ରାଉରକେଲା: ନବଜାତକଙ୍କ ପାଇଁ ବରଦାନ ସାଜିଲା ବିଏସକେଓ୍ବାଇ। ଘରୋଇ ହସ୍ପିଟାଲରେ ମାଗଣାରେ ମିଳିଲା ଅତ୍ୟାଧୁନିକ ଚିକିତ୍ସା । ସୁସ୍ଥ ହୋଇ ଘରକୁ ଫେରିଲେ ଶିଶୁ କନ୍ୟା । ଚିକିତ୍ସାରେ ସମସ୍ତ ସହାୟତା ପାଇଁ ମୁଖ୍ୟମନ୍ତ୍ରୀଙ୍କୁ ଧନ୍ୟବାଦ ଜଣାଇଲେ ପରିବାର । ଗର୍ଭ ଯନ୍ତ୍ରଣା କାରଣରୁ ଅକ୍ଟୋବର ୨୯ରେ ସୁନ୍ଦରଗଡ଼ ରିଜେଣ୍ଟ ମାର୍କେଟ ଅଞ୍ଚଳର ରଫତ ଖାତୁନ ରାଉରକେଲାର ଜୟପ୍ରକାଶ ହସ୍ପିଟାଲରେ ଚିକିତ୍ସା ପାଇଁ ଭର୍ତ୍ତି ହୋଇଥିଲେ। ସାଢେ ଛଅ ମାସରେ ଜନ୍ମ କାରଣରୁ ଶିଶୁକନ୍ୟାର ଶରୀର ଅସୁସ୍ଥ ହୋଇ ପଡିଥିଲା।

ପାଖାପାଖି ଦୁଇମାସ ଆଇସିୟୁରେ ରଖାଯାଇ ଉନ୍ନତମାନର ଓ ଅତ୍ୟାଧୁନିକ ଚିକିତ୍ସା ସୁବିଧା ଯୋଗାଇ ଦିଆଯିବାରୁ ଶିଶୁକନ୍ୟାଙ୍କ ଜୀବନ ବଞ୍ଚି ପାରିଥିଲା । ସମସ୍ତ ଉନ୍ନତମାନର ଚିକିତ୍ସା ପାଇଁ ପରିବାରକୁ ଟଙ୍କାଟିଏ ବି ଖର୍ଚ୍ଚ କରିବାକୁ ପଡିନଥିଲା। ଏନେଇ ପରିବାର ଖୁସି ପ୍ରକାଶ କରିବା ସହ ମୁଖ୍ୟମନ୍ତ୍ରୀଙ୍କୁ ଧନ୍ୟବାଦ ଜଣାଇଛନ୍ତି।

ସାଢେ ଛଅ ମାସରେ ଶିଶୁକନ୍ୟା ଜନ୍ମ ହୋଇଥିବାରୁ ମାଆ ଓ ଶିଶୁଙ୍କ ଜୀବନ ପ୍ରତି ବିପଦ ରହିଥିଲା। କିନ୍ତୁ BSKY କାର୍ଡ ଜରିଆରେ ଉନ୍ନତମାନର ଓ ଅତ୍ୟାଧୁନିକ ଚିକିତ୍ସା ସୁବିଧା ଯୋଗାଇ ଦିଆଯିଵାରୁ ଉଭୟେ ସୁସ୍ଥ ହୋଇ ଘରକୁ ଫେରିଛନ୍ତି। ଏଭଳି ହଜାର ହଜାର ଗରିଵ ରୋଗୀ ପାଇଁ ଜୀବନଦାୟକ ସାଜିଛି ବିଏସକେଓ୍ବାଇ ।

