କାମାକ୍ଷାନଗର: ହାଟରେ ବୋମାମାଡ଼ କରି ୧୪ ଲକ୍ଷ ଟଙ୍କା ଲୁଟ୍। ଗୋରୁ ବ୍ଯବସାୟୀଙ୍କ ଉପରେ ଗୁଳି ଚଳାଇବା ସହ ବୋମାମାଡ଼ କରି ଟଙ୍କା ଲୁଟ୍ ହୋଇଥିବା ଅଭିଯୋଗ ହୋଇଛି। ମୟୂରଭଞ୍ଜ ଜିଲ୍ଲା ବଡ଼ସାହି ଥାନା ଅଞ୍ଚଳରୁ କିଛି ବ୍ଯବସାୟୀ ଢେଙ୍କାନାଳ ଜିଲ୍ଲା କାମାକ୍ଷାନଗର ଜିରାଳ ସାପ୍ତାହିକ ହାଟକୁ ଆସିଥିଲେ।
ହାଟ ନିକଟରେ ବୋଲେରୋ ଗାଡ଼ିରେ ବସିଥିବାବେଳେ ୫ଜଣ ଦୁର୍ବୃତ୍ତ ପ୍ରଥମେ ଡ୍ରାଇଭର ଉପରକୁ ଦୁଇ ରାଉଣ୍ଡ ଫାଙ୍କା ଗୁଳି ଚଳାଇ ଭୟଭୀତ କରିଥିଲେ। ପରେ ବୋମାମାଡ଼ କରି ଟଙ୍କା ବ୍ଯାଗ ସହ ବୋଲେରୋ ଧରି ଫେରାର ହୋଇଯାଇଛନ୍ତି ଅଭିଯୁକ୍ତ। ଘଟଣାସ୍ଥଳରେ ପୋଲିସ ପହଞ୍ଚି ତଦନ୍ତ ଆରମ୍ଭ କରିଛି।
ନୂଆଦିଲ୍ଲୀ: ୨୦୨୪ ଲୋକସଭା ନିର୍ବାଚନ ଲାଗି କଂଗ୍ରେସର ବ୍ଲୁପ୍ରିଣ୍ଟ। ଆଜି ଦଳ ଘୋଷଣା କରିବ ନିର୍ବାଚନୀ ଇସ୍ତାହାର। ଏହା ସହ ଆଜି ଜୟପୁରରେ ଓ ଆସନ୍ତାକାଲି ହାଇଦ୍ରାବାଦରେ କଂଗ୍ରେସ କରିବ ଶକ୍ତି ପ୍ରଦର୍ଶନ । ଜୟପୁରରେ ହେବାକୁ ଥିବା ମେଗାରାଲିରେ ଏଆଇସିସି ଅଧ୍ୟକ୍ଷ ମଲ୍ଲିକାର୍ଜୁନ ଖଡଗେ, କଂଗ୍ରେସ ନେତ୍ରୀ ସୋନିଆ ଗାନ୍ଧୀ, ସାଧାରଣ ସମ୍ପାଦକ ରାହୁଲ ଗାନ୍ଧୀ, ପ୍ରିୟଙ୍କା ଗାନ୍ଧୀ ପ୍ରମୁଖ ଯୋଗଦେବେ। ସେଠାରେ କଂଗ୍ରେସ ଇସ୍ତାହାର ଘୋଷଣା ହେବ।
ଦେଶରେ ପ୍ରଗତିକୁ ଦୃଷ୍ଟିରେ ରଖି ନିର୍ବାଚନୀ ଇସ୍ତାହାର ପ୍ରସ୍ତୁତ କରାଯାଇଛି । ଇସ୍ତାହାରରେ ପାଞ୍ଚଟି ନ୍ୟାୟ ଉପରେ ଗୁରୁତ୍ବ ଦିଆଯାଇଛି । ସେଗୁଡିକ ହେଲା ଯୁବ ନ୍ୟାୟ, ନାରୀ ନ୍ୟାୟ, କିଷାନ ନ୍ୟାୟ, ଶ୍ରମିକ ନ୍ୟାୟ ଓ ସମାନତା ନ୍ୟାୟ । ଗତ ଏପ୍ରିଲ ୩ରୁ ସାରା ଦେଶରେ କଂଗ୍ରେସ ପକ୍ଷରୁ ଆରମ୍ଭ ହୋଇଛି ଘର ଘର ଗ୍ଯାରେଣ୍ଟି କ୍ୟାମ୍ପେନ । ଦେଶର ଆଠ କୋଟି ପରିବାର ନିକଟରେ କଂଗ୍ରେସ ପହଞ୍ଚିବ ବୋଲି ଯୋଜନା କରାଯାଇଛି । ଭାରତ ଯୋଡ ନ୍ୟାୟ ଯାତ୍ରା ବେଳେ ଦେଶରେ ନ୍ଯାୟ ପ୍ରତିଷ୍ଠା ନେଇ ଆହ୍ବାନ ଦେଇଥିଲେ କଗ୍ରେସ ନେତା ରାହୁଲ ଗାନ୍ଧୀ।
