ଚାନ୍ଦିପୁର: ସରିଲା ମହାପ୍ରଭୁଙ୍କ ନବଦିନାତ୍ମକ ଯାତ୍ରା । ଘୋଷଯାତ୍ରାର ଶେଷ ଦିନରେ ଗୋଟି ପହଣ୍ଡିରେ ଯାଇ ରତ୍ନବେଦୀରେ ବିଜେ କଲେ ଚତୁର୍ଦ୍ଧାମୂରତି । ପ୍ରଥମେ ସୁଦର୍ଶନ ପରେ ବଡ଼ ଠାକୁର ବଳଭଦ୍ର ଓ ତାପରେ ମହାମାୟୀ ଭଉଣୀ ସୁଭଦ୍ରା ରତ୍ନବେଦୀକୁ ବିଜେ କରିଥିଲେ । ଏହାପରେ ଆରମ୍ଭ ହୋଇଥିଲା ମହାପ୍ରଭୁ ଶ୍ରୀଜଗନ୍ନାଥଙ୍କ ପହଣ୍ଡି । ଭକ୍ତଙ୍କ ଗହଣରେ ହଲିଝୁଲି ଶ୍ରମନ୍ଦୀର ଅଭିମୁଖେ ଯାତ୍ରା କରିଥିଲେ ମହାପ୍ରଭୁ । ଏହିସମୟରେ ସିଂହଦ୍ୱାର ବନ୍ଦ କରିଥିଲେ ମାଆ ଲକ୍ଷ୍ମୀ ସାଆନ୍ତାଣୀ । ଅନେକ ବଚନିକା ପରେ ମାଆଙ୍କୁ ରସଗୋଲା ଖୁଆଇ ଓ ପାଟବସ୍ତ୍ର ଦେଇ ମାନଭଞ୍ଜନ କରିଥିଲେ ଶ୍ରୀ ଜଗନ୍ନାଥ । ନିଳାଦ୍ରୀ ବିଜେରେ ମହାପ୍ରଭୁଙ୍କ ମାନବୀୟ ଲୀଳା ଦର୍ଶନ କରି କୃତାର୍ଥ ହୋଇଛନ୍ତି ଭକ୍ତଗଣ ।
ଦିନିକିଆ ବିଶ୍ୱକପ୍ ପାଇଁ କ୍ୱାଲିଫାଏ କରିପାରିଲାନି ଦୁଇଥରର ବିଶ୍ୱବିଜେତା ୱେଷ୍ଟଇଣ୍ଡିଜ୍
ନନ୍ଦିଘୋଷ ବ୍ୟୁରୋ: ଦୁଇଥରର ବିଶ୍ୱ ଚାମ୍ପିଅନ ୱେଷ୍ଟଇଣ୍ଡିଜର ଚଳିତଥର ବିଶ୍ୱକପ୍ ଖେଳିବାର ସ୍ୱପ୍ନ ଭାଙ୍ଗିଯାଇଛି । ଦଳ ଚଳିତ ବିଶ୍ୱକପ୍ ଖେଳିବା ପାଇଁ କ୍ୱାଲିଫାଏ କରିପାରିନାହିଁ । ବିଶ୍ୱକପ୍ କ୍ୱାଲିଫାୟର ମ୍ୟାଚରେ ୱେଷ୍ଟଇଣ୍ଡିଜକୁ ସ୍କଟଲାଣ୍ଡ ୭ ୱିକେଟରେ ହରାଇଛି । ଏହା ପ୍ରଥମଥର ଅଟେ ଯେବେ ଦଳ ବିଶ୍ୱକପରେ ଖେଳିବ ନାହିଁ । ୱେଷ୍ଟଇଣ୍ଡିଜ ବିଶ୍ୱକପର ପ୍ରଥମ ଦୁଇଟି ସିଜିନରେ ଟାଇଟଲ ଜିତିଛି । ୧୯୭୫ ଏବଂ ୧୯୭୯ରେ ଚାମ୍ପିଅନ ହୋଇଥିଲା ଦଳ । ହରାରେ ସ୍ପୋର୍ଟ୍ସ କ୍ଲବରେ ଶନିବାର ଖେଳାଯାଇଥିବା ମୁକାବିଲାରେ ୱେଷ୍ଟଇଣ୍ଡିଜ ପ୍ରଥମେ ବ୍ୟାଟିଂ କରି ୧୮୧ ରନ୍ ବନାଇଥିଲା ।
