ନୂଆଦିଲ୍ଲୀ: ଆସନ୍ତାକାଲି ପ୍ରଧାନମନ୍ତ୍ରୀଙ୍କୁ ଭେଟିବେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ପ୍ରଧାନମନ୍ତ୍ରୀଙ୍କ ନିକଟରେ ଓଡ଼ିଶାର ସ୍ବାର୍ଥ ସମ୍ବଳିତ ଦାବି ଦୋହରାଇବେ ନବୀନ । ଦିଲ୍ଲୀରେ ପହଞ୍ଚିବା ପରେ ନବୀନ କହିଛନ୍ତି ଓଡ଼ିଶାର ନ୍ୟାଯ୍ୟ ଦାବିକୁ କେନ୍ଦ୍ର ନିକଟରେ ଉପସ୍ଥାପନ କରିବେ । ୪ ଦିନିଆ ଦିଲ୍ଲୀ ଗସ୍ତରେ କାଲି ପ୍ରଧାନମନ୍ତ୍ରୀଙ୍କୁ ଭେଟିବା ସହ ବିଭିନ୍ନ ସରକାରୀ କାର୍ଯ୍ୟକ୍ରମର ସମୀକ୍ଷା କରିବେ ମୁଖ୍ୟମନ୍ତ୍ରୀ । ବିଭିନ୍ନ ପ୍ରସଙ୍ଗରେ କେନ୍ଦ୍ରମନ୍ତ୍ରୀଙ୍କୁ ଭେଟିବା ସମ୍ଭାବନା ରହିଛି । ବିଭିନ୍ନ ଯୋଜନାରେ କେନ୍ଦ୍ର ପାଖରେ ପଡ଼ିଥିବା ବକେୟା ଅର୍ଥ ଓଡ଼ିଶାକୁ ତୁରନ୍ତ ଦେବାକୁ ଦାବି ରଖିବେ ନବୀନ । ଲଗାତର କେନ୍ଦ୍ର ସରକାର ଓଡ଼ିଶା ପ୍ରତି ବିଭିନ୍ନ କ୍ଷେତ୍ରରେ ଅବହେଳା କରିବା ଯୋଗୁ ରାଜ୍ୟ ବିକାଶରେ ବାଧକ ସାଜିଛି । ଏସବୁ ପ୍ରସଙ୍ଗକୁ ମୁଖ୍ୟମନ୍ତ୍ରୀ ଦିଲ୍ଲୀ ଦରବାରରେ ଉଠାଇ ରାଜ୍ୟ ପାଇଁ ହକ୍ ମାଗିବେ । ୧୩ ତାରିଖରେ ମୁଖ୍ୟମନ୍ତ୍ରୀ ଦିଲ୍ଲୀରୁ ଓଡ଼ିଶା ଫେରିବେ ।
ପ୍ରଫେସର କିଶୋର ବାସା ହେଲେ ASIର ମହାନିର୍ଦ୍ଦେଶକ
ନୂଆଦିଲ୍ଲୀ: ଓଡ଼ିଆ ପୁଅଙ୍କୁ ବଡ଼ ଦାୟିତ୍ୱ । NMAର ଅଧ୍ୟକ୍ଷ ଭାବେ କାର୍ଯ୍ୟ କରୁଥିବା କିଶୋର କୁମାର ବାସାଙ୍କୁ ମିଳିଲା ଅତିରିକ୍ତ ଦାୟିତ୍ୱ । ASIର ମହାନିର୍ଦ୍ଦେଶକ ଭାବେ କିଶୋର ବାସାଙ୍କୁ ମିଳିଲା ଅତିରିକ୍ତ ଦାୟିତ୍ୱ । ଏନେଇ କେନ୍ଦ୍ର ସଂସ୍କୃତି ମନ୍ତ୍ରଣାଳୟ ପକ୍ଷରୁ ବିଧିବଦ୍ଧ ବିଜ୍ଞପ୍ତି ପ୍ରକାଶ ପାଇଛି ।
ଉତ୍କଳ ବିଶ୍ୱବିଦ୍ୟାଳୟର ଅଧ୍ୟାପକ ଥିଲେ ପ୍ରଫେସର କିଶୋର ବାସା । ସେ ଭୋପାଳ IGRMSର ନିର୍ଦ୍ଦେଶକ ଦାୟିତ୍ୱରେ ମଧ୍ୟ ଥିଲେ । ସେହିପରି ବାରିପଦା MSCB ବିଶ୍ୱବିଦ୍ୟାଳୟର କୁଳପତି ଥିଲେ କିଶୋର କୁମାର ବାସା ।
ଜଙ୍ଗଲରେ ଚଳିବନି ଜଙ୍ଗଲରାଜ, ହାର୍ଡକୋରଙ୍କୁ ଡିଜିପିଙ୍କ କଡ଼ା ଚେତାବନୀ
