ରାଉରକେଲା: ରାଉରକେଲା ସହରର ଦାଣ୍ଡିଆପାଲି ଠାରେ ଥିବା ଜୟ ପ୍ରକାଶ ହସ୍ପିଟାଲର ଦୁଇ ଦିନିଆ ବାର୍ଷିକ ଉତ୍ସବ ସମର୍ପଣ-୨୦୨୩ ଉଦଘାଟିତ ହୋଇଯାଇଛି। ଦୁଇ ଦିନ ଧରି ଅନୁଷ୍ଠିତ ହେଉଥିବା ବାର୍ଷିକ ଉତ୍ସବର ଉଦଘାଟନୀ ଉତ୍ସଵରେ ଶ୍ରମମନ୍ତ୍ରୀ ସାରଦା ପ୍ରସାଦ ନାୟକ ମୁଖ୍ୟ ଅତିଥି ଭାଵେ ଯୋଗ ଦେଇଥିଲେ। ଏହି ଅବସରରେ ରାଉରକେଲା ସହରର ପ୍ରତିଭାଵାନ ଛାତ୍ରଛାତ୍ରୀଙ୍କୁ ପୁରସ୍କୃତ କରାଯିଵା ସହ ଉତ୍ତମ କାର୍ଯ୍ୟ ପ୍ରଦର୍ଶନ କରୁଥିବା କର୍ମଚାରୀଙ୍କୁ ହସ୍ପିଟାଲ ପକ୍ଷରୁ ସମ୍ମାନିତ କରାଯାଇଥିଲା। ରାଜ୍ୟ ସରକାରଙ୍କ ପକ୍ଷରୁ ପ୍ରଦାନ କରାଯାଇଥିବା BSKY କାର୍ଡ ଜରିଆରେ ଗରିବ ରୋଗୀମାନଙ୍କୁ ଘରୋଇ ହସ୍ପିଟାଲରେ ଉନ୍ନତମାନର ଓ ଅତ୍ୟାଧୁନିକ ଚିକିତ୍ସା ସୁବିଧା ମାଗଣାରେ ଯୋଗାଇ ଦିଆଯାଉ ଥିବାରୁ ଜୟ ପ୍ରକାଶ ହସ୍ପିଟାଲର ଚେୟାରମେନ ସଞ୍ଜୟ ବଂଶଲ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଧନ୍ୟବାଦ ଅର୍ପଣ କରିଛନ୍ତି।
ଦକ୍ଷିଣଆଫ୍ରିକାରେ ଟେଷ୍ଟରେ ସର୍ବାଧିକ ସ୍କୋର କରିଥିବା ୫ ବ୍ୟାଟ୍ସମ୍ୟାନ
ନୂଆଦିଲ୍ଲୀ: ଟି-୨୦ ଏବଂ ଦିନିକିଆ ସିରିଜ ପରେ ଏବେ ଟେଷ୍ଟ ମ୍ୟାଚ ଜିତିବା ଲକ୍ଷ୍ୟରେ ଟିମ ଇଣ୍ଡିଆ । ଦକ୍ଷିଣ ଆଫ୍ରିକା ବିପକ୍ଷ ଟେଷ୍ଟ ସିରିଜ ଆସନ୍ତା ୨୬ ତାରିଖରୁ ଆରମ୍ଭ ହେବାକୁ ଯାଉଛି । ଭାରତ ଦୁଇଟି ଟେଷ୍ଟ ମ୍ୟାଚ ଖେଳିବାକୁ ଯାଉଥିବାବେଳେ ବିରାଟ, ରୋହିତ, ବୁମରା ଏବଂ ସାମି ଦଳକୁ ଫେରୁଛନ୍ତି । ତେବେ ଏହି ସିରିଜକୁ ଭାରତ ହାତେଇବା ଲକ୍ଷ୍ୟରେ ରହିଥିବାବେଳେ ଆସନ୍ତୁ ଜାଣିବା ଦକ୍ଷିଣ ଆଫ୍ରିକା ବିପକ୍ଷରେ ସର୍ବାଧିକ ସ୍କୋର କରିଥିବା ୫ ଭାରତୀୟ ବ୍ୟାଟ୍ସମ୍ୟାନ ।
ସଚିନ ତେନ୍ଦୁଲକର: ଦକ୍ଷିଣ ଆଫ୍ରିକା ବିପକ୍ଷରେ ସର୍ବାଧିକ ସ୍କୋର କରିଥିବା ବ୍ୟାଟ୍ସମ୍ୟାନମାନଙ୍କ ମଧ୍ୟରେ ଶୀର୍ଷରେ ରହିଛନ୍ତି ମାଷ୍ଟର ବ୍ଲାଷ୍ଟର ସଚିନ ତେନ୍ଦୁଲକର । ଦକ୍ଷିଣ ଆଫ୍ରିକାରେ ସଚିନ ୧୫ ଟେଷ୍ଟ ମ୍ୟାଚ ଖେଳିଥିବାବେଳେ ୪୬.୪୪ ହାରରେ ୧୧୬୧ ରନ ସଂଗ୍ରହ କରିଥିବାବେଳେ ୫ଟି ଶତକ ମଧ୍ୟ ରହିଛି ।
