ଭୁବନେଶ୍ବର: ପୁଣି ଜଣେ କଲେଜ ଛାତ୍ରଙ୍କ ଆତ୍ମହତ୍ୟା। ମୃତ ଛାତ୍ର ହେଲେ ସତ୍ୟ ସ୍ବରୂପ ପଣ୍ଡା। ସେ ନୀଳାଦ୍ରି ବିହାର ସେକ୍ଟର 5 ଅଂଚଳରେ ଏକ ମେସରେ ରହୁଥିଲେ। ସତ୍ୟ ସ୍ବରୂପ ପଣ୍ଡା ନୀଳାଚଳ ପଲିଟେକନିକ୍ କଲେଜ୍ କମ୍ପ୍ୟୁଟର ସାଇନ୍ସ ବିଭାଗର ତୃତୀୟ ବର୍ଷର ଛାତ୍ର ଥିଲେ।
ଘଟଣାସ୍ଥଳରେ ଚନ୍ଦ୍ରଶେଖରପୁର ଥାନା ପୋଲିସ ତଦନ୍ତ ଆରମ୍ଭ କରିଛି। ଘଟଣାସ୍ଥଳରେ ସାଇଣ୍ଟିଫିକ ଟିମର ତଦନ୍ତ ଜାରି। ତେବେ ସତ୍ୟ ବିଭିନ୍ନ ସମୟରେ ନିଶା ସେବନ କରୁଥିଲେ । ତେଣୁ ନିଶା ହିଁ ତାଙ୍କ ଆତ୍ମହତ୍ୟାର କାରଣ ହୋଇଥାଇପାରେ ବୋଲି ପରିବାର ଲୋକେ କହୁଛନ୍ତି।
ନୂଆଦିଲ୍ଲୀ: ପ୍ରେମ ବିବାହକୁ ନେଇ ବୁଧବାର ଗୁରୁତ୍ୱପୂର୍ଣ୍ଣ ଟିପ୍ପଣୀ ଦେଇଛନ୍ତି ସୁପ୍ରିମକୋର୍ଟ । ଦେଶରେ ହେଉଥିବା ଅଧିକାଂଶ ଛାଡ଼ପତ୍ରର ପ୍ରମୁଖ କାରଣ ହେଉଛି ପ୍ରେମ ବିବାହ । ବୁଧବାର ଏକ ମାମଲାର ଶୁଣାଣି କରି ଏହା କହିଛନ୍ତି ସୁପ୍ରିମକୋର୍ଟ । ବିଚାରପତି ବି.ଆର୍ ଗଭାଇ ଓ ସଂଜୟ କାରୋଲଙ୍କ ଖଣ୍ଡପୀଠ ରଖିଛନ୍ତି ଏହି ଟିପ୍ପଣୀ ।
ବୁଧବାର ବୈବାହିକ ବିବାଦ ମାମଲାର ସ୍ଥାନାନ୍ତର ପାଇଁ ହୋଇଥିବା ଆବେଦନର ଶୁଣାଣି ବେଳେ ବିଚାରପତି ବି.ଆର୍ ଗଭାଇ ଓ ସଂଜୟ କାରୋଲଙ୍କ ଖଣ୍ଡପୀଠ ଏଭଳି ମନ୍ତବ୍ୟ ଦେଇଛନ୍ତି । ଶୁଣାଣି ସମୟରେ ଜଣେ ଆବେଦନକାରୀଙ୍କ ଓକିଲ ଦର୍ଶାଇଥିଲେ କି ଏହା ପ୍ରେମ ବିବାହ ଥିଲା । ଏହା ଉପରେ ମନ୍ତବ୍ୟ ଦେଇ ଖଣ୍ଡପୀଠରେ ଅଧ୍ୟକ୍ଷତା କରୁଥିବା ଜଷ୍ଟିସ୍ ବି.ଆର ଗବାଇ କହିଥିଲେ କି ଭାରତରେ ଅଧିକାଂଶ ଛାଡ଼ପତ୍ର ହିଁ ପ୍ରେମ ବିବାହ ପରେ ଆସୁଛି । କୋର୍ଟ ଆବେଦନକାରୀ ଦମ୍ପତ୍ତିଙ୍କୁ ମଧ୍ୟସ୍ଥତା ଦ୍ୱାରା ବିବାଦ ତୁଟାଇବାକୁ ପରାମର୍ଶ ଦେଇଥିଲେ । କିନ୍ତୁ ଏହା ତାଙ୍କ ସ୍ୱାମୀ ବିରୋଧ କରିଥିଲେ ।
