ନନ୍ଦିଘୋଷ ବ୍ୟୁରୋ: ଚକୋଲେଟରେ ଚନ୍ଦ୍ରଯାନ-୩ । ଇସ୍ରୋର ସଫଳ ଉତକ୍ଷେପଣକୁ ନେଇ ସେଲିବ୍ରେସନ କଲା କ୍ଳବ ଚକଲେଟ ଦି ସ୍କୁଲ ଅଫ ବେକିଙ୍ଗ ଆଣ୍ଡ ଫାଇନ ପେଷ୍ଟ୍ରି ଆର୍ଟ । ୧୨ କେଜିରେ ତିଆରି ହୋଇଛି ଚନ୍ଦ୍ର ଯାନ । ଟାଇଟେନିୟମ ଡାଇ ଅକ୍ସସାଇଟ, ବେଲଜିୟମ ଚକଲେଟ ଓ କକୋ ବଟର ମିଶ୍ରଣରେ ପ୍ରସ୍ତୁତ ହୋଇଥିଲା ଚନ୍ଦ୍ରଯାନ-୩ । ଏହାକୁ ପ୍ରସ୍ତୁତ କରିବାକୁ ଦୁଇ ଦିନ ସମୟ ଲାଗିଥିବା ବେଳେ ୧୨ ହଜାର ଟଙ୍କା ଖର୍ଚ୍ଚ ହୋଇଛି । କ୍ଳବ ଚକୋଲେଟ ୧୦ ଜଣ ଟ୍ରେନର ତିଆରି କରିଥିଲେ । ଚକୋଲେଟରେ ଚନ୍ଦ୍ରଯାନ କରିବା ପଛରେ ହେଉଛି ଭାରତର ସଫଳତାର ଉତ୍ସବ ପାଳନ କରିବା ବୋଲି ଏହାର ସହ ପ୍ରତିଷ୍ଠାତା କହିଛନ୍ତି ।
ରାଜ୍ୟର ଅଗ୍ରଣୀ ଶିକ୍ଷା ଅନୁଷ୍ଠାନ ଆରସିଏମ କଲେଜ
ଜଗତସିଂହପୁର: ରାଜ୍ୟର ଅଗ୍ରଣୀ ଶିକ୍ଷା ଅନୁଷ୍ଠାନ ଆରସିଏମ କଲେଜ । ୪୧ ବର୍ଷ ଧରି ଶିକ୍ଷାରେ ଉତ୍କର୍ଷ ହାସଲ କରିଥିବା ଏହି କଲେଜରେ MBA, MCA, PGDM, ମାଷ୍ଟର ଅଫ୍ ଟୁରିଜିମ୍ ଆଡମିନିଷ୍ଟ୍ରେସନ, BBA ଓ BCA ସହ ପ୍ଲସ୍ ପ୍ରୋଗ୍ରାମ ପ୍ରଦାନ କରାଯାଉଛି ।
ଅଗ୍ରଣୀ ଶିକ୍ଷାନୁଷ୍ଠାନ RCM କଲେଜ । ଏଠାରେ ୬୧ ରୁ ଅଧିକ ପିଏଚ୍ଡିଧାରୀ ଫାକଲ୍ଟି, ୩୯ ରୁ ଅଧିକ ସ୍ମାର୍ଟ କ୍ଳାସରୁମ୍ ୧୫ ହଜାର ୭୮୦ରୁ ଅଧିକ ଆଲୁମିନି, ପାଠାଗାରରେ ୬୦,୩୦୦ରୁ ଅଧିକ ପୁସ୍ତକ ଓ ୧ ଲକ୍ଷ ୩୫ ହଜାର ବର୍ଗଫୁଟର ଟେକ୍ନୋ କ୍ୟାମ୍ପସ୍ ରହିଛି । ବର୍ତ୍ତମାନ ସୁଦ୍ଧା ୫୪୦ରୁ ଅଧିକ କମ୍ପାନୀରେ ଛାତ୍ରଛାତ୍ରୀମାନେ ନିଯୁକ୍ତି ପାଇଛନ୍ତି । ଦୀର୍ଘ ୪୧ ବର୍ଷ ଧରି ପ୍ଲେସ୍ମେଣ୍ଟ୍ରେ ରେକର୍ଡ ୧୦୦ ପ୍ରତିଶତ ରହିଛି । ଆର୍ସିଏମ୍ ବିଭିନ୍ନ ସଂସ୍ଥାର ସ୍ବୀକୃତି ଓ ମାନ୍ୟତା ଥିବା ବେଳେ ଆନ୍ତର୍ଜାତିକ ଗବେଷଣା କେନ୍ଦ୍ର, ବିଶ୍ବବିଦ୍ୟାଳୟ ସହ ଛାତ୍ରଛାତ୍ରୀ ବିନିମୟ ପାଇଁ ସହଯୋଗିତା ରହିଛି । ଶିଳ୍ପର ଉଦୀୟମାନ ପ୍ରଯୁକ୍ତି ବିଷୟରେ ପିଲାମାନଙ୍କୁ ଦକ୍ଷତା ପ୍ରଦାନ କରାଯାଇଛି । ପିଲାମାନଙ୍କୁ ସାରା ବିଶ୍ବରେ ପ୍ରତିଷ୍ଠା ହାସଲ କରିବା ପାଇଁ ସଦାସର୍ବଦା ଆର୍ସିଏମ କଲେଜର ଚେଷ୍ଟା ଜାରି ରହିଛି ।
ବଢ଼ୁଛି ମୋ ଖତର ଆଦର
କଟକ: କଟକ ଜଗତପୁର ଅଞ୍ଚଳର ୪ଟି ଓ୍ବାର୍ଡରେ ଘରୁ ବାହାରୁଥିବା ଓଦା ଓ ଶୁଖିଲା ଅଳିଆର ସଫଳ ପ୍ରକ୍ରିୟାକରଣ କରି ଜୈବିକ ସାର ପ୍ରସ୍ତୁତ କରୁଛନ୍ତି ସ୍ବୟଂ ସହାୟିକା ଗୋଷ୍ଠୀର ମାଆ । ଦୁଇଟି ଗ୍ରୁପର ୨୫ ଜଣ ଏସଏସଜି ମାଆ ଏହି ଅଳିଆରୁ ଜୈବିକ ସାର ବାହାର କରି ତାକୁ ପ୍ୟାକେଟ କରି ବିକ୍ରି କରୁଛନ୍ତି । ଏହାଦ୍ବାରା ଭଲ ରୋଜଗାର ସାଙ୍ଗକୁ ମିଳୁଛି ପରିବେଶ ଅନୁକୂଳ ସାର ।
ମୋ ଖତର ବଢୁଛି ଆଦର । ବରିବେଷ ଅନୁକୂଳ ଓ ଜୈବିକ ଖତ । ଘରେ ଘରେ ବ୍ୟବହାର କରୁଛନ୍ତି ଲୋକ । କଟକ ଜଗତପୁର ତ୍ରିନାଥ ସାହିରେ ପ୍ରତିଷ୍ଠା ହୋଇଛି ଅଳିଆ ବିଶୋଧନ ଓ ପ୍ରକ୍ରିୟାକରଣ ପ୍ଲାଣ୍ଟ । ଘରୁ ଘରୁ ସଂଗ୍ରହ ହେଉଥିବା ଅଳିଆରେ ଏସଏସଜି ମାଆମାନେ ପ୍ରସ୍ତୁତ କରୁଛନ୍ତି ପରିବେଶ ଅନୁକୂଳ ଜୈବିକ ସାର । ଆଖପାଖ ୪ଟି ଓ୍ବାର୍ଡରୁ ସଂଗୃହିତ ଓଦା ଓ ଶୁଖିଲା ଅଳିଆ ସିଏମସି ଗାଡିରେ ପ୍ଲାଣ୍ଟରେ ପହଞ୍ଚିଲା ପରେ ମାଆମାନେ ଏହାକୁ ଖେଳାଇ ଖରାରେ ଶୁଖାଉଛନ୍ତି । ପ୍ଲାଷ୍ଟିକ ଓ ଜରି ଅଲଗା କରି ତାକୁ ମୋସିନ ସାହାଯ୍ଯରେ ଛୋଟ ଛୋଟ ଖଣ୍ଡରେ ପରିଣତ କରି ଏହାର ଟ୍ରିଟମେଣ୍ଟ କରି ପ୍ରସ୍ତୁତ କରୁଛନ୍ତି ଗୁଣ୍ଡ ଜୈବିକ ସାର । ଏସବୁକୁ ପ୍ୟାକେଟ କରି ବଜାରକୁ ପଠାଯାଉଛି ।
ଏହି ପ୍ଲାଣ୍ଟରେ ଏବେ ଦୁଇଟି ଏସଏସଜି ଗ୍ରୁପ ର 25 ଜଣ ମହିଳା କାମ କରୁଛନ୍ତି । ସେମାନେ ଜୈବିକ ସାର ପ୍ରସ୍ତୁତ କରି ପ୍ୟାକେଟ କରି ଏହାକୁ ସିଏମସି ଜରିଆରେ ବଜାରକୁ ଛାଡୁଛନ୍ତି । ବଜାରରେ ମଧ୍ଯ ଏଭଳି ଜୈବିକ ସାରର ଭଲ ଚାହିଦା ରହିଛି । ଆଗାମୀ ଦିନରେ ଏଠାରେ ଏକ ପ୍ଲାଷ୍ଟିକ ବର୍ଜ୍ୟବସ୍ତୁ ପରିଚାଳନା ପ୍ଲାଣ୍ଟ କାର୍ଯ୍ୟକ୍ଷମ ହେବାକୁ ଥିବାବେଳେ ଏହା ଅଧିକ କାମ ଯୋଗାଇ ଦେବ ବୋଲି କହିଛନ୍ତି ଏସଏଚଜି ମାଆ ।
ପୁଣି ବଢିଲା ହରଡ଼ ଡାଲି ଦର
ଭୁବନେଶ୍ବର: ପୁଣି ବଢିଲା ହରଡ଼ ଡାଲି ଦର। ୨୫ କିଲୋ ଡାଲି ପ୍ୟାକେଟର ପାଇକାରୀ ମୂଲ୍ୟରେ ୮୦୦ ଟଙ୍କା ବୃଦ୍ଧି ହୋଇଛି । ଫଳରେ କିଲୋ ୧୫୨ ଟଙ୍କାରେ ମିଳୁଥିବା ହରଡ଼ ଡାଲି ଏବେ ୧୭୦ ଟଙ୍କାରେ ବିକ୍ରି ହେଲାଣି। ଆଗକୁ ଡାଲି କିଲୋ ୨୦୦ଟଙ୍କା ଛୁଇଁପାରେ। ଏପରି ଆଶଙ୍କା ବ୍ୟକ୍ତ କରିଛି ରାଜ୍ୟ ବ୍ୟବସାୟୀ ମହାସଂଘ। ଜାଣିଶୁଣି କର୍ପୋରେଟ୍ ସଂସ୍ଥା କୃତ୍ରିମ ଅଭାବ ସୃଷ୍ଟି କରି ଡାଲିର ଦର ବଢାଉଥିବା ଅଭିଯୋଗ ହୋଇଛି। ସେପଟେ ହୋର୍ଡିଂ କଲେ କଡ଼ା କାର୍ଯ୍ୟାନୁଷ୍ଠାନ ହେବ ବୋଲି ସତର୍କ କରାଇଛନ୍ତି ରାଜ୍ୟ ସରକାର।
