ସମ୍ବଲପୁର: ଛାତ୍ରଙ୍କ ଉପରେ ଚଢିଗଲା ବସ । ଘଟଣା ସ୍ଥଳରେ ହିଁ ଛାତ୍ରଙ୍କ ମୃତ୍ୟୁ । ସମ୍ବଲପୁରର ବାଲିବନ୍ଧା ଫେଜର କ୍ଲବ ପାଖରେ ଘଟିଛି ଅଘଟଣ । ଏକ ଘରୋଇ ଟୁରିଷ୍ଟ ବସ ସମଲେଶ୍ବରୀ ମନ୍ଦିରରୁ ଫେରୁଥିବା ବେଳେ ଛାତ୍ରଙ୍କ ଉପରେ ଚଢି ଯାଇଥିଲା । ଏନଏଚ ବଦଳରେ ଟାଉନ ଭିତର ଦେଇ ବସଟି ଯିବା ଫଳରେ ଏହି ଦୁର୍ଘଟଣା ଘଟିଥିବା ଅଭିଯୋଗ ହୋଇଛି । ମୃତ ଛାତ୍ର ଜଣକ ହେଉଛନ୍ତି ସ୍ଥାନୀୟ ଅଂଚଳର ରୋନକ ନାଏକ l ଘଟଣା ସ୍ଥଳରୁ ବସକୁ ନେଇ ଡ୍ରାଇଭର ଚମ୍ପଟ ମାରୁଥିବା ବେଳେ ସ୍ଥାନୀୟ ଲୋକ ଅଟକ ରଖିଛନ୍ତି । ବର୍ତ୍ତମାନ ଘଟଣା ସ୍ଥଳରେ ଚାପା ଉତ୍ତେଜନା ଲାଗିରହିଛି l ସଦର ଏସଡିପିଓ ଏବଂ ଅତିରିକ୍ତ ଏସପି ପହଞ୍ଚି ଲୋକଙ୍କୁ ବୁଝାସୁଝା କରୁଛନ୍ତି l
ନୟାଗଡ଼ କଣ୍ଟେଇମୁଣ୍ଡି ବାଇଗଣକୁ ମିଳିଲା ଜିଆଇ ଟ୍ୟାଗ ରେଜିଷ୍ଟ୍ରେସନ୍
ନୟାଗଡ଼: ନୟାଗଡ଼ କଣ୍ଟେଇମୁଣ୍ଡି ବାଇଗଣକୁ ମିଳିଲା ଜିଆଇ ଟ୍ୟାଗ ରେଜିଷ୍ଟ୍ରେସନ୍ । ଚେନ୍ନାଇ ଠାରେ ଥିବା କେନ୍ଦ୍ରସରକାରଙ୍କ ଜିଓଗ୍ରାଫିକାଲ ଇଣ୍ଡିକେସନ୍ ରେଜେଷ୍ଟ୍ରି ପକ୍ଷରୁ ଆଜି ବଧିବଦ୍ଧ ଭାବେ ମାନ୍ୟତା ପ୍ରଦାନ କରାଯାଇଛି। କଣ୍ଟେଇମୁଣ୍ଡି ବାଇଗଣକୁ ଜିଆଇ ଟ୍ୟାଗ ମାନ୍ୟତା ପାଇଁ କୃଷି ବିଜ୍ଞାନ କେନ୍ଦ୍ର ପକ୍ଷରୁ ୩ ବର୍ଷ ତଳେ ପ୍ରୟାସ ଆରମ୍ଭ ହୋଇଥିଲା । ଜିଲାପାଳଙ୍କ ସବୁଜ ସଙ୍କେତ ମିଳିବା ପରେ ବୈଠକ କରାଯାଇ ଏଥିରେ ସହମତି ପ୍ରକାଶ ପାଇଥିଲା । ଆବଶ୍ୟକୀୟ ଡକ୍ୟୁମେଣ୍ଟସ୍ ପ୍ରସ୍ତୁତ କରାଯାଇ ଓୟୁଏଟିକୁ ଦିଆଯାଇଥିଲା ।
ଓୟୁଏଟି ପକ୍ଷରୁ ଆବଶ୍ୟକ କାଗଜାତ ଜିଆଇ ଟ୍ୟାଗ କାର୍ଯ୍ୟାଳୟ ଚେନ୍ନାଇକୁ ପଠାଯାଇଥିଲା । ଆଜି ଏହି କଣ୍ଟେଇମୁଣ୍ଡି ବାଇଗଣକୁ ଜିଆଇ ଟ୍ୟାଗ ରେଜିଷ୍ଟ୍ରେସନ ନେଇ ସୂଚନା ଦେଇଛନ୍ତି ଜିଲ୍ଲାପାଳ ରବିନ୍ଦ୍ର ନାଥ ସାହୁ। ନୟାଗଡ଼ ଜିଲ୍ଲା ପ୍ରଶାସନ ସହାୟତାରେ କଣ୍ଟିଲୋ ସ୍ଥିତ ନୀଳମାଧବ କୃଷି ସଂଗଠନ ଏହି କଣ୍ଟେଇମୁଣ୍ଡି ବାଇଗଣକୁ ଜିଆଇ ମାନ୍ୟତା ପାଇଁ ଆବେଦନ କରିଥିଲା l ପୋଷକ ତତ୍ତ୍ବରେ ପରିପୂର୍ଣ୍ଣ ଏହି ବାଇଗଣର ସ୍ବାଦ ମଧ୍ୟ ଭାରୀ ନିଆରା l ଖଣ୍ଡପଡା ବ୍ଳକର କଣ୍ଟିଲୋ ମହାନଦୀ କୂଳେ କୂଳେ କଣ୍ଟେଇମୁଣ୍ଡି ବାଇଗଣ କାହିଁ କେଉଁ କାଳରୁ ଚାଷ ହୋଇ ଆସୁଛି। ଏହା ସ୍ବାଦିଷ୍ଟ ଥିବାରୁ ବିକ୍ରି ବଢ଼ି ଚାଲିଛି। ପରେ ବଡବାଣପୁର, ପଦ୍ମାବତୀ ଓ ଏହାର ଆଖପାଖ ଅଞ୍ଚଳ ସମେତ ନୟାଗଡ ଜିଲାର ବିଭିନ୍ନ ଗାଁରେ ଏହି ଚାଷ କରାଯାଉଛି ।
ଆତଙ୍କବାଦୀଙ୍କ ଆକ୍ରମଣରେ ଥରିଲା ଇରାନ୍, ୭୦ ଜଣଙ୍କ ମୃତ୍ୟୁ
ନନ୍ଦିଘୋଷ ବ୍ୟୁରୋ: ଆତଙ୍କବାଦୀଙ୍କ ଆକ୍ରମଣରେ ଥରିଲା ଇରାନ୍ । ଦୁଇଟି ବୋମା ବିସ୍ପୋରଣରେ ୭୦ ଜଣଙ୍କ ମୃତ୍ୟୁ ହୋଇଥିବା ବେଳେ ଶହ ଶହ ଲୋକ ଆହତ ହୋଇଛନ୍ତି । କାସୀମ ସୋଲେମାନିର ସ୍ମୃତି ସଭାରେ ଯୋଗ ଦେଇଥିଲେ ଶହ ଶହ ଲୋକେ । ୨୦୨୦ରେ ଡ୍ରୋନ ଆକ୍ରମଣରେ କାସୀମକୁ ଆମେରିକା ହତ୍ୟା କରିଥିଲା । କାସୀମ ସୋଲେମାନୀ ଆମେରିକା ବିରୋଧରେ ଷଡ଼ଯନ୍ତ୍ର କରିବା ଅଭିଯୋଗରେ ହତ୍ୟା କରାଯାଇଥିଲା ।
ରାଜ୍ୟ କଂଗ୍ରେସକୁ ଘାରିଛି ଦଳୀୟ ପ୍ରାର୍ଥୀ ଚିନ୍ତା
ଭୁବନେଶ୍ବର: ୨୦୨୪ ପାଇଁ ରାଜ୍ୟ କଂଗ୍ରେସକୁ ଘାରିଛି ଦଳୀୟ ପ୍ରାର୍ଥୀ ଚିନ୍ତା । ନିର୍ବାଚନ ଯେତିକି ପାଖେଇ ଆସୁଛି ଦଳର ରଣନୀତି ସେତେ ଅସ୍ପଷ୍ଟତା ଆଡ଼କୁ ଯାଉଛି । ସବୁଠାରୁ ବଡ଼ କଥା ହେଉଛି ରାଜ୍ୟ କଂଗ୍ରେସର ମଙ୍ଗ ଧରିଥିବା ପିସିସି ସଭାପତି ବି ନିର୍ବାଚନ କେଉଁଠୁ ଲଢିବେ ତାହା ଜାଣିନାହାନ୍ତି । ଦଳର ବରିଷ୍ଠ ନେତାମାନେ ଲଢେଇ ପୂର୍ବରୁ ମଇଦାନ ଛାଡ଼ିବା ନିଷ୍ପତ୍ତି ନେଇ ପୁଅମାନଙ୍କୁ ଉତ୍ତରାଧିକାରୀ ଭାବେ ପ୍ରୋଜେକ୍ଟ କରିଛନ୍ତି । ବରିଷ୍ଠ ବିଧାୟକ ସୁରେଶ ରାଉତରାୟ ପରିବାର ରାଜନୀତିରେ ଛନ୍ଦି ହୋଇ ଦଳୀୟ ଟିକେଟରେ ପୁଅକୁ ଲଢାଇବେ କି ନାହିଁ ସେଇ ଚିନ୍ତାରେ ଘାରି ହେଉଛନ୍ତି । ୨୦୧୯ରେ ଦଳୀୟ ଟିକେଟ ପାଇଥିବା ଅଧା ପ୍ରାର୍ଥୀଙ୍କୁ ୨୪ରେ ରିପିଟ କରିବାକୁ କିନ୍ତୁ ପିସିସି ନିଷ୍ପତି ନେଇଛି ।
