ବେଗୁନିଆ: ଖୋର୍ଦ୍ଧା ଜିଲ୍ଲା ବେଗୁନିଆ ମିନି ଷ୍ଟାଡିୟମରେ ସାଧାରଣ ସଭାରେ ଯୋଗଦେଲେ 5T ସଚିବ ଭିକେ ପାଣ୍ଡିଆନ । ମହିଳାମାନେ 5T ସଚିବଙ୍କୁ ରାକ୍ଷୀ ପିନ୍ଧାଇ ମଙ୍ଗଳ ମନାସିବା ସହ ପୁଷ୍ପଗୁଚ୍ଛ ଦେଇ ସ୍ବାଗତ କରିଛନ୍ତି । ଲୋକଙ୍କ ସମସ୍ୟା ବୁଝିବା ସହ ଅଭିଯୋଗ ପତ୍ର ଗ୍ରହଣ କରିଛନ୍ତି 5T ସଚିବ । ଚାଷୀଙ୍କ ଦରଖାସ୍ତକୁ ପ୍ରାଧାନ୍ୟ ଦିଆଯିବ । ଜାଗା ମିଶନରେ ଜମି ପଟ୍ଟା ନେଇ ଜିଲ୍ଲାପାଳଙ୍କୁ ଅନୁରୋଧ କରାଯିବ ବୋଲି କହିଛନ୍ତି 5T ସଚିବ । ମନ୍ଦିର, ମସଜିଦ, ଚର୍ଚ୍ଚ, କମ୍ୟୁନିଟି ସେଣ୍ଟର ପାଇଁ ସାତ ଦିନ ମଧ୍ୟରେ ଖୁସି ଖବର ମିଳିବ । ପିଇବା ପାଣି ସମସ୍ୟା ପାଇଁ ଜିଲ୍ଲାପାଳ ଲୋକଙ୍କ ସହ ଆଲୋଚନା କରିବେ । ଫୋନ ନମ୍ବର ନେବା ପରେ ଯନ୍ତ୍ରୀ ଘରକୁ ଯାଇ ସବୁକିଛି ଠିକ କରିବେ । ବୋଲଗଡ଼ ବ୍ଲକକୁ ପାଇପ ଜରିଆରେ ପିଇବା ପାଣି ପହଞ୍ଚିବ । ବେଗୁନିଆର ୨୧ରୁ ୧୬ଟି ପଞ୍ଚାୟତକୁ ପିଇବା ପାଣି ଯୋଗାଯିବ । ଏଥିପାଇଁ ୩୨୫ କୋଟି ଟଙ୍କା ଖର୍ଚ୍ଚ ହେବ । ଏହାସହ ଲୋ ଭୋଲ୍ଟେଜ୍ ସମସ୍ୟା ସମାଧାନ ପାଇଁ ମୁଖ୍ୟମନ୍ତ୍ରୀ ନିର୍ଦ୍ଦେଶ ଦେଇଛନ୍ତି ବୋଲି କହିଛନ୍ତି 5T ସଚିବ । BSKY, ମିଶନ ଶକ୍ତି, ଚାଷୀ ବୀମା ପ୍ରିମିଅମ, ସ୍କୁଲ କଲେଜରେ 5T ରୂପାନ୍ତର ନେଇ ସମସ୍ତଙ୍କୁ ବୁଝାଇଛନ୍ତି । ଆଜିଠାରୁ ଖୋର୍ଦ୍ଧା ଜିଲ୍ଲାର ଯୁକ୍ତ ଦୁଇ ଓ ଡିଗ୍ରୀ କଲେଜ 5Tରେ ସାମିଲ କରାଗଲା ବୋଲି ଘୋଷଣା କରିଛନ୍ତି 5T ସଚିବ ଭିକେ ପାଣ୍ଡିଆନ ।
ସାଙ୍ଗର ନାବାଳିକା ଝିଅକୁ ଦୁଷ୍କର୍ମ ମାମଲା, ପୀଡ଼ିତାଙ୍କୁ ଭେଟିବାକୁ ବାରଣରୁ ରାତି ତମାମ୍ ଧାରଣା
