ଜଗତସିଂହପୁର: ଶାରଳା ମନ୍ଦିର ମୁଖ୍ୟହୁଣ୍ଡିରୁ ଚୋରି ମାମଲାରେ ମୁଖ୍ୟ ଅଭିଯୁକ୍ତ ଗିରଫ । ଲକ୍ଷାଧିକ ଟଙ୍କା, ମୋବାଇଲ ଫୋନ୍ ଓ କଟର ମେସିନ ଜବତ । ଜଗତସିଂହପୁର ଜିଲ୍ଲାର ଅଧିଷ୍ଠାତ୍ରୀ ଦେବୀ ଝଙ୍କଡ଼ର ମାଆ ଶାରଳାଙ୍କ ମୁଖ୍ୟହୁଣ୍ଡିର ତାଲା କାଟି ଗତ ୧୪ ତାରିଖରେ ଲକ୍ଷାଧିକ ଟଙ୍କା ଲୁଟ୍ ହୋଇଥିଲା । ତିର୍ତ୍ତୋଲ ଥାନାରେ ଅଭିଯୋଗ ପରେ ପୋଲିସ ତଦନ୍ତ କରି କରଞ୍ଜିଆରୁ କେନ୍ଦୁଝର ଜିଲ୍ଲା କେରି ମଇନ ଦାକେଲ ଗାଁର ଋଷି ମହନ୍ତକୁ ଗିରଫ କରିଛି। ତା’ ଠାରୁ ୧ ଲକ୍ଷ ୮୫ ହଜାରରୁ ଅଧିକ ଟଙ୍କା, ଦୁଇଟି ମୋବାଇଲ ଫୋନ୍, କଟର ମେସନ ଓ ରେଞ୍ଚି ଜବତ କରାଯାଇଛି । ଗିରଫ ଅଭିଯୁକ୍ତ ଋଷି ମହନ୍ତ ଗତ ଜୁନ ମାସରେ ଶାରଳା ମନ୍ଦିରକୁ ଆସି ଲୁଟ କରିବାର ଯୋଜନା ପ୍ରସ୍ତୁତ କରି ଫେରି ଯାଇଥିଲା । ଗତ ୧୪ ତାରିଖରେ ଚୋରି କରିଥିଲା ବୋଲି ଆଜି ଜଗତସିଂହପୁର ଅତିରିକ୍ତ ଏସପି ଜୟନ୍ତ ମହାପାତ୍ର ସୂଚନା ଦେଇଛନ୍ତି । ଆଉ କିଏ ସମ୍ପୃକ୍ତ, ସେନେଇ ତଦନ୍ତ ଜାରି ରହିଛି ।
ସଂସଦ ସୁରକ୍ଷା ତ୍ରୁଟି ମାମଲାରେ ପୋଲିସର ଖୋଳତାଡ଼ ଜାରି
ନୂଆଦିଲ୍ଲୀ: ସଂସଦ ସୁରକ୍ଷା ତ୍ରୁଟି ମାମଲାରେ ପୋଲିସର ଖୋଳତାଡ଼ ଜାରି। ମାଷ୍ଟରମାଇଣ୍ଡ ଲଳିତ ଝା ସହାୟତାରେ ପୋଡ଼ା ଯାଇଥିବା ୪ ଅଭିଯୁକ୍ତଙ୍କ ମୋବାଇଲ ଫୋନ ଉଦ୍ଧାର କଲା ଦିଲ୍ଲୀ ପୋଲିସ । ଅଧିକ ପ୍ରମାଣ ସଂଗ୍ରହ ଲାଗି ୬ ରାଜ୍ୟରେ ତନାଘନା ଚଳାଇଛି ଦିଲ୍ଲୀ ପୋଲିସର ସ୍ପେଶାଲ ସେଲ। ରାଜସ୍ଥାନ, ହରିୟାଣା, କର୍ଣ୍ଣାଟକ, ଉତ୍ତରପ୍ରଦେଶ, ମହାରାଷ୍ଟ୍ର ଓ ପଶ୍ଚିମବଂଗରେ ଚାଲିଛି ଖୋଳତାଡ଼ । ଅଭିଯୁକ୍ତଙ୍କ ବ୍ୟାଙ୍କ୍ କାରବାର ଲିଙ୍କ୍ ଯାଞ୍ଚ କରିବାକୁ ଅଲଗା ଅଲଗା ୫୦ଟି ଟିମ କରି ଚାଲିଛି ତଦନ୍ତ। ଅଭିଯୁକ୍ତଙ୍କ ସାଥିରେ ନେଇ ଖୋଳତାଡ଼ କରୁଛି ଦିଲ୍ଲୀ ପୋଲିସର ସ୍ପେଶାଲ ସେଲ୍। ଦିଲ୍ଲୀ ପୋଲିସ ସ୍ପେଶାଲ ସେଲ ସାକେତ ଦକ୍ଷିଣ ରେଂଜ ଟିମ୍ ଅଭିଯୁକ୍ତ ସାଗର ଶର୍ମାକୁ ଜେରା କରୁଛି । ସେହିପରି ଜନକପୁରୀରେ ଥିବା ଦିଲ୍ଲୀ ପୋଲିସର ସ୍ପେଶାଲ ସେଲ ମାଷ୍ଟରମାଇଣ୍ଡ ଲଳିତ ଝାକୁ ନେଇ ତଦନ୍ତ ଜାରି ରଖିଛି।
