କଟକ: ଓଡ଼ିଶା ହାଇକୋର୍ଟ ଆନୁକୂଲ୍ୟରେ କଟକସ୍ଥିତ ଓଡ଼ିଶା ଜୁଡିସିଆଲ ଏକାଡେମୀ ପରିସରରେ ଡିଜିଟାଇଜେସନ, ପେପର୍ ଲେସ୍ କୋର୍ଟ ଓ ଇ-ଇନିସିଏଟିଭ୍ ଶୀର୍ଷକ ଜାତୀୟ ସମ୍ମିଳନୀ ଚାଲିଛି । ଦୁଇ ଦିନିଆ ଜାତୀୟ ସମ୍ମିଳନୀରେ ସୁପ୍ରିମକୋର୍ଟର ପ୍ରଧାନମନ୍ତ୍ରୀ ଜଷ୍ଟିସ ଡି.ୱାଇ. ଚନ୍ଦ୍ରଚୂଡ, ସୁପ୍ରିମକୋର୍ଟ ବିଚାରପତି ଜଷ୍ଟିସ ରାଜେଶ ବିନ୍ଦାଲ ପ୍ରମୁଖ ଅତିଥି ଯୋଗ ଦେଇଛନ୍ତି । ଏହାସହ ବିଭିନ୍ନ ରାଜ୍ୟର ହାଇକୋର୍ଟ ବିଚାରପତି ସାମିଲ ହୋଇଛନ୍ତି । ଡିଜିଟାଇଜେସନ ଓ ପେପର ଲେସ୍ କୋର୍ଟକୁ କାର୍ଯ୍ୟକାରି କରିବାରେ ଓଡ଼ିଶା ଏବେ ସାରା ଦେଶରେ ରୋଲ୍ ମଡେଲ ସାଜିଛି । ଏ ସଂପର୍କରେ ଦୁଇ ଦିନରେ ବିସ୍ତୃତ ଭାବେ ଆଲୋଚନା କରାଯିବ।
ଫେଲ ମାରିଲା ବିଜେପିର ଚାଲ୍, ଚାଷୀଙ୍କୁ ଢାଲ କରି ରାଜନୀତି ଉଦ୍ୟମ ହେଲା ବିଫଳ
ଝାରସୁଗୁଡ଼ା: ଫେଲ ମାରିଲା ବିଜେପିର ଚାଲ୍ । ଚାଷୀଙ୍କୁ ଢାଲ କରି ରାଜନୀତି ଉଦ୍ୟମ ହେଲା ବିଫଳ । ଝାରସୁଗୁଡ଼ା ଉପନିର୍ବାଚନକୁ ଆଉ ଦିନ କେଇଟା ବାକିଥିବାବେଳେ କୋଲାବିରା ବ୍ଲକ ଅଞ୍ଚଳର କିଛି ଚାଷୀଙ୍କୁ ବିଭ୍ରାନ୍ତ କରି ଭୋଟ ବର୍ଜନ ପାଇଁ ଚକ୍ରାନ୍ତ କରିଥିଲା ବିଜେପି । ସମାସିଂହା ପଂଚାୟତ, ସୋଡ଼ାମାଲ ଭେଡେନ ନଦୀ କୂଳରେ ଥିବା ମେଗା ଉଠା ଜଳସେଚନ ପ୍ରକଳ୍ପକୁ କାର୍ଯ୍ୟକାରୀ କରିବାକୁ ଦାବି କରୁଥିଲେ ଚାଷୀ ।
ଭୋଟ ବର୍ଜନ ପାଇଁ ବିଜେପି ଚାଷୀଙ୍କୁ ଉସୁକାଉଥିବା ଅଭିଯୋଗ ହୋଇଥିଲା । ଏ ସମ୍ପର୍କରେ ଅବଗତ ହେବାପରେ ଚାଷୀଙ୍କ ନିକଟରେ ପହଞ୍ଚି ତୁରନ୍ତ ସମସ୍ୟାର ସମାଧାନ ପାଇଁ ପ୍ରତିଶ୍ରୁତି ଦେଇଛନ୍ତି ଜଳସଂପଦ ମନ୍ତ୍ରୀ ଟୁକୁନି ସାହୁ ଓ ଅର୍ଥ ମନ୍ତ୍ରୀ ନିରଞ୍ଜନ ପୂଜାରୀ । ଚାଷୀଙ୍କ ପାଖରେ ପହଞ୍ଚି ସମସ୍ୟା ସମ୍ପର୍କରେ ଅନୁଧ୍ୟାନ କରି ସ୍ଥାୟୀ ସମାଧାନ ପାଇଁ ପ୍ରତିଶ୍ରୁତି ଦେଇଛନ୍ତି । ଏଥିରେ ଚାଷୀମାନେ ସନ୍ତୋଷ ପ୍ରକାଶ କରିବା ସହିତ ରାଜ୍ୟ ସରକାରଙ୍କ ଉପରେ ଭରସା ଥିବା ପ୍ରକାଶ କରିଛନ୍ତି । ସମସ୍ୟାର ସମାଧାନ ପାଇଁ ପ୍ରତିଶ୍ରୁତି ପରେ ଭୋଟ ବର୍ଜନ ନିଷ୍ପତ୍ତିରୁ ଓହରିଛନ୍ତି ଚାଷୀ ।