ଭୁବନେଶ୍ୱର: ଜଙ୍ଗଲରେ ଚଳିବନି ଜଙ୍ଗଲରାଜ । ହାର୍ଡକୋରଙ୍କୁ ଡିଜିପିଙ୍କ କଡ଼ା ଚେତାବନୀ । ସୁଧୁରିଯାଅ ନହେଲେ ପୋଲିସ ଦେଖାଇବ ଅସଲ ରୂପ । ମାଓବାଦୀରୁ ମିଲିସିଆ, ସମସ୍ତଙ୍କ ପାଇଁ ସତର୍କ ଘଣ୍ଟି । କଳାହାଣ୍ଡି ଜିଲ୍ଲା ମଦନପୁର ରାମପୁର ବ୍ଲକ ତାପରଙ୍ଗ ଜଙ୍ଗଲରେ ଗୁଳିବିନିମୟ ଫଳରେ ୩ ମାଓବାଦୀ ନିହତ ହୋଇଛନ୍ତି । ଆହତ ପୋଲିସ ଡିଏସପି ଏୟାରଲିଫ୍ଟ ହୋଇ ଏମ୍ସ ହସ୍ପିଟାଲରେ ଭର୍ତ୍ତି ହୋଇଛନ୍ତି । ଆହତଙ୍କୁ ଆଜି ପୋଲିସ ଡିଜି, ଏଡିଜି ଅପରେସନ, ଗୁଇନ୍ଦା ନିର୍ଦ୍ଦେଶକ ପ୍ରମୁଖ ଭେଟିଛନ୍ତି । ଅସ୍ତ୍ରୋପଚାର ପରେ ଗୋଡ଼ରୁ ଗୋଟିଏ ଗୁଳି ବାହାର କରାଯାଇଛି । ସେପଟେ ମାଓବାଦୀଙ୍କୁ ଗୁଳି, ବନ୍ଧୁକ ଲ୍ୟାଣ୍ଡମାଇନ ଛାଡି ମୁଖ୍ୟ ସ୍ରୋତରେ ସାମିଲ ହେବାକୁ ଆହ୍ୱାନ ଦେଇଛନ୍ତି ଡିଜିପି । ଓଡ଼ିଶା ସରକାରଙ୍କ ଦ୍ୱାରା ଶିକ୍ଷା, ସ୍ୱାସ୍ଥ୍ୟ, ଗମନାଗମନର ଦ୍ରୁତ ବିକାଶ ଚାଲିଥିବା ବେଳେ ଏଥିରେ ସାମିଲ ହେବାକୁ କହିଛନ୍ତି ସୁନୀଲ ବଂଶଲ ।
ରାଜ୍ୟ ସରକାରଙ୍କ ଆତ୍ମସମର୍ପଣ ଓ ପୁର୍ନବାସ ଯୋଜନା ମୁତାବକ ମୁଖ୍ୟସ୍ରୋତକୁ ଫେରିଥିବା ସମସ୍ତ ମାଓବାଦୀଙ୍କୁ ୩୫ ହଜାର ଟଙ୍କା, ୪ ଡିସିମିଲ୍ ଜାଗା କିଣିବାକୁ ୨୫ ହଜାର, ଘର ତିଆରି ପାଇଁ ୪୫ ହଜାର ଟଙ୍କା, ପାଠପଢ଼ା ବାବଦକୁ ୩ ହଜାର ଟଙ୍କା ପ୍ରଦାନ କରୁଛନ୍ତି । ବିଗତ ବର୍ଷରେ ଯୋଗ୍ୟ ବିବେଚିତ ହୋଇଥିବା ୨୨୪ ଜଣ ମାଓବାଦୀଙ୍କୁ ଥଇଥାନ କରିବାରେ ରାଜ୍ୟ ସରକାର ୬ କୋଟି ୭୩ ଲକ୍ଷ ୬ ହଜାର ଟଙ୍କା ଖର୍ଚ୍ଚ କରି ସାରିଥିବା ଗୃହ ବିଭାଗରୁ ସୂଚନା ମିଳିଛି । ଏଣୁ ନିଜର ଦାବି ପୂରଣ ପାଇଁ ନିରୀହଙ୍କ ଜୀବନ ନେବା ଘଟଣା ଆଦୌ ଗ୍ରହଣୀୟ ନୁହେଁ ବୋଲି କହିଛନ୍ତି ମାନବାଧିକାର କର୍ମୀ । ଗୁରୁପ୍ରିୟା ସେତୁ ହେବା ପରେ ବିଚ୍ଛିନ୍ନାଞ୍ଚଳରେ ନିଷ୍ପେସିତ ଭାବେ ବଞ୍ଚୁଥିବା ଲୋକଙ୍କ ସ୍ୱାଭିମାନ ଫେରିଛି । ଏଣୁ ମାରଣାସ୍ତ୍ର ଛାଡ଼ି ଶାନ୍ତିରେ ବଞ୍ଚିବାକୁ ଆହ୍ଵାନ ଦେଇଛନ୍ତି ଡିଜିପି ।
ଜାତୀୟ ସ୍ତରରେ ବଢୁଛି ନବୀନ ପଟ୍ଟନାୟକଙ୍କ ପତିଆରା, ନବୀନ-ନୀତୀଶ ଭେଟଘାଟକୁ ନେଇ ହଲଚଲ ରାଜନୀତି