ବିଜୟ ପାଇଁ ଆବଶ୍ୟକୀୟ ରନକୁ ସ୍କଟଲାଣ୍ଡକୁ ୪୩.୩ ଓଭରରେ ୩ ୱିକେଟ୍ ହରାଇ ହାସଲ କରିନେଇଛି । ସ୍କଟଲାଣ୍ଡର ବ୍ରାଣ୍ଡନ ମ୍ୟାକମୁଲେନ ଓଭୟ ବ୍ୟାଟିଂ ଏବଂ ବୋଲିଂରେ ଚମତ୍କାର ପ୍ରଦର୍ଶନ କରିଛନ୍ତି । ପ୍ରଥମେ ୱେଷ୍ଟଇଣ୍ଡିଜର ତିନି ଜଣଙ୍କୁ ଆଉଟ୍ କରିଥିଲେ । ପରେ ୬୯ ରନର ଇନିଂସ ଖେଳି ଦଳକୁ ବିଜୟୀ କରିବାରେ ମୁଖ୍ୟ ଭୂମିକା ନିର୍ବାହ କରିଛନ୍ତି । ଏହି ଚମତ୍କାର ପ୍ରଦର୍ଶନ ପାଇଁ ତାଙ୍କୁ ମ୍ୟାନ ଅଫ ଦି ମ୍ୟାଚ୍ ବିବେଚିତ କରାଯାଇଛି । ପ୍ରକାଶଥାଉକି, ଅକ୍ଟୋବର ୫ରୁ ନଭେମ୍ବର ୧୯ ପର୍ଯ୍ୟନ୍ତ ଦିନିକିଆ ବିଶ୍ୱକପ୍ ଖେଳାଯିବ । ଚଳିତଥର ଭାରତ ଏହାର ଆୟୋଜନ କରୁଛି ।
ଚାଲିଛି ଶ୍ରୀଜିଉଙ୍କ ନୀଳାଦ୍ରି ବିଜେ ନୀତି, ନୀଳାଚଳକୁ ବାହୁଡୁଛନ୍ତି ନୀଳାଦ୍ରିନାଥ
ପୁରୀ: ଆରମ୍ଭ ହୋଇଛି ମହାପ୍ରଭୁଙ୍କ ନୀଳାଦ୍ରି ବିଜେ ନୀତି । ସରିଲା ଶ୍ରୀମନ୍ଦିରର ପ୍ରତୀକ୍ଷା । ଶ୍ରୀକ୍ଷେତ୍ରରେ ଚାଲିଛି ଶ୍ରୀଜିଉଙ୍କ ନୀଳାଦ୍ରି ପହଣ୍ଡି । ନୀଳାଚଳକୁ ବାହୁଡୁଛନ୍ତି ନୀଳାଦ୍ରିନାଥ । ରଥ ଉପରୁ ପ୍ରଥମେ ଚକ୍ରରାଜ ସୁଦର୍ଶନଙ୍କ ପହଣ୍ଡି ପରେ ଶ୍ରୀବଳଭଦ୍ରଙ୍କ ପହଣ୍ଡି ଶେଷ ହୋଇଛି । ଏହାପରେ ଦେବୀ ସୁଭଦ୍ରାଙ୍କ ପହଣ୍ଡି ପରେ ପରେ ଶେଷରେ ଆସିବେ ଦାରୁବ୍ରହ୍ମ- ପରମବ୍ରହ୍ମ – ଜଗତ ଠାକୁର- ଶ୍ରୀଜଗନ୍ନାଥ । ଶୃଙ୍ଖଳିତ ନୀଳାଦ୍ରି ବିଜେ ନୀତି ପାଇଁ ବ୍ୟାପକ ବ୍ୟବସ୍ଥା କରାଯାଇଛି । କାଳିଆ ସାଆନ୍ତଙ୍କ ନୀଳାଦ୍ରି ପହଣ୍ଡି ବେଳେ ଦେଖିବାକୁ ମିଳିବ ଆଉ ଏକ ମାନବୀୟ ଲୀଳା । ମହାପ୍ରଭୁ ଝୁଲିଝୁଲି ଯିବା ବେଳେ ହଠାତ୍ ସିଂହଦ୍ୱାର ବନ୍ଦ କରିଦେବେ ମାଆ ଲକ୍ଷ୍ମୀ ସାଆନ୍ତାଣୀ । ଅନେକ ବଚନିକା ପରେ ମାଆଙ୍କୁ ରସଗୋଲା ଖୁଆଇ ଓ ପାଟବସ୍ତ୍ର ଦେଇ ମାନଭଞ୍ଜନ ପରେ ଶ୍ରୀମନ୍ଦିରକୁ ପ୍ରବେଶ କରିବା ପାଇଁ ଅନୁମତି ଦେବେ ମହାଲକ୍ଷ୍ମୀ ।
