ସାହିକୁ ନାହିଁ ପକ୍କା ରାସ୍ତା । ବଣଜଙ୍ଗଲ ଘେରା ପରିବେଶ ଦେଇ ଯାଆସ କରୁଛନ୍ତି ଲୋକେ । କେନ୍ଦୁଝର ଜିଲ୍ଲା ଝୁମ୍ପୁରା ବ୍ଲକ ବାରିଆ ଚିଲିଆ ସାହିକୁ ନାହିଁ ରାସ୍ତା । ସାହିରେ ୩୦ ରୁ ଅଧିକ ପରିବାର ବସବାସ କରୁଛନ୍ତି । ହେଲେ ସାହିକୁ ରାସ୍ତା ଖଣ୍ଡିଏ ନାହିଁ । ବାରିଆ ଠାରୁ ୨ କିଲୋମିଟର ଦୂରରେ ଥିବା ଚିଲିଆ ସାହିକୁ ଯିବାକୁ ହେଲେ ଜଙ୍ଗଲିଆ ପାଦ ଚଲା ରାସ୍ତାରେ ଯିବାକୁ ପଡ଼େ । ଖରାଦିନେ ଯେଣତେଣ ପ୍ରକାରେ ଲୋକେ ଯାଆସ ତ କରିଦିଅନ୍ତି । ବର୍ଷା ଦିନେ ଯାତାୟତ କରିବା ମୁସ୍କିଲ ହୋଇଯାଏ । ଛାତ୍ରଛାତ୍ରୀଙ୍କ ପାଠପଢା ଏକ ପ୍ରକାର ଠପ ହୋଇପଡ଼େ । ଆମ୍ବୁଲାନ୍ସ ଯାଇ ପାରେ ନାହିଁ । ସମସ୍ୟା ସଂପର୍କରେ ଗ୍ରାମବାସୀ ଅନେକ ଥର ପ୍ରଶାସନର ଦୃଷ୍ଟି ଆକର୍ଷଣ କଲେଣି ହେଲେ ଫଳ ଶୂନ । ଅନ୍ୟପଟେ ଜଙ୍ଗଲ ପାଇଁ ରାସ୍ତା ନିର୍ମାଣ ହୋଇପାରିନାହିଁ । ଏନେଇ ବ୍ଲକ ପ୍ରଶାସନ ସହ ଯୋଗାଯୋଗ କରି ପଦକ୍ଷେପ ନିଆଯିବ ବୋଲି କହିଛନ୍ତି ସରପଞ୍ଚ ।

ପିପିଲି  : ଭତ୍ତା ପାଇଁ ହୀନସ୍ତା । ହିତାଧିକାରୀଙ୍କୁ ମିଳୁନି ଦୁଇ ମାସର ଭତ୍ତା ଟଙ୍କା । ଡହ ଡହ ଖରାରେ ବ୍ଲକ, ପଞ୍ଚାୟତ ଅଫିସ ଓ ବ୍ୟାଙ୍କକୁ ଦୌଡ଼ି ନିରାଶ ହୋଇ ଫେରୁଛନ୍ତି ହିତାଧିକାରୀ । ପିପିଲି ବ୍ଲକର ପ୍ରାୟ ୯ ହଜାର ହିତାଧିକାରୀଙ୍କ ଆକାଉଣ୍ଟକୁ ଯାଇନାହିଁ ଭତ୍ତା ଟଙ୍କା । କେନ୍ଦ୍ର ସରକାରଙ୍କ ପକ୍ଷରୁ ବ୍ୟାଙ୍କ ଖାତାକୁ ସିଧାସଳଖ ଯାଉଥିବା ହିତାଧିକାରୀଙ୍କ ଟଙ୍କା ଅଟକି ରହିଛି । ଫଳରେ ବହୁ ଅସୁବିଧାର ସମ୍ମୁଖୀନ ହେଉଛନ୍ତି ବୃଦ୍ଧ ଓ ବୃଦ୍ଧା । ହିତାଧିକାରୀଙ୍କୁ ଏକକାଳୀନ ଦୁଇ ମାସର ଭତ୍ତା ତୁରନ୍ତ ପ୍ରଦାନ କରିବାକୁ ଦାବି କରିଛନ୍ତି ବିଜେଡି ଜିଲ୍ଲା ପରିଷଦ ସଭ୍ୟ । ଅନ୍ୟପଟେ ଖୁବଶୀଘ୍ର ସମସ୍ୟାର ସମାଧାନ କରାଯିବ ବୋଲି କହିଛନ୍ତି ପିପିଲି ବିଡ଼ିଓ ।