ପାଖଉଛି ନିର୍ବାଚନ, ବଢୁଛି ଟେନସନ । ନିର୍ବାଚନୀ ପ୍ରସ୍ତୁତିରେ କଂଗ୍ରେସର ସବୁଠି ଅସ୍ପଷ୍ଟ ଚିତ୍ର । ମଙ୍ଗୁଆଳ ଶରତଙ୍କ ନାହିଁ ନିର୍ବାଚନ ମଣ୍ଡଳୀ । ସୁରଙ୍କୁ ଘାରିଛି ପରିବାର ରାଜନୀତି ଘଣ୍ଟାଚକଟା । ୬୯ ଆସନରେ ପ୍ରାର୍ଥୀ ରିପିଟ ପାଇଁ କସରତ । ୨୦୨୪ ନିର୍ବାଚନ ପ୍ରସ୍ତୁତି ଭିତରେ ରାଜ୍ୟ କଂଗ୍ରେସକୁ ଘାରିଛି ପ୍ରାର୍ଥୀ ଚିନ୍ତା । ଦଳର ହେଭିଓ୍ବେଟ ନେତା ବି ଜାଣିନାହାନ୍ତି କଣ ହେବ ସେମାନଙ୍କ ଭାଗ୍ୟ । ୯ରୁ ୯୦ ମିଶନ ସ୍ଲୋଗାନ ଦେଉଥିବା ପିସିସି ସଭାପତି ଜାଣିନାହାନ୍ତି ତାଙ୍କ ନିର୍ବାଚନ ମଣ୍ଡଳୀ କେଉଁଠି । ଦଳ ତାଙ୍କୁ ଯେଉଁଠି ଟିକେଟ ଦେବ ସେଠାରୁ ନିର୍ବାଚନ ଲଢିବେ ବୋଲି ପିସିସି ସଭାପତି କହିଛନ୍ତି । ୨୦୧୯ ନିର୍ବାଚନରେ କମ ବ୍ୟବଧାନରେ ହାରିଥିବା ୬୯ ଜଣ ପ୍ରାର୍ଥୀଙ୍କୁ ଦଳ ପୁଣିଥରେ ଟିକେଟ ଦେବାକୁ ଅଙ୍କ କଷୁଛି । ଏପରି ସ୍ଥିତିରେ ରାହୁଲଙ୍କ ଭାରତ ନ୍ୟାୟ ଯାତ୍ରା ଓଡ଼ିଶାରେ କେଉଁଠି ହେବ ସେ ଚିନ୍ତା ମଧ୍ୟ ପିସିସିକୁ ଘାରିଛି । ଦଳକୁ ଏକଜୁଟ କରି ନିର୍ବାଚନ ପାଇଁ ଯାହା ପରିବର୍ତ୍ତନ ଆବଶ୍ୟକ ତାହା ଉପରେ ହାଇକମାଣ୍ଡ ଗୁରୁତ୍ବ ଦେଉଛନ୍ତି ବୋଲି ଦଳର ବରିଷ୍ଠ ନେତା କହିଛନ୍ତି ।
ସେପଟେ ବରିଷ୍ଠ କଂଗ୍ରେସ ବିଧାୟକ ସୁରେଶ ରାଉତରାୟ ପରିବାର ରାଜନୀତିରେ ଘାଣ୍ଟି ହେଉଛନ୍ତି । ଦୁଇ ପୁଅକୁ ନିର୍ବାଚନ ପାଇଁ ପ୍ରସ୍ତୁତ କରୁଥିବା ସୁର କିନ୍ତୁ ଦଳୀୟ ଟିକେଟରେ ପୁଅଙ୍କୁ ମଇଦାନକୁ ଓହ୍ଲାଇବେ କି ନାହିଁ ଦ୍ବନ୍ଦରେ ପଡ଼ିଛନ୍ତି । ସାନପୁଅ କଂଗ୍ରେସ ଟିକେଟରୁ ନଲଢିବା ପାଇଁ ସଫାସଫା କହିଥିବା ବେଳେ ପୁଅ କେଉଁ ଦଳରୁ ଲଢିବ ତାହା ଠିକ ସମୟରେ ନିଷ୍ପତ୍ତି ନେବେ ବୋଲି ସୁର କହିଛନ୍ତି । ଏପରି ସ୍ଥିତିରେ ଚବିଶ ନିର୍ବାଚନରେ କଂଗ୍ରେସର କିଛି ସମ୍ଭାବନା ନାହିଁ ବୋଲି ରାଜନୈତିକ ସମୀକ୍ଷକ ଆକଳନ କରିଛନ୍ତି ।
୨୦୧୯ ସାଧାରଣ ନିର୍ବାଚନ ପରେ ରାଜ୍ୟ କଂଗ୍ରେସ ସଂଗଠନ ତୃଣମୂଳ ସ୍ତରରେ ଧ୍ବସ୍ତବିଧ୍ବସ୍ତ । ଏହାରି ଭିତରେ ସଂଗଠନକୁ ଚଳଚଞ୍ଚଳ କରିବାକୁ ହାଇକମାଣ୍ଡ ଓଡ଼ିଶାରେ ନୂଆ ପ୍ରଭାରୀ ନିଯୁକ୍ତି କରିଛନ୍ତି । ନିର୍ବାଚନକୁ ଆଉ କିଛି ମାସ ଥିବା ବେଳେ ଦଳର ଚେହେରା ସାଜିଥିବା ନେତାମାନେ ଅସ୍ପଷ୍ଟ ବୟାନ ଦେଇ ନିର୍ବାଚନ ପ୍ରସ୍ତୁତିରେ କେଁ ପୂରାଉଛନ୍ତି ।