ଭୁବନେଶ୍ୱର: ନବୀନ-ନୀତୀଶ ଭେଟଘାଟକୁ ନେଇ ରାଜନୀତିରେ ହଟଚମଟ । ମେଣ୍ଟ ନୁହେଁ, ଉଚ୍ଚ ନେତୃତ୍ୱ ପାଇଁ ଜାତୀୟ ସ୍ତରର ନେତାଏ ଏବେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଫ୍ୟାନ୍ । ଥରେ କେନ୍ଦ୍ରମନ୍ତ୍ରୀ ଓ ୫ ଥର ମୁଖ୍ୟମନ୍ତ୍ରୀ ହୋଇ ଜାତୀୟ ରାଜନୀତିକୁ ନୂଆବାଟ ଦେଖାଇଛନ୍ତି ନବୀନ । ଆଦର୍ଶ ଓ ସ୍ବଚ୍ଛ ରାଜନୀତିରେ ଏଜେଣ୍ଡା ସ୍ପଷ୍ଟ ଥିବାରୁ ସାରା ଦେଶରେ ନବୀନଙ୍କ ରହିଛି ସ୍ବତନ୍ତ୍ର ପରିଚୟ । ସେହି ପରିଚୟ ଯୋଗୁଁ ବିହାର ମୁଖ୍ୟମନ୍ତ୍ରୀ ନୀତୀଶ କୁମାରଙ୍କ ସହ ମୁଖ୍ୟମନ୍ତ୍ରୀ ନବୀନଙ୍କ ହୋଇଛି ଭେଟଘାଟ । ଦୁଇ ନେତାଙ୍କ ଭେଟଘାଟକୁ ବ୍ୟକ୍ତିଗତ ଓ ସୌଜନ୍ୟମୂଳକ କହିଛି ବିଜେଡି । ଦଳର ବରିଷ୍ଠ ଉପସଭାପତି କହିଛନ୍ତି- ବିଜେଡି ରାଜ୍ୟ ସ୍ବାର୍ଥକୁ ଦୃଷ୍ଟିରେ ରଖି ନିଷ୍ପତ୍ତି ନେଇଥାଏ । ବିଜେପି ସୁବିଧାବାଦୀ ରାଜନୀତିକୁ ବିଶ୍ବାସ କରେ ।
୨୦୦୦ରୁ ୨୦୦୯ ଯାଏ ରାଜ୍ୟରେ ବିଜେଡି ଓ ବିଜେପି ମଧ୍ୟରେ ମେଣ୍ଟ ଥିଲା । ମେଣ୍ଟ ଭାଙ୍ଗିବା ପରେ ବିଜେଡି ରାଜ୍ୟ ଓ ଦେଶରେ ସମଦୂରତା ନୀତିକୁ ଆପଣାଇଛି । କେନ୍ଦ୍ରରେ ଯିଏ ବି ସରକାରରେ ଥାଏ ରାଜ୍ୟ ସ୍ୱାର୍ଥକୁ ଆଖିରେ ରହି ପ୍ରସଙ୍ଗଭିତ୍ତିକ ସମର୍ଥନ ଦିଏ ବିଜେଡି । ମୁଖ୍ୟମନ୍ତ୍ରୀ ଜାତୀୟ ସ୍ତରରେ କୌଣସି ମେଣ୍ଟକୁ ଯାଇନାହାନ୍ତି । ତେବେ ଏହି ଭେଟଘାଟକୁ ନେଇ ମୁହାଁମୁହିଁ ବିଜେପି ଓ କଂଗ୍ରେସ । କେନ୍ଦ୍ରର ବିଜେପି ସରକାରକୁ ହଟାଇବା ପାଇଁ ତୃତୀୟ ସାମୁଖ୍ୟ ଗଠନକୁ ଗୁରୁତ୍ୱ ଦେଇଛି କଂଗ୍ରେସ । ତେଣେ ଏହି ଭେଟଘାଟକୁ ନେଇ ଛାନିଆ ରାଜ୍ୟ ବିଜେପି । ପୂର୍ବରୁ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ, ତେଲଙ୍ଗାନା ମୁଖ୍ୟମନ୍ତ୍ରୀ କେ. ଚନ୍ଦ୍ରଶେଖର ରାଓ, ଆନ୍ଧ୍ର ମୁଖ୍ୟମନ୍ତ୍ରୀ ଜଗନ ମୋହନ ରେଡ୍ଡୀ ମୁଖ୍ୟମନ୍ତ୍ରୀଙ୍କୁ କରିଥିଲେ ସାକ୍ଷାତ ।
୪ ଦିନିଆ ଦିଲ୍ଲୀ ଗସ୍ତରେ ମୁଖ୍ୟମନ୍ତ୍ରୀ, ସରକାରୀ କାର୍ଯ୍ୟକ୍ରମର କରିବେ ସମୀକ୍ଷା
