ଖୋର୍ଦ୍ଧା: ଖୋର୍ଦ୍ଧା ବାଘମାରି ଥାନା ସାରୁଅ ଶିଳ୍ପାଞ୍ଚଳରେ ଥିବା ଏକ ଅଏଲ ଫ୍ୟାକ୍ଟ୍ରିରେ ଅଗ୍ନିକାଣ୍ଡ । ସାରୁଅ ଶିଳ୍ପାଞ୍ଚଳରେ ଥିବା ୟୁନିଭରସାଲ ଇନଫ୍ରା ଏଣ୍ଡ ଏଗ୍ରି ଅଏଲ ପ୍ରାଇଭେଟ୍ ଲିମିଟେଡ ନାମକ ଅଏଲ ଫ୍ୟାକ୍ଟ୍ରିର ଗୋଦାମ ଘରେ ନିଆଁ ଲାଗିଯାଇଛି । ଘରେ ତେଲ ପାକିଙ୍ଗ ପାଇଁ ଆବଶ୍ୟକ ସାମଗ୍ରୀ ଗୁଡିକରେ ନିଆଁ ଲାଗିଯାଇଛି । ସଟ୍ସର୍କିଟରେ ଅଗ୍ନିକାଣ୍ଡ ହୋଇଥିବା ଅନୁମାନ କରାଯାଉଛି । ନିଆଁ ଲିଭାଇବା କାମରେ ୩ଟି ଦମକଳ ଗାଡ଼ି ନିୟୋଜିତ ହୋଇଛନ୍ତି ।
ରୂପାନ୍ତରଣ ଯାତ୍ରାରେ ଦୌଡୁଛି ଅନୁଗୁଳ, ୬ ମାସରେ ୨ଶହ କୋଟି ଟଙ୍କାର ପ୍ରକଳ୍ପ ଅନୁମୋଦନ
ଅନୁଗୁଳ: ରୂପାନ୍ତରଣ ଯାତ୍ରାରେ ଦୌଡୁଛି ଅନୁଗୁଳ। ଗତ ଜୁଲାଇ ୧୧ତାରିଖରେ ଜିଲ୍ଲା ଗସ୍ତ କରିଥିଲେ 5T ଅଧ୍ୟକ୍ଷ କାର୍ତ୍ତିକ ପାଣ୍ଡିଆନ। ସେତେବେଳେ ଲୋକେ ଦେଇଥିବା ୨୨୭ଟି ଦରଖାସ୍ତ ମଧ୍ୟରୁ ପ୍ରାୟ ୨ଶହ ଦରଖାସ୍ତର ସମାଧାନ ହୋଇସାରିଛି। ମନ୍ଦିର, ମସଜିଦ୍, କମ୍ୟୁନିଟି ସେଣ୍ଟର ପାଇଁ ଅର୍ଥ ମଂଜୁର କରାଯାଇଛି । ସେସବୁକୁ ସ୍ବଚ୍ଛତା ସହ ଖର୍ଚ୍ଚ କଲେ ଆହୁରି ଅନୁଦାନ ପାଇବେ ବୋଲି 5T ଅଧ୍ୟକ୍ଷ କହିଛନ୍ତି । ଛଅ ମାସ ଭିତରେ ଦ୍ବିତୀୟ ଥର ଅନୁଗୁଳ ଯାଇଛନ୍ତି 5T ଅଧ୍ୟକ୍ଷ। କଥାରେ ନୁହେଁ କାମରେ ବିଶ୍ବାସ କରନ୍ତି ମୁଖ୍ୟମନ୍ତ୍ରୀ । ଛଅମାସ ଭିତରେ ଅଞ୍ଚଳ ପାଇଁ ୨ଶହ କୋଟି ଟଙ୍କାର ପ୍ରକଳ୍ପ ଅନୁମୋଦନ। ବ୍ରାହ୍ମଣୀ ନଦୀ ଉପରେ ଥିବା ସେତୁକୁ ପବିତ୍ର ମୋହନ ପ୍ରଧାନ ସେତୁ କରିବାକୁ ସ୍ଥାନୀୟ ଲୋକେ ଅନୁରୋଧ କରିଥିଲେ । ଅନୁରୋଧ ରକ୍ଷା କରିଛନ୍ତି ମୁଖ୍ୟମନ୍ତ୍ରୀ ।