ଜିଏସଟି ସଂଗ୍ରହରେ ଓଡ଼ିଶାର ରେକର୍ଡ, ଜୁନରେ ଆଦାୟ ହୋଇଛି ୧୭୩୨.୪୯ କୋଟି
ଭୁବନେଶ୍ୱର: ଜିଏସଟି ଆଦାୟରେ ରାଜ୍ୟ ସରକାରଙ୍କ ରେକର୍ଡ । ଜୁନ ମାସରେ ୨୫.୧୩ ପ୍ରତିଶତ ଅଧିକ ଜିଏସଟି ଆଦାୟ ସହ ଆଇଜିଏସଟି ସେଟଲମେଣ୍ଟ କରାଯାଇଛି । ଗତବର୍ଷ ଜୁନ ମାସରେ ରାଜ୍ୟ ସରକାର ୧୩୮୪ କୋଟି ୫୯ ଲକ୍ଷ ଟଙ୍କାର ଜିଏସଟି ଆଦାୟ ସହ ଆଇଜିଏସଟି ସେଟଲମେଣ୍ଟ କରିଥିଲେ । ଚଳିତ ବର୍ଷ ଜୁନରେ କିନ୍ତୁ ରାଜ୍ୟ ସରକାର ରେକର୍ଡ ୧୭୩୨ କୋଟି ୪୯ ଲକ୍ଷ ଟଙ୍କାର ଜିଏସଟି ଆଦାୟ ଓ ଆଇଜିଏସଟି ସେଟଲମେଣ୍ଟ କରିଛନ୍ତି ।
ସେହିଭଳି ଆର୍ଥିକ ବର୍ଷ ଆରମ୍ଭରୁ ଜୁନ ସୁଦ୍ଧା ଅର୍ଥାତ ପ୍ରଥମ ତିନି ମାସରେ ରାଜ୍ୟ ସରକାର ଗତ ବର୍ଷ ତୁଳନାରେ ୩୦.୧୩ ପ୍ରତିଶତ ଅଧିକ ଜିଏସଟି ଆଦାୟ ଓ ଆଇଜିଏସଟି ସେଟଲମେଣ୍ଟ କରିଛନ୍ତି । ଏହି ସମୟ ମଧ୍ୟରେ କେବଳ ଜିଏସଟି ଆଦାୟରେ ମଧ୍ୟ ୭.୬୫ ପ୍ରତିଶତ ଅଭିବୃଦ୍ଧି ହୋଇଛି । ସେହିପରି ଜୁନ ମାସରେ ଟିକସ ଆଦାୟରେ ମଧ୍ୟ ୧୩.୮୪ପ୍ରତିଶତ ବୃଦ୍ଧି ହୋଇଛି ।
ଖେଳୁଥିବା ବେଳେ ପୋଖରୀରେ ବୁଡ଼ି ଦୁଇ ଭାଇଙ୍କ ସଲିଳ ସମାଧି
ଲମତାପୁଟ: ପୋଖରୀରେ ବୁଡି ଦୁଇ ଭାଇଙ୍କ ସଲିଳ ସମାଧି । ଲମତାପୁଟ ବ୍ଲକ କଞ୍ଚଣା ଗାଁ ନିକଟ ପୋଖରୀରେ ଘଟିଛି ଅଘଟଣ । ମୃତକ ହେଲେ ଅର୍ଜୁନ କ୍ରିସାନି ଏବଂ ଲବ କ୍ରିସାନିଙ୍କ ୭ ବର୍ଷର ପୁଅ ଅମିତ ଏବଂ ୮ ବର୍ଷର ପୁଅ ପପୀନ୍ଦ୍ର । ଅର୍ଜୁୱ ଏବଂ ଲବ ବିଲରେ କାମ କରୁଥିବା ବେଳେ ଦୁଇ ଭାଇ ପାଖରେ ଖେଳୁଥିଲେ । ଦୁଇ ଭାଇ ଖେଳୁ ଖେଳୁ ନିକଟରେ ଥିବା ପୋଖରୀକୁ ଚାଲିଯାଇଥିଲେ । କିଛି ସମୟ ପରେ ଉଭୟଙ୍କୁ ବହୁ ଖୋଜା ଖୋଜି କରାଯାଇଥିଲେ ମଧ୍ୟ ସେମାନେ ମିଳିନଥିଲେ । ସ୍ଥାନୀୟ ଲୋକ ମାନେ ପୋଖରୀରେ ଦୁଇ ଭାଇ ଭାସୁଥିବା ଦେଖି ଖବର ଦେବା ପରେ ଉଭୟଙ୍କ ମୃତଦେହ ପାଣିରୁ ଉଦ୍ଧାର କରାଯାଇଥିଲା । ଦୁଇ ଜଣଙ୍କ ମୃତ୍ୟୁରେ ଗାଁରେ ଶୋକାକୁଳ ପରିସ୍ଥିତି ସୃଷ୍ଟି ହୋଇଛି ।
ଓ୍ବାର୍କ ଫ୍ରମ ହୋମ ଅଫର ଦେଇ ୧୪ ଲକ୍ଷ ସାଇବର ଠକେଇ ମାମଲା, ଆଉ ୩ ଜଣ ଗିରଫ
ଭୁବନେଶ୍ୱର: ଓ୍ବାର୍କ ଫ୍ରମ ହୋମ ଅଫର ଦେଇ ୧୪ ଲକ୍ଷ ସାଇବର ଠକେଇ ମାମଲା । ଆଉ ୩ ଜଣକୁ ଗିରଫ କଲା ସାଇବର ଥାନା ପୋଲିସ । ଟେଲିଗ୍ରାମ ଟୁଇଟରରେ ଲିଙ୍କ୍ ପଠାଇ ଠକେଇ କରୁଥିଲେ ଠକ । ରାଉରକେଲାରୁ ଜଣେ, ସମ୍ବଲପୁରରୁ ଦୁଇଜଣ ଏବଂ ବାଲେଶ୍ୱରରୁ ଜଣକୁ ଗିରଫ କରିଛି ପୋଲିସ । ପୁରା ଘଟଣାର ମୁଖ୍ୟ ଅଭିଯୁକ୍ତ ଅନିଲ ହେମ୍ବ୍ରମ ଥିଲା ମାଷ୍ଟରମାଇଣ୍ଡ । ଅନିଲ ହିଁ ନେଟଓ୍ବର୍କିଙ୍ଗ କରି ବିଭିନ୍ନ ପିଲାଙ୍କୁ ଏହି ଗ୍ରୁପ ରେ ମିଶାଇ ଲୋକ ମାନଙ୍କୁ ଲୁଟୁଥିଲା । ଅଭିଯୁକ୍ତଙ୍କ ନିକଟରୁ ୧୮ଟି ଦାମୀ ଫୋନ, ୩୬ ଟି ସିମ୍, ଗୋଟିଏ ଭର୍ଚୁଆଲ ସିମ, ୧୨ଟି ଚେକବୁକ୍, ୧୩ ଟି ଡେବିଟ କାର୍ଡ ଜବତ ହୋଇଛି ।
ଠକଙ୍କ ଆକାଉଣ୍ଟରେ ଥିବା ୬ ଲକ୍ଷ ୩୨ ହଜାର ୮୦୦ ଟଙ୍କା ଫ୍ରିଜ୍ କରିଛି ସାଇବର ଥାନା ପୋଲିସ୍ । ଗତ ସୋମବାର ପୂର୍ବଦିନ ଗ୍ୟାଙ୍ଗ ମୁଖିଆ ଅନିଲ ହେମ୍ରମକୁ ଗିରଫ କରିଥିଲା ପୋଲିସ୍ । ଠକେଇ ଟଙ୍କା ବାହାଘର ଖର୍ଚ୍ଚ କରିଥିଲା । ବାହାଘର ପୁର୍ବରୁ ଅନିଲକୁ ଉଠାଇ ନେଇଥିଲା ପୋଲିସ । ଅନିଲକୁ ରିମାଣ୍ଡରେ ଆଣି ସତ ଉଗାରିଛି ପୋଲିସ । ଏବେ ସୁଦ୍ଧା ୪୫ ଜଣକ ଠାରୁ ଠକେଇ କରିଥିବା ଅଭିଯୋଗ ହୋଇଛି । ପୂର୍ବରୁ ଏହି ଘଟଣାରେ ୪ ଜଣଙ୍କୁ ଗିରଫ କରି କୋର୍ଟ ଚାଲାଣ କରିଥିଲା ସାଇବର ପୋଲିସ