ଲଳିତ ପୋଡ଼ିଥିବା ୪ ସାଥିଙ୍କ ମୋବାଇଲ ଫୋନ ଜବତ କରିଛି ଦିଲ୍ଲୀ ପୋଲିସ । ରାଜସ୍ଥାନର ନାଗୁରରୁ ପୋଡି ଯାଇଥିବା ଅବସ୍ଥାରେ ମୋବାଇଲ ଫୋନ ଜବତ ହୋଇଛି । ସେହିପରି ଅଭିଯୁକ୍ତ ମନୋରଂଜନ ଡି. କୁ ଦିଲ୍ଲୀ ପୋଲିସର ନ୍ୟୁଡେଲି ରେଂଜ୍କୁ ହସ୍ତାନ୍ତର କରାଯାଇଛି । ଅଭିଯୁକ୍ତ ନୀଲମକୁ ନ୍ୟୁ ଫ୍ରେଣ୍ଡସ କଲୋନୀ ସ୍ଥିତ ଦିଲ୍ଲୀ ପୋଲିସର ସ୍ପେଶାଲ ସେଲ ଜେରା କରୁଛି । ମାମଲାରେ ସାମିଲ ସମସ୍ତ ଅଭିଯୁକ୍ତଙ୍କୁ ଦିଲ୍ଲୀ ପୋଲିସ ସ୍ପେଶାଲ ସେଲର ଅଲଗା ଅଲଗା ତଦନ୍ତକାରୀ ଟିମକୁ ଜେରା ପାଇଁ ହସ୍ତାନ୍ତର କରାଯାଇଛି । ଏହି ସମସ୍ତ ଟିମ ଜେରା କରିବା ପରେ ସମସ୍ତ ଅଭିଯୁକ୍ତଙ୍କୁ ଏନଏଫସି ସ୍ପେଶାଲ ସେଲ୍ ଟିମ୍ ପୁଣିଥରେ ଜେରା କରିବ ବୋଲି ଜଣାପଡିଛି ।
ମେଡିକାଲରେ ଭର୍ତ୍ତିହେଲେ ଭେଟେରାନ ଅଭିନେତ୍ରୀ ତନୁଜା
ମୁମ୍ବାଇ: ବଲିଉଡର ଜଣାଶୁଣା ଅଭିନେତ୍ରୀ ତଥା ଅଭିନେତ୍ରୀ କାଜୋଲଙ୍କ ମାଆ ତନୁଜା ମେଡିକାଲରେ ଭର୍ତ୍ତି । ବୟସାଧିକ କାରଣରୁ ସେ ଅସୁସ୍ଥ ହୋଇ ପଡ଼ିଛନ୍ତି । ହଠାତ ଅସୁସ୍ଥ ହୋଇ ପଡ଼ିଥିବାବେଳେ ତାଙ୍କୁ ମୁମ୍ବାଇର ଏକ ଘରୋଇ ହସ୍ପିଟାଲର ଚିକତ୍ସିତ ହେଉଛନ୍ତି । ସେ ଏବେ ଆଇସିୟୁରେ ରହିଥିବା ସୂଚନା ମିଳିଛି । ୮୦ ବର୍ଷୀୟା ତନୁଜାଙ୍କ ଉପରେ ଏବେ ଡାକ୍ତରମାନେ ନଜର ରଖିଛନ୍ତି । ଶୀଘ୍ର କିପରି ସେ ସୁସ୍ଥ ହେବେ ସେ ନେଇ ବହୁ ପ୍ରଂଶସକମାନେ ପ୍ରାର୍ଥନା କରିଥିବା ଦେଖିବାକୁ ମିଳିଛି ।
ସୂଚନା ଥାଉକି, ୧୯୪୩ ସେପ୍ଟେମ୍ବର ୨୩ ତାରିଖରେ ଜନ୍ମ ଗ୍ରହଣ କରିଥିବା ତନୁଜା ମାତ୍ର ୧୬ ବର୍ଷ ବୟସରେ ଫିଲ୍ମ ଜଗତରେ ପାଦ ଥାପିଥିଲେ । ତାଙ୍କ ନିଖୁଣ ଅଭିନୟକୁ ଆଜି ମଧ୍ୟ ବେଶ ପ୍ରଂଶସା କରାଯାଉଛି । ହାତୀ ମେରା ସାଥୀ, ଦୋ ଚୋର ଭଳି ବହୁ ସୁପରହିଟ୍ ଫିଲ୍ମରେ ନିଜର ଜ୍ବଳନ୍ତ ଅଭିନୟର ଛାପ ଛାଡ଼ିଛନ୍ତି।