ଟାଙ୍ଗୀ: ଆହୁରି ତେଜିଲା ବିଜେପିର ଖୋର୍ଦ୍ଧା କଳି। ଦଳ ଘୋଷଣା କରିବା ପୂର୍ବରୁ ପୁଣିଥରେ ଖୋର୍ଦ୍ଧା ବିଧାୟକ ପ୍ରାର୍ଥୀଙ୍କ ନାଁ ଘୋଷଣା କରିଦେଲେ ବିଜେପିର ଭୁବନେଶ୍ବର ସାଂସଦ ପ୍ରାର୍ଥୀ ଅପରାଜିତା ଷଡଙ୍ଗୀ। ଟାଙ୍ଗୀରେ ନିର୍ବାଚନୀ କାର୍ଯ୍ୟାଳୟ ଉଦଘାଟନ ଅବସରରେ ପ୍ରଶାନ୍ତ ଜଗଦ୍ଦେବଙ୍କୁ ଖୋର୍ଦ୍ଧା ବିଧାୟକ ପ୍ରାର୍ଥୀ ଭାବେ ଘୋଷଣା କରିଛନ୍ତି ଅପରାଜିତା।
ସଭାରେ ଅପରାଜିତା କହିଥିଲେ, କିଛିଦିନର କଥା ଅଛି, ପ୍ରଶାନ୍ତ ଜଗଦ୍ଦେବ ଖୋର୍ଦ୍ଧାର ପ୍ରାର୍ଥୀ ହିସାବରେ ମନୋନୀତ ହୋଇଯିବେ। ସେ ପ୍ରାର୍ଥୀ ହେବାନେଇ ପୂରା ଆଶା ଓ ବିଶ୍ବାସ ଅଛି ବୋଲି ଦୃଢୋକ୍ତି ପ୍ରକାଶ କରିଥିଲେ ଅପରାଜିତା। ଏପରିକି ଦିନେ ଦୁଇଦିନ ମଧ୍ଯରେ ବିଧାୟକ ପ୍ରାର୍ଥୀଙ୍କ ନାଁ ଘୋଷଣା ହୋଇଯିବ ବୋଲି ସେ କହିଥିଲେ। ସଭାରେ କାଳୁଖଣ୍ଡାୟତରାୟଙ୍କ ଗୋଷ୍ଠୀ ଉପସ୍ଥିତ ନଥିଲେ। କିଛିଦିନ ପୂର୍ବରୁ ଅପରାଜିତା ମନଇଚ୍ଛା ଏକ ସଭାରେ ପ୍ରଶାନ୍ତ ଜଗଦ୍ଦେବଙ୍କୁ ଖୋର୍ଦ୍ଧାର ବିଧାୟକ ପ୍ରାର୍ଥୀ ଭାବେ ଘୋଷଣା ପରେ ବିବାଦ ଆରମ୍ଭ ହୋଇଥିଲା।
ଏପରିକି କାଳୁଖଣ୍ଡାୟତରାୟକ ଗୋଷ୍ଠୀ ଅପରାଜିତାଙ୍କ ନିଷ୍ପତ୍ତି ବିରୋଧରେ ବିଜେପି ରାଜ୍ଯ ଅଫିସରେ ହଲ୍ଲାବୋଲ୍ କରିଥିଲେ। ହଜାର ହଜାର ସମର୍ଥକ ପାର୍ଟି ଅଫିସରେ ହଙ୍ଗାମା କରିବା ସହ ଅପରାଜିତା ଓ ରାଜ୍ୟ ନେତୃତ୍ବଙ୍କୁ ଖୋଲା ଚ୍ୟାଲେଞ୍ଜ ଦେଇଥିଲେ। ଟିକେଟ ନମିଳିଲେ ଯାହାହେବ ଦେଖିବ ବୋଲି କାଳୁ ଚେତାବନୀ ଶୁଣାଇଥିଲେ। ପ୍ରାର୍ଥୀ ଘୋଷଣା କରିବାକୁ ଅପରାଜିତା କିଏ ବୋଲି ପ୍ରଶ୍ନ କରିଥିଲେ। ଏବେ ପୁଣି ଥରେ ଅପରାଜିତା ପ୍ରଶାନ୍ତ ଜଗଦ୍ଦେବଙ୍କ ନାଁ ଘୋଷଣା କରିବା ପରେ ବିବାଦ ଆହୁରି ତେଜିଛି।
