ନୂଆଦିଲ୍ଲୀ: ସ୍ବାଧୀନତା ସଂଗ୍ରାମରେ ମହିଳାଙ୍କ ଅବଦାନ ଅନନ୍ୟ । ମହିଳାମାନେ ରାଷ୍ଟ୍ର ଗୌରବ ବଢାଇଛନ୍ତି । ଦେଶରେ ମହିଳାଙ୍କ ଆର୍ଥିକ ସଶକ୍ତିକରଣକୁ ପ୍ରାଧାନ୍ୟ ଦିଆଯାଉଛି । ଭାରତ ଗଣତନ୍ତ୍ରର ଜନନୀ ବୋଲି କହିଛନ୍ତି ରାଷ୍ଟ୍ରପତି ଦ୍ରୌପଦୀ ମୁର୍ମୁ । ସ୍ବାଧୀନତା ଦିବସର ଅବ୍ୟବହିତ ପୂର୍ବରୁ ଦେଶବାସୀଙ୍କ ଉଦ୍ଦେଶ୍ୟର ଭାଷଣ ଦେଇ ରାଷ୍ଟ୍ରପତି କହିଛନ୍ତି- ଆମର ପରିଚୟ ମହାନ ଦେଶର ନାଗରିକ ।

ନିଜ ଅଭିଭାଷଣ ଆରମ୍ଭ କରି ରାଷ୍ଟ୍ରପତି କହିଛନ୍ତି, ”ଏହା ଆମ ସମସ୍ତଙ୍କ ପାଇଁ ଏକ ଗୌରବମୟ ଓ ଶୁଭ ଅବସର । ସାଂପ୍ରତିକ ପରିବେଶରୁ ଏହି ଉତ୍ସବ ପାଳନର ଖୁସି ଓ ଆଗ୍ରହ ଦେଖି ମୁଁ ଅତ୍ୟନ୍ତ ଆନନ୍ଦିତ । ଆମ ଗାଁରୁ ସହର ଯାଏ ପିଲାଙ୍କଠୁ ଆରମ୍ଭ କରି ଯୁବବର୍ଗ ଓ ନାଗରିକମାନେ ସମସ୍ତେ ଯେଉଁ ଆନନ୍ଦ, ଉତ୍ସାହ ଓ ଆଗ୍ରହର ସହିତ ଆମ ସ୍ୱାଧୀନତା ଉତ୍ସବକୁ ପାଳନ କରିବାକୁ ପ୍ରସ୍ତୁତ ହେଉଛନ୍ତି ତାହା ଅତ୍ୟନ୍ତ ଚିତ୍ତାକର୍ଷକ । ତାହା ଦେଖିବା ଆମ ସମସ୍ତଙ୍କ ପାଇଁ ଗର୍ବ ଓ ଗୌରବର ବିଷୟ । ଦେଶବାସୀ ଆଜାଦୀ କା ଅମୃତ ମହୋତ୍ସବକୁ ବେଶ୍ ଧୁମଧାମରେ ପାଳନ କରୁଛନ୍ତି । ସ୍ୱାଧୀନତା ଦିବସ ପାଳନ ମଧ୍ୟ ମୋ ପିଲାଦିନର କଥା ମନେ ପକାଇ ଦେଉଛି । ଆମ ଗାଁ ସ୍କୁଲରେ ସ୍ୱାଧୀନତା ଦିବସ ଉତ୍ସବ ପାଳନର ଭାର ନେବାକୁ ଆଗ୍ରହ ଓ ଇଚ୍ଛାକୁ ଆମେ ରୋକି ପାରୁନଥିଲୁ ।

