ଭୁବନେଶ୍ୱର: ଗୋଲ୍ଡେନ ବାବାର ୧ କୋଟି ୫୩ ଲକ୍ଷ ଟଙ୍କାର ସମ୍ପତ୍ତି ଆଟାଚ କଲା ଇଡି । ଘର, ଦାମୀ ଗାଡି ଓ ଫ୍ରିଜ ଆକାଉଣ୍ଟର ଟଙ୍କା ଆଟାଚ ହୋଇଛି । ୧୧୦ କୋଟି ଟଙ୍କାର ଠକେଇ ଅଭିଯୋଗରେ ଗିରଫ ହୋଇଥିଲେ ଗୋଲ୍ଡେନ୍ ବାବା ଓରଫ ଜ୍ୟୋତିରଞ୍ଜନ ବେଉରା । ଚେକ୍ ବାଉନ୍ସ ହେବାରୁ ୨୦୧୮ ଡିସେମ୍ବର ୩୧ରେ ତାକୁ ଗିରଫ କରିଥିଲା ଚନ୍ଦ୍ରଶେଖରପୁର ଥାନା ପୋଲିସ । ୨୦୨୦ରେ ନିଜ ଆଡୁ ମାମଲା ରୁଜୁ କରିଥିଲା ଇଡି । ଠକେଇ ଟଙ୍କାରେ ଚଢୁଥିଲା ଅଡି, ଜାଗୁଆର ଓ ବିଏମଡବ୍ଲୁ କାର । କିଛିଦିନ ତଳେ ନୟାପଲ୍ଲୀ ଅଞ୍ଚଳରୁ ଦାମୀ ଗାଡି ସିଜ୍ କରିଥିଲା ଇଡି ।
ଥାନା କ୍ୱାର୍ଟରରେ ଝୁଲିପଡିଲେ କନେଷ୍ଟବଳ, ପରିବାରିକ କଳହରୁ ଆତ୍ମହତ୍ୟା କରିଥିବା ସନ୍ଦେହ
ଭଦ୍ରକ: ଥାନା କ୍ୱାର୍ଟରରେ ଝୁଲିପଡିଲେ କନେଷ୍ଟବଳ । ଭଦ୍ରକ ଜିଲ୍ଲା ତିହିଡି ଥାନାରେ କାର୍ଯ୍ୟରତ କନେଷ୍ଟବଳ ତୋଫାନ ପାତ୍ରଙ୍କ ଆତ୍ମହତ୍ୟା । ପରିବାରିକ କଳହରୁ ଆତ୍ମହତ୍ୟା କରିଥିବା ସନ୍ଦେହ । ତାଙ୍କ ଘର ଆନନ୍ଦପୁରରେ ବୋଲି ସୂଚନା ମିଳିଛି। ଗତକାଲି ବିଳମ୍ବିତ ରାତିରେ ସେ ପାରିବାରିକ କଳହରୁ ତିହିଡି ଥାନା ପରିସରରେ ଥିବା ନିଜର ସରକାରୀ କ୍ବାର୍ଟରରେ ଵେକରେ ଶାଢ଼ୀ ଲଗାଇ ଆତ୍ମହତ୍ୟା କରିଥିବା ସୂଚନା ମିଳିଛି । ଖବର ପାଇ ତିହିଡି ପୋଲିସ ପହଞ୍ଚି ତାଙ୍କ ଝୁଲନ୍ତା ଅବସ୍ଥାରେ ମୃତଦେହ ଉଦ୍ଧାର କରି ଶବ ବ୍ୟବଛେଦ ପାଇଁ ଭଦ୍ରକ ଜିଲ୍ଲା ମୁଖ୍ୟ ଚିକିତ୍ସାଳୟକୁ ପଠାଇଛନ୍ତି । ତୋଫାନ ପାତ୍ର ଦୀର୍ଘଦିନ ଧରି ତିହିଡି ଥାନାରେ କାର୍ଯ୍ୟରତ ଥିଲେ। ସ୍ବାମୀ ସ୍ତ୍ରୀଙ୍କ ମଧ୍ୟରେ ପାଟିତୁଣ୍ଡ ହେଉଥିଲା । ଏନେଇ ତୋଫାନ ଆତ୍ମହତ୍ୟା କରିଥିବା ସନ୍ଦେହ କରାଯାଉଛି ।