ଝାଡଖଣ୍ଡ ମୁଖ୍ୟମନ୍ତ୍ରୀ ହେମନ୍ତ ସୋରେନଙ୍କ ପାଇଁ ବଢ଼ୁଛି ଅଡ଼ୁଆ
ନନ୍ଦିଘୋଷ ବ୍ୟୁରୋ: ଝାଡଖଣ୍ଡ ମୁଖ୍ୟମନ୍ତ୍ରୀ ହେମନ୍ତ ସୋରେନଙ୍କ ପାଇଁ ବଢ଼ୁଛି ଅଡ଼ୁଆ। ସାତ ସାତ ଥର ସମନ ସତ୍ତ୍ୱେ ହେମନ୍ତ ସୋରେନ ଇଡି ସମ୍ମୁଖରେ ହାଜର ନହେବା ପରେ ତାଙ୍କର ବହୁ ସହଯୋଗୀଙ୍କ ଘରେ ପଶିଛି ଇଡି। ଏକକାଳୀନ ଝାଡଖଣ୍ଡର ୧୦ଟି ସ୍ଥାନରେ ଚଢଉ ହେଉଛି । ମୁଖ୍ୟମନ୍ତ୍ରୀଙ୍କ ଗଣମାଧ୍ୟମ ପରାମର୍ଶଦାତା ଅଭିଷେକ ପ୍ରସାଦ, ସାହିବ ଗଂଜ ଜିଲ୍ଲାପାଳ ରାମ ନିବାସ, ହଜାରିବାଗ ଡିଏସପି ରାଜେନ୍ଦ୍ର ଦୁବେଙ୍କ ଘରେ ମଧ୍ୟ ଆଜି ପଶିଛି ଇଡି। ଏଥିସହ ଜିଲ୍ଲାପାଳ ରାମ ନିବାସଙ୍କ ରାଜସ୍ଥାନ ବାସଭବନରେ ମଧ୍ୟ ଚଢଉ ହେଉଥିବା ସୂଚନା ମିଳିଛି ।
ଝାଡଖଣ୍ଡରେ ବେଆଇନ୍ ଖଣି ଖନନ ନେଇ ଏହି ଚଢଉ ହେଉଛି। ସେପଟେ ଜମି ଦୁର୍ନୀତି ମାମଲାରେ ଇଡି ପକ୍ଷରୁ ଝାଡଖଣ୍ଡ ମୁଖ୍ୟମନ୍ତ୍ରୀ ହେମନ୍ତ ସୋରେନଙ୍କୁ ସାତ ସାତ ଥର ସମନ ଜାରି ପରେ ସେ ହାଜର ନ ହେବାକୁ ନେଇ ନାଲି ଆଖି ଦେଖାଇଛି ଇଡି। ଇଡି ପକ୍ଷରୁ ସୋରେନଙ୍କୁ ହାଜର ହେବାକୁ ଆସନ୍ତା ୭ ଦିନ ପର୍ଯ୍ୟନ୍ତ ସମୟ ଦିଆଯାଇଛି। ନିଜର ପକ୍ଷ ରଖିବା ପାଇଁ ହେମନ୍ତ ସୋରେନଙ୍କ ପାଇଁ ଏହା ଶେଷ ସୁଯୋଗ ବୋଲି ଇଡି ପକ୍ଷରୁ ଚେତାଇ ଦିଆଯାଇଛି। ।
ଅପରପକ୍ଷେ ଝାଡଖଣ୍ଡ ସରକାରରେ ଅସ୍ଥିରତା ସୃଷ୍ଟି ପାଇଁ ଇଡି ଉଦ୍ୟମ କରୁଥିବା ହେମନ୍ତ ସୋରେନ୍ ଅଭିଯୋଗ କରିଛନ୍ତି । ସେ ତାଙ୍କ ସମସ୍ତ ସମ୍ପତ୍ତିର ତାଲିକା ଦେଇସାରିଛନ୍ତି । ଏହା ପରେ ବି ଇଡିର ସମନ ସମ୍ପୂର୍ଣ୍ଣ ବେଆଇନ ବୋଲି ହେମନ୍ତ ସୋରେନଙ୍କ ପକ୍ଷରୁ କୁହାଯାଇଛି ।
ରାଞ୍ଚି ଜମି ଦୁର୍ନୀତି ମାମଲାରେ ହଜାର ହେବାକୁ ହେମନ୍ତ ସୋରେନଙ୍କୁ ଇଡି ସାତ ଥର ସମନ ଜାରି କରିବା ସତ୍ତ୍ୱେ ସେ ହାଜର ହେଉ ନାହାନ୍ତି। ଏବେ ପୁଣି ଥରେ ସପ୍ତମ ଥର ପାଇଁ ତାଙ୍କୁ ସମନ ଜାରି କରା ଯାଇଛି। ଏହି ମାମଲାରେ ଇଡି ତାଙ୍କୁ ଗିରଫ କରିପାରେ ବୋଲି ହେମନ୍ତ ସୋରେନ୍ ଭୟ କରୁଛନ୍ତି। ତେଣୁ ସେ ମୁଖ୍ୟମନ୍ତ୍ରୀ ପଦରୁ ଇସ୍ତଫା ଦେଇ ପତ୍ନୀଙ୍କୁ ଝାଡ଼ଖଣ୍ଡ ମୁଖ୍ୟମନ୍ତ୍ରୀ କରିବାକୁ ପ୍ରସ୍ତୁତି ଚଳାଇଥିବା ରାଜନୈତିକ ମହଲରେ ଚର୍ଚ୍ଚା ଜୋର ଧରିଛି।