ମଧ୍ୟସ୍ଥତାକୁ ସ୍ୱାମୀ ବିରୋଧ କରିବା ପରେ କୋର୍ଟ କହିଥିଲେ କି ନିକଟରେ ଦିଆଯାଇଥିବା ଏକ ରାୟ ଅନୁସାରେ ସ୍ୱାମୀଙ୍କ ସହମତି ବିନା କୋର୍ଟ ଛାଡ଼ପତ୍ର ନିଷ୍ପତ୍ତି ଶୁଣାଇପାରିବେ । ତେବେ ଯେଉଁ କ୍ଷେତ୍ରରେ ଆପୋସ ଆଲୋଚନାର ସମସ୍ତ ବାଟ ବନ୍ଦ ହୋଇଯାଇଥିବା ଏବଂ ସ୍ୱାମୀ ଓ ସ୍ତ୍ରୀଙ୍କ ମଧ୍ୟରେ ସମାଧାନ ଆଉ ସମ୍ଭବ ନୁହେଁ ବୋଲି ସ୍ପଷ୍ଟ ପ୍ରତିୟମାନ ହେଉଥିବା, ସେହିଭଳି କ୍ଷେତ୍ରରେ ସମ୍ବିଧାନର ୧୪୨(୧) ଅଧୀନରେ ନିଜ କ୍ଷମତା ବ୍ୟବହାର କରି ସର୍ବୋଚ୍ଚ ଅଦାଲତ ଛାଡ଼ପତ୍ର ଆଦେଶ ଦେଇପାରିବେ ବୋଲି କହିଥିଲେ ସୁପ୍ରିମକୋର୍ଟ ।
ନୂଆଦିଲ୍ଲୀ: ଆସନ୍ତା ୫ବର୍ଷ ସାରା ବିଶ୍ବବାସୀଙ୍କୁ ଘାଣ୍ଟିବ ତାପମାତ୍ରା । ବିଶ୍ବ ତାପାୟନ 1.5 ଡିଗ୍ରୀ ସେଲସିୟସ ବଢିବ ବୋଲି ସତର୍କ କରାଇଛି ଜାତିସଂଘ । କେବଳ ଏତିକି ନୁହେଁ ଏହି ପାଞ୍ଚ ବର୍ଷ ମଧ୍ୟରୁ ଗୋଟିଏ ବର୍ଷ ସର୍ବାଧିକ ତାପମାତ୍ରାର ଶିକାର ହେବ ବୋଲି ରିପୋର୍ଟରେ କୁହାଯାଇଛି ।
ବିଶ୍ବ ଜଳବାୟୁ ସଂଗଠନ ପକ୍ଷରୁ କୁହାଯାଇଛି- ଆସନ୍ତା ୫ ବର୍ଷରେ ରେକର୍ଡ ତାପମାତ୍ରା ବୃଦ୍ଧି ଆଶଙ୍କା ୯୮ ପ୍ରତିଶତ ଥିବାବେଳେ ଏହି ୫ ବର୍ଷରୁ କୌଣସି ଗୋଟିଏ ବର୍ଷର ତାପମାତ୍ରା ୧.୫ ଡିଗ୍ରୀ ସେଲସିୟସ ବୃଦ୍ଧି ପାଇବା ଆଶଙ୍କା ୬୬ ପ୍ରତିଶତ ରହିଛି। ୨୦୧୫ ପରଠାରୁ ତାପମାତ୍ରା ବୃଦ୍ଧି ଘଟୁଥିବା କୁହାଯାଉଛି। ଗତ ଊନବିଂଶ ଶତାବ୍ଦୀଠାରୁ ବିଭିନ୍ନ ମନୁଷ୍ୟକୃତ କାରଣରୁ ବିଶ୍ବ ତାପମାତ୍ରା ୧ ଡିଗ୍ରୀ ବୃଦ୍ଧି ପାଇଛି।
୧୮୫୦ରୁ ୧୯୦୦ ମଧ୍ୟରେ ହାରାହାରି ତାପମାତ୍ରାଠାରୁ ୨୦୨୨ରେ ୧.୧୫ ଡିଗ୍ରୀ ସେଲସିୟସ ବୃଦ୍ଧି ପରିଲକ୍ଷିତ ହୋଇଥିଲା। ବର୍ତ୍ତମାନ ପ୍ରତି ଦଶନ୍ଧିରେ ତାପମାତ୍ରା ୦.୨ ଡିଗ୍ରୀ ସେଲସିୟମ ବଢୁଛି। ଗତ ୭ ବର୍ଷ ଧରି ଗ୍ରୀନହାଉସ ପ୍ରଭାବ ଜୋରଦାର ପଡିବାରେ ଲାଗିଛି। ଜୁନ ଓ ଜୁଲାଇରେ ଏଲ ନିନୋ ପ୍ରଭାବ ପ୍ରଶାନ୍ତ ମହାସାଗରୀୟ ଅଞ୍ଚଳରେ ପଡିବା ଆଶଙ୍କା ରହିଛି। ବିଶେଷ କରି ୨୦୨୪ରେ ଏଲ ନିନୋର ପ୍ରଭାବ ସର୍ବାଧିକ ହେବ ବୋଲି କୁହାଯାଇଛି।