ସେହିପରି ସିବିଡାରୁ ଖଡ଼କା ରାସ୍ତା ପାଇଁ ୪୨କୋଟି ଟଙ୍କା ମଂଜୁର ହୋଇ ଟେଣ୍ଡର ପ୍ରକ୍ରିୟା ସରିଛି। ପାଲଲହଡ଼ା ସହରରୁ ମାଙ୍କଡ଼ା ନାଳ ଦେଇ ନାଇକାଣିପାଲି ପର୍ଯ୍ୟନ୍ତ ରାସ୍ତା ପାଇଁ ୨୦କୋଟି, ଦାଡ଼ଗଡ଼ିଆ ସିଆରିଆ ରାସ୍ତା ପାଇଁ ୧୪କୋଟି ୯୦ ଲକ୍ଷ, ମାଙ୍କିଡିଆ ନାଳ ଉପରେ ସେତୁ ପାଇଁ ୫କୋଟି ୪୦ଲକ୍ଷ, ଅନ୍ଧାରୀ ନାଳ ଉପରେ ଓଡ଼ଶରୁ କୋଚିଆବେଡ଼ାକୁ ସଂଯୋଗ କରୁଥିବା ସେତୁ ପାଇଁ ୪କୋଟି, ପବିତ୍ର ମୋହନ ପ୍ରଧାନ ମେମୋରିଆଲ୍ ପାଇଁ ପ୍ରାୟ ୩କୋଟି ଅନୁମୋଦନ ହୋଇଛି। ଜିଲ୍ଲାର ସବୁ କଲେଜ ସ୍କୁଲକୁ 5Tରେ ସାମିଲ କରାଯାଇଛି। ବଡ଼ ସହରର ପିଲାଙ୍କ ଭଳି ଏହି ଅଞ୍ଚଳର ପିଲା ବି ପାଠ ପଢିବେ। ଖମାର କଲେଜ ରୂପାନ୍ତରଣ ପାଇଁ ୫କୋଟି ଟଙ୍କା ମଂଜୁର କରାଯାଇଛି। ଗ୍ରାମାଞ୍ଚଳରେ ବଞ୍ଚିତ ହିତାଧିକାରୀଙ୍କୁ ଖୁବ୍ ଶୀଘ୍ର ବିଏସକେଓ୍ବାଇ କାର୍ଡ ମିଳିବ। ଫେବ୍ରୁଆରୀରେ ଅନୁଗୁଳରେ ଲକ୍ଷ୍ମୀ ଯୋଜନାର ଶୁଭାରମ୍ଭ କରାଯିବ। ଫେବ୍ରୁଆରୀ ସୁଦ୍ଧା ଜିଲ୍ଲାର ସବୁ ପଞ୍ଚାୟତରେ ମିଳିବ ବ୍ୟାଙ୍କ ସୁବିଧା। ପ୍ରତି ପଞ୍ଚାୟତରେ ଥିବା ଜଗନ୍ନାଥ ମନ୍ଦିରର ଉନ୍ନତି ପାଇଁ ମଧ୍ୟ ଟଙ୍କା ଦିଆଯାଇଛି ।
ପିଲାଙ୍କୁ ଗୁରୁମନ୍ତ୍ର ଦେଲେ 5T ଅଧ୍ୟକ୍ଷ, କହିଲେ ବାପା,ମାଆ ଓ ଗୁରୁଙ୍କୁ ସମ୍ମାନ ଜଣାଇଲେ ବଢିବ ଜ୍ଞାନ ଓ ଗାରିମା
ଅନୁଗୁଳ: ବାପା,ମାଆ ଓ ଗୁରୁଙ୍କୁ ସମ୍ମାନ ଜଣାଇଲେ ବଢିବ ଜ୍ଞାନ ଓ ଗାରିମା । ଯେତେ ସମ୍ମାନ ଦେବେ ସେତେ ଜ୍ଞାନ ପାଇବେ ବୋଲି ଖମାର କଲେଜରେ ପିଲାଙ୍କୁ ସଫଳତାର ଟିପ୍ସ ଦେଇଛନ୍ତି 5T ଅଧ୍ୟକ୍ଷ କାର୍ତ୍ତିକ ପାଣ୍ଡିଆନ । ଖମାରରେ ଛାତ୍ରଛାତ୍ରୀଙ୍କୁ ଭେଟିବା ଅବସରରେ ଉତ୍କଳମଣି ଗୋପବନ୍ଧୁ ମହାବିଦ୍ୟାଳୟ ସ୍ମାର୍ଟ ହେଉଛି ବୋଲି କହିଛନ୍ତି । ଏହାସହିତ ମୁଖ୍ୟମନ୍ତ୍ରୀ ୫କୋଟି ଅନୁମୋଦନ କରିଛନ୍ତି ବୋଲି ଜଣାଇଛନ୍ତି । ଏହାର କ୍ଲାସରୁମ ସ୍ମାର୍ଟ ହେବ, ସାଇନ୍ସ ଲ୍ୟାବ ଇ-ଲାଇବ୍ରେରୀ ପିଲା ପାଇବେ ବୋଲି ପ୍ରତିଶ୍ରୁତି ଦେଇଛନ୍ତି ପାଣ୍ଡିଆନ। ଖମାରର ପିଲାମାନେ ବଡ଼ ସହରର ପିଲାଙ୍କ ଭଳି