ବାରିପଦା: ଶିମିଳିପାଳ ଅଭୟାରଣ୍ୟରେ ଲିଭୁନି ନିଆଁ। ଶିମିଳିପାଳ ଅଭୟାରଣ୍ୟ ଓ ଏହାର ପାଦଦେଶରେ ଥିବା ଜଙ୍ଗଲ ସମେତ ବାରିପଦା ସର୍କଲରେ ଆଜି ୫୪ଟି ସ୍ଥାନରେ ନିଆଁ ଲାଗିଥିବା ଜଣାପଡିଛି। ଏନେଇ ସୂଚନା ଦେଇଛନ୍ତି ଶିମିଳିପାଳ କର୍ତ୍ତୃପକ୍ଷ।
ଏହା ମଧ୍ୟରୁ କେବଳ ଶିମିଳିପାଳ ଅଭୟାରଣ୍ୟର କୋର ଅଞ୍ଚଳ ଅର୍ଥାତ୍ ବ୍ୟାଘ୍ର ପ୍ରକଳ୍ପ ଅଞ୍ଚଳର ୩୫ଟି ସ୍ଥାନ ଅନ୍ତର୍ଭୁକ୍ତ । ସଂପୃକ୍ତ ଅଂଚଳରେ ଡ୍ୟୁଟିରେ ଥିବା କର୍ମଚାରୀଙ୍କୁ ନିଆଁକୁ ଆୟତ୍ତ କରିବାକୁ ନିର୍ଦ୍ଦେଶ ଦିଆଯାଇଛି। ଅତ୍ୟଧିକ ଗ୍ରୀଷ୍ମପ୍ରବାହ ଫଳରେ ନିଆଁ ବ୍ୟାପକ ଭାବରେ ଜଙ୍ଗଲରେ ମାଡୁଥିବା ଜଣାପଡିଛି।
ନୂଆଦିଲ୍ଲୀ: ଲୋକସଭା ନିର୍ବାଚନର ଦ୍ୱିତୀୟ ପର୍ଯ୍ୟାୟରେ ହୋଇଥିବା ମତଦାନ ପ୍ରଥମ ପର୍ଯ୍ୟାୟ ଭୋଟିଂ ସହ ସମାନ ରହିଛି। ଦ୍ୱିତୀୟ ପର୍ଯ୍ୟାୟରେ ୧୩ଟି ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳର ୮୮ ଆସନରେ ମୋଟ୍ ୬୧ ପ୍ରତିଶତ ମତଦାନ ହୋଇଥିଲା।
ଯେଉଁଥିରେ ତ୍ରିପୁରାରେ ସର୍ବାଧିକ ଭୋଟ୍ ପ୍ରତିଶତ ୮୦.୩୨ ପ୍ରତିଶତ ଭୋଟିଂ ହୋଇଥିଲା। ଯେତେବେଳେ କି ପ୍ରଥମ ପର୍ଯ୍ୟାୟରେ ପ୍ରାୟ ୬୪ ପ୍ରତିଶତ ମତଦାନ ହୋଇଥିଲା। ୨୦୧୯ ତୁଳନାରେ, ୨୦୨୪ ସାଧାରଣ ନିର୍ବାଚନର ଦ୍ୱିତୀୟ ପର୍ଯ୍ୟାୟରେ ଭୋଟ୍ ପ୍ରତିଶତ କମ୍ ରହିଥିଲା । ଚଳିତ ବର୍ଷ ପ୍ରବଳ ଗ୍ରୀଷ୍ମ ପ୍ରବାହ ଯୋଗୁଁ ଅନେକ ରାଜ୍ୟରେ ଭୋଟିଂ କମ୍ ହୋଇଥିବା ଆକଳନ ହୋଇଛି ।
