ନୂଆଦିଲ୍ଲୀ : ଦିଲ୍ଲୀରେ ପୁଣି ସ୍ପିଡ କାର ଆତଙ୍କ। ସୁଭାଷ ନଗର ଇଲାକାରେ ଏକ ସ୍ପିଡ କାର ଧକ୍କାରେ ଗଲା ଫୁଡ ଡେଲିଭରୀ ବୟର ଜୀବନ। ମୃତକ ଜଣକ ଜୋମାଟୋର ଡେଲିଭରୀ ବୟ ବୋଲି ସୂଚନା ମିଳିଛି। ଦୁର୍ଘଟଣା ଘଟାଇଥିବା କାରର ଡ୍ରାଇଭର ମଦ ପିଇଥିଲା ବୋଲି କୁହାଯାଉଛି। କାର୍ ଧକ୍କାରେ ଗୁରୁତର ହେବା ପରେ ଡେଲିଭରୀ ବୟଙ୍କୁ ସ୍ଥାନୀୟ ଲୋକେ ହସ୍ପିଟାଲ ନେଇଥିଲେ। ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ପୋଲିସ ଦୁର୍ଘଟଣାର ତଦନ୍ତ କରୁଥିବାବେଳେ ସିସିଟିଭି ଯାଞ୍ଚ କରୁଛି।
ଆଜିଠୁ ଆରମ୍ଭ ହେବ T-20 ବିଶ୍ବକପର ସୁପର-୮ ମ୍ୟାଚ ; ଖେଳାଯିବ ୧୨ଟି ମ୍ୟାଚ
ନନ୍ଦିଘୋଷ ବ୍ୟୁରୋ : ଆଜିଠୁ ଆରମ୍ଭ ହେବ T-20 ବିଶ୍ବକପର ସୁପର-୮ ମ୍ୟାଚ । ସୁପର 8 ପର୍ଯ୍ୟାୟରେ, ସମସ୍ତ ଦଳକୁ ଚାରିଟି ଲେଖାଏଁ ଦୁଇଟି ଗ୍ରୁପରେ ବିଭକ୍ତ କରାଯାଇଛି । ଏହି ପର୍ଯ୍ୟାୟରେ ମୋଟ ୧୨ଟି ମ୍ୟାଚ୍ ଖେଳାଯିବ। କିଏ ସେମିଫାଇନାଲ୍ ଯିବ ଆଜିଠୁ ମାର୍ଚ୍ଚ ୧ ତାରିଖ ପର୍ଯ୍ୟନ୍ତ ଖେଳାଯିବାକୁ ଥିବା ଏହି ୧୨ଟି ମ୍ୟାଚ୍ ନିର୍ଣ୍ଣୟ କରିବ । ଉଭୟ ଗ୍ରୁପର ଶୀର୍ଷ-2 ପଏଣ୍ଟ ଟେବୁଲରେ ସ୍ଥାନ ପାଇଥିବା ଦଳଗୁଡ଼ିକ ସେମିଫାଇନାଲରେ ପହଞ୍ଚିବେ।
ଗୃପ-୧ ରେ ରହିଛନ୍ତି ଭାରତ, ୱେଷ୍ଟଇଣ୍ଡିଜ୍, ଦକ୍ଷିଣ ଆଫ୍ରିକା, ଜିମ୍ବାୱେ। ସେହିଭଳି ଗୃପ-୨ରେ ପାକିସ୍ତାନ, ନ୍ୟୁଜିଲ୍ୟାଣ୍ଡ, ଇଂଲଣ୍ଡ ଏବଂ ଶ୍ରୀଲଙ୍କା ରହିଛନ୍ତି । ଆଜି ପାକିସ୍ତାନ ଏବଂ ନ୍ୟୁଜିଲ୍ୟାଣ୍ଡ ମଧ୍ୟରେ କେବଳ ଗୋଟିଏ ସୁପର 8 ମ୍ୟାଚ୍ ଖେଳାଯିବ। ଏହି ମ୍ୟାଚ୍ ସନ୍ଧ୍ୟା ୭ଟାରେ ଆରମ୍ଭ ହେବ। ଆସନ୍ତାକାଲି ଅହମ୍ମଦାବାଦରେ ଦକ୍ଷିଣ ଆଫ୍ରିକା ବିପକ୍ଷରେ ଖେଳିବ ଭାରତ ।
