ଭୁବନେଶ୍ୱର: ବ୍ଲାକମେଲର ନେତାଙ୍କ ସପକ୍ଷରେ ଜନବିରୋଧୀ ନେତା । ସୌମ୍ୟରଞ୍ଜନ ପଟ୍ଟନାୟକଙ୍କ ସପକ୍ଷରେ ଗୋପାଳପୁର ବିଧାୟକ ପ୍ରଦୀପ ପାଣିଗ୍ରାହୀଙ୍କ ବୟାନକୁ କଟାକ୍ଷ କରିଛନ୍ତି ପୂର୍ବତନ ଖଣ୍ଡପଡ଼ା ବିଧାୟକ ଅନୁଭବ ପଟ୍ଟନାୟକ । ସୋସିଆଲ ମିଡିଆ ଏକ୍ସରେ ଅନୁଭବ କହିଛନ୍ତି, ଲଗାତାର ଭାବେ ବ୍ଲାକମେଲ୍ କରି ଆସୁଥିବା ଜଣେ ନେତାଙ୍କ ସମର୍ଥନରେ ଆଉ ଜଣେ ଜନବିରୋଧୀ ନେତା ପ୍ରତିକ୍ରିୟା ଦେଇଛନ୍ତି । ଏଥିରେ ଆଶ୍ଚର୍ଯ୍ୟ ହେବାର କିଛି ନାହିଁ । କାରଣ ପ୍ରଦୀପ ପାଣିଗ୍ରାହୀ ଚାକିରି ଦେବାକୁ କହି ଗରିବ ବେକାର ଯୁବକଙ୍କଠାରୁ ଟଙ୍କା ଠକିଥିଲେ । ଆଉ ସୌମ୍ୟରଞ୍ଜନ ନିଜ କର୍ମଚାରୀଙ୍କୁ ଧମକ୍, ନାଲିଆଖି ଦେଖାଇ ସେମାନଙ୍କ ନାଁରେ ଋଣ ଉଠାଇ ନିଜର ସାମ୍ରାଜ୍ୟ ବିସ୍ତାର କରୁଥିଲେ । ଉଭୟ ଜନବିରୋଧୀ ନେତା ନିଜ ସ୍ବାର୍ଥ ପାଇଁ ଏକାଠି ହେବାରେ କିଛି ନୂତନତ୍ବ ନାହିଁ । ଏହା ଅତ୍ୟନ୍ତ ସ୍ବାଭାବିକ କଥା ବୋଲି ଅନୁଭବ କହିଛନ୍ତି ।
ସର୍ବଦଳୀୟ ବୈଠକରେ ଉଠିଲା ମହିଳା ସଂରକ୍ଷଣ ବିଲ୍ ପ୍ରସଙ୍ଗ
ନୂଆଦିଲ୍ଲୀ: ସଂସଦର ସ୍ବତନ୍ତ୍ର ଅଧିବେଶନରେ ମହିଳା ସଂରକ୍ଷଣ ବିଲ୍ ଆଣିବାକୁ ବିଜେଡି ସମେତ ଅନ୍ୟାନ୍ୟ ରାଜନୈତିକ ଦଳର ଦାବି । ଆଜି ଅନୁଷ୍ଠିତ ସର୍ବଦଳୀୟ ବୈଠକରେ ଏହି ଦାବି ଉଠାଇଛନ୍ତି ବିଜେଡି ସାଂସଦ । ବିଜେଡିର ସସ୍ମିତ ପାତ୍ର ଓ ପିନାକୀ ମିଶ୍ର ଏହି ବୈଠକରେ ଯୋଗଦେଇ ଦଳର ଦାବି ଉପସ୍ଥାପନ କରିଛନ୍ତି । ସେପଟେ ଆସନ୍ତାକାଲିଠାରୁ ଆରମ୍ଭ ହେବାକୁ ଥିବା ସଂସଦର ସ୍ବତନ୍ତ୍ର ଅଧିବେଶନକୁ ସୁଚାରୂ ରୂପେ ସମ୍ପାଦନ ଲାଗି ସର୍ବଦଳୀୟ ବୈଠକରେ ହୋଇଛି ଆଲୋଚନା ।
ଆଜିର ଏହି ବୈଠକରେ ଏନଡିଏ ଓ ଇଣ୍ଡିଆ ମେଣ୍ଟର ନେତାମାନେ ସାମିଲ ହୋଇଥିଲେ । ଏହି ବୈଠକରେ ପ୍ରତିରକ୍ଷା ମନ୍ତ୍ରୀ ତଥା ଲୋକସଭାରେ ଉପନେତା ରାଜନାଥ ସିଂ, କେନ୍ଦ୍ରମନ୍ତ୍ରୀ ପୀୟୂଷ ଗୋୟଲ, ସଂସଦୀୟ ବ୍ୟାପାର ମନ୍ତ୍ରୀ ପ୍ରହ୍ଲାଦ ଯୋଶୀ, କଂଗ୍ରେସ ନେତା ଅଧୀର ରଞ୍ଜନ ଚୌଧୁରୀ, ଟିଏମସି ନେତା ଡେରେକ ଓ ବ୍ରିଏନ, ଏନସିପି ନେତା ବନ୍ଦନା ଚଭନ, ନ୍ୟାସନାଲ କନଫରେନ୍ସ ନେତା ଫାରୁକ ଅବଦୁଲ୍ଲା, ଡିଏମକେ ନେତା ଟି. ଶିବା, ଏମଡିଏମକେ ନେତା ଭାଇକୋ ପ୍ରମୁଖ ଉପସ୍ଥିତ ଥିଲେ । ଏହା ସହ ଓ୍ବାଇଆସିପି ନେତା ଭି. ରେଡୀ, ସମାଜବାଦୀ ପାର୍ଟି ନେତା ଏସଟି ହାସନ ବି ଉପସ୍ଥିତ ଥିଲେ ।
