ସୁବର୍ଣ୍ଣରେଖା ନଦୀରୁ ବେଆଇନ ବାଲି ଉତ୍ତୋଳନ କରି ପଶ୍ଚିମବଙ୍ଗକୁ ଚୋରା ଚାଲାଣ କରୁଥିବା ୯ଟି ବାଲି ବୋଝେଇ ହାଇଓ୍ବା ଜବତ । ୧୬ ନଂ ଜାତୀୟ ରାଜପଥ ଗାୟତ୍ରୀ ପେଟ୍ରୋଲ ପମ୍ପ ନିକଟରେ ଚଢ଼ାଉ କରି ଜବତ କରିଛନ୍ତି ଜଳେଶ୍ଵର ଜୁନିୟର ଖଣି ଅଧିକାରୀ। ୧୫ରୁ ଅଧିକ ବାଲି ବୋଝେଇ ହାଇଓ୍ବା ଚମ୍ପଟ ମାରିଥିବା ବେଳେ ୯ଟି ହାଇଓ୍ବାକୁ ଜବତ କରାଯାଇଛି। ଅଧିକାରୀଙ୍କ ଗାଡ଼ି ଉପରକୁ ଚଢ଼ାଇ ମାରିଦେବାକୁ ଉଦ୍ୟମ କରୁଥିବା ଡ୍ରାଇଭରକୁ ଅଟକ ରଖି ପୋଲିସ ଜିମା ଦିଆଯାଇଛି। ସୂଚନା ଅନୁଯାୟୀ ସୁବର୍ଣ୍ଣରେଖା ନଦୀର ବିଭିନ୍ନ ସ୍ଥାନରୁ ବେଆଇନ ବାଲି ଉତ୍ତୋଳନ କରି ପ୍ରତ୍ୟେକ ଦିନ ଶହ ଶହ ଟ୍ରିପ ବାଲି ପଶ୍ଚିମବଙ୍ଗକୁ ଚୋରା ଚାଲାଣ ହେଉଛି। ଗତ ରାତିରେ ପଶ୍ଚିମବଙ୍ଗକୁ ୨୫ରୁ ଅଧିକ ହାଇଓ୍ବାରେ ବାଲି ଚାଲାଣ ହେଉଥିବା ଖବର ପାଇଁ ଜଳେଶ୍ଵର ଜୁନିୟର ଖଣି ଅଧିକାରୀ ତାପସ କୁମାର ବେହେରା ପହଞ୍ଚି ଚଢ଼ାଉ କରି ଗାଡ଼ି ଗୁଡ଼ିକୁ ଜବତ କରିଛନ୍ତି ।
ଚୋର ନେଇଗଲେ ୨୫ ଲକ୍ଷର ସୁନା ଗହଣା
ନୟାଗଡ଼ ଜିଲ୍ଲା ଫତେଗଡ଼ ଥାନା ଭାପୁରରେ ବଡ଼ ଧରଣର ଚୋରି । ପୂର୍ବତନ ସରପଞ୍ଚ କାର୍ତ୍ତିକ ଚନ୍ଦ୍ର ନାୟକଙ୍କ ଘରୁ ୨୫ ଲକ୍ଷ ଟଙ୍କାର ସୁନା ଗହଣା ନେଇଯାଇଛନ୍ତି ଚୋର। ତା ସହିତ ପ୍ରାୟ ଦେଢ଼ ଲକ୍ଷ ଟଙ୍କା ବି ନେଇଛନ୍ତି। ଅଭିଯୋଗ ଅନୁସାରେ ଗତ ରାତିରେ ଚୋରମାନେ ନିଶା ସ୍ପ୍ରେ କରି ସମସ୍ତଙ୍କୁ ଅଚେତ କରିଦେଇଥିଲେ। ତା ପରେ ୨୫ ଲକ୍ଷ ଟଙ୍କାର ସୁନା ଗହଣା ନେଇଯାଇଛନ୍ତି। ଅଭିଯୋଗ ପରେ ପୋଲିସ ଆସି ତଦନ୍ତ କରୁଛି।
ପାକ୍ ଅଧିକୃତ କାଶ୍ମୀରରେ ପାକିସ୍ତାନ ସେନାର ବର୍ବରତାକୁ ସାରା ବିଶ୍ଵରେ ପ୍ରତିବାଦ
