ସୁନ୍ଦରଗଡ଼: ସୁନ୍ଦରଗଡ଼ରେ ଗୁଳିମାଡ଼ । ବଡଗାଁ ଥାନା ଇତମା ନିକଟରେ ଗୁଳିମାଡ ହୋଇଛି । ଗୁଳିମାଡ଼ର ଶିକାର ହୋଇଥିବା ଯୁବକ ହେଲେ କୁତ୍ରା ଥାନା କିରଙ୍ଗସେରାର ସୁବାସ ନାୟକ । ସୁବାସ ଜଣେ ପିକଅପ୍ ଭ୍ୟାନ ଡ୍ରାଇଭର ଭାବେ କାର୍ଯ୍ୟ କରନ୍ତି । ଗାଡ଼ି ଚଳାଇ ଆସୁଥିବାବେଳେ ୪ ଜଣ ଦୁର୍ବୃତ୍ତ ଆସି ତାଙ୍କୁ ଗୁଳିମାଡ କରିଥିଲେ । ଗୁଳିଟି ସୁବାସଙ୍କ ମୁହଁ ତଳେ ବାଜି ପାରହୋଇଯାଇଛି । ତାଙ୍କୁ ଗୁରୁତର ଅବସ୍ଥାରେ ରାଉରକେଲା ସରକାରୀ ହସପିଟାଲରେ ଭର୍ତ୍ତି କରାଯାଇଛି । କିଏ କାହିଁକି ଗୁଳିମାଡ଼ କରିଛି ତାହା ସ୍ପଷ୍ଟ ହୋଇନଥିବାବେଳେ ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ କରୁଛି ।
ଆକ୍ସନ୍ ମୁଡରେ ସରକାର , ଆତଙ୍କବାଦୀଙ୍କୁ ଭାରତରୁ କରିଦେବେ ମୂଳପୋଛ
ଜମ୍ମୁକାଶ୍ମୀର: ଜମ୍ମୁ କାଶ୍ମୀରକୁ ଆତଙ୍କବାଦରୁ ମୁକ୍ତ କରିବା ପାଇଁ କେନ୍ଦ୍ର ସରକାର ନିରନ୍ତର ପ୍ରୟାସ ଜାରି ରଖିଛନ୍ତି । ତେବେ ମୁସଲିମ୍ ଲିଗ୍ ଜମ୍ମୁ-କାଶ୍ମୀର ପରେ ଏବେ ତହରିକ୍- ଏ – ହୁରିୟତ୍ ଉପରେ ପ୍ରତିବନ୍ଧକ ଲଗାଇଛନ୍ତି ସରକାର । ଗୃହ ମନ୍ତ୍ରୀ ଅମିତଶାହା ଆତଙ୍କବାଦୀ କାର୍ଯ୍ୟକଳାପ ଯୋଗୁଁ UAPA ଅଧୀନରେ ଥିବା ଏହି ସଂଗଠନ ଉପରେ ପ୍ରତିବନ୍ଧକ ଲଗାଇଛନ୍ତି । କେନ୍ଦ୍ର ମନ୍ତ୍ରୀ ଅମିତ ଶାହା ଟ୍ବିଟର୍ ରେ କହିଛନ୍ତି ଯେ, ଜମ୍ମୁକାଶ୍ମୀର ରେ ଥିବା ତହରିକ୍- ଏ – ହୁରିୟତ୍ ସଂଗଠନ କୁ UAPA ଆଧାରରେ ବେଆଇନ୍ ସଂଗଠନ ବୋଲି ଘୋଷିତ କରାଯାଇଛି । ଗୃହମନ୍ତ୍ରୀ ଆଉ ମଧ୍ୟ ଲେଖିଛନ୍ତି, ଏହି ସଂଗଠନ ଜାମ୍ମୁକାଶ୍ମୀରକୁ ଭାରତ ଠାରୁ ଅଲଗା କରିବା ଏବଂ ଇସଲାମ୍ ଧର୍ମର ପ୍ରତିଷ୍ଠା ଭଳି ବେଆଇନ୍ କାମ କରୁଥିବା ଯୋଜନା ରେ ସାମିଲ୍ ରହିଛି । ଏହି ସମୂହ ଜମ୍ମୁ-କାଶ୍ମୀରରେ ବିଚ୍ଛିନ୍ନତାକୁ ପ୍ରୋତ୍ସାହିତ କରିବା ସହ ଭାରତ ବିରୋଧୀ ପ୍ରଚାର ପ୍ରସାର କରୁଛି ଏବଂ ଆତଙ୍କବାଦୀ କାର୍ଯ୍ୟକଳାପ ଜାରି ରଖିଛି ।
ଆତଙ୍କବାଦୀଙ୍କ ବିରୁଦ୍ଧରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଶୂନ୍ୟ ସହନଶୀଳତା ନୀତି ଦ୍ବାରା ଭାରତ ବିରୋଧୀ ଗତିବିଧି କାର୍ଯ୍ୟକଳାପରେ ଜଡିତ ଥିବା କୌଣସି ବି ବ୍ୟକ୍ତି କିମ୍ବା ସଂଗଠନ କୁ ତୁରନ୍ତ ରୋକାଯିବ ବୋଲି କହିଛନ୍ତି । ଭାରତ ସରକାର ଏକ ବିଜ୍ଞପ୍ତି ଜାରି କରି କହିଛନ୍ତି ଯେ , ଏହି ସଂଗଠନ ଜମ୍ମୁକାଶ୍ମୀରରେ ବିଚ୍ଛିନ୍ନତାବାଦ ଚିନ୍ତାଧାରା ବିସ୍ତାର କରୁଛି । ଏହି ସଂଗଠନର ଲୋକମାନେ ଆତଙ୍କବାଦୀଙ୍କୁ ଶ୍ରଦ୍ଧାଞ୍ଜଳି ଜ୍ଞାପନ କରନ୍ତି । ଏବଂ ପଥର ଫିଙ୍ଗିବା ଭଳି କାର୍ଯ୍ୟକୁ ଉତ୍ସାହିତ କରନ୍ତି । ସଂଗଠନର ଲୋକମାନେ ଭାରତର ନିୟମ ପାଳନ କରନ୍ତି ନାହିଁ ଏବଂ କାଶ୍ମୀର ଠାରୁ ଭାରତକୁ ଅଲଗା ବୋଲି ଭାବନ୍ତି । ଚାରି ଦିନ ମଧ୍ୟରେ ସରକାର କାଶ୍ମୀର ରେ ଥିବା ଯେତେସବୁ ଆତଙ୍କବାଦୀ କାର୍ଯ୍ୟକଳାପକୁ ପ୍ରୋତ୍ସାହିତ କରୁଥିବା ସଂଗଠନ ବିରୋଧରେ କଡା କାର୍ଯ୍ୟାନୁଷ୍ଠାନ ଗ୍ରହଣ କରିଛନ୍ତି । ଏହା ପୂର୍ବରୁ ଡିସେମ୍ବର ୨୭ରେ ଗୃହ ମନ୍ତ୍ରାଣାଳୟ ମୁସଲିମ୍ ଲିଗ୍ ଜମ୍ମୁକାଶ୍ମୀର ଉପରେ ପ୍ରତିବନ୍ଧକ ଲଗାଇଥିଲା । ଗୃହ ବିରୋଧୀ କାର୍ଯ୍ୟକଳାପ ଯୋଗୁଁ ଏହି ସଂଗଠନକୁ UAPA ଆଧାରରେ ୫ ବର୍ଷ ପାଇଁ ବ୍ୟାନ୍ କରାଯାଇଛି ।
ନେପାଳର ପୂର୍ବତନ ଅଧିନାୟକ ସନ୍ଦିପ ଲାମିଛାନେ ଏମିତି ଫସିଥିଲେ ଦୁଷ୍କର୍ମ ମାମଲାରେ..
ନନ୍ଦିଘୋଷ ବ୍ୟୁରୋ: ଅନେକ ରେକର୍ଡର ଅଧିକାରୀ ତଥା ନେପାଳ କ୍ରିକେଟ ଟିମର ପୂର୍ବତନ ଅଧିନାୟକ ସନ୍ଦିପ ଲାମିଛାନେ ଏବେ ଏକ ଦୁଷ୍କର୍ମ ମାମଲାରେ ଛନ୍ଦି ହୋଇ କୋର୍ଟରେ ବିଚାରାଧିନ ମାମଲା ଚାଲିଛି । ୨୩ ବର୍ଷୀୟ ସନ୍ଦିପଙ୍କ ମାମଲା ଆସନ୍ତା ୧୦ ତାରିଖରେ ଶୁଣାଣି ରହିଛି । ଯଦି ସେ ଦୋଷୀ ସାବ୍ୟସ୍ତ ହୁଅନ୍ତି ତାହେଲେ ୧୦ ବର୍ଷ ଜେଲ ଦଣ୍ଡ ଭୋଗିବେ । କିନ୍ତୁ ତାଙ୍କ ଓକିଲ କହିଛନ୍ତି କି, ଆମେ ଏହି ମାମଲା ହାଇକୋର୍ଟରେ ଲଢ଼ିବୁ । ଗତ ବର୍ଷ ତାଙ୍କ ବିପକ୍ଷରେ ଜଣେ ୧୭ ବର୍ଷୀୟା ନାବାଳିକା ଦୁଷ୍କର୍ମ ଅଭିଯୋଗ ଆଣିଥିଲେ । କାଠମାଣ୍ଡୁରେ ଏହି ଅଭିଯୋଗ ହେବାବେଳେ ସେ ସିପିଏଲ ଖେଳୁଥିଲେ । ଗିରଫ ଓ୍ବାରେଣ୍ଟ ହେବା ପରେ ଦେଶକୁ ଫେରାଇ ଆଣିବାକୁ ନିର୍ଦ୍ଦେଶ ଦିଆଯାଇଥିଲା । କାଠମାଣ୍ଡୁ ଏୟାରପୋର୍ଟରୁ ସନ୍ଦିପଙ୍କୁ ନେପାଳ ପୋଲିସ ଗିରଫ କରିଥିଲା ।
ସନ୍ଦିପ ଗିରଫ ହେବା ପରେ ନେପାଳ କ୍ରିକେଟ ତାଙ୍କ ନିଲମ୍ବନ କରିଥିଲା । କିନ୍ତୁ ୨୦୨୩ ଜାନୁଆରୀରେ ପୁଣି ଏହାକୁ ଫେରାଇ ନେବା ପରେ ସେ ଦଳକୁ ଫେରିଥିଲେ । ପରେ ସବୁ ଲିଗ ଖେଳିଥିଲେ । ସେ ଏମିତି ଜଣେ ଖେଳାଳି ଯିଏକି ବିଗବାସ ଲିଗ୍, କାରବିଆନ ଲିଗ ଭଳି ସମସ୍ତ ଟୁର୍ଣ୍ଣାମେଣ୍ଟ ଖେଳିଛନ୍ତି । ଆଇପିଏଲରେ ମଧ୍ୟ ଖେଳିଛନ୍ତି । ଦିନିକିଆ ଆନ୍ତର୍ଜାତୀୟ କ୍ରିକେଟରେ ଦୃତତମ ୧୦୦ ଓ୍ବିକେଟ ନେବାର ରେକର୍ଡ ସନ୍ଦିପଙ୍କ ନାମରେ ରହିଛି । ରସିଦ ଖାନ ୪୪ଟି ମ୍ୟାଚରେ ଏହି ରେକର୍ଡ କରିଥିବାବେଳେ ସନ୍ଦିପ ମାତ୍ର ୪୨ ମ୍ୟାଚରେ ଏହି ରେକର୍ଡର ଅଧିକାରୀ ହୋଇଛନ୍ତି । ଏହାସହ ଲଗାତାର ୪ଟି ଆନ୍ତର୍ଜାତୀୟ ମ୍ୟାଚରେ ୪ରୁ ଅଧିକ ଓ୍ବିକେଟ ନେଇଥିବା ବୋଲର । ତେବେ ସେ ଦୁର୍ଷମ ମାମଲାରେ ଫସିଥିବାବଳେ ଏବେ ମାମଲା ବିଚାରାଧିନ ରହିଛି ।
ଟ୍ରେନ ବଗି ନେଇ ଯାଉଥିବା ଟ୍ରକ ରେଲିଂ ସହ ହେଲା ଧକ୍କା, ତା ପରେ କଣ ହେଲା ଜାଣନ୍ତୁ ।
ବିହାର : ଗତ କିଛି ଦିନ ତଳେ ବିହାରର ବ୍ରିଜ ତଳେ ବିମାନ ଅଟକି ରହିବା ପରେ ବର୍ତ୍ତମାନ ଟ୍ରେନ୍ କୋଚ୍ ଓଲଟି ପଡିଛି। ଟ୍ରେନ ବଗି ନେଇ ଯାଉଥିବା ଏକ ଟ୍ରକ ଭାଗଲପୁରରେ ରେଲିଂ ସହ ମୁହାଁମୁହିଁ ଧକ୍କା ହୋଇଥିଲା। ଏହା ପରେ ବଗି ତଳେ ପଡିଗଲା | ବଗି ପଡ଼ିବା ପରେ ରାସ୍ତାରେ ଉତ୍ତେଜନା ପରିସ୍ତିତି ଉପୁଜିଥିଲା । ଭଲ କଥା ହେଉଛି ଏହି ଘଟଣାରେ କୌଣସି ବ୍ୟକ୍ତି ଆହତ ହୋଇନାହାଁନ୍ତି। ଭାଗଲପୁର ରେଲୱେ ୟାର୍ଡରୁ ଟ୍ରେନର ଏକ ବଗି ଟ୍ରଲରରେ ଭର୍ତ୍ତି ହୋଇ ଭାଗଲପୁର ଜଙ୍କସନକୁ ନିଆଯାଇଥିଲା। ଏହି ସମୟ ମଧ୍ୟରେ ଲୋହିଆ ବ୍ରିଜରେ ଟ୍ରକର ବ୍ରେକ୍ ଫେଲ ହୋଇଥିଲା । ଡ୍ରାଇଭର ଟ୍ରକକୁ ଅଟକାଇବାକୁ ବହୁତ ଚେଷ୍ଟା କରିଥିଲେ ମଧ୍ୟ ସେ ସଫଳ ହୋଇନଥିଲେ । ଡ୍ରାଇଭରଙ୍କ ବହୁ ଚେଷ୍ଟା ସତ୍ତ୍ୱେ ଟ୍ରକକୁ ନିୟନ୍ତ୍ରଣ କରାଯାଇ ପାରି ନଥିଲା । ରବିବାର ସକାଳେ ଏହି ଘଟଣା ଘଟିଛି । କୁହାଯାଉଛି ଯେ ବ୍ରେକ୍ ଫେଲ ହେବା ପରେ ମଧ୍ୟ ଡ୍ରାଇଭର ନିଜ ବୁଦ୍ଧି ଖଟାଇଥିଲେ । ଏହି କାରଣରୁ ଏକ ବଡ଼ ଦୁର୍ଘଟଣାକୁ ରୋକାଯାଇଥିଲା ଭାଗଲପୁର ରେଳ ଷ୍ଟେସନ ଲୋହିୟାପୁଲ ନିକଟରେ | ସେଠାରେ ସର୍ବଦା ଲୋକଙ୍କ ଭିଡ଼ ଜମିଥାଏ |
ବଗି ହଟାଇବା ପାଇଁ ଦୁଇଟି ବଡ କ୍ରେନ୍ ଡକାଯାଇଛି
ଏହି ଘଟଣା ପରେ ଲୋହିଆ ବ୍ରିଜ୍ ଷ୍ଟେସନ୍ ଚକ୍ ପାର୍ଶ୍ୱରୁ ପନିପରିବା ବଜାରରେ ବ୍ୟାରିକେଡିଂ କରାଯାଇଥିଲା। ଏହା ସହିତ ରେଳ ପୋଲିସ, ଆରପିଏଫ, ଆରପିଏଫ ଇନ୍ସପେକ୍ଟର, ବିହାର ଟ୍ରାଫିକ ପୋଲିସ ଡିଏସପି ଘଟଣାସ୍ଥଳରେ ପହଞ୍ଚିଥିଲେ। ଏଠାରେ ରେଲୱେରୁ ଦୁଇଟି କ୍ରେନ୍ ମଧ୍ୟ ଡକାଯାଇଛି ଯାହାଦ୍ୱାରା ବଗି ଉଠାଯାଇ ଷ୍ଟେସନ ପରିସରକୁ ନିଆଯାଇପାରିବ | ଏହି ପ୍ରସଙ୍ଗରେ ମାଲଦା ଡିଭିଜନର ଡିଆରଏମ ବିକାଶ ଚୁବେ କହିଛନ୍ତି ଯେ ଭାଗଲପୁର ରେଳ ଷ୍ଟେସନ ପରିସରରେ ରେଷ୍ଟୁରାଣ୍ଟ ନିର୍ମାଣ ପାଇଁ ବଗି ନିଆଯାଉଥିଲା । ଏହି କାର୍ଯ୍ୟ ଦିଆଯାଇଥିବା ଏଜେନ୍ସି ଦ୍ୱାରା ରେଳ ବଗି ଅଗଣାରୁ ଷ୍ଟେସନ ପରିସରକୁ ଅଣାଯାଇଥିଲା | ଏହା ପରେ, ଏହି ଘଟଣା ଘଟିଛି ଯାହା ଏକ ସଡକ ଦୁର୍ଘଟଣା, ତଥାପି ରେଳ ଅଧିକାରୀ ଏହି ଘଟଣାକୁ ଗୁରୁତ୍ୱ ଦେଉଛନ୍ତି |
