ନନ୍ଦିଘୋଷ ବ୍ୟୁରୋ ; ଆସନ୍ତାକାଲି ଆସିବ ୨୦୨୬-୨୭ ଆର୍ଥିକ ବର୍ଷ ପାଇଁ କେନ୍ଦ୍ର ବଜେଟ। ପ୍ରଥମ ଥର ପାଇଁ ରବିବାରରେ ବଜେଟ ଆଗତ କରିବେ କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରମଣ। ନବମ ଥର ପାଇଁ ନିର୍ମଳା ବଜେଟ ଆଗତ କରିବେ। ବଜେଟରେ କେନ୍ଦ୍ର ଅର୍ଥମନ୍ତ୍ରୀ ଲୋକଙ୍କ ଅଧିକ କ୍ରୟଶକ୍ତି ବୃଦ୍ଧି କରିବା ପାଇଁ କଣ ପଦକ୍ଷେପ ନେଉଛନ୍ତି। ଆୟକରାଦାତାଙ୍କୁ ଟିକସ ଛାଡ଼ ସୀମା ଅଧିକ ମିଳିବ କି? ନିମ୍ନ ମଧ୍ଯବିତ୍ତଙ୍କ ପାଇଁ ସଞ୍ଚୟ ପାଇଁ କିଛି ବାଟ ବାହାରିବ କି? ଟିକସରେ ରିହାତି ଦେଇ ଦରଦାମ ବୃଦ୍ଧିକୁ ରୋକିବାକୁ କିଛି ନୂଆ ଘୋଷଣା ହେବ କି? କେନ୍ଦ୍ର ବଜେଟକୁ ନେଇ ସାଧାରଣ ଲୋକଙ୍କ ଭିତରେ ଏପରି ଅନେକ କଳ୍ପନାଜଳ୍ପନା। ସେହିପରି ବଜେଟକୁ ନେଇ ଆଶା ଆଶଙ୍କାରେ ଶିଳ୍ପ ସମୁଦାୟ, ରିଅଲ ଇଷ୍ଟେଟ କ୍ଷେତ୍ର, ଏମଏସଏମଇ, ଅଟୋ, ଇଲେକ୍ଟ୍ରୋନିକ୍ସ, ଆର୍ଟିଫିସିଆଲ ଇଣ୍ଟେଲିଜେନ୍ସ ଭଳି ପ୍ରଯୁକ୍ତି ବିଦ୍ଯାକ୍ଷେତ୍ର I ଆମେରିକାର ଟାରିଫ, ଡଲାର ତୁଳନାରେ ଭାରତୀୟ ଟଙ୍କାର ମୂଲ୍ୟ ହ୍ରାସକୁ ଦୃଷ୍ଟିରେ ରଖି ଶିଳ୍ପ ପ୍ରତି ବିଶେଷ ସହାୟତା ଦେବା ଲାଗି ବିଭିନ୍ନ ମହଲରୁ ଆସିଛି ପ୍ରସ୍ତାବ I ମେକ ଇନ ଇଣ୍ଡିଆ କ୍ଷେତ୍ରରେ ଶୁଳ୍କଗତ ପରିବର୍ତ୍ତନ ଲାଗି ରଖାଯାଇଛି ଆଶା I ବିଶ୍ବସ୍ତରରେ ପ୍ରତିଯୋଗିତା କରିବା ଲାଗି ଶିଳ୍ପ କ୍ଷେତ୍ରକୁ ଅଧିକ ପ୍ରାଧାନ୍ୟ ଦେବା ଲାଗି ଦାବି ହୋଇଛି I ସେହିପରି ଇଭି, ସୌର ଯନ୍ତ୍ରପାତି, ପ୍ରତିରକ୍ଷା, ପ୍ରସ୍ତୁତି, ସେମିକଣ୍ଡକ୍ଟର କ୍ଷେତ୍ରକୁ ଗୁରୁତ୍ବ ଦେବା ଲାଗି ପ୍ରସ୍ତାବ ଦିଆଯାଇଛି I ପ୍ରତିଯୋଗିତା ବୃଦ୍ଧି, ଧାରାବାହିକ ଯୋଗାଣ, ଦୀର୍ଘସୂତ୍ରୀ ଟିଭି ମାନୁଫାକ୍ଚରିଂ କ୍ଷେତ୍ରକୁ ବି ଗୁରୁତ୍ବ ଦେବାକୁ ହୋଇଛି ଦାବି I ବାଣିଜ୍ୟଗତ ପ୍ରତିବନ୍ଧକ ହଟାଇବା, ଅକ୍ଷୟ ଶକ୍ତିର ବିକାଶ, ହାଇଟେକ ଅଟୋମେସନ, ଡିଜିଟାଲ ଟ୍ରାନ୍ସଫର୍ମେସନ, ଏମଏସଏମଇ କ୍ଷେତ୍ରକୁ ସୁଦୃଢ଼଼ କରିବା ଲାଗି ବଜେଟରେ ପଦକ୍ଷେପ ନେଇପାରନ୍ତି ଅର୍ଥମନ୍ତ୍ରୀ I
ରାଜ୍ୟ କ୍ୟାବିନେଟରେ ୧୦ଟି ବିଭାଗର ୧୨ଟି ପ୍ରସ୍ତାବକୁ ଅନୁମୋଦନ ମିଳିଛି
ଭୁବନେଶ୍ବର : ରାଜ୍ୟ ସମବାୟ ନୀତି ୨୦୨୬କୁ କ୍ୟାବିନେଟର ଅନୁମୋଦନ। ନୂଆ ନୀତିରେ ସମବାୟ ଭିତ୍ତିଭୂମି ଓ ଟେକ୍ନୋଲୋଜିର ପ୍ରୟୋଗକୁ ମିଳିଛି ଗୁରୁତ୍ବ। ଢେଙ୍କାନାଳର ଗଜମରାରେ ହେବ ଇଣ୍ଟିଗ୍ରେଟେଡ଼ ନ୍ୟୁ-ଏଜ୍ ମ୍ୟାନୁଫାକଚରିଂ କମ୍ପ୍ଲେକ୍ସ। କଲ୍ୟାଣୀ ଗୃପ ଏଥିରେ ୧୭ ହଜାର ୨୫୦କୋଟି ଟଙ୍କା ନିବେଶ କରିବ। ଏହି ପ୍ରକଳ୍ପ ଦ୍ଵାରା ୧୨ ହଜାର ନିଯୁକ୍ତି ସୁଯୋଗ ସୃଷ୍ଟି ହେବ। କଞ୍ଚାମାଲରୁ ଷ୍ଟିଲ, ଷ୍ଟିଲରୁ ବିଭିନ୍ନ ପ୍ରଡ଼କ୍ଟ ବାହାରିବ। ଟିଟାନିୟମ, ସ୍ପେସାଲ ଷ୍ଟିଲ, ଅଟୋ କମ୍ପୋନେଣ୍ଟ, ଏରୋସ୍ପେଶ, ପ୍ରତିରକ୍ଷା ସାମଗ୍ରୀଏଠାରେ ତିଆରି ହେବ। ଡାଉନଷ୍ଟ୍ରିମ ଇଣ୍ଟଷ୍ଟ୍ରୀକୁ ମିଳିବ ପ୍ରୋତ୍ସାହନ। ରାଜ୍ୟ କ୍ୟାବିନେଟରେ ଏହି ପ୍ରସ୍ତାବକୁ ଅନୁମୋଦନ ମିଳିଛି। ମୁଖ୍ୟମନ୍ତ୍ରୀଙ୍କ ଅଧ୍ୟକ୍ଷତାରେ ବସିଥିବା ରାଜ୍ୟ କ୍ୟାବିନେଟରେ ୧୦ଟି ବିଭାଗର ୧୨ଟି ପ୍ରସ୍ତାବକୁ ଅନୁମୋଦନ ମିଳିଛି। ଏହା ସହ ଓଡ଼ିଶା ୟୁନିଫର୍ମ ସେବା କର୍ମଚାରୀ ଚୟନ ଆୟୋଗ ଅଧ୍ୟକ୍ଷ ଏବଂ ସଦସ୍ୟ ନିଯୁକ୍ତି ସଂପର୍କିତ ପ୍ରସ୍ତାବ ବି କ୍ୟାବିନେଟରେ ପାରିତ ହୋଇଛି। ଓପିଏସସି ଢାଞ୍ଚାରେ ଏହି ଆୟୋଗରେ ଅଧ୍ୟକ୍ଷ ଏବଂ ସଦସ୍ୟ ନିଯୁକ୍ତି ହେବେ ।
