ନନ୍ଦିଘୋଷ ବ୍ୟୁରୋ: ଶୀତରେ ଥରୁଛି ସାରା ଓଡିଶା। ସବୁଠି ଜାଡ ଶୀତ ଅନୁଭୂତ ହେଉଥିବା ବେଳେ ଆଗାମୀ ୭ ଦିନ ଯାଏ ଏଥିରେ କୌଣସି ପରିବର୍ତ୍ତନ ହେବାର ନାହିଁ। ଗତ ୨୪ ଘଂଟାରେ ଫୁଲବାଣୀରେ ସର୍ବନିମ୍ନ ତାପମାତ୍ରା ୭.୦ ଡିଗ୍ରୀ ରେକର୍ଡ ହୋଇଥିବା ବେଳେ ପାହାଡିଆ ଅଂଚଳର ସିମିଲିଗୁଡାରେ ୫.୨ ଡିଗ୍ରୀ ସର୍ବନିମ୍ନ ତାପମାତ୍ରା ରେକର୍ଡ କରାଯାଇଛି । ଗତ ଦୁଇଦିନ ହେବ ଶୀତ ସାମାନ୍ୟ କମ ରହିଥିବା ବେଳେ କିଛି କିଛି ସ୍ଥାନରେ ସ୍ୱାଭାବିକ ଠାରୁ ୨ ରୁ ୩ ଡିଗ୍ରୀ ତାପମାତ୍ରା ବୃଦ୍ଧି ପାଇଛି । ସେପଟେ ଘନ କୁହୁଡି କିଛି କିଛି ସ୍ଥାନରେ ଦୃଶ୍ୟମାନ ହେଉଥିବା ବେଳେ ଆଗାମୀ ଦୁଇଦିନ ଯାଏଁ ଚେତାବନୀ ଦେଇଛି ପାଣିପାଗ ବିଭାଗ । ଆଜି ପାଇଁ କୋରାପୁଟ କନ୍ଧମାଳ ସୁନ୍ଦରଗଡ ୩ ଜିଲ୍ଲାକୁ ଘନ କୁହୁଡି ପାଇଁ ୟେଲୋ ଓ୍ବାର୍ଣ୍ଣି ଜାରି କରିଛି ପାଣିପାଗ ବିଭାଗ। ଅନ୍ୟପଟେ ଗତ ୨୪ ଘଣ୍ଟାରେ ୫ ଟି ସ୍ଥାନରେ ଘନ କୁହୁଡି ପରିଲିକ୍ଷିତ ହୋଇଥିବା ବେଳେ ରାଉଲକେଲାରେ ମାତ୍ରାଧିକ ଘନ କୁହୁଡି ଦୃଶ୍ୟମାନ ହୋଇଛି।.
ଆଜି ଓଟିଇଟି ପରୀକ୍ଷା
ନନ୍ଦିଘୋଷ ବ୍ୟୁରୋ: ଆଜି ଓଟିଇଟି ପରୀକ୍ଷା । 452 ଟି ପରୀକ୍ଷା କେନ୍ଦ୍ରରେ ଦେଢ଼ ଲକ୍ଷରୁ ଅଧିକ ପରୀକ୍ଷାର୍ଥୀ ପରୀକ୍ଷା ଦେବେ । ଦୁଇଟି ସିଟିଂ ପରୀକ୍ଷା ହେବ । ପ୍ରଥମ ସିଟିଂ ସକାଳ 9 ରୁ ସାଢେ 11 ଟା ପର୍ଯ୍ୟନ୍ତ ଚାଲିବ । ଏବଂ ଦ୍ୱିତୀୟ ସିଟିଂ ଅପରାହ୍ନ ସାଢେ ଗୋଟାଏରୁ ଅପରାହ୍ନ 4 ଟା ପର୍ଯ୍ୟନ୍ତ ଚାଲିବ । ପରୀକ୍ଷା ସମୟ ରେ ସାମାନ୍ୟ ପରିବର୍ତ୍ତନ କରିଛି ବୋର୍ଡ । ଦ୍ୱିତୀୟ ସିଟିଂ ପରୀକ୍ଷା ଅପରାହ୍ନ 2 ଟାରୁ ଆରମ୍ଭ ହୋଇ ଅପରାହ୍ନ 4.30 ରେ ଶେଷ ହୋଇଥାନ୍ତା । ଯାହାକି