ବୈବାହିକ ବଳାତ୍କାର ଅପରାଧ ବର୍ଗରେ ଆସିବ କି ? ବିଭିନ୍ନ ହାଇକୋର୍ଟର ଭିନ୍ନ ଭିନ୍ନ ନିଷ୍ପତ୍ତି ଜାଣନ୍ତୁ
ନୂଆଦିଲ୍ଲୀ : ବିବାହ ପରେ ସାଧାରଣତଃ ସ୍ୱାମୀ ଓ ସ୍ତ୍ରୀଙ୍କ ସମ୍ପର୍କ ପବିତ୍ର ହୋଇଥାଏ । ବୈବାହିକ ଜୀବନରେ ଅନେକ ସମୟରେ ବିବାଦ ଦେଖାଦେଇଥାଏ । କିନ୍ତୁ ବୈବାହିକ ଜୀବନରେ ବଳାତ୍କାର ମାମଲାରେ କଣ ଆଇନ ରହିଛି ଜାଣନ୍ତୁ । ବୈବାହିକ ଜୀବନରେ ବଳାତ୍କାର ମାମଲାରେ ବିଭିନ୍ନ ହାଇକୋର୍ଟ ଭିନ୍ନ ନିଷ୍ପତ୍ତି ନେଇଛନ୍ତି। ଏହି ମାମଲା ସୁପ୍ରିମକୋର୍ଟରେ ଅଛି ଏବଂ ଶୁଣାଣି ହେବାକୁ ଯାଉଛି। ଏଭଳି ପରିସ୍ଥିତିରେ ସୁପ୍ରିମକୋର୍ଟର ଶୁଣାଣି ପରେ ଚିତ୍ର ସ୍ପଷ୍ଟ ହୋଇଯିବ। ଗତ ସପ୍ତାହରେ ଗୁଜୁରାଟ ହାଇକୋର୍ଟ କହିଥିଲେ ଯେ ବଳାତ୍କାର ହେଉଛି ବଳାତ୍କାର, ଯଦିଓ ଏହା ମହିଳାଙ୍କ ସ୍ୱାମୀ ଦ୍ୱାରା କରାଯାଇଥାଏ। ଭାରତରେ ମହିଳାଙ୍କ ପ୍ରତି ଯୌନ ଅପରାଧ ଉପରେ ନୀରବତା ଭାଙ୍ଗିବାର ଆବଶ୍ୟକତା ରହିଛି। ଏହି ମାସ ଆରମ୍ଭରେ, ଅନ୍ୟ ଏକ ମାମଲାରେ, ଆହ୍ଲାବାଦ ହାଇକୋର୍ଟ ବୈବାହିକ ବଳାତ୍କାର ମାମଲାରେ ଏକ ବଡ ନିଷ୍ପତ୍ତି ନେଇ କହିଥିଲେ ଯେ ଯଦି ପତ୍ନୀଙ୍କ ବୟସ ୧୮ ବର୍ଷରୁ ଅଧିକ ହୁଏ, ତେବେ ଆଇପିସି ଅଧୀନରେ ବଳାତ୍କାରକୁ ଅପରାଧି ଭାବେ ବିବେଚନା କରାଯାଇପାରିବ ନାହିଁ । ବୈବାହିକ ବଳାତ୍କାର ମାମଲାରେ ବିଭିନ୍ନ ହାଇକୋର୍ଟଙ୍କ ନିଷ୍ପତ୍ତି ମଧ୍ୟ ଭିନ୍ନ ଅଟେ। ତେବେ ସୁପ୍ରିମକୋର୍ଟରେ ବୈବାହିକ ବଳାତ୍କାର ମାମଲା ବିଚାରାଧୀନ ରହିଛି ଏବଂ ଏହା ଉପରେ ଶୁଣାଣି ହେବ, ଯାହା ପରେ ଏହି ଘଟଣାର ସମ୍ପୂର୍ଣ୍ଣ ଚିତ୍ର ସ୍ପଷ୍ଟ ହେବ। ବଳାତ୍କାର ଆଇପିସିର ଧାରା ୩୭୫ କିମ୍ବା ଭାରତୀୟ ଜଷ୍ଟିସ କୋଡର ଧାରା ୬୩ ରେ ବ୍ୟାଖ୍ୟା କରାଯାଇଛି। ନିୟମ ଅନୁଯାୟୀ ଯଦି ଜଣେ ପୁରୁଷ ତାଙ୍କ ଇଚ୍ଛା ବିରୁଦ୍ଧରେ କୌଣସି ମହିଳାଙ୍କ ସହ ଶାରୀରିକ ସମ୍ପର୍କ ରଖନ୍ତି ତେବେ ଏହା ବଳାତ୍କାର ହେବ। ଆହୁରି ମଧ୍ୟ, ବୟସ୍କ ପତ୍ନୀଙ୍କ ସହିତ ବାଧ୍ୟତାମୂଳକ ସମ୍ପର୍କ ବଳାତ୍କାରର ଏକ ବ୍ୟତିକ୍ରମ ହେବ |
