ପୁରୀ: ଶ୍ରୀମନ୍ଦିରରେ ଆଜି କୁମାରପୂର୍ଣ୍ଣିମାର ସ୍ୱତନ୍ତ୍ର ନୀତି । ମଧ୍ୟାହ୍ନ ଧୂପ ନୀତି ଶେଷ ହେବା ପରେ ଶ୍ରୀଦେବୀ ଓ ଭୂଦେବୀଙ୍କୁ ଖଟଶେଯ ଘରେ ବିଜେ କରାଯିବ । ଏହା ପରେ ମହାପ୍ରଭୁଙ୍କ ଠାରୁ ଆଜ୍ଞାମାଳ ପାଇ ଶ୍ରୀସୁଦର୍ଶନ ଚଉଦୋଳରେ ୪ ଆଶ୍ରମକୁ ବିଜେ କରିବେ । ସେଠାରେ ପନ୍ତିଭୋଗ ଓ ବନ୍ଦାପନା ନୀତି ସରିବା ପରେ ପଶ୍ଚିମଦ୍ବାର ଦେଇ ପୁନର୍ବାର ଶ୍ରୀମନ୍ଦିର ପ୍ରତ୍ୟାବର୍ତ୍ତନ କରିବେ। ଅନ୍ୟ ପକ୍ଷରେ ବଡସିଂହାର ଭୋଗ ସରିଲେ ରତ୍ନସିଂହାସନ ତଳେ ଓ ଉପରେ ଶକଟା, ପଶା ଓ କଉଡି ଖେଳ ହେବ । ଶ୍ରୀମନ୍ଦିରର ପରମ୍ପରାରେ ଏହା ଦ୍ୟୁତକ୍ରୀଡା ନାମରେ ଅଭିହିତ । ସର୍ତ୍ତ ଅନୁଯାୟୀ ଏହି ଦ୍ୟୂତ କ୍ରୀଡାରେ ମାଆ ମହାଲକ୍ଷ୍ମୀଙ୍କ ଠାରୁ ଶ୍ରୀଜଗନ୍ନାଥ ମହାପ୍ରଭୁ ହାରିଯାଇଥିବାରୁ ପ୍ରଭୁଙ୍କ ଚଳନ୍ତି ପ୍ରତିମା ଶ୍ରୀମାଧବ ୭ଦିନ ପର୍ଯ୍ୟନ୍ତ ଲକ୍ଷ୍ମୀ ମନ୍ଦିରରେ ବନ୍ଧା ରହିବେ । ପରେ ଅଷ୍ଟମୀ ଦିନ ଅବକାଶ ପୂଜା ସମୟରେ ପୁନଃ ମାଧବ ସିଂହାସନରେ ବିଜେ କରିବେ । ମହାପ୍ରଭୁଙ୍କ ତରଫରୁ ପ୍ରତିନିଧି ମୁଦିରସ୍ତ ଓ ଲକ୍ଷ୍ମୀଙ୍କ ପ୍ରତିନିଧି ଭିତରଚ୍ଛ ମହାପାତ୍ର ୨୧ ଟି ହିଙ୍ଗୁଳ କଉଡ଼ି, ୨୧ ଟି ରୁପା କଉଡି, ପଶା ଶକଟାରେ ଏହି ପାରମ୍ପରିକ ଖେଳ ଖେଳିଥାନ୍ତି ।
୧ କୋଟି ଆବେଦନ ଅତିକ୍ରମ କଲା Jio ପ୍ଲାଟଫର୍ମର IPO, ସୃଷ୍ଟି କଲା ନୂଆ ରେକର୍ଡ
ନନ୍ଦିଘୋଷ ବ୍ୟୁରୋ: ଇତିହାସ ରଚିଛି ଜିଓ ପ୍ଲାଟଫର୍ମର ପ୍ରାରମ୍ଭିକ ପବ୍ଲିକ୍ ଅଫରିଂ (IPO)। ଏହି ଆଇପିଓ ପାଇଁ ଆବେଦନ ସଂଖ୍ୟା ୧ କୋଟି ଅତିକ୍ରମ କରିଛି। କମ୍ପାନୀର ଦାବି ଅନୁଯାୟୀ, ଏହା ବିଶ୍ୱରେ ପ୍ରଥମ ଆଇପିଓ, ଯାହା ଏହି ଐତିହାସିକ ମାଇଲଖୁଣ୍ଟ ହାସଲ କରିଛି। ବିଡିଂ ଶେଷ ହେବାକୁ ଆଉ ୫ ଘଣ୍ଟା ବାକି ଥିବାବେଳେ ଏହି ରେକର୍ଡ ସୃଷ୍ଟି ହୋଇଥିବାରୁ ଚୂଡ଼ାନ୍ତ ଆବେଦନ ସଂଖ୍ୟା ଆହୁରି ବଢ଼ିବା ଆଶା କରାଯାଉଛି। ଏହା ସହିତ ଜିଓ ପ୍ଲାଟଫର୍ମ ପୂର୍ବରୁ ଅଧିକ ଆବେଦନ ପାଇଥିବା ଭାରତୀୟ ଆଇପିଓଗୁଡ଼ିକର ରେକର୍ଡକୁ ପଛରେ ପକାଇଛି। ୱାରୀ ଏନର୍ଜିଜ୍ ପ୍ରାୟ ୯୭ ଲକ୍ଷ ଆବେଦନ ପାଇଥିବାବେଳେ ବଜାଜ୍ ହାଉସିଂ ଫାଇନାନ୍ସ ଓ ବିସିସିଏଲ୍ ମଧ୍ୟ ପ୍ରାୟ ୯୦ ଲକ୍ଷ ଆବେଦନ ଆକର୍ଷିତ କରିଥିଲେ। ଅକ୍ଟୋବର ୨୩, ୨୦୨୬ ଦିନ ୧୨ଟା ୨୪ ମିନିଟ୍ ସୁଦ୍ଧା ଆଇପିଓଟି ୭.