ଭୁବନେଶ୍ୱର: ୪ ଦିନିଆ ଦିଲ୍ଲୀ ଗସ୍ତରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଆସନ୍ତାକାଲି ଓ ୧୨ ତାରିଖରେ ମୁଖ୍ୟମନ୍ତ୍ରୀ ସରକାରୀ କାର୍ଯ୍ୟକ୍ରମର ସମୀକ୍ଷା କରିବେ। ଏହି ସମୟରେ ଓଡ଼ିଶା ସ୍ୱାର୍ଥ ସମ୍ବଳିତ ବିଭିନ୍ନ ଦାବି କେନ୍ଦ୍ର ପାଖରେ ଦୋହରାଇବେ । ଦିଲ୍ଲୀ ରହଣୀ ସମୟରେ ମୁଖ୍ୟମନ୍ତ୍ରୀ ବିଭିନ୍ନ ପ୍ରସଙ୍ଗରେ କେନ୍ଦ୍ରମନ୍ତ୍ରୀଙ୍କୁ ଭେଟିବା ସମ୍ଭାବନା ରହିଛି। କେନ୍ଦ୍ରକୁ ବିଭିନ୍ନ ଯୋଜନାରେ ବକେୟା ଅର୍ଥ ଓଡ଼ିଶାକୁ ତୁରନ୍ତ ଦେବାକୁ ଦାବି କରିବେ। ରାଜ୍ୟର ନ୍ୟାର୍ଯ୍ୟ ଦାବି ଉପସ୍ଥାପନ ଦିଗରେ ମୁଖ୍ୟମନ୍ତ୍ରୀଙ୍କ ଦିଲ୍ଲୀ ଗସ୍ତ ବେଶ ଗୁରୁତ୍ବପୂର୍ଣ୍ଣ ବୋଲି ବିଜେଡି କହିଛି । ଲଗାତର କେନ୍ଦ୍ର ସରକାର ଓଡ଼ିଶା ପ୍ରତି ବିଭିନ୍ନ କ୍ଷେତ୍ରରେ ଅବହେଳା କରିବା ରାଜ୍ୟ ବିକାଶରେ ବାଧକ ସାଜିଛି । ଏସବୁ ପ୍ରସଙ୍ଗକୁ ମୁଖ୍ୟମନ୍ତ୍ରୀ ଦିଲ୍ଲୀ ଦରବାରରେ ଉଠାଇ ରାଜ୍ୟ ପାଇଁ ହକ୍ ମାଗିବେ । ୧୩ ତାରିଖରେ ମୁଖ୍ୟମନ୍ତ୍ରୀ ଦିଲ୍ଲୀରୁ ଓଡ଼ିଶା ଫେରିବେ ।
କର୍ଣ୍ଣାଟକରେ ବୁଥ୍ ବାହୁଡ଼ା ମତ ବିଜେପି ପାଇଁ ନୁହେଁ ଶୁଭ, ୫ ବର୍ଷ ପରେ ପୁଣି କଂଗ୍ରେସ ଗଢ଼ିପାରେ ସରକାର
ବେଙ୍ଗାଲୁରୁ: କର୍ଣ୍ଣାଟକରେ କିଏ ସରକାର ଗଠନ କରିବ ? କାହର ହେବ ରାଜତିଳକ । ଯଦି ବୁଥ୍ ବାହୁଡ଼ା ମତକୁ ବିଶ୍ୱାସ କରାଯାଏ ତେବେ ଖବର ବିଜେପି ପାଇଁ ନିଶ୍ଚିତ ଭାବେ ଭଲ ନୁହେଁ । ବିଭିନ୍ନ ଏଗଜିଟ୍ ପୋଲ କଂଗ୍ରେସ ସର୍ବାଧିକ ଆସନ ଜିତିବ ବୋଲି କହୁଥିବା ବେଳେ ବିଜେପିକୁ ରନର୍ସ ଅପ୍ ବୋଲି ପ୍ରୋଜେକ୍ଟ କରୁଛନ୍ତି । ଅନ୍ୟପକ୍ଷରେ ଏଗଜିଟ୍ ପୋଲ୍ ଅନୁସାରେ ୨୦୧୮ ଭଳି ଏଥରକ ମଧ୍ୟ ଜେଡିଏସ୍ କିଙ୍ଗ୍ ମେକର ଭୂମିକାରେ ଅବତ୍ତିର୍ଣ୍ଣ ହେବ । କର୍ଣ୍ଣାଟକରେ ରାଜସ୍ଥାନ ଭଳି ପ୍ରତି ପାଞ୍ଚ ବର୍ଷରେ କ୍ଷମତା ପରିବର୍ତ୍ତନର ପରମ୍ପରା ରହିଛି । ତେବେ ବିଜେପି ୩୮ ବର୍ଷର ଏହି ଧାରା ଉପରେ ପୂର୍ଣ୍ଣଛେଦ ଟାଣିବ ବୋଲି ଆଶା କରିଥିଲା । କିନ୍ତୁ ଏଗଜିଟ୍ ପୋଲ୍ ବିଜେପିକୁ ନିଶ୍ଚୟ ନିରାଶ କରିବ।
ଏଗଜିଟ୍ ପୋଲ୍ କ’ଣ କହୁଛି ?