ବିଭିନ୍ନ ହାଇକୋର୍ଟର ବିଭିନ୍ନ ନିଷ୍ପତ୍ତି
ମଧ୍ୟପ୍ରଦେଶ ହାଇକୋର୍ଟ ଅକ୍ଟୋବରରେ ଏକ ମାମଲାରେ କହିଥିଲେ ଯେ ସ୍ୱାମୀଙ୍କ ବିରୋଧରେ ଅପ୍ରାକୃତିକ ଯୌନ ସମ୍ପର୍କ ମାମଲା ଦାୟର କରାଯାଇପାରିବ ନାହିଁ, କାରଣ ବଳାତ୍କାର ମାମଲାରେ ସ୍ୱାମୀଙ୍କୁ ବ୍ୟତିକ୍ରମ କରାଯାଇଛି ଏବଂ ବଳାତ୍କାର ଆଇନର ନୂତନ ସଂଜ୍ଞା ଅଧିକ ବ୍ୟାପକ ଏବଂ ଅସ୍ୱାଭାବିକ ସମ୍ପର୍କ ମଧ୍ୟ ବଳାତ୍କାର ପରିସରଭୁକ୍ତ | ଏପରି ପରିସ୍ଥିତିରେ ସ୍ୱାମୀଙ୍କ ବିରୋଧରେ ବାଧ୍ୟତାମୂଳକ ଅସ୍ୱାଭାବିକ ଯୌନ ମାମଲା ଦାଖଲ ହେବ ନାହିଁ କାରଣ ବୈବାହିକ ବଳାତ୍କାର ଅପରାଧ ନୁହେଁ।
ଆହ୍ଲାବାଦ ହାଇକୋର୍ଟ କହିଛନ୍ତି ଯେ ଯଦି ପତ୍ନୀଙ୍କ ବୟସ ୧୮ ବର୍ଷରୁ ଅଧିକ ହୁଏ, ତେବେ ଆଇପିସି ଅଧୀନରେ ସ୍ୱାମୀଙ୍କ ବିରୋଧରେ ବୈବାହିକ ବଳାତ୍କାର ମାମଲା କରାଯିବ ନାହିଁ। ଅପ୍ରାକୃତିକ ଅପରାଧ ମାମଲାରେ ଅଭିଯୁକ୍ତକୁ ନିର୍ଦ୍ଦୋଷରେ ଖଲାସ କରିବାବେଳେ ଏହି ମନ୍ତବ୍ୟ ଦିଆଯାଇଛି। କୋର୍ଟ କହିଛନ୍ତି ଯେ ଧାରା ୩୭୭ ଅନୁଯାୟୀ ଅପରାଧ ବଳାତ୍କାର ପରିଭାଷାରେ ଅନ୍ତର୍ଭୁକ୍ତ ଏବଂ ବୈବାହିକ ବଳାତ୍କାର ମାମଲାରେ ସ୍ୱାମୀଙ୍କୁ ବ୍ୟତିକ୍ରମ କରାଯାଇଛି।
ବଳାତ୍କାରୀ ସ୍ୱାମୀ ହୋଇଥିଲେ ମଧ୍ୟ ଗୁଜୁରାଟ ହାଇକୋର୍ଟ କହିଛନ୍ତି । ଯେ ଭାରତରେ ମହିଳାଙ୍କ ପ୍ରତି ହେଉଥିବା ହିଂସା ଘଟଣା ପରିସଂଖ୍ୟାନ ତୁଳନାରେ ବହୁତ ଅଧିକ। ମହିଳାମାନଙ୍କୁ ଏପରି ପରିବେଶରେ ରହିବାକୁ ପଡ଼ିବ ଯେଉଁଠାରେ ସେମାନେ ହିଂସାର ସମ୍ମୁଖୀନ ହୁଅନ୍ତି |
କେରଳ ହାଇକୋର୍ଟ କହିଛନ୍ତି ଯେ ଯଦି ସ୍ୱାମୀ ପତ୍ନୀଙ୍କ ଇଚ୍ଛା ବିରୁଦ୍ଧରେ ଯୌନ ସମ୍ପର୍କ ରଖନ୍ତି ଯଥା ବୈବାହିକ ବଳାତ୍କାର କରନ୍ତି, ତେବେ ଏହା ଛାଡପତ୍ର ପାଇଁ ଏକ ଦୃଢଆଧାର ହେବ।କୋର୍ଟ କହିଛନ୍ତି ଯେ ଏହା ମାନସିକ ଏବଂ ଶାରୀରିକ ନିର୍ଯାତନା ପରିସର ମଧ୍ୟରେ ଅଛି ଏବଂ ଛାଡପତ୍ର ପାଇଁ ଏକ କାରଣ ଅଟେ।
ବୈବାହିକ ବଳାତ୍କାରକୁ ଅପରାଧ ଅଧୀନରେ ଆଣିବା ପାଇଁ ଦିଲ୍ଲୀ ହାଇକୋର୍ଟରେ ଏକ ଆବେଦନ କରାଯାଇଥିଲା। ଏଥିସହିତ କେନ୍ଦ୍ର ପକ୍ଷରୁ ସଲିସିଟର ଜେନେରାଲ ତୁଷାର ମେହେଟ୍ଟା ହାଇକୋର୍ଟଙ୍କୁ କହିଛନ୍ତି ଯେ ଏହି ମାମଲା ସାମାଜିକ ତଥା ପାରିବାରିକ ଜୀବନ ଉପରେ ବ୍ୟାପକ ପ୍ରଭାବ ପକାଇପାରେ, ପରାମର୍ଶ ପ୍ରକ୍ରିୟା ପରେ ହିଁ କେନ୍ଦ୍ର ଏହାର ସ୍ଥିତି ଉପସ୍ଥାପନ କରିବ। ମେ ୧୧ ରେ ଏହି ମାମଲାରେ ଦିଲ୍ଲୀ ହାଇକୋର୍ଟ ଦେଇଥିବା ନିଷ୍ପତ୍ତିକୁ ବିଭକ୍ତ କରାଯାଇଥିଲା। ଦୁଇଜଣ ବିଚାରପତିଙ୍କ ଏକ ବେଞ୍ଚରେ ଜଣେ ବିଚାରପତି କହିଛନ୍ତି ଯେ ଏହାକୁ ଅପରାଧ ବର୍ଗ ଅଧୀନରେ ଆଣିବା ଉଚିତ ଏବଂ ଅନ୍ୟଜଣେ ଏହାର ବିପରୀତ ଉଦ୍ଦେଶ୍ୟ ପ୍ରକାଶ କରିଛନ୍ତି। ଯାହା ପରେ ସୁପ୍ରିମକୋର୍ଟରେ ଏହି ମାମଲା ପହଞ୍ଚିଛି।
ରେଭ୍ ପାର୍ଟି ଉପରେ ଚଢାଉ , ବନ୍ଧା ହେଲେ ୧୦୦ ନିଶାଡି
ମୁମ୍ବାଇ : ଆଜି ହେଉଛି ବର୍ଷର ଶେଷ ଦିନ । ନୂଆବର୍ଷକୁ ସ୍ବାଗତ ଏବଂ ପୁରୁଣା ବର୍ଷକୁ ବିଦାୟ ଦେବା ପାଇଁ ଚାରିଆଡେ ଉତ୍ସବର ମାହୋଲ୍ । ବଡ ବଡ ହୋଟେଲ୍ ମାନଙ୍କରେ ଜିରୋ ନାଇଟ୍ ସେଲିବ୍ରେସନ୍ ସାଙ୍ଗକୁ ଖାଦ୍ୟପେୟର ଆସର ଜମିବ । ତେବେ ମୁମ୍ବାଇ ନିକଟସ୍ଥ ଥାନା ଗୋଡବନ୍ଦର ରୋଡ୍ ରେ ଗତକାଲି ଏକ ରେଭ୍ ପାର୍ଟିର ଆୟୋଜନ କରାଯାଇଥିଲା । ଏହି ରେଭ୍ ପାର୍ଟିରେ ଯୁବକ ମାନଙ୍କ ବ୍ୟତୀତ ୧୨ ଝିଅଙ୍କୁ ପୋଲିସ୍ ନିଜ ହେପାଜତ୍ ରେ ରଖିଛି । ଏହି ପାର୍ଟି ଟି ଜଣଙ୍କର ଫ୍ଲାର୍ଟରେ ଆୟୋଜିତ କରାଯାଇଥିଲା । ପାର୍ଟିରେ ମଦ, ଗଞ୍ଜେଇ, ଚରସ୍ ଭଳି ବିଭିନ୍ନ ମାଦକ ଦ୍ରବ୍ୟ ଯୋଗାଇଦିଆଯାଇଥିଲା । ତେବେ ନୂଆବର୍ଷ ସେଲିବ୍ରେସନ୍ ର ଠିକ୍ ପୂର୍ବରୁ ମୁମ୍ବାଇ ନିକଟସ୍ଥ ଥାନା ଏହି ରେଭ୍ ପାର୍ଟିର ପର୍ଦାଫାଶ୍ କରିଛି । ମୁମ୍ବାଇ ଠାଣେ ପୋଲିସର କ୍ରାଇମବ୍ରାଞ୍ଚ ଟିମ୍ ଏହି ରେଭ୍ ପାର୍ଟିରେ ମିଶିଥିବା ଯୁବକ ଯୁବତୀଙ୍କ ଉପରେ କାର୍ଯ୍ୟାନୁଷ୍ଠାନ କରି ୧୦୦ରୁ ଅଧିକ ଯୁବକଙ୍କୁ ଅଟକ ରଖିଛି । ରେଭ୍ ପାର୍ଟିରେ ଯେଉଁମାନଙ୍କ ଉପରେ ଡ୍ରଗ୍ସ ସେବନ କରିଥିବାର ଅଭିଯୋଗ ରହିଛି ସେମାନଙ୍କ ମଧ୍ୟରୁ ୧୦୦ରୁ ଅଧିକ ଯୁବକଙ୍କୁ ଅଟକ ରଖିବା ପରେ ପୋଲିସ୍ ସେମାନଙ୍କର ମେଡିକାଲ୍ ଯାଞ୍ଚ କରିଛି । ସୂଚନା ଅନୁସାରେ , ଏହି ରେଭ୍ ପାର୍ଟି ମୁମ୍ବାଇ ସ୍ଥିତ ଠାଣେ ର ଗୋଡବନ୍ଦର ରୋଡ୍ ରେ ଆୟୋଜିତ କରାଯାଇଥିଲା । ରେଭ୍ ପାର୍ଟିରେ ଯୁବକ ମାନଙ୍କ ଛଡା ୧୨ ଝିଅଙ୍କୁ ଗିରଫ କରାଯାଇଛି । ଯେଉଁମାନଙ୍କୁ ଗିରଫ କରାଯାଇଛି ସେମାନଙ୍କ ମଧ୍ୟରୁ ଅଧିକ ଜଣ ନିଶା ଖାଉଥିବାର ଜଣାପଡିଛି ।
ଓଡ଼ିଶାରେ ପ୍ରଥମ: ଅବସର ଦିନ ପ୍ରଧାନଶିକ୍ଷକଙ୍କୁ ମିଳିଲା ପେନସନ