ମହଙ୍ଗା ପଡ଼ିଲା ଅଧ୍ୟାପିକାଙ୍କୁ ମାନସିକ ନିର୍ଯାତନା ଦେବା, ଆସିଷ୍ଟାଣ୍ଟ ପ୍ରଫେସର ରଜତ କୁଜୁର ନିଲମ୍ବିତ
ସମ୍ବଲପୁର: ସମ୍ବଲପୁର ବିଶ୍ବ ବିଦ୍ୟାଳୟରେ ମହଙ୍ଗା ପଡ଼ିଲା ଅଧ୍ୟାପିକାଙ୍କୁ ମାନସିକ ନିର୍ଯାତନା ଦେବା । ଏପରି ଅଭିଯୋଗ ଆସିବା ପରେ ଆସିଷ୍ଟାଣ୍ଟ ପ୍ରଫେସର ରଜତ କୁଜୁରଙ୍କୁ ନିଲମ୍ବିତ କରାଯାଇଛି । କୁଳପତିଙ୍କ ନିର୍ଦ୍ଦେଶରେ ରଜତ କୁଜୁରଙ୍କୁ ନିଲମ୍ବିତ କରିଛନ୍ତି କୁଳସଚିବ । ରାଜନୀତି ବିଜ୍ଞାନର ଆସିଷ୍ଟାଣ୍ଟ ପ୍ରଫେସର ରଜତ କୁଜୁର୍ ସେହି ବିଭାଗର ଜଣେ ମହିଳା ଅଧ୍ୟାପିକାଙ୍କୁ ନିର୍ଯାତନା ଦେଉଥିବା ଅଭିଯୋଗ ହୋଇଥିଲା । ଘଟଣାକୁ ଗୁରୁତର ସହ ନେଇଥିଲେ କୁଳପତି । ଘଟଣାର ତଦନ୍ତ ପାଇଁ ୫ ଜଣିଆ ଟିମ୍ ଗଠନ ହୋଇଥିଲା ।
ରାଜଧାନୀରେ ଭିଜିଲାନ୍ସ ଅଧିକାରୀ କହି ଡକାୟତି ମାମଲା, କମିଶନରେଟ ପୋଲିସ ଜାଲରେ ୮ ଜଣିଆ ଡକାୟତି ଗ୍ୟାଙ୍ଗ
ଭୁବନେଶ୍ୱର: ରାଜଧାନୀରେ ଭିଜିଲାନ୍ସ ଅଧିକାରୀ କହି ଡକାୟତି ମାମଲା । କମିଶନରେଟ ପୋଲିସ ଜାଲରେ ୮ ଜଣିଆ ଡକାୟତି ଗ୍ୟାଙ୍ଗ । କେନ୍ଦ୍ରାପଡା, ବାଲେଶ୍ଵରରୁ ୮ ଅଭିଯୁକ୍ତ ଅଟକ । ୮ ଜଣିଆ ଡକାୟତ ଗ୍ୟାଙ୍ଗଠାରୁ ୧୫ ଲକ୍ଷ ନଗଦ ଟଙ୍କା ଓ ସୁନା ଜବତ ହୋଇଛି । ଖଣ୍ଡା, ଭୁଜାଲି ସହ ଅନ୍ୟାନ୍ୟ ମାରଣାସ୍ତ୍ର ଜବତ ହୋଇଥିବା ସୂଚନା ମିଳିଛି । ଗ୍ୟାଙ୍ଗ ବିରୋଧରେ ସାରା ଓଡ଼ିଶାରେ ୧୦ରୁ ଅଧିକ ମାମଲା ରହିଛି । ଇନ୍ଫୋସିଟି ଥାନା ଅଧିନ ନନ୍ଦନବିହାର, ବସୁନ୍ଧରା କଲୋନୀରେ ଲୁଟ ହୋଇଥିଲା । ନିବାରଣ ପାଣିଙ୍କ ଘରେ ଭିଜିଲାନ୍ସ ଅଧିକାରୀ କହି ଟଙ୍କା, ସୁନା ଲୁଟି ନେଇଥିଲେ ଦୁର୍ବୃତ୍ତ । ଘଟଣାସ୍ଥଳରେ ଛାନବିନ କରିଥିଲେ ଡିସିପି ଓ ସାଇଣ୍ଟିଫିକ ଟିମ୍ ।