ପରିବର୍ତ୍ତନ କରାଯାଇ ଅପରାହ୍ନ 1.30 ରୁ ଅପରାହ୍ନ 4 ଟା ସମୟ ଧର୍ଯ୍ୟ କରାଯାଇଛି । ଏନେଇ ବୋର୍ଡ ପକ୍ଷରୁ ପ୍ରେସ ବିଜ୍ଞପ୍ତି ମାଧ୍ୟମରେ ସୂଚନା ଦିଆଯାଇଛି । ତେବେ ସମସ୍ତ କେନ୍ଦ୍ର ରେ ପ୍ରଶ୍ନ ପତ୍ର ସୁରକ୍ଷିତ ଭାବରେ ପହଞ୍ଚି ସାରିଛି ।
୭ ରାଷ୍ଟ୍ର ବିରୋଧରେ ଟ୍ରାଭେଲ ବ୍ୟାନ୍ : ପୁଣି କଠୋରେ ହେଲେ ଆମେରିକା ରାଷ୍ଟ୍ରପତି ଟ୍ରମ୍ପ
ନନ୍ଦିଘୋଷ ବ୍ୟୁରୋ: ନିରାପତ୍ତା, ସାଧାରଣ ଜନତାଙ୍କ ସୁରକ୍ଷା ଓ ଭିସା ପ୍ରସଙ୍ଗରେ ଅଧିକ କଠୋର ହେଲେ ଆମେରିକା ରାଷ୍ଟ୍ରପତି ଡୋନାଲଡ ଟ୍ରମ୍ପ। ୭ଟି ଦେଶର ନାଗରିକାଙ୍କ ଆମେରିକା ପ୍ରବେଶ ଉପରେ ଜାରି କଲେ କଟକଣା।ପୂର୍ବରୁ ଟ୍ରମ୍ପ ଏହି ନିଷ୍ପତ୍ତି ୩୦ଟି ରାଷ୍ଟ୍ର ବିରୋଧରେ ସମ୍ପୂର୍ଣ୍ଣ ଓ ଆଂଶିକ କାର୍ଯ୍ଯକାରୀ କରିଥିଲେ। ଆସନ୍ତା ଜାନୁଆରୀ ୧ରୁ ବୁର୍କିନା ଫାସୋ, ମାଳି, ନାଇଜର ,ଦକ୍ଷିଣ ସୁଦାନ, ସିରିୟା, ଲାଓସ ଓ ସିଏରା ଲିଓନ ବିରୋଧରେ ଏହି ଘୋଷଣା କାର୍ଯ୍ୟକାରୀ ହେବ। ଜାନୁଆରୀ ୧ରୁ ଏହି ନୂଆ ନିୟମ ବଳରେ ଏହି ସବୁ ଦେଶର ନାଗରିକମାନେ ଏଣିକି ଆମେରିକା ଯାଇପାରିବେ ନାହିଁ।
ଏହା ସହ ପାଲେଷ୍ଟାଇନ କର୍ତ୍ତୃପକ୍ଷଙ୍କ ଦ୍ବାରା ଜାରି ଟ୍ରାଭେଲ ଡକୁମେଣ୍ଟ ହାସଲ କରିଥିବା ନାଗରିକମାନେ ବି ଆମେରିକା ଯାଇପାରିବେ ନାହିଁ। ୱେଷ୍ଟବ୍ୟାଙ୍କ ଓ ଗାଜାରେ ଆତଙ୍କବାଦୀମାନେ ରହୁଥିବା କାରଣରୁ ଆମେରିକା ଏହି ନିଷ୍ପତ୍ତି ନେଇଛି। ପୂର୍ବରୁ ଯେଉଁ ୧୨ଟି ରାଷ୍ଟ୍ର ଉପରେ ଏହି କଟକଣା ସମ୍ପୂର୍ଣ୍ଣ ଜାରି ହୋଇଥିଲା ସେହି ଦେଶଗୁଡ଼ିକ ହେଲେ- ଆଫଗାନିସ୍ତାନ, ବର୍ମା, ଚାଦ, କଙ୍ଗୋ, ଗିନି, ଏରିଟ୍ରିଆ, ହାଇତି, ଇରାନ, ଲିବ୍ୟା, ସୋମାଲିଆ ଓ ୟେମେନ। ସେହିପରି ଯେଉଁ ରାଷ୍ଟ୍ରଗୁଡିକ ଉପରେ ଆଂଶିକ କଟକଣା ଲଗାଯାଇଥିଲା ସେହି ରାଷ୍ଟ୍ରଗୁଡିକ ହେଲେ- ବୁରୁଣ୍ଡି, କ୍ଯୁବା, ଟୋଗୋ, ଭେନେଜୁଏଲା ଆଦି ରାଷ୍ଟ୍ର।