ଆସନ୍ତାକାଲିଠୁ ଆରମ୍ଭ ହେବ ସଂସଦର ସ୍ୱତନ୍ତ୍ର ଅଧିବେଶନ
ନୂଆଦିଲ୍ଲୀ: ଆସନ୍ତାକାଲିଠାରୁ ଆରମ୍ଭ ହେବ ସଂସଦର ସ୍ବତନ୍ତ୍ର ଅଧିବେଶନ । ୨୨ ତାରିଖ ଯାଏ ଚାଲିବାକୁ ଥିବା ଏହି ଅଧିବେଶନରେ ସଂସଦର ୭୫ ବର୍ଷର ଇତିହାସ ସମ୍ପର୍କରେ ଆଲୋଚନା ହେବ । ବିଭିନ୍ନ ସଫଳତା, ଅଭିଜ୍ଞତା, ସ୍ମୃତି, ଅନୁଭୂତି ଆଦି ସମ୍ପର୍କରେ ଆଲୋଚନା ହେବ । ଏହା ସହ ଏହି ଅଧିବେଶନରେ ମୁଖ୍ୟ ନିର୍ବାଚନ କମିଶନର ଓ ଅନ୍ୟାନ୍ୟ ନିର୍ବାଚନ କମିଶନର ନିଯୁକ୍ତି ବିଲ୍, ଆଇନଜୀବୀ ସଂଶୋଧନ ବିଲ୍, ପ୍ରେସ ଓ ପଞ୍ଜିକରଣ ବିଲ୍, ଡାକଘର ବିଲ୍, ଉଚ୍ଛେଦ ଓ ସଂଶୋଧନ ବିଲ୍ ସମ୍ପର୍କରେ ଆଲୋଚନା ହେବ ବୋଲି ସୂଚନା ମିଳିଛି ।
ଆସନ୍ତା ୧୯ ତାରିଖରୁ ପୁରୁଣା ସଂସଦ ଭବନ ବଦଳରେ ନୂଆ ସଂସଦ ଭବନର ଚାଲିବ ଅଧିବେଶନ । ସଂସଦ ଅଧିବେଶନରେ ଯୋଗ ଦେବା ଲାଗି ସମ୍ମତ ହୋଇଛନ୍ତି ଇଣ୍ଡିଆ ମେଣ୍ଟର ୨୪ଟି ଦଳ । ସେହିପରି ଜାତି ଗଣନା, ମଣିପୁର ହିଂସା, ସାମ୍ପ୍ରଦାୟିକ ହିଂସା, ମୁଦ୍ରାସ୍ଫୀତି ଆଦି ପ୍ରସଙ୍ଗରେ ଆଲୋଚନା ହେବାର କାର୍ଯ୍ୟକ୍ରମ ରହିଛି । ସଂସଦର ସ୍ବତନ୍ତ୍ର ଅଧିବେଶନର କାରଣ ସ୍ପଷ୍ଟ କରିବା ଲାଗି ପୂର୍ବରୁ ପ୍ରଧାନମନ୍ତ୍ରୀଙ୍କୁ ଚିଠି ଲେଖିଥିଲେ କଂଗ୍ରେସ ସଂସଦୀୟ ଦଳ ନେତ୍ରୀ ସୋନିଆ ଗାନ୍ଧୀ ।
ସାଧାରଣତଃ ସଂସଦର ବଜେଟ ଅଧିବେଶନ, ମୌସୁମୀ ଅଧିବେଶନ ଓ ଶୀତ ଅଧିବେଶନ ବସୁଥିବାବେଳେ କାହିଁକି ସ୍ବତନ୍ତ୍ର ଅଧିବେଶନର ଆବଶ୍ଯକତା ପଡିଲା ତାହାକୁ ନେଇ ସରକାରଙ୍କୁ ଘେରିଥିଲେ ବିରୋଧୀ । ଅଦିନିଆ ଅଧିବେଶନକୁ ନେଇ ସରକାରଙ୍କୁ ବିରୋଧୀ ଦଳ ଘେରିଥିବାବେଳେ ଏହି ଅଧିବେଶନର କାର୍ଯ୍ୟକ୍ରମ ନେଇ ପୂର୍ବରୁ ସ୍ପଷ୍ଟ କରିଥିଲେ ସରକାର । ଶେଷ ଥର ଲାଗି ଗତ 2017 ଜୁନ 30ରେ ଏକ ସ୍ବତନ୍ତ୍ର ଅଧିବେଶନରେ ଲାଗୁ କରାଯାଇଥିଲା ଜିଏସଟି ।
ଏସିଆ କପ୍ ଫାଇନାଲରେ ଶ୍ରୀଲଙ୍କା ବିପକ୍ଷରେ ଭାରତର ବୃହତ ବିଜୟ, ୮ମ ଥର ହେଲା ଚାମ୍ପିଅନ୍
