ଭୁବନେଶ୍ୱର: ଖୁବଶୀଘ୍ର ରାଜ୍ୟରେ ଦୁଇଟି ପର୍ଯ୍ୟାୟରେ ନିଯୁକ୍ତି ପାଇବେ ୫ ହଜାର ଡାକ୍ତର । ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କ ରାଇରଙ୍ଗପୁରକୁ ଡାକ୍ତର ଦିଆଯିବ ବୋଲି ଗୃହରେ ଘୋଷଣା କରିଛନ୍ତି ସ୍ବାସ୍ଥ୍ୟମନ୍ତ୍ରୀ ନିରଞ୍ଜନ ପୂଜାରୀ । ସେହିପରି ବର୍ତ୍ତମାନ ରାଜ୍ୟରେ ପ୍ରତି ହଜାରେ ରୋଗୀରେ ୦.୭% ଶଯ୍ୟା ଅଛି । IPHS ନିୟମ ଅନୁସାରେ ହଜାରେ ରୋଗୀରେ ଶଯ୍ୟା ସଂଖ୍ୟା ୧ ପ୍ରତିଶତ ରହିବା କଥା । ଯାହାକୁ ହାସଲ କରିବା ଦିଗରେ ରାଜ୍ୟ ସରକାର କାମ ଚଳାଇଛନ୍ତି ବୋଲି ବିଧାନସଭାରେ ସୂଚନା ଦେଇଛନ୍ତି ସ୍ବାସ୍ଥ୍ୟମନ୍ତ୍ରୀ ନିରଞ୍ଜନ ପୂଜାରୀ ।
ପରୀକ୍ଷା ଦେଉଥିଲେ ମା’, ଝିଅର ଯତ୍ନ ନେଲେ ମହିଳା କନଷ୍ଟେବଲ୍
ମାଲକାନଗିରି: ଅସମୟରେ ମଣିଷ ପଣିଆ ଦେଖାଇବା ଆମେ ଅନେକ ଖବର ଦେଖିଛେ । ହେଲେ ମାଲକାନଗିରି ଜିଲ୍ଲାରୁ ଯେଉଁ ଖବର ଆସିଛି, ତାହ ଅନ୍ୟମାନଙ୍କ ପାଇଁ ଉଦାହରଣ ସାଜିଛି । ପରୀକ୍ଷା ଦେବାକୁ ଯାଇଥିବା ଜଣେ ମା’ କୋଳରେ ଥିଲା ତା’ର ଛୋଟ ଶିଶୁ । ଛୁଆକୁ ସ୍ତନପାନ କରାଇବାକୁ ପରୀକ୍ଷା କେନ୍ଦ୍ରରେ ରହିଥିଲା ବ୍ୟବସ୍ଥା । ହେଲେ ପରୀକ୍ଷା ବେଳେ ଛୋଟ ଛୁଆକୁ କେମିତି ସମ୍ଭାଳିବେ ବୋଲି ଚିନ୍ତାରେ ଥିଲେ ମା’ ଜଣକ । ଏହି ସମୟରେ ଜଣେ ମହିଳା ପୋଲିସ ମାଆର ପରିସ୍ଥିତିକୁ ବୁଝି ପାରିଥିଲେ । ସହାୟତାର ହାତ ବଢ଼ାଇବା ସହ ଛୁଆକୁ ନିଜ କୋଳକୁ ନେଇଥିଲେ । ପରୀକ୍ଷା ସରିବା ଯାଏ ସମ୍ଭାଳିଥିଲେ କୁନି ଛୁଆକୁ । ଏହି ଘଟଣାକୁ ନେଇ ମାଲକାନଗିରିରେ ଚର୍ଚ୍ଚା ଜୋର ଧରିଛି । ମହିଳା ପୋଲିସ କର୍ମଚାରୀ ଜଣଙ୍କୁ ଭୂରି ଭୂରି ପ୍ରଶଂସା କରାଯାଉଛି ।