ଗୁଣୁପୁର ଗୈାରୀ ପ୍ରସାଦ ମିଶ୍ର ଓ ସୁପାରି କିଲର ରାଜେଶ ହତ୍ୟା ରହସ୍ୟର ପର୍ଦ୍ଦାଫାସ୍
ଗୁଣୁପୁର: ରାୟଗଡ଼ା ଜିଲ୍ଲା ଗୁଣୁପୁର ଗୈାରୀ ପ୍ରସାଦ ମିଶ୍ର ଓ ସୁପାରି କିଲର ରାଜେଶ ହତ୍ୟା ରହସ୍ୟର ପର୍ଦ୍ଦାଫାସ୍ । ପର୍ଦ୍ଦାଫାସ କଲା ପୋଲିସ । ଜମି ବିବାଦକୁ କେନ୍ଦ୍ର କରି ଗୌରୀ ମିଶ୍ରଙ୍କୁ ହୋଇଥିଲା ଗୁଳିମାଡ଼ । ପ୍ରମାଣ ନଷ୍ଟ ପାଇଁ ସୁପାରି କିଲର ରାଜେଶକୁ ବିଶାଖାପାଟଣାରେ ହତ୍ୟା କରି ପୋତି ଦେଇଥିଲେ ଦୁର୍ବୃତ୍ତ । ସୁପାରି ଦେଇଥିବା ଅଭିଯୁକ୍ତ ଓ ସହଯୋଗୀ ସମେତ ୭ଜଣଙ୍କୁ ଗିରଫ କରାଯାଇଥିବା ବେଳେ ଆଉ ୨ଜଣଙ୍କୁ ପୋଲିସ ଖୋଜୁଛି । ଦୁଇଟି ବନ୍ଧୁକ, ଗୋଟିଏ ବାଇକ୍ ଜବତ କରିଛି ଗୁଣୁପୁର ପୋଲିସ୍ ।
ସୂଚନା ଅନୁସାରେ, ଗୌରୀଙ୍କ ଦାଦାଙ୍କ ନାଁରେ ଥିବା ଜମି ହାତେଇବାକୁ ଗଞ୍ଜାମ ଜିଲ୍ଲା ଛତ୍ରପୁରରୁ ହୋଇଥିଲା ପ୍ଲାନ୍ । ମୁଖ୍ୟ ଷଡ଼ଯନ୍ତ୍ରକାରୀ କ୍ରିଷ୍ଣା ଓ ଜିକେ କରିଥିଲେ ପ୍ଲାନ୍ । ଗୈାରୀ ମିଶ୍ରଙ୍କୁ ହତ୍ୟା କରିବା ପାଇିଁ ୩୦ ଲକ୍ଷ ଟଙ୍କାର ହୋଇଥିଲା ଡିଲ୍ । ସୁପାରି କିଲର ରାଜେଶକୁ ଲକ୍ଷେ ୯୦ ହଜାର ଟଙ୍କା ଦିଆସରିଥିଲା । ମେ ୧୩ ତାରିଖରେ ଗୌରୀ ତାଙ୍କ ବନ୍ଧୁଙ୍କ ସହ ବ୍ରିଜ୍ ଉପରେ ଠିଆ ହୋଇଥିବା ବେଳେ ତାଙ୍କୁ ଗୁଳି କରି ହତ୍ୟା କରାଯାଇଥିଲା । ପରେ ସୁପାରି କିଲର ରାଜେଶ ଅବଶିଷ୍ଟ ଟଙ୍କା ମାଗିବାରୁ ତାକୁ ମଧ୍ୟ ରାସ୍ତାରୁ ହଟାଇବାକୁ ହୋଇଥିଲା ପ୍ଲାନ୍ । ରାଜେଶକୁ ବିଶାଖାପାଟଣାକୁ ଡାକି ୧୮ ତାରିଖରେ ହତ୍ୟା କରି ପୋତି ଦେଇଥିଲେ । ଏନେଇ ରାୟଗଡା ଏସପି ବିବେକାନନ୍ଦ ଶର୍ମା ସୂଚନା ଦେଇଛନ୍ତି।
