ବଣାଇ : ଯାତ୍ରୀବାହୀ ବସ ସହ ଟ୍ରକ ମୁହାଁମୁହିଁ ଧକ୍କା। ବଣାଇ ଟିକାୟତପାଲି ଥାନା ଯାତ୍ରାଖମଣ ନିକଟରେ ଘଟିଛି ଦୁର୍ଘଟଣା। ୮ ରୁ ଅଧିକ ଯାତ୍ରୀ ଆହତ ହୋଇଛନ୍ତି। ଆହତ ଯାତ୍ରୀ ରାଉରକେଲା ଡାକ୍ତରଖାନାରେ ଭର୍ତ୍ତି। ବସ୍ ଭୁବନେଶ୍ବରରୁ ରାଉରକେଲା ଆସୁଥିବା ବେଳେ ଯାତ୍ରାଖମଣ ନିକଟରେ ଦୁର୍ଘଟଣା ଘଟିଥିଲା। ବସରେ ୪୦ ଯାତ୍ରୀ ଥିବା ସୂଚନା। ଟିକାୟତପାଲି ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି l
ଆଜି ମହାପ୍ରଭୁଙ୍କ ବନକଲାଗି , ସନ୍ଧ୍ୟା ୬ଟାରୁ ରାତି ୯ଟା ପର୍ଯ୍ୟନ୍ତ ବନ୍ଦ ରହିବ ସାଧାରଣ ଦର୍ଶନ
ପୁରୀ : ଆଜି ମହାପ୍ରଭୁଙ୍କ ବନକଲାଗି ନୀତି । ମାଘ ଶୁକ୍ଳ ଦ୍ଵାଦଶୀ ତିଥିରେ ଶ୍ରୀମନ୍ଦିରରେ ଶ୍ରୀବିଗ୍ରହମାନଙ୍କ ବନକଲାଗି ନୀତି ଅନୁଷ୍ଠିତ ହେବ। ଏଥିପାଇଁ ସନ୍ଧ୍ୟା ୬ଟାରୁ ରାତି ୯ଟା ପର୍ଯ୍ୟନ୍ତ ସାଧାରଣ ଦର୍ଶନ ବନ୍ଦ ରହିବ । ବନକଲାଗି ନୀତି ଅତ୍ୟନ୍ତ ଗୁପ୍ତ ନୀତି ହୋଇଥିବାରୁ ଏହି ସମୟରେ ଚତୁର୍ଦ୍ଧା ମୂରତିଙ୍କ ସାଧାରଣ ଭକ୍ତ ଦର୍ଶନ କରିପାରିବେ ନାହିଁ । କିନ୍ତୁ ପାର୍ଶ୍ଵ ଦେବାଦେବୀଙ୍କୁ ଦର୍ଶନର ସୌଭାଗ୍ୟ ପାଇବେ ଭକ୍ତ ଶ୍ରଦ୍ଧାଳୁ। ଏନେଇ ଶ୍ରୀମନ୍ଦିର ପ୍ରଶାସନ ପକ୍ଷରୁ ସୂଚନା ଦିଆଯାଇଛି ।
ବନକଲାଗି ନୀତି ନୀତି ପାଇଁ ଜୟ ବିଜୟ ଦ୍ୱାର ବନ୍ଦ ରହିବ। ଦ୍ୱିପ୍ରହର ଧୂପ ସରିବା ପରେ ଦତ୍ତମହାପାତ୍ର ସେବକମାନେ ମହାପ୍ରଭୁଙ୍କ ଶ୍ରୀମୁଖ ଶୃଙ୍ଗାର କରିବେ। ଏଥିପାଇଁ ଦତ୍ତମହାପାତ୍ର ସେବକ ପ୍ରାକୃତିକ ରଙ୍ଗ ପ୍ରସ୍ତୁତ କରିଥାନ୍ତି। ଦତ୍ତମହାପାତ୍ର ସେବକମାନେ ପ୍ରାକୃତିକ ପ୍ରଣାଳୀରେ ପ୍ରସ୍ତୁତ ପ୍ରସାଧାନରେ ଶ୍ରୀବିଗ୍ରହମାନଙ୍କ ଶ୍ରୀମୁଖକୁ ଶୃଙ୍ଗାର କରିବେ। ହିଙ୍ଗୁଳ, ହରିତାଳ, କସ୍ତୁରୀ, ନାଲି, ଧଳା ଓ କଳା ଭଳି ପାରମ୍ପରିକ ରଙ୍ଗରେ ମହାପ୍ରଭୁଙ୍କ ଶ୍ରୀମୁଖ ଶୃଙ୍ଗାର କରାଯିବ।