ନୂଆଦିଲ୍ଲୀ: ଦିଲ୍ଲୀରେ ସାଙ୍ଗର ନାବାଳିକା ଝିଅକୁ ଦୁଷ୍କର୍ମ ମାମଲା । ପୀଡ଼ିତାଙ୍କ ଚିକିତ୍ସା ଚାଲିଥିବା ହସ୍ପିଟାଲ ବାହାରେ ହାଇଡ୍ରାମା । ପୋଲିସର ଗୁଣ୍ଡାଗର୍ଦ୍ଦିକୁ ନେଇ ଧାରଣାରେ ବସିଛନ୍ତି ଦିଲ୍ଲୀ ମହିଳା କମିଶନ ଅଧ୍ୟକ୍ଷା ସ୍ବାତୀ ମାଲିଓ୍ବାଲ । ପୀଡ଼ିତା ନାବାଳିକା ଓ ତାଙ୍କ ପରିବାରକୁ ଭେଟିବାକୁ ଦିଆ ନଯିବାରୁ ସେ ହସ୍ପିଟାଲ ବାହାରେ ରାତି ତମାମ ଧାରଣାରେ ବସି ରହିଥିଲେ । ସାଙ୍ଗର ଝିଅକୁ ଆଶ୍ରୟ ଦେବା ନାଁରେ ଜଣେ ସରକାରୀ ଅଧିକାରୀ ଓ ତାଙ୍କ ସ୍ତ୍ରୀ ଯୌନ ଶୋଷଣ କରିଥିବା ବେଳେ ପୋଲିସ କାହିଁକି ପୀଡ଼ିତାଙ୍କୁ ଭେଟିବାକୁ ଦେଉନି ବୋଲି ପ୍ରଶ୍ନ କରିଛନ୍ତି ସ୍ବାତୀ । ପୋଲିସ କ’ଣ ଲୁଚାଇବାକୁ ଚେଷ୍ଟା କରୁଛି ବୋଲି ସ୍ବାତୀ ପ୍ରଶ୍ନ କରିଛନ୍ତି ।
NCPCR ଅଧ୍ୟକ୍ଷା ପୀଡ଼ିତାଙ୍କ ମାଆଙ୍କୁ ଭେଟି ଆଲୋଚନା କରିଛନ୍ତି । ହେଲେ ଦିଲ୍ଲୀରେ ଘଟିଥିବା ଏଭଳି ଏକ ସମ୍ବେଦନଶୀଳ ଘଟଣାରେ ଦିଲ୍ଲୀ ମହିଳା କମିଶନ ଅଧ୍ୟକ୍ଷାଙ୍କୁ କାହିଁକି ପୀଡ଼ିତାଙ୍କ ପରିବାରକୁ ଭେଟିବାକୁ ଦିଆଯାଉନି। ପୋକ୍ସୋ ଆକ୍ଟରେ ମାମଲା ରୁଜୁ ପରେ ବି କାହିଁକି ୮ ଦିନ ଯାଏଁ ଅଭିଯୁକ୍ତକୁ ଗିରଫ କରି ନଥିଲା । ମହିଳା ଓ ଶିଶୁ ବିକାଶ ମନ୍ତ୍ରଣାଳୟର ଉପ ନିର୍ଦ୍ଦେଶକ ଭାବେ କାର୍ଯ୍ୟ କରୁଥିବାରୁ ପୋଲିସ ଅଭିଯୁକ୍ତ ପ୍ରତି କୋହଳ ମନୋଭାବ ଦେଖାଉଛି ବୋଲି ସ୍ବାତୀ ଅଭିଯୋଗ କରିଛନ୍ତି ।
ଖଣ୍ଡଗିରି ବାରିରେ ବୃଦ୍ଧାଙ୍କୁ ହତ୍ୟା ଘଟଣା, ବୋହୂ ବୈଶାଖୀଙ୍କୁ ଗିରଫ କଲା ପୋଲିସ
