ମୁମ୍ବାଇ: ଶିବସେନା ନାଁ ଓ ଚିହ୍ନକୁ ନେଇ ଶିବସେନା ଉଦ୍ଧବ ବାଲାସାହେବ ଠାକରେ ଗୋଷ୍ଠୀ ନେତା ସଞ୍ଜୟ ରାଓ୍ବତଙ୍କ ଚାଞ୍ଚଲ୍ୟକର ବୟାନ । କହିଛନ୍ତି ଶିବସେନା ନାଁ ଓ ଧନୁ ତୀର ଚିହ୍ନ ଲାଗି ହୋଇଛି ୨ ହଜାର କୋଟି ଟଙ୍କାର ଡିଲ । ଏକନାଥ ସିନ୍ଦେ ଓ ଉଦ୍ଧବ ଠାକରେ ଗୋଷ୍ଠୀକୁ ନେଇ ବିବାଦ ଜାରି ରହିଥିବାବେଳେ ନିର୍ବାଚନ କମିଶନ ସିନ୍ଦେ ଗୋଷ୍ଠୀକୁ ଦେଇଥିଲେ ଶିବସେନା ନାଁ ଓ ଧନୁତୀର ଚିହ୍ନ । ସଞ୍ଜୟ କହିଛନ୍ତି ଟଙ୍କା ଡିଲ୍ ସମ୍ପର୍କରେ ଜଣେ ବିଲଡର ଏହି ସୂଚନା ଦେଇଛନ୍ତି । ଏନେଇ ପ୍ରମାଣ ରହିଛି ବୋଲି କହିଛନ୍ତି ସଞ୍ଜୟ । ସେପଟେ ଏହି ଅଭିଯୋଗକୁ ସିନ୍ଦେ କ୍ୟାମ୍ପ ପକ୍ଷରୁ ଖଣ୍ଡନ କରାଯାଇଛି ।
ଲେଖାଶ୍ରୀ ବିଜେପିର ଆତ୍ମଘୋଷିତ ଫରେନ୍ସିକ ଏକ୍ସପର୍ଟ: ଇପସିତା
ଭୁବନେଶ୍ୱର: ମହିଳା ପୋଲିସ ଅଧିକାରୀଙ୍କୁ ବିଜେପି ନେତା ଜୟନାରାୟଣ ମିଶ୍ରଙ୍କ ଆକ୍ରମଣ ପ୍ରସଙ୍ଗରେ ଲେଖାଶ୍ରୀଙ୍କୁ ଟାର୍ଗେଟ କଲା ବିଜେଡି । ବିଜେଡି ମୁଖପାତ୍ର ଇପସିତା ସାହୁ ପ୍ରେସମିଟ୍ କରି ଲେଖାଶ୍ରୀଙ୍କୁ ସମାଲୋଚନା କରିଛନ୍ତି । ଇପସିତା କହିଛନ୍ତି ଜଣେ ମହିଳା ହୋଇ ମଧ୍ୟ ଲେଖାଶ୍ରୀ ନିଜ ଦଳର ନେତାଙ୍କ ଏପରି ଆଚରଣ ବିରୋଧରେ ମୁଁହ ଖୋଲିଲେନି । ବିଜେପିର ଜଣେ ନେତ୍ରୀ ପୂର୍ବରୁ ସେ ଜଣେ ମହିଳା ହେଲେ ଏପରି ଏକ ସମ୍ବେଦନଶୀଳ ଘଟଣା ଉପରେ ଲେଖାଶ୍ରୀ ନିଜ ଦଳର ନେତାଙ୍କ କାର୍ଯ୍ୟକଳାପକୁ ବିରୋଧ ନକରିବା ଲଜ୍ଜାଜନକ କଥା ।
ଇପସିତା କହିଛନ୍ତି, ”ଆପଣମାନଙ୍କୁ ସମସ୍ତଙ୍କୁ ଜଣାଥିବ ୨୦୧୪ ମସିହାର ଘଟଣା । ବିଜେଡିର ମୁଖପାତ୍ର ଲେଖାଶ୍ରୀ ସାମନ୍ତ ସିଂହାର ବିଜୁ ଜନତା ଦଳର ଦଳୀୟ ଟିକେଟ ପାଇଁ ଖୋଲାଖୋଲି ଭାବରେ ନବୀନ ନିବାସ ଆସିଥିଲେ । ସେହିଭଳି ଭାବରେ ୨୦୧୯ ରେ ଆପଣମାନଙ୍କ ଭିତରୁ କାହାକୁ ଜଣାଥିବ ମ୍ୟାଡାମ ଲେଖାଶ୍ରୀ ସାମନ୍ତ ସିଂହାର ଲୁଚିଛପି ନବୀନ ନିବାସ ଆସିଥିଲେ ବିଜୁ ଜନତା ଦଳର ଦଳୀୟ ଟିକେଟ ପାଇଁ । ଆଶା କରୁଛୁ ଆଉ ନିଶ୍ଚିନ୍ତ ଭାବରେ ୨୦୨୪ ରେ ବି ମ୍ୟାଡାମ ଲେଖାଶ୍ରୀ ସାମନ୍ତ ସିଂହାର ଲୁଚିଛପିକି ଆସିବେ ବିଜୁ ଜନତା ଦଳର ଦଳୀୟ ଟିକେଟ ଓ ନିର୍ବାଚନୀ ଟିକେଟ ନେବା ପାଇଁ । ବୋଧହୁଏ ଲାଗୁଛି ଭାରତୀୟ ଜନତା ପାର୍ଟିର ମୁଖପାତ୍ର ଲେଖାଶ୍ରୀ ସାମନ୍ତ ସିଂହାର ଭାରତୀୟ ଜନତା ପାର୍ଟିର ଆତ୍ମଘୋଷିତ ଇନଭେଷ୍ଟିଗେଟର ଫରେନ୍ସିକ ଏକ୍ସପର୍ଟ ।