ନନ୍ଦିଘୋଷ ବ୍ୟୁରୋ : ପାକ୍ ଅଧିକୃତ କାଶ୍ମୀରରେ ପାକିସ୍ତାନ ସେନା ଯେଉଁ ବର୍ବରତା ଚଳାଇଛି, ସାରା ବିଶ୍ଵରେ ତାର ପ୍ରତିବାଦ। ପାକିସ୍ତାନ ସେନାର ଅସଲ ଚିତ୍ର ସମସ୍ତଙ୍କ ସାମ୍ନାକୁ ଆସିବା ପରେ ଏହାକୁ ନେଇ ଅନ୍ତର୍ଜାତୀୟ ସମୁଦାୟରେ ତୀବ୍ର ପ୍ରତିକ୍ରିୟା ପ୍ରକାଶ ପାଇଛି। ବ୍ରିଟେନରେ ବିକ୍ଷୋଭ କରିଛନ୍ତି ପ୍ରବାସୀ କାଶ୍ମୀରୀ। ଏହା ସହିତ ଲଣ୍ଡନରେ ଥିବା ପାକିସ୍ତାନ ଦୂତାବାସ ଆଗରେ ମଧ୍ୟ ସେମାନେ ବିକ୍ଷୋଭ କରିଛନ୍ତି। ପାକିସ୍ତାନ ସେନା ଯେଉଁ ଜଘନ୍ୟକାଣ୍ଡ କରୁଛି, ତାର ନିରପେକ୍ଷ ତଦନ୍ତ ଦାବି କରିଛନ୍ତି ସେମାନେ। ଏହା ସହିତ ଜାତିସଂଘ, ଅନ୍ତର୍ଜାତୀୟ ମାନବାଧିକାର ସଂଗଠନ ପରି ସଂସ୍ଥାର ଦୃଷ୍ଟି ଆକର୍ଷଣ କରାଯିବ ବୋଲି କହିଛନ୍ତି ସେମାନେ।
ଗତ ଚାରି ପାଞ୍ଚ ଦିନ ମଧ୍ୟରେ ପାକ୍ ସେନାର ଆକ୍ରମଣରେ ୧୯ ଶିଶୁ ଓ ୭ ଜଣ ଗର୍ଭବତୀଙ୍କ ମୃତ୍ୟୁ ହୋଇଛି। ପିଓକେରେ ୧୪ ହଜାର ପାକ୍ ପୋଲିସ ଓ ଯବାନଙ୍କୁ ମୁତୟନ କରାଯାଇଥିଲା। ସେମାନେ ଦମନଲୀଳା ଚଳାଇଛନ୍ତି। ପିଓକେରେ ଇଣ୍ଟରନେଟ ବନ୍ଦ କରାଯାଇଛି। କାଶ୍ମୀରୀଙ୍କୁ ଗଣହତ୍ୟା କରାଯାଇଛି ବୋଲି ଅଭିଯୋଗ କରିଛନ୍ତି ସ୍ଥାନୀୟ ଲୋକେ। ରବିବାର ରାତିରେ ରାଓଲାକୋଟରେ ୩୦ କାଶ୍ମୀରୀଙ୍କୁ ହତ୍ୟା କରାଯାଇଥିଲା। ୨୦୦ରୁ ଅଧିକ ଲୋକ ଆହତ ହୋଇଛନ୍ତି। ଘଟଣାକୁ ଅନେକ ଦେଶ ନିନ୍ଦା କରିଛନ୍ତି। ଜାମ୍ମୁ ଓ କାଶ୍ମୀର, ଗିଲଗିଟ-ବଲ୍ଟିସ୍ତାନ ଓ ସାକ୍ଷଗାମ ଉପତ୍ୟକା ଭାରତର ଅଂଶ ହୋଇଥିବା ସତ୍ତ୍ବେ ୧୯୪୭ରୁ କିଛି ଅଂଶକୁ ମାଡି ବସିଛି ପାକିସ୍ତାନ।
ଜିଲ୍ଲା ବୁଲିବେ ଏଡିଜି ଓ ଆଇଜି ; ଆଇନଶୃଙ୍ଖଳା ପରିସ୍ଥିତି ସହ ଥାନାରେ ଘଟୁଥିବା ଥାର୍ଡଡିଗ୍ରୀ ଅଭିଯୋଗର କରିବେ ତଦନ୍ତ
