ରାୟଗଡ଼ା: ରାୟଗଡ଼ା ଜିଲ୍ଲା ଗୁଣପୁର ନିକଟ ଆନ୍ଧ୍ର-ଓଡ଼ିଶା ସୀମାନ୍ତ ଶ୍ରୀକାକୁଲମ ଜିଲ୍ଲା ଭାମିନି ମଣ୍ଡଳରେ ବୁଲୁଛି ମହାବଳ ବାଘ । ଭାଇରାଲ ହେଉଛି ବାଘ ଚଳ ପ୍ରଚଳ କରୁଥିବା ଭିଡିଓ । ଏହାକୁ ନେଇ ଉଭୟ ରାଜ୍ୟର ଗ୍ରାମରେ ଆତଙ୍କ ଖେଳିଯାଇଛି । ଭାଇରଲ ଭିଡିଓରେ ଗୋଟିଏ ମହାବଳ ବାଘ ରାସ୍ତାରେ ଯାଉଥିବା ଦେଖିବାକୁ ମିଳିଛି । ଖବର ପାଇବା ପରେ ଶ୍ରୀକାକୁଲମ ଜଙ୍ଗଲ ବିଭାଗ କର୍ମଚାରୀମାନେ ବାଘ ବୁଲୁଥିବା ଅଞ୍ଚଳ ପରିଦର୍ଶନ କରି ସତ୍ୟାସତ୍ୟ ଯାଞ୍ଚ କରିଛନ୍ତି । କିଛି ଅଞ୍ଚଳରେ ବାଘର ପାଦ ଚିହ୍ନ ପଡ଼ିଥିବା ଦେଖିବାକୁ ମିଳିଛି । ଏହାପରେ ଭାମିନି ମଣ୍ଡଳ ତହସିଲଦାର ଗ୍ରାମବାସୀଙ୍କୁ ଜଙ୍ଗଲ ମଧ୍ୟକୁ ନଯିବାକୁ ପରାମର୍ଶ ଦେଇଛନ୍ତି । ଏଥିସହ ଗୃହପାଳିତ ପଶୁଙ୍କୁ ନଛାଡ଼ିବାକୁ ସତର୍କ କରାଯାଇଛି । ଏନେଇ ଗୁଣୁପୁର ଡେପୁଟି ରେଞ୍ଜର ନୀଳ ମାଧବ ପାଢ଼ୀ କହିଛନ୍ତି ଯେ, ମହାବଳ ବାଘ ଆନ୍ଧ୍ରରେ ରହିଛି । ତେଣୁ ଓଡ଼ିଶା ପ୍ରତି କୌଣସି ବିପଦ ନାହିଁ । ସୀମାନ୍ତରେ ପ୍ରତିଦିନ ଯାଞ୍ଚ କରାଯାଉଛି ବୋଲି ସେ ସୂଚନା ଦେଇଛନ୍ତି ।
ଖୋଲୁଛି କାହ୍ନୁ ପ୍ରଧାନର କଳା କାରନାମା, କାଜୁ ଜଙ୍ଗଲ ହାତେଇବା ପାଇଁ ୨୦୨୦ରେ ୨ ଜଣଙ୍କୁ କରିଥିଲା ହତ୍ୟା
ଭୁବନେଶ୍ୱର: ଖୋଲୁଛି ନକଲି ସୂଚନା ଅଧିକାର କର୍ମୀ କାହ୍ନୁ ପ୍ରଧାନର କଳା କାରନାମା । ସେ ଜଣେ ହତ୍ୟା ଅଭିଯୁକ୍ତ । ୨୦୨୦ରେ କାଜୁ ଜଙ୍ଗଲ ହାତେଇବା ପାଇଁ ଦୁଇ ଜଣଙ୍କୁ ହତ୍ୟା କରିଥିଲା କାହ୍ନୁ । ହତ୍ୟା ବ୍ୟତୀତ ଖୋର୍ଦ୍ଧା ଚାନ୍ଦପୁର ଥାନାରେ ଅଭିଯୁକ୍ତ ବିରୋଧରେ ରହିଛି ଅନେକ ମାମଲା । ଏଥିସହ ୩ଟି ମଦ ଦୋକାନକୁ ଲିଜରେ ନେଇ ଚଲାଉଥିଲା କାହ୍ନୁ । ମାଷ୍ଟରମାଇଣ୍ଡ କାହ୍ନୁଚରଣ ପ୍ରଧାନକୁ STF ଗିରଫ କରି ପଚରାଉଚରା ପରେ ଖୋଲୁଛି ଗୋଟିଏ ପରେ ଗୋଟିଏ ଗୁମର । ଏହି ଘଟଣାରେ ବ୍ରହ୍ମପୁରର କିଶୋର ମିଶ୍ରଙ୍କୁ ଗତ ଶୁକ୍ରବାର ଗିରଫ କରାଯାଇଥିଲା । କାହ୍ନୁଚରଣ ଆକାଉଣ୍ଟରେ ୩ କୋଟି ଟଙ୍କାର ଟ୍ରାଞ୍ଜାକ୍ସନ ହୋଇଛି । ଅଭିଯୁକ୍ତ ନିକଟରୁ କିଛି ବ୍ୟାଙ୍କ ପାସବୁକ ଓ ଏଟିଏମ ଜବତ ହୋଇଛି । ସରକାରୀ କର୍ମଚାରୀଙ୍କୁ ବ୍ଲାକମେଲ କରୁଥିଲେ ନକଲି ଆରଟିଆଇ କର୍ମୀ ।