ସୁବିଧା ପାଇବେ । କଠିନ ପରିଶ୍ରମ କରିବେ, ଭବିଷ୍ୟତ ଉଜ୍ଜଳ କରିବେ ବୋଲି ସେ ଆଶା କରିଛନ୍ତି । ପାଠପଢି ବାପା, ମାଆ, କଲେଜ ଓ ଅନୁଗୁଳର ନାଁ ରଖିବେ । ଏହି ଅବସରରେ ପାଣ୍ଡିଆନ ତାଙ୍କ ଜୀବନର କାହାଣୀ ମଧ୍ୟ ବଖାଣିଥିଲେ । ସେ ବହୁତ ପଛୁଆ ଅଞ୍ଚଳରୁ ଆସିଥିଲେ ।
୨୦କିମି ସାଇକେଲରେ ଯିବା ଆସିବା କରୁଥିଲେ । ସରକାରୀ ସ୍କୁଲରେ ପାଠପଢି ସେ ଆଇଏଏସ ଅଫିସର ହୋଇପାରିଥିଲେ । ଯଦି ସେ ଆଇଏଏସ ଅଫିସର ହୋଇପାରିଲେ ତେବେ ସମସ୍ତେ ଏହି ସ୍ବପ୍ନ ସାକାର କରିପାରିବେ ବୋଲି ଗୁରୁମନ୍ତ୍ର ଦେଇଛନ୍ତି ପାଣ୍ଡିଆନ । ୫ବର୍ଷ ବହୁତ ଗୁରୁତ୍ବପୂର୍ଣ୍ଣ । ଯଦି ଦିନରାତି କଠିନ ପରିଶ୍ରମ କରିବେ ଭବିଷ୍ୟତ ଉଜ୍ଜ୍ବଳ ହେବ । ଗଡସନ୍ତ୍ରିରେ ସମୀକ୍ଷା କାର୍ଯ୍ୟକ୍ରମ ଶେଷ ପରେ ଖମାର ଜଗନ୍ନାଥ ମନ୍ଦିରରେ ଦର୍ଶନ କରି ଛାତ୍ରଛାତ୍ରୀଙ୍କୁ ଭେଟିଥିଲେ 5T ଅଧ୍ୟକ୍ଷ ।
ରାଜ୍ୟରେ କରୋନା ଆକ୍ରାନ୍ତଙ୍କ ସଂଖ୍ୟା ୮କୁ ବୃଦ୍ଧି
ଭୁବନେଶ୍ବର: କୋଭିଡ ସଂଖ୍ୟା ବୃଦ୍ଧିକୁ ନେଇ ଜନସ୍ୱାସ୍ଥ୍ୟ ନିର୍ଦେଶକଙ୍କ ପ୍ରତିକ୍ରିୟା। କୋଭିଡ ଟେଷ୍ଟିଙ୍ଗ ବଢିଛି, ଗତକାଲି ୬୯୦ ଟେଷ୍ଟ ହୋଇଛି, ସେଥିରୁ ୩୭୮ ହେଉଛି ଆରଟିପିସିଆର। ସେଥିରୁ ୩ଜଣ ପଜିଟିଭି ଚି଼ହ୍ନଟ ହୋଇଛନ୍ତି। ବର୍ତ୍ତମାନ ରାଜ୍ୟରେ ୮ଜଣ ଆକ୍ଟିଭ ରୋଗୀ ଅଛନ୍ତି। ସମସ୍ତେ ହୋମ ଆଇସୋଲେସନରେ ଅଛନ୍ତି, ମେଡିକାଲରେ କେହି ନାହାଁନ୍ତି ତେଣୁ ଆତଙ୍କିତ ହେବାର ନାହିଁ। ଆଗକୁ ବଢିବା ନେଇ ସ୍ଥିତି ଅନୁଧ୍ୟାନ କରାଯାଉଛି। ଜାତୀୟସ୍ତରୀୟ ତଥ୍ୟ ଅନୁସାରେ ଯେଉଁମାନେ ଆକ୍ରାନ୍ତ ହେଉଛନ୍ତି ୯୨ ପ୍ରତିଶତରୁ ଅଧିକ ହୋମ ଆଇସୋଲେସନରେ ଅଛନ୍ତି, କୋଭିଡ ପାଇଁ ମେଡିକାଲରେ ଆଡମିଟ ହେବା ବହୁତ କମ। ସ୍ଥିତି ଉପରେ ନଜର ରଖାଯାଇଛି ।
ରାହୁଲଙ୍କ ଶତକୀୟ ପାଳି ଭାଙ୍ଗିଦେଲା ଏହି ୩ ଖେଳାଳିଙ୍କ ସ୍ବପ୍ନ!