ପୁଣି ତେଜିଲା ଚାଷୀ ଆନ୍ଦୋଳନ, ଆଜିଠାରୁ ଆହୁରି ଜୋରଦାର କରିବାକୁ କୃଷକ ସଂଗଠନର ଆହ୍ଵାନ
ନୂଆଦିଲ୍ଲୀ : ଆଜିଠୁ ପୁଣି ଦିଲ୍ଲୀ ସୀମାନ୍ତ ସିଙ୍ଘୁ ବର୍ଡରେ ଜୋର ଧରିବ ଚାଷୀ ଆନ୍ଦୋଳନ। ଦିଲ୍ଲୀ ଚଲୋ ଡାକରା ଦେଇ ସିଙ୍ଘୁ ଓ ଟିକିରି ସୀମାରେ ଏକାଠି ହୋଇଛନ୍ତି ୧୦ ହଜାରରୁ ଅଧିକ ଚାଷୀ। ଆଜିଠାରୁ ଆନ୍ଦୋଳନକୁ ଜୋରଦାର କରିବାକୁ ସଂଯୁକ୍ତ କୃଷକ ମୋର୍ଚ୍ଚା ଚେତାବନୀ ଦେଇଛି।
ଏମଏସପି ଗାରେଣ୍ଟି ନେଇ କେନ୍ଦ୍ରର ଚୁକ୍ତି ପ୍ରସ୍ତାବକୁ ଚାଷୀସଂଗଠନ ପ୍ରତ୍ୟାଖାନ ପରେ ଆନ୍ଦୋଳନକୁ ଜୋରଦାର କରିବାକୁ ନିଷ୍ପତ୍ତି ନେଇଛନ୍ତି କୃଷକ ସଂଗଠନ। ଟ୍ରାକ୍ଟର ଧରି ସିଂଘୁ ସୀମାରେ ଏକାଠି ହେଉଛନ୍ତି ଚାଷୀ। ପୂର୍ବରୁ ରଖିଥିବା ଦାବି ପୂରଣ ନହେଲେ ଧାରଣା ଜାରି ରଖିବାକୁ ଦେଇଛନ୍ତି ଚେତାବନୀ।
ସେପଟେ ହରିୟାଣାରେ ଚାଷୀ ଆନ୍ଦୋଳନକୁ ନେଇ ଜାରି ହୋଇଥିଲା କଟକଣା। ଗତକାଲି ପର୍ଯ୍ୟନ୍ତ ଏକାଧିକ ଜିଲ୍ଲାରେ ମୋବାଇଲ ସେବା ସହ ଇଣ୍ଟନରେଟ ବନ୍ଦ ରହିଥିଲା। କୃଷକ ଆନ୍ଦୋଳନକୁ ଅଧିକ ଶକ୍ତିଶାଳୀ କରିବା ଲାଗି ଆସନ୍ତା ୨୨ ତାରିଖରେ ଦିଲ୍ଲୀରେ ବୈଠକ ବସିବ ବୋଲି ଘୋଷଣା କରାଯାଇଛି ।
ରାଜ୍ଯରେ ବଢୁଛି ଗ୍ରୀଷ୍ମ ପ୍ରବାହ,ଆସନ୍ତାକାଲି ପର୍ଯ୍ୟନ୍ତ ମିଳିବନି ନିସ୍ତାର
ଭୁବନେଶ୍ୱର : ରାଜ୍ଯରେ ବଢୁଛି ଗ୍ରୀଷ୍ମ ପ୍ରବାହ । ଭୁବନେଶ୍ବର ସମେତ ପଶ୍ଚିମ ଓଡ଼ିଶାରେ ପ୍ରବଳ ତାତି । ଆସନ୍ତା କାଲି ପର୍ଯ୍ୟନ୍ତ ତାତିରୁ ମିଳିବନି ନିସ୍ତାର । ଅଧିକାଂଶ ସହରର ତାପମାତ୍ରା ୩୫ ରୁ ୩୭ ଡିଗ୍ରୀ ହେବାନେଇ ନେଇ ଆକଳନ କରିଛି ଆଞ୍ଚଳିକ ପାଣିପାଗ କେନ୍ଦ୍ର । ମେଘମୁକ୍ତ ଆକାଶ ସହ ଶୁଖିଲା ପାଗ ପାଇଁ ରାଜ୍ୟରେ ହଠାତ୍ ବୃଦ୍ଧି ପାଇଛି ତାପମାତ୍ରା । ଗତକାଲି ଭୁବନେଶ୍ବର ରାଜ୍ଯର ସବୁଠାରୁ ଉତ୍ତପ୍ତ ସହର ହୋଇଥିଲା ।