ଅଜଣା ଗାଡ଼ି ଧକ୍କାରେ ଦମ୍ପତି ମୃତ, ୬ ମାସର ଶିଶୁପୁତ୍ର ଗୁରୁତର
ନନ୍ଦିଘୋଷ ବ୍ୟୁରୋ: ଯାଜପୁର ୫୩ ନମ୍ବର ଜାତୀୟ ରାଜପଥର କଳିଙ୍ଗନଗର ଥାନା ବ୍ରାହ୍ମଣୀ ସେତୁ ନିକଟରେ ମର୍ମନ୍ତୁଦ ସଡ଼କ ଦୁର୍ଘଟଣା । ଅଜଣା ଗାଡ଼ି ଧକ୍କାରେ ସ୍ବାମୀ ସ୍ତ୍ରୀଙ୍କ ମୃତ୍ୟୁ ହୋଇଥିବା ବେଳେ ତାଙ୍କ ୬ ମାସର ଶିଶୁପୁତ୍ର ଗୁରୁତର । ଗୁରୁତର ଆହତ ଅବସ୍ଥାରେ ଶିଶୁପୁତ୍ରକୁ କଟକ ଶିଶୁଭବନକୁ ସ୍ଥାନାନ୍ତର କରାଯାଇଛି । ଘଟଣାକୁ ନେଇ ଉତ୍ତେଜନା ପ୍ରକାଶ ପାଇଛି । ବେଳେ ଉତ୍ୟକ୍ତ ଲୋକେ ଚଣ୍ଡିଖୋଲ ଡ଼ୁବୁରୀ ରାସ୍ତା ଅବରୋଧ କରିଛନ୍ତି । ମୃତକ ସ୍ଥାନୀୟ ପଙ୍କପାଳ ଗ୍ରାମର ଜନ୍ମେଜୟ ଦଳେଇ ଓ ତାଙ୍କ ସ୍ତ୍ରୀ ବୈଶାଖୀ । ଦମ୍ପତି ନିଜ ୬ ମାସର ଶିଶୁପୁତ୍ରକୁ ନେଇ ଆଜି ସନ୍ଧ୍ୟାରେ କବାଟବନ୍ଧ ମେଡ଼ିକାଲକୁ ଯାଇଥିଲେ । ମେଡିକାଲରୁ ଘରକୁ ଫେରିବା ସମୟରେ ଘଟିଛି ଦୁର୍ଘଟଣା । ପୋଲିସ ପହଞ୍ଚି ଉତ୍ୟକ୍ତ ଲୋକଙ୍କୁ ବୁଝାସୁଝା କରିବା ସହ ଘଟଣାର ତଦନ୍ତ ଆରମ୍ଭ କରିଛି । ତେବେ ରାସ୍ତା ସମ୍ପ୍ରସାରଣ କାର୍ଯ୍ୟ ଚାଲୁ ରହିଥିବାରୁ ବାରମ୍ବାର ଏହି ରାସ୍ତାରେ ଦୁର୍ଘଟଣା ଘଟି ଲୋକଙ୍କ ଧନଜୀବନ ହାନି ହେଉଥିବା ସ୍ଥାନୀୟ ଲୋକେ ଅଭିଯୋଗ କରିଛନ୍ତି ।
ମରଣଯନ୍ତା ପାଲଟିଛି ସହର ରାସ୍ତା: ଅସାବଧାନ ହେଲେ ଦୁର୍ଘଟଣା ସୁନିଶ୍ଚିତ
ମରଣଯନ୍ତା ପାଲଟିଛି ସହର ରାସ୍ତା । ସବୁଠି ଖାଲଖମା, ସବୁଠି ଉଠିଲାଣି ପିଚୁ । ଅସାବଧାନ ହେଲେ ଦୁର୍ଘଟଣା ସୁନିଶ୍ଚିତ । ରାଉରକେଲା ପାନପୋଷ ଛକ ଠାରୁ ଉଦିତନଗର ଛକ ପର୍ଯ୍ୟନ୍ତ ନବନିର୍ମିତ ହୋଇଥିବା ଏହି ରାସ୍ତାର ବିଭିନ୍ନ ସ୍ଥାନରେ ଗାତ ସୃଷ୍ଟି ହୋଇଥିବାରୁ ବାଧାପ୍ରାପ୍ତ ହେଉଛି ଯାତାୟାତ । ରାସ୍ତାରୁ ଗୋଡ଼ି ଉଠିଯାଇଥିବାରୁ ଅନେକ ସମୟରେ ଦୁର୍ଘଟଣା ଘଟୁଥିବା ଲୋକେ ଅଭିଯୋଗ କରିଛନ୍ତି । ଖାଲି ଏହି ଗୋଟିଏ ରାସ୍ତା ନୁହେଁ ସ୍ମାର୍ଟ ସିଟି ରାଉରକେଲାର ବିଶ୍ରା ଛକ ଠାରୁ ବନ୍ଧମୁଣ୍ଡା ରାସ୍ତା ସହ ସହରର ଅଧିକାଂଶ ରାସ୍ତା ନିମ୍ନମାନର କାମ ଯୋଗୁଁ ଏପରି ସ୍ଥିତି ଉପୁଜିଥିବା ଲୋକେ ଅଭିଯୋଗ କରିଛନ୍ତି ।
ରାଉରକେଲା ସହରର ସମସ୍ତ ଖାଲଖମା ଓ ଗର୍ତ୍ତ ସୃଷ୍ଟି ହୋଇଥିବା ରାସ୍ତା ଆସନ୍ତା ମାର୍ଚ୍ଚ ମାସ ୩୧ ତାରିଖ ସୁଦ୍ଧ ମରାମତି କରିବା ପାଇଁ ରାଉରକେଲା ମହାନଗର ନିଗମ କମିଶନର ବିଭାଗୀୟ ଅଧିକାରୀମାନଙ୍କୁ ନିର୍ଦ୍ଦେଶ ଦେଇଛନ୍ତି । କାମ ସମୟରେ ଲୋକଙ୍କ ଯେପରି ଅସୁବିଧା ନହୁଏ ସେଥିପାଇଁ ରାସ୍ତା ଖୋଳି କୈଣସି କାମ ଆରମ୍ଭ କରିବା ପୂର୍ବରୁ ଅନୁମତି ନେବାକୁ ନିର୍ଦ୍ଦେଶ ଦେଇଛନ୍ତି କମିଶନର । ୨୦୨୬ ମାର୍ଚ୍ଚ ସୁଦ୍ଧା ରାଉରକେଲା ସହରର ସମସ୍ତ ରାସ୍ତା ଗୁଡିକୁ ମରାମତି କରିବା ସହ ରାସ୍ତାକୁ ଗର୍ତ୍ତମୁକ୍ତ କରିବାକୁ କୁହାଯାଇଛି । ରାଉରକେଲା ସହରରେ ବିଭିନ୍ନ ବିଭାଗରେ ନିମ୍ନ ମାନର ରାସ୍ତା କାମ କରୁଥିବା ଠିକାଦାରଙ୍କ ବିରୁଦ୍ଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିବା ସହ ତଦାରଖ ଦାୟିତ୍ଵରେ ଥିବା ଯନ୍ତ୍ରୀଙ୍କ ବିରୁଦ୍ଧରେ ମଧ୍ୟ କାର୍ଯ୍ୟାନୁଷ୍ଠାନ ଗ୍ରହଣ କରିବା ପାଇଁ ଦାବି ହୋଇଛି ।
ପୋଲିସ କବଜାରେ ଆନ୍ତଃରାଜ୍ୟ ଠକ: ସରକାରୀ ଚାକିରୀ ଦେବାକୁ କହି ଲଗାଉଥିଲା ଚୂନ
ପୋଲିସ କବଜାରେ ଆନ୍ତଃରାଜ୍ୟ ଠକ । ସରକାରୀ ଚାକିରୀ ଦେବାକୁ କହି ଲଗାଉଥିଲା ଚୂନ । ନକଲୀ ନିଯୁକ୍ତିପତ୍ର ଦେଇ ଲୁଟୁଥିଲା ଲକ୍ଷ ଲକ୍ଷ ଟଙ୍କା । କୋରାପୁଟ ଜିଲ୍ଲା ଜୟପୁରରୁ ଯାଇ ବିଛାଇଥିଲା ଜାଲ । ଅଭିଯୁକ୍ତକୁ ବାନ୍ଧିବା ପରେ ଗୁମର ଖୋଲୁଛି ରାଉରକେଲା ପୋଲିସ୍ । ରେଲୱେ ସହ ବିଭିନ୍ନ ସରକାରୀ ଓ ବେସରକାରୀ ସଂସ୍ଥାରେ ଚାକିରି ଦେବାକୁ କହି ଶିକ୍ଷିତ ଯୁବକ ଯୁବତୀଙ୍କୁ ବୁଲାଉଥିଲା ଭୁଆଁ । ନକଲି ନିଯୁକ୍ତିପତ୍ର ଦେଇ ୭ରୁର ୮ ଲକ୍ଷ ଟଙ୍କା ଠକି ନେଉଥିଲା । ଶେଷରେ ଅଭିଯୁକ୍ତକୁ କାବୁ କରିଛି ରାଉରକେଲା ଛେଣ୍ଡ ପୋଲିସ । ଅଭିଯୁକ୍ତର କୋରାପୁଟ ଜିଲ୍ଲା ଜୟପୁରର ସନ୍ତୋଷ କୁମାର ସାହୁକୁ ଗିରଫ କରିବା ପରେ ଖୋଲୁଛି ଗୁମର ।
ଚାକିରି ଦେବାକୁ କହି ଓଡ଼ିଶାର ଅନେକ ଆଶାୟୀଙ୍କ ଠାରୁ ୩୯ ଲକ୍ଷରୁ ଅଧିକ ଟଙ୍କା ଠକି ନେଇଥିବା ପୋଲିସର ପ୍ରାଥମିକ ତଦନ୍ତରୁ ଜାଣିବାକୁ ପାଇଛି । କୋରାପୁଟ, ମାଲକାନଗିରି, ବ୍ରହ୍ମପୁର ସମେତ ବିଭିନ୍ନ ଅଞ୍ଚଳର ଆଶାୟୀଙ୍କୁ ଚାକିରି ପ୍ରଲୋଭନ ଦେଖାଇ ଟଙ୍କା ଆଦାୟ କରୁଥିଲା । ଅଭିଯୁକ୍ତ ନିକଟରୁ ବିପୁଳ ଆବେଦନପତ୍ର, ଜାଲ ଡକ୍ୟୁମେଣ୍ଟ ଓ ଦୁଇଟି ମୋବାଇଲ ଫୋନ ଜବତ କରାଯାଇଛି । ଗିରଫ ଠକ ସନ୍ତୋଷକୁ ଗିରଫ କରି କୋର୍ଟ ଚାଲାଣ କରାଯାଇଥିବାବେଳେ ଏଥିରେ ଆଉ କିଏ ସଂପୃକ୍ତ ରହିଛି ସେନେଇ ତଦନ୍ତ ଆରମ୍ଭ ହୋଇଛି । ସେପଟେ ଅନ୍ୟକେହି ଠକେଇର ଶିକାର ହୋଇଥିଲେ ତୁରନ୍ତ ଅଭିଯୋଗ କରିବାକୁ ଅପିଲ କରିଛି ପୋଲିସ ।
ମନ୍ଦିର ଉନ୍ନୟନମୂଳକ କାମରେ ଘୋଟାଲା: ନିମ୍ନମାନର କାମ କରି କରାଯାଇଛି ଟଙ୍କା ହଡ଼ପ
