ଭୁବନେଶ୍ୱର : ବିଜୟର ନବୀନ ମନ୍ତ୍ର ଜନସେବା । ଦୁଇ ଦଶନ୍ଧିରୁ ଅଧିକ ସମୟ ଧରି ବିଜୁ ଜନତା ଦଳର ବିଜୟର ଏକମାତ୍ର କାରଣ । ସ୍ବଚ୍ଛ ଶାସନ ଯୋଗୁ ସାରା ଭାରତରେ ସୁନାମ ଅର୍ଜନ କରିଥିବା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଷଷ୍ଠ ପାଳି ପାଇଁ ପ୍ରସ୍ତୁତି ଆରମ୍ଭ କରିଛନ୍ତି । ନିଜ ସମେତ ୭୨ ବିଧାନସଭା ଓ ୧୫ ଲୋକସଭା ପ୍ରାର୍ଥୀଙ୍କ ନାଁ ଘୋଷଣା କରି ନିର୍ବାଚନୀ ମାହୋଲକୁ ଉଷ୍ମ କରିଛନ୍ତି ନବୀନ । ପ୍ରାର୍ଥୀମାନେ ନବୀନ ନିବାସ ଯାଇ ବିଜେଡି ସଭାପତି ନବୀନ ପଟ୍ଟନାୟକ ଓ ଫାଇଭ-ଟି ଅଧ୍ୟକ୍ଷ କାର୍ତ୍ତିକ ପାଣ୍ଡିଆନଙ୍କୁ ଭେଟିଛନ୍ତି । ଏହି ବିଶ୍ବାସ ଯୋଗୁଁ ସେମାନେ କୃତଜ୍ଞତା ଜଣାଇବା ସହ ବିଜୟର ମନ୍ତ୍ର ବି ଆଣିଛନ୍ତି । ନିରନ୍ତର ଜନସେବା ଯୋଗୁଁ ରାଜ୍ୟବାସୀଙ୍କ ହୃଦୟରେ ଯେଉଁ ସ୍ଥାନ ବିଜେଡି ବଜାୟ ରଖିଛି, ତାହାକୁ ଆହୁରି ତ୍ବରାନ୍ବିତ କରିବାକୁ ନିର୍ଦ୍ଦେଶ ମିଳିଛି । ସଠିକ ନିର୍ବାଚନ ପରିଚାଳନା ସହ ବିପୁଳ ମାତ୍ରାରେ ବିଜୟର ଗୁରୁମନ୍ତ୍ର ପାଇଛନ୍ତି ସବୁ ପ୍ରାର୍ଥୀ । ଏହି ନିର୍ବାଚନରେ ସମସ୍ତଙ୍କ ଆଖି ସମ୍ବଲପୁର ଲୋକସଭା ଉପରେ । କାରଣ ଏଠାରେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କୁ ଟକ୍କର ଦେଉଛନ୍ତି ବିଜେଡି ସଂଗଠନ ସମ୍ପାଦକ ପ୍ରଣବ ପ୍ରକାଶ ଦାସ । ଦଳର ବୃହତ ସ୍ବାର୍ଥ ପାଇଁ ନିଜ ନିର୍ବାଚନ ମଣ୍ଡଳୀକୁ ଛାଡ଼ି ପ୍ରଣବ ଯାଇଛନ୍ତି ସମ୍ବଲପୁର । ଏଠାରେ ଯେଉଁ ବିଗଫାଇଟରେ ଆଶା ରହିଛି, ସେଥିରେ ପ୍ରଣବ ବିପୁଳ ଭୋଟରେ ଜିତିବା ନେଇ ଆକଳନ କରିଛନ୍ତି ସ୍ଥାନୀୟ ନେତା ।
ପଦାକୁ ଆସିଲା ହମାସର ଲୋମହର୍ଷକ ଯୌନ ନିର୍ଯାତନାର ଚିତ୍ର
ନନ୍ଦିଘୋଷ ବ୍ୟୁରୋ : ପଦାକୁ ଆସିଲା ହମାସର ଲୋମହର୍ଷକ ଯୌନ ନିର୍ଯାତନାର ଚିତ୍ର । ପ୍ରଥମ ଥର ଲାଗି ହମାସ କବଳରୁ ମୁକୁଳିଥିବା ଜଣେ ମହିଳା ଖୋଲିଛନ୍ତି ହମାସର ଯୌନ ପିପାସୁ ଯନ୍ତ୍ରଣାର ପେଡି । ଗତ ଅକ୍ଟୋବର ୭ରେ ଇସ୍ରାଏଲରୁ ଅପହୃତ ହୋଇଥିଲେ ୪୦ ବର୍ଷ ବୟସ୍କା ଆମିତ ସୋସାନା । ଅପହରଣର ୫୫ ଦିନ ପରେ ତାଙ୍କ ସହ ୧୦୫ଜଣ ପଣବନ୍ଦୀଙ୍କୁ ଖଲାସ କରାଯାଇଥିଲା । ହେଲେ ଏବେ ଗଣମାଧ୍ଯମ ଆଗରେ ସେ ବଖାଣିଛନ୍ତି ନିର୍ଯାତନାର