ବାଇଜୁ ବଦଳରେ ଏବେ ଟିମ୍ ଇଣ୍ଡିଆ ଜର୍ସିରେ ଦେଖିବାକୁ ମିଳିବ ଡ୍ରିମ ଇଲେଭେନର ଲୋଗୋ
ମୁମ୍ବାଇ: BCCIର ବଡ଼ ଘୋଷଣା । ବଦଳିମ ଟିମ୍ ଇଣ୍ଡିଆର ଜର୍ସି । ବାଇଜୁ ବଦଳରେ ଏବେ ଟିମ୍ ଇଣ୍ଡିଆ ଜର୍ସିରେ ଦେଖିବାକୁ ମିଳିବ ଡ୍ରିମ ଇଲେଭେନର ଲୋଗୋ । ୱେଷ୍ଟଇଣ୍ଡିଜ୍ ଗସ୍ତ ପୂର୍ବରୁ ବିସିସିଆଇ ଘୋଷଣା କରିଛି । ଏବେ ଡ୍ରିମ ଇଲେଭେନ ହୋଇଛି ଟିମ୍ ଇଣ୍ଡିଆ ଜର୍ସିର ଲିଡ୍ ସ୍ପନସର୍ ରହିବ ।ଟିମ୍ ଇଣ୍ଡିଆ ଜର୍ସିର ଲିଡ୍ ସ୍ପନସର ପାଇଁ ବିସିସିଆଇ ଟେଣ୍ଡର ଜାରି କରିଥିଲା ।
ଟେଣ୍ଡର ପ୍ରକ୍ରିୟା ପୂରା ହେବା ପରେ ଆଗାମୀ ୩ ବର୍ଷ ପାଇଁ ଡ୍ରିମ୍ ୧୧ ଟିମ୍ ଇଣ୍ଡିଆର ନୂଆ ଲିଡ୍ ସ୍ପନସର ହେଇଥିବା ଜଣାପଡିଛି । ବିସିସିଆଇଣ ଅଧ୍ୟକ୍ଷ ରୋଜର ବିନ୍ନି କହିଛନ୍ତି, ବିସିସିଆଇର ଅଫିସିଆଲ ସ୍ପୋନ୍ସରଠାରୁ ଆରମ୍ଭ କରି ଲିଡ ସ୍ପୋନ୍ସର ହେବା ପର୍ଯ୍ୟନ୍ତ ବିସିସିଆଇ ଏବଂ ଡ୍ରିମ-୧୧ର ସମ୍ପର୍କ ମଜବୁତ ରହିଛି । ଆମେ ଚଳିତବର୍ଷ ଶେଷ ପର୍ଯ୍ୟାୟରେ ଆଇସିସି ୱାର୍ଲଡ କପର ଆୟୋଜନ କରିବା ପାଇଁ ପ୍ରସ୍ତୁତି ଆରମ୍ଭ କରିବୁ.
ଭାରସାମ୍ୟ ହରାଇ ବଜାରରେ ମାଡିଗଲା ଟ୍ରକ, ୫୧ ମୃତ
ନୈରୋବି: କେନିଆରେ ବଡ଼ ଦୁର୍ଘଟଣା । ଭାରସାମ୍ୟ ହରାଇ ବଜାରରେ ମାଡିଗଲା ଟ୍ରକ । ଦୁର୍ଘଟଣାରେ ପ୍ରାୟ ୫୧ ଜଣଙ୍କର ମୃତ୍ୟୁ ହୋଇଥିବା ବେଳେ ୩୨ରୁ ଅଧିକ ଲୋକ ଆହତ ହୋଇଛନ୍ତି । ସମସ୍ତ ଆହତଙ୍କୁ ନିକଟସ୍ଥ ହସ୍ପିଟାଲରେ ଭର୍ତ୍ତି କରାଯାଇଛି ।ଏହି ଦୁର୍ଘଟଣାରେ କାର୍, ମୋଟର ବାଇକ୍ ଓ ମିନିବସ୍ ଓ ଟ୍ରକ୍ ଭାଙ୍ଗିରୁଜି ଚୁରମାର ହୋଇଯାଇଛି। ମୃତ୍ୟୁସଂଖ୍ୟା ଆହୁରି ବଢିବା ନେଇ ଆଶଙ୍କା କରାଯାଉଛି । ଶୁକ୍ରବାର ସନ୍ଧ୍ୟାରେ ଶିପିଂ କଣ୍ଟେନର ନେଇଯାଉଥିବା ଏକ ବସ୍ ଓଲଟିପଡ଼ି ଏକାଧିକ ଗାଡ଼ିରେ ଧକ୍କା ହେବାରୁ ଏଭଳି ଦୁର୍ଘଟଣା ଘଟିଛି।