ନନ୍ଦିଘୋଷ ବ୍ୟୁରୋ: ବକ୍ସି ଡେ ଟେଷ୍ଟରେ ପ୍ରଥମେ ବ୍ୟାଟିଂ କରିଥିବା ଭାରତ ୨୪୫ ରନରେ ଅଲଆଉଟ ହୋଇଛି । ପ୍ରାରମ୍ଭିକ ବ୍ୟାଟ୍ସମ୍ୟାନମାନେ ଖରାପ ପ୍ରଦର୍ଶନ କରିବା ସହ ବ୍ୟାଟିଂ ବିପର୍ଯ୍ୟୟର ସାମନା କରିଥିଲା ଟିମ ଇଣ୍ଡିଆ । ମାତ୍ର କେ.ଏଲ ରାହୁଲଙ୍କ ଶତକୀୟ ପାଳି ଦଳକୁ ଏକ ସମ୍ମାନଜନକ ସ୍କୋରରେ ପହଞ୍ଚାଇଛି । କିନ୍ତୁ ରାହୁଲଙ୍କ ଶତକ ୩ ଖେଳାଳିଙ୍କ କ୍ୟାରିୟର ଉପରେ ପ୍ରଭାବ ପକାଇବା ବୋଲି କ୍ରିକେଟ ବିଶେଷଜ୍ଞମାନେ ମତ ଦିଅନ୍ତି । ରାହୁଲ ଏବେ ଦମଦାର ଫର୍ମରେ ନଜର ଆସୁଥିବାବେଳେ ଦଳରେ ସ୍ଥାନ ପାଇବା ଲକ୍ଷ୍ୟରେ ରହିଥିବା ସେମାନଙ୍କ ଉପରେ ପ୍ରଭାବ ପକାଇବ ବୋଲି କୁହାଯାଉଛି ।
କେ.ଏସ. ଭରତ: ଭାରତୀୟ ଟେଷ୍ଟ ଦଳରେ ଖେଳିବାର ସୁଯୋଗ ରହିଥିବା କେ.ଏସ. ଭରତ ଜଣେ ଭଲ ଓ୍ବିକେଟ କିପର । ଯଦିଓ ସେ ବ୍ୟାଟିଂରେ ଟିକେ ଦୁର୍ବଳ ଅଛନ୍ତି । ଏଣୁ ରାହୁଲଙ୍କ ଶତକ ପରେ ଆଶା ମଉଳି ଯାଇଛି ।
ଇଶାନ କିଶାନ: ଭାରତୀୟ କ୍ରିକେଟ ଦଳର ଓ୍ବିକେଟ କିପର ବ୍ୟାଟ୍ସମ୍ୟାନ ଦୀର୍ଘଦିନ ଧରି ଦଳରେ ସ୍ଥାନ ପାଉଥିଲେ ସୁଦ୍ଧା ଖେଳିବାର ସୁଯୋଗ ପାଇନାହାନ୍ତି । ଦ୍ବିତୀୟ ଓ୍ବିକେଟ କିପରଭାବେ ଦଳରେ ସ୍ଥାନ ଆସୁଛନ୍ତି ମାତ୍ର ଖେଳିବାର ସୁଯୋଗ ପାଉ ନଥିବାରୁ ଦକ୍ଷିଣ ଆଫ୍ରିକା ଟେଷ୍ଟ ସିରିଜ ପୂର୍ବରୁ ମଧ୍ୟ ସେ ଦେଶକୁ ଫେରିଆସିଛନ୍ତି । ଏବେ ରାହୁଲଙ୍କ ବଡ଼ ପାଳି ପରେ ପୁଣି ଖେଳିବାର ସୁଯୋଗ ପାଇ ନପାରନ୍ତି ।
ଋଷଭ ପନ୍ଥ: ଦୁର୍ଘଟଣା ପରେ ଦଳକୁ ଫେରିନାହାନ୍ତି ଋଷଭ ପନ୍ଥ । ଟେଷ୍ଟରେ ନିୟମିତ ଓ୍ବିକେଟକିପର ବ୍ୟାଟ୍ସମ୍ୟାନଭାବେ ଖେଳିବାର ସୁଯୋଗ ପାଉଥିବା ଋଷଭ ପନ୍ଥ ଦଳକୁ ଫେରିବା ପରେ ସୁଯୋଗ ମିଳିବା କଷ୍ଟସାଧ୍ୟ ହେବ । ପ୍ରଥମ ଆଇପିଏଲ ଖେଳିବେ ଏବଂ ପ୍ରଦର୍ଶନକୁ ଦୃଷ୍ଟିରେ ରଖି ଦଳରେ ସୁଯୋଗ ଦିଆଯିବ ବୋଲି ଆଶା ରଖାଯାଇଛି ।
ଝିଅକୁ ନୃଶଂସ ଭାବେ ହତ୍ୟା କଲା ବାପା