ଛାତିଥରା କାହାଣୀ । ଏକ ମେକସିଫ୍ଟ ଜେଲ ଭିତରେ ତାଙ୍କୁ ନିର୍ଯାତନା ଦେଇଥିଲେ ହମାସ ଆତଙ୍କୀ । ଯୁଦ୍ଧର ପ୍ରାୟ ୫ ମାସ ପରେ ଏବେ ବି ୧୩୦ ପଣବନ୍ଦୀ ହମାସ କବଜାରେ ରହିଛନ୍ତି । ସେମାନଙ୍କ ସମ୍ପର୍କରେ ମିଳୁନି କୌଣସି ଖୋଜଖବର । ସେପଟେ ଇରାନ ବିରୋଧରେ ଆମେରିକା ନେଇଛି ବଡ଼ ପଦକ୍ଷେପ । ଇରାନର ସାମରିକ ବିଭାଗକୁ ସହାୟତା କରୁଥିବା 6ଟି ଦେଶର ବିଭିନ୍ନ ଫାର୍ମ ଉପରେ କଟକଣା ଲଗାଇଛି ଆମେରିକା । କଟକଣାର ଶିକାର ହୋଇଥିବା ଫାର୍ମଗୁଡିକ ମଧ୍ୟରୁ କେତେକ ଫାର୍ମ ୟେମେନର ହାଉଥି ଆତଙ୍କବାଦୀ ସଂଗଠନ ଓ ଲେବାନନର ହେଜବୁଲ୍ଲା ସଂଗଠନକୁ ସହାୟତା କରୁଥିବା ଜଣାଯାଇଛି । ଲାଇବେରିଆ, ଭାରତ, ଭିଏତନାମ, ଲେବାନନ ଓ କୁଏତରେ ପ୍ରତିଷ୍ଠିତ କିମ୍ବା ପଞ୍ଜିକୃତ ଫାର୍ମଗୁଡିକ ବିରୋଧରେ ଏହି ପଦକ୍ଷେପ ନିଆଯାଇଛି ।
ବିଜେପି ଛାଡ଼ିଲେ ସାଲେପୁରର ପୂର୍ବତନ ବିଧାୟକ ପ୍ରକାଶ ଚନ୍ଦ୍ର ବେହେରା
ସାଲେପୁର : ବିଜେପି ଛାଡ଼ିଲେ ପୂର୍ବତନ ବିଧାୟକ ପ୍ରକାଶ ଚନ୍ଦ୍ର ବେହେରା। ଦଳର ପ୍ରାଥମିକ ସଦସ୍ୟ ପଦରୁ ଇସ୍ତଫା ଦେଇଛନ୍ତି ପୂର୍ବତନ ବିଧାୟକ ପ୍ରକାଶ ଚନ୍ଦ୍ର ବେହେରା। ଏ ନେଇ ସେ ଜିଲ୍ଲା ବିଜେପି ସଭାପତି ମନମୋହନ ସାମଲଙ୍କୁ ତାଙ୍କର ଇସ୍ତଫା ପତ୍ର ପଠାଇ ଦେଇଛନ୍ତି। ଏହାସହ କଟକ ଜିଲ୍ଲା ବିଜେପି ସଭାପତି ପଦରୁ ମଧ୍ୟ ଇସ୍ତଫା ଦେଇଥିବା ଇସ୍ତଫା ପତ୍ରରେ ଉଲ୍ଲେଖ କରିଛନ୍ତି। ଏହାସହ ଦଳରେ ଥିବା ବିଭିନ୍ନ ପଦପଦବୀରୁ ଇସ୍ତଫା ଦେଇଥିବା ଉଲ୍ଲେଖ କରିଛନ୍ତି। ସାଲେପୁରର ପୂର୍ବତନ ବିଧାୟକ ହେଉଛନ୍ତି ପ୍ରକାଶ ଚନ୍ଦ୍ର ବେହେରା।
ଗ୍ୟାଙ୍ଗଷ୍ଟାର ମୁଖତାର ଅନସାରୀଙ୍କ ଦେହାନ୍ତ
ନୂଆଦିଲ୍ଲୀ: ଗ୍ଯାଙ୍ଗଷ୍ଟର ତଥା ରାଜନେତା ମୁଖତାର ଅନସାରୀଙ୍କ ଦେହାନ୍ତ । ହୃଦଘାତରେ ତାଙ୍କର ମୃତ୍ଯୁ ଘଟିଥିବା ସୂଚନା ମିଳିଛି । ଜେଲରେ ତାଙ୍କ ସ୍ବାସ୍ଥ୍ଯାବସ୍ଥାରେ ସମସ୍ୟା ଉପୁଜିବା ପରେ ତାଙ୍କୁ ବାନ୍ଦା ମେଡିକାଲ କଲେଜକୁ ଅଣାଯାଇଥିଲା । ସେଠାରେ ତାଙ୍କର ମୃତ୍ଯୁ ଘଟିଛି ।