କଲମ୍ବୋ: ଭାରତ ଏସିଆ କପ୍ ଚାମ୍ପିଅନ୍ । ଅଷ୍ଟମ ଥର ପାଇଁ ଟିମ୍ ଇଣ୍ଡିଆ ହେଲା ଚାମ୍ପିଅନ୍ । ଶ୍ରୀଲଙ୍କାକୁ ହରାଇ ଚାମ୍ପିଅନ୍ ହୋଇଛି ଭାରତ । ୫୧ରନ ଟାର୍ଗେଟକୁ ୬ ଓଭର ଗୋଟିଏ ବଲରେ ହାସଲ କରି ଏସିଆ କପ ଚାମ୍ପିଅନ୍ ହୋଇଛି ରୋହିତ ବିଗ୍ରେଡ । ୧୦ ଓ୍ବିକେଟରେ ଟିମ୍ ଇଣ୍ଡିଆ ଟାଇଟଲ୍ ଜିତିବା ସହିତ ୫ ବର୍ଷ ପରେ ପୁଣି ଏସିଆ କପ୍ ଚାମ୍ପିଅନ ହୋଇଛି । ଏହାଛଡ଼ା ଦିନିକିଆରେ ଭାରତ ୧୧ଥର ପାଇଁ ୧୦ ଓ୍ବିକେଟରେ ବିଜୟୀ ହୋଇଛି । କଲମ୍ବୋରେ ଦେଖିବାକୁ ମିଳିଛି ଭାରତୀୟ ବୋଲରଙ୍କ ଜଲଓ୍ବା ।
ଏସିଆ କପ ଫାଇନାଲ୍ ମୁକାବିଲାରେ ଟିମ୍ ଇଣ୍ଡିଆର ଦମଦାର ପ୍ରଦର୍ଶନ ଦେଖିବାକୁ ମିଳିଥିଲା । ଶ୍ରୀଲଙ୍କାକୁ ମାତ୍ର ୫୦ ରନରେ ଅଲଆଉଟ୍ କରିଥିଲା ଭାରତ । ଭାରତୀୟ ବୋଲରଙ୍କ ଘାତକ ବୋଲିଂ ଆଗରେ ୧୫ ଓଭର ଦୁଇଟି ବଲରେ ମାତ୍ର ୫୦ ରନ କରି ୧୦ ଓ୍ବିକେଟ ହରାଇଥିଲା ଘରୋଇ ଦଳ । ଶୋଚନୀୟ ବ୍ୟାଟିଂ ସହିତ ଏସିଆ କପରେ ଶ୍ରୀଲଙ୍କା ସର୍ବନିମ୍ନ ରନ କରିଥିଲା । ସେପଟେ ଅବିଶ୍ବସନୀୟ ସିରିଜ ଖେଳିଥିଲେ ଭାରତର ଦ୍ରୁତ ବୋଲର ମହମ୍ମଦ ସିରାଜ । ସିରାଜଙ୍କ ଘାତକ ବୋଲିଂ ଆଗରେ ଧରାଶାୟୀ ହୋଇଯାଇଥିଲା ସିଂହଳୀ ଟିମ୍ ।
ପ୍ରଥମ ଓଭରରେ ହିଁ ବୁମରା କୁଶଲ ପରେରାଙ୍କ ଓ୍ବିକେଟ ନେବାପରେ ଜାଦୁ ଦେଖାଇଥିଲେ ସିରାଜ୍ । ଦ୍ବିତୀୟ ଓଭରରେ ଭାଙ୍ଗିଦେଇଥିଲେ ଟିମ ଶ୍ରୀଲଙ୍କାର ଅଣ୍ଟା । ଗୋଟିଏ ଓଭରରେ ୪ଟି ଓ୍ବିକେଟ ନେଇଥିଲେ ସିରାଜ । ପ୍ରଥୁମ ନିଶଙ୍କା, ସଦିରା ସମରବିକ୍ରମା, ଚରିଥ୍ ଅସଲଙ୍କା ଓ ଧନଞ୍ଜୟ ଡିସିଲଭାଙ୍କୁ ପାଭିଲିୟନ ଫେରାଇଥିଲେ । ସେହିପରି ନିଜର ତୃତୀୟ ଓଭରରେ ସନକା ଓ ଷଷ୍ଠ ଓଭରରେ କୁଶଲ ମେଣ୍ଡିସଙ୍କୁ ଆଉଟ୍ କରି ୬ ଓ୍ବିକେଟ ନେଇଥିଲେ ସିରାଜ । ଏହାଛଡ଼ା ହାର୍ଦ୍ଦିକ ପାଣ୍ଡ୍ୟା ୩ଟି ଓ୍ବିକେଟ ନେଇ ଶ୍ରୀଲଙ୍କାକୁ ଅଲଆଉଟ କରିବାରେ ଗୁରୁତ୍ବପୂର୍ଣ୍ଣ ଭୂମିକା ନିଭାଇଥିଲେ ।
୫୧ ରନ ଲକ୍ଷ୍ୟ ନେଇ ପଡ଼ିଆକୁ ଓହ୍ଲାଇଥିଲା ଟିମ ଇଣ୍ଡିଆ । ରୋହିତଙ୍କ ବଦଳରେ ଶୁଭମନ ଗିଲଙ୍କ ସହିତ ଓପନିଂ କରିଥିଲେ ଇଶାନ କିଷନ । ଉଭୟ ଅପରାଜିତ ରହି ମାତ୍ର ୬ ଓଭର ଗୋଟିଏ ବଲରେ ମ୍ୟାଚ ଜିତିବା ସହିତ ଭାରତକୁ ଏସିଆ କପ ଭେଟିଦେଇଥିଲେ । ଇଶାନ କିଷନ ୨୩ରନ କରିଥିବାବେଳେ ଗିଲ ୨୭ ରନ କରିଥିଲେ । ଭାରତର ବିଜୟ ପରେ ସାରା ଦେଶରେ ଉତ୍ସବ ଦେଖାଦେଇଛି ।
