କଟକ: ୩୫୧ ଟି ବିରଳ ପ୍ରଜାତିର କଇଁଛ ଉଦ୍ଧାର । ୩ ଗିରଫ ସହ କାର ଜବତ । କଇଁଛଗୁଡ଼ିକୁ ପଶ୍ଚିମବଙ୍ଗରୁ କର୍ଣ୍ଣାଟକ ଚାଲାଣ ବେଳେ ଧରିଲା ଗୁଇନ୍ଦା ନିର୍ଦ୍ଦେଶାଳୟ । କଟକ ମଙ୍ଗୁଳି ଟୋଲ ଗେଟ୍ ନିକଟରୁ ଏକ କାରକୁ ଅଟକାଇବା ପରେ ସେଥିରେ କଇଁଛ ଚାଲାଣ ହେଉଥିବା ଜଣା ପଡ଼ିଥିଲା । ପରେ ଏହାକୁ ଚାଲାଣ କରୁଥିବା ୩ ଜଣଙ୍କୁ ପଚରାଉଚରା ସହ ସମସ୍ତେ ବନ୍ୟପ୍ରାଣୀ ସ୍ମଗଲର ବୋଲି ଜଣା ପଡିଥିଲା । ପରବର୍ତ୍ତୀ କାର୍ଯ୍ୟନୁଷ୍ଠାନ ପାଇଁ ଉଦ୍ଧାର କଇଁଛ ସହ କାର ଓ ସମସ୍ତ ଚାଲାଣଙ୍କରୀଙ୍କୁ ଓଡ଼ିଶା ବନ୍ୟପ୍ରାଣୀ ବିଭାଗକୁ ହସ୍ତାନ୍ତର କରିଛି ଡିଆରଆଇ ।
୬ ତାରିଖରେ ବିଏସକେୱାଇ ନବୀନ କାର୍ଡର ଶୁଭାରମ୍ଭ କରିବେ ମୁଖ୍ୟମନ୍ତ୍ରୀ
ଭୁବନେଶ୍ବର: ଆସନ୍ତା ୬ ତାରିଖରେ ବିଏସକେୱାଇ ନବୀନ କାର୍ଡର ଶୁଭାରମ୍ଭ କରିବେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ପ୍ରଥମ ପର୍ଯ୍ଯାୟରେ ଏହା ସମ୍ବଲପୁର ଓ ଖୋର୍ଦ୍ଧା ଜିଲ୍ଲାରେ ଆରମ୍ଭ ହେବ । ପରେ ସବୁ ଜିଲ୍ଲାରେ କାର୍ଯ୍ୟକାରୀ ହେବ । ଏଥିରେ ରାଜ୍ୟର ୯୦ ପ୍ରତିଶତ ଲୋକ ଉପକୃତ ହେବେ । ବିଏସକେୱାଇର ଏହି ତୃତୀୟ ପର୍ଯ୍ୟାୟରେ ଗ୍ରାମାଞ୍ଚଳ ଲୋକଙ୍କୁ ଜଟିଳ ରୋଗ ପାଇଁ ମିଳିବ ମାଗଣା ଚିକିତ୍ସା । ସେହିଦିନ ନବୀନ ମ୍ୟାଜିକ କାର୍ଡ ଓ୍ବେବସାଇଟରେ ପଞ୍ଜୀକରଣ ମଧ୍ୟ ଆରମ୍ଭ ହେବ ।
ରାଜ୍ୟରେ ଅର୍ଥ ଅଭାବରୁ କେହି ବି ଉତ୍ତମ ଚିକିତ୍ସାରୁ ବଞ୍ଚିତ ହେବେ ନାହିଁ । ଏଥିପାଇଁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଆରମ୍ଭ କରିଛନ୍ତି ବିଜୁ ସ୍ବାସ୍ଥ୍ୟ କଲ୍ୟାଣ ଯୋଜନା । ଆସନ୍ତା ୬ ତାରିଖରେ ସମ୍ବଲପୁର ଓ ଖୋର୍ଦ୍ଧା ଜିଲ୍ଲାରେ ବିଜୁ ସ୍ବାସ୍ଥ୍ୟ କଲ୍ୟାଣ ଯୋଜନା (ବିଏସକେୱାଇ)ର ତୃତୀୟ ପର୍ଯ୍ୟାୟ ଆରମ୍ଭ କରିବେ ମୁଖ୍ୟମନ୍ତ୍ରୀ । ବିଜୁ ସ୍ବାସ୍ଥ୍ୟ କଲ୍ୟାଣ ଯୋଜନାରୁ ବଞ୍ଚିତ ହୋଇଥିବା ଗାଁ ଗହଳିର ଲୋକଙ୍କୁ ଏହି ପର୍ଯ୍ୟାୟରେ ଜଟିଳ ରୋଗ ପାଇଁ ଘରୋଇ ହସ୍ପିଟାଲରେ କ୍ୟାସଲେସ୍ ଚିକିତ୍ସା ସୁବିଧା ଯୋଗାଇ ଦିଆଯିବ । ସରକାରୀ କର୍ମଚାରୀ ଓ ଆୟକରଦାତାଙ୍କ ବ୍ୟତୀତ ଗାଁରେ ବିଏସକେୱାଇରୁ ବଞ୍ଚିତ ସବୁ ପରିବାର ବିଏସକେଓ୍ବାଇ ନବୀନ କାର୍ଡ ପାଇବେ । ସେମାନେ ଉଭୟ ରାଜ୍ୟ ଭିତରେ ଓ ବାହାରେ ସବୁ ପଞ୍ଜିକୃତ ଘରୋଇ ହସ୍ପିଟାଲରେ ନିର୍ଦ୍ଧାରିତ ଜଟିଳ ରୋଗଗୁଡିକର ମାଗଣା ଚିକିତ୍ସା ସୁବିଧା ପାଇବେ । ତୃତୀୟ ପର୍ଯ୍ୟାୟ ସଂପ୍ରସାରଣରେ ରାଜ୍ୟର ୧ କୋଟି ୧୦ ଲକ୍ଷରୁ ଅଧିକ ପରିବାର ସାମିଲ ହେବାକୁ ଯାଉଛନ୍ତି । ଯାହାକି ରାଜ୍ୟ ଜନସଂଖ୍ୟାର ପ୍ରାୟ ୯୦ ପ୍ରତିଶତ ।