ସେପଟେ ଭାଇଙ୍କୁ ବାନ୍ଦା ଜେଲରେ ଖାଦ୍ଯରେ ବିଷ ଦିଆଯାଇଥିବା ନେଇ ଅଭିଯୋଗ କରିଛନ୍ତି ଭାଇ ଅଫଜଲ ଆନସାରୀ । ଗତ ମାର୍ଚ୍ଚ ୧୯ ଓ ମାର୍ଚ୍ଚ ୨୨ରେ ତାଙ୍କୁ ବିଷ ଦିଆଯାଇଥିବା ନେଇ ଅଭିଯୋଗ କରିଥିଲେ ଭାଇ ତଥା ଘାଜିପୁର ଏମପି ଅଫଜଲ । ବିଗତ ୨୦୦୫ରୁ ପଞ୍ଜାବ ଓ ଉତ୍ତରପ୍ରଦେଶର ବିଭିନ୍ନ ଜେଲରେ ବନ୍ଦୀ ଜୀବନ କାଟୁଛନ୍ତି । ତାଙ୍କ ନାମରେ ୬୦ରୁ ଅଧିକ ମାମଲା ରହିଛି । ୮ଟି ମାମଲାରେ ତାଙ୍କୁ ସଜା ମିଳିଛି । ମୁଖତାରଙ୍କ ମୃତ୍ଯୁ ପରେ ବାନ୍ଦାରେ ୧୪୪ ଧାରା ଜାରି କରାଯାଇଛି । ଲକ୍ଷ୍ମୌ, ଘାଜିପୁର ଓ ମାଉରେ ଆଲର୍ଟ ଜାରି ହୋଇଛି ।
ବିହାରରେ ୧୫ ଆସନରେ ପ୍ରାର୍ଥୀ ଦେଲା AIMIM
ପାଟନା: ବିହାରରେ କଡା ଟକ୍କର ଦେବାକୁ ଯାଉଛି ଅସଦୁଦ୍ଦିନ ଓଓ୍ବେସୀଙ୍କ ଦଳ ଏଆଇଏମଏଆଇଏମ । ମୋଟ ୧୫ ଆସନରେ ଦଳ ପ୍ରାର୍ଥୀଙ୍କ ନାଁ ଘୋଷଣା କରିଛି । ପୂର୍ବରୁ ୧୦ ଆସନରେ ପ୍ରାର୍ଥୀ ଘୋଷଣା କରିଥିବା ବେଳେ ଏବେ ଆଉ ୫ଟି ଆସନରେ ପ୍ରାର୍ଥୀ ଘୋଷଣା କରିଛି ।
ଏଆଇଏମଆଇଏମ ବିହାର ପ୍ରଦେଶ ଅଧ୍ଯକ୍ଷ ଅଖତୁରୁଲ ଇମାମ କହିଛନ୍ତି, ବିହାରରେ ପ୍ରଥମ ଦଳ ୧୦ଟି ଆସନରେ ପ୍ରାର୍ଥୀ ଦେବ ବୋଲି ଘୋଷଣା କରିଥିଲା । ମାତ୍ର ପରେ ଆଉ ୫ଟି ଆସନରେ ପ୍ରାର୍ଥୀ ଦିଆଯିବ ବୋଲି ଦଳ ନିଷ୍ପତ୍ତି ନେଇଛି । ଏହି ୫ଟି ଆସନ ହେଲା ଗୋପାଳଗଞ୍ଜ, ଶିବହର, ଦରଭଙ୍ଗା, ବାଲ୍ମୀକି ନଗର ଓ ମଧୁବନୀ । କିଷନଗଞ୍ଜ ଆସନରୁ ଲଢେଇ କରିବେ ରାଜ୍ଯ ସଭାପତି ଅଖତୁରୁଲ ଇମାମ । ଏହି ଆସନଗୁଡିକରେ ଦଳର ପ୍ରାର୍ଥୀ ଭଲ ସ୍ଥିତିରେ ଅଛନ୍ତି ଏବଂ ସେମାନଙ୍କ ବିଜୟ ଆଶା ଉଜ୍ଜ୍ବଳ ବୋଲି ସେ କହିଛନ୍ତି ।
ଗୁରୁତ୍ବପୂର୍ଣ୍ଣ କଥା ହେଲା ଦଳ ଘୋଷଣା କରିଥିବା ୧୫ ଆସନରୁ ପ୍ରାୟ ୫୦ ପ୍ରତିଶତରେ ହୁନ୍ଦୁ ପରିବାରର ବ୍ୟକ୍ତିଙ୍କୁ ପ୍ରାର୍ଥୀ କରାଯାଇଛି ।
ରାଜନୖେତିକ ବନବାସରୁ ଫେରିଲେ ଗୋବିନ୍ଦା, ସିନ୍ଦେଙ୍କ ଶିବସେନାରେ ହେଲେ ସାମିଲ
ମହାରାଷ୍ଟ୍ର: ରାଜନୈତିକ ବନବାସ ସାରି ଶେଷରେ ଏକନାଥ ସିନ୍ଦେଙ୍କ ଶିବସେନାରେ ସାମିଲ ହେଲେ ସୁପରଷ୍ଟାର ଗୋବିନ୍ଦା । ୨୦୧୦ରୁ ୨୦୨୪ ଯାଏଁ ରାଜନୀତିରୁ ଉଭାନ ହୋଇଯାଇଥିଲେ ଗୋବିନ୍ଦା । ରାଜନୀତିକୁ ଫେରିବା କରେ ଗୋବିନ୍ଦା କହିଛନ୍ତି, ବନବାସ ପରେ ସିନ୍ଦେଙ୍କ ରାମରାଜ୍ଯରେ ପ୍ରବେଶ କରିଛି ।