ଯେତେବେଳେ ତ୍ରିରଙ୍ଗା ପତାକା ଉତ୍ତଳୋନ ହେଉଥିଲା ସେତେବେଳେ ଏକ ବୈଦୁତିକ ଶକ୍ତି ଆମ ଶରୀରରେ ପ୍ରବାହିତ ହେବା ପରି ଅନୁଭୂତ ହେଉଥିଲା । ଦେଶପ୍ରେମର ଗର୍ବ ଓ ଗୌରବରେ ପରିପୂର୍ଣ୍ଣ ଆମ ହୃଦୟକୁ ନେଇ ଆମ ଜାତୀୟ ପତାକାକୁ ସାଲ୍ୟୁଟ କରି ଦେଶାତ୍ମକ ବୋଧକ ସଙ୍ଗୀତ ଗାନ କରୁଥିଲୁ । ଏହା ଆମ ମନରେ ଅନେକ ଦିନ ଧରି ରହୁଥିଲା । ମୁଁ ଯେତେବେଳେ ଜଣେ ସ୍କୁଲ ଶିକ୍ଷକ ହେଲି ସେତେବେଳେ ପିଲାଦିନର ସ୍ମୃତିକୁ ପୁନଃ ଜାଗରିତ କରିବାର ସୁଯୋଗ ମୋତେ ମିଳିଲା ଏବଂ ସେଥିପାଇଁ ମୁଁ ନିଜକୁ ଭାଗ୍ୟବତୀ ମନେ କରେ । ଏ ମହାନ୍ ଗଣତନ୍ତ୍ରର ଅଂଶବିଶେଷ ଭାବେ ଆମେ ଆମ ସ୍ୱାଧୀନତା ଦିବସ ପାଳନ କରୁଛୁ ଏହା ସତ୍ୟ । ଆମ ପ୍ରତ୍ୟେକଙ୍କର ଅନେକ ପରିଚୟ ରହିଛି । ଜାତି, ପନ୍ଥ, ଭାଷା ଓ ଅଞ୍ଚଳ ନିର୍ବିଶେଷରେ ଆମେ ଆମ ପରିବାର ଓ ବୃତି ସହ ସମ୍ପୃକ୍ତ ।

ମାତ୍ର ଏସବୁ ସତ୍ତ୍ୱେ ଆମ ସମସ୍ତଙ୍କର ଗୋଟିଏ ପରିଚୟ ହେଲା ଆମେ ସମସ୍ତେ ଭାରତୀୟ ଓ ଭାରତର ନାଗରିକ । ଆମ ମଧ୍ୟରୁ ପ୍ରତ୍ୟେକ ନାଗରିକ ଦେଶ ଆଗରେ ସମାନ । ୧୯୪୭ ଅଗଷ୍ଟ ୧୫ ତାରିଖରେ ଭାରତରେ ଏକ ନୂତନ ସୂର୍ଯ୍ୟୋଦୟ ହେଲା । ଆମେ ବିଦେଶୀ ଶାସନରୁ କେବଳ ମୁକ୍ତି ପାଇଲୁ ନାହିଁ, ଆମ ଭାଗ୍ୟ ଲେଖିବାର ସ୍ୱାଧୀନତା ମଧ୍ୟ ଆମକୁ ମିଳିଲା । ଆମ ସ୍ୱାଧୀନତା ସହିତ ଅନେକ ଉପନିବେଶରୁ ବିଦେଶୀ ଶାସକମାନେ ହଟିବାକୁ ଲାଗିଲେ । ଆମ ସ୍ୱାଧୀନତାର ସ୍ୱାତନ୍ତ୍ର୍ୟ ହେଲା ଏହାର ଲକ୍ଷ୍ୟ କେବଳ ହାସଲ ହୋଇନାହିଁ, ଆମେ ବରଂ କିଭଳି ଏହି ମୁକ୍ତି ସଂଗ୍ରାମରେ ଲଢ଼ିଲୁ ତାହାର ଗୁରୁତ୍ୱ ପ୍ରତିପାଦିତ ହେଲା । ମହାତ୍ମା ଗାନ୍ଧୀଙ୍କ ନେତୃତ୍ୱରେ ମହାନ ମୁକ୍ତି ସଂଗ୍ରାମ ଓ ଦେଶଭକ୍ତମାନେ ଏକାଠି ହୋଇ ଏହି ସଂଗ୍ରାମକୁ ଏକ ଅନୁପମ ଆଦର୍ଶ ଢାଞ୍ଚା ପ୍ରଦାନ କରିଥିଲେ ।