୪୧ ଗୁଣ ସବସ୍କ୍ରିପସନ୍ ହାସଲ କରିଥିଲା। ଏଥିରେ ଖୁଚୁରା ନିବେଶକଙ୍କ ପାଇଁ ଉଦ୍ଦିଷ୍ଟ ଅଂଶ ୨.୧୨ ଗୁଣ ସବସ୍କ୍ରାଇବ୍ ହୋଇଥିବାବେଳେ ଆଙ୍କର୍ ନିବେଶକଙ୍କୁ ବାଦ୍ ଦେଇ ଯୋଗ୍ୟ ସଂସ୍ଥାଗତ ନିବେଶକ (QIB) ବର୍ଗରେ ୧୫.୯୫ ଗୁଣ ସବସ୍କ୍ରିପସନ୍ ହୋଇଥିଲା। ସେହିପରି ଅଣ-ସଂସ୍ଥାଗତ ନିବେଶକ (NII) ବର୍ଗରେ ୯.୮୬ ଗୁଣ ସବସ୍କ୍ରିପସନ୍ ରେକର୍ଡ ହୋଇଥିଲା।
୩୦,୨୧୩ କୋଟି ଟଙ୍କାର IPO
ଜିଓ ପ୍ଲାଟଫର୍ମର ଏହି ଆଇପିଓର ମୋଟ ଆକାର ୩୦,୨୧୩ କୋଟି ଟଙ୍କା ରହିଛି। ଏଥିରେ ୨୭ କୋଟି ନୂଆ ସେୟାର ଜାରି କରାଯାଉଛି। ପ୍ରତି ସେୟାରର ମୂଲ୍ୟ ୧,୦୬୫ ଟଙ୍କାରୁ ୧,୧୧୯ ଟଙ୍କା ମଧ୍ୟରେ ରଖାଯାଇଛି। ଗୋଟିଏ ଲଟ୍ରେ ୧୨ଟି ସେୟାର ରହିଛି। ଉପର ମୂଲ୍ୟ ସୀମା ଅନୁସାରେ, ଖୁଚୁରା ନିବେଶକଙ୍କୁ ସର୍ବନିମ୍ନ ୧୩,୪୨୮ ଟଙ୍କା ନିବେଶ କରିବାକୁ ପଡ଼ିବ।
ଋଣ ପରିଶୋଧରେ ବ୍ୟବହାର ହେବ ଅଧିକାଂଶ ଅର୍ଥ
ଆଇପିଓରୁ ସଂଗୃହୀତ ଅର୍ଥର ଅଧିକାଂଶ ଭାଗ ଏହାର ସହାୟକ କମ୍ପାନୀ ରିଲାଏନ୍ସ ଜିଓ ଇନଫୋକମ୍ ଲିମିଟେଡ୍ (RJIL)ର ବକେୟା ଋଣ ପରିଶୋଧ ପାଇଁ ବ୍ୟବହାର କରାଯିବ। ଏଥିପାଇଁ ୨୭,୫୦୦ କୋଟି ଟଙ୍କା ରଖାଯାଇଛି। ଅବଶିଷ୍ଟ ଅର୍ଥ କମ୍ପାନୀର ସାଧାରଣ କର୍ପୋରେଟ୍ ଆବଶ୍ୟକତା ପୂରଣରେ ଖର୍ଚ୍ଚ ହେବ।
ଡିଜିଟାଲ୍ କ୍ଷେତ୍ରରେ ଜିଓ ପ୍ଲାଟଫର୍ମର ଭୂମିକା
୧୫ ନଭେମ୍ବର ୨୦୧୯ରେ ପ୍ରତିଷ୍ଠିତ ଜିଓ ପ୍ଲାଟଫର୍ମ ଭାରତରେ ଡିଜିଟାଲ୍ ସଂଯୋଗ, ଡିଜିଟାଲ୍ ସେବା ଓ ଅତ୍ୟାଧୁନିକ ପ୍ରଯୁକ୍ତିଭିତ୍ତିକ ସମାଧାନ କ୍ଷେତ୍ରରେ କାର୍ଯ୍ୟ କରୁଛି। ଗ୍ରାହକ ଓ ବ୍ୟବସାୟିକ ସଂସ୍ଥାଗୁଡ଼ିକୁ ବିଭିନ୍ନ ଡିଜିଟାଲ୍ ସେବା ଯୋଗାଇବା ପାଇଁ କମ୍ପାନୀ ଦେଶବ୍ୟାପୀ ସଂଯୋଗ ଭିତ୍ତିଭୂମି ଓ ଡିଜିଟାଲ୍ ପ୍ରଯୁକ୍ତିର ବିକାଶ କରିଛି। ବିଶାଳ ଗ୍ରାହକ ଆଧାର, ବ୍ୟାପକ ଡିଜିଟାଲ୍ ବଣ୍ଟନ ନେଟୱାର୍କ, ଗ୍ରାହକ ଓ ଉଦ୍ୟୋଗ ପାଇଁ ବିବିଧ ସେବା ଏବଂ ରିଲାଏନ୍ସ ଗ୍ରୁପ୍ର ଅନ୍ୟ ସଂସ୍ଥାଗୁଡ଼ିକ ସହ ସମନ୍ୱୟ କମ୍ପାନୀର ପ୍ରମୁଖ ଶକ୍ତି ଭାବେ ବିବେଚିତ ହେଉଛି। ଜିଓ ପ୍ଲାଟଫର୍ମର ଏହି ଆଇପିଓ ପ୍ରତି ନିବେଶକଙ୍କ ଅଭୂତପୂର୍ବ ଆଗ୍ରହ ଭାରତୀୟ ପୁଞ୍ଜି ବଜାରରେ ଏକ ନୂଆ ଅଧ୍ୟାୟ ସୃଷ୍ଟି କରିଛି।