ଝାରସୁଗୁଡ଼ା ଉପନିର୍ବାଚନ ପାଇଁ ଜୋରଦାର ପ୍ରଚାର, କାଲି ଶକ୍ତି ପ୍ରଦର୍ଶନ କରିବ ବିଜେଡି
ଝାରସୁଗୁଡ଼ା: ଝାରସୁଗୁଡ଼ା ଉପନିର୍ବାଚନ ପାଇଁ ଜୋରଦାର ହେବାରେ ଲାଗିଛି ପ୍ରଚାର । ପ୍ରଚାର ପାଇଁ ଆଜିକୁ ମିଶାଇ ହାତରେ ଆଉ ୩ ଦିନ । ଶେଷ ମୁହୂର୍ତ୍ତରେ ଜନତାଙ୍କ ଦିଲ୍ ଜିତିବାକୁ ଉଦ୍ୟମ କରୁଛନ୍ତି ସବୁ ଦଳ । ବିଭିନ୍ନ ସ୍ଥାନରେ ସମାବେଶ ସହିତ ଗାଁରୁ ଗାଁକୁ ବୁଲି ପ୍ରଚାର କରୁଛି ବିଜେଡି । ଦଳର ଷ୍ଟାର କ୍ୟାମ୍ପେନରଙ୍କ ସହିତ ଭୋଟ ମାଗୁଛନ୍ତି ବିଜେଡି ପ୍ରାର୍ଥୀ ଦୀପାଳି ଦାସ । ଆଜି ଝାରସୁଗୁଡ଼ା ବ୍ଳକର ବିଭିନ୍ନ ଅଞ୍ଚଳରେ ଦୀପାଳି ପ୍ରଚାର କରିବା କାର୍ଯ୍ୟକ୍ରମ ରହିଛି ।
ଆସନ୍ତାକାଲି ରବିବାରରେ ଝାରସୁଗୁଡ଼ାରେ ଶକ୍ତି ପ୍ରଦର୍ଶନ କରିବ ବିଜେଡି । ପ୍ରଚାର ମଇଦାନକୁ ଓହ୍ଲାଇବେ ବିଜେଡି ସୁପ୍ରିମୋ ତଥା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଏଥିପାଇଁ ଅମିଲିପାଲି ପଡ଼ିଆରେ ବିରାଟ ସମାବେଶ ଆୟୋଜନ କରାଯାଉଛି । ନବୀନଙ୍କ ମୁହଁରୁ ପଦେ କଥା ଶୁଣିବା ପାଇଁ ସମସ୍ତେ ବେଶ୍ ଉତ୍ସାହୀ ଅଛନ୍ତି ଜିଲ୍ଲାବାସୀ । ବାପାଙ୍କ ଅଧୁରା ସ୍ବପ୍ନକୁ ପୂରଣ କରିବେ ଦୀପାଳି । ଦୀପାଳିଙ୍କୁ ଜିତାଇବା ପାଇଁ ବାପାଙ୍କ ଭଳି ଦାୟିତ୍ବ ନେଇଛନ୍ତି ନବୀନ । ପୂର୍ବରୁ ଝାରସୁଗୁଡ଼ାବାସୀ ମୁଖ୍ୟମନ୍ତ୍ରୀ, ନବ ଦାସ ଓ ବିକାଶ ସହ ଥିଲେ ଏବଂ ଆଗକୁ ରହିବେ ବୋଲି ବିଜେଡି କହିଛି ।
ସମ୍ବଲପୁରରେ ଭଡ଼ାଟିଆଙ୍କ ଦାଦାଗିରି, ଘର ଖାଲି କରିବାକୁ କହିଲେ ମାଲିକଙ୍କୁ କରୁଛନ୍ତି ମରଣାନ୍ତକ ଆକ୍ରମଣ