ପଟ୍ଟାମୁଣ୍ଡାଇ: ଅବସର ଦିନ ଲାଗୁ ହେଲା ପେନସନ୍ ସୁବିଧା । ଯାହା ଓଡ଼ିଶାରେ ପ୍ରଥମ । ଅବସର ମାତ୍ରେ ପେନସନ୍ ସହ ସବୁ ସୁବିଧା ମିଳିବା ବ୍ୟବସ୍ଥା କରାଯାଇଛି । ପଟ୍ଟାମୁଣ୍ଡାଇ ବ୍ଲକ ବଡପଡା ୟୁପି ସ୍କୁଲର ପ୍ରଧାନଶିକ୍ଷକ ବିଧୁଭୂଷଣ ମହାନ୍ତି ଅବସର ଗ୍ରହଣ କରିବା ସଙ୍ଗେ ସଙ୍ଗେ ତାଙ୍କର ଅବସର କାଳୀନ ସୁବିଧା ପାଇଛନ୍ତି ।
ପୂର୍ବରୁ ଅବସର ନେବା ପରେ ବର୍ଷ ବର୍ଷ ଧରି ପେନସନ ପାଇଁ ଅଫିସକୁ ଦୌଡ଼ିବାକୁ ପଡୁଥିଲା । ହେଲେ 5T ଅଧୀନକୁ ଆସିବା ପରେ ବଦଳିଛି ସ୍ଥିତି । ବିଧୁଭୂଷଣଙ୍କୁ ଅବସର ନେବା ଦିନ ପେନସନ ସହ ଅବସର କାଳୀନ ଛୁଟି ବାବଦ ଅର୍ଥ, ଜିଆରଏସ ଭଳି ସବୁଧା ଦେବାର ବ୍ୟବସ୍ଥା କରିଛି ଶିକ୍ଷା ବିଭାଗ । ଏହା କେବଳ 5T ଯୋଗୁଁ ସମ୍ଭବ ହୋଇଛି । ଏଣିକି ସବୁ କର୍ମଚାରୀଙ୍କୁ ଏମିତି ସୁବିଧା ଯୋଗାଇ ଦିଆଯିବ । ସରକାରୀ କର୍ମଚାରୀ ଅବସର ନେବାର ୬ ମାସ ପୂର୍ବରୁ ସେମାନଙ୍କର କାଗଜପତ୍ର ପ୍ରସ୍ତୁତ କରିବାକୁ ରାଜ୍ୟ ସରକାର ନିର୍ଦ୍ଦେଶ ଦେଇଛନ୍ତି । ଫଳରେ ସରକାରୀ କର୍ମଚାରୀ ପ୍ରଥମ ମାସରୁ ହିଁ ପେନସନ ପାଇପାରିବେ ।
ଗଛ କାଟି ବନ୍ଧାହେଲେ ବିଜେପି ସାଂସଦଙ୍କ ଭାଇ
କର୍ଣ୍ଣାଟକ: ପୁଣି ଚର୍ଚ୍ଚାରେ ବିଜେପି ବିଧାୟକ ମହୀଶୂର-କୋଦାଗୁ ବିଜେପି ସାଂସଦ ପ୍ରତାପ ସିହ୍ମା । ପାର୍ଲାମେଣ୍ଟ ଭିତରକୁ ପଶିଥିବା ଯୁବକଙ୍କୁ ପାସ ଦେଇ ବିବାଦରେ ଥିବା ବେଳେ, ଏବେ ନିଜ ଭାଇଙ୍କୁ ନେଇ ଚର୍ଚ୍ଚା । ମନଇଚ୍ଛା ଗଛ କାଟିବା ଅଭିଯୋଗରେ ପ୍ରତାପଙ୍କ ଭାଇ ବିକ୍ରମ ସିହ୍ନାଙ୍କୁ ଗିରଫ କରିଛି କର୍ଣ୍ଣାଟକ ଜଙ୍ଗଲ ବିଭାଗର ସଂଗଠିତ ଅପରାଧ ନିରୋଧୀ ସ୍କ୍ବାଡ ।
କର୍ଣ୍ଣାଟକର ହାସନ ଜିଲ୍ଲା ଅନ୍ତର୍ଗତ ବେଲୁର ତାଲକ ଅଞ୍ଚଳର ନାନ୍ଦାଗୋନ୍ଦାନାହିଲିରେ ଥିବା ଏକ ସରକାରୀ ଜମିରୁ ୧୨୬ଟି ଗଛ କାଟିଥିଲେ ବିକ୍ରମ । ଏନେଇ ଅଭିଯୋଗ ହେବା ପରେ ତାଙ୍କୁ ଗିରଫ କରି ଜେରା କରାଯାଉଛି । ତାଙ୍କ ବିରୋଧରେ ଅଭିଯୋଗ ହେବା ପରେ ଇଲେକ୍ଟ୍ରୋନିକ ସର୍ଭେଲାନସ ଜରିଆରେ ବିକ୍ରମଙ୍କୁ ଠାବ କରାଯାଇଥିଲା ।
ଜାନୁଆରୀ ୩ରେ ଲୋୟର ସୁକତେଲ ପ୍ରକଳ୍ପର ଲୋକାର୍ପଣ
ବଲାଙ୍ଗୀର: ସାକାର ହେବାକୁ ଯାଉଛି ବଲାଙ୍ଗୀରବାସୀଙ୍କ ଦୀର୍ଘ ଦିନର ସ୍ବପ୍ନ । ଆସନ୍ତା ୩ ତାରିଖରେ ଲୋକାର୍ପିତ ହେବ ବଲାଙ୍ଗୀରର ଲାଇଫ ଲାଇନ କୁହାଯାଉଥିବା ଲୋୟର ସୁକତେଲ ପ୍ରକଳ୍ପ । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ପ୍ରକଳ୍ପର କରିବେ ଲୋକାର୍ପଣ । ପ୍ରକଳ୍ପ ଦ୍ବାରା ୫୦ଟି ପଞ୍ଚାୟତର ୨୦୬ଟି ଗାଁର ଲୋକେ ହେବେ ଉପକୃତ ।