ବାଲେଶ୍ବର: ବାଲେଶ୍ବର ମୁଖ୍ୟ ଚିକିତ୍ସାଳୟରେ ପିଲା ଚୋରି ମାମଲା। ଉଦ୍ଧାର ହେଲା ଚୋରି ହୋଇଥିବା ଶିଶୁପୁତ୍ର। ରେମୁଣା ଥାନା ଅଧୀନ ଦୁର୍ଗାଦେବୀ ଅଞ୍ଚଳରୁ ଶିଶୁକୁ ଉଦ୍ଧାର କରିଛି ପୋଲିସ । ଶିଶୁଟିକୁ ଚୋରି କରିଥିବା ମହିଳାଙ୍କୁ ଅଟକ ରଖାଯାଇଛି ।
ଗତକାଲି ମୁଖ୍ୟ ଚିକିତ୍ସାଳୟର ପ୍ରସୂତି ବିଭାଗରୁ ୭ ଦିନର ଶିଶୁ ପୁତ୍ର ଚୋରି ହୋଇଥିବା ଅଭିଯୋଗ ହୋଇଥିଲା । ବାଲିଆପାଳ ଆଠବାଟିଆ ଅଞ୍ଚଳର ଶୁସାନ୍ତ ବାରିକଙ୍କ ସ୍ତ୍ରୀ ଏକ ଶିଶୁ ପୁତ୍ରକୁ ଜନ୍ମ ଦେଇଥିଲେ। ଜଣ୍ଡିସ ଚିକିତ୍ସା ଚାଲିଥିବା ବେଳେ ପ୍ରସୂତୀ ବିଭାଗର ବେଡରୁ ନବଜାତକକୁ କେହି ଚୋରି କରିନେଇଥିବା ଅଭିଯୋଗ ହୋଇଥିଲା । ଏନେଇ ମେଡିକାଲ ଫାଣ୍ଡିରେ ଏତଲା ପରେ ପୋଲିସ ତଦନ୍ତ କରି ଶିଶୁପୁତ୍ରକୁ ଉଦ୍ଧାର କରିବା ସହ ମହିଳାଙ୍କୁ ପଚରାଉଚରା କରୁଛି।
ବାଲେଶ୍ବର ଏସପି ସାଗରିକା ନାଥ କହିଛନ୍ତି, ଶିଶୁପୁତ୍ର ଲୋଭରେ ମହିଳା ଜଣଙ୍କ ଚୋରି କରିଥିବା ପ୍ରାଥମିକ ତଦନ୍ତରୁ ସୂଚନା ମିଳିଛି । ବର୍ତ୍ତମାନ ଶିଶୁଟି ଚିକିତ୍ସାଧୀନ ଅବସ୍ଥାରେ ରହିଛି । ଆଗକୁ ଆଇନ ଅନୁସାରେ ପଦକ୍ଷେପ ନିଆଯିବ ବୋଲି ଏସପି କହିଛନ୍ତି ।
ରାମେଶ୍ୱରମ: ଲୋକସଭା ନିର୍ବାଚନ ପାଇଁ ଆରମ୍ଭ ହୋଇଯାଇଛି ପ୍ରଚାର। ସରଗରମ ହୋଇଉଠିଛି ରାଜ୍ୟ ରାଜନୀତି। କେହି କେହି ନିଜ ପାର୍ଟି ପାଇଁ ପ୍ରଚାର କରୁଥିବା ବେଳେ ଏବଂ ଆଉ କେହି କେହି ନାମାଙ୍କନପତ୍ର ଦାଖଲ କରୁଛନ୍ତି। ସେହିପରି