ଭୁବନେଶ୍ୱର: କମିଶନରେଟ ପୋଲିସ କବଜାରେ ବାଇକ ଲୁଟେରା ଗ୍ୟାଙ୍ଗ। ଦୁର୍ଦ୍ଦାନ୍ତ ଲୁଟେରା ସାନୁ ସହ ଦୁଇ ସହଯୋଗୀଙ୍କୁ ଗିରଫ କଲା ନୟାପଲ୍ଲୀ ଥାନା ପୋଲିସ୍ । ସାନୁ ବାଇକ ଲୁଟ୍ କରୁଥିବା ବେଳେ ଦୁଇ ସହଯୋଗୀ ବାଇକ କିଣୁଥିଲେ। ଅଭିଯୁକ୍ତଙ୍କ ପାଖରୁ ୨୦ଟି ବାଇକ ଜବତ ହୋଇଛି।
ଅଭିଯୁକ୍ତ ସାନୁ ନାଁରେ ଥାନାରେ ରହିଛି ୨୦ରୁ ଅଧିକ ମାମଲା। ଅଭିଯୁକ୍ତ ମାନେ ଚୋରୀ ବାଇକରେ ଅପରାଧ ଘଟାନ୍ତି। ଚୋରି ବାଇକ ଗୁଡିକୁ ଅଳ୍ପ ଟଙ୍କାରେ ବିକ୍ରି କରନ୍ତି। ଏମାନେ ପୂର୍ବରୁ କେତେ ବାଇକ ଚୋରି କରି ବିକ୍ରି କରିଛନ୍ତି ତଦନ୍ତ ଚାଲିଛି। ଏନେଇ ସୂଚନା ଦେଲେ ପୋଲିସ କମିଶନର ସୌମେନ୍ଦ୍ର ପ୍ରିୟଦର୍ଶୀ।
ନୂଆଦିଲ୍ଲୀ: ମହାଦେବ ଆପ୍ ଦୁର୍ନୀତି ମାମଲାରେ ବଡ଼ କାର୍ଯ୍ୟାନୁଷ୍ଠାନ। ଦୁବାଇରୁ ଗିରଫ ହେଲା ସହ-ସଂସ୍ଥାପକ ରବି ଉପ୍ପଲ। ଇଡିର ଅପିଲ ପରେ ଦୁବାଇ ପୋଲିସର ଆକ୍ସନ। ଇଡ଼ିର ନିବେଦନ ପରେ ଇଣ୍ଟରପୋଲ୍ ଦ୍ୱାରା ଜାରି ହୋଇଥିଲା ରେଡ୍ କର୍ଣ୍ଣର ନୋଟିସ। ତାକୁ ଭାରତକୁ ଆଣିବା ପାଇଁ ଆଲୋଚନା କରାଯାଉଛି।
ସୂଚସୂ ନାନୁସାରେ, ରବି ଉପ୍ପଲଙ୍କୁ ଗତ ସପ୍ତାହରେ ଦୁବାଇରେ ଗିରଫ କରାଯାଇଥିଲା। ତାଙ୍କୁ ଭାରତ ପଠାଇବା ପାଇଁ ଇଡି ଅଧିକାରୀ ଦୁବାଇ କର୍ତ୍ତୃପକ୍ଷଙ୍କ ସହ ଯୋଗାଯୋଗରେ ଅଛନ୍ତି। ଭାରତରେ ଛତିଶଗଡ ଏବଂ ମୁମ୍ବାଇ ପୋଲିସ ଉପ୍ପଲ ବିରୋଧରେ ତଦନ୍ତ କରୁଛି। ଏପଟେ ଇଡି ମହାଦେବ ବେଟିଂ ଆପ୍ ସହ ଜଡିତ ମନି ଲଣ୍ଡରିଂ ମାମଲାର ତଦନ୍ତ କରୁଛି। ରବି ହେଉଛି ମହାଦେବ ମୁଖ୍ୟ ଅଭିଯୁକ୍ତ ସୌରଭ ଚନ୍ଦ୍ରକରର ସହଯୋଗୀ । ମହାଦେବ ବୁକ୍ ଆପ୍ ବେଟିଂ ପାଇଁ ଅନଲାଇନ୍ ପ୍ଲାଟଫର୍ମ ଯୋଗାଇଥାଏ| ଏହାକୁ ଭାରତରେ ବ୍ୟାନ୍ କରାଯାଇଛି। କିନ୍ତୁ ଏହା ଅନ୍ୟ ଦେଶରେ ଚାଲିଛି | ଛତିଶଗଡର ବାସିନ୍ଦା ଚନ୍ଦ୍ରକର ଏବଂ ତାଙ୍କ ସହଯୋଗୀ ରବି ଉପପାଲ ଦୁବାଇରୁ ଏହାକୁ ପରିଚାଳନା କରୁଛନ୍ତି। ଉଭୟଙ୍କ ବିରୋଧରେ ଲୁକଆଉଟ୍ ସର୍କୁଲାର ଜାରି କରାଯାଇଥିଲା।
ଜେରାବେଳେ ତଦନ୍ତକାରୀ ସଂସ୍ଥା ଜାଣିବାକୁ ପାଇଥିଲେ- ରବି ପ୍ରଶାନ୍ତ ମହାସାଗର ଅନ୍ତର୍ଗତ ବାନୁଆତୁ ନାମକ ଦେଶର ଏକ ପାସପୋର୍ଟ ହାସଲ କରିଛନ୍ତି । ଏହି ପାସପୋର୍ଟ ଜରିଆରେ ସେ ଅଷ୍ଟ୍ରେଲିଆରୁ ଭିସା ଲାଗି ଆବେଦନ କରିଥିଲେ । ଗତ ଫେବ୍ରୁଆରୀରେ ଦୁବାଇରେ ମହାଦେବ ଆପର ପ୍ରମୋଟର ସୌରଭ ଚନ୍ଦ୍ରକାରଙ୍କ ବିବାହ ଉତ୍ସବରେ ୨୦୦ କୋଟି ଟଙ୍କା ଖର୍ଚ୍ଚ ହେବା ଘଟଣାକୁ ନେଇ ଚାଞ୍ଚଲ୍ୟ ସୃଷ୍ଟି ହୋଇଥିଲେ । ଏହି ଉତ୍ସବରେ ବହୁ ବଲିଉଡ ଅଭିନେତା ଯୋଗଦେବା ପରେ ଇଡି ମାମଲାର ଛାନବିନ କରିଥିଲା । ସୌରଭ ଓ ରବିଙ୍କ ଘର ଛତିଶଗଡ଼ ଭିଲାଇରେ ଏବଂ ସେମାନେ ଦୁବାଇରେ ରହି କାର୍ଯ୍ୟ କରୁଥିଲେ । ଭାରତ, ଥାଇଲାଣ୍ଡ, ମାଲେସିଆ ଓ ୟୁଏଇରେ ୩୦ଟି କଲ୍ ସେଣ୍ଟର କରି ସେମାନେ ବେଟିଂ ଆପ୍ ଚଳାଇଥିଲେ ।
ଇଡି ତଦନ୍ତରୁ ଜଣାପଡିଛି ଯେ ମହାଦେବ ଅନଲାଇନ୍ ବୁକ୍ ରେ ପୋକର୍, କାର୍ଡ ଗେମ୍, ତାସ୍ ଖେଳ, କ୍ରିକେଟ୍, ବ୍ୟାଡମିଣ୍ଟନ୍, ଟେନିସ୍, ଫୁଟବଲ୍ ଆଦିରେ ଗେମ୍ ଖେଳାଯାଏ। ଡ୍ରାଗନ୍ ଟାଇଗର, କାର୍ଡ ଇତ୍ୟାଦି ବ୍ୟବହାର କରି ଭର୍ଚୁଆର୍ଚୁଲ୍ କ୍ରିକେଟ୍ ଖେଳ, ଏପରିକି ଭାରତରେ ଚାଲିଥିବା ବିଭିନ୍ନ ନିର୍ବାଚନରେ ମଧ୍ୟ ବେଟିଂ କରାଇଥାଏ।ବର୍ତ୍ତମାନ ସୁଦ୍ଧା ବେଟିଂ ଆପ ମାମଲାରେ ସୁନୀଲ ଦମାନି, ଅନିଲ ଦମାନି, ଏଏସଆଇ ଚନ୍ଦ୍ରଭୂଷଣ ବର୍ମା, ଜଣେ କନଷ୍ଟେବଳ ଓ ସତୀଶ ଚନ୍ଦ୍ରକାରଙ୍କୁ ଗିରଫ କରାଯାଇଛି ।
ଉଲ୍ଲେଖଯୋଗ୍ୟ, ଦୈନିକ ୨୦୦ କୋଟିରୁ ଅଧିକ ଟଙ୍କାର ଟର୍ଣ୍ଣଓଭର କରୁଥିବା ବେଟିଂ ଆପକୁ ନେଇ ଗତ ନଭେମ୍ବରରେ ଛତିଶଗଡ଼ରେ ରାଜନୈତିକ ହଲଚଲ କରିଥିଲା । ପୂର୍ବତନ ଛତିଶଗଡ଼ ମୁଖ୍ୟମନ୍ତ୍ରୀ ଭୂପେଶ ବଘେଲଙ୍କୁ ଅସୀମ ଦାସ ନାମକ ଜଣେ ବ୍ୟକ୍ତି ୫୦୮ କୋଟି ଟଙ୍କା ଦେଇଥିଲେ ବୋଲି ପ୍ରଥମେ ଦାବି କରିଥିଲେ । ମାତ୍ର ପରେ ସେ ଏହାକୁ ଅସ୍ବୀକାର କରିଥିଲେ ।