ଦୁବାଇ ଓ ସିଙ୍ଗାପୁରକୁ ସିଧାସଳଖ ବିମାନ ସେବା ମାର୍ଚ୍ଚ ୩୧ ଯାଏଁ ଜାରି ରହିବ ବୋଲି କ୍ୟାବିନେଟରେ ନିଷ୍ପତ୍ତି ହୋଇଛି। ମାର୍ଚ୍ଚ ପରେ ଏହାର ଅବଧି ବୃଦ୍ଧି ନିଷ୍ପତ୍ତି ମୁଖ୍ୟମନ୍ତ୍ରୀ ନେବେ। ଫେବୃଆରୀ ୧୩ ଯାଏଁ ସରକାରଙ୍କ ସହଯୋଗରେ ଦୁବାଇ ଓ ସିଙ୍ଗାପୁରକୁ ବିମାନ ଚାଲିବାର ଥିଲା। ସ୍ବାସ୍ଥ୍ୟ ବିଭାଗର ନର୍ସିଂ କ୍ୟାଡ଼ର ଭଳି ଶ୍ରମ ବିଭାଗ ଅଧୀନରେ ଥିବା ଇଏସଆଇ ହସ୍ପିଟାଲରେ ନର୍ସମାନଙ୍କ ପାଇଁ ସ୍ବତନ୍ତ୍ର କ୍ୟାଡ଼ରକୁ କ୍ୟାବିନେଟ ଅନୁମୋଦନ କରିଛି। ଏହା ସହ ବିଜ୍ଞାନ ଓ କାରିଗରୀ ବିଭାଗର ନୂଆ ଯୋଜନା ‘ରାଜ୍ୟ ବିଜ୍ଞାନ ଓ ବୈଷୟିକ ପରିଷଦ’କୁ କ୍ୟାବିନେଟ ଅନୁମୋଦନ ମିଳିଛି। ୨୦୨୫-୨୬ରୁ ୨୦୨୯-୩୦ ଯାଏଁ ଏହି ଯୋଜନା ପାଇଁ ୨୫୪ କୋଟି ୮୫ ଲକ୍ଷର ବ୍ୟବସ୍ଥା ହୋଇଛି। ମେଧାବୀ ଛାତ୍ରଛାତ୍ରୀଙ୍କୁ ବିଜ୍ଞାନରେ ଉଚ୍ଚଶିକ୍ଷା ଏବଂ ଗବେଷଣା କରିବାକୁ ଉତ୍ସାହିତ କରିବା ଯୋଜନାର ମୁଖ୍ୟ ଉଦ୍ଦେଶ୍ୟ। ଓଡ଼ିଆ ଭାଷା, ସାହିତ୍ୟ ଓ ସଂସ୍କୃତି ବିଭାଗ, ଶିଳ୍ପ ବିଭାଗ, ଜଳ ସମ୍ପଦ ବିଭାଗ, ଶ୍ରମ ଓ କର୍ମଚାରୀ ରାଜ୍ୟ ବୀମା ବିଭାଗ, ବିଜ୍ଞାନ ଓ କାରିଗରୀ, ଆଇନ, ସମବାୟ, ବାଣିଜ୍ୟ ଓ ପରିବହନ, ଇସ୍ପାତ ଓ ଖଣି ବିଭାଗ, ସଂସଦୀୟ ବ୍ୟାପାର ବିଭାଗରୁ ଗୋଟିଏ ଲେଖାଏଁ ଏବଂ ସାଧାରଣ ପ୍ରଶାସନ ଓ ସାଧାରଣ ଅଭିଯୋଗ ବିଭାଗର ୨ଟି ଏହିପରି ମୋଟ ୧୨ ଟି ପ୍ରସ୍ତାବ କ୍ୟାବିନେଟରୋ ପାରିତ ହୋଇଛି।
ଇରାନ ସହିତ ଡବଲ ଗେମ୍ ଖେଳୁଛି ସାଉଦି ଆରବ !
ନନ୍ଦିଘୋଷ ବ୍ୟୁରୋ : ମଧ୍ୟପ୍ରାଚ୍ୟରେ ଇରାନ ଏବଂ ଆମେରିକା ମଧ୍ୟରେ ଉତ୍ତେଜନା ଶୀର୍ଷରେ ପହଞ୍ଚିଛି। ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ବାରମ୍ବାର ଇରାନ ବିରୁଦ୍ଧରେ ସାମରିକ କାର୍ଯ୍ୟାନୁଷ୍ଠାନ ଧମକ ଦେଇଛନ୍ତି ଏବଂ ଉପସାଗରୀୟ ଅଞ୍ଚଳରେ ବ୍ୟାପକ ପରିମାଣରେ ଆମେରିକୀୟ ସୈନ୍ୟ ମୁତୟନ କରିବାକୁ ନିର୍ଦ୍ଦେଶ ଦେଇଛନ୍ତି। ଏହି ବଢ଼ୁଥିବା ସଂଘର୍ଷରେ ସାଉଦି ଆରବର ଭୂମିକା ବିଷୟରେ ଗମ୍ଭୀର ପ୍ରଶ୍ନ ଉଠିଛି।
ଗୋଟିଏ ପଟେ, ରିୟାଦ ସାର୍ବଭୌମ ମଞ୍ଚରେ ଇରାନର ସାର୍ବଭୌମତ୍ୱ ପ୍ରତି ସମ୍ମାନ ଏବଂ ଏକ କୂଟନୈତିକ ସମାଧାନର ସମର୍ଥନ କରୁଥିବା ଦେଖାଯାଉଛି, ଅନ୍ୟପଟେ, ବନ୍ଦ ଦ୍ୱାର ପଛରେ, ଏହା ଆମେରିକାକୁ ଇରାନ ଉପରେ ଆକ୍ରମଣ କରିବାକୁ ଉତ୍ସାହିତ କରୁଥିବା ଦେଖାଯାଉଛି।