ଭୋଟରଙ୍କୁ ନିର୍ବାଚନରେ ଭାଗ ନେବାକୁ ସଚେତନ କରାଇବା ପାଇଁ ନିର୍ବାଚନ ଆୟୋଗ ଅଭିଯାନ ମଧ୍ୟ ଚଳାଉଛନ୍ତି। ପ୍ରଚାର ପାଇଁ ସଭିଏଁ ଅଣ୍ଟା ଭିଡିଥିବା ବେଳେ ଏହାରି ମଧ୍ୟରେ ତାମିଲନାଡୁ ରାମନାଥପୁରମର ଜଣେ ସ୍ୱାଧୀନ ପ୍ରାର୍ଥୀଙ୍କ ନିର୍ବାଚନୀ ପ୍ରଚାର ଏବେ ଚର୍ଚ୍ଚାରେ ରହିଛି । ଖାଲି ଏତିକି ନୁହେଁ ଏହି ଘଟଣା ଏବେ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି । କାରଣ ପ୍ରଚାର ପାଇଁ ସେଲୁନ୍ ଭିତରେ ଦାଢି କାଟିଛନ୍ତି ପ୍ରାର୍ଥୀ । ଏହାସହ ଲୋକଙ୍କ ସହାୟତା ଲୋଡିଛନ୍ତି ।
#WATCH | Rameswaram, Tamil Nadu: Parirajan, Ramanathapuram Independent candidate becomes a barber for a day during the election campaign.#LokSabhaElections2024 pic.twitter.com/BFe19VkTpU
— ANI (@ANI) April 4, 2024
ଭାଇରାଲ୍ ଭିଡିଓରେ ଦେଖିବାକୁ ମିଳିଛି ଯେ, ସେଲୁନ ଭିତରେ ଜଣେ ଲୋକ ଦାଢ଼ି କାଟିବାକୁ ବସିଥିବା ବେଳେ ସ୍ୱାଧୀନ ପ୍ରାର୍ଥୀ ପରିରାଜନ୍ ହାତରେ ଖୁର ଧରି ତାଙ୍କ ଦାଢ଼ି କାଟୁଛନ୍ତି। ପରେ ପରେ ତାଙ୍କ ସହ କଥାବାର୍ତ୍ତା ହେବା ସଙ୍ଗେସଙ୍ଗେ ହାତ ଯୋଡି ସହଯୋଗ ପାଇଁ ନିବେଦନ ମଧ୍ୟ କରୁଛନ୍ତି ।
ସୂଚନା ଅନୁଯାୟୀ, ରମେଶ୍ୱରମର ଏକ ସେଲୁନକୁ ଯାଇ ସ୍ୱାଧୀନ ପ୍ରାର୍ଥୀ ପରିରାଜନ୍ ଦିନକ ପାଇଁ ବାରିକ ସାଜିଥିଲେ। ଏହି ସମୟରେ ସେ ଲୋକଙ୍କ ସହ ଆଲୋଚନା କରି ତାଙ୍କ ସମସ୍ୟା ସମ୍ପର୍କରେ ପଚାରି ବୁଝିଥିଲେ। ତାଙ୍କ କହିବାନୁଯାୟୀ, ଲୋକଙ୍କ ସହ ଯୋଡିହେବା ହେଉଛି ତାଙ୍କର ପ୍ରଥମ ଲକ୍ଷ୍ୟ।
ତେବେ ନିକଟରେ ମଧ୍ୟ ଆଉ ଏକ ଘଟଣା ଚର୍ଚ୍ଚାରେ ରହିଥିଲା । ଯେତେବେଳେ ଗୋରଖପୁରରୁ ପ୍ରାର୍ଥୀ ରବି କିଶନ ଚା’ ତିଆରି କରୁଥିବା ଦେଖିବାକୁ ମିଳିଥିଲା । ସେ ସମୟରେ ରବି କିଶନ ଗୋରଖପୁରରେ ଏକ ଜନସମ୍ପର୍କ ଅଭିଯାନ ଚଳାଉଥିଲେ। ଯାହାପରେ ସେ ଏକ ଚା ଦୋକାନରେ ଅଟକିଥିଲେ ଏବଂ ପରେ ଅଦା ପକାଇ ଚା ତିଆରି କରିଥିଲେ। ଯାହାର ଦୃଶ୍ୟ ଖୁବ୍ ଭାଇରାଲ୍ ହୋଇଥିଲା ।
ଭୁବନେଶ୍ୱର: ଅସହ୍ଯ ଖରାରେ ସିଝୁଛି ଓଡିଶା। ଜନଜୀବନକୁ ଅସ୍ତବ୍ଯସ୍ତ କରୁଛି ଅସମ୍ଭାଳ ଗ୍ରୀଷ୍ମ ପ୍ରବାହ ସହ ଗୁଳୁଗୁଳି। ଗତକାଲି ରାଜ୍ଯର ୨ ସହର ମାଲକାନଗିରି ଓ ବୌଦ୍ଧର ତାପମାତ୍ରା ୪୨ ଡିଗ୍ରୀ ଛୁଇଁଥିବାବେଳେ ଆଜି ସର୍ବାଧିକ ଗ୍ରୀଷ୍ମ ପ୍ରବାହ ହୋଇପାରେ ବୋଲି ସତର୍କତା ଜାରି କରିଛି ଆଞ୍ଚଳିକ ପାଣିପାଗ କେନ୍ଦ୍ର।
ରାଜ୍ଯରେ ୧୦ରୁ ଅଧିକ ସହରର ତାତି ୪୦ ଡିଗ୍ରୀ ଉପରେ ରହୁଛି। ଆସନ୍ତାକାଲି ପର୍ଯ୍ୟନ୍ତ ପ୍ରଖର ଗ୍ରୀଷ୍ମ ପ୍ରବାହର ସାଙ୍ଗକୁ ବିଭିନ୍ନ ସ୍ଥାନରେ ଖରା ୪୦ ଡିଗ୍ରୀ ପାର୍ କରିପାରେ। ଆଜି ଅଧିକ ଖରା ନେଇ ବଲାଙ୍ଗୀର, ବୌଦ୍ଧ, ଅନୁଗୁଳ, ମାଲକାନଗିରି, ନୟାଗଡ଼, କେନ୍ଦୁଝର ଜିଲ୍ଲାକୁ ସତର୍କତା ଜାରି କରାଯାଇଛି। ବଲାଙ୍ଗିର, କନ୍ଧମାଳ, ବୌଦ୍ଧ ଓ ଭଦ୍ରକ ଜିଲ୍ଲାରେ ରାତି ପ୍ରବଳ ଗୁଳୁଗୁଳି ହୋଇପାରେ। ଏଥିପାଇଁ ଏହି ଜିଲ୍ଲା ଗୁଡ଼ିକୁ ୟେଲୋ ୱାର୍ଣ୍ଣିଂ ଜାରି କରାଯାଇଛି। ତେବେ କାଲି ପରେ ପଶ୍ଚିମାଝଡ଼ ସକ୍ରିୟ ହେବା ସହ ତାତି କମିବା ସମ୍ଭାବନା ରହିଛି।
ଭୁବନେଶ୍ୱର: ଅଧରାତିରେ ଏମ୍ସ ପରିଦର୍ଶନ। ରାତି ପ୍ରାୟ ୩ଟା ୧୫ରେ ଭୁବନେଶ୍ବର ଏମ୍ସ ହସ୍ପିଟାଲ ପରିଦର୍ଶନ କରି ଅନୁଧ୍ଯାନ କରିଛନ୍ତି ବିଜେଡିର ଭୁବନେଶ୍ବର ଲୋକସଭା ପ୍ରାର୍ଥୀ ମନ୍ମଥ ରାଉତରାୟ। ନିଜେ ଗାଡ଼ି ଚଳାଇ ଡାକ୍ତରଖାନାକୁ ଯିବା ସହ ରୋଗୀ ଓ ସମ୍ପର୍କୀୟଙ୍କ ସମସ୍ଯା ସମ୍ପର୍କରେ ସେ ଅନୁଧ୍ଯାନ କରିଥିଲେ।