କୋରାପୁଟ ବସଷ୍ଟାଣ୍ଡରେ ନକଲି ଆଇକାର୍ଡ ପକାଇ ବୁଲୁଥିଲେ କିଶୋର । ପୋଲିସର ସନ୍ଦେହ ହେବାରୁ ଅଭିଯୁକ୍ତକୁ ହେପାଜତକୁ ନିଆଯାଇଥିଲା । ତା’ଠାରୁ ସୂଚନା ଓ ଲୋକ ସମ୍ପର୍କ ବିଭାଗର ନକଲି ଆଇକାର୍ଡ ପାଇଥିଲା ପୋଲିସ । ୨ ଅଭିଯୁକ୍ତଙ୍କୁ ଖୁବଶୀଘ୍ର ରିମାଣ୍ଡରେ ଆଣିପାରେ STF । ପଞ୍ଚାୟତରାଜ ବିଭାଗରେ VLW ଚାକିରି କରାଇବାକୁ କହି ଲୁଟୁଥିଲେ ଟଙ୍କା । ଲୁଟ ଟଙ୍କାରେ ଥାଇଲାଣ୍ଡ ଯାଇ ମସାଜ ହେଉଥିବା ଜାଣିବାକୁ ପାଇଛି STF । କୋରାପୁଟ ଟାଉନ ଥାନା ପୋଲିସ ଚିଠି ଲେଖି STFକୁ ଏ ସମ୍ପର୍କରେ ଅବଗତ କରାଇଥିଲା । ଅଭିଯୁକ୍ତଙ୍କ ଆକାଉଣ୍ଟ ତଥ୍ୟ ପାଇଁ RBIକୁ ଚିଠି ଲେଖିଛି STF ।
ଗାଁ କୂଅରେ ଖସିଲା ଜଙ୍ଗଲୀ ବାରହା, ଉଦ୍ଧାର କଲେ ଅଗ୍ନିଶମ ବାହିନୀ ଓ ବନ ବିଭାଗ
ବାଙ୍କୀ : ବାଙ୍କୀ ଅଞ୍ଚଳରେ ବାରହା ଉପଦ୍ରବ । ବାଙ୍କୀର ଅନେକ ଅଞ୍ଚଳରେ ବାରହା ମାନେ ଫସଲ ନଷ୍ଟ କରୁଥିବା ବେଳେ ଏବେ ଜନବସତି ମୁହାଁ ହେଲେଣି । ସୋମବାର ରାତିରେ ବାଙ୍କୀ ଏନଏସି ୧୩ ନମ୍ବର ୱାର୍ଡର ରଣପୁର ଗାଁରେ ଜଣେ ବ୍ୟକ୍ତିଙ୍କ କୂଅରେ ଗୋଟିଏ ବାରହା ଖସି ପଡ଼ିଥିଲା ।
ଗ୍ରାମବାସୀ ଦେଖିବା ପରେ ସ୍ଥାନୀୟ ବନବିଭାଗ ଓ ଅଗ୍ନିଶମ ବାହିନୀକୁ ଖବର ଦେଇଥିଲେ । ଅଗ୍ନିଶମ ବାହିନୀ ଓ ଗ୍ରାମବାସୀଙ୍କ ମିଳିତ ଉଦ୍ୟମରେ କୂଅ ଭିତରୁ ବାରହାକୁ ଉଦ୍ଧାର କରାଯାଇ ଜଙ୍ଗଲରେ ଛାଡି ଦିଆଯାଇଛି ।
କାଲିଠୁ ରାଜ୍ୟରେ ପୁଣି ବର୍ଷା, ୨୫ରେ ବଙ୍ଗୋପସାଗରରେ ସୃଷ୍ଟି ହେବ ଘୂର୍ଣ୍ଣିବଳୟ
ବ୍ୟୁରୋ : କାଲିଠୁ ରାଜ୍ୟରେ ପୁଣି ବର୍ଷା । ଆସନ୍ତା ୨୫ ତାରିଖରେ ବଙ୍ଗୋପସାଗରରେ ସୃଷ୍ଟି ହେବାକୁ ଯାଉଛି ଘୂର୍ଣ୍ଣିବଳୟ । ପ୍ରଭାବରେ କାଲିଠୁ ୨୫ ତାରିଖ ପର୍ଯ୍ୟନ୍ତ ଅବିଶ୍ରାନ୍ତ ବର୍ଷା ସମ୍ଭାବନା ରହିଛି । ବିଶେଷକରି ଉତ୍ତର-ଉପକୂଳ ଏବଂ ଦକ୍ଷିଣ ଓଡ଼ିଶାରେ ପ୍ରବଳ ବର୍ଷା ହୋଇପାରେ । ଅଧିକାଂଶ ଜିଲ୍ଲାରେ ୭୦ରୁ ୧୧୦ ମିଲିମିଟର ବର୍ଷା ନେଇ ପୂର୍ବାନୁମାନ କରିଛି ଆଞ୍ଚଳିକ ପାଣିପାଗ ବିଜ୍ଞାନ କେନ୍ଦ୍ର ।
ଆଜି ବି ରାଜ୍ୟର କେତେକ ସ୍ଥାନରେ ବର୍ଷା ହୋଇପାରେ । କାଲି ପ୍ରବଳ ବର୍ଷା ନେଇ ୨୧ ଟି ଜିଲ୍ଲାକୁ ସତର୍କତା ଜାରି କରାଯାଇଥିବା ବେଳେ ୨୪ ତାରିଖରେ ୧୧ଟି ଜିଲ୍ଲାକୁ ୟେଲୋ ଆଲର୍ଟ ଜାରି କରାଯାଇଛି । ବର୍ଷା ସତ୍ତ୍ବେ ବି ରାଜ୍ୟରେ ସ୍ବାଭାବିକଠାରୁ ୯ ପ୍ରତିଶତ ନିଅଣ୍ଟିଆ ବର୍ଷା ରେକର୍ଡ କରାଯାଇଛି । ୧୧ଟି ଜିଲ୍ଲାରେ ୨୦ରୁ ୫୯ ପ୍ରତିଶତ ନିଅଣ୍ଟିଆ ବର୍ଷା ହୋଇଛି । ୨ଟି ଜିଲ୍ଲାରେ ସ୍ବାଭାବିକ ଠାରୁ ଅଧିକ ବର୍ଷା ହୋଇଥିବା ବେଳେ ୧୭ଟି ଜିଲ୍ଲାରେ ସ୍ବାଭାବିକ ବର୍ଷା ରେକର୍ଡ କରାଯାଇଛି ।…
ବଢୁଛି ଉତ୍କଣ୍ଠା, କାଲି ଇତିହାସ ରଚିପାରେ ଇସ୍ରୋ
ବେଙ୍ଗାଲୁରୁ : ବଢୁଛି ଉତ୍କଣ୍ଠା,ପାଖଉଛି ସମୟ ବଢୁଛି ହାର୍ଟବିଟ୍ । ଆସନ୍ତାକାଲି ଇତିହାସ ରଚିପାରେ ଇସ୍ରୋ । ଚନ୍ଦ୍ରପୃଷ୍ଠରେ ଲ୍ୟାଣ୍ଡ କରିପାରେ ଚନ୍ଦ୍ରଯାନ-୩ । ସନ୍ଧ୍ୟା ୬ଟା ୪ ମିନିଟରେ ସଫ୍ଟ ଲ୍ୟାଣ୍ଡିଂ କରିବାକୁ ଚେଷ୍ଟା କରାଯିବ । ଲ୍ୟାଣ୍ଡିଂ ପ୍ରକ୍ରିୟା ଆରମ୍ଭ ହେବାର ପ୍ରାୟ ୨୦ ମିନିଟ ପରେ ଲ୍ୟାଣ୍ଡର ଚନ୍ଦ୍ରପୃଷ୍ଠରେ ପହଞ୍ଚିବ । ଏହି ୨୦ ମିନିଟ ଚନ୍ଦ୍ରଯାନର ସଫଳତା ପାଇଁ ବେଶ ଗୁରୁତ୍ବପୂର୍ଣ୍ଣ ।
Chandrayaan-3 Mission:
Here are the images of
Lunar far side area
captured by the
Lander Hazard Detection and Avoidance Camera (LHDAC).This camera that assists in locating a safe landing area — without boulders or deep trenches — during the descent is developed by ISRO… pic.twitter.com/rwWhrNFhHB
— ISRO (@isro) August 21, 2023