ଆମେରିକୀୟ ୱେବସାଇଟ୍ ଆକ୍ସିଓସର ଏକ ରିପୋର୍ଟ ଅନୁଯାୟୀ, ସାଉଦି ପ୍ରତିରକ୍ଷା ମନ୍ତ୍ରୀ ପ୍ରିନ୍ସ ଖାଲିଦ ବିନ୍ ସଲମାନ ସମ୍ପ୍ରତି ୱାଶିଂଟନରେ ଏକ ବ୍ୟକ୍ତିଗତ ବ୍ରିଫିଂ ସମୟରେ କହିଥିଲେ ଯେ ଯଦି ରାଷ୍ଟ୍ରପତି ଟ୍ରମ୍ପ ଇରାନ ବିରୁଦ୍ଧରେ ତାଙ୍କର ଧମକକୁ ପାଳନ ନ କରନ୍ତି, ତେବେ ତେହେରାନ ଆହୁରି ଶକ୍ତିଶାଳୀ ହୋଇ ଉଭା ହେବ। ବୈଠକରେ ଉପସ୍ଥିତ ଚାରିଟି ସୂତ୍ର ଅନୁଯାୟୀ, ଖାଲିଦ ବିନ୍ ସଲମାନ ବିଶ୍ୱାସ କରୁଥିଲେ ଯେ ବର୍ତ୍ତମାନ ସାମରିକ କାର୍ଯ୍ୟାନୁଷ୍ଠାନ ସ୍ଥଗିତ ରଖିବା ଦ୍ୱାରା ଇରାନ ଅଧିକ ସାହସୀ ହେବ। ଏହି ବିବୃତ୍ତି ସାଉଦି ଆରବର ସାର୍ବଜନୀନ ନୀତିର ସମ୍ପୂର୍ଣ୍ଣ ବିପରୀତ। ସାର୍ବଜନୀନ ମଞ୍ଚରେ, ସାଉଦି ନେତୃତ୍ୱ ଲଗାତାର ଆଞ୍ଚଳିକ ଉତ୍ତେଜନା ବୃଦ୍ଧିର ବିପଦ ବିଷୟରେ ଚେତାବନୀ ଦେଇଛନ୍ତି ଏବଂ ସାମରିକ ମୁକାବିଲାକୁ ଏଡାଇବାକୁ ଅନୁରୋଧ କରିଛନ୍ତି।
ଆଶ୍ଚର୍ଯ୍ୟର କଥା ହେଉଛି, ମାତ୍ର ତିନି ସପ୍ତାହ ପୂର୍ବରୁ ସାଉଦି ଯୁବରାଜ ମହମ୍ମଦ ବିନ୍ ସଲମାନ ନିଜେ ରାଷ୍ଟ୍ରପତି ଟ୍ରମ୍ପଙ୍କୁ ଇରାନ ଉପରେ ଆକ୍ରମଣ ନକରିବାକୁ ଅନୁରୋଧ କରିଥିଲେ। ଆମେରିକୀୟ ଅଧିକାରୀଙ୍କ ଅନୁଯାୟୀ, ଟ୍ରମ୍ପ ସେହି ଆଲୋଚନା ପରେ ତୁରନ୍ତ ସାମରିକ କାର୍ଯ୍ୟାନୁଷ୍ଠାନକୁ ସ୍ଥଗିତ ରଖିଥିଲେ। ଏବେ ପ୍ରଶ୍ନ ଉଠୁଛି: ସାଉଦି ଆରବର ମତ ଏତେ ଶୀଘ୍ର କାହିଁକି ବଦଳିଗଲା? ଆମେରିକୀୟ ସୂତ୍ରଗୁଡ଼ିକ ବିଶ୍ୱାସ କରନ୍ତି ଯେ ରିୟାଦ ଅନୁଭବ କରିବାକୁ ଆରମ୍ଭ କରିଛି ଯେ ଟ୍ରମ୍ପ ପ୍ରଶାସନ ଆକ୍ରମଣ କରିବାକୁ ସ୍ଥିର କରିଛି। ଫଳସ୍ୱରୂପ, ସାଉଦି ନେତୃତ୍ୱ ଖୋଲାଖୋଲି ବିରୋଧ କରି ନିଜକୁ ବିପଦରେ ପକାଇବାକୁ ଚାହୁଁନାହିଁ।
ଏହି ସପ୍ତାହରେ, ମହମ୍ମଦ ବିନ୍ ସଲମାନ ଇରାନ ରାଷ୍ଟ୍ରପତିଙ୍କ ସହ ଏକ ଫୋନ୍ କଥାବାର୍ତ୍ତାରେ ସ୍ପଷ୍ଟ ଭାବରେ କହିଥିଲେ ଯେ ସାଉଦି ଆରବ ଆମେରିକାକୁ ଇରାନ ଉପରେ ଆକ୍ରମଣ କରିବା ପାଇଁ ଏହାର ଆକାଶ ସୀମା ବ୍ୟବହାର କରିବାକୁ ଅନୁମତି ଦେବ ନାହିଁ। ସାଉଦି ସରକାର ଏକ ସରକାରୀ ବିବୃତ୍ତିରେ ଇରାନର ସାର୍ବଭୌମତ୍ୱକୁ ସମ୍ମାନ ଦେବା ଏବଂ କୂଟନୈତିକ ସମାଧାନ ଖୋଜିବା ପାଇଁ ନିଜର ପ୍ରତିବଦ୍ଧତାକୁ ମଧ୍ୟ ଦୋହରାଇଥିଲେ।
କିନ୍ତୁ ପରଦା ପଛରେ ଚିତ୍ର ଭିନ୍ନ ଦେଖାଯାଉଛି। ରିପୋର୍ଟ ଅନୁଯାୟୀ, ଶୁକ୍ରବାର ମଧ୍ୟପ୍ରାଚ୍ୟ ବିଶେଷଜ୍ଞ ଏବଂ ଯିହୂଦୀ ସଂଗଠନର ପ୍ରତିନିଧିମାନଙ୍କ ସହିତ ପ୍ରାୟ ଏକ ଘଣ୍ଟା ଧରି ଅନୁଷ୍ଠିତ ବୈଠକରେ ଖାଲିଦ ବିନ୍ ସଲମାନ କହିଛନ୍ତି ଯେ ଟ୍ରମ୍ପଙ୍କୁ ଏବେ ସାମରିକ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ପଡିବ, ଯଦିଓ ଏକ ଆଞ୍ଚଳିକ ଯୁଦ୍ଧର ବିପଦକୁ ହ୍ରାସ କରିବା ପାଇଁ ମଧ୍ୟ ପ୍ରୟାସ ଆବଶ୍ୟକ ହେବ।
ଏହି ସମୟରେ, ଆମେରିକା ସାଉଦି ଆରବକୁ ପ୍ରାୟ ୯ ବିଲିୟନ ଡଲାର ମୂଲ୍ୟର ପାଟ୍ରିଅଟ୍ ଆଡଭାନ୍ସଡ୍ କ୍ୟାପାବିଲିଟି-୩ କ୍ଷେପଣାସ୍ତ୍ର ଏବଂ ସମ୍ପର୍କିତ ଉପକରଣ ବିକ୍ରୟକୁ ଅନୁମୋଦନ କରିଛି। ପେଣ୍ଟାଗନ କହିଛି ଯେ ଏହି ଚୁକ୍ତି ସାଉଦି ଆରବର ବାୟୁ ଏବଂ କ୍ଷେପଣାସ୍ତ୍ର ପ୍ରତିରକ୍ଷା କ୍ଷମତାକୁ ମଜବୁତ କରିବ। ରାଜନୈତିକ ବିଶ୍ଳେଷକମାନେ ଏହାକୁ କେବଳ ଏକ ଅସ୍ତ୍ର ବିକ୍ରୟ ନୁହେଁ, ବରଂ ସମ୍ଭାବ୍ୟ ଇରାନ ପ୍ରତିଶୋଧର ମୁକାବିଲା ପାଇଁ ଏକ ପ୍ରସ୍ତୁତି ଭାବରେ ଦେଖନ୍ତି।
ଇଲେକ୍ଟ୍ରିକ୍ ବସ୍ ଚାଳନା ତାଲିମ ପାଇଁ ପୁଣେ ଗଲେ ୨୦ ଜଣ ମହିଳା ଡ୍ରାଇଭର
