ଭୁବନେଶ୍ବର: ଅଧ୍ୟାପକ, ଶିକ୍ଷକ ଓ କମର୍ଚାରୀଙ୍କୁ ରାଜ୍ୟ ସରକାର ୭ମ ବେତନ କମିଶନ ଅନୁସାରେ ଦରମା ନେବାକୁ ନିଷ୍ପତ୍ତି ନେଇଛନ୍ତି । ବେସରକାରୀ ଉଚ୍ଚ ବିଦ୍ୟାଳୟ, ସଂସ୍କୃତ ଟୁଲ୍, ମହାବିଦ୍ୟାଳୟ, କନିଷ୍ଠ ମହାବିଦ୍ୟାଳୟ, ଉଚ୍ଚତର ମାଧ୍ୟମିକ ବିଦ୍ୟାଳୟର ୧୦୦ ପ୍ରତିଶତ ଗ୍ରାଣ୍ଟ ପାଉଥିବା ପ୍ରାୟ ୧୦ ହଜାର ଶିକ୍ଷକ, ଅଧ୍ୟାପକ, କମର୍ଚାରୀ ଏଥିରେ ଉପକୃତ ହେବେ । ସରକାରଙ୍କ ଏହି ନିଷ୍ପତ୍ତିକୁ ସବୁ ମହଲରେ ସ୍ବାଗତ କରାଯାଇଛି । ସପ୍ତମ ବେତନ କମିଶନ ସୁପାରିସ ଅନୁସାରେ ଦରମା ପାଇବାକୁ ଥିବା କମର୍ଚାରୀ ସଂଘ ମୁଖ୍ୟମନ୍ତ୍ରୀଙ୍କୁ କୃତଜ୍ଞତା ଜଣାଇଛନ୍ତି । ୨ ବର୍ଷ ହେଲା ସମାନ କାମକୁ ସମାନ ଦରମା ଦାବିରେ ବାରମ୍ବାର ଏମାନେ ଆନ୍ଦୋଳନକୁ ଓହ୍ଲାଇଥିଲେ ।
ଏହାଦ୍ବାରା ଉପକୃତ ହେବେ ୯ ହଜାର ୫୮୫ ଅଧ୍ୟାପକ, ଶିକ୍ଷକ ଓ କର୍ମଚାରୀ । ସରକାର ବହନ କରିବେ ପ୍ରାୟ ୨୯୪ କୋଟି ଟଙ୍କା । ୨୦୧୪ରୁ ସରକାର ହାତକୁ ନେଇଥିବା କଲେଜ ଗୁଡ଼ିକର ଅଧ୍ୟାପକ ଓ କମର୍ଚାରୀ ୨୦୨୨ରୁ ଶତ ପ୍ରତିଶତ ଅନୁଦାନ ପାଉଥିଲେ ମଧ୍ୟ ସପ୍ତମ ବେତନ କମିଶନ ସୁପାରିସ ଅନୁସାରେ ଦରମା ମିଳୁ ନଥିଲା । ଏଥିପାଇଁ ବାରମ୍ବାର ସଂଘ ପକ୍ଷରୁ ଦାବି କରିବା ସହ ଆନ୍ଦୋଳନ କରୁଥିଲା ସଂଘ । ରାଜ୍ୟ ସରକାର ସେମାନଙ୍କ ଦାବିକୁ ଗ୍ରହଣ କରିଛନ୍ତି । ୨୨ ତାରିଖ କ୍ୟାବିନେଟ ବୈଠକରେ ଏଥିରେ ମୋହର ଲାଗିଛି । ସଂଘର ପ୍ରାୟ ୧୭୮୯ ଅଧ୍ୟାପକ ଓ କମର୍ଚାରୀ ସପ୍ତମ ବେତନ ଅନୁସାରେ ଦରମା ପାଇବେ । ଜାନୁଆରୀ ପହିଲା ୨୦୨୪ରୁ ଏହି ନିଷ୍ପତ୍ତି କାର୍ଯ୍ୟକାରୀ କରାଯିବ। ଏଥିପାଇଁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ କୃତଜ୍ଞତା ଜଣାଇଛି ସଂଘ ।
ନୂତନ ସହାୟତାପ୍ରାପ୍ତ ଅଣ-ସରକାରୀ ଉଚ୍ଚ ବିଦ୍ୟାଳୟ ଓ ସଂସ୍କୃତ ଟୁଲର ଯୋଗ୍ୟ କମର୍ଚାରୀଙ୍କୁ ମଧ୍ୟ ମିଳିବ ସପ୍ତମ ବେତନ ଅନୁସାରେ ଦରମା ମିଳିବ । ୬୨୭ଟି ଉଚ୍ଚ ବିଦ୍ୟାଳୟ, ୩୯ଟି ସଂସ୍କୃତ ଟୁଲର ପ୍ରାୟ ୭ ହଜାର ୭୯୬ ଜଣ ଶିକ୍ଷକ ଓ କର୍ମଚାରୀ ଅନ୍ୟ ସରକାରୀ କମର୍ଚାରୀଙ୍କ ଭଳି ସମାନ ଦରମା ଦେବାକୁ ସରକାର ନିଷ୍ପତ୍ତି ନେଇଛନ୍ତି । ଶିକ୍ଷକ, ଅଧ୍ୟାପକ ଓ କର୍ମଚାରୀଙ୍କ ଦୀର୍ଘଦିନର ଦାବି ପୂରଣ ହୋଇଥିବାରୁ ସରକାରଙ୍କୁ କୃତଜ୍ଞତା ଜଣାଇଛନ୍ତି ଅଧ୍ୟାପକ ଓ କମର୍ଚାରୀ ।