ଲ୍ୟାଣ୍ଡିଂ ପରେ ବୈଜ୍ଞାନିକଙ୍କ କମାଣ୍ଡ ଆଧାରରେ ଚନ୍ଦ୍ରପୃଷ୍ଠରେ ଗବେଷଣା ଆରମ୍ଭ କରିବ ରୋଭର ପ୍ରଜ୍ଞାନ । ରୋଭରରେ ଲଗାଯାଇଥିବା ଅଶୋକ ଚକ୍ର ଓ ଇସ୍ରୋର ଲୋଗୋ ଚନ୍ଦ୍ରପୃଷ୍ଠରେ ଭାରତର ଛାପ ଛାଡ଼ିବ । ତେବେ କୌଣସି ଅସୁବିଧା ହେଲେ ପ୍ଲାନ ବି ତୟାର ରଖିଛି ଇସ୍ରୋ । କକ୍ଷପଥରେ ବୁଲୁଥିବା ସମୟରେ ଚନ୍ଦ୍ରଯାନର ସବୁ ଯନ୍ତ୍ରପାତିକୁ ପରୀକ୍ଷଣ କରାଯିବ । ଲ୍ୟାଣ୍ଡିଂର ୨ ଘଣ୍ଟା ପୂର୍ବରୁ ଚନ୍ଦ୍ର ସ୍ଥିତି ସମ୍ପର୍କରେ ଅନୁଧ୍ୟାନ କରାଯିବ । ଯଦି ସବୁକିଛି ଠିକ ନଥାଏ ତେବେ ବିକଳ୍ପ ବ୍ୟବସ୍ଥା ଆପଣାଇବ ଇସ୍ରୋ । କିଛି ଅସୁବିଧା ହେଲେ କାଲି ପରିବର୍ତ୍ତେ ୨୭ ତାରିଖରେ ଲ୍ୟାଣ୍ଡିଂ କରାଇବାକୁ ଯୋଜନା ରଖାଯାଇଛି । ଏନେଇ ଅହମ୍ମଦାବାଦ ସ୍ପେଶ୍ ଆପ୍ଲିକେସନ ସେଣ୍ଟର ନିର୍ଦ୍ଦେଶକ ନିଲେଶ ଦେଶାଇ ସୂଚନା ଦେଇଛନ୍ତି । ତେବେ ଆସନ୍ତାକାଲି ହିଁ ସଫ୍ଟ ଲ୍ୟାଣ୍ଡିଂ ନେଇ ପ୍ରସ୍ତୁତି କରାଯାଇଛି । ଏବେ ସବୁକିଛି ଠିକଠାକ ରହିଛି । ଯଦି କିଛି ଅସୁବିଧା ହୁଏ ତେବେ ୨୭ ତାରିଖରେ ଲ୍ୟାଣ୍ଡିଂ ପାଇଁ ବି ପ୍ରସ୍ତୁତି ହୋଇଛି ।
ଆଜିଠାରୁ ଜୋହନ୍ସବର୍ଗରେ ବ୍ରିକ୍ସ ସମ୍ମିଳନୀ, ଆସନ୍ତା ୨୪ ଯାଏ ଚାଲିବ ସମ୍ମିଳନୀ
ନୂଆଦିଲ୍ଲୀ: ଆଜିଠାରୁ ସାଉଥ ଆଫ୍ରିକାର ଜୋହନ୍ସବର୍ଗରେ ବ୍ରିକ୍ସ ସମ୍ମିଳନୀ । ଆସନ୍ତା ୨୪ ତାରିଖ ଯାଏ ଚାଲିବାକୁ ଥିବା ଏହି ସମ୍ମିଳନୀରେ ସାମିଲ ହେବେ ବ୍ରାଜିଲ, ଋଷ, ଭାରତ, ଚୀନ ଓ ସାଉଥ ଆଫ୍ରିକାର ନେତୃବୃନ୍ଦ । ସମ୍ମିଳନୀରେ ବିଭିନ୍ନ ରାଷ୍ଟ୍ର ମଧ୍ୟରେ ବହୁ ଗୁରୁତ୍ବପୂର୍ଣ୍ଣ ଆଲୋଚନା ହେବାର କାର୍ଯ୍ୟକ୍ରମ ରହିଛି । ଚୀନ ରାଷ୍ଟ୍ରପତି ସି ଜିନପିଙ୍ଗ ଓ ଭାରତ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ମଧ୍ୟରେ ବି ଆଲୋଚନା ହେବା ସମ୍ଭାବନା ରହିଛି । ବୈଠକରେ ଋଷ ପ୍ରତିନିଧି ୟୁକ୍ରେନ ଯୁଦ୍ଧ ପ୍ରସଙ୍ଗ ଉଠାଇବା ସମ୍ଭାବନା ଥିବାବେଳେ ଏକ ବ୍ରିକ୍ସ ବ୍ୟାଙ୍କ କିମ୍ବା ନ୍ୟୁ ଡେଭଲେପମେଣ୍ଟ ବ୍ୟାଙ୍କ ବା ଏନଡିବି ପ୍ରସଙ୍ଗରେ ହୋଇପାରେ ଆଲୋଚନା ।