ସୂଚନା ଅନୁସାରେ, ପୋଲିସ ପଦବୀ ପାଇଁ ମାଲକାନଗିରି ମହାବିଦ୍ୟାଳୟରେ ପରୀକ୍ଷା ଦେବାକୁ ଆସିଥିଲେ ଚଞ୍ଚଳା ମଲ୍ଲିକ । କାଖରେ ଥିଲା ୪ ବର୍ଷର କୁନି ଝିଅ । କେନ୍ଦ୍ରରେ ପହଞ୍ଚିବା ବେଳକୁ ଛୁଆ କାନ୍ଦିବା ଆରମ୍ଭ କରିଥିଲା । ସ୍ତନ୍ୟପାନ କରାଇ ଛୁଆକୁ ଚୁପ୍ କରାଇଥିଲେ । ହେଲେ ପରୀକ୍ଷା କେମିତି ଦେବ ବୋଲି ଚିନ୍ତାରେ ପଡ଼ିଯାଇଥିଲେ ଚଞ୍ଚଳା । ପରିବାର ପକ୍ଷରୁ ମଧ୍ୟ ପାଖରେ କେହି ନଥିଲେ । ମାଆର ଏଭଳି କରୁଣା ଅବସ୍ଥାକୁ ବୁଝି ପାରି ଥିଲେ ସେଠାରେ ଡ୍ୟୁଟିରେ ଥିବା ମହିଳା କନଷ୍ଟେବଳ ବାସନ୍ତୀ ଚୌଧୁରୀ । ମହିଳା କନେଷ୍ଟବଳ ଜଣକ ଛୁଆକୁ ସମ୍ଭାଳିବା ପରେ ପରୀକ୍ଷା ଦେଇଥିଲେ ଚଞ୍ଚଳା । ପରୀକ୍ଷା ସରିବା ପରେ ମହିଳା କନେଷ୍ଟବଳଙ୍କୁ ପ୍ରଶଂସା କରି ଘରକୁ ଫେରିଥିଲେ ଚଞ୍ଚଳା ।
ପୂର୍ବତନ ବିଧାୟିକା ରାସମଞ୍ଜରୀ ଦେବୀଙ୍କ ବିୟୋଗରେ ଶୋକ ପ୍ରସ୍ତାବ, ଶୋକ ପ୍ରସ୍ତାବ ଆଣିଲେ ମୁଖ୍ୟମନ୍ତ୍ରୀ
ଭୁବନେଶ୍ୱର: ଭାରତ ବର୍ଷର ଶେଷ ରାଣୀ ରାସମଞ୍ଜରୀ ଦେବୀଙ୍କ ପରଲୋକ। ତାଙ୍କ ବିୟୋଗରେ ବିଧାନସଭାରେ ଶୋକ ପ୍ରସ୍ତାବ ଆଗତ କଲେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଗତକାଲି ୯୬ ବର୍ଷ ବୟସରେ ତାଙ୍କ ଦେହାନ୍ତ ହୋଇଥିଲା । ଶୋକପ୍ରସ୍ତାବକୁ ସମର୍ଥନ ଜଣାଇଲେ ବିରୋଧୀ । ଗୃହରେ ଦିବଙ୍ଗତଙ୍କୁ ଶ୍ରଦ୍ଧାଞ୍ଜଳି ଜଣାଇ ନିରବ ପ୍ରାର୍ଥନା କରାଯାଇଛି ।