୨୦୧୯ ମସିହାରେ ୬୭ ପ୍ରତିଶତ ମତଦାନ ହୋଇଥିଲା | ଗତ ଲୋକସଭା ନିର୍ବାଚନରେ ଦ୍ୱିତୀୟ ପର୍ଯ୍ୟାୟରେ ୧୩ଟି ରାଜ୍ୟର ୯୫ଟି ଲୋକସଭା ଆସନରେ ମତଦାନ ହୋଇଥିଲା। ଏଭଳି ଭାବରେ ୧୯୦ ଲୋକସଭା ଆସନରେ ଭୋଟିଂ ସରିଛି । ପ୍ରଥମ ପର୍ଯ୍ୟାୟରେ ୨୧ଟି ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳର ୧୦୨ଟି ଆସନରେ ଭୋଟ୍ ଗ୍ରହଣ କରାଯାଇଥିଲା। ଅପରପକ୍ଷେ ତୃତୀୟ ପର୍ଯ୍ୟାୟ ଭୋଟ୍ ଗ୍ରହଣ ମେ ୭ରେ ଅନୁଷ୍ଠିତ ହେବ। ଏହି ପର୍ଯ୍ୟାୟରେ ୧୨ଟି ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳର ୯୪ଟି ସିଟ୍ ପାଇଁ ଭୋଟ୍ ଗ୍ରହଣ କରାଯିବ।
ଦ୍ୱିତୀୟ ପର୍ଯ୍ୟାୟରେ କେଉଁ ରାଜ୍ୟଗୁଡ଼ିକର କେତେ ଆସନରେ ମତଦାନ?
କେରଳର ସମସ୍ତ ୨୦ଟି ସିଟ୍, କର୍ଣ୍ଣାଟକର ୨୮ ସିଟ୍ ମଧ୍ୟରୁ ୧୪ ସିଟ୍, ରାଜସ୍ଥାନର ୧୩ ସିଟ୍, ମହାରାଷ୍ଟ୍ର ଏବଂ ଉତ୍ତରପ୍ରଦେଶରେ ୮-୮ ସିଟ୍, ମଧ୍ୟପ୍ରଦେଶରେ ୬ ସିଟ୍, ଆସାମ ଏବଂ ବିହାରରେ ୫-୫ ସିଟ୍, ଛତିଶଗଡ ଏବଂ ପଶ୍ଚିମବଙ୍ଗରେ ୩-୩ଟି ସିଟ୍, ମଣିପୁର, ତ୍ରିପୁରା ଏବଂ ଜାମ୍ମୁ କାଶ୍ମୀରର ୧-୧ ଆସନରେ ଶୁକ୍ରବାର ଦିନ ମତଦାନ ଅନୁଷ୍ଠିତ ହୋଇଥିଲା।
ମଣିପୁର: ମଣିପୁରରେ ଜାରି ରହିଥିବା ହିଂସା ଥମିବାର ନାଁ ନେଉନାହିଁ । ଲୋକସଭା ନିର୍ବାଚନର ଗୋଟିଏ ଦିନ ପରେ କୁକି ଉଗ୍ରବାଦୀମାନେ ନାରସେନା ଅଞ୍ଚଳରେ ସେଣ୍ଟ୍ରାଲ ରିଜର୍ଭ ପୋଲିସ ଫୋର୍ସ (ସିଆରପିଏଫ୍) ର ଦୁଇ ଯବାନଙ୍କ ଉପରେ ଆକ୍ରମଣ କରିଛନ୍ତି।