ରାଜ୍ଯ ତଥା ରାଜ୍ଯ ବାହାରର ରୋଗୀ ଏମ୍ସକୁ ଚିକିତ୍ସା ପାଇଁ ଆସୁଥିବାବେଳେ ରାତିରେ ବାହାରେ ଶୋଉଥିବା ଦେଖି ସେମାନଙ୍କ ସହ କଥା ହୋଇଥିଲେ ମନ୍ମଥ। ଏହି ସମୟରେ କିଛି ଲୋକ ମନ୍ମଥଙ୍କ ଆଗରେ କାନ୍ଦିକାନ୍ଦି ସମସ୍ୟା କହିଥିଲେ। କିଏ ସମ୍ପର୍କୀୟଙ୍କ ଚିକିତ୍ସା ପାଇଁ ଆଉ କିଏ ଟିକେଟ ପାଇଁ ରାତିରେ ଲାଇନ ଲଗାଇ ସମସ୍ୟା ଭୋଗୁଥିବା କହିଥିଲେ। ଏମ୍ସ ବାହାରେ ଲୋକ ଅସୁବିଧା ଭୋଗୁଥିବା ଦେଖି ଦୁଃଖ ପ୍ରକାଶ ସହ ଏହାର ସମାଧାନ ପାଇଁ ପଦକ୍ଷେପ ନେବାକୁ ପ୍ରତିଶୃତି ଦେଇଥିଲେ ମନ୍ମଥ।
ନୂଆଦିଲ୍ଲୀ: ଆଜି ଘୋଷିତ ହେବ ଚଳିତ ବର୍ଷର ପ୍ରଥମ ଆର୍ଥିକ ନୀତି। ଭାରତୀୟ ରିଜର୍ଭ ବ୍ଯାଙ୍କର ଆର୍ଥିକ ନୀତି କମିଟି ବା ଏମପିସି ବୈଠକର ନିଷ୍ପତ୍ତି ସମ୍ପର୍କରେ ସୂଚନା ଦେବେ ଗଭର୍ଣ୍ଣର ଶକ୍ତିକାନ୍ତ ଦାସ। ଚଳିତ ଏପ୍ରିଲରେ ରେପୋ ରେଟକୁ ୬ ଦଶମିକ ୫ରେ ଅପରିବର୍ତ୍ତିତ ରଖିପାରନ୍ତି ଆରବିଆଇ। ସାଧାରଣତଃ ରେପୋ ରେଟ୍ ବୃଦ୍ଧି ପାଇଲେ ସ୍ଥାୟୀ ଜମା ବା ଏଫଡି ସୁଧହାର ବଢିଥାଏ।
ସେହିପରି ରେପୋ ରେଟ୍ ହ୍ରାସ ପାଇଲେ ଏଫଡି ସୁଧହାର ହ୍ରାସ ପାଇଥାଏ। ଗତବର୍ଷ ଫେବୃଆରୀରୁ ଆରବିଆଇ ରେପୋ ରେଟକୁ ୬ ଦଶମିକ ୫ରେ ରଖିଛନ୍ତି ଅପରିବର୍ତ୍ତିତ। ଭାରତର ଖୁଚୁରା ମୁଦ୍ରାସ୍ଫୀତି ହାର ୨ରୁ ୬ ପ୍ରତିଶତରେ ସୀମିତ ରଖିବା ଲାଗି ରିଜର୍ଭ ବ୍ଯାଙ୍କ ଏହି ପଦକ୍ଷେପ ନେଇ ଆସଛନ୍ତି। ଏମପିସି ବୈଠକ ନେଇ ଗତ ଏପ୍ରିଲ ୩ ତାରିଖରୁ ବୈଠକ ବସିଥିଲା। ଚଳିତ ବର୍ଷ ଏପ୍ରିଲ ୩ରେ ଏମପିସି ବୈଠକ ବସିଥିବାବଳେ ଆସନ୍ତା ଜୁନ ୫ରୁ ୭, ଅଗଷ୍ଟ ୬ରୁ ୯, ଅକ୍ଟୋବର ୭ରୁ ୯, ଡିସେମ୍ବର ୪ରୁ ୬ ଏମପିସି ବୈଠକ ବସିବ।