ଯାହାଙ୍କୁ ଭାରତୀୟ ଜନତା ପାର୍ଟିର କିଛି ନେତା ମାନେ ବୋଧହୁଏ ନିଯୁକ୍ତି କରିଛନ୍ତି ଚାଲୁଥିବା ତଦନ୍ତ ଉପରେ ସବୁବେଳେ କିଛି କହିବାକୁ । କିନ୍ତୁ ଲାଗେ ଲେଖାଶ୍ରୀ ସାମନ୍ତ ସିଂହାର ମ୍ୟାଡାମ ଘଟଣା ବିଷୟରେ କିଛି ଜାଣନ୍ତିନି ବା ବିଷୟ ଉପରେ କିଛି ଜାଣନ୍ତିନି ଖାଲି ଆସନ୍ତି ଗଣମାଧ୍ୟମ ସାମ୍ନାରେ ବସନ୍ତି, କେବଳ କଥା ହିଁ କୁହନ୍ତି । ଯାହାପରେ ବାରମ୍ବାର ଲେଖାଶ୍ରୀ ସାମନ୍ତ ସିଂହାର ଗଣମାଧ୍ୟମ ସମ୍ମୁଖରେ ଲୋକଙ୍କ ସାମ୍ନାରେ ଜନତା ଜନାର୍ଦ୍ଦନଙ୍କ ଆଗରେ ଜଣେ ଜୋକର ଭଳି ପ୍ରମାଣିତ ହୋଇଥାନ୍ତି । ମୁଁ ଆଶ୍ଚର୍ଯ୍ୟ ମ୍ୟାଡାମ ଲେଖାଶ୍ରୀ ସାମନ୍ତ ସିଂହାର ଭାରତୀୟ ଜନତା ପାର୍ଟିର ମୁଖପାତ୍ର ପୂର୍ବରୁ ଜଣେ ମହିଳା ତ ! କାରଣ ମୁଁ ବି ବିଜୁ ଜନତା ଦଳର ମୁଖପାତ୍ର ପୂର୍ବରୁ ଜଣେ ମହିଳା । ମୋ ପାଇଁ ସବୁ ମହିଳା ସମାନ ।
କିନ୍ତୁ ଲେଖାଶ୍ରୀ ସାମନ୍ତ ସିଂହାର ଭାରତୀୟ ଜନତା ପାର୍ଟିର ମୁଖପାତ୍ର ପୂର୍ବରୁ ଯଦି ଜଣେ ମହିଳା ହୋଇଥାନ୍ତେ ତାହାଲେ ତାଙ୍କ ଦଳର ନେତା ତଥା ବିରୋଧୀ ଦଳର ନେତା ଜୟ ନାରାୟଣ ମିଶ୍ର ମହୋଦୟ ଯେତେବେଳ ଜଣେ କାର୍ଯ୍ୟରତ ମହିଳା ଅଧିକାରୀଙ୍କୁ ମାଡ ମାରିଲେ ଓ ର୍ଦୁବ୍ୟବହାର କଲେ ବା ଅଶାଳୀନ ଭାଷାର ପ୍ରୟୋଗ କରି ଗାଳିଗୁଲଜ କଲେ ତେବେ ଲେଖାଶ୍ରୀ ସାମନ୍ତ ସିଂହାର କେମିତି ଚୁପ ରହିଲେ ଓ କାହିଁକି ଚୁପ ରହିଲେ । ମୋତେ ଲାଗୁଛି ତାର କାରଣ ବି ଏଇଟା ହୋଇଥାଇପାରେ ମ୍ୟାଡାମଙ୍କର ସେ ମାଡ ବୋଧହୁଏ ମନେପଡିଯାଉଥିବ । ଯେତେବେଳ ଜୟନାରାୟଣ ମିଶ୍ର ଦଳର ସଭାପତି ମାନନୀୟ ସମୀର ମହାନ୍ତିଙ୍କୁ ମାଡ ମାରିଥିଲେ ।
ଯେଉଁଭଳି ଭାବରେ ସମୀର ମହାନ୍ତି ଆତଙ୍କିତ ଅବସ୍ଥାରେ ଅଛନ୍ତି ମ୍ୟାଡାମଙ୍କୁ ଲାଗୁଛି କେତେବେଳେ ହୁଏତ ତାଙ୍କ ଉପରେ ଚପଲରେ ବସିବ ସେଥିପାଇଁ ହୁଏତ ସେ ଚୁପ ରହୁଛନ୍ତି । କିନ୍ତୁ ଗୋଟେ ଛୋଟ ଉପଦେଶ ଲେଖାଶ୍ରୀ ମ୍ୟାଡାମଙ୍କୁ କିଛି କହିବା ପୂର୍ବରୁ କିଛି ବଖାଣିବା ପୂର୍ବରୁ ବା ମନଗଢା କାହାଣୀ ତିଆରି କରିବା ପୂର୍ବରୁ ବା ପୂର୍ବ କାହାଣୀ ଲେଖିବା ପୂର୍ବରୁ ମ୍ୟାଡାମଙ୍କୁ ଇନଭେଷ୍ଟିଗେଟ ବା ଫରେନ୍ସିକ ରିପୋର୍ଟ ଉପରେ ପାଠ ଟିକେ ପଢିବାକୁ ପଡିବ ଓ ଡିଗ୍ରୀ ହାସଲ କରିବାକୁ ପଡିବ । ଯେତେବେଳେ ପର୍ଯ୍ୟନ୍ତ ପାଠ ପଢୁଛନ୍ତି ଡିଗ୍ରୀ ହାସଲ କରିବାକୁ ସମୟ ଅଛି ସେପର୍ଯ୍ୟନ୍ତ ନ୍ୟାୟପାଳିକାକୁ ଓ ପୋଲିସକୁ ତାର ତଦନ୍ତ କରିବାକୁ ଦିଅନ୍ତୁ ।”