ସାରା ୟୁରୋପକୁ ବ୍ୟାପୁଛି ଫ୍ରାନ୍ସ ହିଂସା
ନନ୍ଦିଘୋଷ ବ୍ୟୁରୋ: ସାରା ୟୁରୋପରେ ତୀବ୍ର ଜନ ଅସନ୍ତୋଷ। ଫ୍ରାନ୍ସରୁ ଇଟାଲୀ ଯାଏଁ ସବୁଠି ଆନ୍ଦୋଳନ। କେଉଁଠି ବ୍ୟାରିକେଡ ଭଙ୍ଗା ତ କେଉଁଠି ଦୋକାନ ଲୁଟ୍। ଶିକ୍ଷା, ଦରବୃଦ୍ଧି, ବେକାରୀ, ସରକାରୀ ନୀତି, ଗୃହ ନିର୍ମାଣ ଖର୍ଚ୍ଚ ବୃଦ୍ଧି ଆଦି ପ୍ରସଙ୍ଗ ନେଇ ଦିନକୁ ଦିନ ବିସ୍ତାରିତ ହେଉଛି ଆନ୍ଦୋଳନ। ଏହାକୁ ନେଇ ୟୁରୋପରେ ଜାରି କରାଯାଇଛି ହାଇଆଲର୍ଟ। ଅନେକ ସ୍ଥାନରେ ଆନ୍ଦୋଳନକାରୀଙ୍କ ଉପରକୁ ଲୁହବୁହା ଗ୍ୟାସ ପ୍ରୟୋଗ କରାଯାଇଛି। ଫ୍ରାନ୍ସ, ଇଟାଲି, ସ୍ପେନ୍, ପର୍ତ୍ତୁଗାଲ, ଆଲବାନିଆ ଓ ବେଲଜିୟମରେ ଦେଖାଦେଇଛି ତୀବ୍ର ଅସ୍ଥିରତା। ଅନେକ ସ୍ଥାନରେ ଭଙ୍ଗାରୁଜା ହେବା ସହ ପୋଲିସ ସହ ଧସ୍ତାଧସ୍ତି ହୋଇଛି। ଏହି ଦେଶଗୁଡିକରେ ଶାନ୍ତିଶୃଙ୍ଖଳା ରକ୍ଷା ଲାଗି ହଜାର ହଜାର ପୋଲିସ ମୁତୟନ କରାଯାଇଛି।
ଫ୍ରାନ୍ସରେ ୧ ହଜାରରୁ ଅଧିକ ଲୋକଙ୍କୁ ଗିରଫ କରାଯାଇଛି। ଆନ୍ଦୋଳନରେ ବିଭିନ୍ନ ଟ୍ରେଡ଼ ୟୁନିଅନ୍ ସାମିଲ ହୋଇଥିବାରୁ ସ୍ଥିତି ଅଧିକ ଜଟିଳ ହୋଇଛି। ଇଟାଲୀର ମିଲନରେ ବ୍ୟାପକ ଜନଅସନ୍ତୋଷ ହେବାରୁ କଡା ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଛି। ମିଲନ ସହରରେ ଅଧିକ ଫୋର୍ସ ମୁତୟନ କରାଯାଇଛି ବୋଲି କହିଛନ୍ତି ପ୍ରଧାନମନ୍ତ୍ରୀ ଜିଓର୍ଜିଆ ମେଲୋନି। ସ୍ପେନର ବାର୍ସେଲୋନାରେ ଅନେକ ଦୋକାନକୁ ଲୁଟ୍ କରିଛନ୍ତି ଆନ୍ଦୋଳନକାରୀ। ସେଠାରେ ଶତାଧିକ ଲୋକଙ୍କୁ ଗିରଫ କରାଯାଇଛି। ରୋମ, ଟୁରିନ, ବ୍ରସଲେସ, ତିରାନାରେ ଆନ୍ଦୋଳନକାରୀଙ୍କ ଉପରେ ଲୁହବୁହା ଗ୍ୟାସ ପ୍ରୟୋଗ କରାଯାଇଛି। ସବୁଠି ସରକାରଙ୍କ ବିରୋଧରେ ହୋଇଛି ନାରାବାଜି। ଫ୍ରାନ୍ସରେ ପ୍ରାୟ ୭୦ ହଜାର ପୋଲିସଙ୍କୁ ମୁତୟନ କରାଯାଇଛି। ଫ୍ରାନ୍ସର ଦ୍ବିତୀୟ ବୃହତ୍ତମ ସହର ଲିୟନରେ ସ୍ଥିତି ଆୟତ୍ତ ବାହାରକୁ ଯାଇଛି। କେଉଁଠି ବି କାମ କରିନାହିଁ ରାଷ୍ଟ୍ରପତି ମାକ୍ରନଙ୍କ ଚେତାବନୀ। ସେପଟେ ପ୍ରଧାନମନ୍ତ୍ରୀଙ୍କ ଇସ୍ତଫା, ଶିକ୍ଷା ଲାଗି ଅଧିକ ବ୍ୟୟ, କମ୍ ଟ୍ୟୁସନ ଫି ଦାବିରେ ଆଲବାନିଆରେ ଜୋରଦାର ହୋଇଛି ଛାତ୍ର ଆନ୍ଦୋଳନ।
ଆଜି ପବିତ୍ର ଶରତ ପୂର୍ଣ୍ଣିମା, ଜାଣନ୍ତୁ ଏହି ଦିନ କାହିଁକି ଲାଗେ କ୍ଷୀରି ଭୋଗ?