ବ୍ରାଜିଲ ରାଷ୍ଟ୍ରପତି ଲୁଇ ଲୁଲା ଦା ସିଲଭାଙ୍କ ଯୁକ୍ତି ; ମାଦୁରୋଙ୍କ ବିଚାର ବାହାର ଦେଶରେ ନକରି ନିଜ ଦେଶରେ କରାଯାଉ
ନନ୍ଦିଘୋଷ ବ୍ୟୁରୋ: ଭେନେଜୁଏଲାର ପୂର୍ବତନ ରାଷ୍ଟ୍ରପତି ନିକୋଲାସ ମାଦୁରୋଙ୍କୁ ଗିରଫ ଘଟଣା। ମାଦୁରୋଙ୍କ ବିଚାର ବାହାର ଦେଶରେ ନକରି ନିଜ ଦେଶରେ କରିବା ଲାଗି ଦାବି କରିଛନ୍ତି ବ୍ରାଜିଲ ରାଷ୍ଟ୍ରପତି ଲୁଇ ଲୁଲା ଦା ସିଲଭା। ଏହା ସହ ସେ ପରୋକ୍ଷରେ ଆମେରିକାକୁ କରିଛନ୍ତି ଟାର୍ଗେଟ। ସେ କହିଛନ୍ତି- ଭେନେଜୁଏଲାରେ ବର୍ତ୍ତମାନ ଗଣତନ୍ତ୍ରର ପୁନଃପ୍ରତିଷ୍ଠା ଜରୁରୀ ହୋଇଛି। ମାଦୁରୋଙ୍କ ବିଚାର ବାହାର ଦେଶରେ କରିବାର କୌଣସି କାରଣ ନାହିଁ। ଭେନେଜୁଏଲାର ଆଭ୍ୟନ୍ତରୀଣ ବ୍ୟାପାରରେ ବାହାର ରାଷ୍ଟ୍ରର ହସ୍ତକ୍ଷେପକୁ ସେ ସମାଲୋଚନା କରିଛନ୍ତି।
ବ୍ରାଜିଲ ବାହାର ରାଷ୍ଟ୍ରର ନିର୍ଦ୍ଦେଶରେ ପରିଚାଳିତ ହେବ ବାହିଁ। ୧୯୬୦ ଦଶକରେ ଚିଲି, ଆର୍ଜେଣ୍ଟିନା ଓ ଉରୁଗୁଏରେ ହୋଇଥିବା ସାମରିକ ବିଦ୍ରୋହ ବାହ୍ୟଶକ୍ତି ଯୋଗୁ ଘଟିଥିଲା। ସେହି ଧରଣର ଭୁଲର ପୁନରାବୃତ୍ତି ନହେଉ ବୋଲି ସେ କହିଛନ୍ତି । ଭେନେଜୁଏଲାର ସମସ୍ୟା ତାଙ୍କ ନିଜ ଦେଶର ଲୋକଙ୍କ ଜରିଆରେ ସମାଧାନ ହେଉ ବୋଲି ସେ କହିଛନ୍ତି।
ବାଟରେ ଛକି ବସିଥିଲା ମୃତ୍ୟୁ ; ଅକାଳରେ ଚାଲିଗଲା ୨ଜଣଙ୍କ ଜୀବନ
ଅନୁଗୋଳ : ଭୋଜି ଖାଇ ଫେରିବା ବେଳେ ଛକି ବସିଥିଲା ମୃତ୍ୟୁ। ଅନୁଗୋଳ ଜାତୀୟ ରାଜପଥ ୫୫ ମରାତିରା ନିକଟରେ ମର୍ମନ୍ତୁଦ ଦୁର୍ଘଟଣା। ଟ୍ରକ ପଛରେ ଧକ୍କା ଦେଲା କାର । କାରରେ ଥିବା ଦୁଇ ଜଣଙ୍କ ଘଟଣାସ୍ଥଳରେ ମୃତ୍ୟୁ ହୋଇଛି । ଜଣେ ଗୁରୁତରଙ୍କୁ କଟକ ମେଡିକାଲରେ ଭର୍ତ୍ତି କରାଯାଇଛି । ମୃତକ ହେଲେ କନ୍ଦରସିଂହା ଗାଁର ଅମିତ ସାହୁ ଓ ଦେଉଳବେଡା ଗାଁର ବିସ୍ମୟ କୁମାର ଦାସ । ଗୁରୁତର ହେଲେ ବନ୍ତଳାର ଗୋପାଳ ସାହୁ । ତିନି ଜଣ ଏକ ବାହାଘର ଭୋଜିରେ ଯୋଗ ଦେଇ କାରରେ ଫେରୁଥିଲେ । ମରାତିରା ନିକଟରେ ଆଗରେ ଯାଉଥିବା ଏକ ଟ୍ରକ ପଛରେ ସେମାନଙ୍କ କାର ଭାରସାମ୍ୟ ହରାଇ ବାଡେଇ ହୋଇ ଯାଇଥିଲା । ଯାହା ଫଳରେ ଘଟଣା ସ୍ଥଳରେ ହିଁ ଅମିତ ଏବଂ ବିସ୍ମୟଙ୍କର ମୃତ୍ୟୁ ହୋଇଥିଲା।
ଦୁର୍ଘଟଣା ପରେ ତାଳଚେର ଓ ଅନୁଗୁଳ ଅଞ୍ଚଳରେ ଶୋକର ଛାୟା ଖେଳିଯାଇଛି। ମୃତ୍ୟୁ ପୂର୍ବର ଏକ ଭିଡିଓ ଭାଇରାଲ ହେଉଛି । ତିନି ଜଣ ଭୋଜି ଖାଇ କାରରେ ହସି ଖୁସି ହୋଇ ଫେରୁଥିବାର ଏକ ଭିଡିଓ ସୋସିଆଲ ମିଡିଆରେ ପକାଇ ଥିଲେ । ତେବେ ଭିଡିଓ ଅପଲୋଡ଼ କରିବାର କିଛି ସମୟ ପରେ ଯେ ମୃତ୍ୟୁ ସେମାନଙ୍କୁ ଏଭଳି ଡାକି ନେବ ସେମାନେ ଜାଣି ନଥିଲେ ।
ପତ୍ନୀଙ୍କ ମୃତଦେହ ସହ ୪ଦିନ ରହିଲେ ସ୍ବାମୀ ; ଡାକ୍ତରଖାନାରେ ମୃତ୍ୟୁ
ନନ୍ଦିଘୋଷ ବ୍ୟୁରୋ : ଝାରସୁଗୁଡା ଜିଲ୍ଲା ବ୍ରଜରାଜନଗର ଓରିଏଣ୍ଟ ଥାନା ଅଞ୍ଚଳରେ ଚାଞ୍ଚଲ୍ୟକର ଘଟଣା। ପତ୍ନୀଙ୍କ ମୃତଦେହ ସହ ୪ ଦିନ ରହିଲେ ସ୍ବାମୀ। ୪ଦିନ ରହିବା ପରେ ଗୁରୁତର ଅବସ୍ଥାରେ ଉଦ୍ଧାର ହେଲେ ସ୍ୱାମୀ। ଗୁରୁତର ଅବସ୍ଥାରେ ଡାକ୍ତରଖାନାରେ ସ୍ବାମୀଙ୍କର ମୃତ୍ୟୁ ହୋଇଛି। ତେବେ ମୃତ୍ୟୁର କାରଣ ଅସ୍ପଷ୍ଟ ରହିଛି। ଘର ଭିତରେ ଅନେକ ସ୍ଥାନରେ ବାନ୍ତି ପଡ଼ିଥିବାରୁ ଦମ୍ପତି ମଦ୍ୟପାନ କରି ଥାଇ ପାରନ୍ତି ବୋଲି ପୋଲିସ ଅନୁମାନ କରୁଛି ।