ଫୁଲବାଣୀ : ହାଇକୋର୍ଟଙ୍କ ନିର୍ଦ୍ଦେଶକୁ ଫୁ’ । ଷ୍ଟେ ଅର୍ଡର ସତ୍ତ୍ଵେ ଜମିରେ ହେଉଛି କାମ । ଲୋକଙ୍କ ସରକାରରେ ଚାଷୀ ହଟହଟା । ବିନା ନୋଟିସରେ ୨୦ ଏକର ଜମିକୁ କରାଯାଇଛି ହଡ଼ପ । କନ୍ଧମାଳ ଜିଲ୍ଲା ବାଲିଗୁଡ଼ା NACରୁ ଆସିଛି ସାଂଘାତିକ ଅଭିଯୋଗ । ଦଣ୍ଡପଦର NH-୫୯ ନିକଟରେ ଥିବା ୨୦ ଏକର ଜମିକୁ ଦୀର୍ଘ ବର୍ଷ ତଳେ ତତ୍କାଳୀନ ସରକାର ୩୧ ଜଣ ଆଦିବାସୀଙ୍କୁ ଦେଇଥିଲେ । ସେହି ଜମିକୁ ତହସିଲଦାର ଚଞ୍ଚକତା କରି ଜଣେ ପ୍ରଭାବଶାଳୀ ବ୍ୟକ୍ତିଙ୍କ ନାମରେ କରିଦେଇଥିବା ଅଭିଯୋଗ ହୋଇଛି । ସେଠାରେ ମାଟି ପକାଇ ପେଟ୍ରୋଲ ପମ୍ପ କରାଯାଉଥିବା ଚାଷୀ ଅଭିଯୋଗ କରିଛନ୍ତି ।

ଦୀର୍ଘ ବର୍ଷ ଧରି ଚାଷ କରୁଥିବା ଚାଷୀଙ୍କ ହାତରୁ କିଭଳି ଚାଲିଗଲା ଜମି ? ବିନା ନୋଟିସରେ ଜମି ଅନ୍ୟ ନାଁରେ ହେଲା କେମିତି ? ଘଟଣାକୁ ନେଇ ହିତାଧିକାରୀ ମାନେ ଉପଜିଲ୍ଲାପାଳ ଓ ତହସିଲଦାରଙ୍କ ନିକଟରେ ଲିଖିତ ଅଭିଯୋଗ କରିଥିଲେ ସୁଦ୍ଧା କେହି ଶୁଣିଲେଣି । ଜିଲ୍ଲା ପ୍ରଶାସନ ପାଖରୁ ନିରାଶ ହୋଇ ହାଇକୋର୍ଟର ଦ୍ଵାରସ୍ଥ ହୋଇଥିଲେ ଚାଷୀ । ହାଇକୋର୍ଟ ଉକ୍ତ ଜାଗା ଉପରେ ଷ୍ଟେ ଅର୍ଡର ଲଗାଇକୁ ଜିଲ୍ଲା ପ୍ରଶାସନକୁ ନିର୍ଦ୍ଦେଶ ଦେଇଛନ୍ତି । ତଥାପି ପ୍ରଶାସନ ନିର୍ଦ୍ଦେଶନାମାକୁ ମାନୁ ନାହାନ୍ତି । ଚାଷ ଜମିକୁ କିଭଳି ହସ୍ତାନ୍ତର କରାଗଲା ? ହିତାଧିକାରୀଙ୍କୁ କୌଣସି ସୂଚନା ଦିଆଗଲା ନାହିଁ । ଯେଉଁ ଫାଇଲରେ ୩୧ ଜଣଙ୍କୁ ପଟ୍ଟା ଦିଆଯାଇଥିଲା । ଉକ୍ତ ଫାଇଲ ହଜିଯାଇଥିବା କହି ନୂଆ ଫାଇଲ ମାଧ୍ୟମରେ ଘୋଟାଲା କରାଯାଇଥିବା ଅଭିଯୋଗ ହୋଇଛି । କେବେ ଘଟଣାର ତଦନ୍ତ ହେଉଛି ? ଦୁର୍ନୀତିଖୋର ଅଧିକାରୀଙ୍କ ବିରୋଧରେ କେବେ କାର୍ଯ୍ୟାନୁଷ୍ଠାନ ନିଆଯାଉଛି ? ତାକୁ ହିଁ ଅପେକ୍ଷା ।

ଧର୍ମଗଡ : ମିଳୁନି ସରକାରୀ ପ୍ରୋତ୍ସାହନ । ସୂର୍ଯ୍ୟମୁଖୀ ଚାଷରୁ ବିମୁଖ ଚାଷୀ । ବିଜେଡି ସରକାରରେ କଳାହାଣ୍ଡି ଜିଲ୍ଲା ଧର୍ମଗଡ଼, ଗୋଲାମୁଣ୍ଡା ଓ ଜୁନାଗଡ଼ ବ୍ଲକର ୨୫ ଶହ ହେକ୍ଟର ଜମିରେ ଲହଡ଼ି ଭାଙ୍ଗୁଥିଲା ସୁନାର ଫସଲ । ଚାଷୀ ସ୍ଵଳ୍ପ ପରିଶ୍ରମ କରି ବେଶ ଲାଭବାନ ହେଉଥିଲେ । କୃଷି ବିଭାଗ ପକ୍ଷରୁ ଚାଷୀଙ୍କୁ ଇନପୁଟ ସବସିଡ଼ି ଯୋଗାଇ ଦିଆଯାଉଥିଲା । ହେଲେ ସରକାର ବଦଳିବା ପରେ ମିଳୁନି ସବସିଡ଼ି । ଫଳରେ ଚାଷୀ ସୂର୍ଯ୍ୟମୁଖୀ ଚାଷରୁ ମୁହଁ ଫେରାଉଥିବା ଅଭିଯୋଗ ।