ନନ୍ଦିଘୋଷ ବ୍ୟୁରୋ : ଜିଲ୍ଲା ବୁଲିବେ ଏଡିଜି ଓ ଆଇଜି । ଆଇନଶୃଙ୍ଖଳା ପରିସ୍ଥିତି ସହ ଥାନାରେ ଘଟୁଥିବା ଥାର୍ଡଡିଗ୍ରୀ ଅଭିଯୋଗର କରିବେ ତଦନ୍ତ । ଡିଜିପିଙ୍କୁ ଦେବେ ରିପୋର୍ଟ । କ୍ରାଇମବ୍ରାଞ୍ଚ୍ ଡିଜି ଓ ଏଡିଜି ମାଓ ଅପରେସନ ସହ ଅନ୍ୟ ୧୩ ଜଣ ବରିଷ୍ଠ ଆଇପିଏସ ଅଫିସରଙ୍କୁ ଏହି ଗୁରୁ ଦାୟିତ୍ୱ ଦିଆଯାଇଛି। କିଛି ଦିନ ଧରି ରାଜ୍ୟରେ ଏକାଧିକ ହାଜତ ମୃତ୍ୟୁ ଅଭିଯୋଗ, ଭିଡ଼ ହିଂସା, ଥାନାରେ କଏଦୀଙ୍କୁ ‘ଥାର୍ଡ ଡିଗ୍ରୀ’ ଅଭିଯୋଗ ପାଇଁ ପୋଲିସ ବିବାଦୀୟ ହୋଇ ପଡ଼ିଛି। ଅପରାଧୀମାନେ ଖୁଲମଖୁଲା ଆଇନକୁ ହାତକୁ ନେବା ମଧ୍ୟ ରାଜ୍ୟରେ ଆଇନଶୃଙ୍ଖଳାର ପରିସ୍ଥିତିକୁ ବିପର୍ଯ୍ୟସ୍ତ କରିଦେଇଛି। ଏଥିପାଇଁ ରାଜ୍ୟ ସରକାରଙ୍କୁ କଡ଼ା ସମାଲୋଚନାର ଶିକାର ହେଉଛନ୍ତି। ଏହାକୁ ସଜାଡ଼ିବା ପାଇଁ ପୋଲିସ ମୁଖ୍ୟାଳୟ ପକ୍ଷରୁ ବରିଷ୍ଠ ଅଫିସରମାନଙ୍କୁ ବିଭିନ୍ନ ଜିଲ୍ଲାର ଦାୟିତ୍ୱ ଦିଆଯାଇଛି। ସମ୍ପୃକ୍ତ ଆଇପିଏସ୍ ଅଫିସର ଜିଲ୍ଲା ଗସ୍ତ କରି ଆଇନଶୃଙ୍ଖଳା ପରିସ୍ଥିତି, ଅପରାଧ ନିୟନ୍ତ୍ରଣ, ଥାନାର କାର୍ଯ୍ୟକାରୀତା ଦେଖିବେ। କୋଭିଡ ପୂର୍ବରୁ ଠିକ ସମାନ ଢଙ୍ଗରେ ଆଇପିଏସ ମାନଙ୍କୁ ଜିଲ୍ଲା ଦାୟିତ୍ୱ ମିଳିଥିଲା। କ୍ରାଇମବ୍ରାଂଚ ଡିଜି ବିନୟତୋଷ ମିଶ୍ରଙ୍କୁ ବାଲେଶ୍ୱର ଓ ଭଦ୍ରକ ଜିଲ୍ଲା, ସ୍ପେଶାଲ ଅପରେସନ୍ ଏଡିଜି ସଞ୍ଜୀବ ପଣ୍ଡାଙ୍କୁ କୋରାପୁଟ ଓ ରାୟଗଡ଼ା ଜିଲ୍ଲାର ଦାୟିତ୍ୱ ଦିଆଯାଇଛି। ଅନ୍ୟ ୧୩ ବରିଷ୍ଠ ଆଇପିଏସ ଅଫିସରଙ୍କୁ ଗୋଟିଏ ଲେଖାଏଁ ଜିଲ୍ଲା ଦାୟିତ୍ୱ ଦିଆଯାଇଛି। ଏଡିଜି ସୌମେନ୍ଦ୍ର ପ୍ରିୟଦର୍ଶୀଙ୍କୁ ଜଗତସିଂହପୁର, ରେଳବାଇ ଏଡିଜି ଅରୁଣ ବୋଥ୍ରାଙ୍କୁ ଅନୁଗୁଳ, ଆଇନ ଓ ଶୃଙ୍ଖଳା ଏଡିଜି ସଞ୍ଜୟ କୁମାରଙ୍କୁ ସମ୍ବଲପୁର, ଏଡିଜି ରାଜେଶ କୁମାରଙ୍କୁ ନୟାଗଡ଼, ଏଡିଜି ପ୍ରତୀକ ମହାନ୍ତିଙ୍କୁ ଯାଜପୁର, ଏଡିଜି ଯତୀନ୍ଦ୍ର କୋଏଲଙ୍କୁ କଳାହାଣ୍ଡି, ଏଡିଜି ଏସ.