ଭୁବନେଶ୍ବର: ରୌପ୍ୟ ଜୟନ୍ତୀ ବର୍ଷରେ ନବୀନ ସରକାର। ପୂରଣ କଲେ ୨୪ ବର୍ଷର ଶାସନ। ୨ ହଜାର ମସିହା ମାର୍ଚ୍ଚ ୫ ତାରଖରେ ନବୀନ ପଟ୍ଟନାୟକ ମୁଖ୍ୟମନ୍ତ୍ରୀ ଭାବେ ପ୍ରଥମେ ଶପଥ ନେଇଥିଲେ। ଏହା ପରେ ଅପରାଜେୟ ଭାବେ ରାଜନୀତିର ଗୋଟିଏ ପରେ ଗୋଟିଏ ପାହାଚ ଚଢ଼ିଚାଲିଛନ୍ତି । କ୍ରମାଗତ ଭାବେ ୫ଥର ମୁଖ୍ୟମନ୍ତ୍ରୀ ହୋଇ ରାଜ୍ୟବାସୀଙ୍କୁ ଦେଉଛନ୍ତି ସୁଶାସନ।

୧୯୯୭ ମସିହାରେ ବିଜୁ ପଟ୍ଟନାୟକଙ୍କ ତିରୋଧାନ ପରେ ନବୀନ ରାଜନୀତିରେ ପାଦ ଥାପିଥିଲେ। ଆନ୍ତର୍ଜାତିକ ସ୍ତରର ଲେଖକରୁ ସେ ବନିଯାଇଥିଲେ ରାଜନେତା। କଥା କମ୍, କାମ ବେଶୀ ତାଙ୍କର ବିଶେଷତ୍ବ । ବିଜୁ ଜନତା ଦଳ ଗଠନ ପରେ ବିଜୁବାବୁଙ୍କ ଉପରେ ରାଜ୍ୟବାସୀଙ୍କର ଥିବା ଆସ୍ଥା ନବୀନ ବାବୁ୍ଙ୍କ ଉପରେ ହିଁ ପ୍ରକଟ କରିଥିଲେ। ୨ ହଜାର ମସିହାରେ ଅଟଳ ବିହାରୀ ବାଜପେୟୀଙ୍କ ନେତୃତ୍ବରେ କେନ୍ଦ୍ରରେ ଏନଡିଏ ସରକାର ଗଠନ ହେଲା। ଏପଟେ ଓଡ଼ିଶାରେ ନବୀନ ପଟ୍ଟନାୟକ ପ୍ରଥମ ଥର ପାଇଁ ମୁଖ୍ଯମନ୍ତ୍ରୀ ହେଲେ । ସେବେଠାରୁ ଆଉ ପଛକୁ ଫେରି ଚାହିଁନାହାନ୍ତି ନବୀନ।

ସବୁ ରାଜନୀତି, ସବୁ ରଣନୀତି, ସବୁ ଚାଣକ୍ୟନୀତି ନବୀନ ବାବୁଙ୍କ ଆଗରେ ଫେଲ ମାରିଛି। ଓଡ଼ିଶାର ଭୋଟର ନବୀନଙ୍କୁ ହିଁ ନେତା ମାନୁଛନ୍ତି । କ୍ଷମତା ନୁହେଁ, ଲୋକଙ୍କ ସେବା ପାଇଁ ସେ ରାଜନୀତିକୁ ଆସିଥିଲେ। ସେବା ହିଁ ନବୀନଙ୍କ ରାଜନୀତିର ମୂଳମନ୍ତ୍ର। ରାଜନୀତି ତାଙ୍କ ଜନସେବାର ମାଧ୍ଯମ। ଗରିବ ଖଟିଖିଆଙ୍କ ଓଡ଼ିଶା ଆଜି ଅଗ୍ରଣୀ ଓଡ଼ିଶାରେ ପରିଣତ ହୋଇଛି। ଦିନ ଥିଲା ଭୋକିଲା ରାଜ୍ୟ କହିଲେ ଓଡ଼ିଶାକୁ ବୁଝାଉଥିଲା। ନବୀନ ବାବୁଙ୍କ ବଡ଼ ଟାର୍ଗେଟ୍ ଥିଲା ଓଡ଼ିଶାବାସୀଙ୍କ ଜୀବନଧାରଣର ମାନରେ ଉନ୍ନତି ଆଣିବା। କେହି ଯେପରି ଅନାହାରରେ ନ ମରନ୍ତି, ସେଥିପାଇଁ ନବୀନ ପ୍ରତିବଦ୍ଧ ଥିଲେ। ସେଥିପାଇଁ ସେ ଆରମ୍ଭ କରିଥିଲେ ଟଙ୍କିକିଆ ଚାଉଳ ଯୋଜନା।

ଦାରିଦ୍ର୍ୟ ସୀମାରେଖା ତଳେ ଥିବା ଓଡ଼ିଶାର ଲକ୍ଷ ଲକ୍ଷ ପରିବାର ଉପକୃତ ହେଲେ। ଏହି ଯୋଜନା କାର୍ଯ୍ୟକାରୀ ହେବା ପରେ ଭୋକର ଭୂଗୋଳରୁ ହଟିଯାଇଛି ଓଡ଼ିଶା। ଖାଦ୍ୟ ସମସ୍ୟା ସମାଧାନ ଦିଗରେ ମୁଖ୍ୟମନ୍ତ୍ରୀଙ୍କ ଆଉ ଏକ ଲୋକପ୍ରିୟ ଯୋଜନା ହେଲା- ଆହାର। ରାଜ୍ୟର ବଡ଼ ବଡ଼ ସହରକୁ କାମ ଧନ୍ଦା ଆଉ ଅନ୍ୟାନ୍ୟ ଉଦ୍ଦେଶ୍ୟରେ ଆସୁଥିବା ଗରିବ ଲୋକ ସହରରେ ବଡ଼ ବଡ଼ ହୋଟେଲରେ ଅଧିକ ପଇସା ଦେଇ ଖାଇ ପାରୁ ନ ଥିଲେ। ଏହାକୁ ନଜରରେ ରଖି ରାଜ୍ୟ ସରକାର ଜନଗହଳି ସ୍ଥାନ ବା ଛକରେ ଆହାର କେନ୍ଦ୍ର ଖୋଲିଥିଲେ। ଯେଉଁଠି ଲୋକ ମାତ୍ର ୫ ଟଙ୍କା ଦେଇ ଖାଇପାରୁଛନ୍ତି। ନବୀନ ଯେ, କେବଳ ରାଜନୀତିଜ୍ଞ ନୁହନ୍ତି, ସେ ଜଣେ କ୍ରୀଡ଼ାନୀତିଜ୍ଞ ମଧ୍ୟ। କ୍ରୀଡ଼ା କ୍ଷେତ୍ରକୁ ବିଶେଷ ଅବଦାନ ପାଇଁ ନବୀନ ସାରା ବିଶ୍ବରେ ନୂଆ ପରିଚୟ ସୃଷ୍ଟି କରିଛନ୍ତି। କେବଳ ନବୀନଙ୍କ ପାଇଁ ବିଶ୍ବ ମାନଚିତ୍ରରେ ଓଡିଶା ପାଲଟିଛି ବ୍ରାଣ୍ଡେଡ ସ୍ପୋର୍ଟସ ହବ୍ ।