ପାନିପତ୍: ବାପା ସାଜିଲା ରାକ୍ଷସ । ନିଜ ଝିଅକୁ ଅତି ନୃଶଂସ ଭାବରେ ହତ୍ୟା କରିଛି ବାପା । ଯେଉଁ ଝିଅ କୁ ପାଳି ପୋଷି ଛୋଟରୁ ଏତେ ବଡ କରିଥିଲା ସେହି ଝିଅ କୁ ଆଜି ଗୁଳି କରି ହତ୍ୟା କରିଛି ବାପା । ଏଭଳି ଏକ ହୃଦୟ ବିଦାରକ ଘଟଣା ଦେଖିବାକୁ ମିଳିଛି ହରିୟାଣା ର ପାନିପତ୍ ଜିଲ୍ଲା ରେ । ସୂଚନାଅନୁସାରେ , ଜଣେ ବ୍ୟକ୍ତି ନିଜର ୧୭ ବର୍ଷର ଝିଅ ଭାବନାଙ୍କୁ ଅତି ନିର୍ମମ ଭାବରେ ହତ୍ୟା କରିଛି । ବ୍ୟକ୍ତି ଜଣକ ଭାବନାଙ୍କ ଉପରକୁ ୪ରୁ ୫ ରାଉଣ୍ଡ ଗୁଳି ଚଳାଇଥିଲେ । ଗୁଳିର ଶଦ୍ଦ ଶୁଣିବା ମାତ୍ରେ ଆଖପାଖ ଅଞ୍ଚଳରେ ଆତଙ୍କ ଖେଳିଯାଇଥିଲା । ଯେତେବେଳେ ଆଖ ପାଖ ଅଞ୍ଚଳର ଲୋକେ କଣ ଗୁଳି ଶଦ୍ଦ ହେଲା ବୋଲି ଦେଖିବାକୁ ଯାଇଥିଲେ । ସେତେବେଳେ ଲୋକେ ଘଟଣାସ୍ଥଳରେ ଦେଖିଥିଲେ କି ଭାବନା ରକ୍ତ ଜୁଡୁବୁଡୁ ଅବସ୍ଥାରେ ତଳେ ପଡିରହିଛି । ଏହା ପରେ ପଡୋଶୀ ଭାବନାଙ୍କୁ ପାଖରେ ଥିବା ପାର୍କ ହସ୍ପିଟାଲ୍ ରେ ଭର୍ତ୍ତି କରିଥିଲେ କିନ୍ତୁ ଡାକ୍ତର ତାଙ୍କୁ ସେଠାରେ ମୃତ ଘୋଷଣା କରିଛନ୍ତି । ଘଟଣା ସମ୍ପର୍କରେ ସୂଚନା ପାଇବା ପରେ ପୋଲିସ୍ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି । ପୋଲିସ୍ ର କହିବା ଅନୁସାରେ ତାଙ୍କୁ ୧୭ ବର୍ଷର ଝିଅର ହତ୍ୟା କରାଯାଇଥିବା ସୂଚନା ମିଳିଥିଲା । ଅଭିଯୁକ୍ତ ବାପା ଘଟଣାସ୍ଥଳରୁ ଫେରାର୍ ଅଛନ୍ତି । ପୋଲିସ୍ ଏହା ମଧ୍ୟ କହିଛି ଯେ , ଏହା ଅନରକିଲିଂ ମାମାଲା ପରି ଜଣାପଡୁଛି । ଭାବନାଙ୍କ ଶବ କୁ ପୋଷ୍ଟମର୍ଟମ ପାଇଁ ପଠାଯାଇଛି । ଅଭିଯୁକ୍ତ ପିତାକୁ ଖୋଜିବା ପାଇଁ ପୋଲିସ୍ ତନାଘନା ଆରମ୍ଭ କରିଦେଇଛି । ତେବେ ବର୍ତ୍ତମାନ ସୁଦ୍ଧା ହତ୍ୟା ର କାରଣ ଅସ୍ପଷ୍ଟ ରହିଛି ।
ମର୍ମନ୍ତୁଦ ସଡ଼କ ଦୁର୍ଘଟଣାରେ ୧୩ ଯାତ୍ରୀଙ୍କ ମୃତ୍ୟୁ, ୧୭ ଯାତ୍ରୀ ଆହତ
