ନନ୍ଦିଘୋଷ ବ୍ୟୁରୋ: ଗଭୀର ସମୁଦ୍ରରେ ଭାଙ୍ଗିଲା ଜାହାଜର ପ୍ରୋପେଲର ସାଫ୍ଟ । ଜାହାଜ ଭିତରେ ପାଣି ପଶି ବିପଦରେ ଫସିଲେ ଜାହାଜ ସମେତ ୨୭ ଜଣ କ୍ରୁ ସଦସ୍ୟ । ପାରାଦୀପ ବନ୍ଦର ଠାରୁ ୫୦ ନଟିକାଲ ବା ୯୦ କିଲୋମିଟର ଦୂରରେ ଫସିଥିଲା ଜାହାଜ ଏମ୍ ଭି ବିଶ୍ବ ଉଦୟ । ଭାରତୀୟ ସିପିଂ କର୍ପୋରେସନ ପକ୍ଷରୁ ସୂଚନା ପାଇବା ପରେ ସଫଳତାର ସହିତ ଉଦ୍ଧାର କରିଛନ୍ତି ପାରାଦୀପ ବନ୍ଦର କର୍ତ୍ତୃପକ୍ଷ । ଜାହାଜଟି ହଳଦିଆ ବନ୍ଦରରୁ ଆଫ୍ରିକାର ମୋଡାମ୍ବିକ ବନ୍ଦରକୁ କୋଇଲା ପାଇଁ ଯାଉଥିଲା । ହେଲେ ଗଭୀର ସମୁଦ୍ରରେ ହଠାତ୍ ଜାହାଜର ପ୍ରୋପେଲର ସାଫ୍ଟ ଭାଙ୍ଗି ଯିବାରୁ ଜାହାଜରେ ପାଣି ପଶିବା ଆରମ୍ଭ ହୋଇଥିଲା ।
ପାରାଦୀପ ବନ୍ଦର ର ଦୁଇଟି ଟଗ୍ ବୋଟ୍ ଡଲଫିନ ୨୫ ଓ ଡଲଫିନ ୨୦ ଦୁର୍ଘଟଣା ଗ୍ରସ୍ତ ଜାହାଜକୁ ସହାୟତା ପାଇଁ ପହଞ୍ଚିବା ସହିତ ଜାହାଜର କର୍ମଚାରୀଙ୍କ ସହଯୋଗରେ ପ୍ରୋପେଲର ସାଫ୍ଟ କୁ ସଜାଡ଼ି ପାଣିକୁ ବନ୍ଦ କରାଇଥିଲେ । ଫଳରେ ଜାହାଜକୁ ପାରାଦୀପ ବନ୍ଦରର ଆଙ୍କରେଜକୁ ସୁରକ୍ଷିତ ଭାବେ ଟାଣି ଆଣାଯାଇଛି । ବିଭାଗୀୟ ଅନୁମତି ମିଳିବା ପରେ ଜାହାଜକୁ ପାରାଦୀପ ବନ୍ଦରର ବର୍ଥକୁ ଅଣାଯାଇ ଏହାର ମରାମତି କରାଯିବ ବୋଲି ସୂଚନା ଦିଆଯାଇଛି ।