ଏଥିନିମନ୍ତେ ପଥ ପରିଷ୍କାର କରିବାକୁ ଯାଇ ଝାଡ଼ଖଣ୍ଡ ମୁକ୍ତି ମୋର୍ଚ୍ଚାର ବିଧାୟକ ସର୍ଫରାଜ କୌଣସି କାରଣ ନ ଦର୍ଶାଇ ଗାନ୍ଦେୟ ଆସନରୁ ଇସ୍ତଫା ଦେଇ ସାରିଛନ୍ତି । ତାଙ୍କ ଇସ୍ତଫା ପତ୍ରକୁ ମୁଖ୍ୟମନ୍ତ୍ରୀ ସ୍ୱୀକାର କରି ସାରିଥିବା ବେଳେ ଉକ୍ତ ଆସନରୁ ଭବିଷ୍ୟତରେ ପତ୍ନୀ କଳ୍ପନା ସୋରେନଙ୍କୁ ମୁଖ୍ୟମନ୍ତ୍ରୀ କରାଇବା ନିମନ୍ତେ ହେମନ୍ତ ସୋରେନ ଯୋଜନା କରୁଥିବା ଚର୍ଚ୍ଚା ହେଉଛି। ମାତ୍ର ନିଜ ପତ୍ନୀଙ୍କୁ ଭବିଷ୍ୟତରେ ମୁଖ୍ୟମନ୍ତ୍ରୀ ଆସନରେ ବସାଇବା ଖବରକୁ ଖଣ୍ଡନ କରିଛନ୍ତି ଝାଡ଼ଖଣ୍ଡ ମୁଖ୍ୟମନ୍ତ୍ରୀ ହେମନ୍ତ ସୋରେନ । ବିଜେପି ଏପରି ମିଥ୍ୟା ପ୍ରଚାର କରୁଥିବା ସେ ଅଭିଯୋଗ କରିଛନ୍ତି। ମାତ୍ର ଏଥିରେ କୌଣସି ସତ୍ୟତା ନ ଥିବା ସେ ଦୃଢତାର ସହ କହିଛନ୍ତି ।
ଡେଲିଭରି ବଏଙ୍କ ଅଭିନବ ଉପାୟ, ଘୋଡା ଉପରେ ବସି କରୁଛନ୍ତି ଖାଦ୍ୟ ଡେଲିଭରି
ହାଇଦ୍ରାବାଦ: ଡେଲିଭରି ବଏଙ୍କ ଅଭିନବ ଉପାୟ । ଘୋଡା ଉପରେ ବସି କରୁଛନ୍ତି ଖାଦ୍ୟ ଡେଲିଭରି । ଗତ ତିନିଦିନ ଧରି ସାରା ଦେଶରେ ପେଟ୍ରୋଲ ଦର ବୃଦ୍ଧି ନେଇ ହିଟ ଆଣ୍ଡ ରନ ନିୟମ ଲାଗିରହିଥିବା ବେଳେ ଏହାରି ଭିତରେ ସୋସିଆଲ ମିଡିଆରେ ଗୋଟେ ଭିଡିଓ ବହୁତ ମାତ୍ରାରେ ଭାଇରାଲ ହେବାରେ ଲାଗିଛି । ଯେଉଁଥିରେ ଜଣେ ଜୋମାଟୋ ବଏ ଘୋଡା ଉପରେ ବସି ଖାଦ୍ୟ ଡେଲିଭରି କରୁଥିବାର ଦେଖିବାକୁ ମିଳୁଛି । ଏ ଦୃଶ୍ୟ ହେଉଛି ହାଇଦ୍ରାବାଦ ଚଞ୍ଚଳଗୁଡା ଅଞ୍ଚଳର । ଯେଉଁଠାରେ ଡେଲିଭରି ବଏ ଘୋଡା ଉପରେ ବସି ଖାଦ୍ୟ ଡେଲିଭରି କରୁଥିବା ନେଇ ଦେଖିବାକୁ ମିଳିଛି । ତାଙ୍କୁ ଘୋଡା ଉପରେ ବସିଥିବା ନେଇ ଜଣେ ବ୍ୟକ୍ତି ତାଙ୍କୁ ପଚାରିଥିଲେ କଣ ହେଲା ।