ବିରାଟ କୋହଲି: କେହାଲି ୭ଟି ଟେଷ୍ଟ ଖେଳିଥିବାବେଳେ ୫୧. ୩୫ ହାରରେ ୭୧୯ ସଂଗ୍ରହ କରିଥିଲେ । ଏଥିରେ ୨ଟି ଶତକ ରହିଛି ।
ରାହୁଲ ଦ୍ରାଭିଡ୍: ଏବେ ଭାରତର ମୁଖ୍ୟ ପ୍ରଶିକ୍ଷକ ତଥା ଟେଷ୍ଟରେ ଏକ ନିଆରା ରେକର୍ଡ ଅର୍ଜନ କରିଥିବା ରାହୁଲ ଦ୍ରାବିଡ ଏହି ତାଲିକାର ତୃତୀୟ ସ୍ଥାନରେ ରହିଛନ୍ତି । ସେ ୧୧ଟି ମ୍ୟାଚରେ ୬୨୪ ରନ ସଂଗ୍ରହ କରିଥିବାବେଳେ ଗୋଟିଏ ଶତକ ମଧ୍ୟ ରହିଛି ।
ଭିଭିଏସ ଲକ୍ଷ୍ମଣ: ଲକ୍ଷ୍ମଣ ଚତୁର୍ଥ ସ୍ଥାନରେ ରହିଥିବାବେଳେ ୧୦ଟି ଟେଷ୍ଟ ମ୍ୟାଚରେ ୫୬୬ ରନ ସଂଗ୍ରହ କରିଛନ୍ତି ।
ଚେତେଶ୍ବର ପୂଜାରା: ଦକ୍ଷିଣ ଆଫ୍ରିକାରେ ସର୍ବାଧିକ ସ୍କୋର କରିଥିବା ଭାରତୀୟ ବ୍ୟାଟ୍ସମ୍ୟନମାନଙ୍କ ମଧ୍ୟରେ ପଞ୍ଚମ ସ୍ଥାନରେ ରହିଛନ୍ତି ଚେତେଶ୍ବର ପୂଜାରା । ସେ ୧୦ଟି ମ୍ୟାଚ ଖେଳିଥିବାବେଳେ ୫୩୪ ରନ କରିଛନ୍ତି । ଏଥିରେ ଗୋଟିଏ ଶତକ ମଧ୍ୟ ରହିଛି ।
କେବେ ଥମିବ ଋଷ-ୟୁକ୍ରେନ ଯୁଦ୍ଧ?
ନନ୍ଦିଘୋଷ ବ୍ୟୁରୋ: ଥମୁନି ଋଷ-ୟୁକ୍ରେନ ଯୁଦ୍ଧ । ଯୁଦ୍ଧର କେବେ ଅନ୍ତ ତାହାର ହୋଇପାରୁନି ରଫାଦଫା । ସେପଟେ ବାୟୁସେନା ଲାଗି ଋଷ ଯୋଗାଇଛି ଟିୟୁ-୧୬୦ଏମ ହ୍ବାଇଟ ବୋଲଷ୍ଟର । ହାରଜିତର ନିର୍ଣ୍ଣୟ ହୋଇପାରୁ ନଥିବାବେଳେ ଜଳ, ସ୍ଥଳ ଓ ଆକାଶ ବାହିନୀ ଲାଗି ଋଷ ଯୋଗାଇଛି ଅତ୍ୟାଧୁନିକ ଅସ୍ତ୍ରଶସ୍ତ୍ର । ଋଷର ଷ୍ଟ୍ରାଟେଜିକ ନ୍ୟୁକ୍ଲିୟର ଫୋର୍ସ ବା ଏସଏନଏଫ ଲାଗି ପ୍ରତିରକ୍ଷା ବିଭାଗ ଯୋଗାଇଛି ୪ଟି ଅତ୍ୟାଧୁନିକ ଟିୟୁ-୧୬୦ ଏମ ହ୍ବାଇଟ ବୋଲଷ୍ଟର । ଏନେଇ ଘୋଷଣା କରିଛନ୍ତି ଋଷର ପ୍ରତିରକ୍ଷା ମନ୍ତ୍ରୀ ସର୍ଜେଇ ଶୋଇଗୁ । ତେଣେ ଋଷ ପକ୍ଷରୁ ୟୁକ୍ରେନ ରାଜଧାନୀ କିବ୍ ଉପରେ ହମଲା ଜାରି ରହିଛି । ସେପଟେ ଯୁଦ୍ଧକ୍ଷେତ୍ରରେ ସୈନ୍ୟମାନଙ୍କ ମନୋବଳ ବୃଦ୍ଧି ଲାଗି ମେଡିକାଲ ମାରିଜୁଆନାକୁ ଆଇନସମ୍ମତ କରିଛି ୟୁକ୍ରେନ । ଯୁଦ୍ଧ କ୍ଷେତ୍ରରେ ସୈନ୍ୟଙ୍କ ଲାଗି ଏହା ସହାୟକ ହେଉଥିବାରୁ ସରକାର ନେଇଛନ୍ତି ପଦକ୍ଷେପ ।
ଥରୁଛି ଓଡ଼ିଶା, ଜନଜୀବନ ଅସ୍ତବ୍ୟସ୍ତ