ଏଗଜିଟ୍ ପୋଲ୍ ଅନୁସାରେ କର୍ଣ୍ଣାଟକରେ ସରକାର ଗଠନ ପାଇଁ ଆବଶ୍ୟକ ପୂର୍ଣ୍ଣ ବହୁମତ କାହାରିକି ମଧ୍ୟ ମିଳୁନାହିଁ । ସୂଚନାଯୋଗ୍ୟ ଯେ, କର୍ଣ୍ଣାଟକ ବିଧାନସଭାରେ ୨୨୪ ଆସନ ଥିବା ବେଳେ ସରକାର ଗଠନ ପାଇଁ ଆବଶ୍ୟକ ସଂଖ୍ୟା ହେଉଛି ୧୧୩। ଜନ୍ କି ବାତ୍ ଅନୁସାରେ କଂଗ୍ରେସକୁ ୯୧ରୁ ୧୦୬, ବିଜେପିକୁ ୯୪ରୁ ୧୧୭ ଓ ଜେଡିଏସକୁ ୧୪ରୁ ୨୪ ଆସନ ମିଳିବ। ସେହିଭଳି ଜି ନ୍ୟୁଜ୍ ଅନୁସାରେ ବିଜେପିକୁ ୭୯-୯୪,କଂଗ୍ରେସକୁ ୧୦୩-୧୧୮ ଓ ଜେଡିଏସକୁ ୨୫-୩୩ ଆସନ, ସି-ଭୋଟର ବିଜେପିକୁ ୬୬ରୁ ୮୬, କଂଗ୍ରେସକୁ ୮୧ରୁ ୧୦୧ ଓ ଜେଡିଏସକୁ ୨୦ରୁ ୨୭ ଆସନ ମିଳିବାର ସମ୍ଭାବନା ରହିଛି । ଅନ୍ୟପକ୍ଷରେ ଟିଭି-୯ ଭାରତ ବର୍ଷ ବିଜେପିକୁ ୮୮ରୁ ୯୮ ,କଂଗ୍ରେସକୁ ୯୯ରୁ ୧୦୯ ଓ ଜେଡିଏସକୁ ୨୧ରୁ ୨୬ ଆସନ ମିଳିବ ବୋଲି ଭବିଷ୍ୟବାଣୀ କରିଛି । ରିପବ୍ଲିକ୍ ଟିଭି ଅନୁସାରେ ମଧ୍ୟ ବିଜେପି ସରକାର ଗଠନ ରେସରେ ପଛରେ ଅଛି। ଏହା ଅନୁସାରେ ବିଜେପିକୁ ୮୫ରୁ ୧୦୦, କଂଗ୍ରେସକୁ ୯୪ରୁ ୧୦୮ ଓ ଜେଡିଏସକୁ ୨୪ରୁ ୩୨ ମିଳିବ।
ଜେଡିଏସ୍ କିଙ୍ଗ୍ ମେକର ?
ପ୍ରାୟ ସବୁ ଏଗଜିଟ୍ ପୋଲ୍ କୌଣସି ଦଳକୁ ଏକକ ସଂଖ୍ୟା ଗରିଷ୍ଠତା ଦେଉନାହାନ୍ତି । କଂଗ୍ରେସ ଏଗଜିଟ୍ ପୋଲରେ ଆଗରେ ଥିଲେ ମଧ୍ୟ ସରକାର ଗଠନ ପାଇଁ ଆବଶ୍ୟକ ୧୧୩ ସଂଖ୍ୟାରୁ ଦୁରରେ ରହୁଛି । ଏମିତିରେ ପାଖାପାଖି ୨୫ ଆସନ ଜିତିବା ନେଇ ଯେଉଁ ଜେଡିଏସ ବାବଦରେ ଏଗଜିଟ୍ ପୋଲ୍ କହୁଛନ୍ତି ସେହି ଦଳ କିଙ୍ଗ୍ ମେକର ଭୂମିକାରେ ଅବତିର୍ଣ୍ଣ ହେବାର ଯଥେଷ୍ଠ ସମ୍ଭାବନା ରହିଛି । ଏଠାରେ ଉଲ୍ଲେଖନୀୟ ଯେ, ୨୦୧୮ରେ ଜେଡିଏସ୍ କିଙ୍ଗ୍ ମେକର ଭୂମିକା ନିର୍ବାହ କରିଥିଲା ।
ବିଶ୍ବପ୍ରସିଦ୍ଧ ଘୋଷଯାତ୍ରା ପାଇଁ ଜୋରସୋରରେ ଚାଲିଛି ରଥ ନିର୍ମାଣ କାମ, ସିଙ୍ଗଡା ବାଡିଆ କାମରେ ବ୍ୟସ୍ତ ଭୋଇ ସେବାୟତ
ପୁରୀ: ବିଶ୍ୱପ୍ରସିଦ୍ଧ ଘୋଷଯାତ୍ରା ପାଇଁ ଶୃଙ୍ଖଳିତ ଭାବେ ଚାଲିଛି ରଥ ନିର୍ମାଣ କାର୍ଯ୍ୟ । ଆଜି ସୁଦ୍ଧା ତିନି ରଥର ମୋଟ ୧୮ଟି ଚକ ସମ୍ପର୍ଣ୍ଣ ହୋଇଥିବା ବେଳେ ଅନ୍ୟ ଚକ ଗୁଡ଼ିକ ନିର୍ମାଣ ପାଇଁ ମୁଖ୍ୟତଃ ପହି, ଅରରେ ବିନ୍ଧ କାର୍ଯ୍ୟ ଜାରି ରହିଛି । ଏହାପରେ ଭୋଇ ସେବାୟତଙ୍କ ଦ୍ବାରା ସିଙ୍ଗଡ଼ା ବାଡ଼ିଆ ଯାଇ ବିଲେଇ ବାଡ଼ିଆ ପଦ୍ଧତିରେ ଚକ ନିର୍ମାଣ ସମ୍ପର୍ଣ୍ଣ ହେବ । ନୃସିଂହ ଚତୁର୍ଦଶୀଠାରୁ ଗୁଜ ଅନୁକୂଳ ହୋଇଥିବା ବେଳେ କୋଣ ଗୁଜରେ ହସ୍ତୀ ବିରାଳ, ନର ବିରାଳ, ନୃସିଂହ ବିରାଳ ଆଦି ରୂପ ଖୋଦେଇ କାର୍ଯ୍ୟ ଜାରି ରଖିଛନ୍ତି ରୂପକାର ସେବାୟତ । ଆଗକୁ ନାଟଗୋଡ଼, ପ୍ରଭା କାର୍ଯ୍ୟ କରାଯିବାକୁ ଥିବାବେଳେ ସମସ୍ତ ନିର୍ମାଣ ପ୍ରକ୍ରିୟା ସୁରୁଖୁରୁରେ ଚାଲିଥିବା କହିଛନ୍ତି ବିଶ୍ବକର୍ମା ସେବାୟତ ।
ଶାନ୍ତି ଶୃଙ୍ଖଳାର ସହ ସରିଲା ଝାରସୁଗୁଡ଼ା ଉପନିର୍ବାଚନ, ଇଭିଏମରେ ସିଲ୍ ହେଲା ୯ ପ୍ରାର୍ଥୀଙ୍କ ଭାଗ୍ୟ
ଝାରସୁଗୁଡ଼ା: ଶାନ୍ତି ଶୃଙ୍ଖଳାର ସହ ସରିଲା ଝାରସୁଗୁଡ଼ା ଉପନିର୍ବାଚନ । ଇଭିଏମରେ ସିଲ୍ ହେଲା ୯ ପ୍ରାର୍ଥୀଙ୍କ ଭାଗ୍ୟ । କଡ଼ା ସୁରକ୍ଷା ବଳୟରେ ଷ୍ଟ୍ରଙ୍ଗରୁମ୍ । ୧୩ ତାରିଖରେ ବାହାରିବ ରେଜଲ୍ଟ । ମତସାବ୍ୟସ୍ତ କଲେ ବିଜେଡି, ବିଜେପି ଓ କଂଗ୍ରେସ ପ୍ରାର୍ଥୀ । କିଏ ହେବ ନବଙ୍କ ଉତ୍ତରାଧିକାରୀ ? କିଏ ପିନ୍ଧିବ ବିଜୟ ଟିକା ? ଦିନ ୫ ଟା ସୁଦ୍ଧା ୬୮.୧୨ ପ୍ରତିଶତ ଭୋଟିଂ ହୋଇଛି । ମୋଟ ଏକ ଲକ୍ଷ ୫୧ ହଜାର ୩୫ ଜଣ ମତଦାନ କରିଥିବବେଳେ ପୁରୁଷଙ୍କ ତୁଳନାରେ ମହିଳାଙ୍କ ସଂଖ୍ୟା ଅଧିକ ରହିଛି । ୭୪ ହଜାର ୮ ଜଣ ପୁରୁଷ ଭୋଟ୍ ଦେଇଥିବାବେଳେ ମହିଳା ଭୋଟରଙ୍କ ସଂଖ୍ୟା ରହିଛି ୭୭ ହଜାର ୨୦ । ବେହେରାମାଲ ପିଙ୍କ୍ ବୁଥରେ ଭୋଟ ଦେଲେ ଜିଲ୍ଲାପାଳ । ଘନଘନ ବୁଥ ବୁଲିଲେ ଉତ୍ତରାଞ୍ଚଳ ଆଇଜି ଓ ଏସପି । ନୂଆ ଭୋଟରଙ୍କୁ ଫୁଲ ଚନ୍ଦନ ଓ ପୂର୍ଣ୍ଣକୁମ୍ଭ ଥୋଇ ସ୍ବାଗତ କଲେ ମିଶନ ଶକ୍ତି ମହିଳା । ବୟସ୍କଙ୍କୁ ମୁଣ୍ଡିଆମାରି ଦେଲେ ଗୋଲାପ ଫୁଲ । ନୂଆ ଅନୁଭୂତି ନେଇ ଜିଲ୍ଲା ପ୍ରଶାସନକୁ ଧନ୍ୟବାଦ ଦେଲେ ଭୋଟର ।
ମୁକ୍ତ, ଅବାଧ ଓ ନିରପେକ୍ଷ ଭାବରେ ଶେଷ ହୋଇଛି ଝାରସୁଗୁଡା ଉପନିର୍ବାଚନ । ସକାଳୁ ସକାଳୁ ଗଣପତି ମନ୍ଦିରରେ ପୂଜାର୍ଚ୍ଚନା କରିବା ପରେ ସରବାହାଲ ହାଇସ୍କୁଲର ୩୪ ନମ୍ବର ବୁଥରେ ଭୋଟ ଦେଲେ ବିଜେଡି ପ୍ରାର୍ଥୀ ଦୀପାଳି ଦାସ । ମା ମୀନତି ଦାସ ଓ ଭାଇ ବିଶାଲ ଦାସଙ୍କ ସହ ଆସି ଭୋଟ ଦେବା ସହ ଝାରସୁଗୁଡା ବାସୀ ସମସ୍ତେ ଏହି ମହାନ ପର୍ବରେ ସାମିଲ ହେବାକୁ ନିବେଦନ କରିଥିଲେ । ଝାରସୁଗୁଡାର ବିକାଶ ପାଇଁ ସମସ୍ତଙ୍କ ଆର୍ଶୀବାଦରେ ଦୀପାଳି ବିଜୟଲାଭ କରିବେ ବୋଲି ଆଶା କରିଛନ୍ତି । ସେହିଭଳି ବିଜେପି ପ୍ରାର୍ଥୀ ଟଙ୍କଧର ତ୍ରିପାଠୀ ୧୯ ନମ୍ବର ଓ୍ବାର୍ଡ ଗୁଜରାଟୀ ସ୍କୁଲର ୭୦ ବୁଥରେ ମତଦାନ ସାବ୍ୟସ୍ତ କରିଥିଲେ । କଂଗ୍ରେସ ପ୍ରାଥୀ ତରୁଣ ପାଣ୍ଡେ ୧୭ ନମ୍ବର ୱାର୍ଡର ପୁରୁଣା ବସ୍ତି ପ୍ରାଥମିକ ବିଦ୍ୟାଳୟର ୭୨ ନମ୍ବର ବୁଥରେ ତାଙ୍କ ମତ ଦାନ ସାବ୍ୟସ୍ତ କରିଥିଲେ l
ନିର୍ବାଚନକୁ ଶାନ୍ତି ଶୃଙ୍ଖଳାର ସହ ଶେଷ କରିବା ପାଇଁ ଜିଲ୍ଲା ପ୍ରଶାସନ କରିଥିଲା ବ୍ୟାପକ ବ୍ୟବସ୍ଥା । ଖରାକୁ ଦୃଷ୍ଟିରେ ରଖି ସବୁ ବୁଥରେ ଥଣ୍ଡା ପାନୀୟ, ଦହି, ଲସି ଏବଂ ଲେମ୍ବୁପାଣିର ବ୍ୟବସ୍ଥା କରାଯାଇଥିଲା । ମତଦାନରେ ଯେମିତି କୌଣସି ଅସୁବିଧା ନ ହୁଏ ସେ ନେଇ ନିଜେ ଜିଲ୍ଲାପାଳ ଓ ଏସପି ବିଭିନ୍ନ ବୁଥକୁ ମାରାଥନ ଗସ୍ତ କରିଥିଲେ । ଯେଉଁ ବୁଥରେ ଅଭିଯୋଗ ଆସୁଥିଲା ତାହାର ତୁରନ୍ତ ସମାଧାନ ହୋଇଥିଲା । ଏସପିଙ୍କ ସମେତ ଉତ୍ତରାଞ୍ଚଳ ଆଇଜି ଦିପକ କୁମାର ମଧ୍ୟ ଆଇନଶୃଙ୍ଖଳା ପରିସ୍ଥିତି ବୁଲି ବୁଲି ସମୀକ୍ଷା କରିଥିଲେ । ବିଗତ ନିର୍ବାଚନ ଅପେକ୍ଷା ଏହି ଉପନିର୍ବାଚନରେ ଜିଲ୍ଲା ପ୍ରଶାସନର ଏଭଳି ବ୍ୟବସ୍ଥା ଦେଖି ନୁଆ ଅନୁଭୂତି ସାଉଁଟିବା ସହ ପ୍ରଶାସନକୁ ପ୍ରଶଂସା କରିଥିଲେ। ମତଦାନ ସରିବା ପରେ ଇଭିଏମ୍ ଗୁଡିକୁ କଡା ସୁରକ୍ଷା ବଳୟ ମଧ୍ୟରେ ଝାରସୁଗୁଡା ଇଂଜିନିୟରିଂ ସ୍କୁଲ ପରିସରରେ ଥିବା ଷ୍ଟ୍ରଙ୍ଗରୁମରେ ରଖାଯାଇଛି । ୨୪ ଘଣ୍ଟିଆ ସିସିଟିଭି ସହିତ ସଶସ୍ତ୍ର କେନ୍ଦ୍ରୀୟ ଫୋର୍ସ ନିୟୋଜିତ କରାଯାଇଛି ।
ଦିନିକିଆ କ୍ରିକେଟ ବିଶ୍ୱକପ୍: ଏହି ଦିନ ମୁହାଁମୁହିଁ ହେବେ ଭାରତ-ପାକିସ୍ତାନ
ନୂଆଦିଲ୍ଲୀ: ଚଳିତ ବର୍ଷ ଅକ୍ଟୋବର-ନଭେମ୍ବରରେ ଭାରତରେ ଅନୁଷ୍ଠିତ ହେବ ଦିନିକିଆ ବିଶ୍ୱକପ । ଦିନିକିଆ ବିଶ୍ୱକପକୁ ଏବେ ସାମ୍ନାକୁ ଆସିଛି ଏକ ବଡ଼ ଖବର । କ୍ରିକବଜର ଏକ ରିପୋର୍ଟ ଅନୁସାରେ ଅକ୍ଟୋବର ୫ରୁ ଆରମ୍ଭ ହେବ ଦିନିକିଆ ବିଶ୍ୱକପ । ବିଶ୍ୱକପର ପ୍ରଥମ ମ୍ୟାଚ୍ ଇଂଲଣ୍ଡ ଓ ନ୍ୟୁଜିଲାଣ୍ଡ ମଧ୍ୟରେ ଖେଳାଯିବ । ତେବେ ବିଶ୍ୱକପର ଫାଇନାଲ ମ୍ୟାଚ୍ ନଭେମ୍ବର ୧୯ରେ ଖେଳାଯିବ ବୋଲି ଏହି ରିପୋର୍ଟରେ ପ୍ରକାଶ ପାଇଛି ।
