଭଲ ବୋଲି ମତ ରଖିଛନ୍ତି ।
ପୁରୀରେ ଅନେକ ବିକାଶ କାର୍ଯ୍ଯ ହୋଇଛି। ଶ୍ରୀମନ୍ଦିର ପରିକ୍ରମା ପ୍ରକଳ୍ପ ଠାରୁ ଆରମ୍ଭ କରି ଅନ୍ତର୍ଜାତୀୟ ବିମାନ ବନ୍ଦର, ଶ୍ରୀସେତୁ, ଶ୍ରୀଦାଣ୍ଡ ସବୁଠି ଦେଖିବାକୁ ମିଳିଛି ବିକାଶର ଆକାଶଛୁଆଁ ଚିତ୍ର। ବିକାଶକୁ ନେଇ ପୁରୀବାସୀ ଉତ୍ସାହିତ ଥିବବେଳେ ବିଜେପି ମଧ୍ଯ ନିଜ ଦଳର ରିପୋର୍ଟ କାର୍ଡ ଦେଖାଇ ଜନତାଙ୍କୁ ଦୃଷ୍ଟି ଆକର୍ଷଣ କରିବାକୁ ଚେଷ୍ଟା କରିଛି । ଦଳୀୟ ପ୍ରାର୍ଥୀ ସମ୍ବିତ ପାତ୍ର ପ୍ରଚାର ଅଭିଯାନକୁ ଜୋରଦାର କରିଛନ୍ତି। ଏଥର ଜନତାଙ୍କ ଆଶୀର୍ବାଦ ତାଙ୍କ ପ୍ରତି ରହିଥିବା କହିଛନ୍ତି ସମ୍ବିତ। ଦୁଇ ପ୍ରମୁଖ ଦଳ ପୁରୀ ଲୋକସଭା ଆସନ ପାଇଁ ଜୋରଦାର ରଣନୀତି ଆରମ୍ଭ କରିଥିବା ବେଳେ କଂଗ୍ରେସ ଏଠାରେ କାହାକୁ ପାର୍ଥୀ କରିବ ଅପେକ୍ଷା କରିଛନ୍ତି ଦଳୀୟ ନେତା ।