ନନ୍ଦିଘୋଷ ବ୍ୟୁରୋ: ଯେମିତି ଦିଅଁ…ସେମିତି ପୂଜା । ଭଲ ଗେଷ୍ଟ ପାଇଲେ… ଭଲ ହୋଷ୍ଟ ହେବି । ଏମିତି ତେରଛା ବାଣ ମାରି ଚର୍ଚ୍ଚାରେ ରହିଛନ୍ତି ବୈଦେଶିକ ମନ୍ତ୍ରୀ ଜୟଶଙ୍କର। ସାଘାଂଇ ସହଯୋଗ ସଙ୍ଗଠନ ବୈଠକରେ ଯୋଗଦେବାକୁ ଗୋଆ ଆସିଛନ୍ତି ପାକିସ୍ତାନ ବୈଦେଶିକ ମନ୍ତ୍ରୀ ବିଲାୱଲ ଭୁଟ୍ଟୋ । ଏହି ସମୟରେ ବିଲାୱଲଙ୍କ ସହ ହାତ ନମିଶାଇ ଦୂରରୁ ନମସ୍କାର କରିଥିଲେ ଜୟଶଙ୍କର। ଏହାକୁ ନେଇ ମିଡିଆାରେ ଚର୍ଚ୍ଚା ହେବା ପରେ ଏମିତି ଜବାବ ରଖିଛନ୍ତି ଜୟଶଙ୍କର ।

ଏପରିକି ଭୁଟ୍ଟାେଙ୍କୁ ଆତଙ୍କବାଦୀ ଶିଳ୍ପର ମୁଖପାତ୍ର ବୋଲି କହିବାକୁ ପଛାଇ ନାହାନ୍ତି । ଏସସିଓ ବିଦେଶ ମନ୍ତ୍ରୀଙ୍କ ବୈଠକରେ ବିଲାୱଲ ଏକ ବିବାଦୀୟ ବୟାନ ଦେଇଥିଲେ । ଯାହାକୁ ନେଇ ଅନେକ ଚର୍ଚ୍ଚା ଜୋର ଧରିଛି । ବାସ୍ତବରେ କଶ୍ମୀରରେ ଜି -୨୦ ବୈଠକ ଆୟୋଜନ କରିବା ପ୍ରଶ୍ନରେ ବିଲାୱଲ କହିଥିଲେ ଯେ ‘ସମୟ ଆସିଲେ ଉତ୍ତର ଦିଆଯିବ’ । ନିକଟରେ ଗୋଆରେ ଅନୁଷ୍ଠିତ ସାଘାଂଇ ସହଯୋଗ ସଙ୍ଗଠନର ବିଦେଶ ମନ୍ତ୍ରୀମାନଙ୍କର ବୈଠକ ହୋଇଥିଲା ।

ଏଥିରେ ଅନ୍ୟ ସଦସ୍ୟଙ୍କ ସହିତ ପାକିସ୍ତାନର ବିଦେଶ ମନ୍ତ୍ରୀ ବିଲାୱଲ ଭୁଟ୍ଟୋ ଯୋଗଦେଇଥିଲେ । ଏହପରେ ଏକ ପ୍ରେସ କନଫରେନ୍ସରେ ଯୋଗଦେଇ ପାକିସ୍ତାନ ଉପରେ ବର୍ଷିଛନ୍ତି ଜୟଶଙ୍କର । ପାକ୍ ବୈଦେଶିକ ମନ୍ତ୍ରୀ ବିଲାୱଲ ଭୁଟ୍ଟୋଙ୍କୁ ଆତଙ୍କବାଦ ଇଣ୍ଟଷ୍ଟ୍ରିର ପ୍ରବକ୍ତା ବୋଲି କହିଛନ୍ତି । ଆହୁରୀ ମଧ୍ୟ କହିଛନ୍ତି ଯେ, କୌଣସି ପରିସ୍ଥିତିରେ ପାକିସ୍ତାନ ଉପରେ ଭରସା କରାଯାଇପାରିବ ନାହିଁ। ଆତଙ୍କବାଦୀ ଏବଂ ଷଡଯନ୍ତ୍ରକାରୀଙ୍କ ସହ ବସି କୌଣସି କଥାବାର୍ତ୍ତା ହେବା ଉଚିତ ନୁହେଁ ।

ଜୟଶଙ୍କର ବିଲାୱଲଙ୍କୁ ଏଭଳି କଟକ୍ଷ କରି ଉକ୍ତ କନଫରେନ୍ସରେ କହିଛନ୍ତି । ଭାରତର ବୈଦେଶିକ ମନ୍ତ୍ରୀ ଜୟଶଙ୍କର କହିଥିଲେ ଯେ, ଯଦି ଅତିଥି ଭଲ ହୋଇଥାନ୍ତେ ତାହେଲେ ସେ ଜଣେ ଭଲ ଅତିଥି ସତ୍କାରକ ହୋଇପାରିଥାନ୍ତେ । ଅର୍ଥାତ୍ ଜଣେ ଭଲ ଗେଷ୍ଟ ପାଇଲେ ଭଲ ହୋଷ୍ଟ ହୋଇପାରିବେ । ଏଥିରୁ ସେ ସ୍ପଷ୍ଟ କରିଦେଇଛନ୍ତି ଯେ, ପାକିସ୍ତାନର ବିଦେଶ ମନ୍ତ୍ରୀ ଜଣେ ଭଲ ଅତିଥି ନୁହନ୍ତି। ପାକିସ୍ତାନ ଜମ୍ମୁ-କଶ୍ମୀରର ଯେଉଁ ଅଞ୍ଚଳ (ପିଓକେ)କୁ ବେଆଇନ ଭାବେ ଦଖଲ କରିଛି, ସେଠାରୁ ତୁରନ୍ତ ହଟିଯିବା ଉଚିତ । ଭାରତ ସବୁବେଳେ ଏହାର ସ୍ଥିତି ସ୍ପଷ୍ଟ କରିଆସିଛି ଯେ ଆତଙ୍କବାଦ ଓ କଥାବାର୍ତ୍ତା ଦୁଇଟା ଏକାସଙ୍ଗେ ଚାଲିପାରିବ ନାହିଁ ବୋଲି କହିଛନ୍ତି ଜୟଶଙ୍କର ।