ଚଳିତବର୍ଷ ପ୍ରଥମଥର ପାଇଁ ୩୭ ଡିଗ୍ରୀ ଛୁଇଁଥିଲା ରାଜଧାନୀର ତାପମାତ୍ରା । କାଲି ପରେ ରାଜ୍ୟରେ ପାଗ ବଦଳିବା ସମ୍ଭାବନା ରହିଛି । ପଶ୍ଚିମା ଝଡ ପ୍ରଭାବରେ ଉତ୍ତର ଆଭ୍ୟନ୍ତରୀଣ ଓଡ଼ିଶାର କିଛି ଜିଲ୍ଲାରେ ହାଲୁକା ବର୍ଷା ହୋଇପାରେ । କାଲିଠୁ ୨୬ ତାରିଖ ପର୍ଯ୍ୟନ୍ତ ବର୍ଷା ନେଇ ଆକଳନ କରାଯାଇଥିବା ବେଳେ ୨୪ ତାରିଖରେ ସର୍ବାଧିକ ପ୍ରଭାବ ରହିବା ସମ୍ଭାବନା ରହିଛି । ବିଶେଷ କରି ଦକ୍ଷିଣ ଉପକୂଳ ଓଡ଼ିଶା ସମେତ କନ୍ଧମାଳ, ଜଗତସିଂହପୁର, କେନ୍ଦ୍ରାପଡା, କଟକ, କୋରାପୁଟ, ମାଲକାନଗିରି, ରାୟଗଡା ଏବଂ ବୌଦ୍ଧରେ ହାଲୁକାରୁ ମଧ୍ୟମ ଧରଣର ବର୍ଷା ହେବ । ବର୍ଷା ହେଲେ ମଧ୍ୟ ରାତିର ତାପମାତ୍ରାରେ କୌଣସି ପରିବର୍ତ୍ତନ ହେବ ନାହିଁ ବୋଲି ଆକଳନ କରିଛି ପାଣିପାଗ ବିଭାଗ ।
ବାରବାଟୀ ଷ୍ଟାଡିୟମ ପ୍ରକଳ୍ପର ସମୀକ୍ଷା କଲେ 5T ଅଧ୍ୟକ୍ଷ
କଟକ : ଆଗାମୀ ତିନି ବର୍ଷ ମଧ୍ଯରେ ବିଶ୍ବସ୍ତରୀୟ କ୍ରିକେଟ ଷ୍ଟାଡିୟମର ମାନ୍ୟତା ପାଇବ ଐତିହାସିକ ବାରବାଟୀ ଷ୍ଟାଡିୟମ । 5T ଅଧ୍ୟକ୍ଷ କାର୍ତ୍ତିକ ପାଣ୍ଡିଆନ ଆଜି ବାରବାଟୀ ଷ୍ଟାଡିୟମ ବୁଲି ନୂଆ ପ୍ରକଳ୍ପର ବ୍ଲୁପ୍ରିଣ୍ଟ ଦେଖିଥିଲେ। ଏଥି ସହିତ ପିଚ, ଗ୍ରାଉଣ୍ଡ, ଗ୍ୟାଲେରୀର ସ୍ଥିତି ଅନୁଧ୍ୟାନ କରିଥିଲେ। ସାଥିରେ ବିଜେଡିର ସାଂଗଠନିକ ସଂପାଦକ ତଥା ଓସିଏ ସଭାପତି ପ୍ରଣବ ପ୍ରକାଶ ଦାସ, ଓସିଏ ସମ୍ପାଦକ ସଂଜୟ ବେହେରା ,କ୍ରୀଡା ସଚିବ ଭିନିଲ କ୍ରୀଷ୍ଣା ଷ୍ଟାଡିୟମ ବୁଲି ଦେଖିଥିଲେ।
ପିଚ ଉପରେ ପାଣ୍ଡିଆନ ରଣଜୀ ଖେଳାଳି ଓ ଗ୍ରାଉଣ୍ଡ ଷ୍ଟାଫଙ୍କ ସହ ଆଲୋଚନା କରିଥିଲେ। ଏହି ପ୍ରକଳ୍ପର ଭିତ୍ତିପ୍ରସ୍ତର ଆସନ୍ତା 27 ତାରିଖରେ ମୁଖ୍ୟମନ୍ତ୍ରୀ କରିବେ। ପରେ ତିନି ବର୍ଷ ମଧ୍ଯରେ ଷ୍ଟାଡିୟମ କାମ ଶେଷ ହେବ । ନବୀକରଣ ପ୍ରକଳ୍ପ ଅଧିନରେ ବାରବାଟୀର ପୁରୁଣା ଗ୍ୟାଲେରୀ ସବୁ ଭଙ୍ଗା ହୋଇ ନୂଆ ହେବ। ପରେ ପୁରା ଷ୍ଟାଡିୟମରେ ଦର୍ଶକ ପାଇଁ ୬୦ ହଜାର ନୂଆ ଚେୟାର ଲାଗିବ।