ଜିଆରଏସଙ୍କ ସନ୍ଦେହଜନକ ମୃତ୍ୟୁ
ଖୋର୍ଦ୍ଧା: ଗ୍ରାମ ରୋଜଗାର ସେବକ- ଜିଆରଏସଙ୍କ ସନ୍ଦେହଜନକ ମୃତ୍ୟୁ। ପ୍ରେମ ସମ୍ପର୍କକୁ କେନ୍ଦ୍ର କରି ଯୁବକଙ୍କୁ ହତ୍ୟା କରାଯାଇଥିବା ଅଭିଯୋଗ ଆଣିଲେ ପରିବାର ଲୋକ । ଖୋର୍ଦ୍ଧା ଆଦର୍ଶ ଥାନା ଅନ୍ତର୍ଗତ ନବୀନ ବାଗ ଅଞ୍ଚଳରୁ ଜଣେ ଯୁବକଙ୍କ ମୃତଦେହ ଝୁଲନ୍ତା ଅବସ୍ଥାରେ ପୋଲିସ ଉଦ୍ଧାର କରିଛି । ମୃତ ଯୁବକ ହେଲେ ଅଁଳାଯୋଡ଼ି ଗାଁର ସୌମ୍ୟ ରଞ୍ଜନ ମାହାନା। ବୟସ ୨୬ ବର୍ଷ । ସେ କଣାସ ବ୍ଲକରେ ଗ୍ରାମ ରୋଜଗାର ସେବକ ଭାବେ କାମ କରୁଥିଲେ । ସୌମ୍ୟ ନିୟମିତ ଭାବେ ଖୋର୍ଦ୍ଧା ନବୀନାବାଗ ଅଞ୍ଚଳର ଏକ ଆୟୁର୍ବେଦିକ କ୍ଲିନିକକୁ ଯିବା ଆସିବା କରୁଥିଲେ । ସେଇଘରୁ ତାଙ୍କ ମୃତଦେହ ଝୁଲନ୍ତା ଅବସ୍ଥାରେ ଉଦ୍ଧାର କରାଯାଇଛି ।
ସେ ଆତ୍ମହତ୍ୟା କରିଥିବା ସାଙ୍ଗମାନେ ଘରକୁ ଖବର ଦେଇଥିଲେ । ତେବେ ପରିବାର ଲୋକ ପହଞ୍ଚିବା ପରେ ଏହା ଏକ ହତ୍ୟାକାଣ୍ଡ ବୋଲି ସନ୍ଦେହକରି ସୌମ୍ୟଙ୍କ ବାପା ସୁରେଶ ଚନ୍ଦ୍ର ମାହାନା ଥାନାରେ ଏତଲା ଦେଇଛନ୍ତି । ଏତଲାରେ ଜଣେ ଝିଅର ନାଁ ସହ ଆଉ ଦୁଇଜଣଙ୍କ ନାଁ ଉଲ୍ଲେଖ ରହିଛି । ଜଣେ ଝିଅ ସହ ସୌମ୍ୟଙ୍କ ଅନ୍ତରଙ୍ଗ ମୁହୂର୍ତ୍ତର ଭିଡିଓ ଏବେ ମୋବାଇଲରୁ ମୋବାଇଲକୁ ଘୂରି ବୁଲୁଥିବା ଚର୍ଚ୍ଚା ହେଉଛି । ପ୍ରେମ ପରେ ଝିଅ ପ୍ରତାରଣା କରିବାରୁ ସୌମ୍ୟ ବିରୋଧ କରିଥିଲେ । ଝିଅ କିଛି ଯୁବକଙ୍କ ଦ୍ବାରା ସୌମ୍ୟଙ୍କୁ ହତ୍ୟା କରିଥିବା ସୌମ୍ୟଙ୍କ ଭଉଣୀ ଅଭିଯୋଗ କରିଛନ୍ତି। ପୋଲିସ୍ ସୌମ୍ୟଙ୍କ ମୃତଦେହ, ସ୍କୁଟି, ମୋବାଇଲ ଫୋନ, ଘରର ଚାବି, ମଦ ବୋତଲ ସହ ଅନ୍ୟ ସାମଗ୍ରୀ ଜବତ କରି ତଦନ୍ତ କରୁଛି । ତଦନ୍ତ ପରେ ସବୁ ସ୍ପଷ୍ଟ ବୋଲି ଖୋର୍ଦ୍ଧା ଏସଡିପିଓ ଦିଲ୍ଲୀପ କୁମାର ଦାସ ସୂଚନା ଦେଇଛନ୍ତି।
ପୁଣି ଡରାଇଲାଣି କରୋନା, ଫେରିବ କି ମାସ୍କ