ସିରାଜ ସାଜିଲେ କାଳ, ୫୦ ରନରେ ଶ୍ରୀଲଙ୍କା ଅଲଆଉଟ୍
କଲମ୍ବୋ: ଏସିଆା କପର ଫାଇନାଲ ମ୍ୟାଚରେ ଶ୍ରୀଲଙ୍କାର ବ୍ୟାଟିଂ ବିପର୍ଯ୍ୟୟ । ମାତ୍ର ୫୦ ରନରେ ଅଲଆଉଟ୍ ହେଲା ଶ୍ରୀଲଙ୍କା । ସିରାଜଙ୍କ ଘାତକ ବୋଲିଂ ଆଗରେ ଶ୍ରୀଲଙ୍କାର ବ୍ୟାଟ୍ସମ୍ୟାନମାନେ ଧରାଶାୟୀ ହୋଇଛନ୍ତି । ମହମ୍ମଦ ସିରାଜ ୭ ଓଭର ବୋଲିଂ କରିଥିବାବେଳେ ଗୋଟିଏ ଓଭର ମେଡେନ ସହ ୬ ଓ୍ବିକେଟ ଅକ୍ତିଆର କରିଛନ୍ତି । ସେଥିମଧ୍ୟରୁ ଗୋଟିଏ ଓଭର ମେଡେନ ମଧ୍ୟ ରହିଛି । ସେପଟେ ଶ୍ରୀଲଙ୍କାର ମାତ୍ର ୨ଜଣ ଖେଳାଳି ଦୁଇ ଅଛ ଛୁଇଁବାରେ ସକ୍ଷମ ହୋଇଛନ୍ତି । ଦଳର ୫ଜଣ ଖେଳାଳି ଜିରୋରେ ଆଉଟ୍ ହୋଇଛନ୍ତି । ଭାରତ ଆଗରେ ମାତ୍ର ୫୧ ରନର ବିଜୟ ଲକ୍ଷ୍ୟ ରହିଛି । ସିରାଜଙ୍କ ସହ ହାର୍ଦ୍ଦିକ ପାଣ୍ଡ୍ୟା ୩ଟି ଓ୍ବିକେଟ୍ ଏବଂ ବୁମରା ଗୋଟିଏ ଓ୍ବିକେଟ ଅକ୍ତିଆର କରିବାରେ ସକ୍ଷମ ହୋଇଛନ୍ତି । ଭାରତ ଆଗରେ କମ ରନର ବିଜୟ ଲକ୍ଷ୍ୟ ରହିଥିବାବେଳେ ୫ ବର୍ଷ ପରେ ପୁଣିଥରେ ଏସିଆ କପ ଟାଇଟଲ ହାସଲ କରିବ ରୋହିତ ବାହିନୀ ।
ଭାରତୀୟ ବୋଲରଙ୍କ ଘାତକ ବୋଲିଂ ଆଗରେ ୧୫ ଓଭର ଦୁଇଟି ବଲରେ ମାତ୍ର ୫୦ ରନ କରି ୧୦ ଓ୍ବିକେଟ ହରାଇଥିଲା ଘରୋଇ ଦଳ । ଶୋଚନୀୟ ବ୍ୟାଟିଂ ସହିତ ଏସିଆ କପରେ ଶ୍ରୀଲଙ୍କା ସର୍ବନିମ୍ନ ରନ କରିଥିଲା । ସେପଟେ ଅବିଶ୍ବସନୀୟ ସିରିଜ ଖେଳିଥିଲେ ଭାରତର ଦ୍ରୁତ ବୋଲର ମହମ୍ମଦ ସିରାଜ । ସିରାଜଙ୍କ ଘାତକ ବୋଲିଂ ଆଗରେ ଧରାଶାୟୀ ହୋଇଯାଇଥିଲା ସିଂହଳୀ ଟିମ୍ ।
ପ୍ରଥମ ଓଭରରେ ହିଁ ବୁମରା କୁଶଲ ପରେରାଙ୍କ ଓ୍ବିକେଟ ନେବାପରେ ଜାଦୁ ଦେଖାଇଥିଲେ ସିରାଜ୍ । ଦ୍ବିତୀୟ ଓଭରରେ ଭାଙ୍ଗିଦେଇଥିଲେ ଟିମ ଶ୍ରୀଲଙ୍କାର ଅଣ୍ଟା । ଗୋଟିଏ ଓଭରରେ ୪ଟି ଓ୍ବିକେଟ ନେଇଥିଲେ ସିରାଜ । ପ୍ରଥୁମ ନିଶଙ୍କା, ସଦିରା ସମରବିକ୍ରମା, ଚରିଥ୍ ଅସଲଙ୍କା ଓ ଧନଞ୍ଜୟ ଡିସିଲଭାଙ୍କୁ ପାଭିଲିୟନ ଫେରାଇଥିଲେ । ସେହିପରି ନିଜର ତୃତୀୟ ଓଭରରେ ସନକା ଓ ଷଷ୍ଠ ଓଭରରେ କୁଶଲ ମେଣ୍ଡିସଙ୍କୁ ଆଉଟ୍ କରି ୬ ଓ୍ବିକେଟ ନେଇଥିଲେ ସିରାଜ । ଏହାଛଡ଼ା ହାର୍ଦ୍ଦିକ ପାଣ୍ଡ୍ୟା ୩ଟି ଓ୍ବିକେଟ ନେଇ ଶ୍ରୀଲଙ୍କାକୁ ଅଲଆଉଟ କରିବାରେ ଗୁରୁତ୍ବପୂର୍ଣ୍ଣ ଭୂମିକା ନିଭାଇଥିଲେ ।