ସମ୍ବଲପୁର: ଭଡାଟିଆଙ୍କ ଦ୍ବାରା ନିଜ ଘରେ ବନ୍ଦୀ ବୃ୍ଦ୍ଧ ଦମ୍ପତ୍ତି । ଘର ଖାଲି ପାଇଁ କହିଲେ ମରଣାନ୍ତକ ଆକ୍ରମଣ କରାଯାଉଥିବାର ଅଭିଯୋଗ ହୋଇଛି । ବୃଦ୍ଧ ଜଣଙ୍କ ଶଯ୍ୟାଶାୟୀ । ଅନ୍ୟର ସାହାରା ନହେଲେ ଶେଯରୁ ଉଠିବା କଷ୍ଟ । ରଶିରେ ଶଯ୍ୟାଶାୟୀ ବାପାଙ୍କୁ ଖାଦ୍ୟ ପଠାଉଛି ପୁଅ । ଏଭଳି ଏକ ଅଭାବନୀୟ ଘଟଣା ଦେଖିବାକୁ ମିଳିଛି ହୀରାକୁଦ ଗୁରୁଦ୍ବାର ପଡାରେ । ଗେଟରେ ତାଲାମାରି ଫେରାର ଅଛନ୍ତି ଉପର ମହଲାରେ ରହୁଥିବା ଭଡାଟିଆ ।
ସେପଟେ ତଳ ଗେଟରେ ବି ତାଲା ପକାଇ ରଖିଛନ୍ତି ଅନ୍ୟ ଏକ ଭଡାଟିଆ । ପୋଲିସକୁ ଖବର ଦେଲେ ବି ପୋଲିସ ଶୁଣୁନଥିବାର ଅଭିଯୋଗ କରିଛନ୍ତି ପରିବାର ଲୋକେ ।
5T ସ୍କୁଲ ରୂପାନ୍ତରଣ ତୃତୀୟ ପର୍ଯ୍ୟାୟର ପଞ୍ଚମ ଦିନ, ଆଜି ୫ଟି ଜିଲ୍ଲାର ୩୨୫ ରୂପାନ୍ତରିତ ସ୍କୁଲର ହେବ ଲୋକାର୍ପଣ
ଭୁବନେଶ୍ୱର: ରାଜ୍ୟରେ ବଦଳୁଛି ସରକାରୀ ହାଇସ୍କୁଲର ରୂପରେଖ । ଜନସାଧାରଣଙ୍କ ଭାଗିଦାରୀର ପ୍ରକୃଷ୍ଟ ଉଦାହରଣ ହେଉଛି ସ୍କୁଲ ରୂପାନ୍ତର । 5T ସ୍କୁଲ ରୂପାନ୍ତରଣ ତୃତୀୟ ପର୍ଯ୍ୟାୟର ପଞ୍ଚମ ଦିନରେ ଆଜି ୫ଟି ଜିଲ୍ଲାର ୩୨୫ଟି ରୂପାନ୍ତରିତ ସ୍କୁଲର ଲୋକାର୍ପଣ କରିବେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ମୟୂରଭଞ୍ଜର ସର୍ବାଧିକ ୧୦୦ଟି ରୂପାନ୍ତରିତ ହାଇସ୍କୁଲର ଲୋକାର୍ପଣ ହେବ । ସେହିପରି ନବରଙ୍ଗପୁରର ୭୮, ଖୋର୍ଦ୍ଧା ଓ ବରଗଡ଼ ଜିଲ୍ଲାର ୬୨ଟି ଲେଖାଏଁ ଏବଂ ବୌଦ୍ଧର ୨୩ଟି ସ୍କୁଲର ଲୋକାର୍ପଣ କରିବେ ମୁଖ୍ୟମନ୍ତ୍ରୀ ।
5T ହେଉଛି ଟେକ୍ନୋଲୋଜି, ଟିମ୍ ଓ୍ବାର୍କ, ଟ୍ରାନସ୍ପରେନ୍ସି, ଟ୍ରାନ୍ସଫରମେସନ୍ ଏବଂ ଟାଇମ । ଏସବୁର ପ୍ରୟୋଗ ଫଳରେ ରୂପାନ୍ତର ଆସିଥାଏ । ନୂଆ ନୂଆ ଟେକ୍ନୋଲୋଜି ବିଷୟରେ ଜାଣିବାକୁ ଚେଷ୍ଟା କରିବା ଆବଶ୍ୟକ । ଛାତ୍ରଛାତ୍ରୀଙ୍କ ସଫଳତା ହେଉଛି ଓଡିଶାର ସଫଳତା । 5T ସ୍କୁଲ ଗୁଡ଼ିକରେ ପିଲାମାନଙ୍କୁ ସବୁ ପ୍ରକାର ଆଧୁନିକ ସୁବିଧା ଦେବା ପାଇଁ ପ୍ରଚେଷ୍ଟା କରାଯାଇଛି । ପିଲାମାନେ ଏହାର ସୁଯୋଗ ନେଇ ନିଜ ପ୍ରତିଭାର ପରିଚୟ ପ୍ରଦାନ କରିପାରିଲେ, ସେମାନଙ୍କ ନିଜର ଓ ପରିବାରର ଗୌରବ ବୃଦ୍ଧି ହେବା ସହିତ ସାରା ଓଡ଼ିଶାର ଗୌରବ ବୃଦ୍ଧି ହେବ ।