ଭୁବନେଶ୍ବର: ପ୍ରବଳ ଜାଡରେ ଥରୁଛି ଓଡ଼ିଶା । ଉପାନ୍ତରୁ ଉପକୂଳ ସବୁଠି ତଳମୁହାଁ ହୋଇଛି ପାରଦ । ପାହାଡିଆ ଅଞ୍ଚଳରେ ତାପମାତ୍ରା ୪ ଡିଗ୍ରୀରେ ପହଞ୍ଚିଥିବା ବେଳେ ସମତଳ ଅଞ୍ଚଳରେ ସର୍ବନିମ୍ନ ୬ ଡିଗ୍ରୀ ରହିଛି ତାପମାତ୍ରା । ଆସନ୍ତା ୨୪ ଘଣ୍ଟା ପର୍ଯ୍ୟନ୍ତ ରାଜ୍ୟରେ ଏଭଳି ଥଣ୍ଡା ଜାରି ରହିବ ବୋଲି ପୂର୍ବାନୁମାନ କରିଛି ଆଞ୍ଚଳିକ ପାଣିପାଗ କେନ୍ଦ୍ର । ଗତ ୩ ରୁ ୪ ଦିନ ହେବ ଉତ୍ତର-ପଶ୍ଚିମ ଦିଗରୁ ରାଜ୍ୟକୁ ପ୍ରବେଶ କରୁଥିବା ଥଣ୍ଡା ଶୁଷ୍କ ପବନ ପ୍ରବାହ ଧିରେ ଧିରେ ଦୁର୍ବଳ ହେଉଛି । ଆସନ୍ତା ୨ ଦିନ ମଧ୍ୟରେ ରାଜ୍ୟକୁ ପୂର୍ବାଳୀ ଉଷ୍ମ ଜଳୀୟବାଷ୍ପ ପୂର୍ଣ୍ଣ ବାୟୁ ପ୍ରବାହ ବୃଦ୍ଧି ପାଇବାର ସମ୍ଭାବନା ରହିଛି ।
ପ୍ରଭାବରେ ରାଜ୍ୟର ଅଧିକାଂଶ ଅଞ୍ଚଳର ରାତ୍ରୀ ତାପମାତ୍ରା ୨ ରୁ ୪ ଡିଗ୍ରୀ ପର୍ଯ୍ୟନ୍ତ ବୃଦ୍ଧି ପାଇବ । ଫଳରେ ଶୀତର ପ୍ରକୋପ ସାମାନ୍ୟ କମିବ ବୋଲି ସୂଚନା ଦେଇଛି ଆଞ୍ଚଳିକ ପାଣିପାଗ କେନ୍ଦ୍ର । ଶୀତ ସହ କଲବଲ କରିବ ଘନ କୁହୁଡି । ଆସନ୍ତା ୩ ଦିନ ପର୍ଯ୍ୟନ୍ତ ଘନ କୁହୁଡି ପାଇଁ ଉପକୂଳ ଏବଂ ଆଭ୍ୟନ୍ତରୀଣ ଓଡ଼ିଶାର ଅଧିକାଂଶ ଜିଲ୍ଲାକୁ ୟେଲୋ ଆଲର୍ଟ ଜାରି କରାଯାଇଛି । ଆଜି ପାଇଁ ଘନ କୁହୁଡି ପାଇଁ ୧୪ଟି ଜିଲ୍ଲାକୁ ସତର୍କତା ଜାରି କରାଯାଇଛି । ଆଜିଠୁ ଶୀତରୁ ସାମାନ୍ୟ ଆଶ୍ବସ୍ତି ପାଇପାରନ୍ତି ରାଜ୍ୟବାସୀ ।
ଅଡୁଆରେ ମୋଟିଭେସନାଲ ସ୍ପିକର ବିବେକ ବିନ୍ଦ୍ରା, ପତ୍ନୀଙ୍କୁ ମାରପିଟ୍ କରୁଥିବା ନେଇ ମାମଲା ରୁଜୁ
ନୂଆଦିଲ୍ଲୀ: ଅଡୁଆରେ ମୋଟିଭେସନାଲ ସ୍ପିକର ବିବେକ ବିନ୍ଦ୍ରା । ତାଙ୍କ ବିରୋଧରେ ପତ୍ନୀଙ୍କୁ ନିର୍ଯାତନା ଦେଇଥିବା ନେଇ ମାମଲା ରୁଜୁ କରାଯାଇଛି।
ସୂଚନା ଅନୁଯାୟୀ, ୨୦୨୩ ଡିସେମ୍ବର ୬ ତାରିଖରେ ୟାନିକାଙ୍କୁ ଲଲିତ ମାନଗର ହୋଟେଲରେ ବିବାହ କରିଥିଲେ ବିବେକ ବିନ୍ଦ୍ରା । ପରବର୍ତ୍ତୀ ସମୟରେ ଗତ ୧୪ ତାରିଖରେ ତାଙ୍କ ନାଁରେ ମାମଲା ରୁଜୁ ହୋଇଛି ।
ନୋଏଡା ଥାନା ପୋଲିସ ମାମଲାର ତଦନ୍ତ କରୁଥିବା ବେଳେ ତାଙ୍କ ବିରୋଧରେ IPC ଧାରା ୩୨୩, ୫୦୪, ୪୨୭, ୩୨୫ରେ ମାମଲା ରୁଜୁ ହୋଇଛି ।
ତେବେ ବିଜନେଶ ଗୁରୁ ନାଁରେ ପରିଚିତ ବିବେକ ବାନ୍ଦ୍ରା । ବିବେକ ଜଣେ ୟୁଟ୍ୟୁବର ସହ ଜଣେ ବଡ ବ୍ୟବସାୟୀ ମଧ୍ୟ ।