ତୃତୀୟ ପର୍ଯ୍ୟାୟ ବିଜୁ ସ୍ବାସ୍ଥ୍ୟ କଲ୍ୟାଣ ଯୋଜନା ସ୍ପେଶାଲ ଡ୍ରାଇଭ୍ ନେଇ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ପକ୍ଷରୁ ବିଭିନ୍ନ ଜିଲ୍ଲା ଗସ୍ତ ସମୟରେ 5T ଅଧ୍ୟକ୍ଷ କାର୍ତ୍ତିକ ପାଣ୍ଡିଆନ ଘୋଷଣା କରିଥିଲେ । ପ୍ରଥମ ପର୍ଯ୍ୟାୟରେ ସବୁ ଲୋକଙ୍କୁ ସେମାନଙ୍କ ରୋଜଗାର ଓ ବାସସ୍ଥାନ ନିର୍ବିଶେଷରେ, ସବୁ ସରକାରୀ ଚିକିତ୍ସାଳୟରେ ସମସ୍ତ ଉପଲବ୍ଧ ଚିକିତ୍ସା ସୁବିଧା ମାଗଣାରେ ମିଳୁଛି । ଦ୍ବିତୀୟ ପର୍ଯ୍ୟାୟରେ ସବୁ ଖାଦ୍ୟ ସୁରକ୍ଷା ହିତାଧିକାରୀ ଘରୋଇ ଚିକିତ୍ସାଳୟରେ ମାଗଣାରେ ଚିକିତ୍ସା ସୁବିଧା ପାଉଛନ୍ତି । ଏହି ଯୋଜନାରେ ପ୍ରତିମାସର ୪୫ ଲକ୍ଷରୁ ଅଧିକ ଲୋକଙ୍କୁ ବିଭିନ୍ନ ସରକାରୀ ସ୍ବାସ୍ଥ୍ୟ ଅନୁଷ୍ଠାନରେ ମାଗଣାରେ ଚିକିତ୍ସା ସୁବିଧା ମିଳୁଛି । ଏଥିସହ ୧ ଲକ୍ଷ ୩୦ ହଜାର ଲୋକ ଘରୋଇ ହସ୍ପିଟାଲରେ କ୍ୟାସଲେସ୍ ଚିକିତ୍ସା ସୁବିଧା ପାଉଛନ୍ତି । ଏଥିପାଇଁ ପଞ୍ଜିକୃତ ଘରୋଇ ହସ୍ପିଟାଲରେ ରାଜ୍ୟ ସରକାର ମାସକୁ ୨୬୦ କୋଟି ଟଙ୍କା ଖର୍ଚ୍ଚ କରୁଛନ୍ତି । ଗତ ୫ ବର୍ଷରେ ବିଏସକେଓ୍ବାଇରେ ରାଜ୍ୟ ସରକାର ୪୫୦୦ କୋଟି ଟଙ୍କା ଖର୍ଚ୍ଚ କରି ୨୧ ଲକ୍ଷ ରୋଗୀଙ୍କୁ ବିଭିନ୍ନ ଘରୋଇ ହସ୍ପିଟାଲରେ କ୍ୟାସଲେସ ଚିକିତ୍ସା ସୁବିଧା ଯୋଗାଇ ଦେଇଛନ୍ତି ।
କୋଭିଡ ପରେ ବଢୁଛି ଭାରତୀୟଙ୍କ ଫୁସଫୁସ୍ ଓ ଶ୍ବାସପ୍ରଶ୍ବାସ ଜନିତ ରୋଗ
ଭୁବନେଶ୍ବର: କୋଭିଡ ପରେ ବଢୁଛି ଭାରତୀୟଙ୍କ ଫୁସଫୁସ୍ ଓ ଶ୍ବାସପ୍ରଶ୍ବାସଜନିତ ରୋଗ । ଭେଲୋର ସ୍ଥିତ ଖ୍ରୀଷ୍ଟିୟାନ୍ ମେଡିକାଲ କଲେଜର ରିପୋର୍ଟକୁ ନେଇ ଚିନ୍ତା । ୨୦୭ ବ୍ୟକ୍ତିଙ୍କ ଫୁସଫୁସ୍ ନଷ୍ଟ ହେବା ସହ ସେ ସବୁ ବ୍ୟକ୍ତି ସ୍ବାଭାବିକ କାମ କରିବାରେ ଅସମର୍ଥ ପ୍ରମାଣିତ ହୋଇଛନ୍ତି । ଇନଫ୍ଲୁଏଞ୍ଜା ଜନିତ ଜ୍ବର, କାଶ ଓ ଥଣ୍ଡା ହେଲେ ଭଲ ହେବାକୁ ୪ରୁ ୬ ସପ୍ତାହ ଲାଗୁଛି । ବାୟୁ ପ୍ରଦୂଷଣ ଓ ଜୈବ ଇନ୍ଧନ ପରିଚାଳିତ ଯାନବାହାନରୁ ନିର୍ଗତ ବିଷାକ୍ତ ଗ୍ୟାସ୍ ବି ଫୁସ୍ଫୁସ୍ କ୍ୟାନସର୍ କରାଉଥିବା ବିଶେଷଜ୍ଞ କହିଛନ୍ତି ।
୩ ବର୍ଷ ତଳୁ ନିୟନ୍ତ୍ରଣ ହେଲାଣି କୋଭିଡ । ହେଲେ ଖୋଳ କରିଦେଇଛି ଆଲ୍ଫା, ଡେଲ୍ଟା-ଓମିକ୍ରନ୍ ! ଏବେ ବି ଭାରତୀୟଙ୍କଠାରେ ବଢୁଛି ଫୁସ୍ଫୁସ୍ ଓ ଶ୍ବାସପ୍ରଶ୍ବାସ ଜନିତ ରୋଗ । କୋଭିଡ ପରେ ଏକାଧିକ ରୋଗରେ ପୀଡ଼ିତ ବ୍ୟକ୍ତି ଏବେ କୋଭିଡ ପରବର୍ତ୍ତୀ ଜଟିଳ ରୋଗରେ ପୀଡ଼ିତ ହେଉଛନ୍ତି । ସାମାନ୍ୟ ଚିକିତ୍ସା ଅଭାବରୁ ପ୍ରାଣ ହରାଉଛନ୍ତି । ଏଭଳି ଏକ ରିପୋର୍ଟ ଭେଲୋରସ୍ଥିତ ଖ୍ରୀଷ୍ଟିଆନ୍ ମେଡିକାଲ୍ ରିସର୍ଚ୍ଚ୍ ଗବେଷଣାରୁ ଜଣାପଡ଼ିଛି । ୨୦୭ ଜଣ ବ୍ୟକ୍ତିଙ୍କଠାରେ ବିଭିନ୍ନ ପରୀକ୍ଷାନିରୀକ୍ଷା କରିବା ପରେ ଏପରି ସାଂଘାତିକ ତଥ୍ୟ ସାମନାକୁ ଆସିଛି । କୋଭିଡ ପରେ ଲୋକଙ୍କର ରକ୍ତସଞ୍ଚାର କରୁଥିବା ଧମନୀଗୁଡ଼ିକ ପ୍ରଭାବିତ ହେବା ସହ ହଠାତ ହୃଦଘାତର ଶିକାର ହେଉଛନ୍ତି ଲୋକେ । ଏପରିକି ଭୂତାଣୁବାହକ ଜ୍ବର, କାଶ, ଥଣ୍ଡା ପାଇଁ ଔଷଧ ଖାଇଲେ ସୁସ୍ଥ ହେବାକୁ ମାସାଧିକ କାଳ ଲାଗୁଛି । ଏବେ ବି ବଡ଼ ମେଡିକାଲକୁ କୋଭିଡ ପରବର୍ତ୍ତୀଜନିତ ଫୁସଫୁସ୍, ଶ୍ବାସ ପ୍ରଶ୍ବାସ ଜନିତ ରୋଗ, ଗ୍ୟାସଟ୍ରାଇଟିସ୍, ଆଜମା ରୋଗୀ ଆସୁଛନ୍ତି । ଏମାନଙ୍କୁ ଚିକିତ୍ସା କରିବାକୁ ହେଲେ ସେମାନେ କୋଭିଡ ପୀଡ଼ିତ ଥିବାବେଳେ ଇଞ୍ଜେକ୍ସନ୍ ନେଇଛନ୍ତି କି ଟାବଲେଟ୍ ଖାଇଛନ୍ତି ସେ ସମସ୍ତ ତଥ୍ୟ ଅନୁଶୀଳନ କରି ଚିକିତ୍ସା କରିବାକୁ ପଡ଼ିବ ।
କେବଳ କୋଭିଡ ନୁହେଁ, ବାୟୁ ପ୍ରଦୂଷଣ ବି ଶ୍ବାସପ୍ରଶ୍ବାସଜନିତ ରୋଗ ବୃଦ୍ଧି କରୁଛି । ବିଶେଷକରି ଜୈବ ଇନ୍ଧନ ଦ୍ବାରା ପରିଚାଳିତ ଯାନବାହାନରୁ ନିର୍ଗତ କାର୍ବନମନୋକ୍ସାଇଡ୍ ଓ ଲିଡ ବାୟୁମଣ୍ଡଳରେ ଘୂରି ବୁଲୁଛି । ଏସବୁ ଲୋକଙ୍କ ଶ୍ବାସକ୍ରିୟାରେ ଯାଇ ଫୁସଫୁସରେ ଜମା ହେଉଛି । ଅନୁସନ୍ଧାନରୁ ଜଣାପଡ଼ିଛି ଆଜିକାଲି ୪୯.୩ ପ୍ରତିଶତ ଲୋକଙ୍କର ଶ୍ବାସକ୍ରିୟା ଜନିତ ସମସ୍ୟା ରହୁଛି । ୨୭.୧ ପ୍ରତିଶତ ଲୋକେ ବାୟୁପ୍ରଦୂଷଣ ଯୋଗୁଁ କଫ ଜନିତ ରୋଗରେ ପୀଡ଼ିତ ହେଉଛନ୍ତି । ବିଶେଷଜ୍ଞଙ୍କ ଆକଳନ ଏପରି ସମସ୍ୟା ଆହୁରି ଅଧିକ ଦେଖାଦେଇପାରେ ।
ଅନୁସନ୍ଧାନରୁ ଜଣାପଡ଼ିଛି କୋଭିଡ ପରେ ଅଧିକାଂଶ ଲୋକଙ୍କ ଦେହରେ ଟିବି ଲକ୍ଷଣ ବି ଦେଖାଦେଉଛି । ତେବେ ଶରୀରରେ ଏସବୁ ରୋଗ ନେଇ କୌଣସି ଲକ୍ଷଣ ଦେଖା ଦେଲେ ତୁରନ୍ତ ଡାକ୍ତରଙ୍କ ପରାମର୍ଶ ନେଇ ଔଷଧ ନେଲେ ଆରୋଗ୍ୟ ମିଳିବ ବୋଲି ଡାକ୍ତର ପରାମର୍ଶ ଦେଇଛନ୍ତି ।
ସରକାର ଯୋଗାଇଛନ୍ତି ଭିତ୍ତିଭୂମି: ଓଡ଼ିଶାର ଇଣ୍ଡୋର ଷ୍ଟାଡିୟମରୁ ସୃଷ୍ଟି ହେବେ ନୂଆ ପ୍ରତିଭା
କଟକ: ଭାରତର ସ୍ପୋର୍ଟ୍ସ କ୍ୟାପିଟାଲ ହେବା ଦିଗରେ ଓଡ଼ିଶା । କ୍ରୀଡ଼ା ବିକାଶ ପାଇଁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଦୂରଦର୍ଶୀ ପଦକ୍ଷେପ ଆଜି ଓଡ଼ିଶାକୁ ଦେଶ ତଥା ବିଶ୍ବ ଦରବାରରେ ଦେଇଛି ସ୍ବତନ୍ତ୍ର ପରିଚିୟ । କ୍ରୀଡାର ବିକାଶ ପାଇଁ ମୁଖ୍ୟମନ୍ତ୍ରୀ ସାରା ରାଜ୍ଯରେ ୫୦ରୁ ଅଧିକ ଇଣ୍ଡୋର ଷ୍ଟାଡିୟମର ଉଦଘାଟନ କରିଛନ୍ତି । ଏହାରି ଭିତରେ ଖେଳାଳିଙ୍କ କୋଳାହଳରେ ଫାଟି ଉଠୁଛି ଇଣ୍ଡୋର ହଲ । କଟକ ସିଡିଏ ସେକ୍ଟର-୬ରେ ହୋଇଥିବା ଟେବୁଲ ଟେନିସ ହଲରେ ଏବେ ଶତାଧିକ କୁନିକୁନି ପିଲା ଅଭ୍ୟାସ କରୁଥିବା ବେଳେ ସେମାନଙ୍କୁ ଉତ୍ସାହିତ କରିଛନ୍ତି କୋଚ, କ୍ରୀଡା ସଂଗଠକ ଓ ପ୍ରଶାସନିକ ଅଧିକାରୀ ।