ପାଇକମାଳ ପରେ ପଦମପୁରରେ ମୁଖ୍ୟମନ୍ତ୍ରୀ
ବରଗଡ଼: ପଦମପୁରରେ ମୁଖ୍ୟମନ୍ତ୍ରୀ ନୀବନ ପଟ୍ଟନାୟକ । ପାଇକମାଳ ପରେ ପଦମପୁରରେ ପହଁଚିଚନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ପଦମପୁରରେ ବିଭିନ୍ନ ବିକାଶମୂଳକ ପ୍ରକଳ୍ପର ଭିତ୍ତିପ୍ରସ୍ତର ସ୍ଥାପନ କରିବେ ନବୀନ । ଏସଏଚଜି ମହିଳାଙ୍କୁ ସହୟତା ରାଶି ମଧ୍ୟ ପ୍ରଦାନ କରିବେ ।
ପାଇକମାଳ ସମାବେଶରେ ବଡ଼ ଘୋଷଣା କରିଛନ୍ତି ମୁଖ୍ୟମନ୍ତ୍ରୀ । ପଦମପୁରକୁ ବର୍ଷେ ଭିତରେ ଜିଲ୍ଲା କରିବା ନେଇ ଘୋଷଣା କରାଯାଇଛି । ବର୍ଷେ ମଧ୍ୟରେ ପଦମପୁର ହେବ ଜିଲ୍ଲା । ବରଗଡ଼ ଜିଲ୍ଲା ଗସ୍ତରେ ଯାଇ ଝାରବନ୍ଧରେ ଆୟୋଜିତ ସାଧାରଣ ସଭାରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ କରିଛନ୍ତି ବଡ଼ ଘୋଷଣା । ଗତ ଡିସେମ୍ବରରେ ପଦମପୁରକୁ ଜିଲ୍ଲା ମାନ୍ୟତା ପ୍ରଦାନ କରିବା ନେଇ ଘୋଷଣା କରିଥିଲେ ମୁଖ୍ୟମନ୍ତ୍ରୀ। ଆଜି ପୁଣି ବର୍ଷେ ଭିତରେ ପ୍ରତିଶ୍ରୁତି ପୂରଣ ନେଇ କଥା ଦେଇଛନ୍ତି ନବୀନ । ସେ କଥା ନୁହେଁ କାମରେ ବିଶ୍ବାସ କରନ୍ତି । ଉପନିର୍ବାଚନ ବେଳେ ମୁଖ୍ୟମନ୍ତ୍ରୀ ଦେଇଥିବା ବିଭିନ୍ନ ପ୍ରତିଶ୍ରୁତି ପୂରଣ କରାଯାଉଛି।
ସ୍ୱତନ୍ତ୍ର ରାଜ୍ୟର ମାନ୍ୟତା ଓଡ଼ିଶାର ହକ୍: ବିଜୟ ମହାପାତ୍ର
ଭୁବନେଶ୍ୱର: ଓଡ଼ିଶାକୁ ସ୍ୱତନ୍ତ୍ର ରାଜ୍ୟ ମାନ୍ୟତା ନେଇ କେନ୍ଦ୍ର ମନା କରିବା ପ୍ରସଙ୍ଗ । ସ୍ୱତନ୍ତ୍ର ରାଜ୍ୟର ମାନ୍ୟତା ଓଡ଼ିଶାର ନ୍ୟାଯ୍ୟ ହକ୍ ବୋଲି ବରିଷ୍ଠ ବିଜେପି ନେତା ବିଜୟ ମହାପାତ୍ର କହିଛନ୍ତି । ବିଜେଡି ଗଠନ ହେବା ପଛର ମୂଳ ଉଦ୍ଦେଶ୍ୟ ହେଉଛି ଓଡ଼ିଶାକୁ ସ୍ୱତନ୍ତ୍ର ରାଜ୍ୟର ମାନ୍ୟତା ଦେବା । ବିଜେଡି ପ୍ରତିଷ୍ଠା ହେବା ଦିନଠାରୁ ଏହି ଦାବି କରିଆସୁଛି ।
ଏବେ ଯଦି କେନ୍ଦ୍ର ଅର୍ଥ କମିଶନ ଓ ନୀତି ଆୟୋଗ ମନା କରୁଛନ୍ତି, ତେବେ ରାଜ୍ୟକୁ ସ୍ୱତନ୍ତ୍ର ପ୍ୟାକେଜ ଦିଆଯାଉ । କିମ୍ବା ଓଡ଼ିଶାକୁ ସ୍ୱତନ୍ତ୍ର ଫୋକସ ରାଜ୍ୟର ମାନ୍ୟତା ମିଳୁ । ଯେଉଁ କ୍ଷେତ୍ରଗୁଡ଼ିକର ବିକାଶ ହୋଇନାହିଁ, ସେହି କ୍ଷେତ୍ର ପାଇଁ କେନ୍ଦ୍ର ପର୍ଯ୍ୟାପ୍ତ ଅର୍ଥ ଦେଉ ବୋଲି ସେ କହିଛନ୍ତି । କେନ୍ଦ୍ର ଅର୍ଥମନ୍ତ୍ରୀ ଏହାର ପୁନର୍ବିଚାର କରିବାକୁ ବରିଷ୍ଠ ବିଜେପି ନେତା ବିଜୟ ମହାପାତ୍ର ଦାବି କରିଛନ୍ତି ।
ଜୟନାରାୟଣଙ୍କ ଅହଙ୍କାର ଗ୍ରହଣୀୟ ନୁହେଁ: ବିଜୟ
ଭୁବନେଶ୍ବର: ମହିଳା ଆଇଆଇସିଙ୍କୁ ବିଜେପି ବିଧାୟକ ତଥା ବିରୋଧୀ ଦଳ ନେତା ଜୟନାରାୟଣ ମିଶ୍ରଙ୍କ ମାଡ଼ ଘଟଣାକୁ ନେଇ ଅସନ୍ତୋଷ ତୀବ୍ର ହେବାରେ ଲାଗିଛି । ଚାରିଆଡୁ ସମାଲୋଚନାର ଶିକାର ହେଉଛନ୍ତି ଜୟନାରାୟଣ । ମହିଳାଙ୍କଠାରୁ ଆରମ୍ଭ କରି ଛାତ୍ର ସଂଗଠନ, କିନ୍ନର ସମସ୍ତଙ୍କ ମନରେ ଜୟନାରାୟଣଙ୍କୁ ନେଇ ଅସନ୍ତୋଷ । ରାସ୍ତାରେ ହେଉଛି ବିକ୍ଷୋଭ । ଜୟନାରାୟଣଙ୍କ ବାସଭବନ ଆଗରେ ହେଉଛି ପ୍ରଦର୍ଶନ । ଏମିତି ସ୍ଥିତିରେ ନିଜ ଦଳରେ ମଧ୍ୟ ଜୟନାରାୟଣଙ୍କ ବିରୋଧରେ ଉଠିବାରେ ଲାଗିଛି ଅସନ୍ତୋଷର ସ୍ବର । ଜୟନାରାୟଣଙ୍କୁ ତାଙ୍କ ଏପରି କାର୍ଯ୍ୟ ପାଇଁ ତୀବ୍ର ସମାଲୋଚନା କରିଛନ୍ତି ବରିଷ୍ଠ ବିଜେପି ନେତା ବିଜୟ ମହାପାତ୍ର ।
ବିଜୟ କହିଛନ୍ତି, ‘ବିରୋଧୀ ଦଳ ନେତା ପଦ ଏକ ମର୍ଯ୍ୟାଦାଜନକ ଓ ସାମ୍ବିଧାନିକ ପଦବୀ । ଏହାର ମର୍ଯ୍ୟାଦା ରକ୍ଷା କରିବା ବିରୋଧୀ ଦଳ ନେତାଙ୍କ ଦାୟିତ୍ୱ ଓ କର୍ତ୍ତବ୍ୟ । ଜୟନାରାୟଣ ମିଶ୍ରଙ୍କ ଅହଙ୍କାର ଗ୍ରହଣୀୟ ନୁହେଁ । ବିରୋଧୀ ଦଳ ନେତା ନିଜ ସୀମା ଭିତରେ ରହି କାମ କରିବା ଦରକାର ।’
ସେହିପରି ବିରୋଧୀ ଦଳ ନେତା ମ୍ୟାନେଜ ହେଉଥିବା ନେଇ ଜୟନାରାୟଣଙ୍କ ବିବାଦୀୟ ମନ୍ତବ୍ୟକୁ ମଧ୍ୟ କଡ଼ା ସମାଲୋଚନା କରିଛନ୍ତି ବିଜୟ । କହିଛନ୍ତି, ‘ଅତୀତରେ ବିରୋଧୀ ଦଳ ନେତାମାନେ ଗୁରୁତ୍ୱପୂର୍ଣ୍ଣ ଦାୟିତ୍ୱ ତୁଲାଇ ବିଶ୍ୱାସ ଭାଜନ ହୋଇଛନ୍ତି । ସେମାନଙ୍କ ସମ୍ପର୍କରେ ଏଭଳି ଟିପ୍ପଣୀ ଦେବା ଆଦୌ ଉଚିତ ନୁହେଁ ।’
କେନ୍ଦ୍ରମନ୍ତ୍ରୀଙ୍କୁ ନବୀନଙ୍କ ପ୍ରଶ୍ନ କୁଆଡ଼େ ଗଲା ପ୍ରତିଶ୍ରୁତି
ପଦମପୁର: ପଦମପୁର ମାଟିରୁ କେନ୍ଦ୍ରମନ୍ତ୍ରୀଙ୍କୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଟାର୍ଗେଟ । ପଚାରିଲେ, କୁଆଡେ ଗଲା କେନ୍ଦ୍ରର ପ୍ରତିଶ୍ରୁତି । ଉପନିର୍ବାଚନ ବେଳେ କେନ୍ଦ୍ରୀୟ ମନ୍ତ୍ରୀ ଦେଇଥିବା ପ୍ରତିଶ୍ରୁତି ଗୋଟି ଗୋଟି ଗଣାଇଲେ । କହିଲେ, ଉପନିର୍ବାଚନ ବେଳେ କେନ୍ଦ୍ରମନ୍ତ୍ରୀମାନେ ଆସି ଅନେକ ପ୍ରତିଶ୍ରୁତି ଦେଇଥିଲେ । ରେଳବାଇ, ଫସଲ ବୀମା, କେନ୍ଦୁପତ୍ର, ଜିଏସଟି ପ୍ରସଙ୍ଗ ଉଠାଇ ପ୍ରତିଶ୍ରୁତିର ପାହାଡ଼ ଛିଡ଼ା କରିଥିଲେ । ଏବେ ସେମାନଙ୍କ ପ୍ରତିଶ୍ରୁତି କୁଆଡେ ଗଲା ବୋଲି ପ୍ରଶ୍ନ କରିଛନ୍ତି ମୁଖ୍ୟମନ୍ତ୍ରୀ । ଏହାସହ କେନ୍ଦ୍ରମନ୍ତ୍ରୀଙ୍କୁ ସେମାନଙ୍କ ପ୍ରତିଶ୍ରୁତି ମନେ ପକାଇ ଦେବାକୁ ପ୍ରଭୁ ନୃସିଂହନାଥଙ୍କ ପାଖରେ ପ୍ରାର୍ଥନା କରିଛନ୍ତି ।
ସୂଚନାଯୋଗ୍ୟ, ପଦମପୁରବାସୀଙ୍କୁ ଉପନିର୍ବାଚନ ବେଳେ ପୁଣି ଥରେ ଆସିବାକୁ ପ୍ରତିଶ୍ରୁତି ଦେଇଥିଲେ ମୁଖ୍ୟମନ୍ତ୍ରୀ । ଆଜି ମୁଖ୍ୟମନ୍ତ୍ରୀ ତାଙ୍କ ପ୍ରତିଶ୍ରୁତି ରକ୍ଷା କରି ପଦମପୁରରେ ପହଞ୍ଚିଛନ୍ତି । ପ୍ରଥମେ ଝାରବନ୍ଧ ଓ ପରେ ପାଇକମାଳ ଯାଇ ବିଭିନ୍ନ ପ୍ରକଳ୍ପ ଶିଳାନ୍ୟାସ ଓ ଭିତ୍ତିପ୍ରସ୍ତର ସ୍ଥାପନ କରିଛନ୍ତି । ଏହାସହ ଏସଏଚଜି ମହିଳାଙ୍କୁ ମିଶନ ଶକ୍ତି ସହାୟତା ପ୍ରଦାନ କରିଛନ୍ତି । ପଦମପୁରବାସୀଙ୍କୁ ଉପନିର୍ବାଚନରେ ସମର୍ଥନ ପାଇଁ ଧନ୍ୟବାଦ ଜଣାଇଛନ୍ତି ମୁଖ୍ୟମନ୍ତ୍ରୀ । ଏହି ଅବସରରେ କେନ୍ଦ୍ରମନ୍ତ୍ରୀମାନଙ୍କୁ ସେମାନେ ଉପନିର୍ବାଚନ ସମୟରେ ଦେଇଥିବା ପ୍ରତିଶ୍ରୁତି ମନେ ପକାଇ ଟାର୍ଗେଟ କରିଥିଲେ ମୁଖ୍ୟମନ୍ତ୍ରୀ ।
RRR ଫିଲ୍ମର ଅଭିନେତା ଜୁନିୟର୍ ଏନଟିଆରଙ୍କ ଭାଇ ତଥା ଅଭିନେତା ନନ୍ଦମୁରାଇଙ୍କ ଦେହାନ୍ତ
ହାଇଦ୍ରାବାଦ: ସାଉଥ୍ ଫିଲ୍ମର ଅଭିନେତା ଜୁନିୟର୍ ଏନଟିଆରଙ୍କ ପରିବାରରେ ଦୁଃଖର ଛାୟା ଖେଳିଯାଇଛି । ତାଙ୍କ ସାନ ଭାଇ ଅଭିନେତା ତଥା ‘ତେଲୁଗ ଦେଶମ୍ ପାର୍ଟି’ର ନେତା ନନ୍ଦମୁରାଇ ତାରକା ରତ୍ନଙ୍କର ହୃଦଘାତରେ ଦେହାନ୍ତ ହୋଇଛି । ୩୯ ବର୍ଷ ବୟସରେ ତାଙ୍କର ମୃତ୍ୟୁ ଘଟିଛି । ଶନିବାର ରାତିରେ ବେଙ୍ଗାଲୁରୁ ସ୍ଥିତ ‘’ନାରାୟଣ ହୃଦୟାଳୟ ହସ୍ପିଟାଲ୍’ରେ ଚିକିତ୍ସାଧିନ ଅବସ୍ଥାରେ ତାଙ୍କର ଦେହାନ୍ତ ହୋଇଛି । ନନ୍ଦମୁରାଇଙ୍କ ପରଲୋରେ ସମଗ୍ର ସାଉଥ୍ ଇଣ୍ଡଷ୍ଟ୍ରିରେ ଶୋକର ଛାୟା ଖେଳିଯାଇଛି । ବହୁ ରାଜନେତା ଏବଂ ସେଲିବ୍ରେଟିମାନେ ସୋସିଆଲ ମିଡିଆରେ ଶୋକ ପ୍ରକାଶ କରିଛନ୍ତି । ଦକ୍ଷିଣ ସିନେମା ପାଇଁ ଏହା ଏକ ଅପୂରଣୀୟ କ୍ଷତି ।