ମନ୍ଦିର ଉନ୍ନୟନମୂଳକ କାମରେ ଘୋଟାଲା । ନିମ୍ନମାନର କାମ କରି କରାଯାଇଛି ଟଙ୍କା ହଡ଼ପ । ମନ୍ଦିର ସଭାପତି ଟଙ୍କା ହେରଫେର କରିଥିବା ଅଭିଯୋଗ । ଗଞ୍ଜାମ ପୁରୁଷୋତ୍ତମପୁର ବ୍ଲକ ଆଛୁଲି ପଞ୍ଚାୟତରୁ ଆସିଛି ଏଭଳି କିଛି ସଙ୍ଗୀନ ଅଭିଯୋଗ । ଆଛୁଲି ଗାଁର ଜଗନ୍ନାଥ ମନ୍ଦିରର ଉନ୍ନତି ସାଙ୍ଗକୁ ଲୁହା ଗ୍ରୀଲ ଲଗାଇବା ପାଇଁ ସ୍ଥାନୀୟ ବିଧାୟକଙ୍କ ପାଣ୍ଠିରୁ କିଛି ଅନୁଦାନ ମିଳିଥିଲା । ସେହି ଟଙ୍କାରେ ମନ୍ଦିର ସଭାପତି ନିମ୍ନମାନର ଗ୍ରୀଲ ଲଗାଇଦେଇଛନ୍ତି । ତାହା ପୁଣି ସଂପୂର୍ଣ୍ଣ ଝୁଲନ୍ତା ଅବସ୍ଥାରେ ରହିଛି । ଫଳରେ ଯେକୌଣସି ସମୟରେ କିଛି ବି ଅଘଟଣ ଘଟିପାରେ ।
ଜଗନ୍ନାଥ ମନ୍ଦିର କମିଟି ସଭାପତି ଅରୁଣ ପଣ୍ଡା ବିଜେପିର ଜଣେ ସକ୍ରିୟ ନେତା । ତେଣୁ ପାୱାର ଦେଖାଇ ସେ ଗ୍ରାମବାସୀଙ୍କୁ ଅନ୍ଧାରରେ ରଖୁଛନ୍ତି । ମନ୍ଦିର ସଂପର୍କିତ ବିଭିନ୍ନ ପାଣ୍ଠିର ସଠିକ ତଥ୍ୟ ପ୍ରଦାନ ନକରି ଅର୍ଥ ଆତ୍ମସାତ କରୁଥିବା ଗ୍ରାମବାସୀ ଅଭିଯୋଗ କରିଛନ୍ତି । ଜଗନ୍ନାଥ ମନ୍ଦିରର ବ୍ଯାଙ୍କ ଖାତାରେ ପାଖାପାଖି ୧୦ ଲକ୍ଷ ଟଙ୍କା ଜମା ଥିଲା । ହେଲେ ସଭାପତି ଗ୍ରାମବାସୀଙ୍କୁ ନଜଣାଇ ୬ ଲକ୍ଷ ଟଙ୍କା ତାଙ୍କ ବ୍ୟକ୍ତିଗତ ବ୍ଯାଙ୍କ ଆକାଉଣ୍ଟରେ ରଖିଥିବା ଜାଣିବା ପରେ ବିଡିଓଙ୍କ ଦ୍ଵାରସ୍ଥ ହୋଇଥିଲେ । ସେପଟେ ଘଟଣାର ତଦନ୍ତ କରିବାକୁ ଅତିରିକ୍ତ ସହକାରୀ ଯନ୍ତ୍ରୀଙ୍କୁ ନିର୍ଦ୍ଦେଶ ଦେଇଛନ୍ତି ବିଡିଓ । ଦୁର୍ନୀତିଖୋର ସଭାପତିଙ୍କ ଉପରେ କ’ଣ କାର୍ଯ୍ୟାନୁଷ୍ଠାନ ନିଆଯାଉଛି ତାହା ଦେଖିବାକୁ ବାକି ରହିଲା ।
ଶିକ୍ଷା ବ୍ୟବସ୍ଥାର ବିକଳ ଚିତ୍ର: ଦୁଇଟି କ୍ଲାସ ରୁମକୁ ୧୫୨ ପିଲା