ନନ୍ଦିଘୋଷ ବ୍ୟୁରୋ: ଆଜି ହେଉଛି ପବିତ୍ର ଶରତ ପୂର୍ଣ୍ଣିମା ବା କୁମାର ପୂର୍ଣ୍ଣିମା। ଶରତ ଋତୁରେ ଏହା ପଡୁଥିବାରୁ କେତେକ ସ୍ଥାନରେ ଏହାକୁ ଶରତ ପୂର୍ଣ୍ଣମା ବୋଲି କୁହାଯାଏ। ଏହି ଦିନ ସମସ୍ତ ମନ୍ଦିରମାନଙ୍କରେ ବିଶେଷ ପୂଜାର୍ଚ୍ଚନା କରାଯାଏ। ମାନ୍ୟତା ଅନୁଯାୟୀ, ଏହି ଦିନ ଗଜଲକ୍ଷ୍ମୀ ପୂଜା ଆରମ୍ଭ ହୋଇଥାଏ ଓ ଦେବତାଙ୍କ ବିଶେଷ କୃପା ମିଳିବା ସହ ସ୍ୱର୍ଗରୁ ଅମୃତ ବର୍ଷା ହୋଇଥାଏ। ମା’ ଲକ୍ଷ୍ମୀଙ୍କ ମଧ୍ୟ କୃପା ଓ ଆଶୀର୍ବାଦ ମିଳିଥାଏ।
ଶରତ ପୂର୍ଣ୍ଣିମାର ମହତ୍ତ୍ବ…
ଶରତ ପୂର୍ଣ୍ଣିମା ଦିନ ସକାଳୁ ସ୍ନାନ ସାରି ଦେବାଦେବୀଙ୍କ ନିକଟରେ ପୂଜାର୍ଚ୍ଚନା ପରେ ବତ୍ର ରଖାଯାଇଥାଏ । ଏହି ଦିନ ଚନ୍ଦ୍ରମା ପୃଥିବୀର ଖୁବ ନିକଟତର ହୋଇଥାଆନ୍ତି । ଶାସ୍ତ୍ର ଅନୁଯାୟୀ, ଏହି ଦିନ ମଣିଷ ଶରୀରରେ ଚନ୍ଦ୍ରମାଙ୍କ କିରଣ ପଡ଼ିଲେ ଏହାକୁ ଶୁଭ ମନାଯାଇଥାଏ । ଏହି ଦିନ ଗାଈ କ୍ଷୀରରେ ଚିନି ମଶାଇ ଖିରୀ ପ୍ରସ୍ତୁତ କରନ୍ତୁ । ଘରେ ଭଗବାନଙ୍କ ନିକଟରେ ଭୋଗ ଲଗାନ୍ତୁ । ଏହାପରେ ଆକାଶରେ ଚନ୍ଦ୍ରମା ମଧ୍ୟ ସ୍ଥାନରେ ଥିବା ବେଳେ ଖିରୀକୁ ଏକ ଚାନ୍ଦି ପାତ୍ରରେ ନେଇ ଚନ୍ଦ୍ରମାଙ୍କୁ ଅର୍ପଣ କରନ୍ତୁ । ଅର୍ପଣ କରିବା ପରେ ସେହି ଖିରୀକୁ ଚନ୍ଦ୍ର କିରଣରେ ରଖନ୍ତୁ। ପର ଦିନ ସକାଳେ ଏହି ଖିରୀକୁ ଖାଆନ୍ତୁ । ଏହି ଶରତ ପୂର୍ଣ୍ଣିମା ଦିନ ବିଶେଷ କରି ଭଗବାନ ଶିବ ଶଙ୍କର, ମା’ ପାର୍ବତୀ, କାର୍ତ୍ତିକେୟ, ମାଆ ତୁଳସୀ, ମା’ ଗଜଲକ୍ଷ୍ମୀଙ୍କୁ ପୂଜାର୍ଚ୍ଚନା କରାଯାଏ।
ଆଜି ଭାରତ-ଜିମ୍ବାୱେ ଲଢେଇ, ଆଗୁଆ ଦିନିକିଆ ଜିତିବା ଲକ୍ଷ୍ୟରେ ଭାରତୀୟ ମହିଳା ଦଳ
ନନ୍ଦିଘୋଷ ବ୍ୟୁରୋ: ଆଜି ଭାରତ ଓ ଜିମ୍ବାୱେ ମୁକାବିଲା । ଭାରତ- ଜିମ୍ବାୱେ ମଧ୍ୟରେ ଚାଲିଥିବା ତିନି ମ୍ୟାଚ୍ ବିଶିଷ୍ଟ ଘରୋଇ ଦିନିକିଆ ଶୃଙ୍ଖଳାର ଦ୍ବିତୀୟ ମୁକାବିଲା ରବିବାର ଖେଳାଯିବ । ଭାରତୀୟ ମହିଳା କ୍ରିକେଟ୍ ଦଳ ଆଜି ଜିମ୍ବାୱେ ବିପକ୍ଷରେ ଖେଳି ସିରିଜ୍ ଜିତିବା ନେଇ ଲକ୍ଷ୍ୟ ରହିଛି।