ଏଥି ସହିତ ପଡିଆ ଭିତରର ସୌନ୍ଦର୍ଯ୍ୟକରଣ ହେବ। ଏଥି ସହିତ ଡ୍ରେସିଂ ରୁମ, ଜିମ, ସୁଇମିଂ ପୁଲ, ଇଣ୍ଡୋର ଗେମର ବ୍ୟବସ୍ଥା ହେବ। ଏଥି ସହିତ ଷ୍ଟାଡିୟମ ବାହାରର ସୌନ୍ଦର୍ଯ୍ୟକରଣ ସହ ଅନ୍ଯାନ୍ଯ ଖେଳର ଭିତ୍ତିଭୂମି ବିକାଶ କରାଯିବ। ଷ୍ଟାଡିୟମର ନବୀକରଣ ପ୍ରକଳ୍ପ ନେଇ ଖୁସି ପ୍ରକଟ କରିଛନ୍ତି କ୍ରୀଡା ସଂଗଠକ।
ଆଜି ଆଉ ୫ ଜିଲ୍ଲାରେ ଗଡ଼ିବ ଲକ୍ଷ୍ମୀ ବସ୍
ବାଲେଶ୍ବର : ଲକ୍ଷ୍ମୀ ଯୋଜନାରେ ଆଜି ଯୋଡ଼ିହେବ ଆଉ ୫ଟି ଜିଲ୍ଲା । ବାଲେଶ୍ବର, ନୂଆପଡ଼ା, ବୌଦ୍ଧ, ଗଞ୍ଜାମ ଓ ଜଗତସିଂହପୁର ଜିଲ୍ଲାରେ ଆଜିଠୁ ଗଡ଼ିବ ଲକ୍ଷ୍ମୀ ବସ । ମୁଖ୍ଯମନ୍ତ୍ରୀ ନବୀନ ପଟ୍ଟନାୟକ ଏହି ଜିଲ୍ଲାରେ ଲକ୍ଷ୍ମୀ ବସ୍ ଯୋଜନାର ଶୁଭାରମ୍ଭ କରିବେ । ଗାଁ ଲୋକମାନେ ଲକ୍ଷ୍ମୀ ବସ୍ ଜରିଆରେ ସୁବିଧାରେ ଏବଂ କମ ଖର୍ଚ୍ଚରେ ସେମାନଙ୍କର ଦୈନନ୍ଦିନ କାର୍ଯ୍ୟ କରିପାରିବେ । ଲକ୍ଷ୍ମୀ ଯୋଜନା ଲୋକଙ୍କ ଇଚ୍ଛାରୁ କାର୍ଯ୍ୟକାରୀ କରାଯାଇଛି।
5T ଅଧ୍ୟକ୍ଷ ତଥା ମୁଖ୍ୟମନ୍ତ୍ରୀ କାର୍ଯ୍ୟାଳୟର ଜିଲ୍ଲାଗସ୍ତ ପରେ ଲୋକଙ୍କ ଅସୁବିଧାକୁ ଅନୁଭବ କରିଥିଲା । ଏବଂ ଲୋକଙ୍କ ପ୍ରସ୍ତାବକୁ ଅନୁଶୀଳନ କରି ଗାଁ ଲୋକଙ୍କର ଯୋଗାଯୋଗ ସମସ୍ୟା ଦୂର କରିବା ପାଇଁ ଲକ୍ଷ୍ମୀ ବସ୍ ଯୋଜନା ପ୍ରସ୍ତୁତ କରାଯାଇଥିଲା । ଯୋଜନାରେ ପଞ୍ଚାୟତରୁ ବ୍ଲକକୁ ବସ୍ ଚଳାଚଳର ସୁବିଧା କରାଯାଇଛି। ସାରା ରାଜ୍ୟରେ ୧୦୦୦ରୁ ଅଧିକ ବସ୍ ଚାଲିବ। 5T ଯୋଜନାରେ ଆରମ୍ଭ ହୋଇଥିବା ଏହି କାର୍ଯ୍ୟକ୍ରମରେ ମିଶନ ଶକ୍ତି ମା’ମାନଙ୍କୁ ବସ୍ ପରିଚଳନା ଦାୟିତ୍ୱ ଦିଆଯାଇଛି ।
ଲକ୍ଷ୍ମୀ ବସ୍ ଲୋକଙ୍କୁ ଲୋକଙ୍କ ସହିତ ଯୋଡିବ। ସାମାଜିକ ଓ ଆର୍ଥିକ ଜୀବନକୁ ମଜବୁତ କରିବ। ପିଲାଙ୍କୁ ସ୍କୁଲ କଲେଜ ନେବ। ଚାଷୀଙ୍କୁ ମାର୍କେଟ ସହିତ ଯୋଡିବ। ମା’ମାନେ ଓ ଛାତ୍ରଛାତ୍ରୀମାନେ ମାତ୍ର ୫ ଟଙ୍କା ମୂଲ୍ୟରେ ଏହି ବସ୍ ରେ ଯିବା ଆସିବା କରିପାରିବେ ।
ପୁତ୍ର ସନ୍ତାନର ବାପା ହେଲେ କୋହଲି