ଇଣ୍ଡୋର ଷ୍ଟାଡିୟମରୁ ଅଭ୍ୟାସ କରି ସୃଷ୍ଟି ହେବେ ନୂଆ ପ୍ରତିଭା । ବିଶ୍ବରେ କ୍ରୀଡ଼ାର ନୂଆ ଡେଷ୍ଟିନସନ ହେବ ଓଡ଼ିଶା । ସାରା ରାଜ୍ଯରେ ମୁଖ୍ଯମନ୍ତ୍ରୀ ନବୀନ ପଟ୍ଟନାୟକ ୫୦ରୁ ଅଧିକ ବହୁମୁଖୀ ଇଣ୍ଡୋର ଷ୍ଟାଡିୟମ ଉଦଘାନ କରିବା ପରେ ଏବେ ଖେଳାଳିଙ୍କ ମଧ୍ଯରେ ଉତ୍ସାହ । ଉଦଘାଟନର ଦିନ କେଇଟା ପରେ ଏସବୁ ହଲ ଏବେ ଖେଳାଳିଙ୍କ ପ୍ରକୃଷ୍ଟ ଭିତ୍ତିଭୂମୀ ପାଲଟିଛି । କଟକ ସିଡିଏ ସେକ୍ଟର-୬ରେ ଟେବୁଲ ଟେନିସ ଇଣ୍ଡୋର ଷ୍ଟାଡିୟମର ଶୁଭାରମ୍ଭ ପରେ ଶତାଧିକ କୁନି କୁନି ତଥା ଯୁବ ଖେଳାଳି ଆସି ପ୍ରତିଦିନ ଅଭ୍ୟାସ କରିବା ସହ କୋଚଙ୍କ ଠାରୁ ଶିଖୁଛନ୍ତି କ୍ରୀଡ଼ା କୌଶଳ । ରାଜ୍ଯ ଟେବୁଲ ଟେନିସ ସଂଘ ସଭାପତି ସଂଜୟ ସିଂ ନିଜେ ଇଣ୍ଡୋର ହଲକୁ ଯାଇ ଖେଳାଳିଙ୍କୁ ଉତ୍ସାହିତ କରୁଛନ୍ତି ।
ଚଳିତବର୍ଷ ଜାତୀୟ କ୍ୟାଡେଟ୍ ଓ ସବ ଜୁନିୟର ଟେବୁଲ ଟେନିସ ଚାମ୍ପିଅନସିପରେ ଓଡିଶାର ଖେଳାଳି ବ୍ରୋଞ୍ଜ ପଦକ ଜିତିବାର ଗୌରବ ଅର୍ଜନ କରିଥିଲେ । ଟେବୁଲ ଟେନିସ ଇତିହାସରେ ଓଡିଶାର କୌଣସି ଟିମ ପ୍ରଥମ ଥର ଲାଗି ଜାତୀୟ ସ୍ତରରେ ପଦକ ହାତେଇବାରୁ ସକ୍ଷମ ହୋଇଛି । ଟେବୁଲ ଟେନିସ ସଂଘ ସଭାପତି ଟିମକୁ ସମ୍ବର୍ଦ୍ଧିତ କରି ରାଜ୍ୟ ସରକାର ଦେଇଥିବା ଆର୍ଥିକ ପୁରସ୍କାର ପ୍ରଦାନ କରିଛନ୍ତି ।
ନେପାଳର ଜନକପୁର: ଆଜି ବି ରହିଛି ରାଜା ଜନକଙ୍କ ରାଜପ୍ରସାଦ, ମାତା ସୀତାଙ୍କ ମନ୍ଦିର, ପାଲଟିଛି ହିନ୍ଦୁଙ୍କ ପ୍ରାଣକେନ୍ଦ୍ର
ଜନକପୁର: ନେପାଳର ଜନକପୁର । ମାତା ସୀତାଙ୍କ ଜନ୍ମସ୍ଥାନ । ବର୍ତ୍ତମାନର ଧନୁସା ଜିଲ୍ଲ ମୈଥିଳି ସହରରେ ଜନକପୁରରେ ଜନ୍ମ ନେଇଥିଲେ ମାତା ସୀତା । ଯାହା ହିନ୍ଦୁ ଐତିହ୍ୟ ଓ ପରମ୍ପରାର ଏକ ମହାନ ଭୂମି । ପ୍ରତି ହିନ୍ଦୁଙ୍କ ପ୍ରାଣକେନ୍ଦ୍ର । ନେପାଳରେ ଥିଲେ ବି ପ୍ରତିଦିନ ଏହି ଧାମରେ ଜମୁଛି ପର୍ଯ୍ୟଟକଙ୍କ ଭିଡ଼ । ବିଶେଷ କରି ଓଡ଼ିଶା ପର୍ଯ୍ଯଟକ ଜନକପୁର ଯାଇ ମାତା ସୀତାଙ୍କ ଜନ୍ମସ୍ଥାନ ପରିଦର୍ଶନ କରିବାକୁ ବ୍ୟଗ୍ର ।