ମାଲକାନଗିରି: ସାକାର ହେଉଛି ମୁଖ୍ୟମନ୍ତ୍ରୀଙ୍କ ସ୍ବପ୍ନ। ଆକାଶ ପଥରେ ଯୋଡିହେବ ମାଲକାନଗିରି । ଖୁବଶୀଘ୍ର ଜିଲ୍ଲାରୁ ଉଡିବ ବିମାନ । କମ ସମୟରେ ରାଜଧାନୀ ସହ ଅନ୍ୟ ରାଜ୍ୟକୁ ଯାତାୟତ କରିପାରିବେ ଜିଲ୍ଲାବାସୀ। ଜୋରସୋରରେ ଚାଲିଛି ମାଲକାନଗିରି ବିମାନବନ୍ଦର କାର୍ଯ୍ୟ ।
ଆଭିଏସନ୍ ଆଡଭାଇଜର ସୁରେଶ ଚନ୍ଦ୍ର ହୋତା ଏବଂ ବିମାନ ବନ୍ଦର ପ୍ରାଧିକରଣ ଏଜିଏମ ପ୍ରଦୀପ୍ତ କୁମାର ବେଜ ନିର୍ମାଣଧୀନ ଏଆରଷ୍ଟ୍ରିପର ନିରୀକ୍ଷଣ କରି ଫେରିଛନ୍ତି । ଅତିରିକ୍ତ ଜିଲ୍ଲାପାଳ ବେଦବର ପ୍ରଧାନ , ରାଜ୍ୟ ପୂର୍ତ୍ତ ବିଭାଗ ମୁଖ୍ୟ ନିର୍ମାଣ ଯନ୍ତ୍ରୀ ଆଲୋକ କୁମାର ମହାନ୍ତି, ଜିଲ୍ଲା ପୂର୍ତ୍ତ ବିଭାଗ ଅଧିକ୍ଷକ ଯନ୍ତ୍ରୀ ନିହାର ରଞ୍ଜନ ବେହେରାଙ୍କ ଉପସ୍ଥିତରେ ମାଲକାନଗିରି ଏଆରଷ୍ଟ୍ରିପର ଅନୁଧ୍ୟାନ କରାଯାଇଛି। ନିର୍ଦ୍ଧାରିତ ସମୟ ସୀମା ମଧ୍ୟରେ ନିର୍ମାଣ କାର୍ଯ୍ୟ ଶେଷ ହେବ ବୋଲି କହିଛନ୍ତି ଅତିରିକ୍ତ ଜିଲ୍ଲାପାଳ।
ରାୟଗଡ଼ା: ପୁଣି ମହାବଳର ବାଛୁରି ଶିକାର। ଘଟଣାଟି ଘଟିଛି ରାୟଗଡା ଜିଲ୍ଲା ଗୁଡାରି ବନାଞ୍ଚଳ ତେମ୍ବାଗୁଡା ଅଞ୍ଚଳରେ। ମହାବଳ ବାଘଟି ତେମ୍ବାଗୁଡା ରାଜେଶ ରାଓଙ୍କ ଗୁହାଳୁରୁ ବାଛୁରିକୁ ଟାଣି ନେଇ ବାଛୁରୀକୁ ମାରିଦେଇଛି। ଘଟଣାସ୍ଥଳରୁ ବାଛୁରିର କିଛି ଗୋଡ଼ଅଂଶ ସହ ରକ୍ତଛିଟା ଓ ମହାବଳ ବାଘର ପାଦଚିହ୍ନ ଠାବ କରିଛି ଗୁଡ଼ାରି ବନ ବିଭାଗ। ଫଳରେ ସ୍ଥାନୀୟ ଅଞ୍ଚଳରେ ଆତଙ୍କ ଖେଳିଯାଇଛି।
ସରକାରୀ ନିୟମ ଅନୁଯାୟୀ ବାଛୁରୀ ମାଲିକଙ୍କୁ କ୍ଷତିପୂରଣ ଦିଆଯିବା ବୋଲି ରେଞ୍ଜର ଦିଲ୍ଲୀପ ପଟ୍ଟନାୟକ ସୂଚନା ଦେଇଛନ୍ତି। ବର୍ତ୍ତମାନ ବାଘର ଗତିବିଧି ଉପରେ ନଜର ରଖିଛି ବନ ବିଭାଗ। ଏଥିସହିତ ପାଖ ଗାଁ ଗୁଡିକରେ ବନ ବିଭାଗ ପକ୍ଷରୁ ଲୋକଙ୍କୁ ସଚେତନ କରାଯାଇଛି।