୫୧ ରନ ଲକ୍ଷ୍ୟ ନେଇ ପଡ଼ିଆକୁ ଓହ୍ଲାଇଥିଲା ଟିମ ଇଣ୍ଡିଆ । ରୋହିତଙ୍କ ବଦଳରେ ଶୁଭମନ ଗିଲଙ୍କ ସହିତ ଓପନିଂ କରିଥିଲେ ଇଶାନ କିଷନ । ଉଭୟ ଅପରାଜିତ ରହି ମାତ୍ର ୬ ଓଭର ଗୋଟିଏ ବଲରେ ମ୍ୟାଚ ଜିତିବା ସହିତ ଭାରତକୁ ଏସିଆ କପ ଭେଟିଦେଇଥିଲେ । ଇଶାନ କିଷନ ୨୩ରନ କରିଥିବାବେଳେ ଗିଲ ୨୭ ରନ କରିଥିଲେ । ଭାରତର ବିଜୟ ପରେ ସାରା ଦେଶରେ ଉତ୍ସବ ଦେଖାଦେଇଛି ।
ଏସିଆ କପ୍ ଫାଇନାଲ୍: ଭାରତର ଘାତକ ବୋଲିଂରେ ଶ୍ରୀଲଙ୍କା ଧରାଶାୟୀ, ସିରାଜଙ୍କୁ ୬ ୱିକେଟ୍
କଲମ୍ବୋ: ଭାରତ ଏବଂ ଶ୍ରୀଲଙ୍କା ମଧ୍ୟରେ ରବିବାର ଏସିଆକପ୍ ୨୦୨୩ର ଫାଇନାଲ୍ ମ୍ୟାଚ୍ ଖେଳାଯାଉଛି । ଶ୍ରୀଲଙ୍କା ପ୍ରଥମେ ବ୍ୟାଟିଂ କରୁଛି । ତେବେ ଆରମ୍ଭରୁ ହିଁ ଶ୍ରୀଲଙ୍କାକୁ ବିପର୍ଯ୍ୟର ସାମ୍ନା କରିବାକୁ ପଡ଼ିଛି । ଶ୍ରୀଲଙ୍କା ୧୨.୩ ଓଭରରେ ୮ ୱିକେଟ୍ ହରାଇ ମାତ୍ର ୪୦ ରନ୍ କରିଛି । କଲମ୍ବୋରେ ମିଆଁ ମ୍ୟାଜିକ ଚାଲିଛି । ମହମ୍ମଦ ସିରାଜଙ୍କ ଘାତକ ବୋଲିଂରେ ଶ୍ରୀଲଙ୍କା ବ୍ୟାଟର କ୍ରୀଜରେ ତିଷ୍ଠିପାରିନାହାନ୍ତି । ସିରାଜ ୬ଟି ଓ୍ବିକେଟ ନେଇଥିବାବେଳେ ବୁମରା ଓ ପାଣ୍ଡ୍ୟା ଗୋଟିଏ ଲେଖାଏଁ ଓ୍ବିକେଟ ନେଇଛନ୍ତି । ଦୁଶନ ହେମନ୍ଥା ଏବଂ ପ୍ରମୋଦ ମଦୁଶନ କ୍ରୀଜରେ ଅଛନ୍ତି । ଦୁନିଥ ୱାଲ୍ଲାଲାଗେ ୮ ରନ୍ କରି ଆଉଟ୍ ହୋଇଛନ୍ତି । ତାଙ୍କୁ ହାର୍ଦ୍ଦିକ ପାଣ୍ଡ୍ୟା ଆଉଟ୍ କରିଛନ୍ତି । ଏହା ପୂର୍ବରୁ ମହମ୍ମଦ ସିରାଜ ପଥୁମ ନିସାଙ୍କା, ସଦୀରା ସମରବିକ୍ରମା, ଚରୁଥ ଅସାଲଙ୍କା, ଧନଞ୍ଜୟ ଡି ସିଲଭା, ଦସୁନ ଶନକା ଏବଂ କୁସଲ ମେଣ୍ଡିଂସଙ୍କୁ ଆଉଟ୍ କରିଥିଲେ । ସେହିପରି ଜସପ୍ରୀତ ବୁମରାହଙ୍କୁ ଗୋଟିଏ ସଫଳତା ମିଳିଛି । ପାୱାରପ୍ଲେ ରେ ଶ୍ରୀଲଙ୍କା ୧୦ ଓଭରରେ ୩୩ ରନରେ ୬ ୱିକେଟ୍ ହରାଇଥିଲା । ଏହି ଅବଧିରେ ସିରାଜ ୫ ଏବଂ ବୁମରାହ ଗୋଟିଏ ୱିକେଟ୍ ନେଇଥିଲେ । ସ୍ଥିତି ଏପରି ଥିଲା ଯେ ଦଳର କୌଣସି ବି ବ୍ୟାଟର ଡବଲ ଡିଜିଟ ଛୁଇଁ ପାରିନଥିଲେ ।
ସନ୍ଧ୍ୟାରେ ପୁଅ ଆମେରିକାରୁ ଆସିବା ପରେ ଆସନ୍ତାକାଲି ହେବ ଗୀତାଙ୍କ ଶେଷକୃତ୍ୟ