ସୂଚନାଯୋଗ୍ୟ, ୨୦୦୪ରେ କଂଗ୍ରେସ ଟିକେଟରୁ ନର୍ଥ ମୁମ୍ବାଇ ଲୋକସଭା ଆସନରୁ ନିର୍ବାଚିତ ହୋଇଥିଲେ ଗୋବିନ୍ଦ । ବିଜେପି ଭେଟେରାନ ତଥା ୫ ଥରର ସାଂସଦ ରାମ ନାଏକଙ୍କୁ ୫୦ ହଜାରରୁ ଅଧିକ ଭୋଟରେ କରିଥିଲେ ପରାସ୍ତ । ବିଜେପି ଦୁର୍ଗରେ ଗୋବିନ୍ଦାଙ୍କ ବିଜୟ ସେତେବେଳେ ଚର୍ଚ୍ଚା ସୃଷ୍ଟି କରିଥିଲା । ତେବେ ନିର୍ବାଚନରେ ବିଜୟ ପରେ ସେ ଲୋକସଭାକୁ ସଠିକ୍ ପ୍ରତିନିଧିତ୍ବ ନ କରିପାରିଥିବାରୁ ସମାଲୋଚନାର ଶିକାର ହୋଇଥିଲେ । ୨୦୦୮ରେ ସେ ରାଜନୀତିରୁ ଦୂରେଇ ଅଭିନୟ ଉପରେ ଫୋକସ ଦେବାକୁ ଘୋଷଣା କରିଥିଲେ ।
ବିଚାର ବିଭାଗକୁ ପ୍ରଭାବିତ କରିବାକୁ ପ୍ରୟାସ, CJIଙ୍କ ପାଖକୁ ୬ ଶହ ଓକିଲଙ୍କ ଚିଠି
ନୂଆଦିଲ୍ଲୀ: ବିଚାର ବିଭାଗକୁ ପ୍ରଭାବିତ କରିବା ଲାଗି ନ୍ଯସ୍ତସ୍ବାର୍ଥ ଗୋଷ୍ଠୀର ପ୍ରୟାସ ଅଭିଯୋଗ । କୋର୍ଟ ପରି ପବିତ୍ର ପ୍ରତିଷ୍ଠାନର ଆଦର୍ଶକୁ ବିପଥଗାମୀ କରିବା ଅଭିଯୋଗ । ସୁପ୍ରିମକୋର୍ଟ ପ୍ରଧାନ ବିଚାରପତି ଜଷ୍ଟିସ ଡି.ୱାଇ. ଚନ୍ଦ୍ରଚୂଡଙ୍କ ନିକଟକୁ ଏନେଇ ପତ୍ର ଲେଖିଛନ୍ତି ଦେଶର ୬ ଶହରୁ ଅଧିକ ଓକିଲ । ସିଜେଆଇଙ୍କ ନିକଟକୁ ପତ୍ର ଲେଖିଥିବା ଓକିଲଙ୍କ ମଧ୍ଯରେ ରହିଛନ୍ତି ବରିଷ୍ଠ ଆଇନଜୀବୀ ହରିଶ ସାଲଭେ, ବାର୍ କାଉନସିଲ ଅଫ ଇଣ୍ଡିଆ ଅଧ୍ଯକ୍ଷ ମନନ କୁମାର ମିଶ୍ର ଏବଂ ଅନ୍ୟ ଆଇନଜୀବୀ । ସେମାନେ ବିଚାର ବିଭାଗର ସଂହତି ଉପରେ ଗୁରୁତ୍ବାରୋପ କରିଛନ୍ତି ।
ପତ୍ରରେ ଆଇନଜୀବୀ ଦର୍ଶାଇଛନ୍ତି ବିଚାର ପ୍ରକ୍ରିୟା, କୋର୍ଟ ରାୟକୁ ପ୍ରଭାବିତ କରିବା ଲାଗି କିଛି ନ୍ଯସ୍ତ ସ୍ବାର୍ଥଗୋଷ୍ଠୀ ଉଦ୍ଯମ କରୁଛନ୍ତି । ବିଚାର ବିଭାଗ ବିରୋଧରେ ଭିତ୍ତିହୀନ ମନ୍ତବ୍ଯ ଦେବା ସହ ଏହାକୁ ଏକ ରାଜନୈତିକ ଏଜେଣ୍ଡାରେ ପରିଣତ କରିଛନ୍ତି । ବିଶେଷ କରି ଦୁର୍ନୀତିରେ ଅଭିଯୁକ୍ତ ରାଜନୈତିକ ବ୍ଯକ୍ତିଙ୍କଠାରୁ ଏହାର ପ୍ରମାଣ ମିଳୁଛି । ଏପରିକି କୋର୍ଟ ରାୟକୁ ନିନ୍ଦିତ କରିବା ଦେଖାଯାଉଛି । ଏହି ଧରଣର ଉଦ୍ଯମ ଯୋଗୁଁ ବିଚାର ବିଭାଗ ଉପରେ ସର୍ବସାଧାରଣଙ୍କ ରହିଥିବା ବିଶ୍ବାସ କ୍ଷତିଗ୍ରସ୍ତ ହେଉଛି । ଯେଉଁ ଦେଶରେ ଆଇନକାନୁନ ବୋଲି କିଛି ନାହିଁ ସେହି ଦେଶର କୋର୍ଟଗୁଡିକ ସହ ଭାରତୀୟ କୋର୍ଟଗୁଡିକୁ ଏହି ଗୋଷ୍ଠୀ ତୁଳନା କରୁଛନ୍ତି ଓ ଉଦ୍ଦେଶ୍ୟମୂଳକ ଭାବେ ବିଚାର ବିଭାଗୀୟ ପ୍ରତିଷ୍ଠାନଗୁଡିକୁ ନିନ୍ଦିତ କରୁଛନ୍ତି । ଏହି ନ୍ଯସ୍ତସ୍ବାର୍ଥ ଗୋଷ୍ଠୀ ସପକ୍ଷରେ ଯଦି କୋର୍ଟ ରାୟ ନଯାଏ ତେବେ ସେମାନେ କୋର୍ଟକୁ ଖୋଦ୍ କୋର୍ଟ ଭିତରେ ଓ ମିଡିଆ ଜରିଆରେ ସମାଲୋଚନା କରିଥାନ୍ତି । ଏପରିକି ଯେଉଁ ବ୍ଯକ୍ତିଙ୍କ ମାମଲାର ବିଚାର ଯେଉଁ ବିଚାରପତି କରିଥାନ୍ତି ତାଙ୍କୁ ପ୍ରଭାବିତ କରିବା ଲାଗି ଚେଷ୍ଟା କରାଯାଉଛି ଓ ସେହି ବିଚାରପତିଙ୍କୁ ପ୍ରଭାବିତ କରିବା ଲାଗି ସୋସିଆଲ ମିଡିଆର ବ୍ଯବହାର କରିଥାନ୍ତି ବୋଲି ପତ୍ରରେ ଦର୍ଶାଯାଇଛି । ବିଚାର ବିଭାଗକୁ ସୁରକ୍ଷା ଦେବା ଲାଗି ଏହି ଆଇନଜୀବୀମାନେ ସୁପ୍ରିମକୋର୍ଟଙ୍କୁ ଅନୁରୋଧ କରିଛନ୍ତି ।
ଦୁଶ୍ଚିନ୍ତା ଓ ମାନସିକ ଚାପ ନେଉଛି ଭାରତୀୟଙ୍କ ଜୀବନ, ପ୍ରତି ତିନି ଜଣରେ ଜଣେ ଆକ୍ରାନ୍ତ
ଭୁବନେଶ୍ବର: ଜୀବନ ନେଉଛି ହାଇପର ଟେନସନ୍ । ଦେଶରେ ଅଧାରୁ ଅଧିକ ବ୍ୟକ୍ତି ରକ୍ତଚାପରେ ପୀଡ଼ିତ । ଏପରି ରିପୋର୍ଟ ଦେଇଛନ୍ତି ଆଇସିଏମ୍ଆର୍ ଓ ନ୍ୟାସନାଲ ଫ୍ୟାମିଲି ହେଲଥ ସର୍ଭେ । ହୃଦରୋଗ, ମଧୁମେହ ରୋଗରେ ଅକାଳରେ ଝରିପଡ଼ୁଛି ଜୀବନ । ରିପୋର୍ଟ ଅନୁଯାୟୀ ପ୍ରତି ୩ ଜଣରେ ଜଣେ ବ୍ୟକ୍ତି ପ୍ରାକ୍ ହାଇପରଟେନ୍ସନ୍ ରୋଗରେ ପୀଡ଼ିତ । ବିଶେଷଜ୍ଞଙ୍କ ମତରେ ମାନସିକ ଚାପ, ଖାଦ୍ୟରେ ଅତ୍ୟଧିକ ଲୁଣ ସେବନ, ଜଙ୍କ ଫୁଡ୍, ଶାରୀରିକ ପରିଶ୍ରମ ନକରିବା ଯୋଗୁଁ ଯୁବକଯୁବତୀ ବି ରକ୍ତଚାପ ରୋଗରେ ପଡୁଛନ୍ତି ।
ଭାରତୀୟ ଖାଦ୍ୟରେ ଅଧିକ ଲୁଣ ଖାଇବାରୁ ଉଚ୍ଚ ରକ୍ତଚାପରେ ପୀଡ଼ିତ ହୋଇ ହୃଦରୋଗର ଶିକାର ହେଉଛନ୍ତି । ପ୍ରତି ୩ ଜଣ ବ୍ୟକ୍ତିରେ ଜଣେ ପ୍ରାକ୍ ହାଇପରଟେନ୍ସନ୍ ରୋଗରେ ପୀଡିତ । ଏଭଳି ରିପୋର୍ଟ ଦେଇଛି ଇଣ୍ଡିଆନ୍ କାଉନସିଲ ଫର୍ ମେଡିକାଲ ରିସର୍ଚ୍ଚ ବା ଆଇସିଏମ୍ଆର୍ । ଆଞ୍ଚଳିକ ଭେଷଜ ଗବେଷଣା କେନ୍ଦ୍ର ଭୁବନେଶ୍ବର ଦ୍ବାରା କରାଯାଇଥିବା ଅନୁଧ୍ୟାନରୁ ଜଣାପଡ଼ିଛି, ଦେଶର ମହିଳାଙ୍କ ସଂଖ୍ୟାରୁ ୨୧.୩ ପ୍ରତିଶତ ଓ ପୁରୁଷଙ୍କ ଭିତରୁ ୨୪ ପ୍ରତିଶତ ଉଚ୍ଚ ରକ୍ତଚାପ ରୋଗରେ ପୀଡ଼ିତ । ଫଳରେ ଅନିୟନ୍ତ୍ରିତ ଓ ଡାୟୋଗ୍ନଷ୍ଟିକ୍ ନହୋଇ ହୃଦରୋଗ ଓ ମଧୁମେହ ରୋଗରେ ଅଧିକାଂଶ ଲୋକଙ୍କ ଜୀବନ ଯାଉଛି । ଏପରିକି ଅକାଳରେ ଯୁବକଯୁବତୀ ବି ଉଚ୍ଚ ରକ୍ତଚାପରେ ପୀଡ଼ିତ ହୋଇ ମୃତ୍ୟୁମୁଖରେ ପଡୁଛନ୍ତି । ଲୁଣ ମାତ୍ରା ଶରୀରରେ ଅଧିକ ହେଲେ ହୃତପିଣ୍ଡକୁ ରକ୍ତ ସଞ୍ଚାଳନ ବାଧାପ୍ରାପ୍ତ ହୁଏ । ୨୮ଟି