ଲାହୋର: ଇମ୍ରାନଙ୍କ ସମର୍ଥକଙ୍କୁ ପାକିସ୍ତାନ ଆର୍ମି ଚିଫଙ୍କ ଚରମ ବାଣୀ। ମେ ୯ରେ ଯୋଜନାବଦ୍ଧ ଭାବେ ସାରା ଦେଶରେ ହୋଇଥିବା ହିଂସା ଓ ସୈନ୍ୟ ପ୍ରତିଷ୍ଠାନ ଉପରେ ଆକ୍ରମଣକୁ ବରଦାସ୍ତ କରାଯିବନି ବୋଲି କହିଛନ୍ତି ପାକିସ୍ତାନ ଆର୍ମି ଚିଫ୍ ଅସିମ ମୁନୀର।
ସହିଦ ଯବାନ ଓ ସେମାନଙ୍କ ସ୍ମାରକୀକୁ ଅପମାନିତ କରିବାର ଅଧିକାର କାହାର ନାହିଁ । ପ୍ରତ୍ୟେକ ଯବାନ, ଏଜେନ୍ସି ଓ ସରକାରୀ ଅଧିକାରୀ ଓ ପାକିସ୍ତାନୀ ଜନତାଙ୍କ ପାଇଁ ସେମାନେ ଗର୍ବ। ପୂର୍ବତନ ପ୍ରଧାନମନ୍ତ୍ରୀ ଇମ୍ରାନ ଖାନଙ୍କ ଗିରଫଦାରୀ ପରେ ପିଟିଆଇ ସମର୍ଥକଙ୍କ ଦ୍ବାରା ଦେଶରେ ସୃଷ୍ଟି ହୋଇଥିବା ହିଂସାକୁ ନେଇ ବର୍ଷିଛନ୍ତି ପାକିସ୍ତାନୀ ସେନା ମୁଖ୍ୟ।
ସେପଟେ ଅଲ-କାଦୀର ଟ୍ରଷ୍ଟ ଜମି ଦୁର୍ନୀତି ମାମଲାରେ ଜେରା ପାଇଁ NAB ଇମ୍ରାନଙ୍କୁ ସମନ କରିଥିବା ବେଳେ ସେ ଆଜି ହାଜର ହୋଇନପାରନ୍ତି ବୋଲି କୁହାଯାଉଛି। ଇମ୍ରାନଙ୍କ ଜମାନ ପାର୍କ ସ୍ଥିତ ବାସଭବନ ଆଗରେ ବ୍ୟାପକ ପୋଲିସ ଫୋର୍ସ ମୁତୟନ ହୋଇଥିବା ବେଳେ ସମର୍ଥକ ମଧ୍ୟ ଏକାଠି ହୋଇଛନ୍ତି।
ଭୁବନେଶ୍ୱର: ରାଜଧାନୀରେ ବୁଲିଲା ଖଣ୍ଡା। ଭରତପୁର ଥାନା ନୂଆଗାଁ ଛକରେ ହାତରେ ମାରଣାସ୍ତ୍ର ଧରି ଆତଙ୍କ ରଚିଲେ ଯୁବକ। ଖଣ୍ଡା, ତଲୱାର ଧରି ମାର୍କେଟ ଅଞ୍ଚଳରେ ବ୍ୟବସାୟୀଙ୍କୁ ହାଣିଲେ। ଚଳାଇଲେ ଦୀର୍ଘ ୨ ଘଣ୍ଟାର ଆତଙ୍କରାଜ । ସିସିଟିଭିରେ କଏଦ ହେଲା ପୁରା ଘଟଣା।
ନନ୍ଦିଘୋଷ ଟିଭି ହାତରେ ଘଟଣା ବେଳର Exclusive ଫୁଟେଜ । ଗୁଡେଇ ତୁଡେଇ ପିଟିଲେ ଓ ଖଣ୍ଡାରେ ହାଣିଲେ ଯୁବକ । ସମସ୍ତ ଅଭିଯୁକ୍ତଙ୍କୁ ଧରିବା ପାଇଁ ଭରତପୁର ପୋଲିସର ଛାନଭିନ ଜାରି ରହିଛି । ୩ ଅଭିଯୁକ୍ତଙ୍କ ମଧ୍ୟରୁ ଜଣଙ୍କୁ ବିଳମ୍ବିତ ରାତିରେ କାବୁ କରିଛି ପୋଲିସ ।
