ବାଟି ବାଟି ସମ୍ପତ୍ତି, ହଜାର ହଜାର ସେବାୟତ । ତଥାପି ମକର ସଂକ୍ରାନ୍ତିରେ ଖାଡ଼ା ଉପାସ ରହିଲେ ବାବା ଲିଙ୍ଗରାଜ । କ୍ଷୀର ଆଉଟାକୁ ନୀତି ନେଇ ବଡୁ ଓ ବ୍ରାହ୍ମଣ ନିଯୋଗ ବିବାଦ । ପାଳନ ହେଲାନି ମକର ଯାତ୍ରା । ପରସ୍ପରକୁ ଦୋଷ ଦେଲେ ଦୁଇ ନିଯୋଗ । ଯଦିଓ ନୀତି ସ୍ବାଭାବିକ ହୋଇଛି ତଥାପି ପ୍ରଶାସନ ଚାହିଁଥିଲେ ପ୍ରଭୁ ଲିଙ୍ଗରାଜ ଓପାସ ରହି ନଥାନ୍ତେ ବୋଲି ଅଭିଯୋଗ କରିଛନ୍ତି ବଡୁ ନିଯୋଗ ସେବାୟତ। ମଙ୍ଗଳବାର ଦିନ ଥିବା କ୍ଷୀର ଆଉଟା ନୀତି ସମୟରେ ବିଭ୍ରାଟ ଉପୁଜିପାରେ ବୋଲି ଦୋବୋତ୍ତର ବିଭାଗ, ଆଇନ ବିଭାଗ ଓ ମନ୍ଦିର ପ୍ରଶାସନକୁ ବଡୁ ନିଯୋଗ ଅବଗତ କରାଇଥିଲେ । ଆଲୋଚନା କରାଯାଇଥିଲେ ସମାଧାନ ହୋଇପାରିଥାନ୍ତା । ଅନେକ ବର୍ଷରୁ ଏହି ନୀତି ବଡୁ ସେବାୟତ କରି ଆସୁଛନ୍ତି । ଲିଙ୍ଗରାଜ ମନ୍ଦିରର ରେକର୍ଡରେ ବି ଏହି ବିଷୟରେ ଲେଖାଯାଇଛି । ତେବେ ଜିଲ୍ଲାପାଳ ଚୁପ ରହିବାରୁ ଆଜି ଏପରି ସ୍ଥିତି ଉପୁଜିଲା ବୋଲି ନିଯୋଗ ଅଭିଯୋଗ କରିଛି ।
ସେପଟେ ନୀତି ବିଭ୍ରାଟ ପାଇଁ ଦେବୋତ୍ତର ବିଭାଗକୁ ଦୋଷ ଦେଇଛି ବ୍ରାହ୍ମଣ ନିଯୋଗ । ଗତ ୨୪ ବର୍ଷ ଯାଏଁ କ୍ଷୀର ଆଉଟା ନୀତି ବ୍ରାହ୍ମଣ ନିଯୋଗ କରି ଆସୁଛି । ୨୦୨୫ରେ ଏହାକୁ ବଡୁ ନିଯୋଗ ବିରୋଧ କଲା । ଯାହାର ପ୍ରଭାବ ୨୦୨୬ ରେ ପଡିଲା ବୋଲି କହିଛି ବ୍ରାହ୍ମଣ ନିଯୋଗ । ସମାଧାନ ବଦଳରେ ହାଇକୋର୍ଟ ଯାଏଁ କଥା ଯାଉଛି । କିଛି ସମାଧାନ ନକରି କେବଳ ସେବାୟତଙ୍କ ମୁଣ୍ଡରେ ପ୍ରଶାସନ ଦୋଷ ଦେଉଛି ବୋଲି ନିଯୋଗ ଅଭିଯୋଗ କରିଛି । ବାରମ୍ବାର ବିବାଦ ଯୋଗୁଁ ଅନେକ ସମୟରେ ଉପାସରେ ରହୁଛନ୍ତି ବାବା । ତେଣୁ ଏହାର ସ୍ଥାୟୀ ସମାଧାନ ପାଇଁ ସରକାର ତୁରନ୍ତ ଲିଙ୍ଗରାଜ ଆଇନ ଆଣିବାକୁ ଦାବି ଜୋର ଧରିଛି ।