ନୂଆଦିଲ୍ଲୀ: ଆଜିଠୁ ମଧ୍ୟପ୍ରଦେଶ ଓ ଛତିଶଗଡ଼ରେ ନୂଆ ସରକାର। ମୋହନ ଯାଦବ ମଧ୍ୟପ୍ରଦେଶ ଓ ବିଷ୍ଣୁଦେବ ସାଏ ଛତିଶଗଡ଼ର ମୁଖ୍ୟମନ୍ତ୍ରୀ ଭାବେ ଶପଥ ନେବେ। ଛତିଶଗଡ଼ର ରାଇପୁରରେ ଅପରାହ୍ମ ଦୁଇଟାରେ ଶପଥ ଗ୍ରହଣ ସମାରୋହ ଅନୁଷ୍ଠିତ ହେବ। ମୁଖ୍ୟମନ୍ତ୍ରୀଙ୍କ ସହ ୧୩ ଜଣ ମନ୍ତ୍ରୀ ଶପଥ ନେବା ସୂଚନା ମିଳିଛି।
ବିଷ୍ଣୁଦେବ ସାଏ ଛତିଶଗଡ଼ର ପ୍ରଥମ ଆଦିବାସୀ ମୁଖ୍ୟମନ୍ତ୍ରୀ। ୧୯୯୦ରୁ ୧୯୯୮ ଯାଏ ଥିଲେ ମଧ୍ୟପ୍ରଦେଶରୁ ବିଧାୟକ । ୧୯୯୯, ୨୦୦୪, ୨୦୦୯ ଓ ୨୦୧୪ରେ ରାଇଗଡ ଆସନରୁ ଲୋକସଭାକୁ ହୋଇଥିଲେ ନିର୍ବାଚିତ । ୨୦୧୪ରୁ ୨୦୧୯ ମଧ୍ୟରେ ସେ ହୋଇଥିଲେ କେନ୍ଦ୍ର ଖଣି, ଇସ୍ପାତ, ଶ୍ରମ ଓ ନିଯୁକ୍ତି ମନ୍ତ୍ରୀ । ୨୦୦୬ ଓ ୨୦୨୦ରେ ସେ ଥିଲେ ଛତିଶଗଡ ବିଜେପି ମୁଖ୍ୟ।
ଗତ ବିଧାନସଭା ନିର୍ବାଚନରେ କଂଗ୍ରେସ ପ୍ରାର୍ଥୀଙ୍କୁ ହରାଇ କୁନକୁରି ଆସନରୁ ବିଜୟୀ ହୋଇଛନ୍ତି । ସେହିପରି ଭୋପାଳର ମୋତିଲାଲ ନେହେରୁ ଷ୍ଟାଡିୟମରେ ଶପଥ ନେବେ ମୋହନ ଯାଦବ । ମୋହନଙ୍କ ସହିତ ୧୨ ଜଣ ମନ୍ତ୍ରୀ ଶପଥ ନେବାର କାର୍ଯ୍ୟକ୍ରମ ରହିଛି । ମୋହନ ଯାଦବ ଲଗାତର ୩ ଥର ବିଧାୟକ ଭାବେ ନିର୍ବାଚିତ ହୋଇଛନ୍ତି । ପୂର୍ବରୁ ଶିବରାଜ ସିଂ ଚୌହ୍ବାନଙ୍କ ସରକାରରେ ଥିଲେ ସେ ଉଚ୍ଚ ଶିକ୍ଷାମନ୍ତ୍ରୀ । ଜଗଦୀଶ ଦେଓଡା ଏବଂ ରାଜେଶ ଶୁକ୍ଲା ଉପମୁଖମନ୍ତ୍ରୀ ଭାବେ ଶପଥ ନେବେ । ଶପଥ ଗ୍ରହଣ ଉତ୍ସବରେ ବିଜେପିର ବରିଷ୍ଠ ନେତାମାନେ ସାମିଲ ହେବେ ।