ସାଇନିଙ୍କୁ ବଲାଙ୍ଗୀର ଜିଲ୍ଲାର ତଦାରଖ ଦାୟିତ୍ୱ ଦିଆଯାଇଛି। ସେହିପରି ଆଇଜି ଏସ.ପ୍ରବୀଣ କୁମାରଙ୍କୁ କନ୍ଧମାଳ, ଆଇଜି ଗଜଭିୟେ ସତୀଶ କୁମାର ଈଶ୍ୱର ଦାସଙ୍କୁ ଢେଙ୍କାନାଳ, ଆଇଜି ଦୀପକ କୁମାରଙ୍କୁ ମାଲକାନଗିରି, ଆଇଜି ଅନୁପ କୁମାର ସାହୁଙ୍କୁ ପୁରୀ, ଆଇଜି ଅବିନାଶ କୁମାରଙ୍କୁ ମୟୂରଭଞ୍ଜ ଓ ଆଇଜି ସାର୍ଥକ ଷଡ଼ଙ୍ଗୀଙ୍କୁ କେନ୍ଦ୍ରାପଡ଼ା ଜିଲ୍ଲାର ଦାୟିତ୍ୱ ନ୍ୟସ୍ତ ହୋଇଥିବା ଜଣାପଡ଼ିଛି। ସମ୍ପୃକ୍ତ ଜିଲ୍ଲା ଯାଇ ନିରୀକ୍ଷଣ ଶେଷ କରିବାର ୧୫ଦିନ ମଧ୍ୟରେ ଡିଜିପିଙ୍କୁ ରିପୋର୍ଟ ଦେବାକୁ ଦିଆଯାଇଛି ନିର୍ଦ୍ଦେଶ।
ନବରଙ୍ଗପୁର ଜିଲ୍ଲା ସୀମାନ୍ତ ଉରାଣ୍ଡାବେଡାରେ ଅଘଟଣ ; ନିଜକୁ ଗୁଳି କରି ଆତ୍ମହତ୍ୟା କଲେ ଯବାନ
ନନ୍ଦିଘୋଷ ବ୍ୟୁରୋ : ନିଜକୁ ଗୁଳି କରି ଯବାନଙ୍କ ଆତ୍ମହତ୍ୟା ଅଭିଯୋଗ। ନବରଙ୍ଗପୁର ଜିଲ୍ଲା ସୀମାନ୍ତ କୋଣ୍ଡାଗାଓଁ ଜିଲ୍ଲାର ଉରାଣ୍ଡାବେଡାରେ ଅଘଟଣ। ପଞ୍ଚମ ବାଟାଲିୟନ ଛତିଶଗଡ଼ ସଶସ୍ତ୍ର ବାହିନୀ ଶିବିରରେ ଜଣେ ସୈନିକ ନିଜ ସର୍ଭିସ୍ ରାଇଫଲ୍ରେ ନିଜକୁ ଗୁଳି କରି ଆତ୍ମହତ୍ୟା କରିଥିବା ଅଭିଯୋଗ ହୋଇଛି । ମୃତ ଯବାନ ହେଲେ ଯୋଗେନ୍ଦ୍ର ନେତାମ । ସେ CAFର ପଞ୍ଚମ ବାଟାଲିୟନରେ ନିୟୋଜିତ ଥିଲେ। ଶିବିରର ସୁରକ୍ଷା ଦାୟିତ୍ୱରେ ଥିବା ଯୋଗେନ୍ଦ୍ର ନିଜ ଇନସାସ ସର୍ଭିସ୍ ରାଇଫଲ୍ ବାହାର କରି ନିଜକୁ ଗୁଳି କରିଥିବା ସନ୍ଦେହ କରାଯାଉଛି। ଗୁଳିର ଶବ୍ଦ ଶୁଣି ଅନ୍ୟ ସୈନିକମାନେ ଘଟଣାସ୍ଥଳକୁ ଆସି ଦେଖିବା ବେଳକୁ ତାଙ୍କର ମୃତ୍ୟୁ ହୋଇସାରିଥିଲା। ସୂଚନା ପାଇ ପୋଲିସ ଏବଂ ବରିଷ୍ଠ ଅଧିକାରୀମାନେ ଘଟଣାସ୍ଥଳରେ ପହଞ୍ଚିଛନ୍ତି। ସେ ବ୍ୟକ୍ତିଗତ ଚାପ କିମ୍ବା ମାନସିକ ଅଶାନ୍ତି କାରଣରୁ ଆତ୍ମହତ୍ୟା କରିଥିବା ସନ୍ଦେହ କରାଯାଉଛି। ପୋଲିସ ମୃତଦେହକୁ ପୋଷ୍ଟମର୍ଟମ୍ ପାଇଁ ପଠାଇଛି। ତଦନ୍ତ ପରେ ହିଁ ପ୍ରକୃତ କାରଣ ସ୍ପଷ୍ଟ ହେବ ବୋଲି ଅଧିକାରୀ ସୂଚନା ଦେଇଛନ୍ତି l