୨୦୧୫ରେ ପ୍ରତିଷ୍ଠିତ ଏନଡିବି ବିକଳ୍ପ ମୁଦ୍ରା ପ୍ରଚଳନ ଉପରେ ଗୁରୁତ୍ବ ଦେଇଆସୁଛି । ସମ୍ମିଳନୀର ଶେଷ ଦିନରେ ଯୋଗଦେବା ଲାଗି ଆଫ୍ରିକା, ଲାଟିନ ଆମେରିକା, ଏସିଆର ୬୭ ଜଣ ନେତାଙ୍କୁ ଆମନ୍ତ୍ରିତ କରାଯାଇଛି । ପ୍ରତିବର୍ଷ ବ୍ରିକ୍ସ ରାଷ୍ଟ୍ରଗୋଷ୍ଠୀର ଅଧ୍ୟକ୍ଷ ପଦ ପରିବର୍ତ୍ତିତ ହେଉଥିବାବେଳେ ପରସ୍ପର ମଧ୍ୟରେ ଅର୍ଥନୈତିକ, ବାଣିଜ୍ୟକ ସମ୍ପର୍କକୁ ମଜଭୁତ କରିବା ଲାଗି ଗୁରୁତ୍ବ ଦିଆଯାଉଛି । ବ୍ରିକ୍ସ ରାଷ୍ଟ୍ରଗୋଷ୍ଠୀରେ ଥିବା ଜନସଂଖ୍ୟା ବିଶ୍ବର ମୋଟ ଜନସଂଖ୍ୟାର ୪୦ ପ୍ରତିଶତ ହୋଇଥିବାରୁ ଏହି ଗୋଷ୍ଠୀର ଗୁରୁତ୍ବ ବୃଦ୍ଧି ପାଉଛି ।
ଏହି ସବୁ ସମସ୍ୟା ଉପୁଜିଲେ ବଦଳିପାରେ ଚନ୍ଦ୍ରଯାନ-୩ର ଅବତରଣ ତାରିଖ, ଜାଣନ୍ତୁ
ନୂଆଦିଲ୍ଲୀ: ଆସନ୍ତା ଅଗଷ୍ଟ ୨୩ ତାରିଖ ସନ୍ଧ୍ୟା ୬ ଟା ୪ମିନିଟରେ ଚନ୍ଦ୍ରଯାନ-୩ର ଚନ୍ଦ୍ରରେ ଲ୍ୟାଣ୍ଡିଂ ନେଇ ସମୟ ନିର୍ଦ୍ଧାରଣ କରାଯାଇଛି । ସମସ୍ତ ଭାରତୀୟ ଉତ୍ସାହର ସହ ଏହି ଐତିହାସିକ ମୂହୁର୍ତ୍ତକୁ ଅପେକ୍ଷା କରିଛନ୍ତି । ହେଲେ ଏହାରି ମଧ୍ୟରେ ଏକ ବଡ଼ ଅପଡେଟ୍ ସାମ୍ନାକୁ ଆସିଛି । ଯଦି ଲ୍ୟାଣ୍ଡିଂ ନେଇ ଅନୁକୂଳ ସ୍ଥାନ ନମିଳେ ତେବେ ଅବତରଣ ଟଳିପାରେ । ଏହାକୁ ବ୍ୟାପଅପ୍ ପ୍ଲାନ ଭାବେ ରଖାଯାଇଛି । ପ୍ଲାନ-ବି ରୁପରେ ଏହାକୁ ରଖାଯାଇଛି । ତେବେ ଅଧିକ ସମ୍ଭାବନା ଯେ ୨୩ ତାରିଖ ସନ୍ଧ୍ୟାରେ ହିଁ ଲ୍ୟାଣ୍ଡିଂ କରାଯିବ । ଯଦି ଉପଯୁକ୍ତ ସ୍ଥାନ ଲ୍ୟାଣ୍ଡିଂ ପାଇଁ ନମିଳେ ତେବେ ଅବତରଣ ତାରିଖ ଘୁଞ୍ଚାଯିବ ବୋଲି ଇସ୍ରୋ ବୈଜ୍ଞାନିକ କହିଛନ୍ତି । ଇସ୍ରୋର ଏକ ସେଣ୍ଟର ଗୁଜରାଟର ଅହମ୍ମଦାବାଦରେ ରହିଛି ।
ଏହାର ନାଁ ସ୍ପେସ ଆପ୍ଲିକେସନ ସେଣ୍ଟର ଅଟେ ଏବଂ ଏହାର ନିର୍ଦ୍ଦେଶକ ଅଛନ୍ତି ନୀଲେଶ ଏମ୍ ଦେଶାଇ । ନୀଲେଶ ଦେଶାଇ କହିଛନ୍ତି, ୨୩ ଅଗଷ୍ଟରେ ଲ୍ୟାଣ୍ଡିଂର ଦୁଇ ଘଣ୍ଟା ପୂର୍ବେ ଇସ୍ରୋର ପ୍ରମୁଖ ବୈଜ୍ଞାନିକ ଏହି ନିଷ୍ପତ୍ତି ନେବେ ଯେ ଲ୍ୟାଣ୍ଡିଂ କରା ହେବ ନା ନାହିଁ । ଦେଶାଇ କହିଛନ୍ତି, ଏଥିରେ ଆମେ ଦେଖିବୁ ଯେ ଆମକୁ ସଠିକ ସ୍ଥାନ ଲ୍ୟାଣ୍ଡିଂ ପାଇଁ ମିଳୁଛି କି ନାହିଁ । ଲ୍ୟାଣ୍ଡରର ସ୍ୱାସ୍ଥ୍ୟ କିପରି ଅଛି । ଏଥିସହିତ ଚନ୍ଦ୍ରର ବାୟୁମଣ୍ଡଳ ଏବଂ ପୃଷ୍ଠର ସ୍ଥିତି କିପରି ଅଛି । କଣ ତାହା ଲ୍ୟାଣ୍ଡିଂ ପାଇଁ ଉପଯୁକ୍ତ ରହିଛି? ଯଦି କୌଣସି ପ୍ରକାରର ତ୍ରୁଟି ଦେଖିବାକୁ ମିଳେ ବା ଆଶଙ୍କା ସୃଷ୍ଟି ହୁଏ ତେବେ ଚନ୍ଦ୍ରଯାନ-୩ର ଲ୍ୟାଣ୍ଡିଂ ଅଟକାଇ ଦିଆଯିବ । ଏବଂ ୨୭ ତାରିଖରେ ଅବତରଣ କରାଯିବ । ଯଦି କୌଣସି ପ୍ରକାରର ସମସ୍ୟା ନଉପୁଜେ ତେବେ ୨୩ ତାରିଖରେ ହିଁ ଲ୍ୟାଣ୍ଡିଂ କରାଯିବ ।