ଏହି ଆକ୍ରମଣରେ ଦୁଇ ଯବାନ ସହିଦ ହୋଇଛନ୍ତି। ଏସମ୍ପର୍କରେ ମଣିପୁର ପୋଲିସ ପକ୍ଷରୁ ସୂଚନା ମିଳିଛି। ସୂଚନା ଅନୁଯାୟୀ, କୁକି ଉଗ୍ରବାଦୀମାନେ ରାତି ୧୨ଟା ୩୦ମି.ରୁ ଭୋର୍ ୨ଟା ୧୫ମି. ଯାଏଁ ସିଆରପିଏଫ୍ କ୍ୟାମ୍ପ ଉପରେ ଆକ୍ରମଣ କରିଥିଲେ। ଏହି ଆକ୍ରମଣରେ ସହିଦ ହୋଇଥିବା ଯବାନ ବିଷ୍ଣୁପୁର ଜିଲ୍ଲାର ନାରସେନା ଅଞ୍ଚଳରେ ନିୟୋଜିତ CRPF ର ୧୨୮ ବାଟାଲିୟନର ସଦସ୍ୟ ଥିଲେ।
ଅପରପକ୍ଷେ ଏହି ଆକ୍ରମଣରେ ଆଉ ଦୁଇ ଜଣ ମଧ୍ୟ ଆହତ ହୋଇଛନ୍ତି । ପାହାଡ ଶୀର୍ଷରୁ ଉଗ୍ରବାଦୀ ମାନେ ଆକ୍ରମଣ କରୁଥିବା ବେଳେ କ୍ୟାମ୍ପ ଉପରେ ବୋମା ମାଡ଼ ମଧ୍ୟ କରିଥିଲେ । ଏହି ଘଟଣା ପରେ ସ୍ଥାନୀୟ ଅଞ୍ଚଳକୁ ଘେରାବନ୍ଦୀ କରିବା ସହ ଆକ୍ରମଣକାରୀଙ୍କୁ ଖୋଜିବାରେ ଲାଗିଛନ୍ତି ଯବାନ ।
ଗତ ବର୍ଷ ମେ ୩ ରେ ମଣିପୁରରେ ହିଂସା ଆରମ୍ଭ ହୋଇଥିଲା। ବର୍ତ୍ତମାନ ଏପର୍ଯ୍ୟନ୍ତ ୨୦୦ ରୁ ଅଧିକ ଲୋକ ପ୍ରାଣ ହରାଇଛନ୍ତି। ସୁରକ୍ଷା ବାହିନୀ ସହିତ ଜଡିତ ଲୋକମାନେ ମଧ୍ୟ ହିଂସାର ଶିକାର ହୋଇଛନ୍ତି।
ଇରାନ: ମହଙ୍ଗା ପଡିଲା ଇରାନ ସହ ସମ୍ପର୍କ। ଭାରତର ୩ ଫାର୍ମ ସମେତ ୧୨ରୁ ଅଧିକ କମ୍ପାନୀ, ବ୍ଯକ୍ତିବିଶେଷ ଓ ଜାହାଜ ଉପରେ କଟକଣା ଲଗାଇଲା ଆମେରିକା। ଇରାନ ସହ ବେଆଇନ କାରବାର, ମାନବବିହୀନ ବାୟୁ ଯାନ ବା ୟୁଏଭି ହସ୍ତାନ୍ତର ଆଦି କାରଣରୁ ଏହି ପଦକ୍ଷେପ ନିଆଯାଇଛି। ୟୁକ୍ରେନରେ ଯୁଦ୍ଧ ଚାଲିଥିବାବେଳେ ରୁଷିଆକୁ ଇରାନୀୟ ୟୁଏଭି ବିକ୍ରି କରିବା ଅଭିଯୋଗ ଆମେରିକାକୁ ଉତକ୍ଷିପ୍ତ କରିଛି।