ଆଜି ବିଜେଡିର ବଡ଼ ବୈଠକ ; ଶଙ୍ଖ ଭବନରେ ହେବ ଗୁରୁତ୍ବପୂର୍ଣ୍ଣ ବୈଠକ
ନନ୍ଦିଘୋଷ ବ୍ୟୁରୋ : ଆଜି ବସୁଛି ବିଜେଡିର ବଡ଼ ବୈଠକ। ଶଙ୍ଖ ଭବନରେ ହେବ ଏହି ଗୁରୁତ୍ବପୂର୍ଣ୍ଣ ବୈଠକ। ଗତ ନିର୍ବାଚନରେ ପରାଜିତ ହୋଇଥିବା ନେତା ଏହି ବୈଠକରେ ଯୋଗ ଦେବେ। ସେମାନଙ୍କ ସହିତ ସିଧା କଥା ହେବେ ଦଳର ସଭାପତି ନବୀନ ପଟ୍ଟନାୟକ। ଆଜି ଅପରାହ୍ନ ୪ଟାରେ ଏହି ବୈଠକ ହେବ ବୋଲି ଜଣାପଡ଼ିଛି। ଏହା ସହିତ SIR ପ୍ରକ୍ରିୟା, ଦଳରେ କିପରି ଅଧିକରୁ ଅଧିକ ଲୋକ ସାମିଲ ହେବେ, ସଂଗଠନକୁ କିପରି ଅଧିକ ମଜଭୁତ କରାଯିବ, ସେ ନେଇ ମଧ୍ୟ ଆଲୋଚନା କରାଯିବ ବୋଲି ଜଣାପଡ଼ିଛି। ୨୪ ବର୍ଷ ବନାମ ୨୪ ମାସ କାର୍ଯ୍ୟକ୍ରମ କରାଯାଇ ଲୋକଙ୍କ ମତାମତ ନିଆଯିବ।
ଏକ୍ସପାଏରୀ ମେଡିସିନ ଖାଇ ଆଶାକର୍ମୀଙ୍କ ଝିଅ ମୃତ ; କେନ୍ଦୁଝର ଜିଲ୍ଲା ବାଂଶପାଳ ବ୍ଲକ ତଳବରଡ଼ା ଗାଁରୁ ଆସିଛି ଅଭିଯୋଗ
ନନ୍ଦିଘୋଷ ବ୍ୟୁରୋ : ଏକ୍ସପାଏରୀ ମେଡିସିନ ଖାଇ ଆଶାକର୍ମୀଙ୍କ ଝିଅ ମୃତ । କେନ୍ଦୁଝର ଜିଲ୍ଲା ବାଂଶପାଳ ବ୍ଲକ ସିଂପୁର ପଞ୍ଚାୟତ ତଳବରଡ଼ା ଗାଁର ଘଟଣା। ଆଶାକର୍ମୀ ଶ୍ରୀଦେବୀ ନାଏକଙ୍କ ୧୧ବର୍ଷୀୟ ଝିଅ ହୀରାମଣି ନାଏକଙ୍କର ଏକ୍ସପାଏରୀ ମେଡିସିନ ଖାଇ ମୃତ୍ୟୁ ହୋଇଥିବା ଅଭିଯୋଗ ହୋଇଛି । ଗତ ଗୁରୁବାର ସନ୍ଧ୍ୟାରେ ଆଶାକର୍ମୀଙ୍କ ଝିଅ ହୀରାମଣୀ ଓ ୧୩ ବର୍ଷୀୟ ପୁଅ ଗଗନ ନାଏକଙ୍କୁ ଜ୍ଵର ହୋଇଥିଲା । ଆଶାକର୍ମୀ ସିଂପୁର ANM ସେଣ୍ଟରରୁ ଔଷଧ ଆଣି ଉଭୟଙ୍କୁ ଦେଇଥିଲେ । ଏହି ମେଡିସିନ୍ ର ୨ ଡୋଜ୍ ଉଭୟଙ୍କୁ ଦେବାପରେ ସେମାନେ ଗୁରୁତର ହୋଇ ପଡ଼ିଥିଲେ । ସେମାନଙ୍କୁ ପ୍ରଥମେ ବାଂଶପାଳ ଓ ପରେ କେନ୍ଦୁଝର ସ୍ଥାନାନ୍ତର କରାଯାଇଥିଲା । ସେଠାରେ ସୋମବାର ସକାଳେ ହୀରାମଣି ନାଏକଙ୍କର ମୃତ୍ୟୁ ଘଟିଛି । ସିଂପୁର ANM ସେଣ୍ଟରର ଏକ୍ସପାଏରୀ ମେଡିସିନ ଖାଇ ମୃତ୍ୟୁ ହୋଇଥିବା ଅଭିଯୋଗ ହୋଇଛି। ଏକ୍ସପାଏରୀ ମେଡିସିନ ଦେଇଥିବା ANM ଦିଦିଙ୍କ ପ୍ରତି ଦୃଢ଼ କାର୍ଯ୍ୟାନୁଷ୍ଠାନ ଦାବି କରିଛନ୍ତି ପରିବାର ।
ସାମ୍ନାକୁ ଆସିଲା ପୋଲିସର ବର୍ବରତାର ଚିତ୍ର; ଦୁର୍ଘଟଣାରେ ରକ୍ତ ଜୁଡୁବୁଡୁ ଯୁବକଙ୍କୁ PCR ଗାଡ଼ିରେ ନେଲାନାହିଁ ପୋଲିସ
ନନ୍ଦିଘୋଷ ବ୍ୟୁରୋ : ପୁଣି ସାମ୍ନାକୁ ଆସିଲା ପୋଲିସର ବର୍ବରତାର ଚିତ୍ର। ଦୁର୍ଘଟଣାରେ ରକ୍ତ ଜୁଡୁବୁଡୁ ଯୁବକଙ୍କୁ ପିସିଆର ଗାଡ଼ିରେ ନେଲାନାହିଁ ପୋଲିସ। ଦୁର୍ଘଟଣା ଗ୍ରସ୍ତଙ୍କ ଜଣେ ସାଥି ବାରମ୍ବାର ନେହୁରା କଲେ ମଧ୍ୟ ଶୁଣିଲାନି ପୋଲିସ। ଓଲଟା ସାହାଯ୍ୟ ଚାହୁଁଥିବା ଯୁବକଙ୍କୁ ମାରିବାକୁ ଗୋଡ଼ାଇଲା। ପୋଲିସର ଏପରି ଅମାନବୀୟ ଭିଡିଓ ସୋସିଆଲ ମିଡ଼ିଆରେ ଘୁରି ବୁଲୁଛି। କୁହାଯାଉଛି କି ଏହି ଭିଡିଓଟି ଭଦ୍ରକ ଜିଲ୍ଲା ସୀମାବର୍ତ୍ତୀ ରାଣୀତାଲ ଅଞ୍ଚଳର। ଏକ କୁକୁଡ଼ା ଗାଡିକୁ ଧରିବାକୁ ପୋଲିସ ଗୋଡ଼ାଇ ଯିବା ସହିତ ତାକୁ ରାଣୀତାଲ ପରେ ମଇତାପୁର ନିକଟରେ ଅଟକାଇଥିଲା। ଏହି ସମୟରେ ଏକ କାର ପୋଲିସ ଗାଡି ସହ ଧକ୍କା ହୋଇଥିଲା। କାରର ଡ୍ରାଇଭର ସମେତ ଅନ୍ୟ ଜଣେ ଯୁବକ ଗୁରୁତର ହୋଇଥିଲେ। ଜଣେ ଗୁରୁତରଙ୍କୁ କାରରୁ କାଢି ୧୬ ନମ୍ବର ଜାତୀୟ ରାଜପଥରେ ଶୁଆଇବା ସହିତ ପୋଲିସକୁ ସାହାଯ୍ୟ ମାଗିଥିଲେ। ଆମ୍ବୁଲାନ୍ସ ଆସିବା ବିଳମ୍ବ ହେବ କହି ଗୁରୁତରଙ୍କୁ ପୋଲିସ ଗାଡ଼ିରେ ମେଡିକାଲ ପହଞ୍ଚାଇବାକୁ ନେହୁରା