ନୂଆଦିଲ୍ଲୀ: କରୋନା ଭାଇରସ କଥା ମନେ ପଡ଼ିଗଲେ ଆଜି ମଧ୍ୟ ଦେହ ସିତେଇପଡ଼େ । ସହଜ ବୋଲି ଭାବିଥିବା ଭାଇରସ ଅନେକଙ୍କ ଜୀବନ ନେଇଛି । ତେବେ ପୁଣିଥରେ କରୋନା ଭାଇରସ ଚିନ୍ତା ବଢ଼ାଇଲାଣି । ରବିବାର ଦେଶରେ ୩୩୫ ଜଣ ନୂଆ ଆକ୍ରାନ୍ତ ଚିହ୍ନଟ ହୋଇଥିବାବେଳେ ୫ଜଣଙ୍କ ମୃତ୍ୟୁ ହୋଇଛି । କେବଳ କେରଳର ୪ଜଣ କରୋନା ଆକ୍ରାନ୍ତଙ୍କ ମୃତ୍ୟୁ ହୋଇଥିବାବେଳେ ଉତ୍ତରପ୍ରଦେଶର ଜଣେ ଆକ୍ରାନ୍ତଙ୍କ ମୃତ୍ୟୁ ଘଟିଛି । ଏବେ ଦେଶରେ ସକ୍ରିୟ ଆକ୍ରାନ୍ତଙ୍କ ସଂଖ୍ୟା ୧୭୦୧ ରହିଛି । ତଥ୍ୟ ଅନୁଯାୟୀ ଏହି ରୋଗରୁ ୪,୪୪,୬୯,୭୭୯ ଜଣ ସୁସ୍ଥ ହୋଇଛନ୍ତି । ଦେଶରେ ୯୮.୮ ପ୍ରତିଶତ ଆକ୍ରାନ୍ତ ସୁସ୍ଥ ହୋଇଛନ୍ତି । ୧.୧୯ ପ୍ରତିଶତ ଲୋକଙ୍କ ମୃତ୍ୟୁ ହୋଇଥିବାବେଳେ କରୋନା ଭାଇରସ ଦେଶରେ ଚିନ୍ତାର ବିଷୟ ପାଲଟିଥିଲା ।
କରୋନା ଭାଇରସ ଧିରେ ଧିରେ ଆକ୍ରାନ୍ତଙ୍କ ସଂଖ୍ୟା କମିଥିବାବେଳେ ଲୋକେ ମାସ୍କକୁ ଭଉଳି ଗଲେଣି । ସମସ୍ତଙ୍କ ମୁହଁରେ ମାସ୍କ ରହୁଥିବାବେଳେ ଏବେ କିନ୍ତୁ କାଭାଁ ଲୋକ ବ୍ୟବହାର କରୁଛନ୍ତି । ତେବେ ପୁଣି ଆକ୍ରାନ୍ତଙ୍କ ସଂଖ୍ୟା ବଢ଼ିବା ସହ ମୃତ୍ୟୁ ହୋଇଥିବାବେଳେ କୁହାଯାଉଛି କି, ପୁଣିଥରେ ମାସ୍କ ଫେରିବ । କେରଳରେ ପୁଣିଥରେ କରୋନା ଭାଇରସ ଆକ୍ରାନ୍ତଙ୍କ ସଂଖ୍ୟା ବଢ଼ିଥିବାବେଳେ ମୃତ୍ୟୁ ଚିନ୍ତାର କାରଣ ପାଲଟିଛି । ସ୍ବାସ୍ଥ୍ୟ ମନ୍ତ୍ରାଳୟ ପକ୍ଷରୁ ଲୋକଙ୍କ ସଚେତନ କରାଯାଉଥିବାବେଳେ ସ୍ବାସ୍ଥ୍ୟ କର୍ମୀ ମଧ୍ୟ ସଜାଗ ରହିଛନ୍ତି ।
ଜାଣନ୍ତୁ ଦାଉଦ ଇବ୍ରାହିମ ସମ୍ପର୍କରେ ଅଜଣା କଥା
ଇସଲାମବାଦ: ବହୁ ଚର୍ଚ୍ଚିତ ଆତଙ୍କବାଦୀ ତଥା ଅଣ୍ଡରଓ୍ବାଲ୍ଡ ଡନଭାବେ ଜଣାଶୁଣା ଦାଉଦ ଇବ୍ରାହିମ ଏବେ ମେଡିକାଲରେ ଚିକିତ୍ସିତ ହେଉଛି । ଭାରତରେ ମୋଷ୍ଟଓ୍ବାଣ୍ଟେଡ ଭାବେ ଜଣାଶୁଣା ଥିବା ଦାଉଦକୁ ବିଷ ଦେଇଥିବା ଖବର ପ୍ରସାରଣ ହେବା ପରେ ସବୁଠି ଆରମ୍ଭ ହୋଇଛି ଚର୍ଚ୍ଚା । ୩୦ ବର୍ଷ ଧରି ପାକିସ୍ତାନରେ ଲୁଚି ରହିଥିବା ଦାଉଦ ନିଜର ଅଣ୍ଡର ଓ୍ବାଲ୍ଡରେ ନିଜର କଳା ସାମ୍ରାଜ୍ୟକୁ ବିସ୍ତାର କରି ଚାଲିଥିଲା । ୧୯୯୩ରେ ମୁମ୍ବାଇ ଆକ୍ରମଣର ମାଷ୍ଟର ମାଇଣ୍ଡ ଥିବା ଦାଉଦ ଭାରତ ପାଇଁ ମୋଷ୍ଟ ଓ୍ବାଣ୍ଟେଡ । ସେହିପରି ଆମେରିକାରେ ମଧ୍ୟ ଦାଉଦକୁ ଆତଙ୍କବାଦୀ ଭାବେ ଘୋଷଣା କରାଯାଇଛି । ଦୀର୍ଘବର୍ଷ ଧରି ପାକିସ୍ତାନରେ ଲୁଚି ରହିଥିବାବେଳେ ବିଭନ୍ନ ସମୟରେ ଭିନ୍ନ ଭିନ୍ନ ଗୁଜବ ସବୁ ସାମନାକୁ ଆସିଛି ।