ନନ୍ଦିଘୋଷ ବ୍ୟୁରୋ: ପ୍ରଖ୍ୟାତ ଲେଖିକା ତଥା ଭଉଣୀ ଗୀତା ମେହେଟ୍ଟାଙ୍କ ଶେଷ ଦର୍ଶନ କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଗତକାଲି ରାତିରେ ଗୀତାଙ୍କ ବିୟୋଗ ହେବା ପରେ ନୂଆଦିଲ୍ଲୀ ଗସ୍ତ କରିଥିଲେ ନବୀନ । ଆଜି ସନ୍ଧ୍ୟାରେ ଗୀତାଙ୍କ ପୁଅ ଆମେରିକାରୁ ଆସିବା ପରେ ଆସନ୍ତା କାଲି ଗୀତାଙ୍କ ଶେଷକୃତ୍ୟ ସମ୍ପନ୍ନ ହେବ ବୋଲି ସୂଚନା ମିଳିଛି । ଗତକାଲି ରାତିରେ ନୂଆଦିଲ୍ଲୀସ୍ଥିତ ବାସଭବନରେ ୮୦ ବର୍ଷ ବୟସରେ ଶେଷ ନିଶ୍ୱାସ ତ୍ୟାଗ କରିଥିଲେ ଗୀତା । ପ୍ରବାଦ ପୁରୁଷ ବିଜୁ ପଟ୍ଟନାୟକଙ୍କ କନ୍ୟା ତଥା ମୁଖ୍ୟମନ୍ତ୍ରୀ ନବୀନ ପଚ୍ଚନାୟକଙ୍କ ବଡ଼ ଭଉଣୀ ଥିଲେ ଗୀତା ମେହେଟ୍ଟା । ୧୯୪୩ରେ ବିଜୁ ପଟ୍ଟନାୟକ ଓ ଜ୍ଞାନ ଦେବୀଙ୍କ କୋଳ ମଣ୍ଡନ କରିଥିଲେ ଗୀତା ।
ଗୀତା ଭାରତ ଓ ବ୍ରିଟେନରେ ଶିକ୍ଷା ଲାଭ କରିଥିଲେ । ବିଶିଷ୍ଟ ପ୍ରକାଶକ ସନି ମେହେଟ୍ଟାଙ୍କ ସହ ଗୀତାଙ୍କର ବିବାହ ହୋଇଥିଲା । ଗୀତା ମେହେଟ୍ଟାଙ୍କ ବିୟୋଗ କେବଳ ଓଡ଼ିଶା ନୁହେଁ, ସାରା ଦେଶ ଓ ବିଶ୍ବ ଲାଗି ଅପୂରଣୀୟ କ୍ଷତି । ବୃତ୍ତଚିତ୍ର ନିର୍ମାତା, ସାମ୍ବାଦିକା ଭାବେ ବି ବେଶ୍ ଖ୍ୟାତି ଅର୍ଜନ କରିଥିଲେ ଗୀତା । ନିଜର ଯଶସ୍ବୀ ସାଧନା, ଅଙ୍ଗୀକାର, ଲେଖକୀୟ ମହାନୁଭବତାକୁ ପାଥେୟ କରି ସେ ସମୃଦ୍ଧ କରିଥିଲେ ସାହିତ୍ୟ ଭଣ୍ଡାର । ନିଜ ଗରିମା ବଳରେ ସେ ସୃଷ୍ଟି କରିଥିଲେ ନିଜର ସ୍ବତନ୍ତ୍ର ପରିଚୟ ।
ପ୍ରଖ୍ୟାତ ରାଜନୈତିକ ପରିବାରର ସଦସ୍ୟ ଭାବେ ନୁହେଁ, ବରଂ ନିଜର ଅପୂର୍ବ ଭାବବିନ୍ୟାସ, ସୃଜନଶୀଳତା ବଳରେ ସେ ସୃଷ୍ଟି କରିଥଲେ ଇତିହାସ । ତାଙ୍କର କେତେକ ପ୍ରଖ୍ୟାତ ପୁସ୍ତକ ହେଉଛି- କର୍ମା କୋଲା, ସ୍ନେକ ଆଣ୍ଡ ଲ୍ୟାଡର୍ସ, ଏ ରିଭର ସୂତ୍ର, ଦ ଏଟରନାଲ ଗଣେଶ ଇତ୍ୟାଦି । ସାହିତ୍ୟ ଓ ଶିକ୍ଷା କ୍ଷେତ୍ରରେ ଉଲ୍ଲେଖନୀୟ ଅବଦାନ ପାଇଁ ଗତ ୨୦୧୯ ମସିହାରେ କେନ୍ଦ୍ର ସରକାର ତାଙ୍କ ପଦ୍ମଶ୍ରୀ ପୁରସ୍କାର ପ୍ରଦାନ କରିବାକୁ ଘୋଷଣା କରିଥିଲେ । କିନ୍ତୁ ତାହାକୁ ପ୍ରତ୍ୟାଖ୍ୟାନ କରି ସେ ଚର୍ଚ୍ଚାକୁ ଆସିଥିଲେ । ଗୀତାଙ୍କ ସ୍ବାମୀ ସନି ମେହେଟ୍ଟାଙ୍କର ଗତ ୨୦୧୯ରେ ପରଲୋକ ହୋଇଥିଲା ।
ସାହିତ୍ୟ ଜୀବନରେ ଅନେକ ଉଲ୍ଲେଖନୀୟ ପୁସ୍ତକ ରଚନା କରିବା ସହ ଗବେଷଣା କାର୍ଯ୍ୟରେ ଜୀବନ ଉତ୍ସର୍ଗ କରିଥିଲେ । ସେ ଆଦିବାସୀ କଳା ଓ ସଂସ୍କୃତିର ଥିଲେ ସ୍ବନାମଧନ୍ୟ ଗବେଷିକା ଓ ସଂଗ୍ରାହିକା । ବିଶେଷ କରି ଆଦିବାସୀମାନେ ପରିଧାନ କରୁଥିବା ଅଳଙ୍କାରକୁ ଭଲ ପାଇବା ସହ ସେମାନଙ୍କ ଅଳଙ୍କାର, ପଖାଳ କଂସା ଆଦି ସମ୍ପର୍କରେ ଜାଣିବା ଲାଗି ଉତ୍ସୁକତା ପ୍ରକାଶ କରୁଥିଲେ । ତାଙ୍କ ବିୟୋଗରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି, ରାଜ୍ୟପାଳ ପ୍ରଫେସର ଗଣେଶୀ ଲାଲଙ୍କ ସମେତ ବହୁ ବିଶିଷ୍ଟ ବ୍ୟକ୍ତି କରିଛନ୍ତି ଶୋକ ପ୍ରକାଶ ।
ବହୁ ଚର୍ଚ୍ଚିତ ସେବାୟତ କାଳିଆ ପଢ଼ିଆରୀ ହତ୍ୟା ମାମଲାରେ ଅଭିଯୁକ୍ତ ଜଗନ ଖଟେଇ ଗିରଫ
ପୁରୀ: ପୁରୀ ପୋଲିସକୁ ବଡ଼ ସଫଳତା । ବହୁ ଚର୍ଚ୍ଚିତ ସେବାୟତ କାଳିଆ ପଢ଼ିଆରୀ ହତ୍ୟା ମାମଲାରେ ଅଭିଯୁକ୍ତ ଜଗନ ଖଟେଇ ଗିରଫ । ଜଗନ ଘରୁ ଦୁଇଟି ବନ୍ଧୁକ ଗୋଟେ ଜୀବନ୍ତ ଗୁଳି ସହ ମୋବାଇଲ ଜବତ ହୋଇଛି । ଏନେଇ ସାମ୍ବାଦିକ ସମ୍ମିଳନୀରେ ପୋଲିସ ସୂଚନା ଦେଇଛି । ପୋଲିସ ସ୍କାନରରେ ଥିଲା ଜଗନ । ଗତକାଲି ସନ୍ଧ୍ୟାରେ ଜଗନ ହଳଦିଆ ଛକଠାରେ ବନ୍ଧୁକ ବ୍ୟବସାୟ କରିବାକୁ କିଛି ଅପରାଧୀଙ୍କୁ ଅପେକ୍ଷା କରିଥିଲା । ପୋଲିସ ପାଟ୍ରୋଲିଂ ଟିମ୍ ଜଗନକୁ ଅଟକ ରଖି ପଚରାଉଚରା କରିବା ବେଳେ ସେ ସେବାୟତ କାଳିଆ ପଢ଼ିଆରୀ ହତ୍ୟାକାଣ୍ଡରେ ସମ୍ପୃକ୍ତ ଥିବା ଜଣା ପଡିଥିଲା । ପରେ ଜଗନ ଘରେ ପୋଲିସ ଚଢ଼ାଉ କରି ତଦନ୍ତ କରିଥିଲା । ଜଗନ ଘରୁ ଦୁଇଟି ବନ୍ଧୁକ ସହ ଗୋଟିଏ ଜୀବନ୍ତ ଗୁଳି ଓ ମୋବାଇଲ ଫୋନ ଜବତ ହୋଇଛି । ଅଭିଯୁକ୍ତକୁ ଗିରଫ କରି କୋର୍ଟ ଚାଲାଣ କରାଯାଇଛି ।
ଏସିଆ କପ୍ ଫାଇନାଲ୍: ଶ୍ରୀଲଙ୍କା-ଭାରତ ମହାମୁକାବିଲା, ପ୍ରଥମ ଓଭରରେ କୁସଲଙ୍କୁ ଆଉଟ୍ କଲେ ବୁମରାହ
କଲମ୍ବୋ: କଲମ୍ବୋର ଆର୍ ପ୍ରେମଦାସା ଷ୍ଟାଡିମୟରେ ଏସିଆ କପ୍ ଫାଇନାଲ୍ ମ୍ୟାଚ୍ ଖେଳ ଆରମ୍ଭ ହୋଇଯାଇଛି । ଖେଳ ଆରମ୍ଭର ନିର୍ଦ୍ଧାରିତ ସମୟ ଅପରାହ୍ନ ୩ ଟା ରଖାଯାଇଥିଲା । ହେଲେ ବର୍ଷା କାରଣରୁ ମ୍ୟାଚରେ ବିଳମ୍ବ ହୋଇଛି । ବର୍ଷା ଛାଡ଼ିବା ପରେ ଅପରାହ୍ନ ୩ଟା ୪୦ ମିନିଟରେ ଖେଳ ଆରମ୍ଭ ହୋଇଛି । ଶ୍ରୀଲଙ୍କା ଏବଂ ଭାରତ ମଧ୍ୟରେ ମହାମୁକାବିଲ ଚାଲିଛି । ଟସ୍ ଜିତି ପ୍ରଥମେ ବ୍ୟାଟିଂ କରୁଛି ଶ୍ରୀଲଙ୍କା । ତେବେ ପ୍ରଥମ ଓଭରରେ ହିଁ ଶ୍ରୀଲଙ୍କାକୁ ଝଟକା ଲାଗିଛି । ଯଶପ୍ରୀତ ବୁମରାହଙ୍କ ପ୍ରଥମ ଓଭରର ତୃତୀୟ ବଲରେ କୁସଲ ପରେରା ଆଉଟ୍ ହୋଇଯାଇଛନ୍ତି । ଟାଇଟଲ୍ ପାଇଁ ଉଭୟ ଦଳ ମଧ୍ୟରେ କଡ଼ା ମୁକାବିଲା ଚାଲିଛି । ଭାରତ ଏହି ଟାଇଟଲ୍ ୭ଥର ଜିତିଥିବା ବେଳେ ଶ୍ରୀଲଙ୍କା ୬ଥର ଏହି ଟାଇଟଲ ଜିତିଛି ।