ଧନୁସା ଜିଲ୍ଲାର ମୈଥେଳୀ ସହରରେ ଆଜି ବି ରହିଛି ରାଜା ଜନକଙ୍କ ରାଜପ୍ରାସାଦ ଓ ସୀତା ମନ୍ଦିର । ୨୦୨୧ ଜନଗଣନା ଅନୁଯାୟୀ ଏଠାକାର ଜନ ସଂଖ୍ୟା ଏକ ଲକ୍ଷ ୯୫ ହଜାର ୪୩୮ ଥିଲା । ଏଠାକାର ଆଞ୍ଚଳିକ ଭାଷା ମୈଥିଲୀ ହୋଇଥିବା ବେଳେ ସରକାରୀ ଭାଷା ନେପାଳୀ ପ୍ରଚଳିତ l ୯୧.୯୭ ବର୍ଗ କିଲୋମିଟର ବ୍ୟାପ୍ତ ଜନକପୁର ଧାମ । କାଠମାଣ୍ଡୁରୁ ଦକ୍ଷିଣପୂର୍ବ ୨୨୫ କିଲୋମେଟର ଦୂରରେ ଅବସ୍ଥିତ ଜନକପୁରରେ, ୧୨ ଶହ ଶତାବ୍ଦୀରେ ବିଦେହ ବଂଶୀ ରାଜୁତି କରୁଥିଲେ l ଏହି ଅଞ୍ଚଳ ନେପାଳ ଦେଶର ଚତୁର୍ଥ ଜନବହୁଳ ଅଞ୍ଚଳ ରୂପେ ପରିଗଣିତ l ପ୍ରାଚୀନ ଗ୍ରନ୍ଥ, ସାହିତ୍ୟ ତଥା ପାଣ୍ଡିତଙ୍କ ମତରେ ଜନକପୁର ୧୮ ଶହ ମସିହା ବେଳକୁ ଲୋକଲୋଚନକୁ ଆସିଥିଲା l ଜନକ ରାଜାଙ୍କ ରାଜପ୍ରାସାଦ ହିଁ ଜନକପୁର ସ୍ଥିତି ବିଷୟରେ ଜ୍ଞାତ କରାଇଥିଲା l
ଅଯୋଧ୍ୟାରେ ପ୍ରଭୁ ଶ୍ରୀରାମ ମନ୍ଦିର ସହ ଏଠାକାର ଜାନକୀ ମନ୍ଦିରର ରହିଛି ଅନେକ ସାମଞ୍ଜସ୍ୟ । ୧୯୫୦ ମସିହା ପର୍ଯ୍ୟନ୍ତ ଜନକପୁର ଏକ ପଡ଼ା ଗ୍ରାମାଞ୍ଚଳ ରୂପେ ପରିଚିତ ଥିଲା l କୃଷକ, କଳାକାର, ପୂଜକ ସମ୍ପ୍ରଦାୟ ଲୋକମାନେ ଏଠାରେ ବସବାସ କରୁଥିଲେ l ୧୯୬୦ ମସିହା ବେଳକୁ ଜନକପୁର ଏକ ବ୍ୟବସିୟକ ପେଣ୍ଠସ୍ଥଳ ରୂପେ ପରିଗଣିତ ହେଲା l ଏଠି ଜାନକୀ ମନ୍ଦିର ତଥା ରାଜା ଜନକଙ୍କ ମହଲ ସହ ରହିଛି ସୀତା ବିବାହ ମଣ୍ଡପ, ହନୁମାନ ମନ୍ଦିର, ଧନୁସାଧାମ, ରାମ ମନ୍ଦିର । ଏଠାରେ ଜାନକୀ ନବମୀ, ବିବାହ ପଞ୍ଚମୀ, ରାମ ନବମୀ ଆଦି ଖୁବ ଧୁମଧାମରେ ପାଳନ କରାଯାଏ ।
ହିନ୍ଦୁଙ୍କ ଏହି ସ୍ଥାନ ସହିତ ସିଧାସଳଖ ସମ୍ପର୍କ ରହିଛି l ଯାହାର ଐତିହ୍ୟ ଇତିହାସ ସହିତ ସଂସ୍କୃତି ଓ ପରମ୍ପରାକୁ ବଞ୍ଚାଇ ରଖିବାରେ ନେପାଳ ସରକାର ଯଥାସାଧ୍ଯ ଉଦ୍ଯମ କରୁଛନ୍ତି ।
ନିର୍ବାଚନ ପ୍ରସ୍ତୁତି: ରାଜଧାନୀରେ CRPF ମହିଳା ଯବାନଙ୍କ ଫ୍ଲାଗମାର୍ଚ୍ଚ
ଭୁବନେଶ୍ବର: ସାଧାରଣ ନିର୍ବାଚନକୁ ନେଇ ରାଜନୀତି ଜୋର ଧରିବାରେ ଲାଗିଥିବା ବେଳେ ପ୍ରସ୍ତୁତି ବି ସେହିଭଳି ଚାଲିଛି । ନିର୍ବାଚନ ସମୟରେ ସୁରକ୍ଷା ବ୍ୟବସ୍ଥା ଉପରେ ଗୁରୁତ୍ବ ଦିଆଯାଉଛି । ଏହି କ୍ରମରେ ରାଜଧାନୀରେ ଫ୍ଲାଗମାର୍ଚ୍ଚ କରିଛନ୍ତି ସିଆରପିଏଫର ମହିଳା ଯବାନ ।
ଭୁବନେଶ୍ବର ଝରଣା ବସ୍ତିରେ ପୋଲିସ ଫ୍ଲାଗମାର୍ଚ୍ଚ କରିଛି । ଅବାଧ ଓ ନିରପେକ୍ଷ ନିର୍ବାଚନ ପାଇଁ ଏହି ଫ୍ଲାଗମାର୍ଚ୍ଚ କରାଯାଇଛି । ରାଜମହଲ ଛକରୁ ଝରଣା ବସ୍ତି ପର୍ଯ୍ୟନ୍ତ ଫ୍ଲାଗମାର୍ଚ୍ଚ ହୋଇଛି । ଏଥିରେ ସିଆରପିଏଫ ମହିଳା ୱିଙ୍ଗର ୬୧ ଯବାନଙ୍କ ସହ ଖାରବେଳ ନଗର ଥାନା ଓ କ୍ୟାପିଟାଲ ଥାନା ପୋଲିସ ସାମିଲ ଅଛନ୍ତି ।