ପୂର୍ବ ସରକାରରେ କିଏ ଦୁଇ ଏକର ତ ଆଉ କିଏ ପାଞ୍ଚ ଏକର ଜମିରେ ସୂର୍ଯ୍ୟମୁଖୀ ଚାଷ କରୁଥିଲେ । ପ୍ରୋତ୍ସାହନ ସହ ବିକ୍ରିବଟା ସୁବିଧା ନଥିବାରୁ ଚାଷୀ ଚଳିତ ବର୍ଷ ପୂର୍ବ ଭଳି ଚାଷ କରି ନାହାନ୍ତି । ନିଜ ଆବଶ୍ୟକତା ପୂରଣ ପାଇଁ ଅଳ୍ପ ଜମିରେ ଚାଷ କରିଛନ୍ତି । ଅନ୍ୟପଟେ ଚାଷୀଙ୍କୁ ବିହନ ଯୋଗାଇ ଦିଆଯାଇଛି । ଆହୁରି ସରକାରୀ ସୁବିଧା ପାଇବେ ବୋଲି କହିଛନ୍ତି ଜିଲ୍ଲା କୃଷି ଅଧିକାରୀ । ପୂର୍ବ ସରରାକଙ୍କ ଉଦ୍ୟମରେ କଳାହାଣ୍ଡି ଜିଲ୍ଲାର ଚାଷୀ ବିକାଶର ମାଇଲ ଖୁଣ୍ଟ ଚଢୁଥିଲେ । ଧାନ କପା ଓ ମକା ପରେ ସୂର୍ଯ୍ୟମୁଖୀ ଚାଷ କରି ସ୍ଵାବଲମ୍ବୀ ହେଉଥିଲେ । ଏବେ ନିରାଶ ହୋଇ ହାତ ବାନ୍ଧି ବସୁଥିବା ଅଭିଯୋଗ ହୋଇଛି ।…

ଭୁବନେଶ୍ବର : ଗଂଜାମ କବିସୂର୍ଯ୍ୟନଗର ହାଜତ ମୃତ୍ୟୁ ଅଭିଯୋଗ ନେଇ ବର୍ଷିଛନ୍ତି ବିଜେଡି ସଂସଦୀୟ ଦଳ ନେତା ମାନସ ରଂଜନ ମଙ୍ଗରାଜ। ସୋସିଆଲ ମିଡିଆରେ ସେ ପୋଷ୍ଟ କରିଛନ୍ତି, ହାଜତ ମୃତ୍ୟୁ କେବଳ ଏକ ଅପରାଧ ନୁହେଁ, ଏହା ହେଉଛି ସମ୍ବିଧାନର ଧାରା ୨୧ ପ୍ରଦାନ କରିଥିବା ଜୀବନ ପ୍ରତି ଅଧିକାର ଓ ବ୍ୟକ୍ତିଗତ ସ୍ଵାଧୀନତା ଭଳି ମୌଳିକ ସାମ୍ଵିଧାନିକ ଅଧିକାରର ଉଲ୍ଲଂଘନ । ଯେତେବେଳେ ପୋଲିସ ହାଜତରେ ଜଣକର ମୃତ୍ୟୁ ହୁଏ, ଏହା ଦେଶର ଆଇନ ବ୍ୟବସ୍ଥା, ମାନବିକ ସମ୍ମାନ ଉପରେ ପ୍ରଶ୍ନ ଉଠାଇଥାଏ। ଗଂଜାମ ଜିଲ୍ଲାରେ ପୋଲିସ ହାଜତରେ ଜଣେ ଯୁବକଙ୍କ ମୃତ୍ୟୁ ହେଉଛି ମାନବିକ ଅଧିକାର ଉଲ୍ଲଂଘନର ସବୁଠୁ ଖରାପ ନିଦର୍ଶନ। ଓଡ଼ିଶା ସରକାର ଏହାର ସ୍ଵଚ୍ଛ ଓ ନିରପେକ୍ଷ ତଦନ୍ତ କରାନ୍ତୁ। ଯିଏ ବି ଦାୟୀ ହୋଇଥାଉ, ତା ବିରୋଧରେ କଡ଼ା ଆକ୍ସନ ନିଆଯାଉ ବୋଲି ଦାବି କରିଛନ୍ତି ମାନସ ରଂଜନ ମଙ୍ଗରାଜ।