କରାଚିର କ୍ଲିଫଟନ ରୋଡରେ ଦାଉଦର ବିଳାସପୂର୍ଣ୍ଣ ବଙ୍ଗଳା ରହିଛି । ପାକିସ୍ତାନୀ ରେଞ୍ଜର୍ସମାନେ କଡ଼ା ସୁରକ୍ଷା ସହ ଦାଉଦର ଘରକୁ ଜଗିଥାନ୍ତି । ସେ ISIର ସୁରକ୍ଷାରେ ରହିଥିବାବେଳେ ଭାରତ ସରକାରଙ୍କ ପକ୍ଷରୁ ତାର ପ୍ରମାଣପତ୍ର ଦିଆଯାଇଛି । ମାତ୍ର ପାକିସ୍ତାନ ସରକାର ବାରମ୍ବାର ଏହାକୁ ମିଥ୍ୟା ବୋଲି ଦର୍ଶାଇ ଆସୁଥିଲା । ଦାଉଦର ୧୪ଟି ପାସପୋର୍ଟ ରହିଛି । ପୂର୍ବରୁ ମିଛ କହୁଥିବା ପାକିସ୍ତାନ ଏବେ ସତକୁ ଆଉ ଲୁଚାଇ ପାରୁନାହିଁ । କରାଚିରେ ରହୁଥିବା ଦାଉଦ ନିଜ ପତ୍ନୀ ଏବଂ ୪ ପିଲାଙ୍କ ସହ ବାରମ୍ବାର ଦୁବାଇ ଯାତ୍ରା କରିଥାଏ । ପତ୍ନୀଙ୍କ ନାମରେ ମଧ୍ୟ ମିଥ୍ୟା ପାସପୋର୍ଟ ବନାଯାଇଛି । ଏଜେନ୍ସି ସୂତ୍ରରୁ ଏଭଳି ସୂଚନା ମିଳିଥିବାବେଳେ ଟେଲିଫୋନ ବିଲ ହସ୍ତଗତ ହୋଇଛି । ଦାଉଦର ପ୍ରଥମ ପତ୍ନୀ ରହିଥିଲେ ସୁଦ୍ଧା ସେ ଜଣେ ମୁସଲମାନ ଯୁବତୀଙ୍କୁ ବିବାହ କରିଥିବା କୁହାଯାଉଛି । ପ୍ରଥମ ପତ୍ନୀ ମୁମ୍ବାଇର ବାସିନ୍ଦା ହୋଇଥିବାବେଳେ ତାଙ୍କୁ ଛାଡ଼ପତ୍ର ଦେଇନାହାନ୍ତି ।
ଦାଉଦ ୧୯୫୫ ମସିହାରେ ମହାରାଷ୍ଟ୍ରର ରତ୍ନାଗିରି ଜିଲ୍ଲାରେ ଜନ୍ମ ଗ୍ରହଣ କରିଥିଲେ । ତାଙ୍କ ବାପା ଜଣେ ପୋଲିସ କନେଷ୍ଟବଳ ଥିଲେ । ୭୦ ଦଶକରେ ଦାଉଦର ନାମ ବେଶ ଚର୍ଚ୍ଚାରେ ରହିଥିଲା । ସେ ପ୍ରଥମେ ମସ୍ତାନ ଗ୍ୟାଙ୍ଗ ସହ କାମ କରୁଥିଲା । ଧରେ ଧିରେ ନିଜର ଆଧିପତ୍ୟ ବିସ୍ତାର କରିବା ସହ ଗ୍ୟାଙ୍ଗ ଗଢ଼ିଥିଲା । ୯୦ ଦଶକରେ ମୁମ୍ବାଇରେ ହୋଇଥିବା ବିସ୍ଫୋରଣ ସେ ମାଷ୍ଟରମାଇଣ୍ଡ ରହିଥିବାବେଳେ ଏହାପରେ ଭାରତ ଛାଡ଼ି ପଳାଇଥିଲା । ଦୁବାଇରେ ରହି ନିଜର କଳା ସାମ୍ରାଜ୍ୟ ବଢ଼ାଇଥିଲା । କିନ୍ତୁ ପରବର୍ତ୍ତୀ ସମୟରେ ପାକିସ୍ତାନରେ ନିଜର ପରିବାର ସହ ରହିଥିଲା । ଏବେ ମଧ୍ୟ ସେଠାରେ ନିଜର ପରିବାର ସହ ରହୁଛି । ୨୦୦୩ ମସିହାରେ ବିଶ୍ବ ଆତଙ୍କବାଦୀଭାବେ ଦାଉଦର ନାମକୁ ଘୋଷଣା କରାଯାଇଥିଲା । ଏହାସହ ୨୦୧୧ ମସିହାରେ FBI ଏବଂ ଫୋବସ ତାଲିକାରେ ବିଶ୍ବର ତୃତୀୟ ସର୍ବାଧିକ ପଳାତକ ଭାବେ ଘୋଷଣା କରାଯାଇଥିଲା ।
ଦାଉଦର ପରିବାର କହିଲେ ପତ୍ନୀଙ୍କ ସହ ୪ ସନ୍ତାନ । ଏହି ସନ୍ତାନଙ୍କ ମଧ୍ୟରେ ୩ଜଣ ଝିଅ ରହିଥିବାବେଳେ ମାତ୍ର ଗୋଟିଏ ପୁଅ ରହିଛି । ତେବେ ଦାଉଦର ସାନ ଝିଅ ମୃତ୍ୟୁ ବରଣ କରିଥିବାବେଳେ ବାକି ସମସ୍ତ ସନ୍ତାନ ବିବାହ କରିଛନ୍ତି । ବଡ଼ ଝିଅ ପାକିସ୍ତାନର ପୂର୍ବତନ କ୍ରିକେଟର ଜାଭେଦ ମିଆଁଦାରଙ୍କ ପୁଅକୁ ବିବାହ କରିଛନ୍ତି । ଦାଉଦର ୧୫ଟି ଡାକ ନାମ ରହିଛି ।
ଆଜି ଶ୍ରୀମନ୍ଦିରରେ ଅନୁଷ୍ଠିତ ହେବ ଓଢ଼ଣୀ ଷଷ୍ଠୀ
ପୁରୀ: ସୋମବାର ଶ୍ରୀମନ୍ଦିରରେ ଅନୁଷ୍ଠିତ ହେବ ଓଢ଼ଣୀ ଷଷ୍ଠୀ । ମହାପ୍ରଭୁଙ୍କ ମାନବୀୟ ଲୀଳା ମଧ୍ୟରେ ପ୍ରାବରଣ ଷଷ୍ଠୀ ଉତ୍ସବ ହେଉଛି ଅନ୍ୟତମ ଲୀଳା । ମାର୍ଗଶିର ଶୁକ୍ଳପକ୍ଷ ଷଷ୍ଠୀ ଓଢ଼ଣ ଷଷ୍ଠୀ ନାମରେ ପରିଚିତ । ଏହି ସମୟରୁ ଅଧିକ ଶୀତ ଅନୁଭୂତ ହେଉଥିବାରୁ ମହାପ୍ରଭୁଙ୍କର ଘୋଡଲାଗି ନିତୀ ଅନୁଷ୍ଠିତ ହୋଇଥାଏ | ଶ୍ରୀକ୍ଷେତ୍ରର ସମସ୍ତ ଦେବାଦେବୀଙ୍କୁ ଘୋଡ଼ଲାଗି ଅନୁଷ୍ଠିତ ହୋଇଥାଏ | ମହାପ୍ରଭୁ ଏହିଦିନ ନୂତନ ଘୋଡ଼ ପରିଧାନ କରିଥାନ୍ତି। ପ୍ରତିବର୍ଷ ଏହା ନୂତନ ଭାବେ ନିର୍ମିତ କରାଯାଇଥାଏ |ଘୋଡ଼ଲାଗି ଆଜିଠାରୁ ବସନ୍ତ ପଞ୍ଚମୀ ପର୍ଯ୍ୟନ୍ତ ଚାଲିବ । ଶୀତର ପ୍ରକୋପରୁ ବଞ୍ଚିବା ପାଇଁ ମହାପ୍ରଭୁଙ୍କ ଘୋଡ଼ ଲାଗି ନୀତି ଅନୁଷ୍ଠିତ ହୋଇଥାଏ । ଶ୍ରୀମନ୍ଦିରର ପାରମ୍ପରିକ ଦରଜି ସେବାୟତଙ୍କ ଦ୍ଵାରା ଶୀତ ବସ୍ତ୍ର ପ୍ରସ୍ତୁତ କରାଯାଇଛି । ପତନୀ , ଗୀତ ଗୋବିନ୍ଦ ପାଟ ଏବଂ ସୂତା ପାଟରେ ଠାକୁରଙ୍କ ନୂତନ ବସ୍ତ୍ର ତିଆରି କରାଯାଇଛି ।
ପାକିସ୍ତାନରେ ଇଣ୍ଟରନେଟ୍ ସେବା ଠପ୍, ରହିଛି କି ଦାଉଦର ଲିଙ୍କ?