ନନ୍ଦିଘୋଷ ବ୍ୟୁରୋ: ମଧ୍ୟପ୍ରଦେଶ ଗୁନାରେ ମର୍ମନ୍ତୁଦ ସଡକ ଦୁର୍ଘଟଣା । ଡମ୍ଫର ସହିତ ବସଟି ଧକ୍କା ଫଳରେ ବସଟି ସଂପୂର୍ଣ୍ଣ ଜଳିଯାଇଛି । ଘଟଣାରେ ୧୩ଜଣ ଯାତ୍ରୀ ଜୀବନ୍ତ ଦଗ୍ଧ ହୋଇଛନ୍ତି । ୧୭ ଯାତ୍ରୀ ଆହତ ହୋଇଛନ୍ତି । ଏକ ଘରୋଇ ବସଟି ୩୦ରୁ ଉର୍ଦ୍ଧ୍ୱ ଯାତ୍ରୀଙ୍କୁ ନେଇ ଗୁନା ଅଞ୍ଚଳରେ ଯାଉଥିଲା । ମାତ୍ର ହଠାତ୍ ବସଟି ସମ୍ମୁଖରୁ ଆସୁଥିବା ଏକ ଡମ୍ଫର ସହ ଧକ୍କା ହୋଇ ଜଳି ଯାଇଥିଲା । ଏହି ଦୁର୍ଘଟଣାରେ ୧୩ଜଣ ଜୀବନ୍ତ ଜଳି ଯାଇଥିବା ବେଳେ ୧୭ଜଣ ଆହତ ହୋଇଛନ୍ତି । ଖବର ପାଇ ପୋଲିସ ପୋଲିସ ଓ ଅଗ୍ନିଶମ କର୍ମଚାରୀ ଘଟଣା ସ୍ଥଳରେ ପହଞ୍ଚି ନିଆଁକୁ ଆୟତ୍ତ କରିବା ସହିତ ସମସ୍ତ ଆହତଙ୍କୁ ନିକଟସ୍ଥ ହସ୍ପିଟାଲରେ ଭର୍ତ୍ତି କରିଛନ୍ତି । ସେପଟେ ମଧ୍ୟପ୍ରଦେଶ ମୁଖ୍ୟମନ୍ତ୍ରୀ ମୋହନ ଯାଦବ ଦୁର୍ଘଟଣା ଯୋଗୁଁ ଦୁଃଖ ପ୍ରକାଶ କରିବା ସହିତ ମୃତକଙ୍କ ପାଇଁ ୪ଲକ୍ଷ ଟଙ୍କାର ଆର୍ଥିକ ସହାୟତା ପ୍ରଦାନ କରିବା ସହିତ ଆହତଙ୍କ ପାଇଁ ୫୦ ହଜାର ଟଙ୍କାର ଅନୁକମ୍ପା ରାଶି ପ୍ରଦାନ କରିଛନ୍ତି।
ଗଡ଼ସନ୍ତ୍ରୀରେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ନାଁ ନନେଇ ଟାର୍ଗେଟ କଲେ 5T ଅଧ୍ୟକ୍ଷ କାର୍ତ୍ତିକ ପାଣ୍ଡିଆନ
ଅନୁଗୁଳ: ଧାମନଗର ପରେ ଗଡ଼ସନ୍ତୀ । ପୁଣି ନାଁ ନେଇ ଟାର୍ଗେଟ । ଧର୍ମେନ୍ଦ୍ରଙ୍କ ମାଟିରେ ଧର୍ମେନ୍ଦ୍ରଙ୍କୁ ପଏଣ୍ଟ୍ ବ୍ଲାଙ୍କ୍ ଟାର୍ଗେଟ୍ । କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ନିଜ ଜିଲ୍ଲାରେ ଠିଆ ହୋଇ ଟାର୍ଗେଟ୍ କରିଛନ୍ତି ବିଜେଡି ବରିଷ୍ଠ ନେତା ଫାଇଭ ଟି ତଥା ନବୀନ ଓଡ଼ିଶା ଅଧ୍ୟକ୍ଷ କାର୍ତ୍ତିକ ପାଣ୍ଡିଆନ। ଅନୁଗୁଳ ଜିଲ୍ଲାର ଗଡସନ୍ତ୍ରୀ ଠାରେ ସାଧାରଣ ସଭାରେ ପାଣ୍ଡିଆନ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କୁ ସିଧାସଳଖ ଟାର୍ଗେଟ୍ କରିଛନ୍ତି । କେନ୍ଦ୍ରମନ୍ତ୍ରୀ ଧର୍ମେନ୍ଦ୍ରଙ୍କୁ ସେ ତିନିଟି ପ୍ରଶ୍ନ ପଚାରିଛନ୍ତି। କେନ୍ଦ୍ରରେ ଦୀର୍ଘ ଦିନ ଧରି ସେ ମନ୍ତ୍ରୀ ହୋଇ ରହିଛନ୍ତି। କିନ୍ତୁ ଏ ଅଂଚଳ ପାଇଁ ତାଙ୍କର କଣ ଅବଦାନ ବୋଲି ପ୍ରଶ୍ନ କରିଛନ୍ତି କାର୍ତ୍ତିକ ପାଣ୍ଡିଆନ ।