ବିବେକ ବିନ୍ଦ୍ରଙ୍କ ଶଳା ବୈଭବ କ୍ୱାତ୍ରା ନୋଏଡା ଥାନା ସେକ୍ଟର ୧୨୬ ଅଞ୍ଚଳରେ ଅଭିଯୋଗ କରିଛନ୍ତି। ଯେଉଁଥିରେ ସେ ଉଲ୍ଲେଖ କରିଛନ୍ତି ଯେ ତାଙ୍କ ଭଉଣୀ ବିବେକ ବିନ୍ଦ୍ରାଙ୍କୁ ଡିସେମ୍ବର ୬ ବିବାହ କରିଥିଲେ । ସେ ନୋଏଡାର ସୁପରନୋଭା ୱେଷ୍ଟ୍ ରେସିଡେନ୍ସି ୪୨୦୯ ପ୍ଲେଟ୍ ସେକ୍ଟର ୯୪ରେ ରହୁଛନ୍ତି । ବିବେକ ତାଙ୍କ ପତ୍ନୀଙ୍କୁ ମାରୁଥିବା ନେଇ ଏକ ଭିଡିଓ ମଧ୍ୟ ସାମ୍ନାକୁ ଆସିଛି।
ଲାଞ୍ଚ ଟଙ୍କାରେ ବିଦେଶ ବୁଲୁଥିଲେ ଭୁବନେଶ୍ୱର ମୁଖ୍ୟ ଯୋଗାଣ ବିଭାଗ ଅଧିକାରୀ ପ୍ରଶାନ୍ତ କୁମାର ଗନ୍ତାୟତ
ଭୁବନେଶ୍ୱର: ଲାଞ୍ଚ ଟଙ୍କାରେ ବିଦେଶ ବୁଲୁଥିଲେ ଭୁବନେଶ୍ୱର ମୁଖ୍ୟ ଯୋଗାଣ ବିଭାଗ ଅଧିକାରୀ ପ୍ରଶାନ୍ତ କୁମାର ଗନ୍ତାୟତ। ଠୁଳ କରୁଥିଲେ ସୁନା ଅଳଙ୍କାର । କଳା ଟଙ୍କାରେ କିଣୁଥିଲେ ଦାମୀ ଜମି ଫ୍ଲାଟ । ଆୟ ବହିର୍ଭୁତ ସଂପତ୍ତିର ପରିମାଣ ପ୍ରାୟ ୨.୧୭ ପ୍ରତିଶତ। ଯାହା ଆୟ ଠାରୁ ୧୨୮ ପ୍ରତିଶତ ଅଧିକ।
ଖୋର୍ଦ୍ଧାରେ ୫ଟି ଦାମୀ ଜମି, ଭୁବନେଶ୍ୱରରେ ଦୁଇଟି ସ୍ଥାନରେ ଘର ଓ ୨ଟି ଫ୍ଲାଟ ରହିଛି। ଜବତ ହୋଇଛି ୬୧୩ ଗ୍ରାମ ସୁନା ସହିତ ନଗଦ ୮ ଲକ୍ଷ ଟଙ୍କା । ୩୩ ଲକ୍ଷ ଟଙ୍କାର ଫିକ୍ସ ଡିପୋଜିଟ ଠାବ କରିଛି ଭିଜିଲାନ୍ସ। ଆୟ ବହିର୍ଭୁତ ସମ୍ପତ୍ତି ଠୁଳ ଅଭିଯୋଗରେ ଗିରଫ ହୋଇଛନ୍ତି ସମ୍ପୃକ୍ତ ସରକାରୀ ବାବୁ। ଗିରଫ ପରେ କୋର୍ଟ ଚାଲାଣ କରିଛି ଭିଜିଲାନ୍ସ।
ଅଧିକ ପଢନ୍ତୁ:- ଆୟ ବହିର୍ଭୂତ ସମ୍ପତ୍ତି ଠୁଳ ମାମଲା; ଗିରଫ ହେଲେ ପ୍ରଶାନ୍ତ କୁମାର ଗନ୍ତାୟତ
ଉଲ୍ଲେଖଯୋଗ୍ୟ, ଭିଜିଲାନ୍ସର ରେଡ୍ ବେଳେ ପ୍ରଶାନ୍ତଙ୍କ ଭୁବନେଶ୍ବରରେ ଦୁଇଟି ବହୁତଳ ପ୍ରାସାଦ ଠାବ ହୋଇଛି । ୨ଟି ଫ୍ଲାଟ ସହ ୫ଟି ପ୍ଲଟ, ୧.୪୮କୋଟିର ଡିପୋଜିଟ ଠାବ । ୫୩୬ଗ୍ରାମ ସୁନା, ନଗଦ ୧.୨୧ ଲକ୍ଷ, ଗୋଟିଏ ଚାରି ଚକିଆ ଠାବ ହୋଇଛି ।