ତାହାର ଉତ୍ତରରେ ସେ କହିଥିଲେ ପେଟ୍ରୋଲ ପମ୍ପରେ ଦୀର୍ଘ ୩ ଘଣ୍ଟା ଧରି ଲାଇନରେ ଠିଆ ହେବା ପରେ ତାଙ୍କୁ ପେଟ୍ରୋଲ ମିଲିନଥିବାରୁ ସେ ବାଇକ ଥୋଇଦେଇ ଘୋଡା ଉପରେ ବସି ଖାଦ୍ୟ ଡେଲିଭରି ପାଇଁ ଚାଲିଆସିଛନ୍ତି । ଯାହାକି ବର୍ତ୍ତମାନ ସୋସିଆଲ ମିଡିଆରେ ବହୁ ମାତ୍ରାରେ ଭାଇରାଲ ହେବାରେ ଲାଗିଛି । ସମସ୍ତେ ନିଜ ନିଜ ଆକାଉଣ୍ଟରେ ଏହି ଭିଡିଓଟିକୁ ବହୁ ମାତ୍ରାରେ ସେୟାର କରୁଥିବା ନେଇ ଦେଖାଦେଇଛି । ଏହି ଭିଡିଓରେ କେତେକ ୟୁଜର ଏହାକୁ ବୁଦ୍ଧିମାନର ପରିଚୟ ଏଥିରୁ କିଛି ଶିଖିବାର ଅଛି ବୋଲି ମେସେଜ୍ କରିଛନ୍ତି ।
ରାଜସ୍ବ ଆଦାୟ ନେଇ ବିଏମସି କମିଶନରଙ୍କ କଡା ଆଭିମୁଖ୍ୟ
ଭୁବନେଶ୍ବର: ରାଜଧାନୀରେ ବାସଗୃହ ନିର୍ମାଣ କରି ଯଦି ବ୍ୟବସାୟୀକ ଅନୁଷ୍ଠାନ ଭାବେ ବ୍ୟବହାର କରୁଛନ୍ତି ତେବେ ହୋଇ ଯାଆନ୍ତୁ ସାବଧାନ । କାରଣ ସଠିକ୍ ସମୟରେ ହୋଲଡିଂ ଟ୍ୟାକ୍ସ, କମର୍ସିଆଲ ହୋଲଡିଂ ଟ୍ୟାକ୍ସ ନଦେଲେ କଡା କାର୍ଯ୍ୟାନୁଷ୍ଠାନ ଗ୍ରହଣ କରିବ ବିଏମସି । ରାଜସ୍ବ ଆଦାୟ ନେଇ ବିଏମସି କମିଶନରଙ୍କ କଡା ଆଭିମୁଖ୍ୟ । ଲୋକଙ୍କୁ ସଚେତନ କରିବାକୁ ଖୁବଶୀଘ୍ର ବୁଲିବ ରାଜସ୍ବ ରଥ ।
ରାଜସ୍ବ ଆଦାୟ ନେଇ ବିଏମସିର କଡ଼ା ଆଭିମୂଖ୍ୟ । ସମୟରେ ହୋଲଡିଂ, କମର୍ସିଆଲ ହୋଲଡିଂ ଟ୍ୟାକ୍ସ ନଦେଲେ କାର୍ଯ୍ୟାନିୁଷ୍ଠାନ । ଖୁବଶୀଘ୍ର ସଚେତନ ପାଇଁ ବୁଲୁବ ରାଜସ୍ବ ରଥ । ଭୁବନେଶ୍ବରରେ ବାସଗୃହ ନିର୍ମାଣ କରି ଯେଉଁମାନେ ହୋଲଡିଂ ଟ୍ୟାକ୍ସ, ବାଣିଜ୍ୟ ଟ୍ୟାକ୍ସ, ଟ୍ରେଡ ଲାଇସେନ୍ସ ଟ୍ୟାକ୍ସ ଦେଉ ନାହାନ୍ତି ସେମାନଙ୍କ ବିରୋଧରେ କଡ଼ା ଆଭିମୂଖ୍ୟ ଗ୍ରହଣ କରିବ ବିଏମସି । ଏସବୁ ଘର ଗୁଡିକ ମାପି କମର୍ସିଆଲ ହୋଲଡିଂ ଟ୍ୟାକ୍ସ ଆଦାୟ କରିବ ବିଏମସି । ଯେଉଁ ଲୋକ ଟ୍ୟାକ୍ସ ଦେଉ ନାହାନ୍ତି ବା ଲୁଚୁଛନ୍ତି ସେମାନଙ୍କୁ ବାହାର କରିବାକୁ କାର୍ଯ୍ୟ ଆରମ୍ଭ ହୋଇଛି । ଏଥିପାଇଁ ସବୁ ଓ୍ବାର୍ଡର କର୍ପୋରେଟ ଓ ଟାଟା ପାଓ୍ବାର ବିଦ୍ୟୁତ୍ ବିଲରୁ ମଧ୍ୟ ତଥ୍ୟ ଅଣାଯିବ । ଟ୍ୟାକ୍ସ ଆଦାୟ ଅତି ଗୁରୁତ୍ୱପୂର୍ଣ୍ଣ ବିଷୟ ହୋଇଥିବାରୁ ଲୋକଙ୍କୁ ସଚେତନ କରିବ ବିଏମସି । ଖୁବଶୀଘ୍ର ସହରରେ ବୁଲିବ ରାଜସ୍ବ ରଥ । ଏନେଇ ସହଯୋଗ କରିବାକୁ ଜନସାଧାରଣଙ୍କୁ ଅପିଲ କରିଛନ୍ତି କମିଶନର।