ମୃତ ଦମ୍ପତି ହେଲେ ଗୋବିନ୍ଦ ଭୋଇ ଓ ପତ୍ନୀ ରୁକ୍ମିଣୀ ଭୋଇ। ଓରିଏଣ୍ଟ ଥାନା ଅଞ୍ଚଳର ସାବଯୋବ ହନୁମାନ ମନ୍ଦିରପଡାରେ ଘଟିଛି ଏହି ଅଭାବନୀୟ ଘଟଣା। ଘଟଣାସ୍ଥଳରେ ସାଇଣ୍ଟିଫିକ ଟିମ ସହିତ ଓରିଏଣ୍ଟ ପୋଲିସ ତଦନ୍ତ କରୁଛି।
ଆଜି ଲିଙ୍ଗରାଜ ମହାପ୍ରଭୁଙ୍କ ହାଣ୍ଡିଭଙ୍ଗା ଯାତ
ଭୁବନେଶ୍ବର : ଆଜି ଲିଙ୍ଗରାଜ ମହାପ୍ରଭୁଙ୍କ ହାଣ୍ଡିଭଙ୍ଗା ଯାତ । ହାଣ୍ଡିଭଙ୍ଗା ଯାତ ପାଇଁ କପିଳେଶ୍ଵର ମନ୍ଦିରରେ ସ୍ଵତନ୍ତ୍ର ନୀତିକାନ୍ତି । କପିଳେଶ୍ଵର ମନ୍ଦିରରେ ମଙ୍ଗଳ ଆଳତି ପରେ ଚାଲିଛି ସାହାଣ ମେଲା ଦର୍ଶନ । ଦୀର୍ଘ ୧୧ ବର୍ଷ ଧରି ବିବାଦ ପାଇଁ ବନ୍ଦ ହୋଇଥିଲା ଯାତ । ଚଳିତ ବର୍ଷ ପ୍ରଶାସନର ବୁଝାସୁଝା ପରେ ଆରମ୍ଭ ହୋଇଛି ନୀତିକାନ୍ତି । କପିଳେଶ୍ଵର ମନ୍ଦିର ପରିସରରେ ୩ ପ୍ଲାଟୁନ ପୋଲିସ୍ ଫୋର୍ସ ମୁତୟନ ହୋଇଛନ୍ତି।
ରେଭେନ୍ସା ବିଶ୍ୱବିଦ୍ୟାଳୟରେ ଗଣ୍ଡଗୋଳ ; ଇଷ୍ଟ ହଷ୍ଟେଲ ଓ ନିଉ ହଷ୍ଟେଲ ଛାତ୍ର ମୁହାଁମୁହିଁ
କଟକ : ରେଭେନ୍ସା ବିଶ୍ୱବିଦ୍ୟାଳୟର କ୍ୟାମ୍ପସ ଭିତରେ ଗଣ୍ଡଗୋଳକୁ ନେଇ ଉତ୍ତେଜନା । ଇଷ୍ଟ ହଷ୍ଟେଲ ଓ ନିଉ ହଷ୍ଟେଲ ଛାତ୍ରଙ୍କ ଭିତରେ ଗତକାଲି ରାତିରେ ସୃଷ୍ଟି ହୋଇଥିଲା ଉତ୍ତେଜନା। ଇଣ୍ଟର ହଷ୍ଟେଲ ମ୍ୟାଚ୍ ଖେଳ ବେଳେ ଉଭୟ ହଷ୍ଟେଲ ପିଲାଙ୍କ ଭିତରେ ହାରଜିତକୁ ନେଇ ପାଟିତୁଣ୍ଡ ହୋଇଥିଲା । ଏହି ପାଟିତୁଣ୍ଡ ପରେ ନିଉ ହଷ୍ଟେଲ ଓ ଇଷ୍ଟ ହଷ୍ଟେଲ ପିଲା ମୁହାଁମୁହିଁ ହୋଇଥିଲେ। ପରେ ଅଧିକ ଉତ୍ତେଜନା ପ୍ରକାଶ ପାଇଥିଲା।
ପରସ୍ପର ଉପରକୁ ଟେକା ପଥର ଫୋପଡ଼ା ଫୋପଡ଼ି କରିଥିଲେ। ପରିସ୍ଥିତ ବିଗିଡିବା ପରେ ଘଟଣାସ୍ଥଳରେ ପୋଲିସ ପହଞ୍ଚି ଥିଲା। ପୋଲିସ ପହଞ୍ଚି ଉଭୟ ହଷ୍ଟେଲର ପିଲାଙ୍କୁ ବୁଝା ସୁଝା କରିବା ପରେ ସ୍ଥିତି ନିୟନ୍ତ୍ରଣକୁ ଆସିଥିଲା। କ୍ୟାମ୍ପସ ଭିତରେ ଦୁଇ ପ୍ଲାଟୁନ ପୋଲିସ ଫୋର୍ସ ମୁତୟନ ହୋଇଥିଲେ।
ଆଜି ପଞ୍ଚମ ଦିନରେ ମଧ୍ୟ ହୋଇପାରେ ଗୃହ ହୁଲସ୍ତୁଲ ; ସମାନ ପ୍ରସଙ୍ଗକୁ ଅସ୍ତ୍ର କରି ପାରନ୍ତି ବିରୋଧୀ
ଭୁବନେଶ୍ବର : ଆଜି ବଜେଟ ଅଧିବେଶନର ପଞ୍ଚମ ଦିନ। ପଞ୍ଚମ ଦିନରେ ମଧ୍ୟ ଚାଷୀ ପ୍ରସଙ୍ଗକୁ ନେଇ ଗୃହ ହୁଲସ୍ତୁଲ ହୋଇପାରେ। ୩ ଦିନ ଧରି ଧାନ କିଣା ଅବ୍ୟବସ୍ଥା, ମଣ୍ଡି ସମସ୍ୟା, କଟଣୀ ଛଟଣୀ ପ୍ରସଙ୍ଗରେ ଗୃହ କମ୍ପୁ ଥିବା ବେଳେ ଆଜି ମଧ୍ୟ ସମାନ ପ୍ରସଙ୍ଗକୁ ଅସ୍ତ୍ର କରି ପାରନ୍ତି ବିରୋଧୀ। ଏପଟେ ମହିଳା ଓ ଶିଶୁ ବିକାଶ, ପର୍ଯ୍ୟଟନ, ନିର୍ମାଣ, ଅବକାରୀ, ଆଇନ ବିଭାଗର ପ୍ରଶ୍ନ ଉତ୍ତର କାର୍ଯ୍ୟକ୍ରମ ରହିଛି। ତେବେ ଆଜି ଗୃହକାର୍ଯ୍ୟ ସ୍ୱାଭାବିକ ହୋଇ ପାରୁଛି ନା ନାହିଁ ତା ଉପରେ ରହିଛି ନଜର। ସେହିପରି ଅପରାହ୍ନରେ ଅନେକ ଗୁରୁତ୍ୱପୂର୍ଣ୍ଣ କାଗଜ ଉପସ୍ଥାନ ହେବାର ଅଛି।
ପୁଣି ଟ୍ରମ୍ପଙ୍କ କଠୋର ପଦକ୍ଷେପ ; ସୁପ୍ରିମକୋର୍ଟ ଝଟକା ପରେ ବି ଖାତିର କଲେନି ଟ୍ରମ୍ପ
ନନ୍ଦିଘୋଷ ବ୍ୟୁରୋ: ବିଶ୍ବର ସମସ୍ତ ରାଷ୍ଟ୍ରଉପରେ ୧୦ ପ୍ରତିଶତ ଟାରିଫ ଲଗାଇଲେ ଆମେରିକା ରାଷ୍ଟ୍ରପତି ଡୋନାଲଡ ଟ୍ରମ୍ପ । ସମସ୍ତ ଦେଶରୁ ହେଉଥିବା ଆମଦାନୀ ଉପରେ ଲାଗିବ ୧୦ ପ୍ରତିଶତ ଟାରିଫ । ଟାରିଫ ପ୍ରସଙ୍ଗରେ ଆମେରିକା ସୁପ୍ରିମକୋର୍ଟଙ୍କ ପକ୍ଷରୁ ଝଟକା ପରେ ବି ଟ୍ରମ୍ପ ଏହି ନିଷ୍ପତ୍ତି ନେଇଛନ୍ତି । ଓଭାଲ ଅଫିସରୁ ଜାରି ହୋଇଛି ଏ ସଂକ୍ରାନ୍ତ ଘୋଷଣାନାମା। ଟ୍ରେଡ ଆକ୍ଟ ୧୯୭୪ର ଧାରା ୧୨୨ ଅନୁସାରେ ଏହି ଟାରିଫ ଲାଗୁ କରିଛନ୍ତି ଟ୍ରମ୍ପ। ଏପରିକି ଏହି ପରିମାଣ ଆହୁରି ଅଧିକ ହୋଇପାରେ ବୋଲି ସେ ସତର୍କ କରାଇଦେଇଛନ୍ତି । ଏହି ନିର୍ଦ୍ଦେଶନାମା ତୁରନ୍ତ କାର୍ଯ୍ୟକାରୀ ହେବ ଏବଂ ପ୍ରାୟ ୫ ମାସ ଧରି ବଳବତ୍ତର ରହିବ । ଏହି ୫ ମାସ ଭିତରେ ସ୍ଥିତିର ସମୀକ୍ଷା କରାଯିବ ବୋଲି ସେ କହିଛନ୍ତି । ଟ୍ରମ୍ପ କହିଛନ୍ତି ସେ ଯାହା ଚାହିଁବେ ତାହା କରିପାରିବେ। ଭାରତ ବର୍ଦ୍ଧିତ ଟାରିଫ ଦେବ, ଟ୍ରେଡ ଡିଲରେ ପ୍ରଭାବ ପଡ଼ିବ ନାହିଁ ବୋଲି କହିଛନ୍ତି ଟ୍ରମ୍ପ ।
ଗତକାଲି ବିଶ୍ଵର ଅନେକ ଦେଶ ଉପରେ ମନଇଚ୍ଛା ଉଚ୍ଚ ହାରର ଟାରିଫ ଲଗାଇ ଧମକାଉଥିବା ଟ୍ରମ୍ପଙ୍କୁ ଲାଗିଥିଲା ଝଟକା। ଆମେରିକାର ସୁପ୍ରିମକୋର୍ଟ ଏହି ଝଟକା ଦେଇଥିଲେ। ମନ ଇଚ୍ଛା ଏପରି ଉଚ୍ଚ ହାରର ଟାରିଫ ଲଗାଇବା ପାଇଁ ଆମେରିକାର ରାଷ୍ଟ୍ରପତିଙ୍କର କୌଣସି କ୍ଷମତା ନାହିଁ ବୋଲି କହିଥିଲେ ସୁପ୍ରିମକୋର୍ଟ ।
ବଜେଟକୁ ନବୀନଙ୍କ କଟାକ୍ଷ: କହିଲେ- ରୋଷେଇ ଘର ନାହିଁ, ମେନୁ ମାଳ ମାଳ
ବଜେଟକୁ ନବୀନଙ୍କ କଟାକ୍ଷ: କହିଲେ- ରୋଷେଇ ଘର ନାହିଁ, ମେନୁ ମାଳ ମାଳ
ନନ୍ଦିଘୋଷ ବ୍ୟୁରୋ: ଓଡ଼ିଶା ବିଧାନସଭାରେ ମୁଖ୍ୟମନ୍ତ୍ରୀ ମୋହନ ମାଝୀ ୨୦୨୬-୨୭ ଆର୍ଥିକବର୍ଷ ପାଇଁ ବଜେଟ ଉପସ୍ଥାପନ କରିଛନ୍ତି । ୩ ଲକ୍ଷ ୧୦ ହଜାର କୋଟି ଟଙ୍କାର ବଜେଟ ଉପସ୍ଥାପନ କରିଛନ୍ତି ମୁଖ୍ୟମନ୍ତ୍ରୀ । ଯେଉଁଥିରେ ରାଜ୍ୟବାସୀଙ୍କୁ ରଙ୍ଗୀନ ସ୍ବପ୍ନ ଦେଖାଯାଇଛି । ତେବେ ବଜେଟକୁ ବିରୋଧୀ ଦଳ ନେତା ନବୀନ ପଟ୍ଟନାୟକ କଟାକ୍ଷ କରିଛନ୍ତି ।
ମୁଖ୍ୟମନ୍ତ୍ରୀଙ୍କ ବଜେଟ ଉପସ୍ଥାପନ ପରେ ବିରୋଧୀ ଦଳ ନେତା ତଥା ବିଜେଡି ସୁପ୍ରିମୋ ନବୀନ ପଟ୍ଟନାୟକ ପ୍ରତିକ୍ରିୟା ରଖିଛନ୍ତି । ନବୀନ କହିଛନ୍ତି, ରୋଷେଇ ଘର ନାହିଁ, ହେଲେ ଖାଦ୍ୟ ମେନୁ ମାଳ ମାଳ ।