ଆୟବହିର୍ଭୁତ ସମ୍ପତ୍ତି ଠୁଳ ଅଭିଯୋଗରେ ଭୁବନେଶ୍ୱର ଓ ଗଞ୍ଜାମର ୮ ଟି ସ୍ଥାନରେ ରେଡ୍ ହୋଇଥିଲା। ଭୁବନେଶ୍ୱର ଭିଜିଲାନ୍ସ ସ୍ପେଶାଲ ଜଜଙ୍କ ନିର୍ଦ୍ଦେଶକ୍ରମେ ଏହି ଚଢ଼ାଉ କରାଯାଇଥିଲା। ଭୁବନେଶ୍ୱର ପାଣ୍ଡରାସ୍ଥିତ ପ୍ଲଟ୍ ନମ୍ବର ୧୪ ଶହ ୮୫, ତିନି ମହଲା ଘର, ବ୍ରହ୍ମପୁର ନୀଳାଚଳ ହାଇଟ୍ ଆପାର୍ଟମେଣ୍ଟ, ଚନ୍ଦ୍ରଶେଖରପୁର ସ୍ଥିତ ବିଲ୍ଡିଂ, ଲକ୍ଷ୍ମୀସାଗର ନୀଳାଚଳ ସିଟି କେନାଲ ରୋଡରେ ଥିବା ଆପାର୍ଟମେଣ୍ଟ, ଅଫିସ, ବ୍ରହ୍ମପୁର ବୈଦନାଥପୁର ସ୍ଥିତ ପୈତୃକ ଘର, ଭୁବନେଶ୍ୱର ୟୁନିଟ ୩ସ୍ଥିତ ବାସଭବନରେ ଚଢାଉ କରିଥିଲା ଭିଜିଲାନ୍ସ।
ପୁଣି ବଢ଼ିଲା ଆପ୍ ନେତା ସଞ୍ଜୟ ସିଂଙ୍କ ଅଡୁଆ
ନୂଆଦିଲ୍ଲୀ: ପୁଣି ବଢ଼ିଲା ଆପ୍ ନେତା ତଥା ରାଜ୍ୟସଭା ସାଂସଦ ସଞ୍ଜୟ ସିଂଙ୍କ ଅଡୁଆ। ଦିଲ୍ଲୀ ମଦ ଦୁର୍ନୀତି ମାମଲାରେ ସାଂସଦଙ୍କୁ ମିଳିଲାନି ବେଲ୍। ଆଜି ପୁଣି ଥରେ କୋର୍ଟ ତାଙ୍କ ଜାମିନ ଆବେଦନକୁ ଖାରଜ କରି ଦେଇଛନ୍ତି।
ଦିଲ୍ଲୀ ମଦନୀତି ମାମଲାରେ ଦିଲ୍ଲା ହାଇକୋର୍ଟ କହିଛନ୍ତି- ତାଙ୍କ ବିରୋଧରେ ରୁଜୁ ହୋଇଥିବା ମାମଲା ଯଥାର୍ଥ। ଅର୍ଥ ହେରଫେର ମାମଲାରେ ସଞ୍ଜୟଙ୍କ ପରୋକ୍ଷ ଓ ପ୍ରତ୍ୟକ୍ଷ ସମ୍ପୃକ୍ତି ସ୍ପଷ୍ଟ ବୋଲି କହିଛନ୍ତି ହାଇକୋର୍ଟ। ସେପଟେ ସଞ୍ଜୟଙ୍କ ଓକିଲ କହିଛନ୍ତି- ସଞ୍ଜୟଙ୍କୁ ରାଜନୈତିକ ଉଦ୍ଦେଶ୍ୟ ପ୍ରଣୋଦିତ ଭାବେ ଗିରଫ କରାଯାଇଛି। ସେ ବେଆଇନ ଅର୍ଥ କାରବାର ମାମଲାରେ ସମ୍ପୃକ୍ତ ନୁହନ୍ତି । ସେପଟେ ଆସନ୍ତା ଜାନୁଆରୀ ୩ରେ ହାଜର ହେବା ଲାଗି ଅରବିନ୍ଦ କେଜ୍ରିଓ୍ବାଲଙ୍କୁ ଇଡି ଜାରି କରିଛି ସମନ। ଦିଲ୍ଲୀ ମଦ ଦୁର୍ନୀତି ମାମଲାରେ ଆପର ବହୁ ବଡ ବଡ ନେତା ଫସିଛନ୍ତି। ଅକ୍ଟୋବର ୪ରେ ସଞ୍ଜୟ ସିଂହଙ୍କୁ ଗିରଫ କରିଥିଲା ଇଡି।
ଖୁବଶୀଘ୍ର ଓଡ଼ିଶା ଆସିବେ ବଡ଼ ବଡ଼ ଶିକ୍ଷାନୁଷ୍ଠାନ
ଭୁବନେଶ୍ୱର: ଓଡ଼ିଶା ଆସିବେ ବଡ଼ ବଡ଼ ଶିକ୍ଷାନୁଷ୍ଠାନ। ଟାଟା, ବିର୍ଲା, ଅଜିମ ପ୍ରେମଜୀ ଫାଉଣ୍ଡେସନ୍ ସମେତ କ୍ୟାମ୍ପ୍ରିଜ ଓ ଅକ୍ସଫୋର୍ଡ ପରି ବିଶ୍ବବିଦ୍ୟାଳୟର ପ୍ରତିନିଧି ଓଡ଼ିଶା ଆସିବେ। ଆସନ୍ତା ବର୍ଷ ଶିକ୍ଷାରେ ପୁଞ୍ଜିନିବେଶ ପାଇଁ ମେକ୍ ଇନ୍ ଓଡ଼ିଶା ଢାଞ୍ଚାରେ ଏଡୁ ଇନଭେଷ୍ଟ କନକ୍ଲେଭର ଆୟୋଜନ କରିବାକୁ ଯାଉଛନ୍ତି ରାଜ୍ୟ ସରକାର। ଏଥିରେ ୧୧୬ ଜାତୀୟ ଓ ଅନ୍ତର୍ଜାତୀୟ ଶିକ୍ଷାନୁଷ୍ଠାନ ଯୋଗ ଦେବେ। ଖୁବଶୀଘ୍ର ତାରିଖ ସ୍ଥିର କରିବେ ରାଜ୍ୟ ସରକାର।