ଅମଳ ଅଛି ଆମଦାନୀ ବି ଠିକ୍ ହେଉଛି। ତଥାପି ଲଗାମ୍ ଛଡ଼ା ଡାଲି ଦର। ବଡ଼ ବଡ଼ କର୍ପୋରେଟ୍ ସଂସ୍ଥା ହୋର୍ଡିଂ କରୁଥିବାରୁ ନିୟନ୍ତ୍ରଣ ବାହାରକୁ ଗଲାଣି ଡାଲି ଦର। ଟମାଟୋ, ଜିରା, ପିଆଜ ପରେ ହରଡ଼ ଡାଲି ଓ ବୁଟ ଡାଲି ଦର ଆକାଶଛୁଆଁ ହେଲାଣି। ହରଡ଼ ଡାଲିର ପାଇକାରୀ ମୂଲ୍ୟରେ ୮୦୦ଟଙ୍କା ବୃଦ୍ଧି ହୋଇଛି। ଆଗକୁ ଆହୁରି ବଢିବ ଦର। ୧୫୨ଟଙ୍କାରେ ମିଳୁଥିବା ହରଡ଼ ଡାଲି ୧୭୦ ଟଙ୍କାରେ ବିକ୍ରି ହେଉଛି। ବଡ଼ ବଡ଼ କର୍ପୋରେଟ୍ ସଂସ୍ଥା ଡାଲି ହୋର୍ଡିଂ କରି ବଜାରରେ କୃତ୍ରିମ ଅଭାବ ସୃଷ୍ଟି କରୁଛନ୍ତି। ସେମାନଙ୍କୁ ନିୟନ୍ତ୍ରଣ କରୁନାହାନ୍ତି କେନ୍ଦ୍ର ସରକାର। ଖୁଲମଖୁଲା ମୁନାଫାଖୋର ବଡ଼ କମ୍ପାନୀ ଡାଲିର ଦରକୁ ନିୟନ୍ତ୍ରଣ କରୁଛନ୍ତି। ସାଧାରଣ ଖାଉଟି, ଛୋଟ ବ୍ୟବସାୟୀଙ୍କୁ ଏସବୁ କମ୍ପାନୀ ଶୋଷୁଛନ୍ତି ଅଥଚ କେନ୍ଦ୍ର ସରକାର ନିଦାବିଷ୍ଣୁ ପାଲଟିଥିବା ରାଜ୍ୟ ବ୍ୟବସାୟୀ ମହାସଂଘ ଅଭିଯୋଗ କରିଛି।
ଡାଲି ଦର କେବେଠୁ ବଢିଲାଣି। ଅଥଚ କେନ୍ଦ୍ର ସରକାର କିଛି ବି ପଦକ୍ଷେପ ନେଉନାହାନ୍ତି। ଅତ୍ୟାବଶ୍ୟକ ସାମଗ୍ରୀ ଦର ନିୟନ୍ତ୍ରଣ କରିବା ସହ କର୍ପୋରେଟ୍ ସଂସ୍ଥାଙ୍କ ଉପରେ ଅଙ୍କୁଶ ଲଗାଇବା କେନ୍ଦ୍ରର ଦାୟିତ୍ବ । ଗରିବ ହୁଅନ୍ତୁ କି ଧନୀ ଦୈନଦିନ ଖାଦ୍ୟରେ ଡାଲି ମୁଖ୍ୟ ଖାଦ୍ୟ। ପିଆଜ ଦର ହୁ ହୁ ହୋଇ ବଢିବା ପରେ ରପ୍ତାନୀ ଉପରେ କଟକଣା ଲାଗିଲା। ତେବେ ପ୍ରଶ୍ନ ଉଠୁଛି, ଏଭଳି ସ୍ଥିତି ହେଉଛି କାହିଁକି? କାହିଁକି ଲୋକଙ୍କ ଆବଶ୍ୟକତା ଦେଖି ଅତ୍ୟାବଶ୍ୟକ ସାମଗ୍ରୀ ଯୋଗାଣ ସୁନିଶ୍ଚିତ କରୁନାହାନ୍ତି କେନ୍ଦ୍ର ସରକାର? ତେବେ ରାଜ୍ୟ ସରକାରଙ୍କ ଯୋଗାଣ ବିଭାଗ ସତର୍କ ଦୃଷ୍ଟି ରଖିଛି। କୌଣସି ବ୍ୟବସାୟୀ ହୋର୍ଡିଂ କଲେ ତାଙ୍କ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ନିଆଯିବ ବୋଲି ପୁଣି ଥରେ ପ୍ରତିଶ୍ରୁତି ଦେଇଛନ୍ତି ରାଜ୍ୟ ସରକାର।
ଖାଲି ଡାଲି ନୁହଁ। ଚାଉଳ ଦର ବି ହୁ ହୁ ହୋଇ ବଢିଚାଲିଛି। ସ୍ଥିତି ଏମିତି ହେଲାଣି ଆଗକୁ ଆସୁଥିବା ପର୍ବପର୍ବାଣୀରେ ବଜାରରେ ସବୁ ସାମଗ୍ରୀର ଦର ଅହେତୁକ ଭାବେ ବଢିବ। ଲୋକଙ୍କ କ୍ରୟ ଶକ୍ତି କମିବା ସହିତ ବ୍ୟବସାୟୀଙ୍କ ବେପାର ବି ମନ୍ଦା ରହିବା ନେଇ ଆଶଙ୍କା ପ୍ରକାଶ ପାଇଛି ।
ପୂଜା ପାଇଁ ଯିବାକୁ ପଡ଼ିବନି ପୂଜକଙ୍କ ଘର, ଏଣିକି ଘରେ ବସି ଅନଲାଇନରୁ ଡକାଇପାରିବେ ନନା