ଗତଥର ଭାରତ ୨୦୧୮ରେ ଏସିଆ କପ୍ ଜିତିଥିଲା ଏବଂ ଦଳ ଏବଂ ୫ ବର୍ଷ ପରେ ଅଷ୍ଟମଥର ଟାଇଟଲ ଜିତିବାକୁ ସମ୍ପୂର୍ଣ୍ଣ ପ୍ରୟାସ କରିବ । ସେହିପରି ଡିଫେଣ୍ଡିଂ ଚମ୍ପିଆନ ଶ୍ରୀଲଙ୍କା ଫାଇନାଲ୍ ଜିତି ଟାଇଟଲ୍ ନିଜ ପାଖରେ ରଖିବାକୁ ଉଦ୍ୟମ କରିବ । ଶ୍ରୀଲଙ୍କା ଅଧିନାୟକ ଦାସୁନ ଶନାକା ଟସ୍ ଜିତି ପ୍ରଥମେ ବ୍ୟାଟିଂ ନିଷ୍ପତ୍ତି ନେଇଥିଲେ । ଅନ୍ୟପକ୍ଷରେ ବାଂଲାଦେଶ ମୁକାବିଲାରେ ଯେଉଁ ପ୍ଲେଇଙ୍ଗ ଇଲେଭେନ ଥିଲେ ସେଥିରେ ପରିବର୍ତ୍ତନ କରିଛନ୍ତି ଅଧିନାୟକ ରୋହିତ ଶର୍ମା । ଛଅଟି ପରିବର୍ତ୍ତନ କରାଯାଇଛି । ବିରାଟ କୋହଲି, ହାର୍ଦ୍ଦିକ ପାଣ୍ଡ୍ୟା, ଜଶପ୍ରୀତ ବୁମରାହ, ମହମ୍ମଦ ସିରାଜ ଏବଂ କୁଲଦୀପ ଯାଦବ ଦଳକୁ ପ୍ରତ୍ୟାବର୍ତ୍ତନ କରିଛନ୍ତି । ସେହିପରି ଆହତ ଅକ୍ଷର ପଟେଲଙ୍କ ସ୍ଥାନରେ ଅଲରାଉଣ୍ଡର ୱାସିଂଟନ ସୁନ୍ଦରଙ୍କୁ ସୁଯୋଗ ମିଳିଛି । ସୂର୍ଯ୍ୟକୁମାର ଯାଦବ, ତିଲକ ବର୍ମା, ଶାର୍ଦ୍ଦୁଲ ଠାକୁର, ପ୍ରସିଦ୍ଧ କ୍ରୀଷ୍ଣା ଏବଂ ମହମ୍ମଦ ସାମୀଙ୍କୁ ବାହାର କରାଯାଇଛି ।
ରାଜ୍ୟରେ ପୁଣି ବଢ଼ିବ ବର୍ଷାର ପରିମାଣ
ଭୁବନେଶ୍ବର: ରବିବାରଠାରୁ ପୁଣି ଭିଜିବ ଓଡ଼ିଶା । ସୋମବାର ପୁଣି ରାଜ୍ୟରେ ବଢିବ ବର୍ଷାର ପରିମାଣ । ବଙ୍ଗୋପସାଗରରେ ଆଉ ଏକ ଘୂର୍ଣ୍ଣିବଳୟ ସୃଷ୍ଟି ହେବାର ସମ୍ଭାବନା ରହିଛି । ପ୍ରଭାବରେ ଉତ୍ତର ଉପକୂଳ ଓଡ଼ିଶାରେ ପ୍ରବଳ ବର୍ଷା ନେଇ ପୂର୍ବାନୁମାନ କରିଛି ଆଞ୍ଚଳିକ ପାଣିପାଗ କେନ୍ଦ୍ର । ଏନେଇ ରବିବାର କିଛି ଜିଲ୍ଲାରେ ହାଲୁକାରୁ ମଧ୍ୟମ ଧରଣର ବର୍ଷା ହେବାର ସମ୍ଭାବନା ରହିଥିବା ବେଳେ ୧୮ ତାରିଖରେ ଭଦ୍ରକ, କେନ୍ଦ୍ରାପଡା, କଟକ, ଗଜତସିଂହପୁର, ପୁରୀ ଖୋର୍ଦ୍ଧା ଏବଂ ଗଞ୍ଜାମ ଜିଲ୍ଲାକୁ ୟେଲୋ ଆଲର୍ଟ ଜାରି କରାଯାଇଛି । ସେହିଭଳି ୧୯ ତାରିଖରେ ଗଞ୍ଜାମ, ଗଜପତି, ରାୟଗଡା, କୋରାପୁଟ, ମାଲକାନଗିରି, କନ୍ଧମାଳ, ନବରଙ୍ଗପୁର ଏବଂ କଳାହାଣ୍ଡି ଜିଲ୍ଲାକୁ ସତର୍କତା ଜାରି କରାଯାଇଛି । ଏହି ସବୁ ଜିଲ୍ଲାରେ ୭୦ ରୁ ୧୧୦ ମିଲିମିଟର ପର୍ଯ୍ୟନ୍ତ ବର୍ଷା ହେବାର ସମ୍ଭାବନା ରହିଛି ।