କ୍ରସରରେ ପଥର ତଳେ ଚାପି ହୋଇ ୨ ଶ୍ରମିକଙ୍କ ମୃତ୍ୟୁ ଘଟଣା, ୩୨ ଘଣ୍ଟା ପରେ ବାହାରିଲା ମୃତଦେହ
ଗଜପତି: ଗଜପତି ମୋହନା ଥାନା ବନ୍ଧାଗୁଡାଗାଁରେ କ୍ରସରରେ ପଥର ତଳେ ଚାପି ହୋଇ ୨ ଶ୍ରମିକଙ୍କ ମୃତ୍ୟୁ ଘଟଣା । ପ୍ରଶାସନର ଦୀର୍ଘ ୩୨ ଘଣ୍ଟା ଅକ୍ଲାନ୍ତ ପରିଶ୍ରମ ପରେ ପଥର ତଳୁ ବାହାରିଲା ମାମୁ ଓ ଭଣଜାଙ୍କ ମୃତଦେହ । ମୋହନା ଅତିରିକ୍ତ ତହସିଲଦାରଙ୍କ ପ୍ରତ୍ୟକ୍ଷ ତତ୍ୱବଧାନରେ ପୋଲିସ ଏବଂ ଅଗ୍ନିଶମ ବାହିନୀର ମିଳିତ ଉଦ୍ୟମରେ ବିଳମ୍ବିତ ରାତିରେ ପଥର ତଳୁ ମୃତଦେହ ଦୁଇଟିକୁ ବାହାର କରିବାରେ ସଫଳ ହୋଇଥିଲେ । ଶବ ଉଦ୍ଧାର ପରେ ବ୍ୟବଛେଦ ପାଇଁ ବ୍ରହ୍ମପୁର ବଡମେଡିକାଲକୁ ପଠାଯାଇଛି ।
ଭଣ୍ଡାରିପୋଖରୀ ଖପୁରିଆପଦା ଗ୍ରାମରେ ଭୟାବହ ଅଗ୍ନିକାଣ୍ଡ, ଜଳିଗଲା ୪ ବଖରା ଘର
ଭଣ୍ଡାରିପୋଖରୀ: ଭଣ୍ଡାରିପୋଖରୀ ବ୍ଲକ୍ ବନ୍ଦାଳୋ-ମଢ଼ିଆଳି ପଞ୍ଚାୟତ ଖପୁରିଆପଦା ଗ୍ରାମରେ ଭୟାବହ ଅଗ୍ନିକାଣ୍ଡ । ଅଗ୍ନିକାଣ୍ଡରେ ୪ ବଖରା ଘର ଜଳିଯାଇଛି । ଗ୍ରାମର ଶାନ୍ତିଲତା ସେଠୀଙ୍କ ବାସଗୃହରେ ଗ୍ୟାସରେ ନିଆଁ ଲାଗିଥିଲା। ସାହିପଡ଼ିଶା ନିଆଁ ଲିଭାଇବାକୁ ଚେଷ୍ଟା କରିଥିଲେ ସୁଦ୍ଧା ଚାହୁଁଚାହୁଁ ଚାରି ବଖରା ଘର ଭସ୍ମ ହୋଇ ଯାଇଥିଲା । ଘରେ ଥିବା ସମସ୍ତ ଆସବାବପତ୍ର ସହ ଲକ୍ଷାଧିକ ଟଙ୍କାର ସାମଗ୍ରୀ ପୋଡି ପାଉଁଶ ହୋଇଯାଇଛି । ଖବର ପାଇ ଅଗ୍ନିଶମ ଘଟଣାସ୍ଥଳରେ ପହଞ୍ଚି ନିଆଁକୁ ଆୟତ୍ତ କରିଥିଲେ ।
ବିଶ୍ବ ଆଥଲେଟିକ ଚାମ୍ପିଅନସିପ: ଆଜି ନୀରଜ, କିଶୋରଙ୍କ ଭାଗ୍ୟ ପରୀକ୍ଷା