ଭୁବନେଶ୍ୱର: ଓଡ଼ିଶା ଦେଇ ଅଧିକ ଦୁଇଟି ବନ୍ଦେ ଭାରତ ଏକ୍ସେପ୍ରସ ଚଳାଚଳ କରୁ । ଗୋଟିଏ ପୁରୀରୁ ସମ୍ବଲପୁର ଦେଇ ରାଉରକେଲା ଏବଂ ଅନ୍ୟଟି ଭୁବନେଶ୍ବରରୁ ହାଇଦ୍ରାବାଦ ମଧ୍ୟରେ ଚଳାଚଳ କରୁ । ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ନିକଟରେ ଏ ଦାବି ରଖିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଓଡ଼ିଶାର ସ୍ବାର୍ଥକୁ ଆଖିରେ ରଖି ନବୀନ ଆହୁରି ଦାବି ରଖିଛନ୍ତି ଯେ, ଶ୍ରୀକ୍ଷେତ୍ର ପୁରୀ ଓ କୋଣାର୍କ ମଧ୍ୟରେ ନୂଆ ରେଳ ଲାଇନ କାମ ହେଉ । ରେଳ ଚାଲୁ । ଏହା ରାଜ୍ୟର ପର୍ଯ୍ୟଟନ ବିକାଶକୁ ଆଗକୁ ନେବ । ଏଥିସହ ଅନୁଗୁଳ- ସୁକିନ୍ଦା ଏବଂ ହରିଦାସପୁର-ପାରାଦୀପ ଲାଇନରେ ଶୀଘ୍ର ପ୍ୟାସେଞ୍ଜର ଟ୍ରେନ୍ ଚଳାଚଳ ପାଇଁ ଦାବି କରିଛନ୍ତି ମୁଖ୍ୟମନ୍ତ୍ରୀ।
ଆଜି ପୁରୀ-କୋଲକାତା ବନ୍ଦେ ଭାରତ ଏକ୍ସପ୍ରେସ ଶୁଭାରମ୍ଭ କରିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି। ଏଥିସହ ପୁରୀ ଓ କଟକ ରେଳଷ୍ଟେସନର ପୁନର୍ବିକାଶ ପାଇଁ ଭିତ୍ତିପ୍ରସ୍ତର ରଖାଯାଇଛି। ଅନୁଗୁଳ-ସୁକିନ୍ଦା ନୂଆ ରେଳଲାଇନ୍, ସମ୍ବଲପୁର-ଟିଟିଲାଗଡ଼ ଲାଇନ୍ ଦାେହରୀକରଣ ଏବଂ ଆଉ ଦୁଇଟି ରେଳଲାଇନ୍ ଲୋକାର୍ପଣ କରାଯାଇଛି। ଓଡ଼ିଶାରେ ରେଳ ଲାଇନର ଶହେ ପ୍ରତିଶତ ବିଦ୍ୟୁତକରଣ କାର୍ଯ୍ୟର ମଧ୍ୟ ଲୋକାର୍ପଣ କରାଯାଇଛି। ଏହି କାର୍ଯ୍ୟକ୍ରମରେ ସାମିଲ ହାେଇ ପ୍ରଧାନମନ୍ତ୍ରୀଙ୍କୁ ଧନ୍ୟବାଦ ଜଣାଇଛନ୍ତି ମୁଖ୍ୟମନ୍ତ୍ରୀ । ସେ ଏ ଅବସରରେ ପ୍ରଧାନମନ୍ତ୍ରୀଙ୍କ ନିକଟରେ ଦେବି ରଖିଛନ୍ତି, ଅଧିକ ଦୁଇଟି ବନ୍ଦେ ଭାରତ ଏକ୍ସପ୍ରେସ ଚଳାଚଳ କଲେ ଏହା ଯାତ୍ରୀମାନଙ୍କୁ ବେଶ ଲାଭ ଦେବ ।