ଶିକ୍ଷାର ସର୍ବାଙ୍ଗୀନ ଉନ୍ନତି ସହ ବ୍ୟାପକ ପୁଞ୍ଜି ନିବେଶ ପାଇଁ ଏହି କନକ୍ଲେଭ ଅନୁଷ୍ଠିତ ହେବ। ଦେଶ ବିଦେଶର ଶିକ୍ଷାନୁଷ୍ଠାନ ଗୁଡ଼ିକରୁ ଯୁଗ୍ମ ଡିଗ୍ରୀ ମିଳି ପାରିବା ସହ ପାଠ୍ୟକ୍ରମ, ଛାତ୍ର ଓ ଶିକ୍ଷକ ଏକ୍ସଚେଞ୍ଜ କାର୍ଯ୍ୟକ୍ରମ ପାଇଁ ଅନୁକୁଳ ବାତାବରଣ ସୃଷ୍ଟି କରିବ। ବିଦେଶର ବଡ଼ ବଡ଼ ଶିକ୍ଷାନୁଷ୍ଠାନ ପିପିପି ମୋଡରେ ରାଜ୍ୟର ଶିକ୍ଷା କ୍ଷେତ୍ରରେ ପୁଞ୍ଜିନିବେଶ କରି ପାରିବେ।
ଶିକ୍ଷାର ସାମଗ୍ରିକ ବିକାଶ ପାଇଁ ରାଜ୍ୟକୁ ତିନୋଟି ଶିକ୍ଷା କରିଡରରେ ପରିଣତ କରାଯିବ। ପ୍ରଥମଟି ହେଲା ଭୁବନେଶ୍ବର-ପୁରୀ-କଟକ-ଖୋର୍ଦ୍ଧା-ବ୍ରହ୍ମପୁର, ଦ୍ବିତୀୟଟି ହେଲା – କୋରାପୁଟ, କଳାହାଣ୍ଡି, ବଲାଙ୍ଗୀର, ନୂଆପଡ଼ା ଏବଂ ଶେଷରେ ଝାରସୁଗୁଡ଼ା, ସମ୍ବଲପୁର, ବରଗଡ଼, ସୁନ୍ଦରଗଡ଼, ରାଉରକେଲା ।
ମେକ୍ ଇନ୍ ଓଡ଼ିଶା ପରି ଏଡୁ ଇନଭେଷ୍ଟ କନକ୍ଲେଭ ବି ରାଜ୍ୟର ଅର୍ଥନୀତି ସମେତ ଶିକ୍ଷା କ୍ଷେତ୍ରରେ ବୈପ୍ଳବିକ ବିକାଶ ଆଣିବାକୁ ଯାଉଛି। ଏନେଇ ଆସିବ ଏଡୁ ଇନଭେଷ୍ଟ ପଲିସି । ଯାହା ପୁଞ୍ଜିନିବେଶକୁ ପ୍ରୋତ୍ସାହନ ଦେବା ସହ ଶିଳ୍ପ ଓ ଶିକ୍ଷାର ସହଭାଗିତା ବୃଦ୍ଧି କରିବ ।
ରାୟଗଡାରେ ପୁଞ୍ଜିନିବେଶ କରିବ ଆଦିତ୍ୟ ବିର୍ଲା ଗ୍ରୁପ
ଭୁବନେଶ୍ୱର: ଆଦିବାସୀ ବହୁଳ ରାୟଗଡା ଜିଲ୍ଲାରେ ପୁଞ୍ଜିନିବେଶ କରିବ ଆଦିତ୍ୟ ବିର୍ଲା ଗ୍ରୁପ। ରାୟଗଡାରେ ପ୍ରତିଷ୍ଠା ହେବ ଆଦିତ୍ୟ ଆଲୁମିନା ରିଫାଇନାରୀ ବା ହିଣ୍ଡାଲକୋ ଓ ପୋଷାକ କାରଖାନା। ଏହି ଦୁଇଟି ପ୍ରକଳ୍ପ ପାଇଁ ଆଜି ମୁଖ୍ୟମନ୍ତ୍ରୀ ଭିତ୍ତିପ୍ରସ୍ତର ସ୍ଥାପନ କରିଛନ୍ତି। ରାୟଗଡାର କଂଶାରୀଗୁଡାଠାରେ ଆଲୁମିନା ରିଫାଇନାରୀ ପ୍ରତିଷ୍ଠା ହେଉଥିବା ବେଳେ ଫୁଲୁଜିବା ଗାଁରେ ପ୍ରତିଷ୍ଠା ହେବ ପୋଷାକ କାରଖାନା।