ନୂଆଦିଲ୍ଲୀ: ଆଜି ବିଶ୍ବ ଆଥଲେଟିକ ଚାମ୍ପିଅନସିପରେ କମାଲ କରିବେ ଓଡ଼ିଆ ପୁଅ । ହଙ୍ଗେରୀର ବୁଦାପେଷ୍ଟରେ ହେବ ଜାଭେଲିନ ଫାଇନାଲ ଟକ୍କର । ଫାଇନାଲରେ ଅଛନ୍ତି ଓଡ଼ିଆ ପୁଅ କିଶୋର ଜେନା । ବିଶ୍ବ ଆଥେଲିଟିକସ୍ ଚାମ୍ପିୟନସିପରେ ସେ ଦମଦାର ପ୍ରଦର୍ଶନ କରିବା ସହ ଫାଇନାଲରେ ପ୍ରବେଶ କରିଛନ୍ତି । ଭାରତରୁ ପ୍ରତିଯୋଗିତାରେ ୩ ଜଣ ଜାଭଲିନରେ ପ୍ରତିନିଧିତ୍ୱ କରିଥିଲେ । ସେମାନଙ୍କ ମଧ୍ୟରୁ ସମସ୍ତେ ଫାଇନାଲକୁ ଯାଇଛନ୍ତି । ଏହି ତିନି ଜଣ ହେଲେ କିଶୋର ଜେନା, ନିରୋଜ ଚୋପ୍ରା ଓ ଡି.ପି ମନୁ । ୮୦.୫୫ ମିଟର ଜାଭଲିନ୍ ଥ୍ରୋ କରି ଫାଇନାଲ ଟିକେଟ ହାତେଇଛନ୍ତି କିଶୋର ଜେନା । ଡିପି ମନୁ ୮୧.୩୧ ମିଟର ଥ୍ରୋ କରିଥିବା ବେଳେ ନିରଜ ଚୋପ୍ରା ସର୍ବାଧିକ ୮୮.୭୭ ମିଟର ଜାଭଲିନ ଫିଙ୍ଗି ପଏଣ୍ଟ ଟେବୁଲର ଶୀର୍ଷରେ ରହିଛନ୍ତି । ଡିପି ମନୁ ୬ ନମ୍ବର ଓ କିଶୋର ଜେନା ୯ ନମ୍ବର ତାଲିକାରେ ଅଛନ୍ତି । ତେବେ ଓଡ଼ିଆ ପୁଅଙ୍କ ପ୍ରଦର୍ଶନ ଉପରେ ସମସ୍ତଙ୍କର ନଜର ରହିଛି ।
ନୀଳଗିରି ପୋଲିସ କବଜାରେ ଜାଲ ନୋଟ ରାକେଟ୍, ଦୁଇ ଅଭିଯୁକ୍ତ ଗିରଫ
ନୀଳଗିର: ନୀଳଗିରି ପୋଲିସ କବଜାରେ ଜାଲ ନୋଟ ରାକେଟ୍ । ଦୁଇ ଅଭିଯୁକ୍ତଙ୍କୁ ଗିରଫ କଲା ପୋଲିସ୍ । ୩୨ ହଜାର ୭ ଶହ ଟଙ୍କା ଜାଲ ନୋଟ ଜବତ । କିଛି ୫ ଶହ, ଦୁଇ ଶହ ଓ ୧ ଶହ ଟଙ୍କିଆ ଜାଲ ନୋଟ ଜବତ କଲା ପୋଲିସ୍ । ଦୁଇ ଅଭିଯୁକ୍ତ ହେଲେ ନୀଳଗିରି ଥାନା ସନ୍ତରାଗଡ଼ିଆ ଅଞ୍ଚଳରେ ପୂର୍ଣ୍ଣଚନ୍ଦ୍ର ନାୟକ ଓ ଖଇରା ଥାନା ଅଞ୍ଚଳର ବୀଣାପାଣି ମୁଖୀ ।