ଆଜି ସୃଷ୍ଟି ହେବ ଘୂର୍ଣିବଳୟ, କାଲି ସୃଷ୍ଟି ହୋଇପାରେ ଲଘୁଚାପ କ୍ଷେତ୍ର
ଭୁବନେଶ୍ୱର: ଆଜି ବାୟୁମଣ୍ଡଳରେ ସୃଷ୍ଟି ହୋଇପାରେ ଘୂର୍ଣ୍ଣିବଳୟ । ଆସନ୍ତାକାଲି ଏକ ଲଘୁଚାପ କ୍ଷେତ୍ର ସୃଷ୍ଟି ହେବାର ସମ୍ଭାବନା ରହିଛି । ବଙ୍ଗୋପସାଗରରୁ ଧୀରେ ଧୀରେ ଉତ୍ତର ଆଡ଼କୁ ଏହା ଗତି କରିବ । ଏବେଠାରୁ ଏହାର ତୀବ୍ରତା ଓ ଗତିପଥ ଆକଳନ କରାଯାଇପାରିବ ନାହିଁ । ତେବେ ଓଡ଼ିଶା ଉପରେ ଏହାର ପ୍ରଭାବ ରହିବ । ସାଧାରଣତଃ ଏପ୍ରିଲ, ମେ, ଜୁନ ଓ ଅକ୍ଟୋବର, ନଭେମ୍ବର, ଡିସେମ୍ବରରେ ବାତ୍ୟା ସୃଷ୍ଟି ହୋଇଥାଏ । ମେ ମାସରେ ଅଧିକ ବାତ୍ୟା ସୃଷ୍ଟି ହୋଇଥାଏ । ଏହା କିଛି ନୂଆ କଥା ନୁହେଁ ବୋଲି କହିଛନ୍ତି ଆଇଏମଡି ଡିଜି । ଲଘୁଚାପ କ୍ଷେତ୍ର ସୃଷ୍ଟି ହେବା ପରେ ବାତ୍ୟାର ସ୍ପଷ୍ଟ ଚିତ୍ର ଆକଳନ କରାଯାରିବ । ତେବେ ଦକ୍ଷିଣ ପୂର୍ବ ବଙ୍ଗୋପସାଗର, ଦକ୍ଷିଣ ପଶ୍ଚିମ ବଙ୍ଗୋସାଗର, ଆଣ୍ଡାମାନ ସାଗର ଏବଂ କେନ୍ଦ୍ରୀୟ ବଙ୍ଗୋପାଗର ଅଞ୍ଚଳରେ ସମୁଦ୍ର ଅଶାନ୍ତ ରହିବ । ସମ୍ଭାବ୍ୟ ବାତ୍ୟାକୁ ନେଇ ବର୍ତ୍ତମାନ ସୁଦ୍ଧା ଓଡ଼ିଶା ପାଇଁ କୌଣସି ସତର୍କତା ଜାରି ହୋଇନି ।
ସେପଟେ ଆଜିଠୁ କମିବ କାଳବୈଶାଖୀ ଓ ବଢିବ ତାତି । ତାପମାତ୍ରା ସ୍ବାଭାବିକଠୁ ୪ରୁ ୫ ଡିଗ୍ରୀ ଯାଏଁ ବଢ଼ିବ । ବିଭିନ୍ନ ସ୍ଥାନରେ ତାତି ୪୦ରୁ ୪୧ ଡିଗ୍ରୀ ଯାଏଁ ବୃଦ୍ଧିପାଇପାରେ । ବର୍ତ୍ତମାନ ସ୍ଥିତିରେ ଆଭ୍ୟନ୍ତରୀଣ ଓ ଉପକୂଳ ଏବଂ ଓଡ଼ିଶାରେ କାଳବୈଶାଖୀ ପ୍ରଭାବ କମିଛି । ଏହା ଧୀରେ ଧୀରେ ସ୍ବାଭାବିକ ହେବା ପରେ କିଛି ସ୍ଥାନରେ ତାପମାତ୍ରା ବୃଦ୍ଧି ହେବା ନେଇ ପୂର୍ବାନୁମାନ କରିଛି ପାଣିପାଗ ବିଭାଗ । ଏହାସହ ଜଳୀୟବାଷ୍ପ ମାତ୍ରା ଅଧିକ ରହୁଥିବାରୁ ରାଜ୍ୟରେ ଗୁଳୁଗୁଳି ଅଧିକ ଅନୁଭୂତ ହେବ ।