ଫ୍ଲାଗ୍ ମାର୍ଚ୍ଚରେ ଦୁଇ ପ୍ଲାଟୁନ ଫୋର୍ସ ସାମିଲ ହୋଇଛନ୍ତି । ଅପରାଧିକ କାର୍ଯ୍ୟକଳାପରୁ ନିବୃତ୍ତ ରହିବା ପାଇଁ ଫ୍ଲାଗମାର୍ଚ୍ଚରେ ବାର୍ତ୍ତା ଦିଆଯାଉଛି । ଏହାସହ ନିର୍ବାଚନକୁ ଶାନ୍ତିଶୃଙ୍ଖଳାର ସହ କରିବାକୁ ସଚେତନତା କରାଯାଉଛି । ନିର୍ବାଚନ ସମୟରେ କିମ୍ବା ପୂର୍ବରୁ ଯଦି କେହି ଅପରାଧିକ କାର୍ଯ୍ୟକଳାପରେ ଲିପ୍ତ ରୁହନ୍ତି ତେବେ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି କ୍ୟାପିଟାଲ ଥାନା ଆଇଆଇସି ସୂଚନା ଦେଇଛନ୍ତି । ଆଗକୁ ପ୍ରତି ଥାନା ଅଞ୍ଚଳରେ ଥିବା ବସ୍ତି ଓ ସହରର ପ୍ରମୁଖ ରାସ୍ତାରେ ଫ୍ଲାଗମାର୍ଚ୍ଚ କରାଯିବ ।
ନିର୍ମାଣ ଶ୍ରମିକଙ୍କ ପେନସନ ବୃଦ୍ଧି କଲେ ରାଜ୍ୟ ସରକାର, ୭ ଶହ ବଦଳରେ ମିଳିବ ୧୨ ଶହ ଟଙ୍କା
ଭୁବନେଶ୍ବର: ନିର୍ମାଣ ଶ୍ରମିକଙ୍କ ପାଇଁ ଖୁସି ଖବର । ପେନସନ୍ ବୃଦ୍ଧି କଲେ ରାଜ୍ୟ ସରକାର । ନିର୍ମାଣ ଶ୍ରମିକଙ୍କ ପେନସନ ବୃଦ୍ଧି ସମ୍ପର୍କରେ ଘୋଷଣା କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ୮୦ ବର୍ଷରୁ ଊର୍ଦ୍ଧ୍ବ ନିର୍ମାଣ ଶ୍ରମିକ ପାଇବେ ୧୨ ଶହ ଟଙ୍କା । ସେହିପରି ୬୦ ବର୍ଷରୁ ଅଧିକ ବୟସର ନିର୍ମାଣ ଶ୍ରମିକ ପାଇବେ ହଜାରେ ଟଙ୍କା ।
ମୁଖ୍ୟମନ୍ତ୍ରୀଙ୍କ ଘୋଷଣା ଅନୁଯାୟୀ ଓଡିଶା କୋଠାବାଡି ଓ ଅନ୍ୟାନ୍ୟ ନିର୍ମାଣ ଶ୍ରମିକ କଲ୍ୟାଣ ବୋର୍ଡ ଅଧୀନରେ ପଞ୍ଜୀକୃତ ହୋଇଥିବା ନିର୍ମାଣ ଶ୍ରମିକଙ୍କ ପେନ୍ସନ ରାଶିରେ ବୃଦ୍ଧି କରାଯାଇଛି । ଏମାନେ ସମସ୍ତେ ନିର୍ମାଣ ଶ୍ରମିକ ପେନ୍ସନ ଯୋଜନାରେ ଉପକୃତ ହେଉଛନ୍ତି ।
ସୂଚନାଯୋଗ୍ୟ, 5T ଅଧ୍ୟକ୍ଷ କାର୍ତ୍ତିକ ପାଣ୍ଡିଆନଙ୍କ ଜିଲ୍ଲା ଗସ୍ତ ସମୟରେ ବିଭିନ୍ନ ଅଞ୍ଚଳରେ ନିର୍ମାଣ ଶ୍ରମିକ ଓ ସେମାନଙ୍କ ପ୍ରତିନିଧିମାନେ ଏନେଇ ଦୃଷ୍ଟି ଆକର୍ଷଣ କରିଥିଲେ । ଏ ବିଷୟରେ ଅବଗତ ହେବା ପରେ ମୁଖ୍ୟମନ୍ତ୍ରୀ ପେନସନ ବୃଦ୍ଧି କରିଛନ୍ତି । ନିଷ୍ପତ୍ତି ଅନୁଯାୟୀ, ୬୦ ବର୍ଷ ଅତିକ୍ରମ କରିଥିବା ନିର୍ମାଣ ଶ୍ରମିକ ଯେଉଁମାନେ ୫୦୦ ଟଙ୍କା ପାଉଥିଲେ ଏବେ ୧୦୦୦ ଟଙ୍କା ପାଇବେ । ସେହିପରି ୮୦ ବର୍ଷ ବୟସରୁ ଅଧିକ ନିର୍ମାଣ ଶ୍ରମିକ ଯେଉଁମାନେ ୭୦୦ ଟଙ୍କା ପାଉଥିଲେ ଏବେ ପାଇବେ ୧୨୦୦ ଟଙ୍କା ।
ଏହି ପେନ୍ସନ ୨୦୨୪ ଫେବୃଆରୀ ମାସରୁ ପିଛିଲା ଭାବେ ଲାଗୁ ହେବ । ଏ ବାବଦରେ ଆବଶ୍ୟକୀୟ ଖର୍ଚ୍ଚ ଓଡିଶା କୋଠାବଡି ଓ ଅନ୍ୟାନ୍ୟ ନିର୍ମାଣ ଶ୍ରମିକ କଲ୍ୟାଣ ବୋର୍ଡ ବହନ କରିବ ।
ଆକ୍ସନ ମୋଡରେ କମିଶନରେଟ ପୋଲିସ: ସିଜ ହେବ ମଦୁଆଙ୍କ ଗାଡ଼ି, ଡ୍ରାଇଭର ଯିବେ ଜେଲ୍
ଭୁବନେଶ୍ବର: କଡା ହେଉଛି ମଦୁଆ ଦମନ ଅଭିଯାନ । ଗଳିକନ୍ଦିରେ ଚେକିଂ, ରାସ୍ତା ଉପରେ ବ୍ଳକିଂ । ମଦୁଆଙ୍କୁ ଦମନ କରିବାକୁ ବିଦେଶୀ ଉପାୟ ଆପାଣାଉଛି କମିଶନରେଟ ପୋଲିସ । ଡ୍ରଙ୍କ ଆଣ୍ଡ ଡ୍ରାଇଭ ବିରୋଧରେ ରାଜଧାନୀରେ ନିଆଯାଉଛି ଦୃଢ କାର୍ଯ୍ୟାନୁଷ୍ଠାନ ।