ସୂଚନା ଅନୁଯାୟୀ, ପ୍ରଥମ ଦିନିକିଆରେ ଆରାମଦାୟକ ବିଜୟ ହାସଲ କରିଥିଲା ଭାରତୀୟ ମହିଳା କ୍ରିକେଟ୍ ଦଳ । ଜିମ୍ବାୱେକୁ ୯ ୱିକେଟ୍ ରେ ହରାଇ ଶୃଙ୍ଖଳାରେ ଆଗୁଆ ରହିଛି ଭାରତ । ପ୍ରଥମ ମ୍ୟାଚ୍ ରେ ପ୍ରତୀକା ରାୱଲଙ୍କ ଅପରାଜିତ ଶତକ ଓ ଶ୍ରୀ ଚରଣୀଙ୍କ ଚତ୍ମକାର ବୋଲିଂ ଯୋଗୁଁ ଭାରତ ସଜହ ବିଜୟ ହାସଲ କରିଥିଲା । ପ୍ରତୀକା ୯୬ ବଲରୁ ଅପରାଜିତ ୧୦୦ ରନ୍ କରିଥିବା ବେଳେ ଚରଣୀ ୨୩ ରନରେ ୪ ୱିକେଟ୍ ନେଇଥିଲେ । ତେବେ ଏହି ମ୍ୟାଚ୍ ରେ ବିଜୟ ଭାରତର ଆତ୍ମବିଶ୍ବାସକୁ ବଢାଇଛି । ଦ୍ବିତୀୟ ଦିନିଆରେ କବଜା କରି ଭାରତ ଶୃଙ୍ଖଳାକୁ ମୂଳପୋଛ କରିବା ନେଇ ଲକ୍ଷ୍ୟ ରଖିଛି । ଯଦି ଭାରତ ସିରିଜ୍ ଜିତିଯାଏ, ତେବେ ପୂର୍ଣ୍ଣକାଳୀନ ଅଧିନାୟକ ହେବା ପରେ ଏହା ମନ୍ଧାନାଙ୍କର ପ୍ରଥମ ବିଜୟ ହେବ। ସେପଟେ ପ୍ରଥମ ମ୍ୟାଚ୍ ରେ କରିଥିବା ଭୁଲ୍ ସୁଧାରି ଭାରତକୁ ଟକ୍କର ଦେବା ନେଇ ପ୍ରୟାସ କରିବ ଜିମ୍ବାୱେ ।
ଭାରତ (ସମ୍ଭାବ୍ୟ ୧୧)- ସ୍ମୃତି ମନ୍ଧାନା (ଅଧିନାୟକ), ଶେଫାଳି ବର୍ମା, ପ୍ରତୀକା ରାୱଲ, ହରମନପ୍ରୀତ କୌର, ହଲିନ୍ ଦେଓଲ, ତେଜଲ ହସନବିସ୍, ଦୀପ୍ତି ଶର୍ମା, ରିଚା ଘୋଷ (ୱିକେଟକିପର), ଶ୍ରୀ ଚରଣୀ, କ୍ରାନ୍ତି ଗୌଡ଼, ଜିନ୍ତିମଣି କାଲିତା ।
ଜିମ୍ବାୱେ (ସମ୍ଭାବ୍ୟ ୧୧)- ମୋଡେଷ୍ଟର ମୁପାଚିକୱା (ୱିକେଟକିପର),କେଲିସ୍ ଧଲୋଭୁ, ଚିପୋ ମୁଗେରି- ତିରିପାନୋ, ବିଲଭଡ଼ ବିଜା, ଯୋସେଫିନେ ଏନକୋମୋ, ଶାର୍ନେ ମେୟର୍ସ, ନ୍ୟାଶା ଗ୍ବାଞ୍ଜୁରା, ମିଚେଲ ମାଭୁଙ୍ଗା, ନମଭେଲୋ ଶିବାନ୍ଦା, ଫ୍ରାନସିସ୍କା ଚିପାରେ, ଓଲିନ୍ଦର ଚାରେ ।
ଭିଜିଲାନ୍ସ ଜାଲରେ ସୁନାବେଡା DFO କାର୍ଯ୍ୟାଳୟର ସିନିୟର୍ ଆସିସଷ୍ଟାଣ୍ଟ
ନନ୍ଦିଘୋଷ ବ୍ୟୁରୋ: ଭିଜିଲାନ୍ସ ଜାଲରେ ସୁନାବେଡା ଡିଏଫଓଙ୍କ କାର୍ଯ୍ୟାଳୟର ବରିଷ୍ଠ ସହାୟକ। ମିଥ୍ୟା ବିଲ୍ କରି ସରକାରୀ ଅର୍ଥ ହଡ଼ପ ଅଭିଯୋଗ ବରିଷ୍ଠ ସହାୟକ ବବଲୁ ସୁନାଙ୍କୁ ଗିରଫ କରିଛି ଭିଜିଲାନ୍ସ। ମିଥ୍ୟା ବିଲ୍ କରି ୨୦୨୩ ମସିହାରୁ ୨ କୋଟି ୬୦ ଲକ୍ଷ ଟଙ୍କାରୁ ଅଧିକ ସରକାରୀ ପାଣ୍ଠି ହଡ଼ପ କରିଥିବା ନେଇ ଅଭିଯୋଗ ହୋଇଥିଲା। ଗତ ୬ ମାସ ଧରି ପଳାତକ ଥିବା ବବଲୁଙ୍କୁ ଶନିବାର ରାତିରେ ବଲାଙ୍ଗୀରରୁ ଗିରଫ କରାଯାଇଛି। ସରକାରୀ ପାଣ୍ଠିର ଅପବ୍ୟବହାର ଅଭିଯୋଗରେ ଭିଜିଲାନ୍ସ ପଚରାଉଚରା କରିଛି।