ଓଡ଼ିଶାକୁ ମିଳିଛି ଦେଶର ପ୍ରମୁଖ ସ୍ପୋର୍ଟସ ଡେଷ୍ଟିନେସନର ମାନ୍ୟତା। ବିଶ୍ବର ନାମକରା ହକି ଖେଳାଳିଙ୍କ ପସନ୍ଦ ପାଲଟିଛି ଓଡ଼ିଶା। ଏହା କେବଳ ସଫଳ ହୋଇଛି ମୁଖ୍ୟମନ୍ତ୍ରୀଙ୍କ ଦୃଢ଼ ଇଛାଶକ୍ତି ଓ ଉଦ୍ୟମ ପାଇଁ। ମିଶନ ମ୍ୟାନ୍ ନବୀନଙ୍କର ସବୁଠୁ ବଡ଼ ଶକ୍ତି ହେଉଛନ୍ତି ନାରୀ ଶକ୍ତି। ନାରୀ ଶକ୍ତିକୁ ଚାରି କାନ୍ଥର ଆବଦ୍ଧରୁ ବାହାର କରିବାକୁ ଅନବରତ ଉଦ୍ୟମ ଜାରି ରଖିଛନ୍ତି ନବୀନ। ପରିବାରରେ ଆର୍ଥିକ ପ୍ରଗତିରେ ନାରୀକୁ ଯୋଡ଼ିବାକୁ ମୁଖ୍ୟମନ୍ତ୍ରୀ ଆରମ୍ଭ କରିଥିଲେ ମିଶନ ଶକ୍ତି ଯୋଜନା। ମହିଳାମାନଙ୍କୁ ସାମାଜିକ, ଆର୍ଥିକ ଓ ରାଜନୈତିକ ଭାବେ ସଶକ୍ତ କରିବାକୁ ମଧ୍ୟ ପଦକ୍ଷେପ ନେଇଛନ୍ତି ନବୀନ। ନାରୀ ସଶକ୍ତିକରଣ ଦିଗରେ ମୁଖ୍ୟମନ୍ତ୍ରୀଙ୍କ ଏହି ଉଦ୍ୟମକୁ ଜାତିସଂଘ ପକ୍ଷରୁ ପ୍ରଶଂସା କରାଯାଇଛି। ସେହିପରି ବିଭିନ୍ନ ସ୍ବୟଂ ସହାୟକ ଗୋଷ୍ଠୀର ପ୍ରାୟ ୭୦ ଲକ୍ଷ ମହିଳା ଉପକୃତ ହୋଇଛନ୍ତି। ଖାଲି ସେତିକି ନୁହେଁ, ଶ୍ରୀକ୍ଷେତ୍ର ପୁରୀ ଓ ଲିଙ୍ଗରାଜ ମନ୍ଦିର ସମେତ ରାଜ୍ୟର ସମସ୍ତ ଐତିହ୍ୟ କ୍ଷେତ୍ରର ବିକାଶ ହୋଇଛି। ଯାହା ଓଡ଼ିଶାକୁ ଏକ ନୂଆ ରୂପ ଦେଇଛି।

ସ୍ବାସ୍ଥ୍ୟ ଓ ଶିକ୍ଷା କ୍ଷେତ୍ର ପ୍ରତି ମଧ୍ୟ ନବୀନ ଧ୍ୟାନ ଦେଇଛନ୍ତି। ସରକାରୀ ସ୍କୁଲଗୁଡ଼ିକ ସହ ପୁରାତନ ଛାତ୍ରମାନଙ୍କୁ ଯୋଡ଼ିବା ପାଇଁ ମୋ ସ୍କୁଲ ଭଳି ଯୋଜନା ଆରମ୍ଭ କରିଛନ୍ତି। ଗରିବ ମେଧାବୀ ଓଡ଼ିଆ ପିଲାଙ୍କୁ ଇଂରାଜୀ ମାଧ୍ୟମ ବିଦ୍ୟାଳୟରେ ପାଠ ପଢ଼ିବାର ସୁବିଧା ପାଇଁ ଆଦର୍ଶ ବିଦ୍ୟାଳୟ ଆରମ୍ଭ କରିଛନ୍ତି। ରାଜ୍ୟର ସମସ୍ତଙ୍କୁ ମାଗଣା ସ୍ବାସ୍ଥ୍ୟସେବା ଯୋଗାଇବାକୁ ଆରମ୍ଭ ହୋଇଛି ବିଜୁ ସ୍ବାସ୍ଥ୍ୟ କଲ୍ୟାଣ ଯୋଜନା। ସ୍ବାସ୍ଥ୍ୟସେବାରେ ଉତ୍କର୍ଷ ପାଇଁ କଟକ ବଡ଼ ମେଡିକାଲକୁ ବିଶ୍ବସ୍ତରୀୟ କରିବାକୁ ନବୀନ କାର୍ଯ୍ୟ ଆରମ୍ଭ କରିଛନ୍ତି। ନବୀନ ନିଜ ସରକାରକୁ ଜନକୈନ୍ଦ୍ରିକ ବୋଲି ପ୍ରମାଣିତ କରିବାକୁ ସଚିବାଳୟର ନାମ ପରିବର୍ତ୍ତନ କରାଯାଇ ଲୋକସେବା ଭବନ କରିଛନ୍ତି। ପ୍ରଶାସନକୁ ଲୋକଙ୍କ ନିକଟତର କରିବା ପାଇଁ ଆରମ୍ଭ ହୋଇଛି ମୋ ସରକାର। ଦୁର୍ନୀତିର ମୂଳୋତ୍ପାଟନ ସହ ସାଧାରଣ ଲୋକଙ୍କୁ ପ୍ରଶାସନିକ ବ୍ୟବସ୍ଥା ସହ ଯୋଡ଼ିବାକୁ ଆରମ୍ଭ ହୋଇଛି 5T। କୃଷି ଓ କୃଷକଙ୍କ ଉନ୍ନତି ପାଇଁ କାଳିଆ ଓ ବଳରାମ ଯୋଜନା ମାଇଲଖୁଣ୍ଚ ସାଜିଛି। ଶିଳ୍ପ କ୍ଷେତ୍ରରେ ଆସିଛି ବୈପ୍ଲବିକ ପରିବର୍ତ୍ତନ। ମେକ୍ ଇନ୍ ଓଡ଼ିଶା ଏକ୍ଷେତ୍ରରେ ସଫଳ ହୋଇଛି। ପ୍ରାକୃତିକ ବିପର୍ଯ୍ଯୟର ମୁକାବିଲାରେ ଓଡ଼ିଶା ସାରା ବିଶ୍ବରେ ରୋଲ ମଡେଲ ସାଜିଛି। ୧୯୯୯ ମହାବାତ୍ଯାରେ ଧ୍ବସ୍ତ ବିଧ୍ବସ୍ତ ହୋଇଯାଇଥିଲା ଓଡ଼ିଶା। ୨୦୦୦ ମସିହାରେ ଓଡ଼ିଶା ଶାସନର ମଙ୍ଗ ଧରିଥିବା ନବୀନ ପଟ୍ଟନାୟକ ସବୁକିଛି ବଦଳାଇ ଦେଇ ଓଡ଼ିଶାକୁ ଅଗ୍ରଣୀ ରାଜ୍ଯରେ ପରିଣତ କରିଛନ୍ତି। ୨୪ ବର୍ଷର ଶାସନ ପୂରଣ କରି ଆଜି ରୌପ୍ୟ ଜୟନ୍ତୀ ବର୍ଷରେ ପାଦଦେଇଛି ନବୀନ ସରକାର। ସବୁକ୍ଷେତ୍ରରେ ଓଡ଼ିଶାର ବିକାଶ ପାଇଁ ନବୀନଙ୍କ ଉପରେ ଓଡ଼ିଶାବାସୀଙ୍କ ଆଶୀର୍ବାଦ ରହିଆସିଛି। ନବୀନଙ୍କୁ ଲଗାତାର ଷଷ୍ଠଥର ମୁଖ୍ଯମନ୍ତ୍ରୀ କରିବା ପାଇଁ ଓଡ଼ିଶାବାସୀ ସଂକଳ୍ପ ନେଇଛନ୍ତି। ନବୀନ ପଟ୍ଟନାୟକ ଦେଶର ରାଜନୀତିରେ ରେକର୍ଡ କରିବେ। ଜନସେବା ଓ ରାଜନୀତିରେ ନବୀନ ଅନନ୍ଯ।