ଇସଲାମବାଦ: ପାକିସ୍ତାନରେ ସୋସିଆଲ ମିଡିଆ ନିମ୍ନଗାମୀ ହୋଇଥିବାବେଳେ ଇଣ୍ଟରନେଟ୍ ସେବା ଠପ୍ ରହିଛି । କୁହାଯାଉଛି କି, ଏହା ପଛରେ ଦାଉଦ ଇବ୍ରାହିମର ହାତ ଥାଇପାରେ । ଏବେ କରାଚିର ଏକ ମେଡିକାଲରେ ଦାଉଦ ଚିକିତ୍ସିତ ହେଉଥିବା ଖବରକୁ ନେଇ ଗୁଜବ ପ୍ରଚାର ନହେଉ ଏହାକୁ ଦୃଷ୍ଟିରେ ରଖି ଏଭଳି କରାଯାଇଥିବା ସ୍ଥାନୀୟ ଲୋକେ ଦାବି କରିଛନ୍ତି । ସେପଟେ ସରକାରୀ ସୂତ୍ରରୁ କୁହାଯାଇଛି କି, ପାକିସ୍ତାନର ପୂର୍ବତନ ପ୍ରଧାନମନ୍ତ୍ରୀ ଇମ୍ରାନଙ୍କ ଖାନଙ୍କ ଭର୍ଚ୍ଚୁଆଲ ରାଲି ରହିଥିଲା । ଯାହାକୁ ଦୃଷ୍ଟିରେ ରଖି ଇଣ୍ଟରନେଟ୍ ସେବାକୁ ଜାଣିଶୁଣି ବନ୍ଦ ରଖାଯାଇଥିଲା । ରବିବାର ରାତିରେ ଏହି ରାଲି ରହିଥିବାବେଳେ ଜାଣିଶୁଣି ବନ୍ଦ ରଖାଯାଇଥିଲା । କିନ୍ତୁ ସ୍ଥାନୀୟ ଲୋକେ ଦାବି କରିଛନ୍ତି କି, ଦାଉଦ ଇବ୍ରାହିମର ଖବର ପ୍ରଚାର ନହେବାକୁ ଏଭଳି କରାଯାଇଛି । ରବିବାରଠାରୁ ବହୁ ଗୁଜବ ମଧ୍ୟ ପାକିସ୍ତାନରେ ଦେଖିବାକୁ ମିଳିଥିଲା ।
ସୂଚନା ଥାଉକି, ପାକିସ୍ତାନର କରାଚିରେ ଅଣ୍ଡରୱାର୍ଲଡ ଡନ୍ ଦାଉଦ୍ ଇବ୍ରାହିମ୍ ଗୁରୁତର । ଅସୁସ୍ଥ ହେବା ପରେ ଦାଉଦ ଇବ୍ରାହିମ ହସ୍ପିଟାଲରେ ଭର୍ତ୍ତି ହୋଇଥିବା ଜଣାପଡିଛି । କେହି ବିଷ ଦେଇ ହତ୍ୟା କରିବାକୁ ଉଦ୍ୟମ କରିଥିବା ଅନୁମାନ କରାଯାଉଛି । କିନ୍ତୁ ଏ ନେଇ କୌଣସି ସ୍ପଷ୍ଟ ସୂଚନା ମିଳିନାହିଁ । ଗତକାଲିଠୁ କରାଚିରେ ଏକ ହସ୍ପିଟାଲରେ ଭର୍ତ୍ତି ହୋଇଥିବା କୁହାଯାଉଛି । ଦାଉଦ୍ ଇବ୍ରାହିମକୁ ହସ୍ପିଟାଲ୍ ଭିତରେ କଡ଼ା ସୁରକ୍ଷା ବଳୟରେ ରଖାଯାଇଛି । କେବଳ ଉପରିସ୍ଥ ହସ୍ପିଟାଲ କର୍ତ୍ତୃପକ୍ଷ ଓ ତାଙ୍କ ନିକଟ ସମ୍ପର୍କୀୟଙ୍କୁ ସେହି ଫ୍ଲୋରକୁ ପ୍ରବେଶ ଅନୁମତି ରହିଛି । ଅଣ୍ଡରୱାର୍ଲଡ ଡନର ସମ୍ପର୍କୀୟ ଅଲିଶାହ ପାର୍କର ଓ ସାଜିଦ ବାଗଲେଙ୍କ ଠାରୁ ମୁମ୍ବାଇ ପୋଲିସ ଅଧିକ ତଥ୍ୟ ହାସଲ କରିବାକୁ ଚେଷ୍ଟା କରୁଛି । ମୁମ୍ବାଇ ଆକ୍ରମଣର ଅନ୍ୟତମ ମାଷ୍ଟର ମାଇଣ୍ଡ ହେଉଛି ଦାଉଦ ଇବ୍ରାହିମ୍ ।
ଅଣ୍ଡରୱାର୍ଲଡ ଡନ୍ ଦାଉଦ୍ ଇବ୍ରାହିମ୍ ଗୁରୁତର