ସୂଚନା ଅନୁସାରେ, ବବଲୁ ସୁନା ନିଜର ପଦର ଅପବ୍ୟବହାର କରି ବିଭିନ୍ନ ଯୋଜନାରେ ଅର୍ଥ ହେରଫେର କରିଥିଲେ। ସୁନାବେଡା ବନ୍ୟପ୍ରାଣୀ ଡିଭିଜନର ପୂର୍ବତନ, ଅବସରପ୍ରାପ୍ତ ଓ ମୃତ କର୍ମଚାରୀଙ୍କ ପରିଚୟପତ୍ର ଓ ପରିଚୟ ବ୍ୟବହାର କରି ନକଲି ବିଲ୍ କରିଥିଲେ। ଏହି ଅର୍ଥକୁ ସ୍ତ୍ରୀ, ଭାଇ, ଭଉଣୀ ଓ ଘନିଷ୍ଠ ସହଯୋଗଙ୍କ ବ୍ୟକ୍ତିଗତ ବ୍ୟାଙ୍କ ଆକାଉଣ୍ଟରେ ଜମା କରୁଥିଲେ। ମୋଟାମୋଟି ଭାବେ ବବଲୁ ସୁନା ୨ କୋଟି ୬୦ ଲକ୍ଷ ୨୧ ହଜାର ୩୦୬ ଟଙ୍କା ଆତ୍ମସାତ କରିଥିବା ଜଣାପଡିଛି। ଘଟଣାରେ ବରିଷ୍ଠ ସହାୟକ ବବଲୁ ସୁନାଙ୍କୁ ଗିରଫ କରାଯିବା ସହ ମାମଲା ରୁଜୁ କରାଯାଇଛି।
ଭୂମିକମ୍ପରେ ଥରିଲା ଜାପାନ, ରିକ୍ଟର ସ୍କେଲରେ ତୀବ୍ରତା ୬.୫ ରେର୍କଡ଼
ନନ୍ଦିଘୋଷ ବ୍ୟୁରୋ: ଥରିଲା ଜାପାନ । ଭାରତୀୟ ସମୟ ଅନୁଯାୟୀ ଶନିବାର ରାତିରେ ବୋନିନ୍ ଦ୍ୱୀପରେ ଭୂମିକମ୍ପ ଝଟକା ଅନୁଭୂତ ହୋଇଥିଲା । ରିକ୍ଟର ସ୍କେଲରେ ଏହାର ତୀବ୍ରତା ୬.୫ ରେର୍କଡ଼ ହୋଇଛି । ମୃତାହତ, କ୍ଷୟକ୍ଷତି କିମ୍ବା ସୁନାମି ଆଲର୍ଟ ନେଇ ବର୍ତ୍ତମାନ ସୁଦ୍ଧା କୌଣସି ସୂଚନା ନାହିଁ।
ଆମେରିକାର ଭୂତତ୍ତ୍ୱ ସର୍ବେକ୍ଷଣ ସଂସ୍ଥା (ୟୁଏସ୍ଜିଏସ୍) ରିପୋର୍ଟ ଅନୁଯାୟୀ, ଟୋକିଓର ପ୍ରାୟ ୧,୦୦୦ କିଲୋମିଟର ଦକ୍ଷିଣ-ଦକ୍ଷିଣପୂର୍ବରେ ଥିବା ବୋନିନ୍ ଦ୍ୱୀପରେ ୬.୫ ତୀବ୍ରତାର ଭୂମିକମ୍ପ ଅନୁଭୂତ ହୋଇଥିଲା। ଭୂକମ୍ପର କେନ୍ଦ୍ରସ୍ଥଳ ୪୯୪ କିଲୋମିଟର ଗଭୀରତାରେ ଥିଲା। ପ୍ରଭାବିତ ଅଞ୍ଚଳ ପାଇଁ କୌଣସି ସୁନାମି ଆଲର୍ଟ ଜାରି କରାଯାଇ ନାହିଁ । ଏହାସହ କୌଣସି କ୍ଷୟକ୍ଷତି କିମ୍ବା ମୃତାହତ ନେଇ ସୂଚନା ନାହିଁ।
ସୂଚନା ଥାଉ କି, ଗତ ଗୁରୁବାର ଚୀନର ତିବ୍ବତ ଅଞ୍ଚଳରେ ଏକ ଶକ୍ତିଶାଳୀ ଭୂମିକମ୍ପ ହୋଇଥିଲା। ଏଥିରେ ଅତି କମରେ ୧୬ ଜଣଙ୍କ ମୃତ୍ୟୁ ହୋଇଥିବା ବେଳେ ବହୁ ଲୋକ ଆହତ ହୋଇଥିଲେ । ଏହି ଭୂକମ୍ପରେ ୩୩୯ଟି ଘର ଓ ୨୦ଟି ଗୁହାଳ ଭାଙ୍ଗିଯାଇଥିବା ନେଇ ସ୍ଥାନୀୟ ପ୍ରଶାସନ ପକ୍ଷରୁ ସୂଚନା ମିଳିଥିଲା । ସ୍ଥାନୀୟ ରାତି ପ୍ରାୟ ୧୦ଟା ୩୩ ମିନିଟରେ ଏହି ଭୂମିକମ୍ପ ହୋଇଥିଲା । ଏହାର କେନ୍ଦ୍ରସ୍ଥଳ ନାଗକୁ ସହରଠାରୁ ପୂର୍ବ-ଉତ୍ତରପୂର୍ବ ଦିଗରେ ପ୍ରାୟ ୧୯୧ କିଲୋମିଟର ଦୂରରେ ଓ ଭୂପୃଷ୍ଠଠାରୁ ୧୮ କିଲୋମିଟର ଗଭୀରରେ ଥିଲା ବୋଲି ଆମେରିକାର ଭୂତତ୍ତ୍ୱ ସର୍ବେକ୍ଷଣ ସଂସ୍ଥା (ୟୁଏସ୍ଜିଏସ୍) ରିପୋର୍ଟରେ କୁହାଯାଇଥିଲା ।