ନବୀନ କହିଲେ, ରାଜ୍ୟ ସରକାର ପୁରୀକୁ ଐତିହ୍ୟ ନଗରୀ କରିବାକୁ କାମ ଆରମ୍ଭ କରିଛନ୍ତି । ଏଥିପାଇଁ ଭିତ୍ତିଭୂମି ବିକାଶ କାମ ଚାଲିଛି । ଶହେ ପ୍ରତିଶତ ଡ୍ରିଙ୍କ ଫ୍ରମ୍ ଟ୍ୟାପ୍ ପ୍ରକଳ୍ପ କାର୍ଯ୍ୟକାରୀ କରିବାରେ ପୁରୀ ଦେଶରେ ପ୍ରଥମ ସହର । ତେଣୁ ପୁରୀ ଓ କୋଣାର୍କ ମଧ୍ୟରେ ରେଳ ସଂଯାେଗ ଜରୁରୀ । ଏହାଦ୍ବାରା ଦୁଇ ଜଣାଶୁଣା ପର୍ଯ୍ୟଟନସ୍ଥଳୀ ମଧ୍ୟରେ ଯାତାୟତ ଆହୁରି ସୁଗମ ହେବ । ଆଗକୁ ପୁରୀ ଆନ୍ତର୍ଜାତିକ ବିମାନବନ୍ଦର କାମ ହେବ । ନିକଟରେ ପ୍ରଧାନମନ୍ତ୍ରୀଙ୍କୁ ଭେଟି ପୁରୀରେ ପ୍ରସ୍ତାବିତ ଶ୍ରୀଜଗନ୍ନାଥ ଆନ୍ତର୍ଜାତିକ ବିମାନବନ୍ଦର ସଂପର୍କରେ ସେ ବିସ୍ତୃତ ଆଲୋଚନା କରିଥିଲେ । ପ୍ରଧାନମନ୍ତ୍ରୀ ଦେଇଥିବା ସମସ୍ତ ପ୍ରସ୍ତାବ କାର୍ଯ୍ୟକାରୀ କରାଯିବ। ଆସନ୍ତା ୪ ବର୍ଷ ମଧ୍ୟରେ ଏ ବିମାନ ବନ୍ଦର କାମ ସରି କାର୍ଯ୍ୟକ୍ଷମ ହେବ । ଏହାକୁ ନିଜେ ପ୍ରଧାନମନ୍ତ୍ରୀ ଆସି ଲୋକାର୍ପଣ କରିବା ନେଇ ସେ ଆଶାବାଦି ବୋଲି ମୁଖ୍ୟମନ୍ତ୍ରୀ କହିଛନ୍ତି । ପୁରୀ-କୋଣାର୍କ ରେଳ ପ୍ରକଳ୍ପରେ ରାଜ୍ୟ ସରକାର ସବୁପ୍ରକାର ସହଯାେଗ କରିବେ । ଏ ପ୍ରକଳ୍ପର ୫୦ ପ୍ରତିଶତ ନିର୍ମାଣ ଖର୍ଚ୍ଚ ସହ ସମୁଦାୟ ଜମି ଅଧିଗ୍ରହଣ ଖର୍ଚ୍ଚ ବହନ କରିବାକୁ ପ୍ରସ୍ତାବ ଦେଇଛନ୍ତି। ଏହା ରେଳବାଇ ପାଇଁ ଲାଭଜନକ ହେବ ବୋଲି ସ୍ପଷ୍ଟ କରିଛନ୍ତି ନବୀନ ।
ଦେଶରେ ବୁଲେଟ୍ ଟ୍ରେନ୍ ଚଳାଚଳର ପ୍ରଥମ ପାହାଚ ହେଉଛି ବନ୍ଦେ ଭାରତ ଏକ୍ସପ୍ରେସ୍ । ପ୍ରଧାନମନ୍ତ୍ରୀଙ୍କ ନେତୃତ୍ବରେ ଖୁବ୍ ଶୀଘ୍ର ଦେଶରେ ବୁଲେଟ୍ ଟ୍ରେନ୍ ଚାଲିବ ବୋଲି ମୁଖ୍ୟମନ୍ତ୍ରୀ କହିଛନ୍ତି ।
ତାମିଲନାଡୁ: ଜଲ୍ଲିକଟ୍ଟୁ ସପକ୍ଷରେ ସୁପ୍ରିମକୋର୍ଟ। ତାମିଲନାଡୁରେ ଜଲ୍ଲିକଟ୍ଟୁକୁ ଆଇନସମ୍ମତ କରିବା ସଂକ୍ରାନ୍ତ କେତେକ ପିଟିସନର ଶୁଣାଣି କରି ରାୟ ଦେଇଛନ୍ତି ସର୍ବୋଚ୍ଚ ଅଦାଲତ। ସୁପ୍ରିମକୋର୍ଟଙ୍କ ଖଣ୍ଡପୀଠ କହିଛନ୍ତି ତାମିଲନାଡୁର ଏକ ସାଂସ୍କୃତିକ ଐତିହ୍ୟ ଭାବେ ପରିଚିତି ଲାଭ କରିଛି ଜଲ୍ଲିକଟ୍ଟୁ। ବିଚାର ବିଭାଗ ଏଥିରେ ହସ୍ତକ୍ଷେପ କରିପାରିବେ ନାହିଁ।
ଜଷ୍ଟିସ କେ.ଏମ. ଯୋଶେଫ, ଜଷ୍ଟିସ ଅଜୟ ରାସ୍ତୋଗି, ଜଷ୍ଟିସ ଅନିରୁଦ୍ଧ ବୋଷ, ଜଷ୍ଟିସ ହୃଷୀକେଶ ରୟ ଓ ଜଷ୍ଟିସ ସି.ଟି. ରବିକୁମାରଙ୍କୁ ନେଇ ଗଠିତ ଖଣ୍ଡପୀଠ ଜଲ୍ଲିକଟ୍ଟୁ ସପକ୍ଷରେ ଶୁଣାଇଛନ୍ତି ରାୟ। ପୋଙ୍ଗଲ ସମୟରେ ତାମିଲନାଡୁରେ ଜଲ୍ଲିକଟ୍ଟୁ ଉତ୍ସବ ଏରୁଥଝୁବୁଥାଲ ନାମରେ ଜଣାଶୁଣା ଏବଂ ଏହାକୁ ଅଧିକାଂଶ ସ୍ଥାନରେ ପାଳନ କରାଯାଇଥାଏ। ୨୦୧୪ରେ ବିଭିନ୍ନ ପ୍ରାଣୀ ଅଧିକାର କର୍ମୀଙ୍କ ପକ୍ଷରୁ ଆଗତ ପିଟିସନର ଶୁଣାଣି କରି ଜଲ୍ଲିକଟ୍ଟୁକୁ ନିଷିଦ୍ଧ କରିଥିଲେ ସୁପ୍ରିମକୋର୍ଟ।
୨୦୧୫ରେ ଏହି ରାୟକୁ ସୁପ୍ରିମକୋର୍ଟରେ ବିରୋଧ କରିଥିଲେ ତାମିଲନାଡୁ ସରକାର । ୩ ହଜାର ୫୦୦ ବର୍ଷର ପରମ୍ପରାକୁ ବଳବତ୍ତର ରଖିବାକୁ ସରକାର କରିଥିବା ଅନୁରୋଧକୁ ଅଗ୍ରାହ୍ୟ କରିଥିଲେ ଖଣ୍ଡପୀଠ । ପରେ ପରିବେଶ ମନ୍ତ୍ରାଳୟ ପକ୍ଷରୁ ଏହି କ୍ରୀଡା ଲାଗି କେତେକ ଗାଇଡଲାଇନ ଜାରି ହୋଇଥିଲା । ତେବେ ଜଲ୍ଲିକଟ୍ଟୁକୁ ବଳବତ୍ତର ରଖିବା ଲାଗି ୨୦୧୭ରେ ତାମିଲନାଡୁ ସରକାର ଆଣିଥିଲେ ଏକ ଅଧ୍ୟାଦେଶ । ତେବେ ବିଧାନସଭାରେ ଗୃହିତ ଏହି ଆଇନ ବିରୋଧରେ ଆଗତ ପିଟିସନର ଶୁଣାଣି କରି ଏହା ଉପରେ ସ୍ଥଗିତାଦେଶ ଜାରି କରିବାକୁ ଅଗ୍ରାହ୍ୟ କରିଥିଲେ ସୁପ୍ରିମକୋର୍ଟ । ୨୦୧୮ରେ ଏହି ମାମଲା ବୃହତ ଖଣ୍ଡପୀଠକୁ ଯାଇଥିଲା ।
ନୂଆଦିଲ୍ଲୀ: କେନ୍ଦ୍ର ମନ୍ତ୍ରିମଣ୍ଡଳରେ ଆକସ୍ମିକ ପରିବର୍ତ୍ତନ। ବଦଳିଲେ କେନ୍ଦ୍ର ଆଇନ ମନ୍ତ୍ରୀ କିରଣ ରିଜିଜୁ । ତାଙ୍କ ବଦଳରେ ଆଇନ ବିଭାଗ ମନ୍ତ୍ରୀ ରହିବେ ଅର୍ଜୁନ ରାମ ମେଘଓ୍ବାଲ । ଆସନ୍ତା ବର୍ଷ ସାଧାରଣ ନିର୍ବାଚନ ହେବାକୁ ଯାଉଥିବାବେଳେ ଏହି ପରିବର୍ତ୍ତନକୁ ନେଇ ଚର୍ଚ୍ଚା ଜୋର ଧରିଛି।