ଫରେନ୍ ପୋଲିସ୍ ଭଳି କମିଶନରେଟ ପୋଲିସର ଷ୍ଟାଇଲ । ଡ୍ରଙ୍କ ଆଣ୍ଡ ଡ୍ରାଇଭ ସହ ନିଶାଖୋରଙ୍କୁ କଡା ହସ୍ତରେ ଦମନ । ଖୁବଶୀଘ୍ର ବାର, କ୍ଲବରେ ହେବ ମାରାଥନ ରେଡ୍ । ମଦପିଇ ଗଡି ଚଳାଇଲେ ସିଜ ହେବ ଗାଡ଼ି । ଡ୍ରାଇଭର ଯିବେ ଜେଲ୍ । ମାସକ ଭିତରେ ରାଜଧାନୀରେ ୬୮୬ ଗାଡ଼ି ସିଜ କରିଛି ପୋଲିସ । ୧୦୦ ଜଣଙ୍କ ବିରୋଧରେ ହେଇଛି ମାମଲା । ଅତ୍ୟଧିକ ମଦ୍ୟପାନ କରିଥିବା ଗାଡ଼ି ଚାଳକଙ୍କ ଉପରେ ଆକ୍ସନ ମୋଡରେ କମିଶନରେଟ୍ ପୋଲିସ । ଡ୍ରଙ୍କ ଏଣ୍ଡ ଡ୍ରାଇଭ୍ ଘଟଣାରେ ରାତିରେ ଚେକିଙ୍ଗ ବ୍ଲକିଂକୁ କଡାକଡ଼ି ପରେ ଗିରଫ ହେଉଛନ୍ତି ଡ୍ରାଇଭର । ଗୋଟିଏ ରାତିରେ ରାଜଧାନୀର ବିଭିନ୍ନ ସ୍ଥାନରୁ ୨୫ଟି ଦାମୀ ଗାଡ଼ି ସିଜ ହୋଇଥିବା ବେଳେ ଡ୍ରାଇଭରଙ୍କୁ ଗିରଫ କରିଛି ପୋଲିସ । କେବେଳ ବାଇକ ନୁହେଁ BMW, ଅଡ଼ି ଭଳି ଦାମୀ ଗାଡ଼ି ପୋଲିସ ଆକ୍ସନରୁ ବର୍ତ୍ତି ପାରିନାହିଁ । ମଦ୍ୟପାନ କରି ବାରମ୍ବାର ଧାରା ପଡିଲେ ଗାଡ଼ି ଲାଇସେନ୍ସ ରଦ୍ଦ କରିବା ସହ ରାସ୍ତାରେ ଚଳାଇ ନଦେବା ପାଇଁ ଚେତାବନୀ ଦିଆଯାଇଛି ।
କିଛି ବାର ଓ ପବ ଅବକାରୀ ନିୟମର ଖୋଲାଖୋଲି ଉଲ୍ଲଂଘନ କରୁଥିବା ମଧ୍ଯ ନଜର ଆସିଛି । ବଡ଼ି ଭୋର ପର୍ଯ୍ୟନ୍ତ ନାଚ ଗୀତ ଡିଜେ ସାଙ୍ଗକୁ ନିଶାର ଆସର ଜମୁଛି । ଆଗକୁ ନିର୍ବାଚନ ଥିବାବେଳେ ପୋଲିସ ଅସାମାଜିକ ଓ ଅପରାଧୀଙ୍କ ଉପରେ ଲଗାମ ଲଗାଉଛି । ପେସାଦାର ଅପରାଧୀଙ୍କୁ ଥାନାରେ ହାଜିରା ପାଇଁ ନୋଟିସ ହେଉଛି । ଏହାରି ଭିତରେ ବାର ପବଗୁଡିକ ଉପରେ ଆଗାମୀ ଦିନରେ ଚଢ଼ାଉ ବ୍ୟାପକ ହେବା ସହ ଲାଇସେନ୍ସ ରଦ୍ଦ ନେଇ ନିଷ୍ପତ୍ତି ନିଆଯିବ ବୋଲି କଡା ଚେତାବନୀ ଦେଇଛନ୍ତି ପୋଲିସ କମିଶନର ସଞ୍ଜୀବ ପଣ୍ଡା ।
ପୋଲିସ କମିଶନର ଭାବେ ସଞ୍ଜୀବ ପଣ୍ଡା କାର୍ଯ୍ୟରେ ଯୋଗଦେବା ପରେ ଇନଫୋର୍ସମେଣ୍ଟକୁ ଗୁରୁତ୍ୱ ଦିଆଯାଇଛି । ଆଗକୁ ଏହା ବଳବତ୍ତର ରହିବ ବୋଲି ଚେତାବନୀ ଦେଇଛି ପୋଲିସ ।
ପାହାଡ଼ରେ ପିଟି ହେଲା ବରଯାତ୍ରୀ ବସ୍, ୨୦ ଆହତ, ୮ ଗୁରୁତର
ଦିଗପହଣ୍ଡି: ଗଞ୍ଜାମ-ଗଜପତି ସୀମାନ୍ତ ତପ୍ତପାଣିର ଆଳୁଖୋଳା ନିକଟରେ ବସ ଦୁର୍ଘଟଣା । ମୋହନାରୁ ଗଞ୍ଜାମ ଅଭିମୁଖେ ଆସୁଥିବା ଗୁପ୍ତେଶ୍ଵର ନାମକ ବରଯାତ୍ରୀ ବସ୍ ଦୁର୍ଘଟଣା ଗ୍ରସ୍ତ । ପାହାଡରେ ବସ୍ ପିଟି ହୋଇଥିବା ସୂଚନା ମିଳିଛି । ଦୁର୍ଘଟଣାରେ ୨୦ ଯାତ୍ରୀ ଆହତ ହୋଇଥିବା ବେଳେ ୮ ଜଣଙ୍କ ସ୍ବାସ୍ଥ୍ୟାବସ୍ଥା ଗୁରୁତର ଥିବା ଜଣାପଡିଛି । ଗୁରୁତରମାନଙ୍କୁ ଏମକେସିଜିକୁ ସ୍ଥାନାନ୍ତର କରାଯାଇଛି ।