ପ୍ରକଳ୍ପ ସମ୍ପୂର୍ଣ୍ଣ ହେବା ପରେ ବଲାଙ୍ଗୀର ଓ ସୁବର୍ଣ୍ଣପୁର ଜିଲ୍ଲାର ୪୦ ହଜାର ହେକ୍ଟର ଜମିକୁ ଜଳସେଚନର ସୁବିଧା ମିଳିବ । ଏହାସହ ୭୦ ହଜାରରୁ ଅଧିକ ଲୋକ ପିଇବା ପାଣିର ସୁବିଧା ପାଇବେ । ଏହି ପ୍ରକଳ୍ପ ଦ୍ବାରା ଏକ ଲକ୍ଷରୁ ଅଧିକ ଚାଷୀ ଉପକୃତ ହେବେ । ଏଥିପାଇଁ ରାଜ୍ୟ ସରକାର ଖର୍ଚ୍ଚ କରୁଛନ୍ତି ୫ ହଜାର ୨୫୯ କୋଟି ଟଙ୍କା । ଜଳସେଚନ ଓ ପାନୀୟଜଳ ପାଇଁ ଏହି ପ୍ରକଳ୍ପ ହେବ ପ୍ରମୁଖ ବରଦାନ । 5T ଅଧୀନରେ କାମ ତ୍ୱରିତ ହୋଇ ଶେଷ ହେବାକୁ ବସିଛି ।
୨୦୨୩ର ଶେଷ ଦିନ, ରାଜଧାନୀରେ ଅଦିନିଆ ଛାଡ଼ଖାଇ
ଭୁବନେଶ୍ବର: ଆଜି ୨୦୨୩ ଡିସେମ୍ବର ୩୧ ତାରିଖ । ଅର୍ଥାତ ୨୦୨୩ର ଶେଷ ଦିନ । କିଛି ଘଣ୍ଟା ପରେ ୨୦୨୪କୁ ସ୍ବାଗତ କରିବେ ଲୋକେ । ତେବେ ୨୩ର ଶେଷ ଦିନରେ ଆମିଷ ବଜାରରେ ଲାଗିଛି ଲୋକଙ୍କ ଭିଡ଼ । ଏମିତି ଲାଗୁଛି ଅଦିନିଆ ଛାଡ଼ଖାଇ ପାଳୁଛନ୍ତି ରାଜଧାନୀବାସୀ । କିଏ ଘରକୁ ମାଛ, ମାଂସ ବୋହି ନେଉଛି ତ କିଏ ଭୋଜି କରିବାକୁ ବଜାରରେ ଲଗାଇଛି ଆମିଷ ନେବାକୁ ଲାଇନ୍ ।
ନୂଆବର୍ଷର ଆରମ୍ଭକୁ ନିଜ ମନମୁତାବ ଭାବେ ସ୍ବାଗତ କରିବେ । ଏହି ଦିନରେ କିଏ ତୀର୍ଥ ସ୍ଥାନ ଭ୍ରମଣ କରିବାକୁ ମନସ୍ଥ କରିଛି, ତ ଆଉ କେହି ବିଭିନ୍ନ ପର୍ଯ୍ୟଟନସ୍ଥଳରେ ସାଙ୍ଗସାଥୀ ବା ପରିବାର ସହ ସମୟ ବିତାଇବେ । କିନ୍ତୁ ନୂଆବର୍ଷ ଉପଲକ୍ଷେ ପ୍ରଥମ ଚଏସ୍ ଥାଏ ଭୋଜି । ପ୍ରାୟ ପ୍ରତିବର୍ଷ ବାର ସାଙ୍ଗକୁ ତାଳ ଦେଇ ପଡ଼ିଥାଏ ବଡ଼ଦିନ ଏବଂ ନୂଆବର୍ଷ । ହେଲେ ଚଳିତ ବର୍ଷ ସୋମବାରରେ ପଡ଼ିଛି ନୂଆବର୍ଷ । ତଥାପି ଆମିଷ ଖାଉଥିବା ଲୋକଙ୍କ ଖୁସି ବା ଉତ୍କଣ୍ଠା କମିନି । କାରଣ ପୂର୍ବଦିନ ଅର୍ଥାତ୍ ଆଜି ରବିବାର ଥିବାରୁ ଜମିବ ଭୋଜିର ଆସର । ସହରର ପ୍ରମୁଖ ମାର୍କେଟ୍ ୪ ନମ୍ବର ଆମିଷ ମାର୍କେଟ, ୧ ନମ୍ବର ମାଛ ମାର୍କେଟ୍, ବଡ଼ଗଡ଼ ମାଛ ମାର୍କେଟ୍, ଡମଣା ମାଛ ମାର୍କେଟ୍, ଡମଣା ଆଦି ଆମିଷ ମାର୍କେଟରେ ଭିଡ଼ ଲାଗିଛି । ମଟନ ୮ ଶହ, ଦେଶୀ ଚିକେନ ୪୫୦, ପାମ୍ପ୍ଲେଟ ୮୫୦ରୁ ହଜାରେ ୫୦, ଖଈଙ୍ଗା ୪୫୦, କଙ୍କଡା ୧୩ ଶହରୁ୨୫ ଶହ, ଭେକ୍ଟି ୮ ଶହ, ଚିଙ୍ଗୁଡ଼ି ୫ ଶହରୁ ୨୨ ଶହ ଟଙ୍କା ପର୍ଯ୍ୟନ୍ତ ବିକ୍ରି ହେଉଛି ।
ତେବେ କେବଳ ରାଜଧାନୀ ନୁହେଁ ସାରା ଓଡ଼ିଶାରେ ସମାନ ସ୍ଥିତି । ବିଭିନ୍ନ ବଜାରରେ ଆମିଷ ଦୋକାନ ପାଖରେ ଲାଗିଛି ଲୋକଙ୍କ ଗହଳି ।