ନୀଳଗିରି ଥାନା ସନ୍ତରାଗଡିଆ ଅଞ୍ଚଳର ପୂର୍ଣ୍ଣଚନ୍ଦ୍ର ନାୟକ ସନ୍ତରାଗଡିଆ ବଜାର ବ୍ୟାଙ୍କ ଅଫ ବରୋଦା କିଓସ୍କ ଶାଖାରେ ୩୦ ହଜାର ଟଙ୍କା ଜମା କରିବାକୁ ଯାଇଥିଲେ । ମାତ୍ର ସେହି ଟଙ୍କା ଜାଲ ନୋଟ ଥିବାରୁ ବ୍ୟାଙ୍କ କର୍ମଚାରୀ ଟଙ୍କା ଫେରାଇ ଦେଇଥିଲେ । ସେହି ଜାଲ ନୋଟରୁ କିଛି ଟଙ୍କାରେ ସରକାରୀ ମଦ ଦୋକାନରୁ ୩ ହଜାର ଟଙ୍କାର ମଦ କିଣିବା ସହିତ ପାନ ଦୋକାନ ଏବଂ ମାଛ ଦୋକାନୀଙ୍କୁ ଦେଇଥିଲେ । ପୋଲିସ ଦୁଇଜଣଙ୍କୁ ଗିରଫ କରି ରାକେଟ ଅନ୍ୟମାନଙ୍କୁ ଖୋଜୁଥିବା ସମ୍ବାଦିକ ସମ୍ମିଳନୀରେ ସୂଚନା ଦେଇଛନ୍ତି ଏସପି ସାଗରିକା ନାଥ ।
ଶ୍ରୀମନ୍ଦିର ଯାଇ ମହାପ୍ରଭୁଙ୍କ ଦର୍ଶନ କରିଛନ୍ତି 5T ସଚିବ
ନନ୍ଦିଘୋଷ ବ୍ୟୁରୋ: ପୁରୀରେ 5T ସଚିବ ଭିକେ ପାଣ୍ଡିଆନ । ଦୁଇଦିନିଆ ଗଞ୍ଜାମ ଗସ୍ତ ସାରି ସିଧାସଳଖ ପୁରୀ ଯାଇଛନ୍ତି 5T ସଚିବ । ଶ୍ରୀମନ୍ଦିର ଯାଇ ମହାପ୍ରଭୁଙ୍କ ଦର୍ଶନ କରିଛନ୍ତି । ଦର୍ଶନ ସାରି ଶ୍ରୀମନ୍ଦିର ପରିକ୍ରମା ପ୍ରକଳ୍ପର ନିର୍ମାଣ କାର୍ଯ୍ୟ ସମୀକ୍ଷା କରିଛନ୍ତି । ସାଥିରେ ପୁରୀ ଉପଜିଲ୍ଲାପାଳଙ୍କ ସମେତ ଓବିସିସି ଓ ନିର୍ମାଣକାରୀ ସଂସ୍ଥାର ବରିଷ୍ଠ ଅଧିକାରୀ ଉପସ୍ଥିତ ରହିଛନ୍ତି । ପ୍ରକଳ୍ପ କାର୍ଯ୍ୟ ସମୀକ୍ଷା ପରେ ସେ ଭୁବନେଶ୍ୱର ପ୍ରତ୍ୟାବର୍ତ୍ତନ କରିଛନ୍ତି ।
IBSA ଓ୍ବାଲ୍ଡ ଗେମ୍ସରେ ଅଷ୍ଟ୍ରେଲିଆକୁ ହରାଇଲା ଭାରତୀୟ ମହିଳା ଦିବ୍ୟାଙ୍ଗ ଟିମ୍
ନୂଆଦିଲ୍ଲୀ: IBSA ଓ୍ବାଲ୍ଡ ଗେମ୍ସରେ ଇତିହାସ ରଚିଲା ଭାରତୀୟ ଦିବ୍ୟାଙ୍ଗ ମହିଳା ଦଳ । ଫାଇନାଲରେ ଅଷ୍ଟ୍ରେଲିଆକୁ ୯ ଓ୍ବିକେଟରେ ହରାଇଛି ଭାରତ । ଏହି ବିଜୟ ସହ ଭାରତ ସ୍ବର୍ଣ୍ଣ ପଦକ ଜିତିଛି । ଅଷ୍ଟ୍ରେଲିଆ ଟସ ଜିତି ପ୍ରଥମେ ବ୍ୟାଟିଂ କରି ନିର୍ଦ୍ଧାରିତ ୨୦ ଓଭର ମଧ୍ୟରେ ୮ ଓ୍ବିକେଟ ହରାଇ ୧୧୪ ରନ ସଂଗ୍ରହ କରିଥିଲା । ଜବାବରେ ଭାରତ ୩ ଓଭର ୩ଟି ବଲ ପୂର୍ବରୁ ମାତ୍ର ଗୋଟିଏ ଓ୍ବିକେଟ ବିନିମୟରେ ଜିତିଛି ।