ରାଜସ୍ବ ଆଦାୟ ଓ ଏସମ୍ପର୍କୀତ ସର୍ବେକ୍ଷଣକୁ ନେଇ ବିଏମସି ପକ୍ଷରୁ ଏକ ବୈଠକ ଅନୁଷ୍ଠିତ ହୋଇଥିଲା । ଚଳିତବର୍ଷ ରାଜସ୍ବ ଆଦାୟ ଲକ୍ଷ ୧୧୫ କୋଟି ହୋଇଥିବାବାବେଳେ ଡିମାଣ୍ଡ ପ୍ରାୟ ୮୪ କୋଟି ରହିଛି । ଧାର୍ଯ୍ୟ ଲକ୍ଷର ୨୬ ପ୍ରତିଶତ ଆଦାୟ ହୋଇଥିବାବେଳେ ଡିମାଣ୍ଡର ୩୫ ପ୍ରତିଶତ ହୋଇଛି । ଲୋକଙ୍କୁ ସଚେତନ କଲେ ଅଧିକ ଟ୍ୟାକ୍ସ ଆଦାୟ ହୋଇପାରିବ ବୋଲି କହିଛନ୍ତି ରାଜଧାନୀବାସୀ ।
କାଲିଠୁ ଆରମ୍ଭ ହେବ ଯୁକ୍ତ ଦୁଇ କଲେଜରେ NEET ଓ JEE କୋଚିଂ
ଭୁବନେଶ୍ବର: ଗୁରୁବାରଠାରୁ ଆରମ୍ଭ ହେବ ଯୁକ୍ତ ଦୁଇ କଲେଜରେ NEET ଓ JEE କୋଚିଂ। ଭର୍ଚୁଆଲରେ ଯୁକ୍ତ ଦୁଇ ଛାତ୍ରଛାତ୍ରୀ ପାଇବେ କୋଚିଂ । ସବୁ ସରକାରୀ ଓ ଅନୁଦାନପ୍ରାପ୍ତ ବେସରକାରୀ କଲେଜରେ ଆରମ୍ଭ ହେବ କୋଚିଂ । ଏଥିଲାଗି କଲେଜରେ ସ୍ମାର୍ଟ TV ଓ interactive panel install କରିବାକୁ ନିର୍ଦ୍ଦେଶ ଦିଆଯାଇଛି । ସର୍ବ ଭାରତୀୟ ମେଡିକାଲ ପ୍ରବେଶିକା ପରୀକ୍ଷା, neet ଓ ଇଞ୍ଜିନିୟରିଂ ପ୍ରବେଶିକା ପରୀକ୍ଷା jee ରେ ଓଡ଼ିଆ ଛାତ୍ରଛାତ୍ରୀଙ୍କ ସଫଳତା ହାର ବଢ଼ାଇବାକୁ ଉଚ୍ଚ ମାଧ୍ୟମିକ ଶିକ୍ଷା ନିର୍ଦ୍ଦେଶାଳୟ ପକ୍ଷରୁ ଯୋଜନା ଆରମ୍ଭ ହୋଇଛି । ପ୍ରତିଦିନ କୋଚିଂ କ୍ଲାସର ଉପସ୍ଥାନ ସମ୍ପର୍କରେ ନୋଡାଲ ଅଫିସର ନିର୍ଦ୍ଦେଶାଳୟକୁ ଅବଗତ କରାଇବେ । ଅନଲାଇନ୍ କ୍ଲାସ ସମୟରେ କଲେଜ୍ କର୍ତ୍ତୃପକ୍ଷ ପିଲାଙ୍କୁ ସହାୟତା କରିବାକୁ ମେଣ୍ଟର ଟିଚରଙ୍କୁ ନିଯୁକ୍ତ କରିବେ ।
ଅର୍ଥତତ୍ତ୍ବ ଚିଟଫଣ୍ଡ କମ୍ପାନୀର ସମ୍ପତ୍ତି ହେବ ବାଜ୍ୟାପ୍ତ
କଟକ: ଅର୍ଥତତ୍ତ୍ବ ଚିଟଫଣ୍ଡ କମ୍ପାନୀର ସମ୍ପତ୍ତି ହେବ ବାଜ୍ୟାପ୍ତ । ନିର୍ଦ୍ଦେଶ ଦେଲେ କଟକ ସ୍ବତନ୍ତ୍ର ଓପିଆଇଡି କୋର୍ଟ । ଉଭୟ ସ୍ଥାବର ଓ ଅସ୍ଥାବର ସମ୍ପତ୍ତି ବାଜ୍ୟାପ୍ତ ପାଇଁ ନିର୍ଦ୍ଦେଶ ଦେଇଛନ୍ତି କୋର୍ଟ । ୧୧୦ ଏକର ଭୂସମ୍ପତ୍ତି ନିଲାମ କରି ଜମାକାରୀଙ୍କ ମଧ୍ୟରେ ବାଣ୍ଟି ଦେବାକୁ ନିର୍ଦ୍ଦେଶ ଦିଆଯାଇଛି । ଭୁବନେଶ୍ବର, ବେଗୁନିଆ, ଟାଙ୍ଗୀ, ଭଦ୍ରକ, ବାଲେଶ୍ବର, ଗଞ୍ଜାମ, ପୁରୀ, ଅନୁଗୁଳରେ ରହିଛି ଏହି ଭୂସମ୍ପତ୍ତି ।