ସାମ୍ବାଦିକଙ୍କୁ ହତ୍ୟା ଷଡ଼ଯନ୍ତ୍ର ମାମଲା, ତଦନ୍ତ ଆରମ୍ଭ କଲେ ସମ୍ବଲପୁର ଜେଲ ଡିଆଇଜି
କଣ୍ଟାବାଞ୍ଜି: ବଢିଲା କଣ୍ଟାବାଞ୍ଜି ସବଜେଲ ର ଜେଲର ବିକାଶଲତା ବାରୁଙ୍କ ଅଡୁଆ । ଜେଲ ଡିଜିଙ୍କ ନିର୍ଦ୍ଦଶକ୍ରମେ ତଦନ୍ତ ଆରମ୍ଭ କରିଛନ୍ତି ଡିଆଇଜି । ସମ୍ବଲପୁର ରେଞ୍ଜ ଡିଆଇଜି କୁଳମଣି ବେହେରାଙ୍କ ନେତୃତ୍ବରେ ଟିମ କଣ୍ଟାବାଞ୍ଜି ଯାଇ ଛାନବିନ କରିଛି । ତେବେ ତଦନ୍ତ ଜାରି ରହିଛି । ଜେଲର ସିସିଟିଭି ଯାଞ୍ଚ କରାଯିବ ବୋଲି କହିଛନ୍ତି ଡିଆଇଜି । ଏବେ ସୁଦ୍ଧା ଜେଲର, ଜେଲ କର୍ମଚାରୀ ଏବଂ ଅଭିଯୋଗକାରୀଙ୍କୁ ତଦନ୍ତ ପରିସରଭୁକ୍ତ କରାଯାଇଛି । ଆସନ୍ତାକାଲି ଜେଲ ଡିଜିଙ୍କୁ ରିପୋର୍ଟ ଦିଆଯିବ ବୋଲି ସେ କହିଛନ୍ତି ।
ଦୈନିକ ସକାଳର କଣ୍ଟାବାଞ୍ଜି ପ୍ରତିନିଧି ରୋହନ କୁମାର ମହନ୍ତଙ୍କୁ ଉପକାରାଗାରର ଜେଲର ବିକାଶଲତା ବାରୁ ମାରିଦେବାକୁ ଷଡଯନ୍ତ୍ର କରୁଥିବା ଅଡିଓ ଭାଇରାଲ ପରେ ଆକ୍ସନକୁ ଆସିଛି ଜେଲ ବିଭାଗ । ଲେଡି ଜେଲର ବିକାଶଲତା ବାରୁ ଏବଂ ଜଣେ ଓ୍ବେବ ପୋର୍ଟାଲ ସାମ୍ବାଦିକଙ୍କ ଅଡିଓ କାଲି ଭାଇରଲ ହୋଇଥିଲା । ଅଡିଓରେ ସାମ୍ବାଦିକଙ୍କୁ ହତ୍ୟା ଷଡ଼ଯନ୍ତ୍ର କରାଯାଉଥିବା ସ୍ପଷ୍ଟ ଜଣାପଡୁଥିଲା । ଏନେଇ ଥାନାରେ ମାମଲା ହୋଇଥିବାବେଳେ ଜେଲ ଡିଜିଙ୍କ ନିର୍ଦ୍ଦଶକ୍ରମେ ତଦନ୍ତ ଆରମ୍ଭ କରିଛନ୍ତି ଡିଆଇଜି ।
୧୨୧ତମ ରାଜ୍ୟସ୍ତରୀୟ ସିଙ୍ଗଲ ଓ୍ୱିଣ୍ଡୋ କ୍ଲିୟରାନ୍ସ ଅଥରିଟି ବୈଠକରେ ୯ ପ୍ରକଳ୍ପକୁ ମଞ୍ଜୁରୀ