ଇରାନର ବିଭିନ୍ନ ବ୍ଯାବସାୟିକ କାର୍ଯ୍ୟକଳାପ ତଦାରଖ କରୁଥିବା ସାହାରା ଥଣ୍ଡର ସହ ସମ୍ପର୍କ ରଖିଥିବା ଅଭିଯୋଗରେ ଭାରତର ଜେନ ସିପିଙ୍ଗ, ପୋର୍ଟ ଇଣ୍ଡିଆ ପ୍ରାଇଭେଟ ଲିମିଟେଜ, ସି ଆର୍ଟ ସିପ୍ ମ୍ଯାନେଜମେଣ୍ଟ ପ୍ରାଇଭେଟ ଲିମିଟେଡ ଉପରେ ଏହି କଟକଣା ଜାରି ହୋଇଛି। ଇରାନ ପ୍ରତିରରକ୍ଷା ମନ୍ତ୍ରାଳୟ ଓ ଆର୍ମଡ ଫୋର୍ସେସ ଲଜିଷ୍ଟିକ୍ସ ପକ୍ଷରୁ ବିକ୍ରିବଟା ଦାୟିତ୍ବ ନେଇଥିବା ଇରାନୀୟ ସାମରିକ ସଂସ୍ଥା ସାହାରା ଥଣ୍ଡର ପକ୍ଷରୁ ଚୀନ, ରୁଷିଆ, ଭେନିଜୁଏଲାକୁ ସାମରିକ ଅସ୍ତ୍ରଶସ୍ତ୍ର ଓ ଅନ୍ଯାନ୍ଯ ସାମଗ୍ରୀ ବିକ୍ରି କରିଥିବା ଅଭିଯୋଗ ହୋଇଥିଲା। ସେହିପରି ଇରାନସ୍ଥିତ ଏସିଆ ମେରାଇନ କ୍ରାଉନ ଏଜେନ୍ସି ବିରୋଧରେ ମଧ୍ଯ କାର୍ଯ୍ୟାନୁଷ୍ଠାନ ହୋଇଛି।
ଭୁବନେଶ୍ୱର: ତାତିରେ ସିଝୁଛି ଓଡ଼ିଶା। ଜାରି ରହିଛି ଗ୍ରୀଷ ପ୍ରବାହ। ରାଜ୍ୟକୁ ପଶ୍ଚିମ-ଉତ୍ତର-ପଶ୍ଚିମ ଦିଗରୁ ପ୍ରଚୁର ମାତ୍ରାରେ ପ୍ରବେଶ କରୁଥିବା ଗରମ ଶୁଷ୍କ ପବନ ପ୍ରଭାବରେ ଏଭଳି ସ୍ଥିତି ଲାଗି ରହିଛି। ଆହୁରି ୪ଦିନ ପର୍ଯ୍ୟନ୍ତ ହିଟ୍ଓ୍ବେଭ୍ ସ୍ଥିତି ଲାଗି ରହିବ। ୪ ରୁ ୬ ଡିଗ୍ରୀ ପର୍ଯ୍ୟନ୍ତ ତାପମାତ୍ରା ବୃଦ୍ଧି ହେବ।
ପ୍ରବଳ ଗ୍ରୀଷ୍ମପ୍ରବାହ ପାଇଁ ଉପକୂଳ ଏବଂ ଆଭ୍ୟନ୍ତରୀଣ ଓଡ଼ିଶାର ୧୭ଟି ଜିଲ୍ଲାକୁ ୟେଲୋ ଆଲର୍ଟ ଜାରି କରାଯାଇଛି। ସିଭିୟର ହିଟ୍ଓ୍ବେଭ ପାଇଁ ୨୩ଟି ଜିଲ୍ଲାକୁ ଅରେଞ୍ଜ ଆଲର୍ଟ ଜାରି କରାଯାଇଥିବା ବେଳେ ୪ଟି ଜିଲ୍ଲାକୁ ୟେଲୋ ଆଲର୍ଟ ଜାରି କରାଯାଇଛି। ୩୦ ତାରିଖ ବେଳକୁ ରାଜ୍ୟରେ ସାମାନ୍ୟ କାଳବୈଶାଖୀ ବର୍ଷାର ପ୍ରଭାବ ଦେଖାଦେବ। ସିଭିୟର ହିଟ୍ଓ୍ବେଭ୍ ପାଇଁ ଦିନ ୧୧ଟାରୁ ଅପରାହ୍ନ ୩ଟା ପର୍ଯ୍ୟନ୍ତ ପିକ୍ ଆଓ୍ବାର ଘୋଷଣା କରାଯାଇଛି। ଏହି ସମୟରେ ଘରୁ ନ ବାହାରିବା ପାଇଁ ପରାମର୍ଶ ଦେଇଛି ପାଣିପାଗ କେନ୍ଦ୍ର।