ବ୍ୟାଙ୍କ ଜମା ୨ କୋଟି ୧୭ ଲକ୍ଷ ଓ ୧୧ ଟି ଦାମୀ ଗାଡି ମଧ୍ୟ ନିଲାମ ପାଇଁ ନିର୍ଦ୍ଦେଶ ଦେଇଛନ୍ତି କୋର୍ଟ । ଅର୍ଥତତ୍ତ୍ବ ନାଁରେ ପ୍ରାୟ ୬୦୦ କୋଟି ଟଙ୍କାର ଠକେଇ ଅଭିଯୋଗ ହୋଇଥିଲା । ୨୦୦୯ ରୁ ୨୦୧୨ ମଧ୍ୟରେ କରିଥିଲେ ଏହି ଠକେଇ । ଏହି ମାମଲାରେ ଅର୍ଥତତ୍ତ୍ବ ପରିଚାଳନା ନିର୍ଦ୍ଦେଶକ ପ୍ରଦୀପ ସେଠୀ ଗିରଫ ହୋଇ ଜେଲରେ ରହିଥିଲେ ।
ଦିବ୍ୟାଙ୍ଗ ଶିକ୍ଷାର୍ଥୀଙ୍କ ମୁହଁରେ ହସ, ପରିଦର୍ଶନ କରିବେ ରାଜ୍ୟର ବିଭିନ୍ନ ସ୍ଥାନ
ସୁନ୍ଦରଗଡ଼: ଦିବ୍ୟାଙ୍ଗ ଶିକ୍ଷାର୍ଥୀଙ୍କ ମୁହଁରେ ହସ । ସୁନ୍ଦରଗଡ ଦୃଷ୍ଟିହୀନ ବଧିର ବିଦ୍ୟାଳୟର ୫୦ରୁ ଉର୍ଦ୍ଧ୍ବ ଛାତ୍ର ଛାତ୍ରୀ ୫ ଦିନ ଧରି ରାଜ୍ୟର ବିଭିନ୍ନ ସ୍ଥାନ ବୁଲି ପରିଦର୍ଶନ କରିବେ । ଜୟ ଜଗନ୍ନାଥ ଟ୍ରକର୍ସ ଆସୋସିଏସନ ପକ୍ଷରୁ ସେମାନଙ୍କ ବୁଲାବୁଲିର ସମସ୍ତ ଖର୍ଚ୍ଚ ବହନ ହୋଇଛି । ପିଲାଙ୍କ ମୁହଁରେ ହସ ।
କିଏ ଶୁଣି ପାରେ ନାହିଁ , ଆଉ କିଏ କହିପାରେ ନାହିଁ । ହେଲେ ସାଧାରଣ ମଣିଷଟେ ପରି ତାଙ୍କର ବି ଇଚ୍ଛା କେବଳ ପାଠପଢା ନୁହେଁ ପିକନିକ ଋତୁର ମଜାନେବେ । ବୁଲାବୁଲି କରି ନୂଆନୂଆ ସ୍ଥାନ ଦେଖିବେ । ତାଙ୍କର ଏହି ଇଚ୍ଛା ପୂରଣ ହେଉଛି । ସୁନ୍ଦରଗଡ ଦୃଷ୍ଟିହୀନ ବଧିର ବିଦ୍ୟାଳୟର ୫୦ରୁ ଉର୍ଦ୍ଧ୍ବ ଛାତ୍ର ଛାତ୍ରୀ ୫ ଦିନ ଧରି ରାଜ୍ୟର ବଭିନ୍ନ ସ୍ଥାନ ବୁଲି ପରିଦର୍ଶନ କରିବେ । ଦେବଗଡ, ଘଟଗାଁ , ଭୁବନେଶ୍ୱର , ପୁରୀ , କୋଣାର୍କ ଏବଂ ଚିଲିକା ଆଦି ସ୍ଥାନ ପରିଦର୍ଶନ କରି ଆସନ୍ତା ୭ ତାରିଖ ସୁନ୍ଦରଗଡ ଫେରିବେ । ଯେଉଁଥିପାଇଁ ବେଶ୍ ଖୁସି ଅଛନ୍ତି ଶିକ୍ଷାର୍ଥୀ ।
ରାଜବାଟୀ ସ୍ଥିତ ସମଲେଇ ମନ୍ଦିର ଠାରେ ପୂଜାର୍ଚ୍ଚନା ପରେ ଏକ ସ୍ୱତନ୍ତ୍ର ବସରେ ସମସ୍ତ ଛାତ୍ରଛାତ୍ରୀ ଶିକ୍ଷକଙ୍କ ସହିତ ଯାତ୍ରା ଆରମ୍ଭ କରିଥିଲେ । ଏହାକୁ ଜୟ ଜଗନ୍ନାଥ ଟ୍ରକର୍ସ ଆସୋସିଏସନର ସଭାପତି ସଞ୍ଜୟ ନନ୍ଦ ସବୁଜ ପତାକା ଦେଖାଇ ଶୁଭେଚ୍ଛା ଜଣାଇଥିଲେ। ଏହି ଯାତ୍ରାର ସମସ୍ତ ଖର୍ଚ୍ଚ ଆସୋସିଏସନ ବହନ କରିବ ବୋଲି କହିବା ସହିତ ଏପରି ଅସହାୟଙ୍କ ପ୍ରତି ସବୁବେଳେ ଅନୁଷ୍ଠାନ ସାହାଯ୍ୟର ହାତ ବଢାଇବ ବୋଲି କହିଛନ୍ତି ସଭାପତି ସଞ୍ଜୟ ନନ୍ଦ।