ଭୁବନେଶ୍ୱର: ରାଜ୍ୟରେ ସମୃଦ୍ଧ ହେଉଛି ଶିକ୍ଷା ବ୍ୟବସ୍ଥା। ପୂରଣ ହେଉଛି ଶିକ୍ଷକ ପଦବୀ। ଅନୁଦାନପ୍ରାପ୍ତ ବେସରକାରୀ ଉଚ୍ଚ ମାଧ୍ୟମିକ ବିଦ୍ୟାଳୟରେ ୪୮୨ ଜଣ ସ୍ନାତକୋତ୍ତର ଶିକ୍ଷକଙ୍କୁ ନିଯୁକ୍ତି ଦେଇଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ। ପିଜିଟି ଟିଚର ନିଯୁକ୍ତିରେ ଏମାନେ ହେଉଛନ୍ତି ପ୍ରଥମ ବ୍ୟାଚ। ଲୋକସେବା ଭବନରେ ଆୟୋଜିତ ସ୍ବତନ୍ତ୍ର କାର୍ଯ୍ୟକ୍ରମରେ ସମସ୍ତଙ୍କୁ ନିଯୁକ୍ତିପତ୍ର ପ୍ରଦାନ କରି ନିଜକୁ ଅପଡେଟ ରଖିବାକୁ ମୁଖ୍ୟମନ୍ତ୍ରୀ ପରାମର୍ଶ ଦେଇଛନ୍ତି।

ଏହାସହ ପ୍ରଯୁକ୍ତି ବିଜ୍ଞାନକୁ ଶିକ୍ଷକତାରେ ଉପଯୋଗ କରି ସାବଲୀଳ କରିବାକୁ ନବୀନ କହିଛନ୍ତି। ଶ୍ରେଣୀଗୃହକୁ ପରିବେଶ ଭିତ୍ତିକ କରି ଛାତ୍ରଛାତ୍ରୀମାନଙ୍କୁ ଗୁଣାତ୍ମକ ଶିକ୍ଷା ପ୍ରଦାନ କରିବା ଉପରେ ନବୀନ ଗୁରୁତ୍ବ ଦେଇଛନ୍ତି । ସମସ୍ତଙ୍କୁ ନବୀନ ଅଭିନନ୍ଦନ ଜଣାଇବା ସହ ଉତ୍ସର୍ଗୀକୃତ ମନୋଭାବ ନେଇ ନିଷ୍ଠାର ସହିତ ସମସ୍ତେ ଶିକ୍ଷକତା କରି ରାଜ୍ୟ ରୂପାନ୍ତରଣରେ ଗୁରୁତ୍ବପୂର୍ଣ୍ଣ ଭୂମିକା ତୁଲାଇବାକୁ ଶିକ୍ଷକମାନଙ୍କୁ ପରାମର୍ଶ ଦେଇଛନ୍ତି ମୁଖ୍ୟମନ୍ତ୍ରୀ।  ଉଚ୍ଚମାଧ୍ୟମିକ ସ୍କୁଲ ଗୁଡ଼ିକର ରୂପାନ୍ତରଣ କରାଯାଉଛି ।

ଏହା ଭିତରେ ୧୧୦ଟି ହାଇସ୍କୁଲକୁ ଉଚ୍ଚ ମାଧ୍ୟମିକ ସ୍ତରକୁ ଉନ୍ନୀତ କରାଯାଇଛି। ଉଚ୍ଚମାଧ୍ୟମିକ ସ୍ତର ଛାତ୍ରଛାତ୍ରୀଙ୍କ ପାଇଁ ଅତ୍ୟନ୍ତ ଗୁରୁତ୍ବପୂର୍ଣ୍ଣ। ଏହିଠାରୁ ଟେକ୍ନିକାଲ ଓ ପ୍ରଫେସନାଲ ଶିକ୍ଷାକୁ ବାଟ ଫିଟିଥାଏ। ତେଣୁ ଶିକ୍ଷକମାନେ ସର୍ବୋତ୍କୃଷ୍ଟ ଉପାୟରେ ପିଲାମାନଙ୍କୁ ଶିକ୍ଷାଦାନ କରିବାକୁ ମୁଖ୍ୟମନ୍ତ୍ରୀ ପରାମର୍ଶ ଦେଇଛନ୍ତି।