ଆଜି ମହାରାଜା ଶ୍ରୀରାମଚନ୍ଦ୍ର ଭଞ୍ଜଦେଓ ବିଶ୍ବବିଦ୍ୟାଳୟର ସମାବର୍ତ୍ତନ ଉତ୍ସବରେ ସାମିଲ ହେବେ ମହାମହିମ
ବାରିପଦା: ମହାମହିମଙ୍କ ତିନିଦିନିଆ ଓଡ଼ିଶା ଗସ୍ତର ଆଜି ଶେଷଦିନ । ଅନ୍ତିମ ଦିନରେ ମହାରାଜା ଶ୍ରୀରାମଚନ୍ଦ୍ର ଭଞ୍ଜଦେଓ ବିଶ୍ୱବିଦ୍ୟାଳୟର ସମାବର୍ତ୍ତନ ଉତ୍ସବରେ ସାମିଲ ହେବେ ରାଷ୍ଟ୍ରପତି । ସେଠାରେ ଛାତ୍ରଛାତ୍ରୀଙ୍କ ଉଦ୍ଦେଶ୍ୟରେ ଦୀକ୍ଷାନ୍ତ ଭାଷଣ ଦେବାର କାର୍ଯ୍ୟକ୍ରମ କରିଛି । ଏହି ଅବସରରେ ମାଙ୍କିଡିଆ, ଲୋଧା ଆଦି କେତେକ ପ୍ରାଚୀନ ଜନଜାତିର ପ୍ରତିନିଧିଙ୍କୁ ଭେଟିବା ସହ ବିଭିନ୍ନ ବ୍ୟକ୍ତିବିଶେଷଙ୍କୁ ପ୍ରଦାନ କରିବେ ସମ୍ମାନସୂଚକ ଡକ୍ଟରେଟ୍ । ପରେ ଅପରାହ୍ନରେ ନୂଆଦିଲ୍ଲୀ ଫେରିଯିବେ ରାଷ୍ଟ୍ରପତି ।
ରାଷ୍ଟ୍ରପତି ହେବା ପରେ ପ୍ରଥମଥର କରି ଜନ୍ମମାଟିରେ ଆସିଥିଲେ ମହାମହିମ । ନିଜ ଗାଁ ପାହାଡ଼ପୁର ଯାଇ ସ୍ବର୍ଗତ ଶ୍ୟାମଚରଣ ମୁର୍ମୁଙ୍କ ପ୍ରତିମୂର୍ତ୍ତିରେ ମାଲ୍ୟାର୍ପଣ କରିଥିଲେ । ଏହାସହିତ ବିଭିନ୍ନ କାର୍ଯ୍ୟକ୍ରମରେ ଯୋଗଦେଇଥିଲେ । ସେହିପରି ଗତକାଲି ଦ୍ବିତୀୟ ଦିନରେ ରାଇରଙ୍ଗପୁରସ୍ଥିତ ଶିବମନ୍ଦିର ଓ ଜଗନ୍ନାଥ ମନ୍ଦିର ପରିଦର୍ଶନ ପରେ ପଣ୍ଡିତ ରଘୁନାଥ ମୁର୍ମୁଙ୍କ ସମାଧି ପୀଠରେ ଶ୍ରଦ୍ଧାଞ୍ଜଳି ଦେଇଥିଲେ । ଏହା ସହ ଶିମିଳିପାଳ ପରିଦର୍ଶନ କରିଥିଲେ ରାଷ୍ଟ୍ରପତି ।
ପୁରୀରେ 5T ସଚିବ, ପରିକ୍ରମା ପ୍ରକଳ୍ପ କାର୍ଯ୍ୟର କଲେ ଅନୁଧ୍ୟାନ
ପୁରୀ: ପୁରୀରେ ବିଭିନ୍ନ ଉନ୍ନୟନ କାର୍ଯ୍ୟର ସମୀକ୍ଷା କରିଛନ୍ତି 5T ସଚିବ ଭି.କେ ପାଣ୍ଡିଆନ । ପ୍ରଥମେ ଶ୍ରୀମନ୍ଦିରରେ ଶ୍ରୀଜିଉଙ୍କୁ ଦର୍ଶନ କରିବା ପରେ ପରିକ୍ରମା ପ୍ରକଳ୍ପ କାର୍ଯ୍ୟର ଅନୁଧ୍ୟାନ କରିଥିଲେ । ସିଂହଦ୍ବାର ସମ୍ମୁଖରୁ ଏମାର ମଠ ଚକଡ଼ ଅଞ୍ଚଳ, କାକୁଡ଼ିଖାଇ ହୋଇ ଦକ୍ଷିଣ ଦ୍ବାରରେ ଜାରି ରହିଥିବା ନିର୍ମାଣ କାର୍ଯ୍ୟର ସମୀକ୍ଷା କରିଥିଲେ । ପରେ ପଶ୍ଚିମ ଓ ଉତ୍ତର ଦ୍ବାରରେ ଜାରି ରହିଥିବା ପରିକ୍ରମା ପ୍ରକଳ୍ପର ଆଉଟର ରୋଡ କାର୍ଯ୍ୟ ଅଗ୍ରଗତି ସମ୍ପର୍କରେ ପଚାରି ବୁଝିବା ସହିତ ଉତ୍ତର ଦ୍ବାର ନିକଟରେ ଚାଲିଥିବା ବିଭିନ୍ନ ଜୋନର ରାସ୍ତା ସମ୍ପର୍କରେ ଅନୁଧ୍ୟାନ କରିଥିଲେ । ୭୫ ମିଟର ସୁରକ୍ଷା ବଳୟ ମଧ୍ୟରେ ନିର୍ମାଣାଧୀନ ପରିକ୍ରମା ପ୍ରକଳ୍ପର ବାହାର ରାସ୍ତା କାର୍ଯ୍ୟ ରଥଯାତ୍ରା ପୂର୍ବରୁ ଶେଷ କରିବାକୁ ନିର୍ଦ୍ଦେଶ ଦେଇଥିଲେ 5T ସଚିବ ।
ଏହାସହ କାର୍ଯ୍ୟର ଅଗ୍ରଗତି ସମ୍ପର୍କରେ ପୁରୀ ଜିଲ୍ଲାପାଳ ଓ ଉପଜିଲ୍ଲାପାଳଙ୍କ ସମେତ ନିର୍ମାଣକାରୀ ସଂସ୍ଥାର ଅଧିକାରୀଙ୍କ ସହିତ ଆଲୋଚନା କରିଥିଲେ । ପ୍ରକଳ୍ପ ନିର୍ମାଣ କାର୍ଯ୍ୟ ବୁଲି ଦେଖିବା ପରେ 5T ସଚିବ ଶ୍ରୀସେତୁ ନିର୍ମାଣ କାର୍ଯ୍ୟର ଅନୁଧ୍ୟାନ କରିଥିଲେ । ଏହାର ନିର୍ମାଣ ଅଗ୍ରଗତିକୁ ନେଇ ସନ୍ତୋଷ ପ୍ରକଟ କରିଥିଲେ । ଶ୍ରୀସେତୁ ନିର୍ମାଣ କରୁଥିବା ସଂସ୍ଥାର ଅଧିକାରୀମାନେ 5T ସଚିବଙ୍କୁ ନକ୍ସା ଦେଖାଇ ନିର୍ମାଣ ସମ୍ପର୍କରେ ବିସ୍ତୃତ ଭାବେ ବୁଝାଇଥିଲେ । ପ୍ରତି ସପ୍ତାହରେ 5T ସଚିବ ପୁରୀ ଗସ୍ତ କରି ବିଭିନ୍ନ ପ୍ରକଳ୍ପର ଅଗ୍ରଗତି ସମ୍ପର୍କରେ ସମୀକ୍ଷା କରୁଛନ୍ତି । ଯାହାକୁ ସ୍ବାଗତ କରିଛନ୍ତି ପୁରୀବାସୀ ଓ ଶ୍ରଦ୍ଧାଳୁ ।
ଏସସିଓ ବୈଠକରେ ପାକିସ୍ତାନକୁ କଡ଼ା ଜବାବ, ଜୟଶଙ୍କର କହିଲେ ଆତଙ୍କବାଦ ଇଣ୍ଡଷ୍ଟ୍ରୀର ମୁଖପାତ୍ର ହୋଇ ଆସିଛନ୍ତି ବିଲୱାଲ
ପାନାଜୀ: ବିଦେଶ ମନ୍ତ୍ରୀ ଏସ୍ ଜୟଶଙ୍କର ଏସସିଓ ବୈଠକ ସମୟରେ ପାକିସ୍ତାନର ବିଦେଶ ମନ୍ତ୍ରୀ ବିଲୱାଲ ଭୁଟ୍ଟୋ ଜରଦାରୀଙ୍କ ଉପସ୍ଥିତିରେ ପାକିସ୍ତାନକୁ ଭର୍ତ୍ସନା କରିଛନ୍ତି । ସେ କହିଛନ୍ତି ଯେ, ପାକିସ୍ତାନର ବିଶ୍ୱସନୀୟତା ଲଗାତାର ହ୍ରାସ ପାଉଛି । ଭାରତୀୟ ବିଦେଶ ମନ୍ତ୍ରୀ କହିଛନ୍ତି ଯେ ଚୀନ୍ ଏବଂ ପାକିସ୍ତାନ ସହ ଆମର ସମ୍ପର୍କ ସାମାନ୍ୟ ନାହିଁ । ସୀମାରେ ସ୍ଥିତି ସୁଧୁରିବା ପର୍ଯ୍ୟନ୍ତ ଏ ସମ୍ପର୍କ ସାମାନ୍ୟ ହୋଇ ପାରିବ ନାହିଁ । ବୈଠକ ପରେ ଜୟଶଙ୍କର ପାକ୍ ବିଦେଶ ମନ୍ତ୍ରୀଙ୍କ ଉପରେ ବାକ୍ ଆକ୍ରମଣ କରି କହିଛନ୍ତି ଯେ ସେ ଆତଙ୍କବାଦ ଇଣ୍ଡଷ୍ଟ୍ରୀର ମୁଖପାତ୍ର ହୋଇ ଆସିଛନ୍ତି ।
ଜୟଶଙ୍କର ପାକ୍ ବିଦେଶ ମନ୍ତ୍ରୀଙ୍କ ଉପରେ ଟାର୍ଗେଟ କରି କହିଛନ୍ତି ଯେ, ଆତଙ୍କବାଦର ପୀଡିତ ଏବଂ ପୋଷଣ କରୁଥିବା ଲୋକ ଏକାସାଙ୍ଗରେ ବସିପାରିବେ ନାହିଁ । ବିଦେଶ ମନ୍ତ୍ରୀ ଜୟଶଙ୍କର କହିଛନ୍ତି, ଜମ୍ମୁ କାଶ୍ମୀର ଭାରତର ଏକ ଅଭିନ୍ନ ଅଙ୍ଗ ଥିଲା, ଅଛି ଏବଂ ରହିବ । ଦେଶର ସମସ୍ତ ରାଜ୍ୟ ଏବଂ କେନ୍ଦ୍ର ଶାସିତ ଅଞ୍ଚଳ ଭଳି ଜମ୍ମୁ କାଶ୍ମୀରରେ ମଧ୍ୟ ଜି-୨୦ ବୈଠକ ହେଉଛି, ଏଥିରେ କିଛି ବି ଆଶ୍ଚର୍ଯ୍ୟକର କଥା ନାହିଁ । ବିଦେଶ ମନ୍ତ୍ରୀ ଆଗକୁ କହିଛନ୍ତି, ପାକିସ୍ତାନ ସହ ଜି-୨୦ ଏବଂ ଶ୍ରୀନଗର ପ୍ରସଙ୍ଗ ହିଁ ନାହିଁ । ପାକିସ୍ତାନ ସହ କେବଳ ଏବଂ କେବଳ ପିଓକେ ହିଁ ପ୍ରସଙ୍ଗ ରହିଛି ।
ଭାରତ ପାକିସ୍ତାନ-ଚୀନ୍ ମଧ୍ୟରେ ତଥାକଥିତ କରିଡର ସମ୍ପର୍କରେ ଏସସିଓ ବୈଠକରେ ଗୋଟେଥର ନୁହେଁ ବରଂ ଦୁଇଥର ସ୍ପଷ୍ଟ କରିଛି ଯେ, କନେକ୍ଟିଭିଟି ବିକାଶ ପାଇଁ ଜରୁରୀ ଅଟେ କିନ୍ତୁ କନେକ୍ଟିଭିଟି କାହାର କ୍ଷେତ୍ରୀୟ ଅଖଣ୍ଡତାକୁ ଉଲ୍ଲଂଘନ କରିପାରିବ ନାହିଁ । ବିଦେଶ ମନ୍ତ୍ରୀ ଏସ୍ ଜୟଶଙ୍କର କହିଛନ୍ତି, ଏସସିଓ ସଦସ୍ୟ ଦେଶର ବିଦେଶ ମନ୍ତ୍ରୀ ଭାବରେ ପାକିସ୍ତାନର ବିଦେଶମନ୍ତ୍ରୀ ବିଲୱାଲ ଭୁଟ୍ଟୋ ଜରଦାରୀଙ୍କ ସହ ବାକି ବିଦେଶ ସଦସ୍ୟ ଦେଶର ବିଦେଶ ମନ୍ତ୍ରୀଙ୍କ ଭଳି ବ୍ୟବହାର କରାଯାଇଛି ।