କେନ୍ଦ୍ରରେ ଶିକ୍ଷାମନ୍ତ୍ରୀ ଅଛନ୍ତି ଧର୍ମେନ୍ଦ୍ର ପ୍ରଧାନ। ସେ ଚାହିଁଥିଲେ ତାଙ୍କ ଅଞ୍ଚଳରେ ଥିବା ୩୦ଟି ଯାକ ବ୍ଲକରେ କେନ୍ଦ୍ରୀୟ ବିଦ୍ୟାଳୟ, ନବୋଦୟ ବିଦ୍ୟାଳୟ ଭଳି ଶିକ୍ଷାନୁଷ୍ଠାନ ପ୍ରତିଷ୍ଠା କରିପାରିଥାନ୍ତେ। ସେ କାହିଁକି କଲେ ନାହିଁ। ସେହିଭଳି ଏ ଅଂଚଳର ଲୋକ କାମ ଧନ୍ଦା ପାଇଁ ବାହାରକୁ ଯାଉଛନ୍ତି । ସେ ନିଜେ ଦକ୍ଷତା ବିକାଶ ବିଭାଗର ମନ୍ତ୍ରୀ ଅଛନ୍ତି। ଚାହିଁଥିଲେ ଏ ଅଂଚଳରେ ବହୁ ଦକ୍ଷତା ବିକାଶ କେନ୍ଦ୍ର ପ୍ରତିଷ୍ଠା କରିପାରିଥାନ୍ତେ । ଫଳରେ ଏ ଅଂଚଳ ଯୁବପିଢି ନିଜର ଦକ୍ଷତା ବୃଦ୍ଧି କରିଥାନ୍ତେ । କାହିଁକି ଏଠାରେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଦକ୍ଷତା ବିକାଶ କେନ୍ଦ୍ର ପ୍ରତିଷ୍ଠା କଲେନାହିଁ ବୋଲି ପଚାରିଛନ୍ତି କାର୍ତ୍ତିକ ପାଣ୍ଡିଆନ । ସେହିପରି କଟକରୁ ଅନୁଗୁଳକୁ ଦେଇ ସମ୍ବଲପୁର ସଂଯୋଗ କରୁଥିବା ୫୫ ନମ୍ବର ଜାତୀୟ ରାଜପଥ କାହିଁକି ବର୍ଷ ବର୍ଷ ଧରି ଅବହେଳିତ ହୋଇ ପଡି ରହିଛି ବୋଲି ସେ ପରାରିଛନ୍ତି ।
ବର୍ଷେ ଭିତରେ କେନ୍ଦ୍ରମନ୍ତ୍ରୀ ୪୦ ଥର ଅନୁଗୁଳ ଜିଲ୍ଲା ଆସିଛନ୍ତି । ପ୍ରତିଥର ଟିକିଏ ଟିକିଏ ବିକାଶମୂଳକ କାର୍ଯ୍ୟ ହାତକୁ ନେଇଥିଲେ ଅନୁଗୁଳର ପ୍ରଭୂତ ବିକାଶ ହୋଇପାରିଥାନ୍ତା । କିନ୍ତୁ କେନ୍ଦ୍ରମନ୍ତ୍ରୀ ତାହା କରିନାହାନ୍ତି । ଜୁନ ମାସରେ ଥରଟିଏ କାର୍ତ୍ତିକ ପାଣ୍ଡିଆନ ଅନୁଗୁଳ ଜିଲ୍ଲା ଆସିଥିଲେ ।ତାପରେ ୧୦୦ କୋଟି ଟଙ୍କା ଜିଲ୍ଲାକୁ ପ୍ରଦାନ କରାଯାଇଛି ବୋଲି ପାଣ୍ଡିଆନ କହିଛନ୍ତି। ନିଜ ଅଂଚଳ ପାଇଁ ନିଜର କର୍ତ୍ତବ୍ୟ ନେଇ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଆତ୍ମସମୀକ୍ଷା କରନ୍ତୁ ବୋଲି କାର୍ତ୍ତିକ ପାଣ୍ଡିଆନ ଗଡ଼ସନ୍ତ୍ରୀ ଠାରେ ଆହ୍ବାନ ଦେଇଛନ୍ତି । ସଭାରେ ଯୋଗ ଦେବା ପୂର୍ବରୁ ଗଡ଼ସନ୍ତ୍ରୀରେ ଲୋଭି ଠାକୁରାଣୀ ମନ୍ଦିରରେ ପହଞ୍ଚିଥିଲେ ଫାଇଭ-ଟି କାର୍ତ୍ତିକ ପାଣ୍ଡିଆନ । ସେଠାରେ ମାଆଙ୍କୁ ଦର୍ଶନ କରିବା ସହ ପୂଜା କରିଥିଲେ । ପରେ ମନ୍ଦିର ପରିସର ଭିତରେ ମନ୍ଦିରର ଉନ୍ନତିକରଣ ପ୍ରକଳ୍ପର ସମୀକ୍ଷା କରିଥିଲେ ।