ମିଳିଥିବା ସୂଚନା ଅନୁସାରେ, ଗଞ୍ଜାମ ଜିଲ୍ଲା ମେଘଝୁଳିରୁ ମୋହନା ଚାନ୍ଦିପୁଟକୁ ବିବାହ ଉତ୍ସବରେ ଯୋଗ ଦେବାକୁ ବରଯାତ୍ରୀ ଯାଇଥିଲେ । ବିବାହ ଉତ୍ସବରେ ସାମିଲ ହେବା ପରେ ବରଯାତ୍ରୀ ବସରେ ଘରକୁ ଫେରୁଥିଲେ । ଏହି ସମୟରେ ଆଳୁଖୋଳା ନିକଟରେ ଦୁର୍ଘଟଣା ଘଟିଥିଲା ।
ଖବରପାଇ ସାନଖେମୁଣ୍ଡି ଅଗ୍ନିଶମ ବିଭାଗ ଓ ପାଟପୁର ପୋଲିସ ଉଦ୍ଧାର କାର୍ଯ୍ୟ ଆରମ୍ଭ କରିଥିଲେ । ଆହତ ଓ ଗୁରୁତରଙ୍କୁ ଉଦ୍ଧାର କରାଯାଇ ଦିଗପହଣ୍ଡି ମେଡିକାଲ ଭର୍ତ୍ତି କରାଯାଇଛି । ବସରେ ୪୦ ଜଣ ଯାତ୍ରୀ ଥିଲେ । ଆସିକା ଏସଡିପିଓଙ୍କ ସମେତ ଦିଗପହଣ୍ଡି ଓ ସାନଖେମୁଣ୍ଡି ପ୍ରଶାସନିକ ଅଧିକାରୀ ଦୁର୍ଘଟଣା ସ୍ଥଳରେ ପହଞ୍ଚିଛନ୍ତି ।
ମୋଦି ହିନ୍ଦୁ ନୁହଁନ୍ତି, ନୀତୀଶ ପଲଟୁରାମ: ଲାଲୁ
ପାଟନା: ବିହାର ରାଜଧାନୀ ପାଟନାରେ ଚାଲିଛି ଇଣ୍ଡିଆ ମେଣ୍ଟର ରାଲି । ଏଥିରେ ସାମିଲ ହୋଇ ଆରଜେଡି ଅଧ୍ୟକ୍ଷ ତଥା ପୂର୍ବତନ ମୁଖ୍ୟମନ୍ତ୍ରୀ ଲାଲୁ ପ୍ରସାଦ ଯାଦବ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏବଂ ବିହାର ମୁଖ୍ୟମନ୍ତ୍ରୀ ନୀତୀଶ କୁମାରଙ୍କୁ ଟାର୍ଗେଟ କରିଛନ୍ତି । ପ୍ରଧାନମନ୍ତ୍ରୀଙ୍କୁ ସମାଲୋଚନା କରି ସେ ହିନ୍ଦୁ ନୁହଁନ୍ତି ବୋଲି କହିଛନ୍ତି ଲାଲୁ । ସେହିପରି ନୀତୀଶ କୁମାରଙ୍କୁ ପଲଟୁରାମ କହି କକ୍ଷାକ୍ଷ କରିଛନ୍ତି ।
ବିହାରୀ ବାବୁ ଷ୍ଟାଇଲରେ ଲାଲୁ କହିଛନ୍ତି, ‘ମୋଦି କୋଇ ଚିଜ୍ ହୈ କ୍ୟା… । ଆଜିକାଲି ପରିବାରବାଦକୁ ନେଇ ମୋଦି ସମାଲୋଚନା କରୁଛନ୍ତି । ପରିବାର ପାଇଁ ଲୋକେ ଲଢୁଛନ୍ତି ବୋଲି କହୁଛନ୍ତି । ହେଲେ ଆପଣଙ୍କ ପାଖରେ ପରିବାର ନାହିଁ । ଆପଣଙ୍କ ମାଆଙ୍କ ଦେହାନ୍ତ ହେଲା । ହିନ୍ଦୁ ପରମ୍ପରା ଅନୁସାରେ ମାଆ ପାଇଁ ଡାଲି ଚୋପା ଛଡାଇବା କଥା, ହେଲେ ଆପଣ କରିଛନ୍ତି କି ? ରାମ-ରହିମଙ୍କ ଅନୁଗାମୀ ଦେଶରେ ଘୃଣା ଭାବ ସୃଷ୍ଟି କରୁଛନ୍ତି ।’
ନୀତୀଶ ‘ପଲଟୁରାମ’
ସେହିପରି ମହାରାଲିରେ ନୀତୀଶ କୁମାରଙ୍କୁ ପଲଟୁରାମ କହି କଟାକ୍ଷ କରିଛନ୍ତି ଲାଲୁ । କହିଛନ୍ତି, ‘ମୁଁ ନୀତୀଶ କୁମାରଙ୍କୁ କେବେ କୌଣସି ଗାଳି, ଗୁଲଜ କରିନାହିଁ । ପ୍ରଥମେ ଯେବେ ସେ ଆମ ସହ ମେଣ୍ଟ ଭାଙ୍ଗି ଥିଲେ, ମୁଁ ଗାଳି ଦେଇ ନଥିଲି କେବଳ ପଲଟୁରାମ କହିଥିଲି । ତାଙ୍କୁ ଆରଜେଡି ସହ ମେଣ୍ଟ ଭାଙ୍ଗିବାର ନଥିଲା । ତେଜସ୍ବୀ ଭୁଲ କରିଛନ୍ତି । ଦ୍ବିତୀୟ ଥର ବଦଳି ଗଲେ ଓ ମୋଦିଙ୍କ ପାଦ ତଳକୁ ନୀତୀଶ ଚାଲିଗଲେ ।’