ସେହି ନୀତି ଓ ଆଦର୍ଶ ଉପରେ ଦେଶରେ ସ୍ୱାଧୀନତା ସଂଗ୍ରାମ ହୋଇଥିଲା । ଗାନ୍ଧିଜୀ ଓ ଅନ୍ୟମାନେ ଭାରତ ମାତାର ଆତ୍ମାକୁ ପୁନଃ ପ୍ରଜ୍ଜ୍ୱଳିତ କଲେ । ସ୍ୱାଧୀନତା ଦିବସର ଅବ୍ୟବହିତ ପୂର୍ବରୁ ମୁଁ ଆମର ସେହି ଜ୍ଞାତ ଓ ଅଜ୍ଞାତ ସ୍ୱାଧୀନତା ସଂଗ୍ରାମୀମାନଙ୍କ ପ୍ରତି ଦେଶବାସୀଙ୍କ ସହିତ ମୋର ଶ୍ରଦ୍ଧା ଓ ସମ୍ମାନ ଅର୍ପଣ କରୁଛି । ସେମାନଙ୍କ ଯୋଗୁଁ ଭାରତ ବିଶ୍ୱ ଦରବାରରେ ଉପଯୁକ୍ତ ସ୍ଥାନ ପାଇବାର ଆଜି ସମର୍ଥ ହୋଇଛି । ମାତଙ୍ଗନୀ ହାଜରା ଓ କନକଲତା ବରୁଆଙ୍କ ଭଳି ମହାନ ମହିଳା ମୁକ୍ତି ସଂଗ୍ରାମୀମାନେ ଭାରତ ମାତାଙ୍କ ପାଇଁ ନିଜର ପ୍ରାଣବଳୀ ଦେଇଥିଲେ । ମା କସ୍ତୁରବା ଜାତିର ପିତାଙ୍କ ସହ ତାଳ ମିଳାଇ ସତ୍ୟାଗ୍ରହର ବନ୍ଧୁର ପଥରେ ଆଗକୁ ବଢ଼ିଥିଲେ ।

ସରୋଜିନୀ ନାଇଡୁ, ଅମ୍ମୁ ସ୍ୱାମୀନାଥନ, ରମାଦେବୀ, ଅରୁଣା ଆଶଫ ଅଲ୍ଲୀ ଓ ସୁଚେତା କୃପାଳିନୀଙ୍କ ଭଳି ଅନେକ ମହାନ ମହିଳା ଭବିଷ୍ୟତର ମହିଳା ପିଢିଙ୍କ ପାଇଁ ସେବା, ତ୍ୟାଗ ଓ ଦେଶଭକ୍ତିର ଉଚ୍ଚ ପ୍ରେରଣାଦାୟୀ ଆଦର୍ଶ ଛାଡିଗଲେ । ସେହି ଆଦର୍ଶରେ ଅନୁପ୍ରାଣିତ ହୋଇ ଆତ୍ମବିଶ୍ୱାସର ସହିତ ଦେଶ ମହିଳାମାନେ ରାଷ୍ଟ୍ର ଓ ସମାଜ ପାଇ କାମ କରିପାରିବେ । ମହିଳାମାନଙ୍କ ସେବା ଓ ଅବଦାନ ଫଳରେ ଦେଶର ଗରିମା ବୃଦ୍ଧି ପାଉଛି । ଅଳ୍ପ କେଇ ଦେଶକ ତଳେ ଯେଉଁସବୁ କ୍ଷେତ୍ରରେ ମହିଳାମାନଙ୍କର ପ୍ରବେଶ କଳ୍ପନାତୀତ ଥିଲା ଏବେ ସେଠାରେ ନାରୀମାନେ ଚମତ୍କାର ସଫଳତା ହାସଲ କରୁଛନ୍ତି । ମୁଁ ଆନନ୍ଦର ସହ କହୁଛି ଯେ ଆମ ଦେଶରେ ମହିଳାମାନଙ୍କ ଆର୍ଥିକ ସଶକ୍ତିକରଣକୁ ସ୍ୱତନ୍ତ୍ର ଗୁରୁତ୍ୱ ପ୍ରଦାନ କରାଯାଉଛି । ଆର୍ଥିକ ସଶକ୍ତିକରଣ ପରିବାର ଓ ସମାଜରେ ମହିଳାମାନଙ୍କ ସ୍ଥିତି ସୁଦୃଢ କରେ ।