ରାଜ୍ୟ ଓ ୮ଟି କେନ୍ଦ୍ରଶାସିତ ଅଞ୍ଚଳର ୧୮ରୁ ୫୪ ବର୍ଷ ବୟସ ଭିତରେ ୭ ଲକ୍ଷ ୪୩ ହଜାର ୬୭ ଜଣ ବ୍ୟକ୍ତିଙ୍କ ନମୁନା ସଂଗ୍ରହ କରାଯାଇ ବିଭିନ୍ନ ପରୀକ୍ଷା ନିରୀକ୍ଷା କରାଯାଇଥିଲା । ସେମାନେ ସମସ୍ତେ ଉଚ୍ଚ ରକ୍ତଚାପ ରୋଗରେ ପୀଡ଼ିତ । ମାନସିକ ଚାପ, ଜଙ୍କ୍ ଫୁଡ ଏଥିପାଇଁ ଦାୟୀ । ଏହାସହ ଆଜିକାଲି ଅଧିକାଂଶ ଲୋକ ଶାରୀରିକ ପରିଶ୍ରମ କରୁନାହାନ୍ତି । ଯାହା ବଡ଼ ସମସ୍ୟା ହୋଇ ଉଭା ହୋଇଛି ।
ଯେଉଁ ବ୍ୟକ୍ତିର ରକ୍ତଚାପ ସିଷ୍ଟୋଲିକ୍ ପ୍ରେସର୍ ୧୩୦ରୁ ୧୩୯ ଓ ଡାୟୋଷ୍ଟୋଲିକ୍ ପ୍ରେସର୍ ୮୦ରୁ ୮୯ ଭିତରେ ରହୁଛି । ସେ ପ୍ରାକ୍ ହାଇପରଟେନ୍ସନରେ ପୀଡ଼ିତ । ଏହାସହିତ ବରା, ପିଆଜି, ଫାଷ୍ଟଫୁଡ, ସୋଡିୟମ କ୍ଲୋରାଇଡ ଯୁକ୍ତ ପ୍ରକ୍ରିୟାକୃତ ଖାଦ୍ୟ ଏସବୁ ରୋଗର କାରଣ ବନୁଛି । ସୁସ୍ଥ ଜୀବନ ପାଇଁ ଜଣେ ବ୍ୟକ୍ତି ଦିନ ଭିତରେ ମାତ୍ର ୫ ମିଲିଗ୍ରାମ ବା ଗୋଟିଏ ଚା ଚାମୁଚ ପରିମାଣର ଲୁଣ ଖାଇବା ଦରକାର । କିନ୍ତୁ ଆଜିକାଲି ଦିନ ଭିତରେ ୧୫ ମଲିଗ୍ରାମ ଲୁଣ ଲୋକେ ଖାଉଛନ୍ତି । ଯେଉଁଥିପାଇଁ ସାମାନ୍ୟ ମାନସିକ ଚାପଗ୍ରସ୍ତ ହେଲେ ରକ୍ତଚାପରେ ପୀଡ଼ିତ ହେଉଛନ୍ତି । ଏପରି ଲାଇଫଷ୍ଟାଇଲ୍କୁ ବଦଳାଇବାକୁ ପଡ଼ିବ । ସ୍କୁଲ ପିଲାମାନେ ବାହାରକୁ ଆସିଲେ ଆଜିନୋମୋଟୋ ମିଶ୍ରିତ ଖାଦ୍ୟ ସହିତ ବଜାରରେ ମିଳୁଥିବା ଅସନ୍ତୁଳିତ ଖାଦ୍ୟ ପ୍ରତି ଆକୃଷ୍ଟ ହେଉଛନ୍ତି । ଏସବୁ ଖାଦ୍ୟ ଶରୀରରେ କୋମରବିଡିଟି ବୃଦ୍ଧି କରିବାରେ ସହାୟକ ହେଉଛି ।
ରକ୍ତଚାପ ସହିତ ଭାରତରେ ଦିନକୁ ଦିନ ବଢୁଛି ମଧୁମେହ ରୋଗୀଙ୍କ ସଂଖ୍ୟା । ଗୋଟିଏ ପରିସଂଖ୍ୟାନରୁ ଜଣାପଡ଼ିଛି ଦେଶର ୭୦ ପ୍ରତିଶତ ଲୋକ ଏହି ରୋଗରେ ପୀଡ଼ିତ । ଯାହାକି ସ୍ଲୋ ପଏଜନ୍ ପରି ଜୀବନ ନେଉଛି ।
ରାଜ୍ୟ କଂଗ୍ରେସରେ ଟିକେଟ୍ ଝଡ଼, ନେତା ଘୋଷଣା କରୁଛନ୍ତି ନିଜ ପ୍ରାର୍ଥିତ୍ବ
ଭୁବନେଶ୍ବର: ବିଜେଡି ୭୨ ବିଧାୟକ ଓ ୧୫ ସାଂସଦ ପ୍ରାର୍ଥୀଙ୍କ ନାଁ ଘୋଷଣା କରିଥିବା ବେଳେ ରାଜ୍ୟ ବିଜେପି ପକ୍ଷରୁ ୧୮ ଲୋକସଭା ପ୍ରାର୍ଥୀଙ୍କ ନାଁ ଘୋଷଣା କରାଯାଇଛି । ହେଲେ ରାଜ୍ୟ କଂଗ୍ରେସରେ କାହାକୁ ମିଳିବ ଟିକେଟ୍ ଏବେ ବି ଅଙ୍କ ଛିଣ୍ଡୁନି । ନେତାଙ୍କ ନାଁରେ ଫାଇନାଲ ଷ୍ଟାମ କେନ୍ଦ୍ରୀୟ ନେତୃବୃନ୍ଦ ମାରିବାକୁ ଥିବା