ଭୁବନେଶ୍ୱର: ରାଜ୍ୟରେ ନିବେଶର ସମ୍ଭାର । ୯ଟି ପ୍ରକଳ୍ପକୁ ମଞ୍ଜୁରୀ ଦେଲେ ରାଜ୍ୟ ସରକାର । ୧୨୧ ତମ ରାଜ୍ୟସ୍ତରୀୟ ସିଙ୍ଗଲ ଓ୍ୱିଣ୍ଡୋ କ୍ଲିୟରାନ୍ସ ଅଥରିଟି ବୈଠକରେ ପ୍ରକଳ୍ପକୁ ମଞ୍ଜୁରୀ ମିଳିଛି । ଏହାଦ୍ବାରା ରାଜ୍ୟରେ ୮୭୩ ଦଶମିକ ୫୭ କୋଟି ଟଙ୍କାର ନିବେଶ ହେବାକୁ ଥିବାବେଳେ ୨୫୧୬ଟି ନିଯୁକ୍ତି ସୁଯୋଗ ସୃଷ୍ଟି ହେବ । ଅନୁମୋଦନ ପାଇଥିବା ଉଦ୍ୟୋଗଗୁଡ଼ିକ ମଧ୍ୟରେ ପେଟ୍ରୋନେଟ୍ ଏଲଏନଜି ଲିମିଟେଡ କମ୍ପ୍ରେସ୍ଡ ବାୟୋ ଗ୍ୟାସ୍ ଏବଂ ଫର୍ମେଣ୍ଟେଡ୍ ଅର୍ଗାନିକ୍ ସାର ପ୍ଲାଣ୍ଟ ପ୍ରକଳ୍ପ ସ୍ଥାପନ ହେବ । ଏହା ଜରିଆରେ ବାର୍ଷିକ ୩୩ ହଜାର ୬୫ ମେଟ୍ରିକ୍ ଟନ୍ କ୍ଷମତା ବିଶିଷ୍ଟ ରାସାୟନିକ ଉତ୍ପାଦନ ଏବଂ ଅକ୍ଷୟ ଶକ୍ତି ଆଦି ଦୁଇ ପ୍ରକାର ଲାଭ ପ୍ରତିଶ୍ରୁତି ଦେଇଛି ।
ସେହିପରି ପାରାଦୀପରେ ପ୍ଲାଷ୍ଟିକ ପାର୍କ ନିର୍ମାଣ ହେବ । ପ୍ଲାଷ୍ଟିକ କ୍ଷେତ୍ରରେ ଇଣ୍ଡୋପେଟ୍ ପଲିପ୍ଲାଷ୍ଟ ପ୍ରାଇଭେଟ୍ ଲିମିଟେଡ୍ ବାର୍ଷିକ ୮ ହଜାର ମେଟ୍ରିକ୍ ଟନ୍ କ୍ଷମତା ବିଶିଷ୍ଟ ଫୁଡ୍ ଗ୍ରେଡ୍ ପେଟ୍ ବୋତଲ, ଜାର୍ ଏବଂ ପ୍ରି-ଫର୍ମ ପାଇଁ ଏକ ଉଚ୍ଚ କ୍ଷମତା ବିଶିଷ୍ଟ ଉତ୍ପାଦନ ୟୁନିଟ୍ ପ୍ରତିଷ୍ଠା କରିବାକୁ ଯାଉଛି । ଖୁବଶୀଘ୍ର ଖୋର୍ଦ୍ଧାରେ ସ୍ଥାପିତ ହେବାକୁ ଥିବା ଏହି ପ୍ରକଳ୍ପ ଉଭୟ ନିଯୁକ୍ତି ସୁଯୋଗ ଏବଂ ପ୍ଲାଷ୍ଟିକ ଉତ୍ପାଦନ ଉତ୍କର୍ଷତା ବୃଦ୍ଧି କରିବା ପାଇଁ ଉଦ୍ଦିଷ୍ଟ । ଟିଆରଏଲ କ୍ରୋସାକି ରିଫ୍ରାକ୍ଟୋରିଜ୍ ଲିମିଟେଡ୍ର ବ୍ୟାପକ ପ୍ରକଳ୍ପକୁ ଅନୁମୋଦନ ମିଳିଛି ।
୫୭ ହଜାର ମେଟ୍ରିକ୍ ଟନ୍ ମୌଳିକ କଞ୍ଚାମାଲ ଗ୍ରାଇଣ୍ଡିଂ ୟୁନିଟ୍, ୧୧ ହଜାର ୭୦୦ ମେଟ୍ରିକ୍ ଟନ୍ କଞ୍ଚାମାଲ ଗ୍ରାଇଣ୍ଡିଂ ୟୁନିଟ୍, ୮ ହଜାର ୯୦୦ ମେଟ୍ରିକ୍ ଟନ୍ ଉଚ୍ଚ ଆଲୁମିନା କଞ୍ଚାମାଲ ଗ୍ରାଇଣ୍ଡିଂ ୟୁନିଟ୍ ଏବଂ ୧୪ ହଜାର ୪୦୦ ମେଟ୍ରିକ୍ ଟନ୍ ଗ୍ରୋଗ୍ ପ୍ରୋସେସିଂ ୟୁନିଟ୍ ସହ ଏହି ଉଦ୍ୟୋଗ ଝାରସୁଗୁଡ଼ାରେ ଅବସ୍ଥିତ । SLSWCA ଦ୍ବାରା ଅନୁମୋଦିତ ଏହି କ୍ଷେତ୍ରର ଅନ୍ୟ ଏକ ପ୍ରକଳ୍ପ ହେଉଛି ଚୋସୁନ୍ ସର୍ଭେଶ ରିଫ୍ରାକ୍ଟୋରିଜ୍ ପ୍ରାଇଭେଟ୍ ଲିମିଟେଡର ୧୪ ହଜାର ୪୦୦ ମେଟ୍ରିକ୍ ଟନ୍ ଟ୍ୟାପ୍ ହୋଲ୍ କ୍ଲେ ୟୁନିଟ୍ । ଏହା କୁଆଁରମୁଣ୍ଡା ସୁନ୍ଦରଗଡ଼ରେ ଅବସ୍ଥିତ ।