ଭୁବନେଶ୍ୱର: ଖଣ୍ଡଗିରି ବାରିରେ ମଦା ପଲେଇଙ୍କୁ ଗଳା କାଟି ହତ୍ୟା ଘଟଣା । ବୋହୂ ବୈଶାଖୀ ପଲେଇକୁ ଗିରଫ କଲା ଭରତପୁର ପୋଲିସ । ପରକୀୟା ପ୍ରୀତିରୁ ହତ୍ୟା କରାଯାଇଥିବା ନେଇ ମିଳିଲା ପ୍ରମାଣ । ଘଟଣାର ୮ ଦିନ ପରେ ପାଇଖାନା ଟାଙ୍କିରୁ ପ୍ରମାଣ ଖୋଜିଥିଲା ପୋଲିସ । ହତ୍ୟାରେ ବ୍ୟବହୃତ ଛୁରି ଖୋଜିବା ପାଇଁ ପାଇଖାନା ଟାଙ୍କି ସଫା କରିଥିଲା ପୋଲିସ । ସେସପୁଲ ଗାଡି ଦ୍ୱାରା ପାଇଖାନା ଟାଙ୍କି ସଫା କରିଥିଲା ଭରତପୁର ପୋଲିସ । ବୋହୂ ବୈଶାଖୀଙ୍କ ସମ୍ପୃକ୍ତି ନେଇ ପୋଲିସକୁ ମିଳିଛି ଠୋସ୍ ପ୍ରମାଣ । ହତ୍ୟାକାଣ୍ଡ ପରେ ବୈଶାଖୀ ପାଇଖାନାକୁ ହାତ ଧୋଇବାକୁ ଯାଇଥିଲେ । ଗତ ମଙ୍ଗଳବାର ମଦା ପଲେଇଙ୍କ ହତ୍ୟା କରାଯାଇଥିଲା । ବୋହୂର ପରକୀୟା ପ୍ରୀତିରୁ ଶାଶୁଙ୍କୁ ଗଳା କାଟି ହତ୍ୟା ନେଇ ପୋଲିସ ସନ୍ଦେହ କରୁଥିଲା । ମଦା ପଲେଇଙ୍କ ଘର ଗଞ୍ଜାମ ଜିଲ୍ଲା ବେଳଗୁଣ୍ଠା ଥାନା ଅନ୍ତର୍ଗତ ଇନ୍ଦ୍ରଗଡ଼ ।
ଆରମ୍ଭ ହେଲା ମୁଖ୍ୟମନ୍ତ୍ରୀ ସ୍ରିମ୍ ସ୍କିମ୍, MSME କ୍ଷେତ୍ରର ନିବେଶ ପାଇଁ ଋଣ ରିହାତି ଯୋଗାଇଦେବେ ରାଜ୍ୟ ସରକାର
ଭୁବନେଶ୍ୱର: MSME କ୍ଷେତ୍ରର ବିକାଶ ପାଇଁ ଆରମ୍ଭ ହେଲା ନୂଆ ଯୋଜନା । ଆରମ୍ଭ ହେଲା ମୁଖ୍ୟମନ୍ତ୍ରୀ ସ୍କିମ୍ ଫର୍ ରି-ଇମ୍ବରସମେଣ୍ଟ ଅଫ୍ ଇଣ୍ଟରେଷ୍ଟ ଟୁ MSME ବା ସ୍ରିମ୍ ସ୍କିମ୍ । MSME କ୍ଷେତ୍ରର ନିବେଶ ପାଇଁ ଋଣ ରିହାତି ଯୋଗାଇଦେବେ ରାଜ୍ୟ ସରକାର । ଯୋଜନା ଅନୁସାରେ MSME ସେକ୍ଟରରେ ୧୦ ଲକ୍ଷ କୋଟି ନିବେଶ କରିଥିବା ନିବେଶକାରୀଙ୍କୁ ସମ୍ପୁର୍ଣ୍ଣ ଋଣ ଛାଡ଼ କରିବେ ରାଜ୍ୟ ସରକାର । ସେହିପରି ୧୦ ଲକ୍ଷରୁ ୫୦ ଲକ୍ଷ ପର୍ଯ୍ୟନ୍ତ ନିବେଶ କରିଥିବା ନିବେଶକାରୀଙ୍କୁ ୭୫ ପ୍ରତିଶତ, ୫୦ ଲକ୍ଷରୁ ଏକ କୋଟି ଯାଏଁ ୫୦ ପ୍ରତିଶତ , ଏକ କୋଟିରୁ ୩ କୋଟି ପର୍ଯ୍ୟନ୍ତ ନିବେଶକାରୀଙ୍କୁ ୨୫ ପ୍ରତିଶତ ଋଣ ରିହାତି ଯୋଗାଇଦେବେ ରାଜ୍ୟ ସରକାର । ଓଡ଼ିଶାରେ ଶିଳ୍ପାୟନ ପାଇଁ ନୂଆ ଯୁଗ ଆରମ୍ଭ ହୋଇଛି । ଗ୍ରାମାଞ୍ଚଳରେ ବ୍ୟାପକ ଉଦ୍ୟୋଗୀ ସୃଷ୍ଟି କରିବା ପାଇଁ ରାଜ୍ୟ ସରକାର ନୂଆ ଶିଳ୍ପ ନୀତିରେ ବିଭିନ୍ନ ବ୍ୟବସ୍ଥା କରିଛନ୍ତି । ଯେଉଁଥିପାଇଁ MSME ସେକ୍ଟରରେ ବ୍ୟାପକ ପୁଞ୍ଜି ନିବେଶ କରିବା ପାଇଁ ଆଗ୍ରହ ପ୍ରକାଶ କରୁଛନ୍ତି ଉଦ୍ୟୋଗୀ । ସେଥିପାଇଁ ନୂଆ ଯୋଜନାରେ ଅନେକ ରିହାତିର ବ୍ୟବସ୍ଥା କରାଯାଇଛି । ଖୁବଶୀଘ୍ର ମୁଖ୍ୟମନ୍ତ୍ରୀ ଶ୍ରୀମ ସ୍କିମ ଯୋଜନାର ସମ୍ପୁର୍ଣ୍ଣ ରୂପରେଖ ପ୍ରସ୍ତୁତ କରାଯିବ ।
ଚନ୍ଦ୍ରଯାନର ସୁନା ମଡେଲ, ପ୍ରତିକୃତି ନିର୍ମାଣ ପାଇଁ ବ୍ୟବହାର ହୋଇଛି ୪ ଗ୍ରାମ ସୁନା
ନୂଆଦିଲ୍ଲୀ: ଚନ୍ଦ୍ରଯାନର ସୁନା ମଡେଲ । ଦେଢ଼ ଇଞ୍ଚର ପ୍ରତିକୃତି ନିର୍ମାଣ କରିଛନ୍ତି ତାମିଲନାଡୁ କୋଏମ୍ବାଟୁରର ଲଘୁ କାରିଗର ମରିଆପ୍ପାନ । ପ୍ରତିକୃତି ନିର୍ମାଣ ପାଇଁ ୪ ଗ୍ରାମ ସୁନା ବ୍ୟବହାର ହୋଇଛି । ଚନ୍ଦ୍ରଯାନର ମିନି ମଡେଲ ନିର୍ମାଣ ଲାଗି ୪୮ ଘଣ୍ଟା ସମୟ ଲାଗିଛି ବୋଲି ସେ କହିଛନ୍ତି । ଚନ୍ଦ୍ରଯାନ ପ୍ରୋଜେକ୍ଟରେ ସାମିଲ ସମସ୍ତ ବୈଜ୍ଞାନିକଙ୍କୁ କୃତଜ୍ଞତା ଜଣାଇବା ଉଦ୍ଦେଶ୍ୟରେ ଏହି ମଡେଲ ନିର୍ମାଣ କରାଯାଇଛି ବୋଲି କହିଛନ୍ତି ମରିଆପ୍ପାନ ।
ଆନ୍ଧ୍ର-ଓଡ଼ିଶା ସୀମାନ୍ତରେ ବୁଲୁଛି ମହାବଳ ବାଘ, ଭାଇରାଲ ହେଉଛି ବାଘ ଚଳ ପ୍ରଚଳ କରୁଥିବା ଭିଡିଓ
ରାୟଗଡ଼ା: ରାୟଗଡ଼ା ଜିଲ୍ଲା ଗୁଣପୁର ନିକଟ ଆନ୍ଧ୍ର-ଓଡ଼ିଶା ସୀମାନ୍ତ ଶ୍ରୀକାକୁଲମ ଜିଲ୍ଲା ଭାମିନି ମଣ୍ଡଳରେ ବୁଲୁଛି ମହାବଳ ବାଘ । ଭାଇରାଲ ହେଉଛି ବାଘ ଚଳ ପ୍ରଚଳ କରୁଥିବା ଭିଡିଓ । ଏହାକୁ ନେଇ ଉଭୟ ରାଜ୍ୟର ଗ୍ରାମରେ ଆତଙ୍କ ଖେଳିଯାଇଛି । ଭାଇରଲ ଭିଡିଓରେ ଗୋଟିଏ ମହାବଳ ବାଘ ରାସ୍ତାରେ ଯାଉଥିବା ଦେଖିବାକୁ ମିଳିଛି । ଖବର ପାଇବା ପରେ ଶ୍ରୀକାକୁଲମ ଜଙ୍ଗଲ ବିଭାଗ କର୍ମଚାରୀମାନେ ବାଘ ବୁଲୁଥିବା ଅଞ୍ଚଳ ପରିଦର୍ଶନ କରି ସତ୍ୟାସତ୍ୟ ଯାଞ୍ଚ କରିଛନ୍ତି । କିଛି ଅଞ୍ଚଳରେ ବାଘର ପାଦ ଚିହ୍ନ ପଡ଼ିଥିବା ଦେଖିବାକୁ ମିଳିଛି । ଏହାପରେ ଭାମିନି ମଣ୍ଡଳ ତହସିଲଦାର ଗ୍ରାମବାସୀଙ୍କୁ ଜଙ୍ଗଲ ମଧ୍ୟକୁ ନଯିବାକୁ ପରାମର୍ଶ ଦେଇଛନ୍ତି । ଏଥିସହ ଗୃହପାଳିତ ପଶୁଙ୍କୁ ନଛାଡ଼ିବାକୁ ସତର୍କ କରାଯାଇଛି । ଏନେଇ ଗୁଣୁପୁର ଡେପୁଟି ରେଞ୍ଜର ନୀଳ ମାଧବ ପାଢ଼ୀ କହିଛନ୍ତି ଯେ, ମହାବଳ ବାଘ ଆନ୍ଧ୍ରରେ ରହିଛି । ତେଣୁ ଓଡ଼ିଶା ପ୍ରତି କୌଣସି ବିପଦ ନାହିଁ । ସୀମାନ୍ତରେ ପ୍ରତିଦିନ ଯାଞ୍ଚ କରାଯାଉଛି ବୋଲି ସେ ସୂଚନା ଦେଇଛନ୍ତି ।
ଖୋଲୁଛି କାହ୍ନୁ ପ୍ରଧାନର କଳା କାରନାମା, କାଜୁ ଜଙ୍ଗଲ ହାତେଇବା ପାଇଁ ୨୦୨୦ରେ ୨ ଜଣଙ୍କୁ କରିଥିଲା ହତ୍ୟା
ଭୁବନେଶ୍ୱର: ଖୋଲୁଛି ନକଲି ସୂଚନା ଅଧିକାର କର୍ମୀ କାହ୍ନୁ ପ୍ରଧାନର କଳା କାରନାମା । ସେ ଜଣେ ହତ୍ୟା ଅଭିଯୁକ୍ତ । ୨୦୨୦ରେ କାଜୁ ଜଙ୍ଗଲ ହାତେଇବା ପାଇଁ ଦୁଇ ଜଣଙ୍କୁ ହତ୍ୟା କରିଥିଲା କାହ୍ନୁ । ହତ୍ୟା ବ୍ୟତୀତ ଖୋର୍ଦ୍ଧା ଚାନ୍ଦପୁର ଥାନାରେ ଅଭିଯୁକ୍ତ ବିରୋଧରେ ରହିଛି ଅନେକ ମାମଲା । ଏଥିସହ ୩ଟି ମଦ ଦୋକାନକୁ ଲିଜରେ ନେଇ ଚଲାଉଥିଲା କାହ୍ନୁ । ମାଷ୍ଟରମାଇଣ୍ଡ କାହ୍ନୁଚରଣ ପ୍ରଧାନକୁ STF ଗିରଫ କରି ପଚରାଉଚରା ପରେ ଖୋଲୁଛି ଗୋଟିଏ ପରେ ଗୋଟିଏ ଗୁମର । ଏହି ଘଟଣାରେ ବ୍ରହ୍ମପୁରର କିଶୋର ମିଶ୍ରଙ୍କୁ ଗତ ଶୁକ୍ରବାର ଗିରଫ କରାଯାଇଥିଲା । କାହ୍ନୁଚରଣ ଆକାଉଣ୍ଟରେ ୩ କୋଟି ଟଙ୍କାର ଟ୍ରାଞ୍ଜାକ୍ସନ ହୋଇଛି । ଅଭିଯୁକ୍ତ ନିକଟରୁ କିଛି ବ୍ୟାଙ୍କ ପାସବୁକ ଓ ଏଟିଏମ ଜବତ ହୋଇଛି । ସରକାରୀ କର୍ମଚାରୀଙ୍କୁ ବ୍ଲାକମେଲ କରୁଥିଲେ ନକଲି ଆରଟିଆଇ କର୍ମୀ ।