ଭୁବନେଶ୍ବର : ମହିଳା ଚଳାଇବେ ଆମ ବସ୍ । ଇଲେକ୍ଟ୍ରିକ୍ ବସ୍ ଚାଳନା ତାଲିମ ପାଇଁ ପୁଣେ ଗଲେ ୨୦ ଜଣ ମହିଳା ଡ୍ରାଇଭର । କ୍ୟାପିଟାଲ ରିଜିଅନ୍ ଅର୍ବାନ୍ ଟ୍ରାନ୍ସପୋର୍ଟ ଆମ ବସ୍ ସେବା ପାଇଁ ମହିଳା ଡ୍ରାଇଭରମାନଙ୍କୁ ସାମିଲ କରିବା ଆରମ୍ଭ କରିଛି । ପ୍ରଥମ ପର୍ଯ୍ୟାୟରେ ପୁଣେରେ ପ୍ରଶିକ୍ଷଣ ନେବା ପାଇଁ ଭାରୀ ମୋଟର ଯାନ ଲାଇସେନ୍ସ ଥିବା ୨୦ ଜଣ ମହିଳା ଡ୍ରାଇଭରଙ୍କୁ ଚୟନ କରାଯାଇଛି । ଏହି ପ୍ରଶିକ୍ଷାର୍ଥୀମାନେ ଆଜି ବିମାନ ଯୋଗେ ପୁଣେ ଅଭିମୁଖେ ଯାତ୍ରା କରିଛନ୍ତି । ପୁଣେ ଯିବା ପୂର୍ବରୁ ମହିଳା ଡ୍ରାଇଭରମାନଙ୍କୁ ଗୃହ ଓ ନଗର ଉନ୍ନୟନ ମନ୍ତ୍ରୀ ଏବଂ ବିଭାଗର ପ୍ରମୁଖ ସଚିବ ଶୁଭେଚ୍ଛା ଜଣାଇଥିଲେ । ତାଲିମ କାର୍ଯ୍ୟକ୍ରମକୁ ସଫଳତାର ସହ ସମାପ୍ତ କରିବା ଏବଂ ଜନ ପରିବହନ ସେବାରେ ଉଦାହରଣ ସୃଷ୍ଟି କରିବା ପାଇଁ ସେମାନଙ୍କୁ ଉତ୍ସାହିତ କରିଥିଲେ । ୨ ଫେବୃଆରୀରୁ ୧୫ ଫେବୃଆରୀ ୧୪ ଦିନ ଧରି ଏକ୍କା ମୋବିଲିଟି ପ୍ଲାଣ୍ଟରେ ସେମାନେ ପ୍ରଶିଖ୍ଷଣ ନେବେ । କାର୍ଯ୍ୟକ୍ରମରେ ଇଲେକ୍ଟ୍ରିକ୍ ବସ୍ ପରିଚାଳନା, ଉନ୍ନତ ଡ୍ରାଇଭିଂ, ସୁରକ୍ଷା ପ୍ରୋଟୋକଲ୍ ଏବଂ ପରିଚାଳନାଗତ ଉତ୍କର୍ଷତା ଉପରେ ଧ୍ୟାନ ଦିଆଯିବ । ପ୍ରଶିକ୍ଷାର୍ଥୀମାନେ ଫେବୃଆରୀ ୧୭ ପ୍ରଶିକ୍ଷଣ ସାରି ଫେରିବେ । ଖାରବେଳ ଭବନର ତୃତୀୟ ମହଲା ସମ୍ମିଳନୀ କକ୍ଷରେ ଅନୁଷ୍ଠିତ ଏହି ସମ୍ବର୍ଦ୍ଧନା ଉତ୍ସବରେ କ୍ରୁଟର ପରିଚାଳନା ନିର୍ଦ୍ଦେଶକ ସଞ୍ଜୟ ବିଶ୍ୱାଳ, ମହାପ୍ରବନ୍ଧକ ସହଦେବ ସମାଧିଆ ଏବଂ ବିଭାଗର ବରିଷ୍ଠ ଅଧିକାରୀମାନେ ଉପସ୍ଥିତ ଥିଲେ ।
ସଜେଇ ହୋଇଛି କଟକ ଗାନ୍ଧୀ ପାର୍କ, ମନ ଟାଣୁଛି ଜାତି ଜାତିକା ଫୁଲ
କଟକ : ମନ ଟାଣୁଛି ଜାତି ଜାତିକା ଫୁଲ । ଗୋଲାପ, ସୂର୍ଯ୍ୟମୁଖୀ, ଗେଣ୍ଡୁ, ଜିନିଆ ସହ ଦେଶ ବିଦେଶର ବହୁ ଫୁଲର ସମ୍ଭାର । ଗୋଟିଏ ସ୍ଥାନରେ ବିଭିନ୍ନ ରଙ୍ଗର ଫୁଲକୁ ଦେଖି ଉତ୍ସାହିତ ଦର୍ଶକ ଓ ପ୍ରକୃତିପ୍ରେମୀ । କଟକ ବେଲଭ୍ଯୁ ଛକ ସ୍ଥିତ ଗାନ୍ଧୀ ପାର୍କର ସିଏମସି, ସିଡିଏ, ଏବଂ ନେଚର୍ସ କ୍ଲବ୍ ପକ୍ଷରୁ ଆରମ୍ଭ ହୋଇଛି ପୁଷ୍ପ ପ୍ରଦର୍ଶନୀ । ଏହି ପ୍ରଦର୍ଶନରୀ ଲାଗିଛି ୧୪୦ରୁ ଅଧିକ ପ୍ରକାରର ଫୁଲ । ଏହାସହ ବିଭିନ୍ନ ଔଷଧୀୟ ବୃକ୍ଷ ସ୍ନେକ୍ ପ୍ଲାଣ୍ଟ, ଘିଁ-କୁଆଁରୀ, ରବର୍ ଗଛ, ମନି ପ୍ଲାଣ୍ଟ ଓ ଅମ୍ଲଜାନ ପାଇଁ ତୁଳସୀ ଗଛ ସହ ବିଭିନ୍ନ କ୍ଯାକଟସ ଓ ଅନ୍ୟ ଗଛ ସବୁ ସଜେଇ ହୋଇ ରହିଛି । ଏହାକୁ ଦେଖିବାକୁ ପ୍ରତିଦିନ ଜମୁଛି ଦର୍ଶକଙ୍କ ଭିଡ଼ ।
ଜାତି ଜାତିକା ଫୁଲ ସହ ସେଲଫି ନେବାକୁ ଧାଡ଼ି ଲଗାଇଛନ୍ତି ଲୋକେ । କିଏ ଫୁଲକୁ ଦେଖି ଏହାକୁ କିଣି ଘରେ ଲଗାଇବାକୁ ମନ କରୁଛି ତ କିଏ ନିଜ କ୍ଯାମେରାରେ ଫୁଲ ଗହଣରେ ଫଟୋ ଉଠାଉଛି । ଭୁବନେଶ୍ବର ପରେ କଟକରେ ଏପରି ପୁଷ୍ପ ପ୍ରଦର୍ଶନୀ ଦେଖି ବେଶ ଉତ୍ସାହିତ ହୋଇଛନ୍ତି ସହରିଆ । ସେପଟେ ଲୋକଙ୍କ ଆଗ୍ରହକୁ ଦେଖି ଏପରି ଫୁଲ ପ୍ରଦର୍ଶନୀ ଆଗାମୀ ଦେନରେ କଟକର ସବୁ ପାର୍କରେ କରିବାକୁ ଘୋଷଣା କରିଛନ୍ତି ମେୟର । ଶନିବାର ଠାରୁ ଆରମ୍ଭ ହୋଇଥିବା ଏହି ପୁଷ୍ପ ପ୍ରଦର୍ଶନୀ ଦୁଇଦିନ ଧରି ଚାଲିବାକୁ ଥିବାରୁ ଏହାକୁ ଦେଖିବାକୁ କେହି ହାତଛଡ଼ା କରୁ ନାହାନ୍ତି ।
ଓଡ଼ିଶା ଅଗ୍ନିଶମ ବିଭାଗ ପକ୍ଷରୁ ସଡ଼କ ଦୁର୍ଘଟଣା ନେଇ ମକଡ୍ରିଲ.