ସୁଚନା ଅନୁଯାୟୀ, ଜାନୁଆରି ୨୭ ତାରିଖ ଦିନ ଆନ୍ଧ୍ରପ୍ରଦେଶର ଚିତ୍ତୁର ଜିଲ୍ଲାରେ ଏକ ରୋଡ୍ ସୋ’ ସମୟରେ ହୃଦ୍ଘାତରେ ଆକ୍ରାନ୍ତ ହୋଇ ଚେତାଶୂନ୍ୟ ହୋଇ ପଡିଥିଲେ । ଏହାପରେ ତାଙ୍କୁ ତୁରନ୍ତ ସ୍ଥାନୀୟ ହସ୍ପିଟାଲରେ ଭର୍ତ୍ତି କରାଯାଇଥିଲା । ପରେ ସେଠାରୁ ତାଙ୍କୁ ବେଙ୍ଗାଲୁରୁ ସ୍ଥିତ ନାରାୟଣ ହୃଦୟାଳୟ ହସ୍ପିଟାଲ୍କୁ ସ୍ଥାନାନ୍ତର କରାଯାଇଥିଲା।
ସୂଚନା ମୁତାବକ, ନନ୍ଦମୁରାଇ ତାରକା ରତ୍ନ ହେଉଛନ୍ତି ଜଣେ ଅଭିନେତା ତଥା ଆନ୍ଧ୍ରପ୍ରଦେଶର ପୂର୍ବତନ ମୁଖ୍ୟମନ୍ତ୍ରୀ ଏନ୍. ଟି. ରାମାରାଓଙ୍କ ନାତି ଓ ଟଲିଉଡ୍ ଅଭିନେତା ଜୁନିୟର୍ ଏନ୍ଟିଆର୍ଙ୍କ ସମ୍ପର୍କୀୟ ଭାଇ। ନନ୍ଦମୁରାଇ ୨୦୦୨ରେ ‘ଓକାତୋ ନମ୍ବର୍ କୁରାଡୁ’ ଚଳଚ୍ଚିତ୍ରରେ ସେ ପ୍ରଥମ ଥର ଡେବ୍ୟୁ କରିଥିଲେ କରିଥିଲେ। ଏହାପରେ ସେ ‘ୟୁବା ରତ୍ନ’, ‘ତାରକ’, ‘ଭାଦ୍ରାଦ୍ରି ରାମୁଡୁ’ ଏବଂ ‘ଅମରାବତୀ’ ଭଳି ଚଳଚ୍ଚିତ୍ରରେ ମଧ୍ୟ ଅଭିନୟ କରିଛନ୍ତି। ଏହାସହ ସେ ଜଣେ ଭଲ ରାଜନେତା । ଆସନ୍ତାବର୍ଷ ‘ଟିଡିପି’ ଟିକେଟ୍ରେ ବିଧାନସଭା ନିର୍ବାଚନ ଲଢ଼ିବାକୁ ସେ ଖୁବ୍ ଆଗ୍ରହୀ ମଧ୍ୟ ଥିଲେ ।
ଝାରବନ୍ଧରେ ମୁଖ୍ୟମନ୍ତ୍ରୀଙ୍କ ବଡ଼ ଘୋଷଣା, ବର୍ଷକ ଭିତରେ ଜିଲ୍ଲା ହେବ ପଦମପୁର
ଝାରବନ୍ଧ : ଦିନିକିଆ ପଦମପୁର ଗସ୍ତରେ ଯାଇଥିବା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ବଡ଼ ଘୋଷଣା କରିଛନ୍ତି । ଝାରବନ୍ଧରେ ଆୟୋଜିତ ସାଧାରଣ ସଭାକୁ ଉଦବୋଧନ କରି ମୁଖ୍ୟମନ୍ତ୍ରୀ ପଦମପୁର ବର୍ଷକ ଭିତରେ ଜିଲ୍ଲା ହେବ ବୋଲି କହିଛନ୍ତି । ମୁଖ୍ୟମନ୍ତ୍ରୀ କହିଛନ୍ତି ଯେ, ମୁଁ ଯାହା ପ୍ରତିଶ୍ରୁତି ଦିଏ ତାକୁ ପୁରା କରେ । ମୁଁ କଥାରେ ନୁହେଁ କାମରେ ବିଶ୍ୱାସ କରେ । ସୂଚନାଯୋଗ୍ୟ ଯେ, ପଦମପୁର ଉପନିର୍ବାଚନ କାଳରେ ମୁଖ୍ୟମନ୍ତ୍ରୀ ପଦମପୁରକୁ ଜିଲ୍ଲା କରାଯିବ ବୋଲି ପ୍ରତିଶ୍ରୁତି ଦେଇଥିଲେ । ଗତବର୍ଷ ଡିସେମ୍ବର ମାସରେ ଏନେଇ ମୁଖ୍ୟମନ୍ତ୍ରୀ ଘୋଷଣା କରିଥିଲେ ।
ମୁଖ୍ୟମନ୍ତ୍ରୀ ଆହୁରି ମଧ୍ୟ କହିଥିଲେ ଯେ, ମିଶନ ଶକ୍ତି ଅନ୍ତର୍ଗତରେ ମହିଳାଙ୍କ କାମକୁ ନେଇ ସେ ବେସ ଖୁସି ଅଛନ୍ତି । ମିଶନ ଶକ୍ତିର ମା’ମାନଙ୍କୁ ୧ କୋଟି ୨୩ ଲକ୍ଷ ଟଙ୍କାର ସହାୟତା ରାଶି ଦେବା କଥା ମଧ୍ୟ ଘୋଷଣା କରିଥିଲେ । ଏହି ଟଙ୍କାକୁ ବ୍ୟବହାର କରି ମା’ମାନେ ଉଦ୍ୟୋଗୀ ହେବେ ବୋଲି ସେ ଆଶାବ୍ୟକ୍ତ କରିଛନ୍ତି । ଲୋକଙ୍କ ସ୍ନେହଶ୍ରଦ୍ଧା ତାଙ୍କୁ ଅଭିଭୂତ କରିଛି ବୋଲି ମଧ୍ୟ ସେ କହିଥିଲେ । ବିକାଶ ପାଇଁ ସାଧାରଣ ଲୋକ ଦେଇଥିବା ପ୍ରସ୍ତାବକୁ ତାଙ୍କ ସରକାର ଗ୍ରହଣ କରିଛନ୍ତି । ପାଇକମାଳ ପିଏଚସିକୁ ସିଏଚସି କରାଯାଇଛି । ପଦମପୁରରେ ବିଭିନ୍ନ ବିକାଶମୁଳକ କାର୍ଯ୍ୟ ପାଇଁ ୯୦ କୋଟି ଟଙ୍କା ମୁଖ୍ୟମନ୍ତ୍ରୀ ମଂଜୁର କରିଛନ୍ତି ।