ନନ୍ଦିଘୋଷ ବ୍ୟୁରୋ: ପୁଣି ଥରେ ବାପା ହେଲେ ବିରାଟ କୋହଲି। ପତ୍ନୀ ଅନୁଷ୍କା ଶର୍ମା ଏକ ପୁତ୍ର ସନ୍ତାକୁ ଜନ୍ମ ଦେଇଛନ୍ତି । ଗତ ୧୫ ତାରିଖରେ ଉଭୟଙ୍କ ପୁତ୍ର ସନ୍ତାନ ଜନ୍ମ ହୋଇଥିବା ନେଇ ବିରାଟ ଇନଷ୍ଟାରେ ସୂଚନା ଦେଇଛନ୍ତି । ତାଙ୍କ ପୁଅର ନାଁ ରହିଛି ଅକାୟ । ଏହି ଖବର ଆସିବା ପରେ କ୍ରିକେଟ ଷ୍ଟାର ବିରାଟ ଏବଂ ଅଭିନେତ୍ରୀ ଅନୁଷ୍କାଙ୍କ ଲାଗି ଶୁଭେଚ୍ଛାର ସୁଅ ଛୁଟୁଛି। ଅନୁଷ୍କା ଗର୍ଭବତୀ ଥିବା ଖବର ଦକ୍ଷିଣ ଆଫ୍ରିକାର କ୍ରିକେଟର ଏବି ଡିଭିଲିୟର ଏକ ସାକ୍ଷାତକାରରେ ଖୁଲାସା କରିଥିଲେ । ପୂର୍ବରୁ ବିରାଟ ଓ ଅନୁଷ୍କାଙ୍କର ଏକ କନ୍ଯା ସନ୍ତାନ ରହିଛି । ତାଙ୍କ ଝିଅର ନାଁ ହେଉଛି ଭାମିକା । ବିରାଟ ଓ ଅନୁଷ୍କା ୨୦୧୭ରେ ବିବାହ କରିଥିଲେ ।
ମୁଖ୍ଯମନ୍ତ୍ରୀଙ୍କୁ ଭେଟିଲେ ବିଜୟୀ ରାଜ୍ୟସଭା ପ୍ରାର୍ଥୀ ଦେବାଶିଷ ସାମନ୍ତରାୟ ଓ ଶୁଭାଶିଷ ଖୁଣ୍ଟିଆ
ଭୁବନେଶ୍ବର: ମୁଖ୍ଯମନ୍ତ୍ରୀଙ୍କୁ ଭେଟିଲେ ବିଜୟୀ ରାଜ୍ୟସଭା ପ୍ରାର୍ଥୀ । ନବୀନ ନିବାସ ଯାଇଁ ମୁଖ୍ଯମନ୍ତ୍ରୀ ନବୀନ ପଟ୍ଟନାୟକଙ୍କୁ ସାକ୍ଷାତ କରିଛନ୍ତି ବିଜୟୀ ପ୍ରାର୍ଥୀ ଦେବାଶିଷ ସାମନ୍ତରାୟ ଓ ଶୁଭାଶିଷ ଖୁଣ୍ଟିଆ । 5T ଅଧ୍ଯକ୍ଷ କାର୍ତ୍ତିକ ପାଣ୍ଡିଆନଙ୍କୁ ମଧ୍ଯ ଉଭୟ ସାକ୍ଷାତ କରିଥିଲ । ରାଜ୍ଯସଭାକୁ ପଠାଇଥିବାରୁ ସେମାନେ ମୁଖ୍ଯମନ୍ତ୍ରୀଙ୍କୁ କୃତଜ୍ଞତା ଜଣାଇଛନ୍ତି । ରାଜ୍ଯ ସ୍ବାର୍ଥ ପାଇଁ ସଂସଦରେ ସ୍ବର ଉତ୍ତୋଳନ କରିବାକୁ ଉଭୟଙ୍କୁ ପରାମର୍ଶ ଦେଇଛନ୍ତି ମୁଖ୍ଯମନ୍ତ୍ରୀ । ଆଜି ପ୍ରାର୍ଥିପତ୍ର ପତ୍ଯାହାରର ସମୟସୀମା ସରିବା ପରେ ଓଡ଼ିଶାର ୩ ରାଜ୍ଯସଭା ପ୍ରାର୍ଥୀଙ୍କୁ ନିର୍ଦ୍ବନ୍ଦ୍ବରେ ନିର୍ବାଚିତ ଘୋଷଣା କରିଥିଲେ ରିଟର୍ଣ୍ଣିଂ ଅଫିସଲ । ଦେବାଶିଷ ସାମନ୍ତରାୟ, ଶୁଭାଶିଷ ଖୁଣ୍ଟିଆ ଓ ଅଶ୍ବିନୀ ବୈଷ୍ଣବ ରାଜ୍ଯସଭାକୁ ନିର୍ବାଚିତ ହୋଇଛନ୍ତି । ନିର୍ବାଚିତ ହେବାପରେ ଦେବାଶିଷ କହିଛନ୍ତି ସଂଘୀୟ ବ୍ୟବସ୍ଥାରେ କେନ୍ଦ୍ରରେ ରାଜ୍ୟ ସ୍ବାର୍ଥ କଥା ଉଠାଯିବ । ଓଡ଼ିଶାକୁ ସ୍ଵତନ୍ତ୍ର ରାଜ୍ୟ ମାନ୍ୟତା ଦେବାକୁ ମୁଖ୍ୟମନ୍ତ୍ରୀ ଦାବି କରି ଆସିଛନ୍ତି । ସେ ଦାବିକୁ ଜୋରଦାର କରିବା ସହ ବିଜୁ ବାବୁଙ୍କୁ ଭାରତ ରତ୍ନ କଥା ବି ଗୃହରେ ଉଠାଇବୁ। ଅନ୍ଯପଟେ ଶ୍ରୀକ୍ଷେତ୍ର ସହ ଓଡ଼ିଶାର ସ୍ବାର୍ଥ ପାଇଁ ସଂଘୀୟ ବ୍ୟବସ୍ଥାରେ ଦିଲ୍ଲୀରେ ଦାବି ଉପସ୍ଥାପନ କରିବୁ ବୋଲି କହିଛନ୍ତି ଶୁଭାଶିଷ ଖୁଣ୍ଟିଆ ।
ଦେଶରେ ବେକାରୀ ୪୫ବର୍ଷର ରେକର୍ଡ ଭାଙ୍ଗିଲା
ନନ୍ଦିଘୋଷ ବ୍ୟୁରୋ: ଦେଶର ଅଭିବୃଦ୍ଧିକୁ ନେଇ କେନ୍ଦ୍ର ଡିଣ୍ଡିମ ପିଟୁଛି । ହେଲେ ଅଭିବୃଦ୍ଧି ସହିତ ତାଳ ଦେଇ ସୃଷ୍ଟି ହେଉନି ରୋଜଗାର । ବେକାରୀ ସଂଖ୍ୟା ଉତ୍କଟ । ଆଇଆଇଏମ୍ ଲକ୍ଷ୍ନୌ, ବିର୍ଲା ବୈଷୟିକ ପ୍ରତିଷ୍ଠାନ ଓ ଭାରତ ସରକାରଙ୍କ କୃଷି ମନ୍ତ୍ରାଳୟର ଗବେଷଣାରୁ ଜଣାପଡ଼ିଛି, ଅପାଠୁଆ ବେକାରୀଙ୍କଠୁ ଶିକ୍ଷିତ ବେକାରୀଙ୍କ ସଂଖ୍ୟା ଢେର ଅଧିକ। ଦେଶରେ ଏଭଳି ସ୍ଥିତି ଥିବାବେଳେ ଓଡ଼ିଶା ଭଲ ସ୍ଥିତିରେ ରହିଛି। ଗତ ୧୦ ବର୍ଷରେ ରାଜ୍ୟର ମୁଣ୍ଡପିଛା ଆୟ ୩ ଗୁଣ ବୃଦ୍ଧି ପାଇଛି ।
ଦେଶରେ ବେକାରୀ ୪୫ବର୍ଷର ରେକର୍ଡ ଭାଙ୍ଗିଲା । ଏଭଳି ରିପୋର୍ଟ ଦେଇଥିଲା ଜାତୀୟ ସାମ୍ପୁଲ ସର୍ଭେ ଅଫିସ୍-ଏନ୍ଏସ୍ଏସ୍ଓ । ଆଇଆଇଏମ୍ ଲକ୍ଷ୍ନୌ, ବିର୍ଲା ବୈଷୟିକ ପ୍ରତିଷ୍ଠାନ ଓ ଭାରତ ସରକାରଙ୍କ କୃଷି ମନ୍ତ୍ରାଳୟର ମିଳିତ ରିପୋର୍ଟ । ବେକାରୀ ହାର ନକମି ନେଲାଣି ଉତ୍କଟ ରୂପ । ୫୫ କୋଟି ରୋଜଗାରକ୍ଷମ ବ୍ୟକ୍ତିଙ୍କ ଭିତରେ ୫୪.୯ ପ୍ରତିଶତ ଆତ୍ମ ନିଯୁକ୍ତି ଦ୍ବାରା ରୋଜଗାର ସୃଷ୍ଟି କରୁଥିବାବେଳେ ୨୨.୮ ପ୍ରତିଶତ ନିୟମିତ ରୋଜଗାର ଏବଂ ୨୨.