ଭୁବନେଶ୍ୱର : ଭୟଙ୍କର ସଡ଼କ ଦୁର୍ଘଟଣା । କାରକୁ ଧକ୍କା ଦେଇଛି ମିଲ୍କ ଭ୍ଯାନ । ଭାଙ୍ଗିରୁଜି ଚୁରମାର ହୋଇଯାଇଛି ଗାଡ଼ି । ଆଉ ଗାଡ଼ି ଭିତରେ ଫସି ରହିଛନ୍ତି ଡ୍ରାଇଭର ଓ ଗାଡ଼ି ଚାଳକ । ଡୋରକୁ କାଟି ବାହାର କରୁଛନ୍ତ ଉଦ୍ଧାରକାରୀଦଳ । ତୁରନ୍ତ ପ୍ରାଥିମିକ ଚିକିତ୍ସା ଦେବା ସହ ହସପିଟାଲ ନିଆଯାଉଛି । ହେଲେ ଏହା ସତ ସତିକା ନୁହେଁ । ଦୁର୍ଘଟଣା ସମୟରେ କିଭଳି ନିଜର ଦାୟୀତ୍ବ ନିର୍ବାହ କରନ୍ତି ଏବଂ ସେଥିପାଇଁ କେଉଁ ପ୍ରକାର ଅତ୍ୟାଧୁନିକ ଯନ୍ତ୍ରପାତି ଓ ଉପକରଣ ବ୍ୟବହାର କରାଯାଏ ସେନେଇ ଡେମୋ ଦେଖାଇଲେ ଅଗ୍ନିଯୋଦ୍ଧା । ଓଡ଼ିଶା ଅଗ୍ନିଶମ ବାହିନୀ ପକ୍ଷରୁ କରାଯାଇଛି ଏପରି ଏକ ମକଡ୍ରିଲ୍ ।
ଆପଦା କାଳରେ ହାଇଡ୍ରୋଲିକ କଟର ସାହାଯ୍ୟରେ ଦୁର୍ଘଟଣା ଗ୍ରସ୍ତ କାର୍ କୁ କାଟି ଆହତଙ୍କୁ କିପରି ଉଦ୍ଧାର କରାଯାଏ । ଲିଫ୍ଟିଂ ବ୍ୟାଗ, ଶହେ ଟନ୍ ରୁ ଉର୍ଦ୍ଧ୍ବ ଓଜନକୁ ଉଠାଇବାର କାର୍ଯ୍ୟ କରାଯାଇଥାଏ । ହାଇଡ୍ରୋଲିକ ଡ୍ରୋର ବ୍ରେକର୍, ଅତ୍ୟାଧୁନିକ କ୍ୟାମେରା, କଙ୍କରିଟ କଟର, ରେସକ୍ୟୁ ଟେଣ୍ଡେର, ମିଷ୍ଟ ବାଇକ, ଫାୟାର ଏଣ୍ଟ୍ରି ସୁଟ ଡେମୋ, ୱାଟର କେନନ ଡେମୋ, ଫାୟାର ଫାଇଟିଙ୍ଗ ରୋବୋଟିକ ମନିଟର, ପ୍ଲାଜମା କଟର, ସ୍କୁବା ଡେମୋ, ବାଇକ ପିରାମିଡ, ମରଚରି ଭ୍ୟାନ୍, ଆମ୍ବୁଲାନ୍ସ , ସ୍ବତନ୍ତ୍ର ଫାୟାର ଫାଇଟ୍ ଭ୍ୟାନ୍ ଭଳି ସର୍ବମୋଟ ୧୨ ଟି ଅତ୍ୟାଧୁନିକ ଜ୍ଞାନକୌଶଳ ପ୍ରଦର୍ଶନ କରିଥିଲେ ଅଗ୍ନିଶମ ବାହିନୀ । ହାଇଷ୍ଟ୍ରାନ୍ସ ମେସିନ ଦ୍ବାରା ୩ କିଲୋମିଟର ଦୂରରେ ଥିବା ଜଳାଶୟରୁ ପାଣି ଅଣାଯାଇ ନିଆଁ ଆୟୋତ କରାଯାଇ ପାରିବ । ଗଣମାଧ୍ୟମର ପ୍ରତିନିଧିମାନଙ୍କୁ ନେଇ ଏକ କର୍ମଶାଳାର ଆୟୋଜନ କରାଯାଇଥିଲା । ସାରା ଓଡ଼ିଶାରେ ରହିଛି ୩୪୬ ଫାୟାର ବ୍ରିଗେଡ ଷ୍ଟେସନ । ଓଡ଼ିଶା ଅଗ୍ନିଶମ ବାହିନୀ ପାଖରେ ୧୨ଶହ ଉଦ୍ଧାରକାରୀ ଭ୍ୟାନ୍ ରହିଛି । ଜରୁରୀକାଳୀନ ସେବା କକ୍ଷ ନିର୍ମାଣ ପାଇଁ ୨୯ କୋଟି ଖର୍ଚ୍ଚ ପାଇଁ ମିଳିଛି ଅନୁମତି ।
ମହାମହିମଙ୍କ ପାଇଁ ସୁରକ୍ଷା ବଳୟରେ ପୁରୀ ସହର..