କୋଷ୍ଟାଲ ବାୟୋଟେକ୍ ପ୍ରାଇଭେଟ୍ ଲିମିଟେଡର ମକା ପ୍ରକ୍ରିୟାକରଣ ଏବଂ ମକା ଷ୍ଟାର୍ଚ ଉତ୍ପାଦନ ୟୁନିଟ୍ ସହିତ କୃଷି ଏବଂ ଖାଦ୍ୟ ପ୍ରକ୍ରିୟାକରଣ କ୍ଷେତ୍ରକୁ ପ୍ରୋତ୍ସାହନ ମିଳିଛି । ନବରଙ୍ଗପୁର ଜିଲ୍ଲାର ବାମୁନି ଶିଳ୍ପାଞ୍ଚଳରେ ଅବସ୍ଥିତ ଏହି ଉଦ୍ୟୋଗ ଜିଲ୍ଲାର ମକା ଉତ୍ପାଦନ କ୍ଷମତାର ଲାଭ ଉଠାଇବ । ଏସଏନଏମ୍ ହୋଟେଲ୍ ଏବଂ ରିସୋର୍ଟସ୍ ପ୍ରାଇଭେଟ୍ ଲିମିଟେଡର ମହତ୍ତ୍ୱାକାଂକ୍ଷୀ ପ୍ରକଳ୍ପ ଦ୍ୱାରା ଓଡ଼ିଶାର ପର୍ଯ୍ୟଟନ କ୍ଷେତ୍ର ଉନ୍ନତ ହୋଇଛି । ଏହି କ୍ରମରେ ଗଞ୍ଜାମ ଜିଲ୍ଲାର ଚିକିଟିରେ ହୋଟେଲ ଏବଂ ରିସୋର୍ଟ ସୁବିଧା କରାଯିବ । ଏହି ପ୍ରକଳ୍ପ ପର୍ଯ୍ୟଟନ କ୍ଷେତ୍ରରେ ବ୍ୟାପକ ଶିଳ୍ପଭିତ୍ତିକ ଅଭିବୃଦ୍ଧି ପାଇଁ ରାଜ୍ୟର ପ୍ରୟାସକୁ ପ୍ରୋତ୍ସାହିତ କରୁଛି । ଏହି ସବୁ ପ୍ରକଳ୍ପ ଫଳପ୍ରଦ ହେବାର ନିକଟତର ହେବା ସହ ଓଡ଼ିଶା ନିଜର ପ୍ରଗତି ଯାତ୍ରାରେ ନୂଆ ମାଇଲଖୁଣ୍ଟ ହାସଲ କରିବାକୁ ଯାଉଛି ।
ଚେସ୍ ବିଶ୍ୱକପ୍ ଫାଇନାଲରେ ଭାରତର ଆର୍ ପ୍ରଜ୍ଞାନନ୍ଦ
ନନ୍ଦିଘୋଷ ବ୍ୟୁରୋ: ଚେସ୍ ବିଶ୍ୱକପ୍ ଫାଇନାଲରେ ଭାରତର ଆର୍ ପ୍ରଜ୍ଞାନାନନ୍ଦ । ସର୍ବକନିଷ୍ଠ ଭାବେ ଫାଇନାଲରେ ପ୍ରବେଶ କରି ସେ ରେକର୍ଡ କରିଛନ୍ତି । ସୋମବାର ଖେଳାଯାଇଥିବା ସେମିଫାଇନାଲରେ ସେ ଆମେରିକୀୟ ଗ୍ରାଣ୍ଡମାଷ୍ଟର ଫାବିଆନୋ କାରୁଆନାଙ୍କୁ ପରାସ୍ତ କରିବାରେ ସଫଳ ହୋଇଥିଲେ । ଆଜେରବାଇଜାନର ବାକୁରେ ଚାଲିଥିବା FIDE ବିଶ୍ୱକପ୍ ଚେସ୍ ଟୁର୍ଣ୍ଣାମେଣ୍ଟ ସେମିଫାଇନାଲରେ ଟାଇ-ବ୍ରେକ ମାଧ୍ୟମରେ ଇଣ୍ଡିଆନ ଗ୍ରାଣ୍ଡମାଷ୍ଟର ବିଶ୍ୱର ନଂ-୩ କାରୁଆନାଙ୍କୁ ୩.୫-୨.୫ରେ ପରାଜିତ କରିଛନ୍ତି ।
ଦୁଇ ଖେଳର କ୍ଲାସିକାଲ ସିରିଜ ୧-୧ରେ ସମାପ୍ତ ହେବା ପରେ ୧୮ ବର୍ଷୀୟ ଭାରତୀୟ ପ୍ରଗନ୍ନାଧ, ଆମେରିକୀୟ ଗ୍ରାଣ୍ଡମାଷ୍ଟରଙ୍କୁ ଏକ ଟାଇ-ବ୍ରେକରେ ମାତ୍ ଦେଇଥିଲେ । ପ୍ରଜ୍ଞାନାନନ୍ଦ ଏବେ ଫାଇନାଲରେ ନରୱେର ମାଗ୍ନସ କାର୍ଲସେନଙ୍କୁ ଭେଟିବେ । ମାଗ୍ନସ କାର୍ଲସେନ ବର୍ତ୍ତମାନ ବିଶ୍ୱର ନଂ-୧ ଚେସ୍ ଖେଳାଳି ଅଟନ୍ତି । ଉଲ୍ଲେଖଯୋଗ୍ୟ, ବିଶ୍ୱନାଥନଙ୍କ ପରେ ପ୍ରଜ୍ଞାନାନନ୍ଦ ପ୍ରଥମ ଭାରତୀୟ ଭାବେ ଫାଇନାଲରେ ପ୍ରବେଶ କରିଛନ୍ତି ।