ମୁଖ୍ୟମନ୍ତ୍ରୀ ଆଗକୁ କହିଥିଲେ, ‘ଚକ୍ରଧର ଡ୍ୟାମ କାମ ଆରମ୍ଭ ହୋଇସାରିଛି। ୧୩୩ କେଭି ସବଷ୍ଟେସନ୍ ପାଇଁ ଜମି ଚିହ୍ନଟ ହୋଇସାରିଛି ।’ ଏହି ଅବସରରେ ଝାରବନ୍ଧରେ ୮ କୋଟି ୮୫ ଲକ୍ଷ ୩୮ ହଜାର ଟଙ୍କାର ୧୧ଟି ପ୍ରକଳ୍ପ ଉଦଘାଟନ କରିଛନ୍ତି ମୁଖ୍ୟମନ୍ତ୍ରୀ । ସେହିପରି ୯୦ କୋଟି ୨୪ ଲକ୍ଷ ୯୯ ହଜାର ଟଙ୍କାର ୩୩୦ଟି ପ୍ରକଳ୍ପର ଭିତ୍ତିପ୍ରସ୍ତର ସ୍ଥାପନ କରାଯାଇଛି ।
ସୂଚନାଯୋଗ୍ୟ ଯେ, ମୁଖ୍ୟମନ୍ତ୍ରୀ ଉପନିର୍ବାଚନ କାଳରେ ପୁଣିଥରେ ପଦମପୁର ଆସିବେ ବୋଲି କଥା ଦେଇଥିଲେ । ସେହି ପ୍ରତିଶ୍ରୁତି ପୂରଣ କରି ମୁଖ୍ୟମନ୍ତ୍ରୀ ରବିବାର ଦିନ ପଦମପୁର ଗସ୍ତରେ ଯାଇଛନ୍ତି ।
ବରଗଡ଼ରେ ପହଞ୍ଚିଲେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ
ପଦମପୁର: ପଦମପୁରରେ ପହଞ୍ଚି ସାରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଉପ ନିର୍ବାଚନରେ ବିଜେଡି ପ୍ରାର୍ଥୀ ବର୍ଷା ସିଂ ବରିହାଙ୍କୁ ଜିତାଇ ଥିବାରୁ ପଦମପୁରବାସୀଙ୍କୁ ଜଣାଇବେ ଧନ୍ୟବାଦ । ଝାରବନ୍ଧ, ପାଇକମାଳ ଓ ପଦମପୁରରେ ବିଭିନ୍ନ ପ୍ରକଳ୍ପର ଭିତିପ୍ରସ୍ତର ସ୍ଥାପନ କରିବେ । ଏଥିସହ ମିଶନ ଶକ୍ତି ଏସଏଚଜି ଗ୍ରୁପଙ୍କୁ ଆର୍ଥିକ ସହାୟତା ପ୍ରଦାନ କରିବେ ।
ବରଗଡ଼ ସୀତାଭାଟି ଏୟାରଷ୍ଟ୍ରିପରେ ବିମାନରେ ଯାଇ ପହଞ୍ଚିଲେ ମୁଖ୍ୟମନ୍ତ୍ରୀ । ସେଠାରୁ ସ୍ବତନ୍ତ୍ର ହେଲିକପ୍ଟରରେ ଝାରବନ୍ଧ ଯାତ୍ରା କରିବେ । ହେଲିକପ୍ଟରରେ ଯାଉଥିଲେ ବି ପ୍ରିୟ ମୁଖ୍ୟମନ୍ତ୍ରୀଙ୍କୁ ସ୍ବାଗତ କରିବାକୁ ରାସ୍ତାରେ ଲାଗିଛି ପଦମପୁରବାସୀଙ୍କ ଲମ୍ବା ଲାଇନ୍ । ଉପନିର୍ବାଚନ ସମୟରେ ମୁଖ୍ୟମନ୍ତ୍ରୀ ଦେଇଥିବା ପ୍ରତିଶ୍ରୁତି ରକ୍ଷା କରି ପଦମପୁର ଆସିଥିବାରୁ ଲୋକଙ୍କ ମଧ୍ୟରେ ଉତ୍ସାହ ଦେଖିବାକୁ ମିଳୁଛି । ସବୁଠି ନବୀନଙ୍କ ଜୟ ଜୟ ଧ୍ବନୀ ଶୁଣିବାକୁ ମିଳୁଛି ।