କୋରାପୁଟ ବସଷ୍ଟାଣ୍ଡରେ ନକଲି ଆଇକାର୍ଡ ପକାଇ ବୁଲୁଥିଲେ କିଶୋର । ପୋଲିସର ସନ୍ଦେହ ହେବାରୁ ଅଭିଯୁକ୍ତକୁ ହେପାଜତକୁ ନିଆଯାଇଥିଲା । ତା’ଠାରୁ ସୂଚନା ଓ ଲୋକ ସମ୍ପର୍କ ବିଭାଗର ନକଲି ଆଇକାର୍ଡ ପାଇଥିଲା ପୋଲିସ । ୨ ଅଭିଯୁକ୍ତଙ୍କୁ ଖୁବଶୀଘ୍ର ରିମାଣ୍ଡରେ ଆଣିପାରେ STF । ପଞ୍ଚାୟତରାଜ ବିଭାଗରେ VLW ଚାକିରି କରାଇବାକୁ କହି ଲୁଟୁଥିଲେ ଟଙ୍କା । ଲୁଟ ଟଙ୍କାରେ ଥାଇଲାଣ୍ଡ ଯାଇ ମସାଜ ହେଉଥିବା ଜାଣିବାକୁ ପାଇଛି STF । କୋରାପୁଟ ଟାଉନ ଥାନା ପୋଲିସ ଚିଠି ଲେଖି STFକୁ ଏ ସମ୍ପର୍କରେ ଅବଗତ କରାଇଥିଲା । ଅଭିଯୁକ୍ତଙ୍କ ଆକାଉଣ୍ଟ ତଥ୍ୟ ପାଇଁ RBIକୁ ଚିଠି ଲେଖିଛି STF ।
ଗାଁ କୂଅରେ ଖସିଲା ଜଙ୍ଗଲୀ ବାରହା, ଉଦ୍ଧାର କଲେ ଅଗ୍ନିଶମ ବାହିନୀ ଓ ବନ ବିଭାଗ
ବାଙ୍କୀ : ବାଙ୍କୀ ଅଞ୍ଚଳରେ ବାରହା ଉପଦ୍ରବ । ବାଙ୍କୀର ଅନେକ ଅଞ୍ଚଳରେ ବାରହା ମାନେ ଫସଲ ନଷ୍ଟ କରୁଥିବା ବେଳେ ଏବେ ଜନବସତି ମୁହାଁ ହେଲେଣି । ସୋମବାର ରାତିରେ ବାଙ୍କୀ ଏନଏସି ୧୩ ନମ୍ବର ୱାର୍ଡର ରଣପୁର ଗାଁରେ ଜଣେ ବ୍ୟକ୍ତିଙ୍କ କୂଅରେ ଗୋଟିଏ ବାରହା ଖସି ପଡ଼ିଥିଲା ।
ଗ୍ରାମବାସୀ ଦେଖିବା ପରେ ସ୍ଥାନୀୟ ବନବିଭାଗ ଓ ଅଗ୍ନିଶମ ବାହିନୀକୁ ଖବର ଦେଇଥିଲେ । ଅଗ୍ନିଶମ ବାହିନୀ ଓ ଗ୍ରାମବାସୀଙ୍କ ମିଳିତ ଉଦ୍ୟମରେ କୂଅ ଭିତରୁ ବାରହାକୁ ଉଦ୍ଧାର କରାଯାଇ ଜଙ୍ଗଲରେ ଛାଡି ଦିଆଯାଇଛି ।
କାଲିଠୁ ରାଜ୍ୟରେ ପୁଣି ବର୍ଷା, ୨୫ରେ ବଙ୍ଗୋପସାଗରରେ ସୃଷ୍ଟି ହେବ ଘୂର୍ଣ୍ଣିବଳୟ
