ଭୁବନେଶ୍ବର: ସାରା ଦେଶକୁ ପଛରେ ପକାଇଲା ଓଡ଼ିଶା  । ତମାଖୁ ମୁକ୍ତ ଗାଁ ଅଭିଯାନରେ ସାରା ଦେଶରେ ଶ୍ରେଷ୍ଠ ସ୍ଥାନ ହାସଲ କରିଛି ଓଡ଼ିଶା । ଏହା ଟୋବାକୋ ଫ୍ରି ୟୁଥ କ୍ୟାମ୍ପେନ-୨୦୨୩ ଅଧୀନରେ ହୋଇଥିଲା  । ଏହି ଅଭିଯାନ ଜୁଲାଇ ଓ ଅଗଷ୍ଟ ଦୁଇ ମାସ ଧରି ଚାଲିଥିଲା ।

ଭାରତ ସରକାରଙ୍କ ପକ୍ଷରୁ ଓଡ଼ିଶାକୁ ଏହି ପୁରସ୍କାର ଦିଆଯାଇଛି । ସାରା ଦେଶରେ ପ୍ରଥମ ରାଜ୍ୟ ଭାବେ ଓଡ଼ିଶାରେ ଟୋବାକୋ ମୁକ୍ତ ଗାଁ ଅଭିଯାନ ଆରମ୍ଭ ହୋଇଥିଲା  । ଏଥିରେ ପଂଚାୟତିରାଜ ବିଭାଗକୁ ସରପଞ୍ଚଙ୍କ ଜରିଆରେ କୋଟପା ଆଇନକୁ ଗାଁରେ କାର୍ଯ୍ୟକାରୀ କରିବାକୁ ସ୍ୱାସ୍ଥ୍ୟ ବିଭାଗ ଚିଠି କରିଥିଲା  ।

ଏ ଯାଏ ୫୪ ପଞ୍ଚାୟତ ଟୋବାକୋ ମୁକ୍ତ ଘୋଷଣା ହୋଇ ସାରିଛି । ଆହୁରି ୧୧୪ ପଂଚାୟତରେ ଏହି କାମ ଚାଲିଛି  । ସାରା ରାଜ୍ୟରେ ସଫଳତା ସହ ଟୋବାକୋ ମୁକ୍ତ ସ୍କୁଲ ଅଭିଯାନ ଚାଲିଛି  ।

ଝାରସୁଗୁଡ଼ା: ଝାରସୁଗୁଡ଼ା କଟାପାଲି ପିକେଏସ୍ଏସ୍ ସ୍ନାତକ ମହାବିଦ୍ୟାଳୟର ଅଧ୍ୟାପକଙ୍କୁ ଛାତ୍ରଙ୍କ ମାଡ ଘଟଣା । ମାଡ଼ରେ ଅଧ୍ୟାପକ ଅମିତ ବାରିକ ଗୁରୁତର ହେବା ପରେ ୯ ମାସ ପରେ ତାଙ୍କର ମୃତ୍ୟୁ ହୋଇଯାଇଛି । ଗତକାଲି ବିଳମ୍ବିତ ରାତିରେ ତାଙ୍କର ମୃତ୍ୟୁ ହୋଇଯାଇଛି  ।

ଅଧ୍ୟାପକ ଗୁରୁତର ହେବା ପରେ ପ୍ରଥମେ ଝାରସୁଗୁଡା ହସ୍ପିଟାଲ ପରେ ଓ ପରେ ବୁର୍ଲା ହସ୍ପିଟାଲ କୁ ସ୍ଥାନାନ୍ତର କରାଯାଇଥିଲା  । ହେଲେ ଶେଷରେ ସେ ଆଖି ବୁଜିଛନ୍ତି  । ଗତ ଫେବ୍ରୁଆରୀରେ  ୨୨ ତାରିଖରେ କଲେଜର ଜଣେ ଯୁକ୍ତ ତିନି ଦ୍ବିତୀୟ ବର୍ଷର ଛାତ୍ର ରାଜେଶ ସହିସ ଅମିତଙ୍କୁ ଆକ୍ରମଣ କରି ମାଡ ମାରିଥିଲେ  । ଏଥିରେ ଅମିତ ଗୁରୁତର ହୋଇ ପଡିଥିଲେ ଏବଂ ତାଙ୍କୁ ବୁର୍ଲାରେ ଚିକିତ୍ସା କରାଯାଉଥିଲା  ।

ତେବେ ୯ ମାସ ଧରି ଚିକିତ୍ସା ହେବା ପରେ ଗତ ବିଳମ୍ବିତ ରାତିରେ ଅଧ୍ୟାପକଙ୍କ ମୃତ୍ୟୁ ଘଟିଛି । ଘଟଣା ଦିନ ସକାଳେ ଶ୍ରେଣୀକୁ ବିଳମ୍ବରେ ଆସିଥିବାରୁ ଅମିତ ରାଜେସକୁ ତାଗିଦ କରିଥିଲେ । ଏହାକୁ ନେଇ ଖୁବ ବଚସା ମଧ୍ୟ ହୋଇଥିଲା  । ଏହାପରେ ରାଜେଶ ରାଗରେ ଅମିତଙ୍କୁ ଆକ୍ରମଣ କରିଥିଲେ । ୯ ମାସ ଧରି ଚିକିତ୍ସିତ ହେବା ପରେ ଗତକାଲି ତାଙ୍କର ମୃତ୍ୟୁ ହୋଇଯାଇଛି  । ଘଟଣାରେ ଅଭିଯୁକ୍ତ ଛାତ୍ର ରାଜେଶକୁ ପୋଲିସ ଗିରଫ କରି କୋର୍ଟ ଚାଲାଣ କରିଛି  ।

କୋରାପୁଟ: ପଟ୍ଟାଙ୍ଗୀ ଥାନା କୁନ୍ଦୁଲି ହାଟପଦାରେ ଡବଲ ମର୍ଡର । ଟେମା ଗ୍ରାମର ଗୋବର୍ଦ୍ଧନ ପାଣ୍ଡକାଙ୍କୁ ହତ୍ୟା କରିଛନ୍ତି କୁନ୍ଦୁଲି ହାଟପଦାର ଯୋଗୁଲୁ ରୁଡି ଓ ତାଙ୍କ ପୁଅ ରାଜକୁମାର ରୁଡି । ସେହିପରି ପ୍ରତିଶୋଧ ନେବାକୁ ଯାଇ ହତ୍ୟାକାରୀ ରାଜକୁମାରଙ୍କୁ ହତ୍ୟା କରିଛନ୍ତି ମୃତ ଗୋବର୍ଦ୍ଧନ ପାଣ୍ଡକାଙ୍କ ପରିବାର ।

ଦୁଇ ପରିବାର ମଧ୍ୟରେ କାହିଁକି ଏଭଳି ହତ୍ୟା କାଣ୍ଡ ଘଟିଥିଲା, ତାର କାରଣ ଜଣାପଡିନାହିଁ । ଘଟଣାସ୍ଥଳରେ ପୋଲିସ ପହଞ୍ଚି ତଦନ୍ତ ଆରମ୍ଭ କରିଛି ।