ଆଜି ଦିନିକିଆ ଓଡ଼ିଶା ଗସ୍ତରେ ଆସିବେ ପ୍ରଧାନମନ୍ତ୍ରୀ, RBI ଡ଼ାଟା ସେଣ୍ଟରର କରିବେ ଉଦ୍ଦଘାଟନ
ନନ୍ଦିଘୋଷ ବ୍ୟୁରୋ: ଆଜି ଦିନିକିଆ ଓଡ଼ିଶା ଗସ୍ତରେ ଆସିବେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ଏହି ଅବସରରେ ପ୍ରଧାନମନ୍ତ୍ରୀ ଜଟଣୀ ଭାରତୀୟ ରିଜର୍ଭ ବ୍ୟାଙ୍କର ନୂତନ ଡ଼ାଟା ସେଣ୍ଚର ଓ ସାଇବର ସୁରକ୍ଷା ପ୍ରଶିକ୍ଷଣ ପ୍ରତିଷ୍ଠାନକୁ ଉଦ୍ଦଘାଟନ କରିବେ । ତେବେ ପ୍ରଧାନମନ୍ତ୍ରୀଙ୍କ ଗ୍ରସ୍ତକୁ ନେଇ ଭୁବନେଶ୍ବର ଓ ଖୋର୍ଦ୍ଧାରେ ସୁରକ୍ଷା ବ୍ୟବସ୍ଥାକୁ କଡ଼ାକଡ଼ି କରାଯାଇଛି ।
ସୂଚନା ଅନୁଯାୟୀ, ଅପରାହ୍ନ ୪ଟା ୧୦ରେ ମୋଦି ବାୟୁସେନାର ସ୍ବତନ୍ତ୍ର ବିମାନ ଯୋଗେ ଭୁବନେଶ୍ବରରେ ପହଞ୍ଚିବେ । ଏହାପରେ ପ୍ରଧାନମନ୍ତ୍ରୀ ବାୟୁସେନାର ସ୍ବତନ୍ତ୍ର ହେଲିକପ୍ଟରରେ ଭୁବନେଶ୍ବରରୁ ଖୋର୍ଦ୍ଧାସ୍ଥିତ ଆରବିଆଇ ଡ଼ାଟା ସେଣ୍ଟରକୁ ଯିବେ । ଅପରାହ୍ନ ୪ଟା ୪୫ ମିନିଟ୍ ରୁ ୫ଟା ୪୫ ମିନିଟ୍ ପର୍ଯ୍ୟନ୍ତ ଆରବିଆଇ ଡ଼ାଟା ସେଣ୍ଟର ଓ ସାଇବର ସୁରକ୍ଷା ପ୍ରଶିକ୍ଷଣ ପ୍ରତିଷ୍ଠାନର ଉଦଘାଟନୀ କାର୍ଯ୍ୟକ୍ରମରେ ଯୋଗଦେବେ । ୫ଟା ୫୦ ସଡ଼କ ପଥରେ ଭୁବନେଶ୍ବର ବିମାନବନ୍ଦରକୁ ଯିବେ । ପରେ ୬ଟା ୩୫ ମିନିଟ୍ ରେ ଭୁବନେଶ୍ବରରୁ ଦିଲ୍ଲୀ ଅଭିମୁଖେ ଯାତ୍ରା କରିବେ ।
ଏହି କାର୍ଯ୍ୟକ୍ରମରେ ଓଡ଼ିଶାର ରାଜ୍ୟପାଳ ବ୍ରଜମୋହନ ରାମ, ମୁଖ୍ୟମନ୍ତ୍ରୀ ମୋହନ ଚରଣ ମାଝୀ, ଆରବିଆଇ ଗଭର୍ଣ୍ଣର ସଞ୍ଜୟ ମାଲହୋତ୍ରା, ଭୁବନେଶ୍ଵର ସାଂସଦ ଅପରାଜିତା ଷଡ଼ଙ୍ଗୀ ପ୍ରମୁଖ ଅତିଥି ଭାବେ ଯୋଗଦେବେ । ପ୍ରଧାନମନ୍ତ୍ରୀଙ୍କ ସମେତ ଅନ୍ୟ ଭିଭିଆଇପିମାନେ ସଡ଼କ ପଥରେ ଖୋର୍ଦ୍ଧାରୁ ଭୁବନେଶ୍ବର ଫେରିବାକୁ ଥିବାରୁ କମିସନରେଟ୍ ପୋଲିସ ପକ୍ଷରୁ ସୁରକ୍ଷା ବ୍ୟବସ୍ଥା କଡ଼ାକଡ଼ି କରାଯାଇଛି । ବିମାନବନ୍ଦରରୁ କାର୍ଯ୍ୟକ୍ରମ ସ୍ଥଳ ପର୍ଯ୍ୟନ୍ତ କାରକେଡ୍ ରିହର୍ସାଲ କରିଛନ୍ତି। ୫୭ ପ୍ଲାଟୁନ୍ ପୁଲିସ ଫୋର୍ସ, ୫ କମ୍ପାନୀ CAPF ଫୋର୍ସ ଓ ୨୦୦ ଅଫିସର ନିୟୋଜିତ ହୋଇଛନ୍ତି।
ପାଖେଇଲାଣି ବାତ୍ୟା !