ବ୍ୟୁରୋ : କାଲିଠୁ ରାଜ୍ୟରେ ପୁଣି ବର୍ଷା । ଆସନ୍ତା ୨୫ ତାରିଖରେ ବଙ୍ଗୋପସାଗରରେ ସୃଷ୍ଟି ହେବାକୁ ଯାଉଛି ଘୂର୍ଣ୍ଣିବଳୟ । ପ୍ରଭାବରେ କାଲିଠୁ ୨୫ ତାରିଖ ପର୍ଯ୍ୟନ୍ତ ଅବିଶ୍ରାନ୍ତ ବର୍ଷା ସମ୍ଭାବନା ରହିଛି । ବିଶେଷକରି ଉତ୍ତର-ଉପକୂଳ ଏବଂ ଦକ୍ଷିଣ ଓଡ଼ିଶାରେ ପ୍ରବଳ ବର୍ଷା ହୋଇପାରେ । ଅଧିକାଂଶ ଜିଲ୍ଲାରେ ୭୦ରୁ ୧୧୦ ମିଲିମିଟର ବର୍ଷା ନେଇ ପୂର୍ବାନୁମାନ କରିଛି ଆଞ୍ଚଳିକ ପାଣିପାଗ ବିଜ୍ଞାନ କେନ୍ଦ୍ର ।
ଆଜି ବି ରାଜ୍ୟର କେତେକ ସ୍ଥାନରେ ବର୍ଷା ହୋଇପାରେ । କାଲି ପ୍ରବଳ ବର୍ଷା ନେଇ ୨୧ ଟି ଜିଲ୍ଲାକୁ ସତର୍କତା ଜାରି କରାଯାଇଥିବା ବେଳେ ୨୪ ତାରିଖରେ ୧୧ଟି ଜିଲ୍ଲାକୁ ୟେଲୋ ଆଲର୍ଟ ଜାରି କରାଯାଇଛି । ବର୍ଷା ସତ୍ତ୍ବେ ବି ରାଜ୍ୟରେ ସ୍ବାଭାବିକଠାରୁ ୯ ପ୍ରତିଶତ ନିଅଣ୍ଟିଆ ବର୍ଷା ରେକର୍ଡ କରାଯାଇଛି । ୧୧ଟି ଜିଲ୍ଲାରେ ୨୦ରୁ ୫୯ ପ୍ରତିଶତ ନିଅଣ୍ଟିଆ ବର୍ଷା ହୋଇଛି । ୨ଟି ଜିଲ୍ଲାରେ ସ୍ବାଭାବିକ ଠାରୁ ଅଧିକ ବର୍ଷା ହୋଇଥିବା ବେଳେ ୧୭ଟି ଜିଲ୍ଲାରେ ସ୍ବାଭାବିକ ବର୍ଷା ରେକର୍ଡ କରାଯାଇଛି ।…
ବଢୁଛି ଉତ୍କଣ୍ଠା, କାଲି ଇତିହାସ ରଚିପାରେ ଇସ୍ରୋ
ବେଙ୍ଗାଲୁରୁ : ବଢୁଛି ଉତ୍କଣ୍ଠା,ପାଖଉଛି ସମୟ ବଢୁଛି ହାର୍ଟବିଟ୍ । ଆସନ୍ତାକାଲି ଇତିହାସ ରଚିପାରେ ଇସ୍ରୋ । ଚନ୍ଦ୍ରପୃଷ୍ଠରେ ଲ୍ୟାଣ୍ଡ କରିପାରେ ଚନ୍ଦ୍ରଯାନ-୩ । ସନ୍ଧ୍ୟା ୬ଟା ୪ ମିନିଟରେ ସଫ୍ଟ ଲ୍ୟାଣ୍ଡିଂ କରିବାକୁ ଚେଷ୍ଟା କରାଯିବ । ଲ୍ୟାଣ୍ଡିଂ ପ୍ରକ୍ରିୟା ଆରମ୍ଭ ହେବାର ପ୍ରାୟ ୨୦ ମିନିଟ ପରେ ଲ୍ୟାଣ୍ଡର ଚନ୍ଦ୍ରପୃଷ୍ଠରେ ପହଞ୍ଚିବ । ଏହି ୨୦ ମିନିଟ ଚନ୍ଦ୍ରଯାନର ସଫଳତା ପାଇଁ ବେଶ ଗୁରୁତ୍ବପୂର୍ଣ୍ଣ ।