ଦୀର୍ଘ ଦିନ ଧରି ରିଜିଜୁ କେନ୍ଦ୍ର ମନ୍ତ୍ରିମଣ୍ଡଳରେ ଗୁରୁତ୍ବପୂର୍ଣ୍ଣ ବିଭାଗ ସମ୍ଭାଳିଥିଲେ। ତାଙ୍କୁ ଆର୍ଥ ସାଇନ୍ସ ବିଭାଗ ଦାୟିତ୍ବ ଦିଆଯାଇଛି। ବର୍ତ୍ତମାନ ସଂସଦୀୟ ବ୍ୟାପାର ବିଭାଗର ମନ୍ତ୍ରୀ ଅଛନ୍ତି ଅର୍ଜୁନ ରାମ ମେଘଓ୍ବାଲ। ସେ ଏବେ ଆଇନ ମନ୍ତ୍ରାଳୟର ସ୍ବାଧୀନ ଦାୟିତ୍ବରେ ରହିବେ। ନିକଟ ଇତିହାସର ତଥ୍ୟ ଅନୁସାରେ ପ୍ରଥମ ଥର ଲାଗି ଆଇନ ମନ୍ତ୍ରାଳୟ ଦାୟିତ୍ବ ଜଣେ କ୍ୟାବିନେଟ ରାଙ୍କ ମନ୍ତ୍ରୀଙ୍କୁ ଦିଆଯାଇନାହିଁ। ଆଜି ସକାଳୁ ଆଇନ ମନ୍ତ୍ରୀ ବଦଳିବା ନେଇ ରାଷ୍ଟ୍ରପତି ଭବନ ପକ୍ଷରୁ ଏକ ବିବୃତି ଜାରି କରାଯାଇଥିଲା।
ମୁମ୍ବାଇ: ଭାରତକୁ ଅଣାଯିବ କୁଖ୍ୟାତ ଆତଙ୍କବାଦୀ ତାହାଉର ରାଣା । ପାକିସ୍ତାନରେ ଜନ୍ମ, କାନାଡାରେ ବ୍ୟବସାୟ କରୁଥିବା ତାହାଉର ରାଣା ୨୦୦୮ରେ ହୋଇଥିବା ୨୬/୧୧ ମୁମ୍ବାଇ ଆକ୍ରମଣରେ ଆତଙ୍କବାଦୀଙ୍କୁ ସହଯୋଗ କରିଥିଲା। ତାକୁ ଭାରତକୁ ପ୍ରତ୍ୟାର୍ପଣ କରିବା ପାଇଁ ଆମେରିକାର କାଲିଫର୍ଣ୍ଣିଆ କୋର୍ଟ ଅନୁମତି ଦେଇଛନ୍ତି।
ଭାରତର ତଦନ୍ତକାରୀ ସଂସ୍ଥା ଏନଆଇଏ ମାମଲାର ତଦନ୍ତ କରୁଛି। ମୁମ୍ବାଇ ଆକ୍ରମଣ ପଛରେ ଲସ୍କର ଇ ତୋଇବାର ହାତ ଥିବା ସ୍ପଷ୍ଟ ହୋଇଥିଲା । ତାହାଉରକୁ ଆମେରିକାରେ ଗିରଫ କରାଯାଇଥିଲା । ସେବେଠୁ ତାକୁ ଭାରତ ଆଣିବାକୁ ପ୍ରୟାସ କରାଯାଉଛି । କିଛି କୁଟନୈତିକ ସମସ୍ୟା ଯୋଗୁଁ ତାକୁ ଭାରତ ଅଣାଯାଇପାରୁନଥିଲା । ଏବେ କିନ୍ତୁ ତାହା ସମ୍ଭବ ହୋଇଛି ।
ତାହାଉରର ପିଲା ବେଳର ସାଙ୍ଗ ଡେଭିଡ କୋଲେମନ ହେଡଲି ଲସ୍କର ଇ ତୋଇବା ସହ ସାମିଲ ଥିଲା। ସେମାନେ ଭାରତରେ ଆକ୍ରମଣ କରିବାକୁ ଯୋଜନା କରୁଥିବା ତାହାଉର ଜାଣିଥିଲା। ଆକ୍ରମଣ ପାଇଁ ଆତଙ୍କବାଦୀଙ୍କୁ ସବୁ ପ୍ରକାର ସହଯୋଗ କରିଥିଲା ତାହାଉର। ସେବେଠୁ ଭାରତ ପାଇଁ ମୋଷ୍ଟ ଓ୍ବାଣ୍ଟେଡ ହୋଇଯାଇଥିଲା।