କିନ୍ତୁ ଆତଙ୍କବାଦର ପ୍ରମୋଟର, ପ୍ରୋଟେକ୍ଟର ଏବଂ ଆତଙ୍କର ଇଣ୍ଡଷ୍ଟ୍ରିର ପ୍ରବକ୍ତା ଭଳି ତାଙ୍କର କାଉଣ୍ଟର କରାଗଲା । ଗୋଆର ରାଜଧାନୀ ପାନାଜୀରେ ଶୁକ୍ରବାର ବିଦେଶ ମନ୍ତ୍ରୀଙ୍କ ଏସସିଓ ପରିଷଦର ବୈଠକ ହୋଇଥିଲା । ବୈଠକ ପୂର୍ବରୁ ଭାରତୀୟ ବିଦେଶ ମନ୍ତ୍ରୀ ଡା. ଏସ୍ ଜୟଶଙ୍କର ଏସସିଓର ସଦସ୍ୟ ଦେଶମାନଙ୍କର ବିଦେଶ ମନ୍ତ୍ରୀଙ୍କୁ ସ୍ୱାଗତ କରିଥିଲେ । ଏହି ବୈଠକରେ ସାମିଲ ହେବା ପାଇଁ ପାକିସ୍ତାନର ବିଦେଶ ମନ୍ତ୍ରୀ ବିଲୱାଲ ଭୁଟ୍ଟୋ ଜରଦାରୀ ମଧ୍ୟ ଭାରତରେ ପହଞ୍ଚିଥିଲେ । ଶୁକ୍ରବାର ବିଦେଶ ମନ୍ତ୍ରୀମାନଙ୍କ ବୈଠକ ପୂର୍ବରୁ ଭାରତୀୟ ବିଦେଶମନ୍ତ୍ରୀ ପାକିସ୍ତାନୀ ବିଦେଶ ମନ୍ତ୍ରୀଙ୍କୁ ସ୍ୱାଗତ କରିଥିଲେ ।
ପର୍ଯ୍ୟଟକଙ୍କ ସୁରକ୍ଷା ଚିନ୍ତା, ପୁରୀ ସମୁଦ୍ର କୂଳରେ ଲାଗିଲା ନାଲି ପତାକା
ପୁରୀ: ପୁରୀ ସମୁଦ୍ର କୂଳରେ ଲାଗିଲା ନାଲି ପତାକା । ଗତ ଦୁଇଦିନରେ ସମୁଦ୍ରରେ ୪ଟି ଜୀବନ ଯିବାପରେ ପ୍ରଶାସନ ପକ୍ଷରୁ ସମୁଦ୍ର କୂଳରେ ଲଗାଯାଇଛି ନାଲି ପତାକା । ସଂପୃକ୍ତ ସ୍ଥାନରେ କୌଣସି ପର୍ଯ୍ୟଟକ ଯେଭଳି ସ୍ନାନ ନକରିବେ ସେନେଇ ଲାଗିଛି କଟକଣା । ତେବେ କିଛି ପର୍ଯ୍ୟଟକ ଏହାକୁ ଅବମାନନା କରୁଥିବା ଦେଖିବାକୁ ମିଳିଛି । ସମୁଦ୍ର କୂଳରେ ଉପସ୍ଥିତ ଥିବା ଲାଇଫ ଗାର୍ଡମାନେ ପର୍ଯ୍ୟଟକଙ୍କୁ ବିପଦପୂର୍ଣ୍ଣ ସ୍ଥାନରେ ନଗାଧୋଇବା ପାଇଁ ଅନୁରୋଧ କରୁଥିଲେ ମଧ୍ୟ ଏହାକୁ ପର୍ଯ୍ୟଟକ ମାନୁନଥିବା ଦେଖିବାକୁ ମିଳିଛି ।
ସେହିପରି ବିସ୍ତିର୍ଣ୍ଣ ବେଳାଭୂମିକୁ ୧୪ଟି ଜୋନରେ ବିଭକ୍ତ କରାଯାଇଥିବା ବେଳେ ମାତ୍ର ଶହେ ଜଣ ଲାଇଫ ଗାର୍ଡ ପର୍ଯ୍ୟଟକଙ୍କ ସୁରକ୍ଷା ଦାୟିତ୍ବରେ ଅଛନ୍ତି । ସମୁଦ୍ର କୂଳରେ ପର୍ଯ୍ୟଟକଙ୍କ ସୁରକ୍ଷା ପାଇଁ ପର୍ଯ୍ୟାପ୍ତ ଲାଇଫ ଗାର୍ଡ ସହ ଅତ୍ୟାଧୁନିକ ଉପକରଣର ଆବଶ୍ୟକତା ରହିଛି ବୋଲି ଦାବି କରିଛନ୍ତି ପର୍ଯ୍ୟଟକ । ଏପଟେ ପ୍ରଶାସନ ପକ୍ଷରୁ ବେଳାଭୂମିର କୌଣସି ସ୍ଥାନରେ ସାଇନ୍ ବୋର୍ଡ ଲଗାଯାଇ ନଥିବାରୁ ପର୍ଯ୍ୟଟକ ମାନେ ସଚେତନ ହୋଇପାରୁ ନାହାନ୍ତି ।