ନୂଆଦିଲ୍ଲୀ: ପ୍ରଥମେ ବିବାଦ ପୁଣି ସମସ୍ୟା ପିଛା ଛାଡିବାରେ ନାଁ ନେଉନି। ସାଂସଦ ପଦ ପରେ ଖୂବ ଶୀଘ୍ର ହାତରୁ ଯିବ ସରକାରୀ ବାସଭବନ। ଆମେ କହୁଛୁ ଟିଏମସି ନେତ୍ରୀ ତଥା ସାଂସଦ ମହୁଆ ମୈତ୍ରଙ୍କ କଥା। ଦିଲ୍ଲୀରୁ କୋଲକାତା ଚର୍ଚ୍ଚାରେ ସାଂସଦ ମହୁଆ। ନିକଟରେ ଲୋକସଭା ଏଥିକ୍ସ କମିଟିର ସୁପାରିଶ କ୍ରମେ ଟିଏମସି ସାଂସଦ ମହୁଆ ମୈତ୍ରଙ୍କ ସାଂସଦ ପଦ ରଦ୍ଦ ହୋଇଛି।
ବଢିବାରେ ଲାଗିଛି ମହୁଆଙ୍କ ସମସ୍ୟା। ଲୋକସଭାରୁ ବହିଷ୍କାର ହେବା ପରେ ଏବେ ୩୦ ଦିନ ମଧ୍ୟରେ ହିଁ ତାଙ୍କୁ ସରକାରୀ ବାସଭବନ ଖାଲି କରିବାକୁ କହିଲେ ସଂସଦର ହାଉସିଂ କମିଟି। ମହୁଆଙ୍କ ବିରୋଧରେ ’କ୍ୟାସ୍ ଫର୍ କ୍ୱେରି’ ଅଭିଯୋଗରେ ରିପୋର୍ଟ ଆସିବା ପରେ ଡିସେମ୍ବର ୮ରେ ସାଂସଦ ପଦ ରଦ୍ଦ କରାଯାଇଥିଲା। ଏବେ ତାଙ୍କୁ ସରକାରୀ ବାସଭବନ ଖାଲି କରିବାକୁ ପଡିବ, ଏ ସମ୍ପର୍କରେ କାର୍ଯ୍ୟ ମଧ୍ୟ ଆରମ୍ଭ ହୋଇଥିବା ନେଇ ଜଣାପଡିଛି ।୩୦ ଦିନ ମଧ୍ୟରେ ସରକାରୀ ବାସଭବନ ଛାଡ଼ିବାକୁ ହାଉସିଂ କମିଟି ତରଫରୁ ନୋଟିସ୍ ଜାରି କରାଯାଇଛି।
ସୂଚନା ଅନୁସାରେ, ସଂସଦରେ ’କ୍ୟାସ୍ ଫର୍ କ୍ୱେରି’ ଅଭିଯୋଗ ଆସିଥିଲା। ଏହା ସହ ରିପୋର୍ଟ ଅନୁଯାୟୀ ମହୁଆ ନିଜ ବ୍ୟବସାୟୀ ବନ୍ଧୁ ହିରାନନ୍ଦାନୀଙ୍କଠାରୁ ଟଙ୍କା ଏବଂ ମୂଲ୍ୟବାନ ଉପହାର ନେଇ ସଂସଦର ଲଗଇନ୍ ପାସୱାର୍ଡ ଓ ଆଇଡି ସେୟାର କରିଥିଲେ । ଅନ୍ୟପଟେ ଲୋକ ସଭାରୁ ବହିଷ୍କୃତ ହେବା ପରେ ମହୁଆ ସୋମବାର ଦିନ ସୁପ୍ରିମକୋର୍ଟରେ ଚ୍ୟାଲେଞ୍ଜ କରିଛନ୍ତି। ତାଙ୍କ ସହ ଅନ୍ୟାୟ ହୋଇଥିବା ନେଇ ସୁପ୍ରିମକୋର୍ଟରେ ନିଜ ପକ୍ଷ ରଖିଲେ ମହୁଆ। ତାଙ୍କୁ ଗୃହରେ ନିଜ ପକ୍ଷ ମଧ୍ୟ ରଖିବାକୁ ଦିଆଯାଇନଥିବା ବେଳେ ଏଥିକ୍ସ କମିଟି ଗୃହର ନିୟମ ଭଙ୍କ କରିଥିବା କହିଛନ୍ତି ଟିଏମଟି ନେତ୍ରୀ ମହୁଆ ମୈତ୍ର।