Chandrayaan-3 Mission:
Here are the images of
Lunar far side area
captured by the
Lander Hazard Detection and Avoidance Camera (LHDAC).This camera that assists in locating a safe landing area — without boulders or deep trenches — during the descent is developed by ISRO… pic.twitter.com/rwWhrNFhHB
— ISRO (@isro) August 21, 2023
ଲ୍ୟାଣ୍ଡିଂ ପରେ ବୈଜ୍ଞାନିକଙ୍କ କମାଣ୍ଡ ଆଧାରରେ ଚନ୍ଦ୍ରପୃଷ୍ଠରେ ଗବେଷଣା ଆରମ୍ଭ କରିବ ରୋଭର ପ୍ରଜ୍ଞାନ । ରୋଭରରେ ଲଗାଯାଇଥିବା ଅଶୋକ ଚକ୍ର ଓ ଇସ୍ରୋର ଲୋଗୋ ଚନ୍ଦ୍ରପୃଷ୍ଠରେ ଭାରତର ଛାପ ଛାଡ଼ିବ । ତେବେ କୌଣସି ଅସୁବିଧା ହେଲେ ପ୍ଲାନ ବି ତୟାର ରଖିଛି ଇସ୍ରୋ । କକ୍ଷପଥରେ ବୁଲୁଥିବା ସମୟରେ ଚନ୍ଦ୍ରଯାନର ସବୁ ଯନ୍ତ୍ରପାତିକୁ ପରୀକ୍ଷଣ କରାଯିବ । ଲ୍ୟାଣ୍ଡିଂର ୨ ଘଣ୍ଟା ପୂର୍ବରୁ ଚନ୍ଦ୍ର ସ୍ଥିତି ସମ୍ପର୍କରେ ଅନୁଧ୍ୟାନ କରାଯିବ । ଯଦି ସବୁକିଛି ଠିକ ନଥାଏ ତେବେ ବିକଳ୍ପ ବ୍ୟବସ୍ଥା ଆପଣାଇବ ଇସ୍ରୋ । କିଛି ଅସୁବିଧା ହେଲେ କାଲି ପରିବର୍ତ୍ତେ ୨୭ ତାରିଖରେ ଲ୍ୟାଣ୍ଡିଂ କରାଇବାକୁ ଯୋଜନା ରଖାଯାଇଛି । ଏନେଇ ଅହମ୍ମଦାବାଦ ସ୍ପେଶ୍ ଆପ୍ଲିକେସନ ସେଣ୍ଟର ନିର୍ଦ୍ଦେଶକ ନିଲେଶ ଦେଶାଇ ସୂଚନା ଦେଇଛନ୍ତି । ତେବେ ଆସନ୍ତାକାଲି ହିଁ ସଫ୍ଟ ଲ୍ୟାଣ୍ଡିଂ ନେଇ ପ୍ରସ୍ତୁତି କରାଯାଇଛି । ଏବେ ସବୁକିଛି ଠିକଠାକ ରହିଛି । ଯଦି କିଛି ଅସୁବିଧା ହୁଏ ତେବେ ୨୭ ତାରିଖରେ ଲ୍ୟାଣ୍ଡିଂ ପାଇଁ ବି ପ୍ରସ୍ତୁତି ହୋଇଛି ।