ହୋଇଥିଲେ। ମାତ୍ର ପୋଲିସ ସାହାଯ୍ୟ କରିବ କଣ ମାଡ଼ ମାରିବାକୁ ଉଦ୍ୟତ ହେବା ସହିତ ଅଭଦ୍ର ଭାଷାରେ ଗାଳିଗୁଲଜ କରୁଥିବା ଭିଡିଓରେ ଦେଖିବାକୁ ମିଳିଛି। ଏପରି ଭିଡିଓ ଏବେ ସୋସିଆଲ ମିଡ଼ିଆରେ ଭାଇରଲା ହେବା ପରେ ପୋଲିସକୁ ବିଭିନ୍ନ ମହଲରେ ନିନ୍ଦା କରାଯାଇଛି। ଏନେଇ ଭଦ୍ରକ ଜିଲ୍ଲା ଅତିରିକ୍ତ ଏସପିଙ୍କୁ ଯୋଗାଯୋଗ କରିବାରୁ ଘଟଣାର ତଦନ୍ତ କରାଯିବ ବୋଲି ଫୋନ ମାଧ୍ୟମରେ ସୂଚନା ଦେଇଛନ୍ତି ।
ବିପର୍ଯ୍ୟସ୍ତ ଆଇନଶୃଙ୍ଖଲାକୁ ନେଇ ସରକାର ଉପରେ ବର୍ଷିଲେ ବିରୋଧୀ
ବିପର୍ଯ୍ୟସ୍ତ ଆଇନଶୃଙ୍ଖଲାକୁ ନେଇ ସରକାର ଉପରେ ବର୍ଷିଲେ ବିରୋଧୀ
ନନ୍ଦିଘୋଷ ବ୍ୟୁରୋ: ବିଜେପି ସରକାରରେ ହାଜତ ମୃତ୍ୟୁ ସହ ଭିଡହିଂସା ବଢିବଢି ଚାଲିଛି । ନିରୀହ ଲୋକଙ୍କ ଉପରେ ପୋଲିସର ଥାର୍ଡ ଡିଗ୍ରି ଜନ ଅସନ୍ତୋଷ ସୃଷ୍ଟି କରିଛି । କବିସୂର୍ଯ୍ୟନଗର, ବାରଙ୍ଗଠାରୁ ଆରମ୍ଭ କରି ବାଲିଅନ୍ତା ଯାଏଁ ଘଟଣା ପ୍ରମାଣିତ କରିଛି ଓଡିଶାରେ ଆଇନଶୃଙ୍ଖଳା ଆଦୌ ନାହିଁ । କବିସୂର୍ଯ୍ୟନଗର ହାଜତ ମୃତ୍ୟୁକୁ ନେଇ ଗୁରୁବାର ଓଡିଶା ଜନତା କଂଗ୍ରେସ କରିବ ଡିଜି ଅଫିସ ଘେରାଉ । କଂଗ୍ରେସ ବିଚାର ବିଭାଗୀୟ ତଦନ୍ତ ସହ ମୃତ୍ୟୁ ଯୁବକଙ୍କ ପରିବାରକୁ ୨କୋଟି ଦେବାକୁ ଦାବି । ମୁଖ୍ୟ ବିରୋଧୀ ବିଜେଡି ଏହାକୁ ନେଇ ସରକାରଙ୍କ ଉପରେ ଖୁବ ବର୍ଷିଛି ।
ହୁଗୁଳା ଶାସନ, ବିପର୍ଯ୍ୟସ୍ତ ଆଇନଶୃଙ୍ଖଳା । ସୀମା ଟିପିଛି ହାଜତ ମୃତ୍ୟୁ ଓ ଭିଡ଼ ହିଂସା । ୨ ବର୍ଷର ବିଜେପି ଶାସନରେ ଓଡିଶାର କ୍ରାଇମ ୟୁପି-ବିହାରକୁ କାଟିଛି । ଅପରାଧ ରାଜ୍ୟ ତାଲିକାରେ ଦେଶରେ ଆଗକୁ ବଢୁଛି ଓଡ଼ିଶା । ହତ୍ୟା, ମାରପିଟ, ଭିଡ଼ ହିଂସା ସାଙ୍ଗକୁ ରାସ୍ତାଉପରେ ଖୋଲିଖୋଲି ବୁଲୁଛି ଭୁଜାଲି ଓ ଫୁଟୁଛି ଗୁଳି । ପୋଲିସ ପ୍ରତି କାହାର ଡର ନାହିଁ । ଆଇନଶୃଙ୍ଖଳାକୁ ସଜାଡିବା ବଦଳରେ ପୋଲିସ ନିରୀହ ଲୋକଙ୍କୁ ଥାନରେ ଥାର୍ଡ ଡିଗ୍ରି ଦେଇ ଜୀବନ ନେଉଛି । ଗଂଜାମ ଜିଲ୍ଲା କବିସୂର୍ଯ୍ୟନଗର ହାଜତ ମୃତ୍ୟୁକୁ ନେଇ ମୋହନ ସରକାରଙ୍କୁ ଏପରି ନିଶାଣ କରିଛନ୍ତି ବିରୋଧୀ । ଗୁରୁବାର ଓଡିଶା ଜନତା କଂଗ୍ରେସ ଡିଜି ଅଫିସ ଘେରାଉ କରିବ । କଂଗ୍ରେସ କବିସୂର୍ଯ୍ୟନଗର ହାଜତ ମୃତ୍ୟୁ ଘଟଣାକୁ ନେଇ ରାଜ୍ୟ ସରକାର ଉପରେ ବର୍ଷିବା ସହ ମୃତ ଯୁବକଙ୍କ ପରିବାରକୁ ୨କୋଟି ଟଙ୍କା ଆର୍ଥିକ ସହାୟତା ଦେବାକୁ ଦାବି କରିଛି । ବିପର୍ଯ୍ୟସ୍ତ ଆଇନଶୃଙ୍ଖଳାକୁ ନେଇ ବିରୋଧୀ ଶାସକ ଦଳକୁ ଟାର୍ଗେଟ କରିଥିବା ବେଳେ ବିଜେପି ଏହାକୁ ହାଲକା ଭାବେ ନେଇଛି ।
ବିଜେପି ସରକାର ଦୁଇବର୍ଷ ପୂର୍ତ୍ତି ନେଇ ସଫଳତା ବଖାଣୁଥିବା ବେଳେ ରାଜ୍ୟରେ ବିପର୍ଯ୍ୟସ୍ତ ଆଇନଶୃଙ୍ଖଳା ନେଇ ମୁଖ୍ୟ ବିରୋଧୀ ବିଜେଡି ସରକାରଙ୍କୁ କଡ଼ା ସମାଲୋଚନା କରିଛି । ରାଜ୍ୟରେ ଜଙ୍ଗଲରାଜ ଶାସନ ଚାଲିଛି । ବିଜେପି ସରକାର ଆସିବା ପରଠାରୁ ଓଡିଶାରେ ଲୋକମାନେ ଅସୁରକ୍ଷିତ ଓ ଭୟଭୀତ । ଉତ୍ତରପ୍ରଦେଶ, ବିହାର ପରି ଓଡିଶାରେ ଅପରାଧ ବଢିବଢି ଚାଲିଛି । ଅପରାଧୀଙ୍କ ପୃଷ୍ଠପୋଷକ ସାଜିଛି ଓଡିଶା । ତୁରନ୍ତ ରାଜ୍ୟ ସରକାର ଆଇନଶୃଙ୍ଖଳାକୁ ନିୟନ୍ତ୍ରଣକୁ ଆଣିବାକୁ ବିଜେଡି ଦାବି କରିଛି ।
କେବଳ ଏତିକି ନୁହେଁ କବିସୂର୍ଯ୍ୟନଗର ହାଜତ ମୃତ୍ୟୁର ବିଚାର ବିଭାଗୀୟ ତଦନ୍ତ ଦାବି କରିଛନ୍ତି ବିରୋଧୀ । ବିପର୍ଯ୍ୟସ୍ତ ଆଇନଶୃଙ୍ଖଳା ପାଇଁ ବିଜେପି ସରକାରକୁ ଦାୟୀ କରି ରାଜରାସ୍ତାକୁ ଓହ୍ଲାଇବାକୁ ଚେତାବନୀ ଦେଇଛନ୍ତି ବିରୋଧୀ । ଗୃହବିଭାଗ ମୁଖ୍ୟମନ୍ତ୍ରୀଙ୍କ ଅଧୀନରେ ରହିଥିବାରୁ ଶାସକ ଦଳକୁ ଏହା ଚିନ୍ତାରେ ପକାଇଛି ।