୨ ନିୟୁତ ଟନ କ୍ଷମତା ସମ୍ପନ୍ନ ଏହି ଆଲୁମିନା ରିଫାଇନାରୀ ପାଇଁ ୮ହଜାର କୋଟି ଟଙ୍କାର ପୁଂଜିନିବେଶ କରିବ ଆଦିତ୍ୟ ବିର୍ଲା ଗ୍ରୁପ। ସେହିଭଳି ପୋଷାକ କାରଖାନାରୁ ବାର୍ଷିକ ୩୬ ଲକ୍ଷ ସାର୍ଟ ତିଆରି ହେବ। ଏହି ଅବସରରେ ମୁଖ୍ୟମନ୍ତ୍ରୀ କହିଥିଲେ ଯେ, ଓଡିଶାର ଶିଳ୍ପାୟନରେ ଏହା କେବଳ ଏକ ମାଇଲଖୁଣ୍ଟ ନୁହେଁ। ରାଜ୍ୟର ଅନାଲୋଚିତ ପ୍ରାକୃତିକ ସମ୍ବଳର ସୁବିନିଯୋଗର ଏକ ସୁଯୋଗ। ରାଜ୍ୟର ଶିଳ୍ପ ମାନଚିତ୍ରରେ ଏହି ଦୁଇ ପ୍ରକଳ୍ପ ଏକ ନୂଆ ଅଧ୍ୟାୟ।
ରାଜ୍ୟରେ ଆଦିତ୍ୟ ବିର୍ଲା ଗ୍ରୁପ ପୁଂଜିନିବେଶ ପୁଣି ଥରେ ପ୍ରମାଣିତ କରିଛି ଯେ, ଉତ୍ପାଦନଭିତ୍ତିକ ଶିଳ୍ପ ପାଇଁ ଓଡିଶା ଶିଳ୍ପପତିଙ୍କ ପସନ୍ଦ । ଭୂମିପୂଜନ ସମାରୋହରେ ଏହି ଦୁଇ ପ୍ରକଳ୍ପ ପ୍ରତିଷ୍ଠାରେ ସରକାର ସବୁ ପ୍ରକାର ସହଯୋଗ କରିବେ ବୋଲି ମୁଖ୍ୟମନ୍ତ୍ରୀ ଆଶ୍ବାସନା ଦେଇଛନ୍ତି। ଏଥିସହିତ ପ୍ରକଳ୍ପ ପାଇଁ ରାୟଗଡାବାସୀଙ୍କ ସହଯୋଗ ପାଇଁ ଧନ୍ୟବାଦ ଜଣାଇଛନ୍ତି ମୁଖ୍ୟମନ୍ତ୍ରୀ। ଆଗାମୀ ଦିନରେ ଏହି ଦୁଇ ପ୍ରକଳ୍ପ ରାୟଗଡାର ଆର୍ଥିକ ସ୍ଥିତିରେ ବୈପ୍ଳବିକ ପରିବର୍ତ୍ତନ ଆଣିବ।
ଗତ ଅକ୍ଟୋବର ୫ ତାରିଖରେ ହୋଇଥିବା ଏମଓୟୁରେ ସରକାର ରିଫାଇନାରୀ ପ୍ଲାଣ୍ଟ ପାଇଁ ଦୀର୍ଘମିଆଦି କଞ୍ଚାମାଲ ଯୋଗାଦେବାକୁ ଚୁକ୍ତି ହୋଇଛି। ସେହିଭଳି ପୋଷାକ କାରଖାନା ଦ୍ବାରା ପ୍ରାୟ ୩ହଜାର ସ୍ଥାନୀୟ ଲୋକଙ୍କ ପାଇଁ ନିଯୁକ୍ତି ସୁଯୋଗ ସୃଷ୍ଟି ହେବ। ଏଥିରେ ମହିଳାଙ୍କୁ ପ୍ରାଧାନ୍ୟ ଦିଆଯିବ। ଏହି ଅବସରରେ ଶିଳ୍ପ ମନ୍ତ୍ରୀ ପ୍ରତାପ ଦେବ, ଅନୁସୂଚିତ ଜାତି ଜନଜାତି ମନ୍ତ୍ରୀ ଜଗନ୍ନାଥ ସାରକା, ଫାଇଭ ଟି ଅଧ୍ୟକ୍ଷ, ହିଣ୍ଡାଲକୋ ପରିଚାଳନା ନିର୍ଦ୍ଦେଶକ ସତୀଶ ପାଇ ଓ ଅନ୍ୟ ବରିଷ୍ଠ ଅଧିକାରୀମାନେ ଯୋଗ ଦେଇଥିଲେ।
ଶ୍ରୀମନ୍ଦିର ପରିକ୍ରମା ପ୍ରକଳ୍ପର ଲୋକାର୍ପଣ; ଜଗତ୍ଗୁରୁ ସ୍ବାମୀ ନିଶ୍ଚଳାନନ୍ଦ ସରସ୍ବତୀଙ୍କୁ ନିମନ୍ତ୍ରଣ ପାଇଁ ଉଜ୍ଜୟିନୀ ଗଲେ ଟିମ୍
ପୁରୀ: ଶ୍ରୀମନ୍ଦିର ପରିକ୍ରମା ପ୍ରକଳ୍ପର ଲୋକାର୍ପଣ ପାଇଁ ଜଗତ୍ଗୁରୁ ସ୍ବାମୀ ନିଶ୍ଚଳାନନ୍ଦ ସରସ୍ବତୀଙ୍କ ପାଇଁ ଶ୍ରୀମନ୍ଦିର ପ୍ରଶାସନ ପକ୍ଷରୁ ଆଜି ନିମନ୍ତ୍ରଣ ପତ୍ର ନେଇ ଉଜ୍ଜୟିନୀ ଯାତ୍ରା ଆରମ୍ଭ କରିଛନ୍ତି ମୁଖ୍ୟ ପ୍ରଶାସକ ଓ ପରିଚାଳନା କମିଟିର ସଦସ୍ୟ। ଗତକାଲି ମହାପ୍ରଭୁଙ୍କ ଆଶିଷ ଭିକ୍ଷା ସହ ନିମନ୍ତ୍ରଣ ପତ୍ର ପ୍ରଦାନ କରାଯାଇଥିବା ବେଳେ ହୋମ ଯଜ୍ଞ କିଭଳି ନିଷ୍ଠା ଓ ଭକ୍ତିର ସହ ସମାପନ କରାଯିବ ସେନେଇ ମୁକ୍ତି ମଣ୍ଡପ ବ୍ରାହ୍ମଣଙ୍କ ସହ ଗଜପତି ସ୍ବତନ୍ତ୍ର ବୈଠକ କରିଥିଲେ।
ଜାନୁଆରୀ ୧୭ରେ ଲୋକାର୍ପିତ ହେବ ଶ୍ରୀମନ୍ଦିର ପରିକ୍ରମା ପ୍ରକଳ୍ପ। ବ୍ରାହ୍ମଣଙ୍କ ଦ୍ବାରା ଜାନୁଆରୀ ୧୨ରୁ ୧୭ ଯାଏଁ ହୋମ, ଯଜ୍ଞ ଓ ବେଦପାଠରେ କମ୍ପିବ ଶ୍ରୀକ୍ଷେତ୍ର। ପରମ୍ପରା ଅନୁଯାୟୀ ମହାପ୍ରଭୁଙ୍କ ପ୍ରଥମ ନିମନ୍ତ୍ରଣ ପତ୍ର ଦିଆଯାଇଥିଲା। ଶ୍ରୀମନ୍ଦିର ମୁଖ୍ୟ ପ୍ରଶାସକ ଓ ପରିଚାଳନା କମିଟି ସଦସ୍ୟ ମାନେ ମଧ୍ୟପ୍ରଦେଶର ଉଜ୍ଜୟିନୀ ଯାତ୍ରା କରି ଜଗତଗୁରୁଙ୍କୁ ନିମନ୍ତ୍ରଣ କରିବେ।
ଜଗତଗୁରୁଙ୍କ ସହ ଵିସ୍ତୃତ ଭାବେ ବିଧିବିଧାନ ସମ୍ପର୍କରେ ହେବ ଆଲୋଚନା । ଶ୍ରୀମନ୍ଦିର ପ୍ରଶାସନ କାର୍ଯ୍ୟାଳୟରୁ ପରିଚାଳନା କମିଟିର ତିନିଜଣ ସଦସ୍ୟଙ୍କ ସହ ଶ୍ରୀମନ୍ଦିର ମୁଖ୍ୟ ପ୍ରଶାସକ ରଞ୍ଜନ ଦାସ ଉଜ୍ଜୟିନୀ ଯାତ୍ରା କରିଛନ୍ତି। ଶଙ୍କରାଚାର୍ଯ୍ୟଙ୍କ ପରେ ଭାରତବର୍ଷର ୪ ଧାମ, ଦ୍ବାଦଶ ଜ୍ୟୋତିର୍ଲିଙ୍ଗ ଓ ବିଭିନ୍ନ ଶୈବପୀଠ, ଶ୍ରୀଜଗନ୍ନାଥ ମନ୍ଦିର ଓ ବିଭିନ୍ନ ମନ୍ଦିରର ମୁଖ୍ୟ ପୂଜକଙ୍କୁ ନିମନ୍ତ୍ରଣ କରାଯିବ।
ଏହି ଉତ୍ସବରେ ସଂକୀର୍ତ୍ତନ, ଯଜ୍ଞ ଓ ବେଦପାଠ କରାଯିବ। ଯଜ୍ଞ ପାଇଁ ୧୦୮ ଶ୍ରୋତ୍ରୀୟ ବ୍ରାହ୍ମଣ ନିୟୋଜିତ ହେବେ। ତନ୍ମଧ୍ୟରୁ ୬୦ ଜଣ ବ୍ରାହ୍ମଣ ଚାରିଦ୍ବାରରେ ବେଦ ପାରାୟଣ କରିବେ। ୧୨ ତାରିଖ ସନ୍ଧ୍ୟାରେ ଶ୍ରୀନହରରେ ଗଜପତି ମହାରାଜାଙ୍କ ଦ୍ବାରା ଗୁଆ ଟେକା ଯାଇ ଯଜ୍ଞ ନିମନ୍ତେ ପ୍ରକ୍ରିୟା ସମ୍ପାଦନ ହେବ। ପରେ ଶ୍ରୀମନ୍ଦିର ରାଜପୁରୋହିତଙ୍କ ପରାମର୍ଶ କ୍ରମେ ଗଜପତିଙ୍କ ରାଶି ଓ ନକ୍ଷତ୍ରକୁ ନେଇ ଯଜ୍ଞ ଆରମ୍ଭ ହେବ। ଜାନୁଆରୀ ୧୫ ତାରିଖ ସକାଳ ୭ଟାରେ ଶ୍ରୀମନ୍ଦିର ଐଶାନ୍ୟ କୋଣରେ ଆରମ୍ଭ ହେବ ଯଜ୍ଞ। ୧୭ ତାରିଖ ପୂର୍ଣ୍ଣାହୁତି କାର୍ଯ୍ୟକ୍ରମରେ ମୁଖ୍ୟମନ୍ତ୍ରୀ, ଶଙ୍କରାଚାର୍ଯ୍ୟ ଓ ନିମନ୍ତ୍ରିତ ଅତିଥି ଯୋଗଦେବେ। ପରମ୍ପରା ଅନୁଯାୟୀ ୧୭ ତାରିଖରେ ଗଜପତିଙ୍କ ଦ୍ବାରା ଶଙ୍କରାଚାର୍ଯ୍ୟଙ୍କ ପାଦୁକା ପୂଜା କରାଯିବ ।