ନନ୍ଦିଘୋଷ ବ୍ୟୁରୋ : ଡାକ୍ତରଖାନା ପରିସରରୁ ଔଷଧ ଦୋକାନ ହଟିବ । ଏ ନେଇ ରାଜ୍ୟ ସ୍ବାସ୍ଥ୍ୟ ସଚିବ ଶାଳିନୀ ପଣ୍ଡିତ ସମସ୍ତ ସିଡିଏମଓଙ୍କ ସମେତ ଏମକେସିଜି ମେଡିକାଲ ଓ ଭିମସାର ମେଡିକାଲ କଲେଜର ଡିନ୍ ଓ ଅଧ୍ୟକ୍ଷଙ୍କୁ ନିର୍ଦ୍ଦେଶ ଦେଇଛନ୍ତି । ଫେବୃଆରୀ ୨୦୧୫ରେ ମେଡିକାଲ୍ କ୍ୟାମ୍ପସ ମଧ୍ୟରେ ଥିବା ଔଷଧ ଦୋକାନୀ ଲାଇସେନ୍ସ ଅବଧି ବୃଦ୍ଧି କରିବାକୁ ଆବେଦନ କରିଥିଲେ । ହାଇକୋର୍ଟ ସମସ୍ତ ଆବେଦନର ଶୁଣାଣୀ କରି ଲାଇସେନ୍ସ ଅବଧି ବୃଦ୍ଧିକୁ ନାକଚ କରିଦେବା ସହ ମେଡିକାଲ କ୍ୟାମ୍ପସରେ ନୂଆ ଔଷଧ ଦୋକାନ ଖୋଲିବା ପାଇଁ ଅନୁମତି ଦେବାକୁ ମନା କରିଦେଇଥିଲେ । କିଛି ଔଷଧ ଦୋକାନଙ୍କ ଲାଇସେନ୍ସ ଅବଧି ସରିଯାଇଥିଲେ ମଧ୍ୟ,କୋର୍ଟଙ୍କ ଅନ୍ତରୀଣ ଆଦେଶ ବଳରେ ଔଷଧ ଦୋକାନ ଗୁଡିକ ଚାଲୁରହିଥିଲା । ୧୯.୦୪.୨୪ରେ ହାଇକୋର୍ଟ ଏକ ନିର୍ଦ୍ଦେଶନାମା ଜାରି କରି ମେଡିକାଲ କ୍ୟାମ୍ପସ ଭିତରେ ଥିବା ସମସ୍ତ ଔଷଧ ଦୋକାନକୁ ନୋଟିସ ଜାରି କରିବାର ୧୫ ଦିନ ମଧ୍ୟରେ ଖାଲି କରିବା ସହ ସମସ୍ତ ବକେୟା ପାଉଣା ସଂଗ୍ରହ କରିବାକୁ ନିର୍ଦ୍ଦେଶ ନେଇଛନ୍ତି ।
ଆଠମଲ୍ଲିକ : ସମ୍ବଲପୁର ସାଂସଦୀୟର କ୍ଷେତ୍ର ଆଠମଲ୍ଲିକ ବିଧାନସଭା ନିର୍ବାଚନ ମଣ୍ଡଳୀ, କିଶୋର ନଗର ବର ପଡିଆ ଠାରେ, ବିଜେପିର ନିର୍ବାଚନ ପ୍ରଚାର ସଭାକୁ, ବିଜେପି କର୍ମୀ ମାନେ ସକାଳୁ ଆଖ ପାଖ ଗାଁ ମହିଳା ମାନଙ୍କୁ ଘରୁ ଡାକିଆଣି ମହିଳାମାନଙ୍କୁ ଖାଇବାକୁ ଦେଇନଥିଲେ ଫଳରେ ହାତରେ ଖଲି ଧରି ଲୋକହସା କରିଥିଲେ । ଅସହ୍ୟ ହେବାରୁ ଭୋକରେ ଡହଳ ବିକଳ ହେଉଥିବା ମହିଳାମାନେ ଅତିଷ୍ଟ ହୋଇଥିଲେ । ସମ୍ବଲପୁର ବିଜେପି ସାଂସଦ ପାର୍ଥି ଧର୍ମେନ୍ଦ୍ର ପ୍ରଧାନଙ୍କ ସମେତ ବିଜେପି ଦଳକୁ ବିରୋଧ କରିବା ସହ ସମାଲୋଚନ କରିଥିଲେ । ଯାହାର ଭିଡ଼ିଓ ଏବେ ଶୋଇସିଆଲ ମିଡ଼ିଆ ରେ ଭାଇରାଲ ହେଉଛି । ଅନ୍ୟ ପଟେ ଆଠମଲ୍ଲିକ ନିର୍ବାଚନ ମଣ୍ଡଳୀ ରେ ଏପ୍ରିଲି ୨୪ରେ ଧର୍ମେନ୍ଦ୍ର ପ୍ରଧାନଙ୍କ ରୋଡ଼ ଶୋରେ ବିଜେପି ନେତାଙ୍କ ଗାଡ଼ି ସାଧାରଣ ଜନତାଙ୍କୁ ମଡ଼େଇ ଚାଲି ଯାଇଥିଲା । ସେପଟେ ଆଠମଲ୍ଲିକ ଥାନା ସମୁଖରେ ନାବାଳକ ଓ ନାବାଳିକା ଙ୍କୁ ଧର୍ମେନ୍ଦ୍ର ପ୍ରଧାନଙ୍କ ନିର୍ବାଚନୀ ପ୍ରଚାରେ ହାତରେ ଦଳୀୟ ପତାକା ଧରାଇ ଭବିଷ୍ୟତକୁ ଅନ୍ଧାର ଆଡେ ଠେଲିଦେଉଛି ବିଜେପି । ଏ ସବୁକୁ ନେଇ ଆଠମଲ୍ଲିକ ଜନସାଧାରଣଙ୍କ ମନରେ ତୀବ୍ର ଅସନ୍ତୋଷ ଦେଖା ଦେଇଛି ।
ନନ୍ଦିଘୋଷ ବ୍ୟୁରୋ : ଦ୍ବିତୀୟ ପର୍ଯ୍ୟାୟ ମତଦାନ ଶେଷ । ୧୩ ରାଜ୍ୟର ୮୮ ଆସନରେ ୧୨୧୦ ପ୍ରାର୍ଥୀଙ୍କ ଭାଗ୍ଯ ସିଲ୍। କଂଗ୍ରେସ ନେତା ରାହୁଲ ଗାନ୍ଧୀ, କେ.ସି. ଭେନୁଗୋପାଲ, ତାରିକ ଅନୱର, ଶଶୀ ଥରୁରଙ୍କ ଭାଗ୍ୟ ନିର୍ଦ୍ଧାରଣ କରିଛନ୍ତି ଭୋଟର। ପୂର୍ବତନ ମୁଖ୍ଯମନ୍ତ୍ରୀ ଏଚ.ଡି.କୁମାରସ୍ବାମୀ, ଭୂପେଶ ବଘେଲ, କେରଳର ପୂର୍ବତନ ମୁଖ୍ଯମନ୍ତ୍ରୀ ଏକେ ଆଣ୍ଟୋନିଙ୍କ ପୁଅ ଅନିଲ ଆଣ୍ଟୋନି, ରାଜସ୍ଥାନର ପୂର୍ବତନ ମୁଖ୍ଯମନ୍ତ୍ରୀ ଅଶୋକ ଗେହଲଟଙ୍କ ପୁଅ ବୈଭବ ପଟେଲ, ରାଜସ୍ଥାନର ପୂର୍ବତନ ମୁଖ୍ଯମନ୍ତ୍ରୀ ବସୁନ୍ଧରା ରାଜେଙ୍କ ପୁଅ ଦୁଶ୍ଯନ୍ତ ସିଂଙ୍କର ବି ହୋଇଛି ଭାଗ୍ଯ ପରୀକ୍ଷା। ସେହିପରି ଅଭିନେତ୍ରୀ ହେମାମାଳିନୀ, ଅରୁଣ ଗୋଭିଲଙ୍କର ବି ଭାଗ୍ଯ ହୋଇଛି ସିଲ୍। ମଇଦାନରେ ୧୦୦ ମହିଳା ପ୍ରାର୍ଥୀ ଥିବାବେଳେ ୩୯୦ କୋଟିପତି ପ୍ରାର୍ଥୀ ରହିଥିଲେ। ସାରା ଦେଶବାସୀଙ୍କ ନଜର ରହିଛି କେରଳ ୱାୟନାଡ ସିଟ୍ ଉପରେ। ଏଠାରେ ପ୍ରତିଦ୍ବନ୍ଦ୍ବିତା କରୁଛନ୍ତି କଂଗ୍ରେସ ନେତା ରାହୁଲ ଗାନ୍ଧୀ। ସେଠାରେ ଇଣ୍ଡିଆ ମେଣ୍ଟ ବିଫଳ ହୋଇଥିବାରୁ ରାହୁଲ ସଙ୍କଟର ସମ୍ମୁଖୀନ ହୋଇପାରନ୍ତି। ଆସାମର ୫ ଲୋକସଭା ଆସନ, ବିହାରର ୫, ଛତିଶଗଡ଼ ୩, କର୍ଣ୍ଣାଟକର ୧୪, କେରଳର ୨୦, ମଧ୍ୟପ୍ରଦେଶର ୬, ମହାରାଷ୍ଟ୍ରର ୮, ଉତ୍ତରପ୍ରଦେଶର ୮, ରାଜସ୍ଥାନର ୧୩, ପଶ୍ଚିମବଂଗର ୩ ସହ ତ୍ରିପୁରା, ମଣିପୁର ଓ ଜମ୍ମୁ କାଶ୍ମୀର ଗୋଟିଏ ଲେଖାଏ ଆସନରେ ଭୋଟ ଗ୍ରହଣ ହୋଇଛି। ମେ ୭ରେ ତୃତୀୟ ପର୍ଯ୍ୟାୟ ନିର୍ବାଚନ ହେବ।
ଭୁବନେଶ୍ୱର : ବଢୁଛି ପାରଦ, ପ୍ରବଳ ଗରମରେ ଆଉଟୁପାଉଟୁ ସାରା ରାଜ୍ଯ । ଆଗାମୀ ୫ ଦିନ ଯାଏଁ ତାତିରୁ ନିସ୍ତାର ମିଳିବନି ବୋଲି ସତର୍କ କଲା ପାଣିପାଗ ବିଭାଗ । 30 ତାରିଖ ଯାଏ ରାଜ୍ୟର ଅଧିକାଂଶ ଜିଲ୍ଲାକୁ ରେଡ ଆଲର୍ଟ ଜାରି । ଉତ୍ତର ଆଭ୍ୟନ୍ତରୀଣ, ଉପକୂଳ, ଓଡ଼ିଶା ସମେତ ରାଜ୍ୟର ଅଧିକାଂଶ ଜିଲ୍ଲାକୁ ସତର୍କ ସୂଚନା ଜାରି କରାଯାଇଛି । ଆଭ୍ୟନ୍ତରୀଣ ଓଡିଶାରେ 45 କିମ୍ବା ତାଠୁ ଅଧିକ ତାପମାତ୍ରା ରେକର୍ଡ ହୋଇପାରେ ବୋଲି ପୂର୍ବାନୁମାନ କରିଛି ପାଣିପାଗ ବିଭାଗ । ଦିନ 11 ରୁ 3ଟା ଭିତରେ ବାହାରକୁ ବାହାରିଲେ ଆବଶ୍ୟକୀୟ ପଦକ୍ଷେପ ଗ୍ରହଣ କରିବାକୁ ପରାମର୍ଶ ଦିଆଯାଇଛି । ଆଗାମୀ 2 ଦିନ ଦକ୍ଷିଣ ଓଡ଼ିଶା ସମେତ ଆଖପାଖ ଅଞ୍ଚଳରେ କାଳ ବୈଶାଖୀ ବର୍ଷା ସମ୍ଭାବନା ରହିଛି । କୋରାପୁଟ, ମାଲକାନଗିରି, ଗଞ୍ଜାମ, ଗଜପତି, ଖୋର୍ଦ୍ଧାର ଗୋଟିଏ ଦୁଇଟି ସ୍ଥାନରେ ବର୍ଷା ହୋଇପାରେ । କାଳବୈଶାଖୀ ସତ୍ତ୍ବେ ଗରମରୁ ନିସ୍ତାର ମିଳିବନ ବୋଲି ସତର୍କ କରିଛି ବିଭାଗ । ପଶ୍ଚିମ ଦିଗରୁ ଶୁଷ୍କ ପବନ ପ୍ରବାହିତ ହେଉଥିବାରୁ ଗରମ ବଢୁଛି । ତେଣୁ ଅତ୍ଯନ୍ତ ଜରୁରୀ ନଥିଲେ ପଦାକୁ ନ ବାହାରିବାକୁ ସତର୍କ କରିଛି ପାଣିପାଗ ବିଭାଗ ।
କୁଚିଣ୍ଡା : କୁଚିଣ୍ଡା ନିର୍ବାଚନ ମଣ୍ଡଳୀର ଜମନକିରାରେ ସମ୍ବଲପୁର ଲୋକସଭା ପ୍ରାର୍ଥୀ ପ୍ରଣବ ପ୍ରକାଶ ଦାସଙ୍କୁ ଭବ୍ଯ ସ୍ବାଗତ କରାଯାଇଛି । ଏକ ବିଶାଳ ବାଇକ ରାଲି କରି ସମର୍ଥକମାନେ ସଭାସ୍ଥଳକୁ ପାଛୋଟି ଆଣିଥିଲେ । ଏହି ଅବସରରେ ସେଠାରେ ଉପସ୍ଥିତ ଥିଲେ କୁଚିଣ୍ଡା ବିଧାୟକ ବିଧାୟକ ପ୍ରାର୍ଥୀ ରାଜେନ୍ଦ୍ର ଛତ୍ରିଆ । ଭବ୍ଯସ୍ବାଗତ ଲାଗି ସମସ୍ତଙ୍କୁ ଧନ୍ଯବାଦ ଜଣାଇବା ସହ ଉପସ୍ଥିତ ହଜାର ହଜାର ମହିଳାଙ୍କ ପ୍ରଶଂସା କରିଥିଲେ । ଏତେ ଖରାରେ ଆସି ସଭାରେ ଉପସ୍ଥିତ ରହିଥିବାରୁ ସେ ଋଣୀ ବୋଲି କହିଥିଲେ । ପଶ୍ଚିମ ଓଡ଼ିଶାରେ ପାଞ୍ଚ ପାଞ୍ଚ ଜଣ ସାଂସଦ ନିର୍ବାଚିତ ହୋଇ ଦିଲ୍ଲୀ ଗଲେ ବି ଚୁପ ରହିଥିଲେ । ବିଗତ ଦିନ ମାନଙ୍କରେ କଣ ବିକାଶ କରିଛନ୍ତି ବୋଲି ପ୍ରଶ୍ନ କରିଥିଲେ ପ୍ରଣବ । ନିର୍ବାଚନ ପରେ ତାଙ୍କର ଦେଖା ମିଳେ ନାହିଁ କହି ବିରୋଧୀଙ୍କୁ ଟାର୍ଗେଟ କରିଥିଲେ ପ୍ରଣବ ।