୩ ପ୍ରତିଶତ ବେଳେ ବେଳେ ରୋଜଗାର ପାଉଛନ୍ତି । ଦେଶର ଅଭିବୃଦ୍ଧି ହେଉଛି ବୋଲି କେନ୍ଦ୍ର ସରକାର ଡିଣ୍ଡିମ ପିଟୁଛନ୍ତି । କିନ୍ତୁ ଅଭିବୃଦ୍ଧି ସହିତ ତାଳ ଦେଇ ରୋଜଗାର ସୃଷ୍ଟି ହେଉନି । ଅପାଠୁଆ ଓ ଦର ଶିକ୍ଷିତଙ୍କ ତୁଳନାରେ ଉଚ୍ଚଶିକ୍ଷିତଙ୍କ ବେକାରୀ ସଂଖ୍ୟା ଦେଶରେ ଅଧିକ। ୧୫ରୁ ୨୯ ବର୍ଷ ବୟସର ଶିକ୍ଷିତ ବେକାରୀଙ୍କ ସଂଖ୍ୟା ୧୪.୭୩ ପ୍ରତିଶତ । ଖାଲି ସେତିକି ନୁହେଁ, ପୁରୁଷଙ୍କ ତୁଳନାରେ ମହିଳାଙ୍କ ନିଯୁକ୍ତି ବହୁତ କମ୍ । ସିଏମ୍ଆଇଇ ରିପୋର୍ଟ ଅନୁଯାୟୀ, ଗୁଣାତ୍ମକ ନିଯୁକ୍ତି ଦେବାରେ ଭାରତ ବହୁ ତଳେ ରହିଛି । ଅବସ୍ଥା ଏପରି ହୋଇଛି ନିର୍ମାଣ କାର୍ଯ୍ୟ ଓ ନର୍ସିଂ କ୍ଷେତ୍ରରେ ନିଯୁକ୍ତି ପାଇଁ ଭାରତ ସରକାର ତାଇଓ୍ବାନ୍ ଓ ଇସ୍ରାଏଲ ସରକାରଙ୍କ ସହ କଥା ହେଉଛନ୍ତି । ଏପରିକି ଚଳିତମାସରେ ତାଇଓ୍ବାନ୍ ସରକାରଙ୍କ ସହ ସ୍ବାକ୍ଷରିତ ହୋଇଛି ବୁଝାମଣା ପତ୍ର ।
ଜାତୀୟ ବେକାରୀ ହାରଠାରୁ ଢେର ଭଲ ସ୍ଥିତିରେ ରହିଛି ଓଡ଼ିଶା । ଖାଦ୍ୟଶସ୍ୟ ନିଅଣ୍ଟିଆ ରାଜ୍ୟରୁ ଖାଦ୍ୟ ବଳକା ରାଜ୍ୟରେ ପରିଣତ ହୋଇଛି। ଇସ୍ପାତ ଶିଳ୍ପଠାରୁ ଆରମ୍ଭ କହି ବିଶ୍ବର ବୃହତ୍ତମ ଆମୋନିଆ ପ୍ଲାଣ୍ଟ, ଗ୍ରୀନ ହାଇଡ୍ରୋଜେନ୍ ଆଧାରିତ ଇସ୍ପାତ ପ୍ଲାଣ୍ଟ୍, ବହୁରାଷ୍ଟ୍ରୀୟ ଆଇଟି କମ୍ପାନୀ, ମିଶନ ଶକ୍ତି ମହିଳାଙ୍କ ଆତ୍ମନିଯୁକ୍ତିରେ ଯୋଡ଼ିଛି ନୂଆ ଅଧ୍ୟାୟ । ସହରାଞ୍ଚଳରେ ଶ୍ରମଜୀବୀଙ୍କ ପାଇଁ ମୁକ୍ତା ଯୋଜନାଠୁ ଆରମ୍ଭ କରି ଉଠାଦୋକାନୀଙ୍କ ପର୍ଯ୍ୟନ୍ତ ସମସ୍ତଙ୍କୁ ରୋଜଗାର ଦେବା ପାଇଁ ବ୍ୟବସ୍ଥା କରିଛନ୍ତି ସରକାର । ବିଶ୍ବ ଦକ୍ଷତା ବିକାଶ କେନ୍ଦ୍ର, ବ୍ୟାଟେରି ଗାଡ଼ି ଉତ୍ପାଦନ ପ୍ଲାଣ୍ଟ ପାଇଁ ପୁଞ୍ଜି ଆକୃଷ୍ଟି କରିପାରିଛି ଓଡ଼ିଶା । ରାଜ୍ୟରେ ସ୍ଥିର ସରକାର ଓ ଦୂରଦୃଷ୍ଟି ସମ୍ପନ୍ନ ଭିଜନ ଯୋଗୁ ଏକଥା ସମ୍ଭବ ହୋଇପାରିଛି । ଗତ ୧୦ ବର୍ଷ ଭିତରେ ରାଜ୍ୟରେ ମୁଣ୍ଡପିଛା ଆୟ ୩ ଗୁଣା ବୃଦ୍ଧି ପାଇଛି ।
ଦୀର୍ଘ ବର୍ଷର ଜମିଜମା ସମସ୍ୟାର ହେଲା ସମାଧାନ