ଶିକ୍ଷା ବ୍ୟବସ୍ଥାର ବିକଳ ଚିତ୍ର । ଦୁଇଟି କ୍ଲାସ ରୁମକୁ ୧୫୨ ପିଲା । ଆଗପଛ ହୋଇ ବସି ପଢୁଛନ୍ତି ପାଠ । ଏ ହେଉଛି କନ୍ଧମାଳ ଜିଲ୍ଲା ବାଲିଗୁଡ଼ା ବ୍ଲକ ବାଟାଗୁଡ଼ା ପଞ୍ଚାୟତ ଗଞ୍ଜୁଗୁଡ଼ା ଉଚ୍ଚ ପ୍ରାଥମିକ ବିଦ୍ୟାଳୟର ଦୃଶ୍ୟ । ବିଦ୍ୟାଳୟରେ ଶିଶୁ ବାଟିକା ଠାରୁ ଅଷ୍ଟମ ଶ୍ରେଣୀ ପର୍ଯ୍ୟନ୍ତ ୧୫୨ ଜଣ ଛାତ୍ରଛାତ୍ରୀ ପାଠ ପଢୁଛନ୍ତି । ହେଲେ ସ୍କୁଲରେ ଆବଶ୍ୟକୀୟ ଶ୍ରେଣୀ ଗୃହ ନଥିବାରୁ ପିଲା ବହୁ ଅସୁବିଧାର ସମ୍ମୁଖୀନ ହେଉଛନ୍ତି ।
ବିଦ୍ୟାଳୟ ପରିସର ମଧ୍ୟରେ ନୂତନ ଶ୍ରେଣୀ ଗୃହ ନିର୍ମାଣ ହୋଇଛି । ହେଲେ ତାହା ଦୀର୍ଘ ବର୍ଷ ହେବ ଅଧା ନିର୍ମିତ ଅବସ୍ଥାରେ ପଡିରହିଥିବା ବେଳେ ସେଥିରେ ଲତାବୁଦା ମାଡିଗଲାଣି । ଫଳରେ ପୁରୁଣା ଶ୍ରେଣୀ ଗୃହରେ ପିଲାମାନେ ପାଠ ପଢୁଛନ୍ତି । ଭଙ୍ଗାଦଦରା ରୋଷେଇ ଘରେ ଚାଲିଛି ପିଲାଙ୍କ ମଧ୍ୟାହ୍ନ ଭୋଜନ । ଖାଲି ସେତିକି ନୁହେଁ ବିଦ୍ୟାଳୟରେ ପାନୀୟ ଜଳର ସୁବ୍ୟବସ୍ଥା ବି ନାହିଁ । ଯେଉଁ ନଳକୂପଟି ଅଛି ସେଥିରୁ ପର୍ଯ୍ୟାପ୍ତ ପାଣି ବାହାରୁ ନାହିଁ । ସମସ୍ୟା ସଂପର୍କରେ ବାରମ୍ବାର ବିଦ୍ୟାଳୟ ପରିଚାଳନା କମିଟି ଓ ବର୍ତ୍ତମାନ ଦାୟିତ୍ୱରେ ଥିବା ପ୍ରଧାନ ଶିକ୍ଷୟତ୍ରୀ ପ୍ରଶାସନ ଓ ବିଭାଗୀୟ ଅଧିକାରୀଙ୍କୁ ଜଣାଇଲେଣି ହେଲେ ଫଳ ଶୂନ । କେବେ ବିଦ୍ୟାଳୟ ସମସ୍ୟାର ହେଉଛି ସମାଧାନ ? କେବେ ଛାତ୍ରଛାତ୍ରୀ ସୁବିଧାରେ ପାଠ ପଢୁଛନ୍ତି ? ତାହା ଦେଖିବାକୁ ବାକି ରହିଲା ।
ଡିଜିଟାଲ ଇଣ୍ଡିଆର ବିକଳ ଚିତ୍ର: ମିଳୁନି ସିଗନାଲ, କନ୍ଦାଉଛି ନେଟୱର୍କ
ମିଳୁନି ସିଗନାଲ, କନ୍ଦାଉଛି ନେଟୱର୍କ । ସିଗନାଲ ପାଇଁ କିଏ ଗଛ ଉପରେ ତ କିଏ ଗଛ ତଳେ । ବୌଦ୍ଧ ଜିଲ୍ଲାର ଦୁର୍ଗମ ଅଞ୍ଚଳରେ ଦେଖିବାକୁ ମିଳିଛି ଡିଜିଟାଲ ଇଣ୍ଡିଆର ବିକଳ ଚିତ୍ର । ବୌଦ୍ଧ ବ୍ଲକର ଚାରିଗୋଟି ପଞ୍ଚାୟତ ଆମ୍ବଝରି, ବଘିଆପଡ଼ା, ଶଗଡା ଓ ଗୁନ୍ଦୁଲିଆରେ ଲୋକଙ୍କୁ ମିଳୁନି ମୋବାଇଲ ସେବା । କଣ୍ଟାମାଳ ବ୍ଲକ ବରଗାଁ, ଉମା, ନାରାୟଣପ୍ରସାଦ, ଖୁଣ୍ଟିଗୋରା ଭଳି ଆଠଗୋଟି ପଞ୍ଚାୟତରେ ବି ଅବସ୍ଥା ସମାନ । ଫଳରେ ଲୋକେ ବହୁ ଅସୁବିଧାର ସମ୍ମୁଖୀନ ହେଉଛନ୍ତି । ଗାଁ ଠାରୁ ପାଞ୍ଚ କିଲୋମିଟର ଦୂରରେ ଥିବା ଏକ ଗଛ ଉପରେ ଚଢି ଲୋକେ ଜରୁରୀ କାମ କରିଥାନ୍ତି । ଆଉ କିଛି ପିଲା ଗଛ ତଳେ ପଟା ଉପରେ ମୋବାଇଲ ରଖି କଥା ହୋଇଥାନ୍ତି ।
ବର୍ତ୍ତମାନ 5ଜି ଯୁଗରେ ଲୋକେ ଯାଇ ଚନ୍ଦ୍ରରେ ପହଞ୍ଚିଲେଣି । ହେଲେ ଏଠାକାର ଲୋକେ ଏବେ ବି ଅନ୍ଧାରୀ ଜୀବନ ବିତାଉଛନ୍ତି । ଫୋନ ଆଉ ଇଣ୍ଟରନେଟ ସେବା ନମିଳିବାରୁ ପିଲା ଅନଲାଇନରେ ପାଠ ପଢିପାରୁନାହାନ୍ତି । ଲୋକେ ଗୁରୁତର ରୋଗୀଙ୍କୁ ଡାକ୍ତରଖାନା ନେବାକୁ ଆମ୍ବୁଲାନ୍ସ ଡାକି ପାରୁନାହାନ୍ତି କି ନିଆଁ ଲାଗିଲେ ଦମକଳ କେନ୍ଦ୍ରକୁ ଫୋନ କରିପାରୁନାହାନ୍ତି । ସମସ୍ୟା ସଂପର୍କରେ ଲୋକେ ବାରମ୍ବାର ଜିଲ୍ଲା ପ୍ରଶାସନ ନିକଟରେ ଅଭିଯୋଗ କଲେଣି ହେଲେ ଫଳ ଶୂନ ।
ଧର୍ମଶାଳା ଫାର୍ମହାଉସରେ ଦୁର୍ବୃତ୍ତଙ୍କ ଆତଙ୍କରାଜ ଘଟଣାକୁ ନେଇ ପୋଲିସକୁ ଦାୟୀ କଲେ ବିଜେଡି ବିଧାୟିକା ପ୍ରମିଳା ମଲ୍ଲିକ
ଧର୍ମଶାଳା ଫାର୍ମହାଉସରେ ଦୁର୍ବୃତ୍ତଙ୍କ ଆତଙ୍କରାଜ ଘଟଣାକୁ ନେଇ ପୋଲିସକୁ ଦାୟୀ କଲେ ବିଜେଡି ବିଧାୟିକା ପ୍ରମିଳା ମଲ୍ଲିକ। ପୋଲିସ ପ୍ରଶାସନ ସଜାଗ ଥିଲେ ଧର୍ମଶାଳାରେ ଏଭଳି ଘଟଣା ଘଟିନଥାନ୍ତା ବୋଲି କହିଛନ୍ତି ପ୍ରମିଳା । ସିଧାସଳଖ ଥାନା ଅଧିକାରୀ ଓ ଏସ୍ପିଙ୍କୁ ଦାୟୀ କରିଛନ୍ତି ପ୍ରମିଳା । କହିଲେ ବିଜେପି ପୋଲିସକୁ ଧରି ରାଜନୀତି କରୁଛି । କେବଳ ଚାରିଜଣ ନୁହେଁ ଘଟଣାରେ ସମ୍ପୃକ୍ତ ଥିବା ସମସ୍ତ ଦୋଷୀଙ୍କୁ ଗିରଫ ନକଲେ ବିଜେଡି ନିଜ ଆନ୍ଦୋଳନକୁ ଆହୁରି ତୀବ୍ର କରିବ ବୋଲି ଚେତାବନୀ ଦିଆଯାଇଛି ।