ଅଶାନ୍ତ ହେବାରେ ଲାଗିଛି ଫ୍ରାନ୍ସ , ପୋଲିସ ଗୁଳିରେ ୧୭ ବର୍ଷୀୟ ନାବାଳକର ମୃତ୍ୟୁ ପରେ ୪ ଦିନ ହେଲା ଚାଲିଛି ହିଂସା
ପ୍ୟାରିସ: ଅଶାନ୍ତ ହେବାରେ ଲାଗିଛି ଫ୍ରାନ୍ସ । ପୋଲିସ ଗୁଳିରେ ଜଣେ ୧୭ ବର୍ଷୀୟ ନାବାଳକର ମୃତ୍ୟୁ ପରେ ୪ ଦିନ ହେଲା ଫ୍ରାନ୍ସରେ ବ୍ୟାପକ ହିଂସାକାଣ୍ଡ ଘଟିଛି। ଆନ୍ଦୋଳନକାରୀ ବ୍ୟାପକ ସରକାରୀ ସମ୍ପତ୍ତି ନଷ୍ଟ କରିଛନ୍ତି। ବିଭିନ୍ନ ସ୍ଥାନରେ ପୋଲିସ ଏବଂ ଦଙ୍ଗାକାରୀ ମୁହାଁମୁହିଁ ହୋଇଛନ୍ତି । ୮ ଶହରୁ ଅଧିକ ଲୋକ ଗିରଫ ହେଲେଣି। ବଜାରରୁ ଲୁଟ୍ ହେଉଛି ଏବଂ ହଜାର ହଜାର ଗାଡ଼ି ଜାଳି ଦିଆଯାଇଛି । ବିଭିନ୍ନ ସହରରେ କର୍ଫ୍ୟୁ ଜାରି ହୋଇଛି। ସୁରକ୍ଷା ପାଇଁ ୪୫ ହଜାରରୁ ଅଧିକ ସୁରକ୍ଷାକର୍ମୀ ନିୟୋଜିତ ଅଛନ୍ତି । ଆଜି ଏକ ଜରୁରୀ ବୈଠକରେ ରାଷ୍ଟ୍ରପତି ଇମାନୁଏଲ ମାକ୍ରନ ସୂଚନା ଦେଇଛନ୍ତି ଯେ, ଦଙ୍ଗାକାରୀମାନେ ୪୯୨ ସରକାରୀ କୋଠା ନଷ୍ଟ କରିଛନ୍ତି ।
୩ ହଜାର ୮୮୦ ସ୍ଥାନରେ ପୋଡ଼ାଜଳା ହୋଇଛି। ସ୍ଥିତି ନିୟନ୍ତ୍ରଣକୁ ନ ଆସିଲେ ଦେଶରେ ଜରୁରୀ ସ୍ଥିତି ଜାରି ହୋଇପାରେ ବୋଲି ଆଶଙ୍କା କରାଯାଉଛି । ୧୭ ବର୍ଷୀୟ ନାବାଳକ ନାହେଲ ଏମଙ୍କୁ ଗୋଟିଏ ଟ୍ରାଫିକ ପୋଷ୍ଟ ନିକଟରେ ଜଣେ ପୋଲିସ୍ ଅଧିକାରୀ ଗୁଳି କରି ହତ୍ୟା କରିଥିଲେ। ନାହେଲ ଟ୍ରାଫିକ ପୋଷ୍ଟରେ ଦ୍ରୁତଗତିରେ ଗାଡ଼ି ଚଳାଇ ଯାଉଥିଲେ। କିଛି ବାଟ ଯିବା ପରେ ପୋଲିସ୍ ଅଧିକାରୀ ଜଣଙ୍କ ତାଙ୍କୁ ଅଟକାଇ ଜିରୋ ରେଞ୍ଜରୁ ଗୁଳି କରିଥିଲେ । ପୋଲିସ ଅଧିକାରୀଙ୍କୁ ଗିରଫ କରାଯାଇଥିଲେ ମଧ୍ୟ ହିଂସା ଥମିବାର ନାଁ ଧରୁନି।