ଭୁବନେଶ୍ବର: ଆସୁଛି ପାର୍ବଣ ରତୁ । ପୂଜା ପାଇଁ ନନାଙ୍କ ଘରକୁ ଯିବାକୁ ପଡିବନି । ଗୋଟିଏ କଲ୍ କଲେ ଫଟାଫଟ ମିଳିବେ ପୂଜାରୀ । ପୂଜାକୁ ନଜରରେ ରଖି ଜୟ ଓଡିଶା ପକ୍ଷରୁ ନିଆରା ପଦକ୍ଷେପ ନିଆଯାଇଛି । ଗିରିଦୁର୍ଗା ମନ୍ଦିରରେ ଉନ୍ମୋଚନ ହୋଇଛି ମୋ ପୁଜାରୀ ଡଟ କମ । ଓ୍ବେବସାଇଟ ଶୁଭାରମ୍ଭ ଅବସରରେ ଏକ ଯଜ୍ଞ ଆୟୋଜନ କରାଯାଇଥିଲା । ଏହି ଅବସରରେ ପୂଜାରୀଙ୍କୁ ତୁଳସୀ ଗଛ ପ୍ରଦାନ କରି ସମ୍ବର୍ଦ୍ଧିତ କରାଯିବା ସହିତ ତୁଳସୀ ଯାତ୍ରା ଆୟୋଜନ ହୋଇଥିଲା । ଭୁବନେଶ୍ବରରେ ଯେଉଁ ଅଞ୍ଚଳରେ ଚାହିଁବେ ଘରେ ବସି ନିଜ ଅଞ୍ଚଳ ଓ ବିଭିନ୍ନ ପୂଜା କାର୍ଯ୍ୟ ପାଇଁ ପୁଜାରୀ ମାନଙ୍କ ସହ ଯୋଗଯୋଗ କରିପାରିବେ । ଓ୍ବେବସାଇଟରେ ପୂଜାରୀଙ୍କ ପୂରା ଠିକଣା ଉପଲବ୍ଧ ରହିଛି । ପ୍ରାଥମିକ ପାର୍ଯ୍ୟୟରେ ୪୦୦ ପୂଜାରୀ ଯୋଡି ହୋଇଛନ୍ତି । ଆଗାମୀ ଦିନରେ ଅନ୍ୟ ପୂଜାରୀ ଯୋଡ଼ିହେବା ପାଇଁ ସ୍ବତନ୍ତ୍ର ନମ୍ବର ୯୮୫୩୨୨୦୦୨୩ ଜାରି ହୋଇଛି । ଆଗକୁ ସାରା ରାଜ୍ୟ ଏହି ଓ୍ବେବସାଇଟକୁ କାର୍ଯ୍ଯକାରୀ କରିବା ପାଇଁ ଯୋଜନା କରାଯାଇଛି । ଏହା ଦ୍ବାରା ପୂଜାରୀ ମାନଙ୍କୁ ରୋଜଗାର ଯୋଗାଇବା ସହିତ ଗ୍ରାହକ ମାନଙ୍କୁ ସୁବିଧାରେ ସେବା ମିଳିବ ବୋଲି ଜୟ ଓଡିଶାର ସଭାପତି କହିଛନ୍ତି ।
ଚନ୍ଦ୍ରର ରହସ୍ୟ ଉପରୁ ଉଠିବ ପରଦା
ନନ୍ଦିଘୋଷ ବ୍ୟୁରୋ: ଚନ୍ଦ୍ରର ରହସ୍ୟ ଉପରୁ ଉଠିବ ପରଦା । ଚନ୍ଦ୍ରପୃଷ୍ଠର ଦକ୍ଷିଣ ମେରୁରେ ରୋଭରର ଗତିବିଧି ଜାରି କରିଛି । ଚନ୍ଦ୍ରପୃଷ୍ଠର ଦକ୍ଷିଣ ମେରୁରେ ଥିବା ରହସ୍ୟକୁ ନେଇ ଅଧିକ ତଥ୍ୟ ସଂଗ୍ରହ କରୁଛି ରୋଭର ପ୍ରଜ୍ଞାନ । ଚନ୍ଦ୍ରପୃଷ୍ଠରେ ଲ୍ୟାଣ୍ଡର ବିକ୍ରମର ଧୀର ଅବତରଣ ଓ ଏହାପରେ ପର୍ଯ୍ୟାୟ କ୍ରମେ ସମସ୍ତ ଗତିବିଧିର ଫଟୋ ଓ ଭିଡିଓ ଜାରି କରୁଛି ଇସ୍ରୋ । ପୃଥିବୀର ୧୪ ଦିନ ଅର୍ଥାତ ଗୋଟିଏ ଚନ୍ଦ୍ର ଦିନ ରୋଭର କାର୍ଯ୍ୟ କରିବ । ଏହି ୧୪ ଦିନ ମଧ୍ୟରେ ଅନେକ କିଛି କାର୍ଯ୍ୟ ସଂପାଦନ କରିବ ରୋଭର । ସେପଟେ ଚନ୍ଦ୍ରରୁ ନୂଆ ତଥ୍ୟ ପଠାଇଛି ଚନ୍ଦ୍ରଯାନ-୩ । ଚନ୍ଦ୍ରପୃଷ୍ଠର ଦକ୍ଷିଣ ମେରୁରେ ଘୂରି ବୁଲିବା ସହ ମାଟିର ତାପମାତ୍ରା ରେକର୍ଡ କରି ରିପୋର୍ଟ ଦେଇଛି ଚାଷ୍ଟି ପେଲୋଡ । ଚନ୍ଦ୍ରସ ସରଫେସ ଥରମୋଫିଜିକାଲ ଏକ୍ସପେରିମେଣ୍ଟ ତାପମାତ୍ରା ପ୍ରୋଫାଇଲ ପ୍ରସ୍ତୁତ କରିଛି । ଗ୍ରାଫରେ ଚନ୍ଦ୍ରପୃଷ୍ଠର ତାପମାତ୍ରା ମାଇନସ ୧୦ରୁ ୫୦ ଡିଗ୍ରୀ ସେଲସିୟସ ପର୍ଯ୍ୟନ୍ତ ରେକର୍ଡ ହୋଇଛି । ମାଟିର ୧୦ ସେଣ୍ଟିମିଟର ପର୍ଯ୍ୟନ୍ତ ତାପମାତ୍ରାର ଗ୍ରାଫ୍ ଇସ୍ରୋ ଟୁଇଟରରେ ସେୟାର କରିଛି । ଚନ୍ଦ୍ରର ଦକ୍ଷିଣ ମେରୁରେ ପ୍ରଥମ ଥର ଲାଗି ଏଭଳି ଯାଞ୍ଚ କରାଯାଇଥିବା ବେଳେ ମାଟିର ତାପମାତ୍ରା ରେକର୍ଡ କରାଯାଇଛି ବୋଲି ଇସ୍ରୋ ପକ୍ଷରୁ କୁହାଯାଇଛି । ଗତ ୨୩ ତାରିଖରେ ଚନ୍ଦ୍ରପୃଷ୍ଠରେ ଲ୍ୟାଣ୍ଡ କରିବା ପରେ ଗବେଷଣା ଚଳାଇଛି ଚନ୍ଦ୍ରଯାନ-୩ ।
ଶାହାରୁଖଙ୍କ ଘର ସମ୍ମୁଖରେ ବିକ୍ଷୋଭ
ମୁମ୍ବାଇ: ଅନଲାଇନ ଗେମ ବିଜ୍ଞାପନକୁ ନେଇ ବଲିଉଡ ଷ୍ଟାର ଶାହାରୁଖଙ୍କ ଘର ମନତ ଆଗରେ ବିକ୍ଷୋଭ । ଫିଲ୍ମ ‘ଜୱାନ’ର ମୁକ୍ତିଲାଭ ପୂର୍ବରୁ ଶାହରୁଖ ଖାନଙ୍କ ଅନଲାଇନ୍ ଗେମିଂ ବିଜ୍ଞାପନ କୁ ନେଇ ବିରୋଧ ପ୍ରଦର୍ଶନ । ଶାହାରୁଖଙ୍କ ବାସଭବନ ମନତ ବାହାରେ ବିକ୍ଷୋଭକାରୀମାନେ ଏକାଠି ହେବାପରେ ମୁମ୍ବାଇ ପୋଲିସ ସୁରକ୍ଷା ବଢାଇବା ସହ ପୋଲିସ ମୁତୟନ କରିଛି । ଶାହରୁଖ ଖାନ ତାଙ୍କର ଆଗାମୀ ଚଳଚ୍ଚିତ୍ର ‘ଯବାନ’ ରିଲିଜକୁ ଅପେକ୍ଷା କରିଛନ୍ତି । ପ୍ରଶଂସକମାନେ ତାଙ୍କୁ ପୁଣି ଥରେ ବଡ ପରଦାରେ ଦେଖିବାକୁ ଉତ୍ସାହିତ ଥିବାବେଳେ ବଲିଉଡ ସୁପରଷ୍ଟାର ଅନଲାଇନ୍ ଗେମିଙ୍ଗ ସମ୍ବନ୍ଧୀୟ ଏକ ବିଜ୍ଞାପନକୁ ନେଇ ଅଡୁଆରେ ପଡ଼ିଛନ୍ତି । ଅନଲାଇନ୍ ଗେମିଂ ଆପକୁ ବିରୋଧ କରି ତାଙ୍କ ବିରୋଧରେ ବିକ୍ଷୋଭ ପ୍ରଦର୍ଶନ କରିବା ପାଇଁ ମାନ୍ନତ ବାହାରେ ଦେଖିବାକୁ ମିଳିଥିଲା ବିକ୍ଷୋଭ । A23 ଏକ ଅନଲାଇନ୍ ଗେମିଙ୍ଗ ପୋର୍ଟାଲ୍ । ଶାହରୁଖ ଖାନ ଏହି A23 ଗେମସ ପ୍ଲାଟଫର୍ମରେ ବ୍ରାଣ୍ଡ ଆମ୍ବାସାଡର ରହିଛନ୍ତି । ସେ ଏହି ଆପ୍ ପାଇଁ ଏକ ପ୍ରୋମୋ ମଧ୍ୟ ସୁଟ୍ କରିଥିଲେ ।
ତେବେ ଏହାକୁ ବିରୋଧ କରି ଅନଟଚ୍ ୟୁଥ୍ ଫାଉଣ୍ଡେସନ୍ ବିକ୍ଷୋଭ ପ୍ରଦର୍ଶନ କରିଛି । ବିକ୍ଷୋଭକାରୀ ମାନେ କହିଛନ୍ତି ଯେ ଏହି ଅନଲାଇନ୍ ଗେମିଂ ଆପସ ପ୍ଲାଟଫର୍ମଗୁଡିକ ଯୁବକମାନଙ୍କୁ ଭ୍ରଷ୍ଟ କରି ସେମାନଙ୍କୁ ଭ୍ରମିତ କରୁଛନ୍ତି । ଏହି ବିଜ୍ଞାପନରେ ପ୍ରସିଦ୍ଧ ଅଭିନେତା ଏବଂ ଅଭିନେତ୍ରୀମାନେ କାର୍ଯ୍ୟ କରନ୍ତି ଏବଂ ସେମାନେ ସମାଜକୁ ବିଭ୍ରାନ୍ତ କରିବା ଦିଗରେ କାର୍ଯ୍ୟ କରୁଛନ୍ତି । ଯାହାକୁ ନେଇ ଅନଟୁଚ୍ ଇଣ୍ଡିଆ ଫାଉଣ୍ଡେସନ୍ ତରଫରୁ ଶାହରୁଖ ଖାନଙ୍କ ମନତ ବଙ୍ଗଳା ବାହାରେ ବିକ୍ଷୋଭ ପ୍ରଦର୍ଶନ କରାଯାଇଛି । ସେମାନଙ୍କ କହିବା କଥା ଏହି ଅନଲାଇନ୍ ଖେଳକୁ ପ୍ରୋତ୍ସାହିତ କରୁଥିବା ବଡ ବଲିଉଡ ତାରକାମାନେ ଯୁବ ପିଢିଙ୍କୁ ବିଭ୍ରାନ୍ତ କରୁଛନ୍ତି । ବଲିଉଡ ତାରକାମାନେ ଏହା ମଧ୍ୟ ଜାଣନ୍ତି ଯେ ଏହା ଭୁଲ, କିନ୍ତୁ ସେମାନେ ଟଙ୍କା ପାଉଛନ୍ତି ତେଣୁ ସେମାନେ ଏହାକୁ ପ୍ରୋତ୍ସାହିତ କରୁଛନ୍ତି । ଏହି ବିଜ୍ଞାପନଗୁଡିକ ବନ୍ଦ କରିବାକୁ ବିକ୍ଷୋଭକାରି ଦାବି କରିଛନ୍ତି । ବାନ୍ଦ୍ରାସ୍ଥିତ ଶାହରୁଖ ଖାନଙ୍କ ଘର ମନ୍ନତ ବାହାରେ ପୋଲିସ ମୁତୟନ କରାଯାଇଥିଲା ।
ପ୍ରାୟ 4-5 ଜଣଙ୍କୁ ମଧ୍ୟ ପୋଲିସ ଗିରଫ ମଧ୍ୟ କରିଥିଲା ପୋଲିସ । ଏବେ ଯୁବପୀଢ଼ି ଖେଳକୁଦ କରିବା ତଥା ବୁଲାବୁଲି କରିବା ଅପେକ୍ଷା ଘରେ ଭିଡ଼ିଓ ଗେମ୍ ଖେଳିବା ପାଇଁ ଅଧିକ ପସନ୍ଦ କରୁଛନ୍ତି । ପିଲାଙ୍କ ମଧ୍ୟରେ ବଢୁଛି ଅନଲାଇନ ଗେମର କ୍ରେଜ । ବିଭିନ୍ନ ପ୍ରକାର କଂପ୍ୟୁଟର ଗେମରେ ଅଧିକ ସମୟ ବିତାଉଛନ୍ତି ଯୁବପିଢି । ଆଉଟଡୋର ଗେମ ଅପେକ୍ଷା ଏବଂ କାଉଂଟର ଷ୍ଟ୍ରାଇକ ରେସିଂ ଗେମ୍ ଏବଂ ଭାଟିକାନ ସିଟି ଭଳି ଥ୍ରିଡି ଓ ଥ୍ରିଲ ଗେମରେ ପିଲାମାନେ ମନ ଦେଉଛନ୍ତି । ଅତ୍ୟଧିକ ଭିଡିଓ ଗେମ ଖେଳିବା ମାନସିକ ବିକୃତିର କାରଣ ବୋଲି ଏକ ସର୍ଭେରୁ ଜଣାପଡ଼ିଛି । ମୁଖ୍ୟତଃ ଯୁବପୀଢି ମାତ୍ରାଧିକ ଅନଲାଇନ ଗେମ ଖେଳି ମାନସିକ ରୋଗ ସମସ୍ୟା ଦେଖିବାକୁ ମିଳୁଛି । ଏହି ଅନଲାଇନ ଗେମ ପାଇଁ ଅନେକ ଜୀବନ ମଧ୍ୟ ଯାଉଛି । ଅନେକ ସାଇବର ଫ୍ରଡ ମଧ୍ୟ ଏହି ଅନଲାଇନ ଗେମ ମାଧ୍ୟମରେ ହେଉଛି । ଯୁବପିଢିଙ୍କୁ ଅବାଟକୁ ମଧ୍ୟ ନେଉଛି ଏହି ଅନଲାଇନ ଗେମ । ଯେଉଁଥିପାଇଁ ଏହାକୁ ଅନେକ ସମୟରେ ବିରୋଧ ମଧ୍ୟ କରାଯାଇ ଆସୁଛି ।
ଭାରତୀୟ ଲୋକ ପ୍ରଶାସନ ସଂସ୍ଥାନ, ନୂଆ ଦିଲ୍ଲୀ ଏବଂ ଗୋପବନ୍ଧୁ ପ୍ରଶାସନିକ ଏକାଡେମୀ ମଧ୍ୟରେ ବୁଝାମଣାପତ୍ର ସ୍ୱାକ୍ଷରିତ
ନନ୍ଦିଘୋଷ ବ୍ୟୁରୋ: ଭାରତୀୟ ଲୋକ ପ୍ରଶାସନ ସଂସ୍ଥାନ (ଆଇଆଇପିଏ), ନୂଆଦିଲ୍ଲୀ ଏବଂ ଓଡ଼ିଶା ସରକାରଙ୍କ ଗୋପବନ୍ଧୁପ୍ରଶାସନିକ ଏକାଡେମୀ (ଜିଏଏ) ମଧ୍ୟରେ ଏକ ବୁଝାମଣାପତ୍ର ଶୁକ୍ରବାର ସ୍ୱାକ୍ଷରିତ ହୋଇଯାଇଛି । ଏହିଦୁଇ ଅନୁଷ୍ଠାନ ମଧ୍ୟରେ ଏକ ସହଯୋଗୀ ଢାଞ୍ଚା ପ୍ରତିଷ୍ଠା କରିବା ପାଇଁ ଜିଏଏର ମହାନିର୍ଦ୍ଦେଶକ ରାଜକୁମାର ଶର୍ମା ଆଇଆଇପିଏର ମହାନିର୍ଦ୍ଦେଶକ ସୁରେନ୍ଦ୍ରନାଥତ୍ରି ପାଠୀଙ୍କ ସହ ପର୍ଯ୍ୟାୟ କ୍ରମେ ଆଲୋଚନା କରିଥିଲେ । ଫଳ ସ୍ୱରୂପ ଏହି ବୁଝାମଣାପତ୍ର ସ୍ୱାକ୍ଷରିତ ହୋଇଛି । ମିଳିତ ଦୂରଦୃଷ୍ଟି ଏବଂ ନିରନ୍ତର ପ୍ରୟାସ ଉଭୟ ଅନୁଷ୍ଠାନର ଶିକ୍ଷାଦାନ ଏବଂ ଶିକ୍ଷଣ ଅଭିଜ୍ଞତାର ଗୁଣବତ୍ତା ବୃଦ୍ଧି କରିବ । ସମସ୍ତ ସମ୍ଭାବ୍ୟ ପାରସ୍ପରିକ ସହଯୋଗ ଓ ସୁଯୋଗ ଥିବା ବିଭିନ୍ନ କ୍ଷେତ୍ରରେ ରାଜ୍ୟ ତଥା ଦେଶରେ ପ୍ରଶିକ୍ଷଣ ଇକୋ-ସିଷ୍ଟମ୍ ର କ୍ଷମତା ବୃଦ୍ଧିରେ ଏହା ସହାୟକ ହେବ। ଏହି ସହଯୋଗ ରାଜ୍ୟର ସରକାରୀ କର୍ମଚାରୀଙ୍କ ଜ୍ଞାନ, ମନୋଭାବ ଓ ଦକ୍ଷତାରେ ଉନ୍ନତି ଆଣିବା ସହ ସୁଶାସନର ଗତିରେ ଗଠନମୂଳକ ପ୍ରଭାବ ପକାଇବ ।
ମିଳିମିଶି ଚଳୁ କଲେ କୋଟିଏରୁ ଉର୍ଦ୍ଧ୍ବ ଟଙ୍କା
ଢ଼େଙ୍କାନାଳ: ମିଳିମିଶି ଚଳୁ କଲେ କୋଟିଏରୁ ଉର୍ଦ୍ଧ୍ବ ଟଙ୍କା । ଷ୍ଟ୍ରିଟ ଲାଇଟ୍ କିଣା ସହ ହୋଲଡିଂ ଟ୍ୟାକ୍ସ ଓ ଅନ୍ୟାନ୍ୟ କାର୍ଯ୍ୟ ବାବଦରେ ବ୍ୟୟ ହୋଇଥିବା ଅର୍ଥର ନାହିଁ ହିସାବ । ଅଡିଟିରୁ ଧରା ପଡ଼ିଲା ସ୍ଥାନୀୟ ସରକାରୀ ବାବୁ ମାନଙ୍କ ମହା ଗୁମର । ଯାହାକୁ ନେଇ ଡେଙ୍କାନାଳ ପୌର କାର୍ଯ୍ୟାଳୟରେ ରେଡ୍ କରିଛି ଭିଜିଲାନ୍ସ ।
ଖୋଲିଲା ଢେଙ୍କାନାଳ ପୌର କର୍ମଚାରୀଙ୍କ ଅସଲ ମୁଖା । ଉନ୍ନତିକରଣ ନାଁରେ ଚଳୁ କରିଦେଇଛନ୍ତି କୋଟିଏରୁ ଉର୍ଦ୍ଧ ଟଙ୍କା । ସରକାରୀ ଅର୍ଥକୁ ଆତ୍ମସାତ କରି ଫେରାର କର୍ମଚାରୀ । ତଦନ୍ତ ପାଇଁ କାର୍ଯ୍ୟାଳୟରେ ଭିଜିଲାନ୍ସ ।….୨୦୨୦-୨୧ ଓ ୨୦୨୧-୨୨ରେ ଢେ଼ଙ୍କାନାଳ ପୌର ସଂସ୍ଥାର ପ୍ରମୁଖ ରାସ୍ତା ,ବିଭିନ୍ନ ଓ୍ବାର୍ଡରେ ଷ୍ଟ୍ରିଟ ଲାଇଟ୍ ଲାଗିବା ସହ ଅନ୍ୟାନ୍ୟ କାର୍ଯ୍ୟ କରାଯାଇଥିଲା । ୨୦୨୨ରେ ଏହି ସବୁ କାର୍ଯ୍ୟରେ ଖର୍ଚ୍ଚ ନେଇ ଅଡିଟ ବେଳେ ୯ ଲକ୍ଷ ଟଙ୍କା ଦୁର୍ନୀତି ହୋଇଥିବା ଓ ଏଥିରେ ଜଣେ କର୍ମଚାରୀଙ୍କ ସଂପୃକ୍ତି ଥିବା ଜଣା ପଡିଥିଲା । ପରେ ସହରାଞ୍ଚଳରେ ବିଭିନ୍ନ ପ୍ରକଳ୍ପ ନିର୍ମାଣ ପାଇଁ ହୋଇଥିବା ଟେଣ୍ଡର ପ୍ରକ୍ରିୟାରେ ସାମିଲ ହୋଇଥିବା ଠିକାଦାରମାନେ ଆଇଡି ବାବଦ ଜମା କରିଥିବା ୫୧ ଲକ୍ଷ ଟଙ୍କା ପୌର ସଂସ୍ଥା ଆକାଉଁଣ୍ଟରେ ପୈଠ ହୋଇ ନଥିବା ପଦାକୁ ଆସିଥିଲା । ଏହାକୁ ମଧ୍ୟ କୌଶଳ କ୍ରମେ ହଡ଼ପ କରା ଯାଇଥିବା ଅଭିଯୋଗ ହୋଇଥିଲା । ଲାଇଟ୍ କିଣା ବାବଦରେ ଯୋଗାଣକାରୀ ସଂସ୍ଥା ଦାଖଲ କରିଥିବା ୧୭ ଲକ୍ଷ ୫୦ ହଜାର ଟଙ୍କା ମଧ୍ୟ ଫାଇଲରେ ଚଢି ନଥିବା ଜଣା ପଡ଼ିଛି । ସହରରେ ଲୋକ ମାନଙ୍କୁ ଠାରୁ ଆଦାୟ ହୋଇଥିବା ହୋଲଡିଂ ଟ୍ୟାକ୍ସ ଓ ଅନ୍ୟାନ୍ୟ କର ବାବଦ ୫୦ ଲକ୍ଷ ଟଙ୍କାର ବି ହିସାବ ମିଳୁ ନାହିଁ ।