ମହିଳା ସଶକ୍ତିକରଣକୁ ପ୍ରାଧାନ୍ୟ ଦେବାକୁ ମୁଁ ସବୁ ନାଗରିକଙ୍କୁ ଆହ୍ୱାନ ଦଜଣାଉଛି । ଆମ ଇତିହାସ ପୁନଃ ସଂଯୁକ୍ତ ହେବା ପାଇଁ ସ୍ୱାଧୀନତା ଦିବସ ଏକ ଅବସର । ଏହା ମଧ୍ୟ ବର୍ତ୍ତମାନର ସ୍ଥିତିକୁ ଆକଳନ କରି ଭବିଷ୍ୟତର କର୍ମପନ୍ଥା ନିର୍ଦ୍ଧାରଣ କରିବାର କ୍ଷଣ । ବର୍ତ୍ତମାନ ଦେଖିଲେ ଆମକୁ ଦେଖାଯାଏ ଯେ ଭାରତ କେବଳ ବିଶ୍ୱ ମଞ୍ଚରେ ତାହାର ଯଥାର୍ଥ ସ୍ଥାନ ଫେରି ପାଇନାହିଁ, ଆମ ଦେଶ ବରଂ ଆନ୍ତର୍ଜାତିକ ସ୍ତରରେ ତାହାର ସ୍ଥିତି ଓ ପ୍ରଭାବକୁ ବଢ଼ାଇ ପାରିଛି । ସମଗ୍ର ବିଶ୍ୱରେ ମାନବୀୟ ଓ ବିକାଶ ସଂକ୍ରାନ୍ତ ଲକ୍ଷ୍ୟ ହାସଲ ପାଇଁ ଭାରତ ଏକ ଗୁରୁତ୍ୱପୂର୍ଣ୍ଣ ଭୂମିକା ନିର୍ବାହ କରୁଛି ।

ଜି-୨୦ ସମେତ ବିଭିନ୍ନ ଗୁରୁତ୍ୱପୂର୍ଣ୍ଣ ବୈଶ୍ୱିକ ମଞ୍ଚର ନେତୃତ୍ୱ ଏବେ ଭାରତ ନେଉଛି । ଅନେକ ବୈଶ୍ୱିକ ପ୍ରସଙ୍ଗ ରହିଛି ଯାହା ମାନବ ସମାଜ ପାଇଁ ଚିନ୍ତାର କାରଣ ପାଲଟିଛି । ଏସବୁ ଘଟଣା ଏକ ନର୍ଦ୍ଧିଷ୍ଟ ଭୌଗଳିକ ଅଞ୍ଚଳ ମଧ୍ୟରେ ସୀମାବଦ୍ଧ ନୁହେଁ । ମୋର ଦୃଢ଼ ବିଶ୍ୱାସ ଯେ ଭାରତ ବୈଶ୍ୱିକ ପ୍ରସଙ୍ଗରେ ତାହାର ନେତୃତ୍ୱର ପରାକାଷ୍ଠା ବଳରେ ପ୍ରମୁଖ ଓ ପ୍ରଭାବଶାଳୀ ରାଷ୍ଟ୍ରମାନଙ୍କୁ ଏକାଠି କରି ଏସବୁର ସ୍ଥାୟୀ ସମାଧାନ ପାଇଁ ବାଟ ବାହାରିପାରିବ । ସଶକ୍ତ ହେବାର ବିଚାର ସହିତ ଏହି ଉତ୍ସାହ ପ୍ରକାଶ ପାଇବା ସ୍ୱାଭାବିକ, କାରଣ ଆମ ଦେଶ ସବୁ କ୍ଷେତ୍ରରେ ବେଶ୍ ଉଲ୍ଲେଖନୀୟ ଅଗ୍ରଗତି କରିଛି ।

ଭାରତର ଅର୍ଥନୀତି କେବଳ ସୁଦୃଢ଼ ହୋଇନାହିଁ ମହାମାରୀର ଅସ୍ଥିର ସମୟରେ ଏହା ଅନ୍ୟ ଦେଶଙ୍କ ପାଇଁ ପଥ ପ୍ରଦର୍ଶକ ସାଜିଛି । ଭାରତ ମହାମାରୀ ସୟର ସମସ୍ୟାବଳୀକୁ ବେଶ୍ ଦକ୍ଷତାର ସହିତ ସୁଯୋଗରେ ପରିଣତ କରିପାରିଥିଲା । ଏହା ଫଳରେ ଅସ୍ଥିର ସମୟରେ ଆମେ ନିରାପଦରେ ଆମ ଲକ୍ଷ୍ୟ ହାସଲ କରିପାରିଲୁ । ବୈଶ୍ୱିକ ସ୍ତରରେ ମୁଦ୍ରାସ୍ଫୀତି ଏବେ ଚିନ୍ତାର କାରଣ ପାଲଟିଛି । ମାତ୍ର ଭାରତରେ ଉଭୟ କେନ୍ଦ୍ର ଓ ରିଜର୍ଭ ବ୍ୟାଙ୍କ ମିଳିତଭାବେ ମୁଦ୍ରାସ୍ଫୀତିକୁ ନିୟନ୍ତ୍ରଣରେ ରଖିବାକୁ ସଫଳ ହୋଇଛନ୍ତି । ଭାରତର ଅର୍ଥନୀତିକ ପ୍ରଗତି ପଛରେ ଏହାର ଜନତାଙ୍କ ସ୍ୱପ୍ନ ଶକ୍ତି କାମ କରୁଛି । ବିଶେଷକରି ଦେଶର ଯୁବପିଢି ପାଇଁ ଅସୀମ ସୁଯୋଗ ଓ ସୁବିଧା ଦିଆଯାଇଛି । ଷ୍ଟାର୍ଟଅପ୍ ଠାରୁ କ୍ରୀଡ଼ା ପର୍ଯ୍ୟନ୍ତ ସବୁ କ୍ଷେତ୍ରରେ ଆମ ଯୁବବର୍ଗ ଉତ୍କର୍ଷର ନୂଆ ଦିଗବଳୟ ଆବିଷ୍କାର କରିଛନ୍ତି ।