ଦିନ ୧୧ଟାରେ ବରଗଡ଼ରେ ମୁଖ୍ୟମନ୍ତ୍ରୀ ପହଞ୍ଚିବା ପରେ ସାଢେ ୧୧ଟାରେ ଝାରବନ୍ଧ କାର୍ଯ୍ୟକ୍ରମ ସ୍ଥଳରେ ପହଞ୍ଚିବେ । ସାଢେ ୧୨ ଟାରେ ପାଇକମାଳ ଓ ଅପରାହ୍ନ ୩ ଟା ୫୫ରେ ପଦମପୁର କାର୍ଯ୍ୟକ୍ରମ ସ୍ଥଳରେ ପହଞ୍ଚିବେ । ସେଠାରେ ସମାବେଶରେ ମୁଖ୍ୟମନ୍ତ୍ରୀ ଉଦବୋଧନ ଦେଇ ପଦମପୁରବାସୀଙ୍କୁ ଜଣାଇବେ ଧନ୍ୟବାଦ । ଝାରବନ୍ଧ ବ୍ଲକର ଶକ୍ତି ଛକ ପଡିଆ, ପାଇକମାଳ ହାଇସ୍କୁଲ ପଡିଆ ଓ ପଦମପୁର ଷ୍ଟାଡିୟମରେ ମୁଖ୍ୟମନ୍ତ୍ରୀ ପଦମପୁର ବାସୀଙ୍କୁ ଧନ୍ୟବାଦ ଦେବେ । ପଦମପୁର ବାସୀ ପୁଣି ଥରେ ନବୀନଙ୍କ ବିକାଶରଧାରା ସାମିଲ ହୋଇ ବର୍ଷା ସିଂ ବରିହାଙ୍କୁ ବିଜୟୀ କରିଥିବାରୁ ଧନ୍ୟବାଦ ଜଣାଇବେ ମୁଖ୍ୟମନ୍ତ୍ରୀ । ଉପନିର୍ବାଚନ ଫଳାଫଳ ପରେ ମୁଖ୍ୟମନ୍ତ୍ରୀ ପଦମପୁର ଅଞ୍ଚଳ ଗସ୍ତ କରିବେ ବୋଲି ପ୍ରତିଶ୍ରୁତି ଦେଇଥିଲେ । ଆଜି ଦେଇଥିବା କଥା ରଖିବେ ମୁଖ୍ୟମନ୍ତ୍ରୀ ନବୀନ ପଟ୍ଟନାକୟ ।
ଶାନ୍ତି ଶୃଙ୍ଖଳାର ସହ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ କାର୍ଯ୍ୟକ୍ରମ ଶେଷ କରିବାକୁ ପ୍ରଶାସନ ପ୍ରସ୍ତୁତି କରିଛି । ସୁରକ୍ଷା ପାଇଁ ୨୫ ପ୍ଲାଟୁନ ପୋଲିସ ଫୋର୍ସ, ୫ ଜଣ ଆଡିସନାଲ ଏସପି, ୧୬ ଜଣ ଡିଏସପି ମୁତୟନ ହୋଇଛନ୍ତି ।
ସୁପ୍ରିମକୋର୍ଟ ଗଲା ଶିବସେନା ଲଢ଼େଇ
ମୁମ୍ବାଇ: ଶିବସେନା କାହାର ? ଏ ବିବାଦ ଥମିବାର ନାଁ ନେଉନି । ନିର୍ବାଚନ ଆୟୋଗ ଏକନାଥ ସିନ୍ଦେ ଗୋଷ୍ଠୀକୁ ଶିବସେନା ନାଁ ଓ ନିର୍ବାଚନୀ ଚିହ୍ନ ପ୍ରଦାନ କରିବା ପରେ ପୁଣି ତେଜିଛି ବିବାଦ । ଯାହା ସୁପ୍ରିମକୋର୍ଟରେ ପହଞ୍ଚିଛି । ନିର୍ବାଚନ ଆୟୋଗଙ୍କ ନିଷ୍ପତ୍ତି ପରେ ସିନ୍ଦେ ଗୋଷ୍ଠୀ ପକ୍ଷରୁ ସୁପ୍ରିମକୋର୍ଟରେ କ୍ୟାବିଏଟ ଦାଖଲ କରାଯାଇଛି । ଏହାର ଜବାବ ଦେବାକୁ ଯାଇ ଉଦ୍ଧବ ଗୋଷ୍ଠୀ ପକ୍ଷରୁ ଅନଲାଇନରେ ଆପତ୍ତି ଦାଖଲ କରାଯାଇଛି । ଏଥିରେ ନିର୍ବାଚନ ଆୟୋଗଙ୍କ ଆଦେଶକୁ ଚ୍ୟାଲେଞ୍ଜ କରାଯିବା ସହ ଫେବୃଆରୀ ୨୦ରେ ତୁରନ୍ତ ଶୁଣାଣି ପାଇଁ ସୁପ୍ରିମକୋର୍ଟରେ ଆବେଦନ କରାଯାଇଛି । ନିର୍ବାଚନ ଆୟୋଗଙ୍କ ନିଷ୍ପତ୍ତି ତ୍ରୁଟିପୂର୍ଣ୍ଣ ଦର୍ଶାଇ ଏଥିରେ ରହିତାଦେଶ ଜାରି କରିବାକୁ ଉଦ୍ଧବ ଗୋଷ୍ଠୀ ଆବେଦନ କରିଛି ।
ଠାକରେ ଗୋଷ୍ଠୀର ଓକିଲ କପିଲ ଶିବଲଙ୍କ ଅନୁସାରେ ନିର୍ବାଚନ ଆୟୋଗଙ୍କ ଆଦେଶରେ ଆଇନଗତ ତ୍ରୁଟି ରହିଛି । ଯାହାକୁ ଆଧାର କରି ସୁପ୍ରିମକୋର୍ଟରେ ଆବେଦନ କରାଯାଇଛି ।