ଅଡିଟରେ ୨୦୨୨ ଡିସେମ୍ବରରୁ ୨୦୨୩ ମାର୍ଚ୍ଚ ୨୫ ଯାଏ ଖୋଲତାଡ଼ କରା ଯାଇଥିଲା । ଗତ ମେ ମାସ ୧୨ ତାରିଖରେ ଏହାର ରିପୋର୍ଟ ଦାଖଲ କରାଯାଇଥିଲା । ଷ୍ଟକ ରେଜିଷ୍ଟର ଯାଞ୍ଚ ସମୟରେ ମଧ୍ୟ ୧୦ଟି ମନି ରିସିପ୍ଟ ଗାଏବ ରହିଚି ବୋଲି ଜଣା ପଡିଥିଲା । ଏହାପରେ ପୌର କାର୍ଯ୍ୟାଳୟରେ ଚଢାଉ କରିଛି ଭିଜିଲାନ୍ସ । ଘଟଣାକୁ ଗୁରୁତ୍ବର ସହ ନେଇ ଫାଇଲ ଓ କିଛି କାଗଜ ପତ୍ରକୁ ଜବତ କରାଯାଇଛି । ତଦନ୍ତ ଆରମ୍ଭ ପରଠୁ ନିର୍ବାହୀ ଅଧିକାରୀ, ଅନ୍ୟ କିଛି କର୍ମଚାରୀ ଲମ୍ବା ଛୁଟିରେ ଅଛନ୍ତି । ଯାହାକୁ ନେଇ ଭିଜିଲାନ୍ସ ତଦନ୍ତରେ ବାଧା ସୃଷ୍ଟି ହୋଇଛି । ଘଟଣାର ନିରପେକ୍ଷ ତଦନ୍ତ ପାଇଁ ବୁଦ୍ଧିଜୀବୀ ଦାବି କରିଛନ୍ତି ।
କଲବଲ କରିବ ଗୁଳୁଗୁଳି!
ଭୁବନେଶ୍ବର: ଆସନ୍ତା ୫ ଦିନ ପର୍ଯ୍ୟନ୍ତ ରାଜ୍ୟରେ ନାହିଁ ବର୍ଷା । ରାଜ କରିବ ଗରମ ଗୁଳୁଗୁଳି । ଉପାନ୍ତରୁ ଉପକୂଳ ସବୁଠି ଜାରି ରହିବ ଏଭଳି ସ୍ଥିତି । ମୌସୁମୀ ଦୁର୍ବଳ ହେବା ପରେ ସାରା ଓଡ଼ିଶାରେ ବଦଳିଛି ପାଣିପାଗର ମିଜାଜ୍ । ଅଧିକାଂଶ ଜିଲ୍ଲାରେ ସ୍ବାଭାବିକ ତୁଳନାରେ ୪ ରୁ ୫ ଡିଗ୍ରୀ ପର୍ଯ୍ୟନ୍ତ ବଢିଛି ପାରଦ । ୩୧ ତାରିଖ ପରେ ପୁଣି ବଦଳିବ ପାଗ । ବଙ୍ଗୋପସାଗରରେ ସୃଷ୍ଟି ହେବ ଲଘୁଚାପ । ପ୍ରଭାବରେ ଅଗଷ୍ଟ ୫ ତାରିଖ ପର୍ଯ୍ୟନ୍ତ ପୁଣି ଭିଜିବ ଓଡ଼ିଶା । ବିଶେଷ କରି ଉତ୍ତର ଉପକୂଳ ସହ ଦକ୍ଷିଣ ଆଭ୍ୟନ୍ତରୀଣ ଓଡ଼ିଶାରେ ପ୍ରବଳ ବର୍ଷା ସମ୍ଭାବନା ରହିଛି । ସେପଟେ ଜୁନ୍ ୧ ତାରିଖରୁ ଆଜି ପର୍ଯ୍ୟନ୍ତ ରାଜ୍ୟରେ ସ୍ବାଭାବିକ ଠାରୁ ୧୦ ପ୍ରତିଶତ ନିଅଣ୍ଟିଆ ବର୍ଷା ରେକର୍ଡ ହୋଇଛି । ୫ ଦିନ ପର୍ଯ୍ୟନ୍ତ ମିଳିବନି ନିସ୍ତାର । କାଁ ଭାଁ ସ୍ଥାନରେ ଘଡଘଡି ବିଜୁଳି ସହ ବର୍ଷା ସମ୍ଭାବନା । ୩୧ ତାରିଖ ପରେ ବଦଳିବ ପାଗ । ପ୍ରଭାବରେ ପୁଣି ଭିଜିବ ଓଡ଼ିଶା । ଖରା ବର୍ଷାର ଲୁଚକାଳୀ ଖେଳ ମଧ୍ୟରେ ରାଜ୍ୟରେ ରାଜ୍ କରୁଛି ତାତି । ଉପକୂଳ ଓଡ଼ିଶା ସମେତ ଆଭ୍ୟନ୍ତରୀଣ ଓଡ଼ିଶାରେ ଏବେ ସ୍ବାଭାବିକ ଠାରୁ ଅଧିକ ରହୁଛି ତାପମାତ୍ରା । ରାଜଧାନୀ ଭୁବନେଶ୍ବରରେ ୩୦ ରୁ ୩୨ ଡିଗ୍ରୀ ତାପମାତ୍ରା ସ୍ବାଭାବିକ ଥିବା ବେଳେ ଏବେ ୩୫ ରୁ ୩୬ ଡିଗ୍ରୀ ମଧ୍ୟରେ ରହୁଛି । ଆସନ୍ତା ୫ ଦିନ ପର୍ଯ୍ୟନ୍ତ ଏଭଳି ପାଗ ଜାରି ରହିବ ବୋଲି ଆକଳନ କରିଛନ୍ତୁ ପାଣିପାଗ ବିଶେଷଜ୍ଞ ସୁରେନ୍ଦ୍ରନାଥ ପଶୁପାଳକ ।