ଏହି ଟୁର୍ଣ୍ଣାମେଣ୍ଟରେ ଭାରତ ତା’ର ଅଭିଯାନ ପାଞ୍ଚ ଥରର ଚମ୍ପିଆନ ଅଷ୍ଟ୍ରେଲିଆ ବିପକ୍ଷରୁ ଆରମ୍ଭ କରିବ । ତେବେ କ୍ରିକେଟର ଏହି ମହାକୁମ୍ଭରେ ସମସ୍ତଙ୍କ ନଜର ରହିଛି ଭାରତ-ପାକିସ୍ତାନ ମ୍ୟାଚ୍ ଉପରେ । ଅକ୍ଟୋବର ୧୫ରେ ଭାରତ ପାରମ୍ପାରିକ ପ୍ରତିଦ୍ୱନ୍ଦୀ ପାକିସ୍ତାନକୁ ଭେଟିବାର ସମ୍ଭାବନା ରହିଛି । ଏହା ସହ ଏହି ଟୁର୍ଣ୍ଣାମେଣ୍ଟର ଉଦଘାଟନୀ ଓ ଫାଇନାଲ ମ୍ୟାଚ୍ ନରେନ୍ଦ୍ର ମୋଦୀ ଷ୍ଟାଡିୟମରେ ହୋଇପାରେ ।
କ୍ରିକବଜ୍ ଏହା ମଧ୍ୟ ନିଶ୍ଚିତ କରିଛି ଯେ ଦିନିକିଆ ବିଶ୍ୱକପ ପାଇଁ ପାକିସ୍ତାନ ଭାରତ ଗସ୍ତ କରିବାକୁ ରାଜି ହୋଇଛି । କିନ୍ତୁ ପାକିସ୍ତାନ ଅହମ୍ମଦାବାଦରେ ଗ୍ରୁପ୍ ମ୍ୟାଚ୍ ଖେଳିବାକୁ ଚାହୁଁନାହିଁ । ସୂଚନା ଅନୁସାରେ ପାକିସ୍ତାନ ତା’ର ମ୍ୟାଚ୍ ଅହମ୍ମଦାବାଦ, ହାଇଦ୍ରାବାଦ, ଚେନ୍ନାଇ ଓ ବେଙ୍ଗାଲୁରୁରେ ଖେଳିବ । ଚଳିତ ବର୍ଷ ହେବାକୁ ଥିବା ଦିନିକିଆ ବିଶ୍ୱକପରେ ୧୦ଟି ଭାଗ ନେବେ । ସେଥିମଧ୍ୟରୁ ୮ଟି ଦଳ ସିଧାସଳଖ ବିଶ୍ୱକପ୍ ପାଇଁ ଯୋଗ୍ୟତା ଅର୍ଜନ କରିଛନ୍ତି । ଏହି ୮ଟି ଦଳ ହେଉଛନ୍ତି ଭାରତ, ଇଂଲଣ୍ଡ, ଅଷ୍ଟ୍ରେଲିଆ, ନ୍ୟୁଜିଲାଣ୍ଡ, ଆଫଗାନିସ୍ତାନ, ପାକିସ୍ତାନ, ବାଂଲାଦେଶ ଏବଂ ଦକ୍ଷିଣ ଆଫ୍ରିକା । ଅବଶିଷ୍ଟ ଦୁଇଟି ଦଳ ଜିମ୍ବାଓ୍ୱେରେ ହେବାକୁ ଥିବା ଯୋଗ୍ୟତା ପର୍ଯ୍ୟାୟରେ ମାଧ୍ୟମରେ ନିଷ୍ପତ୍ତି ନିଆଯିବ ।
ମହୁମାଛି ଆକ୍ରମଣରେ ପ୍ରାଣ ହରାଇଲେ କମ୍ୟୁନିଷ୍ଟ ପାର୍ଟି ନେତା ରାମଚନ୍ଦ୍ର ସ
ବାଲେଶ୍ୱର: ବାଲେଶ୍ବର ଜିଲ୍ଲା ନୀଳଗିରି ବାଙ୍କୀସାହି ଅଞ୍ଚଳରେ ମହୁମାଛି ଆକ୍ରମଣରେ ଜଣେ ମୃତ । ମୃତକ ହେଲେ କମ୍ୟୁନିଷ୍ଟ ପାର୍ଟି ନେତା ରାମଚନ୍ଦ୍ର ସ । ଗତକାଲି ସକାଳେ ବାଡ଼ିରେ ଅଳିଆ ସଫା କରି ନିଆଁ ଲଗାଇବା ସମୟରେ ମହୁମାଛି ଆକ୍ରମଣ କରିଥିଲେ । ଗୁରୁତର ଅବସ୍ଥାରେ ତାଙ୍କୁ ଡାକ୍ତରଖାନାରେ ଭର୍ତ୍ତି କରାଯାଇଥିଲା । ଚିକିତ୍ସାଧୀନ ଅବସ୍ଥାରେ ତାଙ୍କର ମୃତ୍ୟୁ ହୋଇଛି । ରାମଚନ୍ଦ୍ରଙ୍କ ବିୟୋଗରେ ସ୍ଥାନୀୟ ଅଞ୍ଚଳରେ ଶୋକର ଛାୟା ଖେଳିଯାଇଛି ।