ମା’ ଲୋଭୀ ଠାକୁରାଣୀଙ୍କ ପୀଠରେ ପାଣ୍ଡିଆନ
ଅନୁଗୁଳ: ଅନୁଗୁଳ ଜିଲ୍ଲା ଗସ୍ତରେ 5T ଅଧ୍ୟକ୍ଷ କାର୍ତ୍ତିକ ପାଣ୍ଡିଆନ । ଗଡ଼ସନ୍ତି ମା’ ଲୋଭୀ ଠାକୁରାଣୀଙ୍କ ପୀଠରେ ପହଞ୍ଚି ମା’ଙ୍କ ଦର୍ଶନ କରିବା ସହ ଆଶୀର୍ବାଦ ନେଇଛନ୍ତି । ମନ୍ଦିର ଉନ୍ନତି ନେଇ କମିଟିର ଦାବିପତ୍ର ଗ୍ରହଣ କଲେ। ସାଧାରଣ ସଭାରେ ଯୋଗ ଦେବା ପୂର୍ବରୁ ଲୋକଙ୍କ ସହ ମିଶିଥିଲେ । ଲୋକଙ୍କ ପାଖକୁ ଯାଇ ଅଭିଯୋଗପତ୍ର ମଧ୍ୟ ଗ୍ରହଣ କରିଛନ୍ତି । 5T ଅଧ୍ୟକ୍ଷଙ୍କୁ ସ୍ବାଗତ ସମ୍ବର୍ଦ୍ଧନା ଦିଆଯାଇଛି । ବିକାଶର ସମୀକ୍ଷା କରିବା ପାଇଁ ଅନୁଗୁଳ ଜିଲ୍ଲାରେ ପହଞ୍ଚିଥିବାବେଳେ ଲୋକଙ୍କ ମଧ୍ୟରେ ଉତ୍ସାହର ମାହୋଲ ଦେଖିବାକୁ ମିଳିଛି ।
ଆଫଗାନିସ୍ତାନ ବିପକ୍ଷ ଟି-୨୦ ସିରିଜ ପାଇଁ କେବେ ଘୋଷଣା ହେବ ଭାରତୀୟ ଟିମ୍?
ନୂଆଦିଲ୍ଲୀ: ଦକ୍ଷିଣଆଫ୍ରିକା ସିରିଜ ପରେ ଆଫଗାନିସ୍ତାନ ବିପକ୍ଷରେ ଟି-୨୦ ସିରିଜ ଖେଳିବ ଭାରତ। ୩ ମ୍ୟାଚ ବିଶିଷ୍ଟ ଏହି ସିରିଜ ଖେଳାଯିବାକୁ ଥିବାବେଳେ ଭାରତୀୟ ଦଳ କେବେ ଘୋଷଣା ହେବ ତାକୁ ନେଇ ଆରମ୍ଭ ହୋଇଛି ଚର୍ଚ୍ଚା। ତେବେ ଦଳରେ କେଉଁମାନେ ସ୍ଥାନ ପାଇବେ ତାହା ବେଶ ଗୁରୁତ୍ବବହନ କରୁଛି । ୨୦୨୪ରେ ଟି-୨୦ ବିଶ୍ବକପ ଅନୁଷ୍ଠିତ ହେବାକୁଥିବାବେଳେ ଏହା ଶେଷ ଟି-୨୦ ସିରିଜ । ଏଣୁ ବିଶ୍ବକପ ପାଇଁ ଖେଳାଳିଙ୍କ ପ୍ରଦର୍ଶନ ବେଶ ଗୁରୁତ୍ବବହନ କରୁଛି । ଏହି ସିରିଜ ପରେ ଆଇପିଏଲ ଖେଳିବେ ଭାରତୀୟ ଖେଳାଳି । ଏଣୁ ଆଇପିଏଲ ସାଙ୍ଗକୁ ଏହି ଟି-୨୦ ସିରିଜ ବେଶ ଗୁଚରୁତ୍ବବହନ କରୁଛି । ହାର୍ଦ୍ଦିକ ପାଣ୍ଡ୍ୟା ଏବଂ ଋତୁରାଜ ଗାଏକ୍ବାଡ ଆହତ ରହିଥିବାବେଳେ ଏହି ସିରିଜରେ ନଖେଳି ପାରନ୍ତି । ସେପଟେ ଜାଡେଜା ଏବଂ ବୁମରାଙ୍କୁ ଏହି ସିରିଜରେ ବିଶ୍ରାମ ଦିଆଯାଇପାରେ । ସୂର୍ଯ୍ୟ କୁମାର ଯାଦବଙ୍କ ଗୋଡ଼ରେ ଆଘାତ ଲାଗିଥିବାରୁ ସେ ଏବେ ଦଳରୁ ବାଦ ପଡ଼ିଛନ୍ତି । ଏଣୁ ସେ ମଧ୍ୟ ଖେଳିପାରିବେ ନାହିଁ । ତେବେ ଆସନ୍ତା ସପ୍ତାହରେ ଭାରତୀୟ ଦଳ ଘୋଷଣା ହେବ ବୋଲି ଆଶା କରାଯାଉଛି ।