ଆଜିର ନବଭାରତର ଆକାଂକ୍ଷାଗୁଡ଼ିକ ସକାଶେ ନୂଆ ଦିଗସବୁ ଅସୀମ । ଭାରତୀୟ ମହାକାଶ ସଂଗଠନ ନୂଆ ସୋପାନ ଛୁଇଁଛି ଏବଂ ବିଚକ୍ଷଣତାର ଉତ୍କର୍ଷ ସ୍ଥାପନ କରିଛି । ଚଳିତ ବର୍ଷ ଚନ୍ଦ୍ରଯାନ-୩ ମହାକାଶକୁ ଛଡ଼ାଯାଇଛି, ଯାହା ଚନ୍ଦ୍ର କକ୍ଷପଥରେ ପ୍ରବେଶ କରିପାରିଛି । ଏହାର ବିକ୍ରମ ନାମକ ଲ୍ୟାଣ୍ଡର ଓ ପ୍ରଜ୍ଞାନ ନାମକ ରୋଭର ଆଉ କିଛି ଦିନ ପରେ ଚନ୍ଦ୍ରର ପୃଷ୍ଠରେ ଅବତରଣ କରିବ । ଏହା ଆମ ସମସ୍ତଙ୍କ ପାଇଁ ଗୌରବର ମୂହୁର୍ତ୍ତ ହେବ । ଜ୍ଞାନ ବିଜ୍ଞାନରେ ଉତ୍କର୍ଷ ଲାଭ କରିବା ଆମର ଲକ୍ଷ୍ୟ ନୁହେଁ, ଆମ ପାଇଁ ସବୁ ଲୋକଙ୍କର ବିକାଶ ଓ ସାଧନର ଲକ୍ଷ୍ୟ ରହିଛି । ଜଳବାୟୁ ପରିବର୍ତ୍ତନ କ୍ଷେତ୍ର ଏମିତ ଏକ କ୍ଷେତ୍ର ଯାହା ଉପରେ ସାରା ବିଶ୍ୱର ବୈଜ୍ଞାନିକ ଓ ନୀତି ନିର୍ଦ୍ଧାରକମାନଙ୍କର ଅଧିକ ଧ୍ୟାନ ଦେବାର ଆବଶ୍ୟକତା ରହିଛି । ପାଣିପାଗ ଅସ୍ଥିରତା ଯୋଗୁ ସମସତେ ପ୍ରଭାବିତ ହେଉଛନ୍ତି, କିନ୍ତୁ ଏହି ପ୍ରଭାବ ଗରିବ ଓ ଅବହେଳିତମାନଙ୍କ ଉପରେ ଅଧିକ ପଡୁଛି । ସହର ଓ ପାହାଡିଆ ଇଲାକାକୁ ଜଳବାୟୁ ପରିବର୍ତ୍ତନ ସ୍ଥିତିର ମୁକାବିଲା କରିବା ନିମନ୍ତେ ବିଶେଷ ଭାବେ ସମର୍ଥ କରିବାକୁ ପଡ଼ିବ ।