ଭୁବନେଶ୍ୱର: ପ୍ରକାଶ ପାଇଲା ମାଟ୍ରିକ ରେଜଲ୍ଟ । ମୋଟ୍ ପାସ୍ ହାର ୯୬.୧୯% ଥିବା ବେଳେ ଛାତ୍ରଙ୍କ ତୁଳନାରେ ଭଲ କରିଛନ୍ତି ଛାତ୍ରୀ। ରେଗୁଲାର ପାସ୍ ହାର ୯୬.୪୦% । ଏକ୍ସ ରେଗୁଲାର ପାସ୍ ହାର ୭୩.୪୧% । ମୋଟ୍ ୬ଟି ଜିଲ୍ଲାରେ ପାସ୍ ହାର ୯୭ ପ୍ରତିଶତରୁ ଅଧିକ ରହିଛି। କଟକ, ଜଗତସିଂହପୁରରେ ସର୍ବାଧିକ ପାସ୍ ହାର ୯୭.୯୯% ଥିବା ବେଳେ ମାଲକାନଗିରିରେ ସର୍ବନିମ୍ନ ପାସ୍ ହାର ୯୨.୬୮ପ୍ରତିଶତ ରହିଛି ।୩୨୨୨ ସ୍କୁଲରେ ଶତ ପ୍ରତିଶତ ରେଜଲ୍ଟ ଥିବା ବେଳେ କୌଣସି ସ୍କୁଲରେ ହୋଇନି ଶୂନ ରେଜଲ୍ଟ ।
ମୋଟ୍ ୨,୫୩,୬୩୩ ଛାତ୍ର ପାସ୍ କରିଥିବା ବେଳେ ୨,୫୮,୮୨୭ ଛାତ୍ରୀ ପାସ୍ କରିଛନ୍ତି । ଛାତ୍ରୀଙ୍କ ପାସ୍ ହାର ୯୭.୦୫% ରହିଥିବା ବେଳେ ଛାତ୍ରଙ୍କ ପାସ୍ ହାର ୯୫.୭୫% । A1ଗ୍ରେଡରେ- ୪୧୫୮ ଛାତ୍ରଛାତ୍ରୀ ପାସ୍ କରିଛନ୍ତି । A2 ଗ୍ରେଡରେ ୨୯,୮୦୫ ଛାତ୍ରଛାତ୍ରୀ ପାସ୍ କରିଛନ୍ତି । b1-77,762, b2-1,19,120 ଛାତ୍ରଛାତ୍ରୀ ପାସ୍ କରିଛନ୍ତି । C ଗ୍ରେଡରେ 1,22,271, D-95,934, E-62,791 ଓ F ଗ୍ରେଡରେ 8585 ଛାତ୍ରଛାତ୍ରୀ ପାସ୍ କରିଛନ୍ତି ।
ବୋର୍ଡ କାର୍ଯ୍ୟାଳୟରେ ଗଣଶିକ୍ଷା ମନ୍ତ୍ରୀ ପ୍ରମିଳା ମଲ୍ଲିକ ରେଜଲ୍ଟ ବୁକ୍ ଉନ୍ମୋଚନ କରିବା ସହ ରେଜଲ୍ଟ ଘୋଷଣା କରିଛନ୍ତି । ମଧ୍ୟମା ଓ ରାଜ୍ୟ ଓପନ ସ୍କୁଲ ସାର୍ଟିଫିକେଟ ପରୀକ୍ଷାଫଳ ପ୍ରକାଶ ପାଇଛି । ବୋର୍ଡ ଓ୍ବେବସାଇଟ www.bseodisha.ac.inରୁ ପରୀକ୍ଷାର୍ଥୀମାନେ ରେଜଲ୍ଟ ଜାଣିପାରିବେ । ସେହିପରି OR 10 space ରୋଲ୍ ନମ୍ବର ଲେଖି 5676750କୁ ଏସଏମଏସ କଲେ ଫଳ ଜଣାପଡ଼ିବ । ଚଳିତବର୍ଷ ୫ ଲକ୍ଷ ୧୬ ହଜାର ୪୨୬ ପିଲା ପାସ୍ ହୋଇଛନ୍ତି । ଗତ ମାର୍ଚ୍ଚ ୧୦ରୁ ୨୦ ତାରିଖ ପର୍ଯ୍ୟନ୍ତ ରାଜ୍ୟର ୩ ହଜାର ୨୧୮ଟି କେନ୍ଦ୍ରରେ ମାଟ୍ରିକ ପରୀକ୍ଷା ହୋଇଥିଲା ।