ନନ୍ଦିଘୋଷ ବ୍ୟୁରୋ: ଦୀର୍ଘ ବର୍ଷର ଜମିଜମା ସମସ୍ୟାର ହେଲା ସମାଧାନ। ସିକିମ ସ୍ବତ୍ତ୍ବ ରୟତ ଚାଷୀଙ୍କୁ ମିଳିଲା ଜମି ପଟ୍ଟା। ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ମଙ୍ଗଳବାର ଏକ ସ୍ୱତନ୍ତ୍ର ସମାରୋହରେ ପ୍ରଥମ ଦିନରେ ୨୬ଟି ଜିଲ୍ଲାର ଦଶ ହଜାର ସିକିମ ରୟତ ଚାଷୀଙ୍କୁ ଜମି ପଟ୍ଟା ବଣ୍ଟନ କରିଛନ୍ତି। ଏହି ଆଇନଗତ ପଦକ୍ଷେପ ବଳରେ ସିକିମ ଜମି ଉପରେ ଜମି ସ୍ୱତ୍ତ୍ବ ଥିବା ରୟତମାନେ ବଂଶାନୁକ୍ରମିକ ଓ ହସ୍ତାନ୍ତରଯୋଗ୍ୟ ଅଧିକାର ପାଇଛନ୍ତି । ଏହି ଐତିହାସିକ ପଦକ୍ଷେପ ଫଳରେ ଓଡ଼ିଶାର ପ୍ରାୟ ଅଢେଇ ଲକ୍ଷ ସିକିମ ରୟତ ଓ ଉତ୍ତରାଧିକାରୀ ଉପକୃତ ହେବେ। ସିକିମ ରୟତମାନଙ୍କର ଏହା ବହୁ ଦିନର ସମସ୍ୟା ଥିଲା । ୫୦ ବର୍ଷରୁ ଅଧିକ ସମୟ ହେଲା ସମସ୍ଯାର ସମାଧାନ ହୋଇପାରୁନଥିଲା ।
ସେଥିପାଇଁ ସରକାରଙ୍କ ବିଭିନ୍ନ କୃଷି ବିକାଶ କାର୍ଯ୍ୟକ୍ରମରେ ମଧ୍ୟ ସେମାନେ ଲାଭ ପାଇପାରୁନଥିଲେ । ଏତେ ଲମ୍ବା ସମୟର ସମସ୍ଯାକୁ ସମାଧାନ କରାଯାଇଥିବାରୁ ଏହାକୁ ଐତିହାସିକ ପଦକ୍ଷେପ କହି ଲୋକଙ୍କର ଖୁସି ହି ସବୁଠୁ ବଡ଼଼ ପୁରସ୍କାର ବୋଲି କହିଛନ୍ତି ମୁଖ୍ଯମନ୍ତ୍ରୀ । 5T ଅଧ୍ୟକ୍ଷଙ୍କ କେନ୍ଦ୍ରାପଡା ଜିଲ୍ଲା ଗସ୍ତ ଅବସରରେ ସିକିମ ରୟତମାନେ ତାଙ୍କୁ ଭେଟି ଅସୁବିଧା ଜଣାଇଥିଲେ । 5T ଅଧ୍ୟକ୍ଷ ଏ ବିଷୟରେ ଦୃଷ୍ଟି ଆକର୍ଷଣ କରିବା ପରେ ମୁଖ୍ୟମନ୍ତ୍ରୀ ସମସ୍ୟାର ସମାଧାନ ପାଇଁ ପଦକ୍ଷେପ ନେବାକୁ ରାଜସ୍ୱ ଓ ବିପର୍ଯ୍ୟୟ ପରିଚାଳନା ବିଭାଗକୁ ନିର୍ଦ୍ଦେଶ ଦେଇଥିଲେ। ଜନସାଧାରଣଙ୍କ ସମସ୍ୟାର ସମାଧାନ ପ୍ରତି ଏହା ସରକାରଙ୍କ ପ୍ରତିବଦ୍ଧତା ଓ ନିଷ୍ଠାର ପରିଚୟ ବୋଲି କହିଥିଲେ ନବୀନ। ବାକି ରହିଯାଇଥିବା ଜମି ପଟ୍ଟା ପ୍ରଦାନ କାର୍ଯ୍ୟକୁ ଶୀଘ୍ର ଶେଷ କରି ସ୍ୱଚ୍ଛତା ଓ ସମ୍ମାନର ସହ ବଣ୍ଟନ କରିବା ପାଇଁ ଜିଲ୍ଲା ପ୍ରଶାସନମାନଙ୍କୁ ନିର୍ଦ୍ଦେଶ ଦିଆଯାଇଛି ବୋଲି ଏହି ଅବସରରେ କହିଛନ୍ତି 5T ଅଧ୍ୟକ୍ଷ କାର୍ତ୍ତିକ ପାଣ୍ଡିଆନ ।