ପୁରୀ : ପିଣ୍ଡଦାନ କରିବେ ମହାମହିମ। ଶ୍ବେତଗଙ୍ଗାରେ ପରିତ୍ର ପୁଷ୍କରିଣୀରେ ପିତୃପୁରୁଷଙ୍କ ଉଦ୍ଦେଶ୍ଯରେ ଦେବେ ଶ୍ରାଦ୍ଧ । ଏଥିପାଇଁ ୩ ତାରିଖରେ ବାୟୁସେନାର ସ୍ବତନ୍ତ୍ର ବିମାନରେ ପୁରୀ ଆସୁଛନ୍ତି ରାଷ୍ଟ୍ରପତି ଦ୍ରୌପଦୀ ମୁର୍ମୁ । ଲୋକ ଭବନରେ ରାତ୍ରୀ ଯାପନ ପରେ ୪ ତାରିଖ ସକାଳୁ ସକାଳୁ ଶ୍ବେତଗଙ୍ଗା ଯାଇ କରିବେ ପିଣ୍ଡଦାନ । ଏହାପରେ ଶ୍ରୀମନ୍ଦିର ଯାଇ ମହାପ୍ରଭୁଙ୍କୁ ଦର୍ଶନ କରି ନେବେ ଆଶିଷ । ରାଷ୍ଟ୍ରପତିଙ୍କ ଗସ୍ତ ଦୃଷ୍ଟିରୁ ପୁରୀ ହେଲିପ୍ୟାଡ, ଲୋକଭବନ, ଶ୍ୱେତଗଙ୍ଗା, ଶ୍ରୀମନ୍ଦିର ଓ ସହରରେ ସୁରକ୍ଷାକୁ କଡ଼ାକଡ଼ି କରାଯାଇଛି । ୩୦ ପ୍ଲାଟୁନ ଫୋର୍ସ ସହ ଆଣ୍ଟି ରହିବେ। ଶ୍ରୀମନ୍ଦିର ଚାରିପଟେ ଥିବା ସମସ୍ତ ହୋଟେଲ, ଲଜିଂ, ଜନଗହଳି ସ୍ଥାନ ସହ ସବୁଠି ଯାଞ୍ଚ କରାଯାଇଛି ।
ଶ୍ରୀମନ୍ଦିର ଗସ୍ତବେଳେ ରାଷ୍ଟ୍ରପତିଙ୍କୁ ଉପହାର ସ୍ବରୂପ ମହାପ୍ରଭୁଙ୍କ ଶ୍ରୀଅଙ୍ଗ ଲାଗି ଖଣ୍ଡୁଆ, ମହାପ୍ରସାଦ ଉପହାର ପ୍ରଦାନ କରାଯିବ । ସେପଟେ ୩ ତାରିଖ ପୁରୀ ଲୋକ ଭବନରେ ରାଷ୍ଟ୍ରପତିଙ୍କୁ ରାତ୍ରୀ ଭୋଜନରେ ମହାପ୍ରସାଦ ଦିଆଯିବ । ମହାପ୍ରସାଦ ସହ ବିଭିନ୍ନ ପ୍ରକାର ବ୍ୟଞ୍ଜନ, ପିଠା, ମିଠା ଆଦି ପରସି ଦେବାକୁ କହିଛନ୍ତି ଶ୍ରୀମନ୍ଦିର ବରିଷ୍ଠ ଦେବାୟତ । ଶ୍ୱେତଗଙ୍ଗା ପୁଷ୍କରିଣୀ ସଲଗ୍ନରେ ଗଢି ଉଠିଥିବା ବିଭିନ୍ନ ହୋମଷ୍ଟେ ଗୁଡିକରେ ୩ ତାରିଖ ଏବଂ ୪ ତାରିଖରେ କୌଣସି ପର୍ଯ୍ୟଟକଙ୍କ ରହଣି କିଭଳି ନହେବ ସେନେଇ ପର୍ଯ୍ୟଟନ ବିଭାଗ ସହ ଆଲୋଚନା କରିଛନ୍ତି ଏସପି ।
‘ଦବଙ୍ଗ’ ଡାଇରେକ୍ଟର ଅଭିନବ କଶ୍ୟପଙ୍କ ବିରୋଧରେ ସଲମାନଙ୍କ ମାନହାନୀ ମାମଲା
‘ଦବଙ୍ଗ’ ଡାଇରେକ୍ଟର ଅଭିନବ କଶ୍ୟପଙ୍କ ବିରୋଧରେ ସଲମାନଙ୍କ ମାନହାନୀ ମାମଲା
ନନ୍ଦିଘୋଷ ବ୍ୟୁରୋ: ଦବଙ୍ଗ ଫିଲ୍ମର ଡାଇରେକ୍ଟର ଅଭିନବ କଶ୍ୟପ ବଲିଉଡ଼ ସୁପରଷ୍ଟାର ସଲମାନ ଖାନ ଓ ତାଙ୍କ ପରିବାର ସମ୍ପର୍କରେ ବିବାଦୀୟ ବୟାନ ଦେଇଥିଲେ । ତାଙ୍କର ଶେଷ ସାକ୍ଷାତକାର ବହୁତ ଚର୍ଚ୍ଚାରେ ରହିଥିଲା । ଯେଉଁଥିରେ ସେ ସଲମାନଙ୍କ ଅଭିନୟରୁ ନେଇ ତାଙ୍କ ବ୍ୟବହାର ଉପରେ ପ୍ରଶ୍ନ ଉଠାଇ ଥିଲେ । ଅଭିନବ ତାଙ୍କ କ୍ୟାରେକ୍ଟରକୁ ନେଇ ଗମ୍ଭୀର ଆରୋପ ଲଗାଇଥିଲେ । ଯାହା ଉପରେ ସଲମାନଙ୍କ ରିଆକ୍ଟ ଆସିଥିଲା । ଏବେ ଏହି ଘଟଣାରେ କୋର୍ଟଙ୍କ ଏଣ୍ଟ୍ରି ହୋଇଛି । ଯେଉଁଥିରେ ସଲମାନ ଓ ତାଙ୍କ ପରିବାରକୁ ଆସ୍ବସ୍ତି ମିଳିଛି ।
ଅଭିନବଙ୍କୁ କୋର୍ଟଙ୍କ ଭର୍ତ୍ସନା
ଶୁକ୍ରବାର ମୁମ୍ବାଇର ଏକ କୋର୍ଟ ଫିଲ୍ମ ମେକର ଅନୁରାଗ କଶ୍ୟପଙ୍କ ଭାଇ ଅଭିନବ କଶ୍ୟପଙ୍କୁ ସଲମାନ ଖାନ ଏବଂ ତାଙ୍କ ପରିବାର ବିରୋଧରେ ଅପମାନଜନକ କମେଣ୍ଟ କରିବା ଓ ନକରାତ୍ମକ ଭାବନା ସୃଷ୍ଟି କରିବା ଉପରେ ଅସ୍ଥାୟୀ ରୂପେ ସ୍ଥଗିତାଦେଶ ଲଗାଇଛନ୍ତି । ସଲମାନ କୋର୍ଟରେ ମାନହାନୀ ମାମଲା କରିଛନ୍ତି । ସେ ଚାହୁଁଛନ୍ତି କୋର୍ଟ ବୟାନବାଜି ଉପରେ ସ୍ଥାୟୀ ପ୍ରତିବନ୍ଧକ ଲଗାନ୍ତୁ । ସେ ଅଭିନବ କଶ୍ୟପଙ୍କୁ ୯ କୋଟି ଟଙ୍କା କ୍ଷତିପୂରଣ ଦେବାକୁ ଦାବି କରିଛନ୍ତି । ଏହାସହ ବିନା ସର୍ତ୍ତରେ କ୍ଷମା ମାଗିବାକୁ ବି ଦାବି କରିଛନ୍ତି ।
ଅଭିନବ କଶ୍ୟପ ସଲମାନଙ୍କ ବିରୋଧରେ ସେପ୍ଟେମ୍ବରରୁ ଡିସେମ୍ବର ୨୦୨୫ ମଧ୍ୟରେ ୨୬ ଭିଡିଓ ସାକ୍ଷାତାକର ଓ ପୋଡକାଷ୍ଟ ଜାରି କରିଥିଲେ । କୋର୍ଟରେ ଦାୟର ଆବେଦନର ଦାବି କରାଯାଇଛି ଏହି ଭିଡିଓରେ ଡାଇରେକ୍ଟର ତାଙ୍କର ଓ ତାଙ୍କ ପରିବାର ବିରୋଧରେ ଖରାପ କଥା କହିବା, ମିଛ କହିବା ଓ ଅପମାନଜନକ ଶବ୍ଦ ବ୍ୟବହାର କରିଥିଲେ । ଏଥିରେ ଅଭିନବଙ୍କ ବ୍ୟତୀତ ଖୁସବୁ ହଜାରେ ଓ ଏକାଧିକ ସୋସିଆଲ ମିଡିଆ ପ୍ଲାଟଫର୍ମର ନାଁ ରହିଛି ।
ଆବେଦନ ଅନୁସାରେ, ଡାଇରେକ୍ଟର ସଲମାନ ଓ ତାଙ୍କ ପରିବାର ବିରୋଧରେ ଅଭଦ୍ର ଟିପ୍ପଣୀ କରିଥିଲେ । ସେ ସଲମାନଙ୍କ କ୍ୟାରିଅରକୁ ନେଇ ମିଛ ଦାବି କରିଥିଲେ । ଡାଇରେକ୍ଟର ଏକ ସାକ୍ଷାତକାରରେ ଖାନ ପରିବାରକୁ ଦୋଷୀ ବି କହିଥିଲେ । ଏହାସହ ସଲମାନଙ୍କ ଚେହେରା, ତାଙ୍କ ବୟସ ଓ ବ୍ୟକ୍ତିଗତ ଜୀବନକୁ ନେଇ ବହୁତ ଅପଶବ୍ଦ ବ୍ୟବହାର କରିଥିଲେ । ଅଭିନବ କଶ୍ୟପ ସଲମାନଙ୍କ ବାପା ସଲିମ ଖାନ, ଦୁଇ ଭାଇ ଅରବାଜ ଓ ସୋହେଲଙ୍କ ବିରୋଧରେ ବି ଅପମାନଜନକ କଥା କହିଥିଲେ ।
କୋର୍ଟଙ୍କ ଆଦେଶ ?
ସଲମାନଙ୍କ ପାକ୍ଷରୁ ଏହା ଦାବି କରାଯାଇଥିଲା, ଏହି ଲୋକମାନେ ଆଗକୁ ଯେମିତି ତାଙ୍କର ଓ ତାଙ୍କ ପରିବାରର ମାନହାନୀ ହେବା ପରି ଟିପ୍ପଣୀ ନଦିଅନ୍ତି ସେଥିପାଇଁ ପ୍ରତିବନ୍ଧକ ଲଗାନ୍ତୁ । ଏହାସହ ସମସ୍ତ ବିବାଦୀୟ କଣ୍ଟେନ ହଟା ଯିବା ସହ ଡାଇରେକ୍ଟର ବିନା ସର୍ତ୍ତରେ କ୍ଷମା ମାଗନ୍ତୁ । କୋର୍ଟ ବି ଅଭିନବଙ୍କ କମେଣ୍ଟସକୁ ବଦନାମୀ କରିବା, ନିଚା ଦେଖାଇବା, ଅପଶବ୍ଦ ବ୍ୟବହାର କରିବା ଓ ଅପମାନିତ କରିବା ମାନିଛନ୍ତି । କୋର୍ଟ କହିଛନ୍ତି, ଏମିତି ଟିପ୍ପଣୀ ସାଧାରଣ ଲୋକଙ୍କ ଆଗରେ ଜଣଙ୍କର ଇମେଜ ଖରାପ କରିଥାଏ । ଅଭିନବ ଓ ଅନ୍ୟମାନଙ୍କ ଟିପ୍ପଣୀ ସଲମାନ ଓ ତାଙ୍କ ପରିବାରର ଇଜ୍ଜତକୁ ତଳେ ପକାଇଛି । କୋର୍ଟ ସ୍ପଷ୍ଟ କରିଛନ୍ତି, କୌଣସି ବ୍ୟକ୍ତି କାହାରି ପରିବାର ବିରୋଧରେ ଅଭଦ୍ର ଓ ଅପମାନଜନକ ଶବ୍ଦ ବ୍ୟବହାର କରିବା ଅନୁଚିତ ।
ବେଲୁଚିସ୍ତାନର ୧୨ ସହର ଉପରେ ବିଏଲଏର ଆକ୍ରମଣ, ୧୦ ପୋଲିସ କର୍ମୀ ମୃତ
ବେଲୁଚିସ୍ତାନର ୧୨ ସହର ଉପରେ ବିଏଲଏର ଆକ୍ରମଣ, ୧୦ ପୋଲିସ କର୍ମୀ ମୃତ
ନନ୍ଦିଘୋଷ ବ୍ୟୁରୋ: ପୁଣି ଅଶାନ୍ତ ପାକିସ୍ତାନର ବେଲୁଚିସ୍ତାନ ପ୍ରାନ୍ତ । ବେଲୁଚ ଲିବରେଶନ ଆର୍ମୀ (ବିଏଲଏ) ଏକାଥରେ ୧୨ ସହର ଉପରେ କରିଛି ଆତ୍ମଘାତି ଆକ୍ରମଣ । ଏଥିରେ ୧୦ ଜଣ ସୁରକ୍ଷାକର୍ମୀଙ୍କ ମୃତ୍ୟୁ ଘଟିଛି । ପଲଟା ଆକ୍ରମଣରେ ୫୦ରୁ ଅଧିକ ବିଦ୍ରୋହୀଙ୍କ ମୃତ୍ୟୁ ଘଟିଥିବା ଦାବି କରାଯାଉଛି ।
ସ୍ଥାନୀୟ ସୁରକ୍ଷା ଅଧିକାରୀଙ୍କ ଅନୁସାରେ, ଶନିବାର ସକାଳେ ଏକା ସାଙ୍ଗରେ ବେଲୁଚିସ୍ତାନର ୫ଟି ପ୍ରମୁଖ ଜିଲ୍ଲା କ୍ବେଟା, ପସନୀ, ମସ୍ତୁଙ୍ଗ, ନୁସ୍କି ଓ ଗ୍ବାଦରରେ ବିଏଲଏ ବିଦ୍ରୋହୀ ଆକ୍ରମଣ କରିଥିଲେ । ଅନ୍ଧାଧୁନ ଗୁଳିମାଡ଼ ସହ ଆତ୍ମଘାତି ଆକ୍ରମଣ କରାଯାଇଥିଲା । କ୍ବେଟାରେ ସ୍ଥିତି ବହୁତ ଅଶାନ୍ତ ରହିଛି । ଯେଉଁଠି ୪ ପୋଲିସ କର୍ମୀଙ୍କ ମୃତ୍ୟୁ ଘଟିଥିବା ସ୍ପଷ୍ଟ ହୋଇଛି ।
ବିଏଲଏର ‘ଅପରେସନ ହେରଫ’
ଆକ୍ରମଣର ଦାୟିତ୍ବ ବେଲୁଚ ଲିବରେଶନ ଆର୍ମୀ ବା ବିଏଲଏ ନେଇଛି । ସଂଗଠନ ପକ୍ଷରୁ କୁହାଯାଇଛି, ସେମାନଙ୍କ ଟାର୍ଗେଟରେ ସୈନ୍ୟ ଠିକଣା, ପୋଲିସ ଓ ସାଧାରଣ ପ୍ରଶାସନର ଅଧିକାରୀ ଥିଲେ । ରିପୋର୍ଟ ଅନୁସାରେ, ବିଏଲଏ ଏହି ଆକ୍ରମଣ ସହ ତା’ର କଥାକଥିତ ଆପରେଶନ ହେରଫର 2.0 ଆରମ୍ଭ କରିଦେଇଛି । ମାତୃଭୂମିର ରକ୍ଷା ପାଇଁ ନୂଆ ଆକ୍ରମଣର ପ୍ରସ୍ତୁତି ଚାଲିଥିବା ପୂର୍ବରୁ ବିଏଲଏ ପକ୍ଷରୁ କୁହାଯାଇଥିଲା ।
ସୁରକ୍ଷା ବ୍ୟବସ୍ଥା କଡ଼ାକଡ଼ି