ବେଳେ ରାଜ୍ୟରେ ନେତାମାନେ ଧର୍ଯ୍ୟହରା ହୋଇଯିବା ପରିଲାଗୁଛନ୍ତି । ଏପରିକି ନିଜେ ନିଜର ପ୍ରାର୍ଥିତ୍ବ ନେଇ ଘୋଷଣା କରୁଛନ୍ତି । କଂଗ୍ରେସର ହେଭିଓ୍ବେଟ୍ ତଥା ପ୍ରଚାର କମିଟି ଅଧ୍ୟକ୍ଷ ଭକ୍ତ ଚରଣ ଦାସ ନର୍ଲାରୁ ବିଧାୟକ ପ୍ରାର୍ଥୀ ହେବେ ବୋଲି କଂଗ୍ରେସ ଭବନରେ ସାମ୍ବାଦିକ ସମ୍ମିଳନୀ କରି ଘୋଷଣା କରିଛନ୍ତି । ତେବେ କଂଗ୍ରେସ ମଡିଆ ସେଲ୍ ଅଧ୍ୟକ୍ଷ କହିଛନ୍ତି, ଟିକେଟ୍ ବଣ୍ଟନ ନେଇ ସ୍କ୍ରିନିଂ ଓ ସିଇସି ବୈଠକରେ ସ୍ଥିର ହେବ । ଯାହାକୁ ନେଇ ଦଳରେ ଟିକେଟ କଳି ଜଟିଳ ହୋଇଛି ।
ରାଜ୍ଯ କଂଗ୍ରେସ ଟିକେଟ୍ ଚୟନରେ ବିଳମ୍ବ ପରେ ଆଗକୁ ଆସିଲେ ଭକ୍ତ ଦାସ । ପିଇସି, ସ୍କ୍ରିନିଂ ଓ ସିଇସିର ଉଡ଼ାଇଲେ ଧଜିଆ । ହାଇକମାଣ୍ଡଙ୍କ ଘୋଷଣା ପୂର୍ବରୁ କହିଲେ, ନର୍ଲାରୁ ଲଢ଼ିବି । ପିସିସି କହିଲା, କିଛି ହୋଇନାହଁ ଚୂଡ଼ାନ୍ତ । କଂଗ୍ରେସ ପ୍ରଗମନ ଆପ୍ ଜରିଆରେ ଆଗୁଆ ଟିକେଟ ବାଣ୍ଟିବାରେ ଫେଲ୍ ମାରିବା ପରେ ଦଳୀୟ ନେତା ହାଇକମାଣ୍ଡଙ୍କ ଘୋଷଣାକୁ ଅପେକ୍ଷା କରିବାକୁ ନାରାଜ । ଖୋଦ୍ କଂଗ୍ରେସ ପ୍ରଚାର କମିଟିର ଅଧ୍ୟକ୍ଷ ଭକ୍ତ ଚରଣ ଦାସ ନର୍ଲାରୁ ବିଧାନସଭା ନିର୍ବାଚନ ଲଢ଼ିବେ ବୋଲି ଘୋଷଣା କରିଛନ୍ତି । ଏହାସହ ତାଙ୍କ ପୁଅ ସାଗର ଦାସ ଟିକେଟ ପାଇବା ନେଇ ଯୁକ୍ତି ବାଢ଼ିଛନ୍ତି ଭକ୍ତ । ତେବେ ପିସିସି ମିଡିଆ ସେଲ୍ ଅଧ୍ୟକ୍ଷ ବିଶ୍ବରଞ୍ଜନ ମହାନ୍ତି କହିଛନ୍ତି, ଖୁବଶୀଘ୍ର ସ୍କ୍ରିନିଂ ଓ ସିଇସି ବୈଠକରେ ପ୍ରାର୍ଥୀ ସ୍ଥିର କରାଯିବ ।
୨୪ ବର୍ଷ ଧରି ରାଜ୍ୟରେ କ୍ଷମତା ବାହାରେ ରହିଛି କଂଗ୍ରେସ । ଦଳର ଭୋଟ ହାର କମିବାରେ ଲାଗିଛି । ଏପରି ସ୍ଥିତିରେ ୨୦୨୪ ନିର୍ବାଚନରେ କଂଗ୍ରେସ ଆଗୁଆ ଟିକେଟ ବଣ୍ଟିବା ପାଇଁ ୨ ମାସ ଧରି କସରତ କରିଥିଲା । ଫଳ କିନ୍ତୁ ଶୂନ ହୋଇଛି । ଟିକେଟ ବଣ୍ଟନରେ ବିଳମ୍ବ ଯୋଗୁଁ ନେତାମାନେ ନିଜେ ସର୍ବେସର୍ବା ନୀତିକୁ ଆପଣାଇଛନ୍ତି । ଫଳରେ ବରିଷ୍ଠ କଂଗ୍ରେସ ନେତାମାନେ ନିଜେ ନିଜ ଟିକେଟ ଘୋଷଣା କରୁଛନ୍ତି ବୋଲି ରାଜନୈତିକ ସମୀକ୍ଷକ କହିଛନ୍ତି ।
୨ ମାସ ବିଳମ୍ବ ପରେ ପୁଣି କଂଗ୍ରେସ ନେତାମାନେ କହିଛନ୍ତି, ଏପ୍ରିଲ ପ୍ରଥମ ସପ୍ତାହରେ ଦଳର ପ୍ରାର୍ଥୀ ତାଲିକା ଆସିବ । ତେବେ ଆଗୁଆ ଟିକେଟ ବାଣ୍ଟିବାର ଡିଣ୍ଡିମ ପିଟୁଥିବା କଂଗ୍ରେସ ସବୁ ବେଳେ ଫେଲ୍ ମାରୁଥିବା ନେଇ ଭୁବନେଶ୍ବରରୁ ଦିଲ୍ଲୀ ଯାଏଁ ଚର୍ଚ୍ଚା ହେଉଛି ।