ଇସଲାମବାଦ: ପାକିସ୍ତାନର କରାଚିରେ ଅଣ୍ଡରୱାର୍ଲଡ ଡନ୍ ଦାଉଦ୍ ଇବ୍ରାହିମ୍ ଗୁରୁତର । ଅସୁସ୍ଥ ହେବା ପରେ ଦାଉଦ ଇବ୍ରାହିମ ହସ୍ପିଟାଲରେ ଭର୍ତ୍ତି ହୋଇଥିବା ଜଣାପଡିଛି । କେହି ବିଷ ଦେଇ ହତ୍ୟା କରିବାକୁ ଉଦ୍ୟମ କରିଥିବା ଅନୁମାନ କରାଯାଉଛି । କିନ୍ତୁ ଏ ନେଇ କୌଣସି ସ୍ପଷ୍ଟ ସୂଚନା ମିଳିନାହିଁ । ଗତକାଲିଠୁ କରାଚିରେ ଏକ ହସ୍ପିଟାଲରେ ଭର୍ତ୍ତି ହୋଇଥିବା କୁହାଯାଉଛି । ଦାଉଦ୍ ଇବ୍ରାହିମକୁ ହସ୍ପିଟାଲ୍ ଭିତରେ କଡ଼ା ସୁରକ୍ଷା ବଳୟରେ ରଖାଯାଇଛି । କେବଳ ଉପରିସ୍ଥ ହସ୍ପିଟାଲ କର୍ତ୍ତୃପକ୍ଷ ଓ ତାଙ୍କ ନିକଟ ସମ୍ପର୍କୀୟଙ୍କୁ ସେହି ଫ୍ଲୋରକୁ ପ୍ରବେଶ ଅନୁମତି ରହିଛି । ଅଣ୍ଡରୱାର୍ଲଡ ଡନର ସମ୍ପର୍କୀୟ ଅଲିଶାହ ପାର୍କର ଓ ସାଜିଦ ବାଗଲେଙ୍କ ଠାରୁ ମୁମ୍ବାଇ ପୋଲିସ ଅଧିକ ତଥ୍ୟ ହାସଲ କରିବାକୁ ଚେଷ୍ଟା କରୁଛି । ମୁମ୍ବାଇ ଆକ୍ରମଣର ଅନ୍ୟତମ ମାଷ୍ଟର ମାଇଣ୍ଡ ହେଉଛି ଦାଉଦ ଇବ୍ରାହିମ୍ ।
ରାଉରକେଲାରେ ଥମୁନି ଝାଡ଼ାବାନ୍ତି ଆତଙ୍କ
ରାଉରକେଲା: ରାଉରକେଲାରେ ଥମୁନି ଝାଡ଼ାବାନ୍ତି ଆତଙ୍କ । ଝାଡାବାନ୍ତିରେ ମୃତ୍ୟୁ ସଂଖ୍ୟା ୫କୁ ବୃଦ୍ଧି ହୋଇଥିବାବେଳେ ୧୧୧ ଜଣଙ୍କର ଚିକିତ୍ସା ଚାଲିଛି । ଆକ୍ରାନ୍ତଙ୍କ ରାଉରକେଲା ସରକାରୀ ଡାକ୍ତରଖାନାରେ ଚାଲିଛି ଚିକିତ୍ସା । ୧୧୨ ଜଣଙ୍କ ମଧ୍ୟରୁ ୧୫ ଜଣ ସୁସ୍ଥ ହୋଇ ଘରକୁ ଫେରିଛନ୍ତି । ସୁନ୍ଦରଗଡ଼ ମେଡ଼ିକାଲ୍ କଲେଜର ୪ ଜଣିଆ ଡ଼ାକ୍ତରୀ ଟିମ ପହଞ୍ଚି ଚିକିତ୍ସା ସ୍ଥିତି ଅନୁଧ୍ୟାନ କରୁଛନ୍ତି ।ରାଜ୍ୟ ସ୍ଵାସ୍ଥ୍ୟ ଵିଭାଗର ଗୋଟିଏ ଟିମ ମଧ୍ୟ ରାଉରକେଲା ସହରରେ ପହଞ୍ଚି ଅନୁସନ୍ଧାନ ଆରମ୍ଭ କରିଛନ୍ତି । ଆକ୍ରାନ୍ତଙ୍କ ପାଇଁ ଔଷଧ ଓ ବେଡର ଵ୍ୟଵସ୍ଥା କରାଯାଇଛି । ପାନୀୟ ଜଳରୁ ଭୂତାଣୁ ନଥିବା ଜଣା ପଡିବା ପରେ ଏହା ଖାଦ୍ୟରୁ ବ୍ୟାପିଥିବା ସନ୍ଦେହ କରାଯାଉଛି । ମହାନଗର ନିଗମ ସ୍ଵାସ୍ଥ୍ୟ ଵିଭାଗ ପକ୍ଷରୁ ସହରର ବିଭିନ୍ନ ହୋଟେଲ, ରେଷ୍ଟୁରାଣ୍ଟ, ଜଳଖିଆ ଦୋକାନ ଓ ଫାଷ୍ଟ ଫୁଡ ଷ୍ଟଲରେ ଚଢାଉକୁ ଜୋରଦାର କରାଯାଇଛି ।