ପୁରୀ: ପୁରୀ ଯାଇ ମହାପ୍ରଭୁଙ୍କୁ ଦର୍ଶନ କଲେ 5T ଓ ନବୀନ ଓଡ଼ିଶାର ଅଧ୍ଯକ୍ଷ କାର୍ତ୍ତିକ ପାଣ୍ଡିଆନ। ଭୋରରୁ ଶ୍ରୀମନ୍ଦିରରେ ପହଞ୍ଚି ଶ୍ରୀଜିଉଙ୍କୁ ଦର୍ଶନ କରିଛନ୍ତି ପାଣ୍ଡିଆନ। ମହାପ୍ରଭୁଙ୍କୁ ଦର୍ଶନ କରିବା ପରେ ସେ ଭିତର ବେଢା ପରିକ୍ରମା କରିଥିଲେ। ଉତ୍ତରଦ୍ୱାର ଦେଇ ଶ୍ରୀମନ୍ଦିରରୁ ବାହାରିବା ପରେ ତାଙ୍କୁ ଜନସାଧାରଣମାନେ ଅଭିବାଦନ ଜଣାଇଥିଲେ। ପରେ 5T ଅଧ୍ଯକ୍ଷ ଭୁବନେଶ୍ବର ପ୍ରତ୍ଯାବର୍ତ୍ତନ କରିଥିବା ନେଇ ସୂଚନା ମିଳିଛି।
ନନ୍ଦିଘୋଷ ବ୍ୟୁରୋ: ବଡମ୍ବା ବିଜେପିରେ ଗୋଷ୍ଠୀ କନ୍ଦଳ । ଗୋପାଳପୁର ନିକଟରେ ବିଜେପି ପ୍ରାର୍ଥୀ ସମ୍ବିତ ତ୍ରିପାଠୀଙ୍କ ଗାଡି ଅଟକାଇଲେ ଅସାମାଜିକ ବ୍ୟକ୍ତି । ଥାନାରେ ବିଜେପି କର୍ମୀଙ୍କ ନାଁରେ ଏତଲା ଦେଲେ ବିଜେପି ନେତା ସମ୍ବିତ ତ୍ରିପାଠୀ । ବଡମ୍ବା ନିର୍ବାଚନ ମଣ୍ଡଳୀରେ ବିଜେପି ଟିକେଟରୁ ଲଢ଼ିବେ ପୂର୍ବତନ ପ୍ରଶାସକ ସମ୍ବିତ ତ୍ରିପାଠୀ । ଆଜି ସମ୍ବିତ ନିର୍ବାଚନ ପ୍ରଚାରରେ ବାହାରି ଥିବା ବେଳେ ବଡମ୍ବା ଗୋପାଳପୁର ଛକ ନିକଟରେ ତାଙ୍କ ଗାଡି ପୂର୍ବତନ ବିଜେପି ନେତା ବିଜୟ ଦଳ ବେହେରାଙ୍କର ଗୋଷ୍ଠୀ ଅଟକାଇଥିବା ଅଭିଯୋଗ ହୋଇଛି । ଏପରିକି ଜୀବନରୁ ମାରି ଦେବାକୁ ମଧ୍ୟ ଧମକ ଦିଆଯାଇଥିବା ଅଭିଯୋଗ ହୋଇଛି । ଟିକେଟ ଫେରାଇବା ପାଇଁ ମଧ୍ୟ ଧମକ ଦିଆଯାଇଥିବା ଅଭିଯୋଗ ହୋଇଛି । ବଡମ୍ବା ଥାନାରେ ଏନେଇ ବିଜେପି ନେତା ସମ୍ବିତ ଏତଲା ଦେଇଛନ୍ତି । ପ୍ରତିବାଦରେ ୧୦୦ରୁ ଅଧିକ ବିଜେପି କର୍ମୀ ଧାରଣାରେ ବସି ପ୍ରତିବାଦ କରିଛନ୍ତି। ବଡମ୍ବା ପୋଲିସ ଅଧିକ ତଦନ୍ତ ଚଳାଇଛି ।