ଆଉ ୪ ଦିନ ବଢ଼ିଲା କେଜ୍ରିଓ୍ବାଲଙ୍କ ରିମାଣ୍ଡ ଅବଧି
ନୂଆଦିଲ୍ଲୀ: ଦିଲ୍ଲୀ ଅବକାରୀ ନୀତି ଦୁର୍ନୀତି ମାମଲାରେ ଗିରଫ ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିଓ୍ବାଲଙ୍କ ରିମାଣ୍ଡ ଅବଧି ଆଉ ୪ ଦିନ ବଢିଲା । ଆସନ୍ତା ଏପ୍ରିଲ ୧ ତାରିଖ ପର୍ଯ୍ୟନ୍ତ ଇଡି ହେପାଜତରେ ରହିବେ କେଜ୍ରିଓ୍ବାଲ । ଇଡି ୭ ଦିନିଆ ରିମାଣ୍ଡ ଦାବି କରିଥିବା ବେଳେ ୪ ଦିନର ଅନୁମତି ଦେଇଛନ୍ତି ଦିଲ୍ଲୀର ରାଉଜ ଏଭେନ୍ଯୁ କୋର୍ଟ ।
ଆଜି କେଜ୍ରିଓ୍ବାଲଙ୍କ ପ୍ରଥମ ପର୍ଯ୍ୟାୟ ରିମାଣ୍ଡ ସରିଥିବା ପରେ ତାଙ୍କୁ ରାଉଜ ଏଭେନ୍ୟୁ କୋର୍ଟରେ ହାଜର କରାଯାଇଥିଲା । ଜେରାବେଳେ କେଜ୍ରିଓ୍ବାଲଙ୍କ ବୟାନ ରେକର୍ଡ କରାଯାଇଥିବା ନେଇ ଇଡି ପକ୍ଷରୁ ଦିଆଯାଇଥିଲା । ତେବେ ତଦନ୍ତରେ କେଜ୍ରିଓ୍ବାଲ ସହଯୋଗ କରୁ ନଥିବା ଇଡି କହିଛି । କିଛି ଡିଜିଟାଲ ତଥ୍ୟ ମିଳିଥିବାରୁ ଏହାର ଛାନବିନ କରାଯାଉଛି । କେଜ୍ରିଓ୍ବାଲଙ୍କୁ ଆହୁରି ଅଧିକ ତଦନ୍ତ କରିବାର ଆବଶ୍ୟକ ଅଛି ବୋଲି ଇଡି ଦର୍ଶାଇଥିଲା । ତେଣୁ ଆଉ ୭ ଦିନ ରିମାଣ୍ଡରେ ନେବାକୁ ଦାବି କରିଥିଲା ଇଡି । ମାମଲାରେ ଗୋଆର କିଛି ନେତାଙ୍କ ସହ କେଜ୍ରିଓ୍ବାଲଙ୍କୁ ସାମ୍ନାସାମ୍ନି ଜେରା କରିବାକୁ ଚାହୁଁଛି ପ୍ରବର୍ତ୍ତନ ନିର୍ଦ୍ଦେଶାଳୟ ।
ସେପଟେ ତାଙ୍କୁ କାହିଁକି ଇଡି ଗିରଫ କରିଛି ବୋଲି କୋର୍ଟରେ ପଚାରିଥିଲେ ଅରବିନ୍ଦ କେଜ୍ରିଓ୍ବାଲ । ଗତ ୨ ବର୍ଷ ଧରି ଏହି ମାମଲା ଚାଲି ଆସୁଛି । ୨୦୨୨ରେ ସିବିଆଇରେ ମାମଲା ରୁଜୁ ହୋଇଥିଲା । ମାମଲାରେ କୌଣସି ଅଦାଲତ ଦୋଷୀ ସାବ୍ୟସ୍ତ କରି ନଥିବାରୁ ମୋତେ କାହିଁକି ଗିରଫ କରାଯାଇଛି ବୋଲି କହିଥିଲେ କେଜ୍ରିଓ୍ବାଲ । ମୋ ସପକ୍ଷରେ ବୟାନ ଦେଇଥିବା ସାକ୍ଷୀଙ୍କୁ ଜବରଦସ୍ତ ମୋ ବିରୋଧରେ ସାକ୍ଷ ଦେବାକୁ ବାଧ୍ୟ କରାଯାଉଛି ବୋଲି ମଧ୍ୟ କେଜ୍ରିଓ୍ବାଲ କହିଛନ୍ତି । କୋର୍ଟ ଯିବା ପୂର୍ବରୁ ଗଣମାଧ୍ୟମ ଆଗରେ ପ୍ରତିକ୍ରିୟା ଦେଇ ଏହା ଏକ ରାଜନୈତିକ ଷଡ଼ଯନ୍ତ୍ର ଓ ଆପକୁ ଧ୍ଵଂସ କରିବାକୁ ଇଡିର ଏହା ଷଡ଼ଯନ୍ତ୍ର ବୋଲି କହିଥିଲେ କେଜ୍ରିଓ୍ବାଲ ।