ଭୁବନେଶ୍ବର: ରାଜ୍ୟ ପରିବହନ ବିଭାଗ ଦ୍ବାରା ନ୍ୟାସନାଲ ରୋଡ଼ ସେପ୍ଟି ସର୍ଟ ଫିଲ୍ମ ଫେଷ୍ଟିଭାଲ ୨୦୨୩ର ପୁରସ୍କାର ବିତରଣ ଉତ୍ସବ ଅନୁଷ୍ଠିତ । ଏହି ଫେଷ୍ଟିଭାଲରେ ୮ ଟି ରାଜ୍ୟର ୭ଟି ଭାଷାରେ ୨୪୭ ଟି ଫିଲ୍ମ ଭାଗନେଇଥିଲେ । ଏହି ଫିଲ୍ମ ମଧ୍ୟରୁ ୩ ଟି ଫିଲ୍ମକୁ ପୁରସ୍କାର ପ୍ରଦାନ କରାଯାଇଛି। ପ୍ରଥମ ପୁରସ୍କାର ଏକ ଲକ୍ଷ ଟଙ୍କାର ଅର୍ଥ ରାଶି , ଦ୍ବିତୀୟ ପୁରସ୍କାର ପାଇଁ ୮୦ ହଜାର, ତୃତୀୟ ପୁରସ୍କାର ପାଇଁ ୬୦ ହଜାର ଟଙ୍କା ପ୍ରଦାନ କରାଯାଇଛି । ଓଡ଼ିଆରେ ବିଶ୍ଵସ୍ତ ସାଥୀ ପ୍ରଥମ , ହେ ପ୍ରଭୁ ଦ୍ବିତୀୟ , ସିଲଟ ତୃତୀୟ ହୋଇଛନ୍ତି । ସେହିଭଳି ଇଂରାଜୀ ଭାଷାରେ ଆଇଏଫ୍ ପ୍ରଥମ ଫିଲ୍ମ, ଓ୍ବାଟ ଦି ହେଲମେଟ ଦ୍ବିତୀୟ , ହେଲମେଟ ସାଇଲେଣ୍ଟ ତୃତୀୟ ଫିଲ୍ମ ଭାବେ ପୁରସ୍କୃତ ହୋଇଛି । ଭୁବନେଶ୍ୱର କିଟ୍ କ୍ୟାମ୍ପସରେ ଆୟୋଜିତ ହୋଇଥିଲା କାର୍ଯ୍ୟକ୍ରମ । ଏହି କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଭିଡିଓ କନଫରେନ୍ସ ମାଧ୍ୟମରେ ଯୋଗ ଦେଇଥିଲେ। ପ୍ରତିଟି ଜୀବନ ମୂଲ୍ୟବାନ ତେଣୁ ଲୋକମାନଙ୍କୁ ଫିଲ୍ମ ମାଧ୍ୟରେ ସଚେତନତା କରାଯାଉଛି। ଓଡ଼ିଆରେ ଦୁର୍ଘଟଣା ରୋକିବା ଓ ମୂଲ୍ୟବାନ ଜୀବନକୁ ସୁରକ୍ଷିତ ରଖିବା ପାଇଁ ରାଜ୍ୟ ସରକାର ଓ ପରିବହନ ବିଭାଗ କାର୍ଯ୍ୟ ପ୍ରଶଂସନୀୟ ବୋଲି ମୁଖ୍ୟମନ୍ତ୍ରୀ କହିଛନ୍ତି। ସମ୍ମାନୀତ ଅତିଥି ଭାବେ ପରିବହନ ମନ୍ତ୍ରୀ ଟୁକୁନି ସାହୁ, ପରିବହନ ବିଭାଗର ପ୍ରିନ୍ସିପାଲ ସେକ୍ରେଟାରୀ ଉଷା ପାଢ଼ୀ, ପରିବହନ ବିଭାଗର କମିଶନର ଅମିତାଭ ଠାକୁର, କ୍ରୁଟର ଏମଡି ଅରୁଣ ବୋଥ୍ରା, ସମାଜସେବୀ ସ୍ମୃତି ମହାପାତ୍ର ଯୋଗ ଦେଇଥିଲେ ।
ସମ୍ବଲପୁର: ରଖେ ହରି ତ ମାରେ କିଏ । ପଥର ଚିରି ବାହାରିଲା ପାର୍ଥବୀ । ଜଙ୍ଗଲ ଭିତରେ ଅନ୍ଧାରୁଆ ବୋରଓ୍ବେଲ ଭିତରେ ମୃତ୍ୟୁ ସହିତ ସଂଘର୍ଷ କରି ମୃତ୍ୟୁବିଜୟୀ ହୋଇଛି ନବଜାତକ । ୮ ଘଣ୍ଟାରୁ ଅଧିକ ସମୟର ମାରାଥନ ଅପରେସନ ପରେ ବୋରଓ୍ବେଲରୁ ଜୀବିତ ଉଦ୍ଧାର ହୋଇଛି ନବଜାତ ଶିଶୁକନ୍ୟା । ସମ୍ବଲପୁର ରେଙ୍ଗାଲୀ ବ୍ଲକ ଲରିପାଲି ଜଙ୍ଗଲ ଭିତରେ ବୋରଓ୍ବେଲରେ ପଡ଼ିଥିବା ଶିଶୁଟିକୁ ସୁରକ୍ଷିତ ଭାବେ ଉଦ୍ଧାର କରାଯାଇଛି । ଉଦ୍ଧାର ପରେ ତାକୁ ରେଙ୍ଗାଲୀ ମେଡିକାଲରେ ପ୍ରାଥମିକ ଚିକିତ୍ସା କରାଯାଇଥିଲା । ସେଠାରୁ ତାକୁ ନ୍ତ ବୁର୍ଲା ମେଡିକାଲକୁ ସ୍ଥାନାନ୍ତରିତ କରାଯାଇଛି । ସ୍ବତନ୍ତ୍ର ଆମ୍ବୁଲାନ୍ସରେ ଡାକ୍ତରୀ ଦଳଙ୍କ ତତ୍ତ୍ବାବଧାନରେ ଶିଶୁକନ୍ୟାକୁ ଡାକ୍ତରଖାନା ନିଆଯାଉଛି । ସେଠାରେ ସ୍ପେଶାଲ ଟିମ୍ ତାର ଚିକିତ୍ସା କରିବେ । ଉଦ୍ଧାରକାରୀ ଦଳର କହିବା ଅନୁସାରେ, ବୋରଓ୍ବେଲ ନିକଟରେ ୧୭ରୁ ୧୮ ଫୁଟର ଗାତ ଖୋଳାଯାଇଥିଲା ।
ନବଜାତକଟି କେଉଁଠି ଅଛି ସେନେଇ ଭିକ୍ଟିମ ଲୋକେସନ କ୍ୟାମେରାରେ ଟ୍ରାକ କରାଯାଇଥିଲା । ପରେ ନିର୍ଦ୍ଦିଷ୍ଟ ବ୍ୟବଧାନରେ ପାଇପକୁ ତଳୁ କଟାଯାଇଥିଲା । ଶିଶୁଟିକୁ ସୁରକ୍ଷିତ ଉଦ୍ଧାର କରିବା ପାଇଁ ପାଇପ ତଳେ ଏକ କନା ବିଛାଯାଇଥିଲା । ପାଇପ ଭିତରେ ଏକ କାଚ ବୋତଲ ଓ ତା ଉପରେ ଥିବା ଏକ ପ୍ଲାଷ୍ଟିକ ଉପରେ ଶିଶୁ କନ୍ୟାଟି ଅଟକି ରହିଥିଲା । ବୋତଲକୁ କାଢ଼ିଦେବା ପରେ ଶିଶୁ କନ୍ୟାଟି ଉଦ୍ଧାରକାରୀ ଦଳଙ୍କ ହାତକୁ ଖସିଆସିଥିଲା । ପରେ ତାକୁ ତୁରନ୍ତ ଡାକ୍ତରଖାନାକୁ ନିଆଯାଇଥିଲା । ଅଗ୍ନିଶମ ବାହିନୀ, ଓଡ୍ରାଫ ଓ ଜିଲ୍ଲା ପ୍ରଶାସନ ରେସ୍କ୍ୟୁକୁ ଅଦ୍ଭୁତପୂର୍ବ ସଫଳତା ମିଳିଥିବାରୁ ସବୁଆଡ଼ୁ ଅଭିନନ୍ଦନର ସୁଅ ଛୁଟୁଛି ।
ସମ୍ବଲପୁର: ଶିଶୁ କନ୍ୟାର ଜୀବନ୍ତ ଉଦ୍ଧାର ପରେ ଆଶ୍ବସ୍ତ ହେଲେ ମୁଖ୍ୟମନ୍ତ୍ରୀ । ଉଦ୍ଧାରକାରୀ ଦଳକୁ ଜଣାଇଲେ ଧନ୍ୟବାଦ । ଓଡ୍ରାଫ, ଅଗ୍ନିଶମ, ଜିଲ୍ଲା ପ୍ରଶାସନକୁ ଉଦ୍ଧାରକାର୍ଯ୍ୟ ପାଇଁ ଧନ୍ୟବାଦ ଜଣାଇଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ପ୍ରତିଟି ଜୀବନ ମୁଲ୍ୟବାନ ଏହି ନୀତିରେ କାମ କରୁଥିଲେ ଉଦ୍ଧାରକାରୀ ଟିମ୍ । ଶିଶୁର ଦୀର୍ଘଜୀବନ କାମନା କରିଛନ୍ତି ମୁଖ୍ୟମନ୍ତ୍ରୀ । ଭଗବାନ ଶିଶୁକୁ ଆଶିର୍ବାଦ ଦିଅନ୍ତୁ ବୋଲି ମୁଖ୍ୟମନ୍ତ୍ରୀ କାମନା କରିଛନ୍ତି । ଶିଶୁର ଉଦ୍ଧାରକାର୍ଯ୍ୟ ଆରମ୍ଭ ହେବା ପରେ ପରେ ପୁରା ସ୍ଥିତି ଉପରେ ନଜର ରଖିଥିଲେ ମୁଖ୍ୟମନ୍ତ୍ରୀ । ଟିକନିଖ କାମରେ ନେଉଥିଲେ ଅପଡେଟ ।
ସମ୍ବଲପୁର: ବୋରଓ୍ବେଲରୁ ଉଦ୍ଧାର ହେଲା ନବଜାତ ଶିଶୁ । ଦୀର୍ଘ ସମୟର ନନଷ୍ଟପ ଅପରେସନ ପରେ ଶେଷରେ ଉଦ୍ଧାର ହେଲା ଶିଶୁ । ୮ ଘଣ୍ଟାରୁ ଅଧିକ ସମୟ ଧରି ଚାଲିଥିଲା ଅପରେସନ । ୨୦ରୁ ୨୫ ଫୁଟ ତଳେ ଥିଲା ଶିଶୁ ।
ସୂଚନା ଥାଉକି, ପରିତ୍ୟକ୍ତ ବୋରଓ୍ବେଲ ଭିତରେ ପଡ଼ିଛି ନବଜାତ ଶିଶୁ । ସମ୍ବଲପୁର ଜିଲ୍ଲା ରେଙ୍ଗାଲୀ ବ୍ଲକର ଲରିପାଲି ଜଙ୍ଗଲ ଭିତରେ ଥିବା ଏକ ପରିତ୍ୟକ୍ତ ବୋରଓ୍ବେଲ ଭିତରେ ନବଜାତ ଶିଶୁ ପଡ଼ିଥିବା ଜଣାପଡ଼ିଛି । ଜଙ୍ଗଲ ରାସ୍ତା ଦେଇ ଯାଉଥିବା କିଛି ଲୋକ ପ୍ରଥମେ କଅଁଳଶିଶୁର କାନ୍ଦିବା ଶୁଣି ବୋରଓ୍ବେଲ ପାଖକୁ ଯାଇଥିଲେ, ବୋରଓ୍ବେଲ ଭିତରୁ ନବଜାତ ଶିଶୁର କାନ୍ଦିବା ଶବ୍ଦ ଶୁଣି ପୋଲିସକୁ ଖବର ଦେଇଥିଲେ । ଘଟଣାସ୍ଥଳରେ ପୋଲିସ ଦମକଳବାହିନୀ ଓ ବ୍ଲକ ପ୍ରଶାସନ ପହଞ୍ଚି ଉଦ୍ଧାର କାର୍ଯ୍ୟରେ ଲାଗିଛନ୍ତି । କେହି ଜାଣିଶୁଣି ନବଜାତ ଶିଶୁଟିକୁ ବୋରଓ୍ବେଲ ଭିତରେ ଫିଙ୍ଗି ଦେଇଥିବା ଅନୁମାନ କରାଯାଉଛି । ତେବେ କିଏ ଏବଂ କାହିଁକି ଫୋପାଡ଼ିଛି ତାହା ଏବେ ଚର୍ଚ୍ଚାର ବିଷୟ ପାଲଟିଛି ।
ସେପଟେ ନବଜାତକର କାନ୍ଦ ଶୁଭିବା ପରେ ସ୍ଥାନୀୟ ଅଞ୍ଚଳରେ ଚର୍ଚ୍ଚାର ବିଷୟ ପାଲଟିଥିଲା । ସ୍ଥାନୀୟ ଲୋକେ ପୋଲିସ ଏବଂ ଅଗ୍ନିଶମ ବିଭାଗକୁ ଖବର ଦେଇଥିଲେ । ଲୋକଙ୍କ ଗହଳି ଘଟଣାସ୍ଥଳରେ ଲାଗିଥିବାବେଳେ ଉଦ୍ଧାର କାର୍ଯ୍ୟ ଜାରି ରହିଛି । ଛୁଆର କାନ୍ଦ ଜୋରରେ ଶୁଭୁଥିବାବେଳେ ଶୀଘ୍ର ଉଦ୍ଧାର ହେବେ ସେ ନେଇ ଚାଲିଛି କାର୍ଯ୍ୟ ।