ନନ୍ଦିଘୋଷ ବ୍ୟୁରୋ: ଉପକୂଳ ମୁହାଁ ହୋଇ ମାଡ଼ିଆସୁଛି ବାତ୍ୟା ଅର୍ଣ୍ଣବ। ଆଜି ଦକ୍ଷିଣ ଦିଗକୁ ଗତି କରି ଗଭୀର ଅବପାତରେ ପରିଣତ ହେବ ଅବପାତ। ଏହାପରେ ପଶ୍ଚିମ-ଉତ୍ତର-ପଶ୍ଚିମ ଦିଗକୁ ଗତି କରିବା ସହ ଅଧିକ ଘନୀଭୂତ ହେବାର ସମ୍ଭାବନା ରହିଛି। ଏହି ପ୍ରକ୍ରିୟାରେ ୨୬ ଅକ୍ଟୋବର ସକାଳ ସୁଦ୍ଧା ଏହା ପୂର୍ବ-ମଧ୍ୟ ଓ ସଂଲଗ୍ନ ପଶ୍ଚିମ-ମଧ୍ୟ ବଙ୍ଗୋପସାଗର ଉପରେ ବାତ୍ୟାର ରୂପ ନେଇପାରେ। ପରବର୍ତ୍ତୀ ସମୟରେ ଏହା ଆହୁରି ଶକ୍ତିଶାଳୀ ହୋଇ ୨୭ ଅକ୍ଟୋବର ସକାଳ ପାଖାପାଖି ପଶ୍ଚିମ-ମଧ୍ୟ ବଙ୍ଗୋପସାଗର ଉପରେ ଭୀଷଣ ବାତ୍ୟାରେ ପରିଣତ ହେବାର ଆଶଙ୍କା ରହିଛି। ପରବର୍ତ୍ତୀ ସମୟରେ ବାତ୍ୟାଟି ଅଧିକ ଘନୀଭୂତ ହେବା ସହ ଅତି ଭୀଷଣ ବାତ୍ୟାର ରୂପ ନେଇପାରେ। ୨୮ ଅକ୍ଟୋବର ପୂର୍ବାହ୍ନ ସୁଦ୍ଧା ଅତି ଭୀଷଣ ବାତ୍ୟାଟି ଆନ୍ଧ୍ରପ୍ରଦେଶ ଓ ୟାନାମ୍ ଉପକୂଳରେ ବାପଟଲା ଓ ବିଶାଖାପାଟଣା ମଧ୍ୟବର୍ତ୍ତୀ ଅଞ୍ଚଳ ଦେଇ ସ୍ଥଳଭାଗ ଅତିକ୍ରମ କରିପାରେ। ସ୍ଥଳଭାଗ ଅତିକ୍ରମ ସମୟରେ ବାତ୍ୟାର ସର୍ବାଧିକ ପବନର ବେଗ ଘଣ୍ଟା ପ୍ରତି ୧୧୫ରୁ ୧୨୫ କିଲୋମିଟର ରହିବା ସହ ପବନର ଝଟକା ବେଗ ଘଣ୍ଟା ପ୍ରତି ୧୪୦ କିଲୋମିଟର ପର୍ଯ୍ୟନ୍ତ ପହଞ୍ଚିପାରେ। ଆନ୍ଧ୍ରପ୍ରଦେଶ ଓ ଦକ୍ଷିଣ ଓଡ଼ିଶା ଉପକୂଳ ପାଇଁ ପାଣିପାଗ ବିଭାଗ ପକ୍ଷରୁ ଏନେଇ ଆଲର୍ଟ ଜାରି ହୋଇଛି।
ଋଷ-ୟୁକ୍ରେନ ଯୁଦ୍ଧ: ଲାଗୁ ହେଲା ଅସ୍ଥାୟୀ ଅସ୍ତ୍ରବିରତି !
ନନ୍ଦିଘୋଷ ବ୍ୟୁରୋ: ଋଷ ଅଧିକୃତ ତଥା ୟୁକ୍ରେନ ଅନ୍ତର୍ଗତ ଓଲେକ୍ସି ସହରରେ ଅସ୍ଥାୟୀ ଅସ୍ତ୍ରବିରତି ଲାଗୁ l ଆସନ୍ତା ୨୭ରୁ ଲାଗୁ ହେବ ଅସ୍ଥାୟୀ ଅସ୍ତ୍ରବିରତି l ସେଠାରେ ମାନବିକ ସହାୟତା ଲାଗି ପ୍ରକ୍ରିୟା ଆରମ୍ଭ ହେବ l ଆମେରିକାର ଫାଷ୍ଟଲେଡି ମେଲାନିଆ ଟ୍ରମ୍ପଙ୍କ ମଧ୍ୟସ୍ଥତାରେ ଏହି ଅସ୍ତ୍ରବିରତି ଆରମ୍ଭ ହେବ l ସେପଟେ ଦୁଇ ଦେଶ ମଧ୍ୟରେ ଶାନ୍ତି ଲାଗି ପ୍ରକ୍ରିୟା ଆରମ୍ଭ ହୋଇଛି l ୟୁକ୍ରେନ ରାଷ୍ଟ୍ରପତି ଭୋଲୋଦିମିର ଜେଲେନସ୍କି କହିଛନ୍ତି- ଯୁଦ୍ଧର ଅନ୍ତ ଲାଗି ଋଷ, ୟୁକ୍ରେନ ଓ ଆମେରିକା ପକ୍ଷରୁ ଆବୁଧାବିରେ ଆସନ୍ତା ନଭେମ୍ବରରେ ବାଗରେ ଆଲୋଚନା ହେବ l ଯଦି ଆବୁଧାବିରେ ସମ୍ଭବ ନହୁଏ ତେବେ ସୁଇଜରଲାଣ୍ଡରେ ଏହି କଥାବାର୍ତ୍ତା ହେବ l ସମଗ୍ର ଦୋନବାସ ସମେତ ଋଷ ଅଧିକୃତ କରି ନଥିବା ଅଞ୍ଚଳଗୁଡିକୁ ଋଷ ହାତରେ ଅର୍ପଣ କରିବା ଲାଗି ମସ୍କୋ ଦାବି କରୁଥିବାରୁ କଥାବାର୍ତ୍ତାରେ ବିଶେଷ ଅଗ୍ରଗତି ହୋଇପାରୁନାହିଁ l ଷ୍ଟାରଲିଙ୍କ ସାଟେଲାଇଟ କମ୍ୟୁନିକେସନ୍ସ ସିଷ୍ଟମ ବ୍ୟବହାର ଲାଗି ୟୁକ୍ରେନକୁ ଅନୁମତି ନଦେବା ଏବଂ ଋଷୀୟ ତୈଳସମ୍ପଦକୁ ଆମେରିକା ସମେତ ବିଭିନ୍ନ ଦେଶକୁ ରପ୍ତାନି ଲାଗି ଟ୍ରମ୍ପ ଅନୁମତି ଦେବା ପରେ ଆମେରିକା-ୟୁକ୍ରେନ ମଧ୍ୟରେ ସମ୍ପର୍କ ତିକ୍ତ ହୋଇଛି l