ମୁମ୍ବାଇ: ମହାରାଷ୍ଟ୍ରରେ ପୁଣି ଏକ ବୀଭତ୍ସ ହତ୍ୟା । ନିଜର ଗର୍ଲପ୍ରେଣ୍ଡଙ୍କୁ ପାଣିରେ ବୁଡାଇ ହତ୍ୟା କରିଛି ଜଣେ ଗ୍ରାଫିକ୍ସ ଡିଜାଇନର । ମହାରାଷ୍ଟ୍ରର ନାଇଗାଁରେ ଘଟିଛି ବୀଭତ୍ସ ହତ୍ୟାକାଣ୍ଡ । ହତ୍ୟାରେ ସହଯୋଗ କରିଥିଲେ ହତ୍ୟାକାରୀଙ୍କ ପତ୍ନୀ । ବଡ଼କଥା ହେଉଛି ହତ୍ୟାକାଣ୍ଡ ପରେ ଶବକୁ ଏକ ସ୍କୁଟରରେ ସୁଟକେଶରେ ନେଇ ସେମାନେ ୧୫୦ କିଲୋମିଟର ଦୂର ଗୁଜରାଟ ଭାଲସାଦରେ ଫୋପାଡିଥିବା ସୂଚନା ମିଳିଛି ।

ତେବେ ଏହି ଲୋମହର୍ଷକ କାଣ୍ଡକୁ ସର୍ବସାଧାରଣରୁ ଦୂରେଇ ରଖିବା ଲାଗି ସେମାନେ ସ୍କୁଟରରେ ୨ ବର୍ଷର ସନ୍ତାନକୁ ନେଇଥିଲେ । ଅଭିଯୁକ୍ତ ମନୋହର ଶୁକ୍ଲାକୁ ଭାସାଇରୁ ଗିରଫ କରାଯାଇଛି । ତା ସହ ବି ଗିରଫ ହୋଇଛି ପତ୍ନୀ ପୂର୍ଣ୍ଣିମା । ମୃତକଙ୍କ ପରିବାର ପକ୍ଷରୁ ଅଭିଯୋଗ କ୍ରମେ ତଦନ୍ତ ହେବା ପରେ ସତ ସାମନାକୁ ଆସିଛି । ଏହି ହତ୍ୟାକାଣ୍ଡ ଘଟିଥିଲା ଗତ ଅଗଷ୍ଟ ୯ରେ । ମୃତକ ନୈନା ମହାତ ଜଣେ ହେୟାର ଷ୍ଟାଇଲିଷ୍ଟ । ଅଭିଯୁକ୍ତ ମନୋହର ଓ ନୈନା ବିଭିନ୍ନ କ୍ଷେତ୍ରରେ ଏକତ୍ର କାର୍ଯ୍ୟ କରୁଥିଲେ । ତେବେ ଗତ ୨୦୧୯ରେ ମନୋହର ବିରୋଧରେ ନୈନା ଗୋଟିଏ ବଳାତ୍କାର ଓ ଆକ୍ରମଣ ମାମଲା ଦାୟର କରିଥିଲେ ।

ଭାସାଇରେ ୨୦୧୩ରେ ଦୁହେଁ ପଡୋଶୀ ଭାବେ ବାସ କରୁଥିବାବେଳେ ସେମାନଙ୍କ ମଧ୍ୟରେ ସମ୍ପର୍କ ବଢିଥିଲା । ୨୦୧୮ରେ ମନୋହର ପୂର୍ଣ୍ଣିମାକୁ ବିବାହ କରିଥିଲେ ବି ନୈନା ସହ ସମ୍ପର୍କ ରଖୁଥିଲା । ବିବାହ ବିଷୟ ଜାଣିବା ପରେ ମନୋହର ବିରୋଧରେ ନୈନା ଏଫଆଇଆର ଦାୟର କରିଥିଲେ । ଗତ ଅଗଷ୍ଟ ୯ ତାରିଖରେ ମନୋହର ଘରକୁ ନୈନା ଆସିବା ପରେ କଳହ ଉପୁଜିଥିଲା । ଏପରିକି କୀଟନାଶକ ଖାଇ ଆତ୍ମହତ୍ୟା କରିବେ ବୋଲି ନୈନା ଧମକ ଦେଇଥିଲେ ।

ଏହାକୁ ନେଇ ଏକ ପାଣି ଭର୍ତ୍ତି ପାତ୍ରରେ ନୈନାର ମୁଣ୍ଡକୁ ବୁଡାଇ ମନୋହର ତାଙ୍କୁ ହତ୍ୟା କରିଥିଲା । ସେହିଦିନ ରାତିରେ ଏକ ଟ୍ରଲି ବ୍ୟାଗରେ ନୈନାର ଶବକୁ ଏକ ସ୍କୁଟରରେ ନେଇ ଫୋପାଡି ଦେଇଥିଲେ । ଲୋକଙ୍କୁ ଭୁଆଁ ବୁଲାଇବା ଲାଗି ପୂର୍ଣ୍ଣିମା ନିଜ ଛୁଆକୁ କୋଳରେ ରଖି ବସିଥିବାର ସିସିଟିଭିର ଭିଜୁଆଲ କଏଦ ହୋଇଥିଲା ।