ଆମେ ଆମର ଲୋଭ ବୃଦ୍ଧି ଯୋଗୁଁ ଆମ ସାଂସ୍କୃତିକ ଦୁନିଆଠାରୁ ପ୍ରକୃତିକୁ ଦୂରେଇ ନେଉଛେ ବୋଲି ମୁଁ କହିବି ଏବଂ ଏବେ ଆମେ ଅନୁଭବ କଲେଣି ଯେ ଆମକୁ ମୂଳକୁ ପୁଣି ଫେରିବାକୁ ପଡ଼ିବ । ଅନେକ ଜନଜାତି ସମ୍ପ୍ରଦାୟ ଅଛନ୍ତି, ଯେଉଁମାନେ କି ପ୍ରକୃତି ସହ ଅତି ନିବିଡ ଏବଂ ପ୍ରକୃତି ସହ ସୌହାର୍ଦ୍ଦ୍ୟ ବଜାୟ ରଖି ଜୀବନ ବିତାଉଛନ୍ତି । ସେମାନଙ୍କର ଜୀବନର ମୂଲ୍ୟବୋଧ ଓ ଜୀବନ ଶୈଳୀ ଜଳବାୟୁ କାର୍ଯ୍ୟାନୁଷ୍ଠାନ କ୍ଷେତ୍ରରେ ଅମୂଲ୍ୟ ଶିକ୍ଷା ପ୍ରାଦନ କରୁଛି । ସହନଶୀଳତା ହେଉଛି ସେମାନଙ୍କ ମୁଖ୍ୟ ଅସ୍ତ୍ର । ଆମ ଦେଶ ନୂଆ ସଂକଳ୍ପ ସହ ଅମୃତକାଳରେ ପ୍ରବେଶ କରିଛି । ୨୦୪୭ ମସିହା ସୁଦ୍ଧା ଭାରତକୁ ଏକ ବିକଶିତ ରାଷ୍ଟ୍ରରେ ପରିଣତ କରିବା ପାଇଁ ଦେଶ ଆଗେଇ ଚାଲିଛି ।

ଆସନ୍ତୁ ସମସ୍ତେ ନିଜ ନିଜର ସାମ୍ବିଧାନକି ମୌଳିକ କର୍ତ୍ତବ୍ୟ ନିଭାଇବା ପାଇଁ ପ୍ରତିଜ୍ଞା କରିବା ତଥା ବ୍ୟକ୍ତିଗତ ଓ ସାମୁହିକ ସ୍ତରରେ ସବୁକ୍ଷେତ୍ରରେ ଉତ୍କର୍ଷ ହାସଲ ନିମନ୍ତେ ଆଗକୁ ବଢ଼ିବା ଲାଗି ସବୁ ପ୍ରକାର ଚେଷ୍ଟା କରିବା । ଫଳରେ ଆମ ଦେଶର ନିରନ୍ତର ବିକାଶ ହାସଲ କରିବା ସଙ୍ଗେ ସଙ୍ଗେ ଆମର କର୍ମକୁଶଳତା ଓ ଅଭିଜ୍ଞତାକୁ ନୂଆ ସୋପାନରେ ପହଞ୍ଚାଇପାରିବ । ସମ୍ବିଧାନର ପ୍ରସ୍ତାବନାରେ ଆମ ସ୍ୱାଧୀନତା ସଂଗ୍ରାମର ଆଦର୍ଶ ସ୍ଥାନ ପାଇଛି । କିନ୍ତୁ ଆସନ୍ତୁ ଆମେ ଆମର ରାଷ୍ଟ୍ର ନିର୍ମାତାମାନଙ୍କ ସ୍ୱପ୍ନକୁ ସାକାର କରିବା ପାଇଁ ସଦଭାବନା ଓ ଭାତୃଭାବର ବିଚାର ସହିତ ଆଗକୁ ବଢ଼ିବା । ସ୍ୱାଧୀନତା ଦିବସର ଅବ୍ୟବହିତ ପୂର୍ବରୁ ମୁଁ ପୁଣି ଆପଣମାନଙ୍କୁ ବିଶେଷ କରି ସୀମାରେ ଦେଶକୁ ସୁରକ୍ଷା କରୁଥିବା ଯବାନମାନଙ୍କୁ, ଦେଶର ଆଭ୍ୟନ୍ତରୀଣ ସୁରକ୍ଷାରେ ଥିବା ସବୁ ବାହିନୀ ଏବଂ ପୋଲିସମାନଙ୍କୁ ତଥା ବିଶ୍ୱର ବିଭିନ୍ନ ସ୍ଥାନରେ ରହୁଥିବା ପ୍ରବାସୀ ଭାରତୀୟମାନଙ୍କୁ ଶୁଭେଚ୍ଛା ଜଣାଉଛି । ”