ଆକ୍ରମଣ ପରେ ପୂରା ବେଲୁଚିସ୍ତାନରେ ସୁରକ୍ଷା ବ୍ୟବସ୍ଥାକୁ କଡ଼ାକଡ଼ି କରିଦିଆଯାଇଛି । ଏକାଧିକ ସହରରେ ଜରୁରୀକାଳିନ ଟିମ୍ ମୁତୟନ କରାଯାଇଛି । ସମ୍ବେଦନଶୀଳ ଅଞ୍ଚଳରେ ତଲାସୀ ଆରମ୍ଭ କରିଦିଆଯାଇଛି । ଆକ୍ରମଣରେ ସାଧାରଣ ଲୋକଙ୍କ ମୃତ୍ୟୁ ନେଇ ବର୍ତ୍ତମାନ ସୁଦ୍ଧା କିଛି ସ୍ପଷ୍ଟ ହୋଇ ନଥିବା ସ୍ଥାନୀୟ ଅଧିକାରୀ କହିଛନ୍ତି ।
ଦଶକ ପୁରୁଣା ବିଦ୍ରୋହ
ବେଲୁଚିସ୍ତାନରେ ବିଚ୍ଛିନ୍ନତାବାଦୀଙ୍କ ଆନ୍ଦୋଳନ କିଛି ନୂଆ କଥା ନୁହେଁ । ଏକ ଦଶନ୍ଧିରୁ ଏହି ଅଧିକ ହେବ ବେଲୁଚିସ୍ତାନ ବିଦ୍ରୋହର ନିଆଁରେ ଜଳୁଛି । ବେଲୁଚ ସମୁଦାୟ ବର୍ଷ ବର୍ଷ ଧରି ରାଜନୈତିକ ଉପେକ୍ଷା ଓ ଆର୍ଥିକ ଶୋଷଣ ଅଭିଯୋଗ କରି ଆସୁଛନ୍ତି । ଅନ୍ୟପକ୍ଷେ ଏହି ଅଞ୍ଚଳ ଖଣିଜ ସମ୍ପଦରେ ଭରପୂର ରହିଛି । ନିକଟ ଅତୀତରେ ବିଏଲଏ ଅନ୍ୟ ପ୍ରାନ୍ତରୁ ଆସିଥିବା ପାକିସ୍ତାନୀ ନାଗରିକ ଓ ବିଦେଶୀ କମ୍ପାନୀଙ୍କ ଉପରେ ଆକ୍ରମଣ କରୁଛନ୍ତି । ୨୦୨୫ ମାର୍ଚ୍ଚରେ ବେଲୁଚ ଉଗ୍ରବାଦୀ ୪୫୦ ଯାତ୍ରୀ ଥିବା ଏକ ଟ୍ରେନକୁ ହାଇଜାକ କରି ନେଇଥିଲେ । ଯେଉଁଥିରେ ୧୨ରୁ ଅଧିକ ଲୋକଙ୍କ ମୃତ୍ୟୁ ଘଟିଥିଲା ।
ମନ୍ଦିରରୁ ୭୦ ଲକ୍ଷ ଟଙ୍କାର ମିଳିଲା ଗଞ୍ଜେଇ, ପୂଜକ ଗିରଫ
ନନ୍ଦିଘୋଷ ବ୍ୟୁରୋ ; ତେଲେଙ୍ଗାନାର ସାଙ୍ଗାରେଡି ଜିଲ୍ଲାର ନାରାୟଣଖେଡ ମଣ୍ଡଳର ପଞ୍ଚଗମ ଗାଁରେ ପୋଲିସ ଜଣେ ମନ୍ଦିର ପୂଜକଙ୍କୁ ଗିରଫ କରିଛି। ମନ୍ଦିର ପରିସରରେ ଡ୍ରଗ୍ସ କାରବାର କରୁଥିବା ଅଭିଯୋଗ ପରେ ପୂଜକଙ୍କୁ ଗିରଫ କରାଯାଇଛି। ସେ ମନ୍ଦିର ପରିସରରେ ଗେଣ୍ଡୁ ଫୁଲ ଗଛ ସହିତ ଗଞ୍ଜେଇ ଚାଷ କରି ବିକ୍ରୟ କରୁଥିବାର ଜଣାପଡ଼ିଥିଲା। ଡିଟିଏଫ ସାଙ୍ଗାରେଡି ଟିମ୍ ନାରାୟଣଖେଡରେ ପୂଜକଙ୍କୁ ଗିରଫ କରିବା ସହିତ ୭୦ ଲକ୍ଷ ମୂଲ୍ୟର ଗଞ୍ଜେଇ ଜବତ କରିଛି।
ଏହି ମାମଲାଟି ଡ୍ରଗ୍ସ ଚାଲାଣ ସହିତ ଜଡିତ। ପୋଲିସ ସାଙ୍ଗାରେଡ୍ଡି ଜିଲ୍ଲାର ନାରାୟଣଖେଡ ମଣ୍ଡଳର ପଞ୍ଚଗାମ ଗ୍ରାମର ଜଣେ ମନ୍ଦିର ପୂଜକଙ୍କୁ ଗିରଫ କରିଛି। ପୋଲିସ ମନ୍ଦିର ପରିସରରୁ ୭୦ ଲକ୍ଷ ମୂଲ୍ୟର ଗଞ୍ଜେଇ ମଧ୍ୟ ଜବତ କରିଛି। ପୂଜକ ନିଜକୁ ଜଣେ ଆଧ୍ୟାତ୍ମିକ ଗୁରୁ ବୋଲି ଦାବି କରିଥିଲେ, କିନ୍ତୁ ଗଞ୍ଜେଇ ଚାଷ ଏବଂ ବିକ୍ରୟ ପାଇଁ ଗିରଫ ହେବା ପରେ ତାଙ୍କର ଗୁମୁର ଜଣାପଡିଥିଲା । ମନ୍ଦିର ପରିସରରେ ଗେଣ୍ଡୁ ବଗିଚାରେ ଫୁଲ ଚାଷ ନାମରେ ଗଞ୍ଜେଇ ଚାଷ କରାଯାଉଥିଲା।
ଚଢାଉ ସମୟରେ ପୋଲିସ ୬୮୫ଟି ଗଞ୍ଜେଇ ଗଛ, ୧୭.୭୪୧ କିଲୋଗ୍ରାମ ଶୁଖିଲା ଗଞ୍ଜେଇ, ୦.୮୯୭ କିଲୋଗ୍ରାମ ଗଞ୍ଜେଇ ବିହନ, ୩୦ ହଜାର ନଗଦ ଟଙ୍କା, ଏକ ଡିଜିଟାଲ୍ ଓଜନ ମେସିନ୍ ଏବଂ ଏକ ମୋବାଇଲ୍ ଫୋନ୍ ଜବତ କରିଛି।