ସେ ୧୯୭୭ରେ ଆଠଗଡ଼ ନିର୍ବାଚନ ମଣ୍ଡଳୀରୁ ବିଧାୟିକା ଭାବେ ନିର୍ବାଚିତ ହୋଇଥିଲେ । ରାସମଞ୍ଜରୀ ଦେବୀ ଜନତା ଦଳରୁ ୧୯୭୭-୮୦ ମସିହା ପର୍ଯ୍ୟନ୍ତ ଆଠଗଡ ନିର୍ବାଚନ ମଣ୍ଡଳୀରୁ ବିଧାୟିକା ଭାବେ ନିର୍ବାଚିତ ହୋଇଥିଲେ । ୨୦୦୨-୨୦୦୭ ପର୍ଯ୍ୟନ୍ତ ତିଗିରିଆ ୧୪ ନମ୍ବର ଜୋନର ଜିଲ୍ଲାପରିଷଦ ସଭ୍ୟଭାବେ ନିର୍ବାଚନ ଲଢି କଟକ ଜିଲ୍ଲା ପରିଷଦର ଉପ ସଭାନେତ୍ରୀ ଥିଲେ । ଦୀର୍ଘ ଦିନ ଧରି ବାର୍ଦ୍ଧକ୍ୟ ଜନିତ ରୋଗରେ ପୀଡିତ ଥିଲେ । ତେବେ ରାସମଞ୍ଜରୀ ଦେବୀଙ୍କ ମୃତ୍ୟୁ ପରେ ଆଠଗଡ ତିଗିରିଆ ନିର୍ବାଚନ ମଣ୍ଡଳୀରେ ଶୋକର ଛାୟା ଖେଳି ଯାଇଛି । ବିଜୁ ପଟ୍ଟନାୟକ ଯେତେବେଳେ ନାରୀ ସଶକ୍ତିକରଣ ପାଇଁ ଚେଷ୍ଟିତ ଥିଲେ ସେତେବେଳେ ରାଣୀ ମା’ ସାଜିଥିଲେ ରୋଲ୍ ମଡେଲ। ଆଜି ସକାଳୁ ରାଣୀଙ୍କ ପାର୍ଥୀବ ଶରୀରକୁ ଶୋଭାଯାତ୍ରାରେ ନେଇ ତିଗିରିଆ ଗଡଜାତର ସମସ୍ତ ଗାଁ ପରିକ୍ରମା କରାଯାଇଛି । ପୋଲିସ ପକ୍ଷରୁ ତାଙ୍କୁ ସଲାମି ଦିଆଯାଇଛି ।
ଇଣ୍ଡିଆ ଟୁଡେ ପର୍ଯ୍ୟଟନ ସମ୍ମିଳନୀରେ ରାଜ୍ୟକୁ ସଫଳତା, ୩ଟି ବର୍ଗରେ ଓଡ଼ିଶା ପର୍ଯ୍ୟଟନ ବିଭାଗ ସମ୍ମାନିତ
ନୂଆଦିଲ୍ଲୀ: ଇଣ୍ଡିଆ ଟୁଡେ ପର୍ଯ୍ୟଟନ ସମ୍ମିଳନୀରେ ଓଡ଼ିଶା ପର୍ଯ୍ୟଟନ ବିଭାଗ ୩ଟି ବର୍ଗରେ ସମ୍ମାନିତ । ପୁରୀ ରଥଯାତ୍ରା ଶ୍ରେଷ୍ଠ ପାର୍ବଣ ସ୍ଥଳ । ଶ୍ରେଷ୍ଠ ବନ୍ୟଜନ୍ତୁ ଭାବେ ଭିତରକନିକା ପୁରସ୍କୃତ ହୋଇଛି । ସେହିପରି କୋଣାର୍କକୁ ମିଳିଲା ଶ୍ରେଷ୍ଠ ଆଇକନିକ ପୁରସ୍କାର । ଏନେଇ ବିଭିନ୍ନ ମହଲରେ ଖୁସିର ଲହରୀ ଖେଳିଯାଇଛି । ପ୍ରକୃତିର ବିସ୍ମୟ ଭିତରକନିକା । ୬୭୨ ବର୍ଗ କିଲୋମିଟର ବ୍ୟାପ୍ତ ଭିତରକନିକା ଅଭୟାରଣ୍ୟ ଓ ୧୪୫ ବର୍ଗ କିଲୋମିଟର ବିଶିଷ୍ଟ ଭିତରକନିକା ଜାତୀୟ ଉଦ୍ୟାନର ଜୈବ ବିବିଧତା ପ୍ରକୃତି ପ୍ରେମୀଙ୍କୁ ଆକୃଷ୍ଟ କରିଆସିଛି । ଜୈବ ବିବିଧତା ପାଇଁ ଭିତରକନିକାକୁ ଆନ୍ତର୍ଜାତୀକ ରାମସାର ସାଇଟ ମାନ୍ୟତା ବି ମିଳିଛି ।
ସେହିପରି ଶ୍ରୀଜିଉଙ୍କ ଘୋଷଯାତ୍ରା ତ ବିଶ୍ବପ୍ରସିଦ୍ଧ । ଅଗଣିତ ଭକ୍ତ ଓ ଶ୍ରଦ୍ଧାଳୁଙ୍କ ଗହଣରେ ଚତୁର୍ଦ୍ଧାମୁରତିଙ୍କ ରଥଯାତ୍ରା ସାରା ବିଶ୍ବରେ ନିଆରା । ତେଣୁ ତା’ଠାରୁ ଆଉ ପାର୍ବଣ ସ୍ଥଳ କ’ଣ ବା ହୋଇପାରେ । କୋଣାର୍କର ନିଆରା ନିର୍ମାଣ ସବୁବେଳେ ସମସ୍ତଙ୍କୁ ଚକିତ କରିଛି । ଏଠାରେ ମନ୍ଦିର ତିଆରି ହୋଇଛି । ହେଲେ ଗର୍ଭଗୃହ ନାହିଁ । ଏଠାରେ କୌଣସି ଠାକୁର ପୂଜା ପାଆନ୍ତିନି । ବରଂ ସୂର୍ଯ୍ୟଙ୍କ ପହିଲି କିରଣ ଏହି ମନ୍ଦିର ଉପରେ ପଡ଼ିଲେ ସୂର୍ଯ୍ୟଙ୍କ ପୂଜା ହୁଏ । କୋଣାର୍କ ସୂର୍ଯ୍ୟ ମନ୍ଦିରର ନିଆରା ନିର୍ମାଣକୁ ଆଇକନିକ ସ୍ଥଳ ଭାବେ ବିବେଚନା କରିବା ସହ ସମ୍ମାନ ମିଳିଛି ।
ମାର୍ଚ୍ଚ ଆରମ୍ଭରୁ ଅସମ୍ଭାଳ ତାତି, ୨ରୁ ୪ଡିଗ୍ରୀ ପର୍ଯ୍ୟନ୍ତ ବଢ଼ିବ ତାପମାତ୍ରା
ଭୁବନେଶ୍ୱର: ମାର୍ଚ୍ଚ ଆରମ୍ଭରୁ ରାଜ୍ୟରେ ସୃଷ୍ଟି ହୋଇପାରେ ଅସମ୍ଭାଳ ତାତି । ଉତ୍ତର ଓ ଉତ୍ତରପଶ୍ଚିମ ଦିଗରୁ ଶୁଷ୍କ ଉତ୍ତପ୍ତ ବାୟୁ ପ୍ରଭାବରେ ରାଜ୍ୟରେ ତାପମାତ୍ରା ପ୍ରାୟ ୫ ଡିଗ୍ରୀ ପର୍ଯ୍ୟନ୍ତ ବୃଦ୍ଧି ପାଇପାରେ । ମାର୍ଚ୍ଚ ପ୍ରଥମ ସପ୍ତାହ ବେଳକୁ ତାତି ୪୧ ଡିଗ୍ରୀ ଛୁଇଁ ପାରେ ବୋଲି ପାଣିପାଗ ବିଶେଷଜ୍ଞମାନେ ଆକଳନ କରିଛନ୍ତି । ଆସନ୍ତା ମାର୍ଚ୍ଚ ୪ ତାରିଖରେ ବଙ୍ଗୋପସାଗରରେ ଏକ ଘୂର୍ଣ୍ଣିବଳୟ ସୃଷ୍ଟି ହେବାର ସମ୍ଭାବନା ରହିଛି । ଏହାର ପ୍ରଭାବରେ ୭ ତାରିଖ ସୁଦ୍ଧା ଏକ ଲଘୁଚାପ ସୃଷ୍ଟି ହେବ । ପରବର୍ତ୍ତୀ ସମୟରେ ଏହା ଅଧିକ ଘନୀଭୂତ ହେବ ବୋଲି ମଡେଲ୍ ଦର୍ଶାଉଛି । ଏହା ଉତ୍ତର ପଶ୍ଚିମ ଦିଗରୁ ଶୁଷ୍କ ଓ ଉତ୍ତପ୍ତ ବାୟୁକୁ ଆକର୍ଷିତ କରିବ । ଯାହାଦ୍ୱାରା ତାପମାତ୍ରା ବୃଦ୍ଧି ପାଇବାର ସମ୍ଭାବନା ରହିଛି ।
ରାଜ୍ୟର ବିଭିନ୍ନ ସ୍ଥାନରେ ତାପପାତ୍ରା ସ୍ୱାଭାବିକଠାରୁ ୨ ରୁ ୪ ଡିଗ୍ରୀ ପର୍ଯ୍ୟନ୍ତ ଉପରେ ରହୁଛି । ବର୍ତ୍ତମାନ ରାଜ୍ୟକୁ ବଙ୍ଗୋପସାଗରରୁ ଜଳୀୟବାଷ୍ପପୂର୍ଣ୍ଣ ବାୟୁ ପ୍ରବାହ ହେଉଛି । ଦୀର୍ଘ ଦିନ ହେବ ବର୍ଷା ନହେବା ଏବଂ ମାଟି ଶୁଷ୍କ ରହିବାରୁ ରାଜ୍ୟରେ ଏଭଳି ସ୍ଥିତି ସୃଷ୍ଟି ହୋଇଛି । ମାର୍ଚ୍ଚ ଦ୍ବିତୀୟ କିମ୍ବା ତୃତୀୟ ସପ୍ତାହ ବେଳକୁ ରାଜ୍ୟରେ ସ୍ଥିତି ସଂଗୀନ ହେବ ବୋଲି ଆକଳନ କରାଯାଇଛି । ଓଡ଼ିଶାର ଅଧିକାଂଶ ଅଞ୍ଚଳ ଅରେଞ୍ଜ ମାର୍କରେ ରହିଥିବା ବେଳେ ଭୁବନେଶ୍ବର ସମେତ ଅନୁଗୁଳ, ମାଲକାନଗିରି, ଟିଟିଲାଗଡ, ସୋନପୁର, ବାରିପଦା ରେଡ୍ ମାର୍କରେ ରହିଛି ।
ଦୁଇ ଦିନିଆ ମୁମ୍ବାଇ ଗସ୍ତରେ ଯିବେ ମୁଖ୍ୟମନ୍ତ୍ରୀ, କ୍ରୀଡ଼ାର ବିକାଶରେ ଓଡ଼ିଶାର ଅବଦାନ ପାଇଁ ହେବେ ସମ୍ମାନିତ
ଭୁବନେଶ୍ୱର: ମୁମ୍ବାଇ ଗସ୍ତ କରିବେ ମୁଖ୍ୟମନ୍ତ୍ରୀ । ଆଜିଠୁ ଦୁଇ ଦିନିଆ ମୁମ୍ବାଇ ଗସ୍ତରେ ଯିବେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । କ୍ରୀଡ଼ାର ବିକାଶରେ ଓଡ଼ିଶାର ଅବଦାନ ପାଇଁ ସମ୍ମାନିତ ହେବେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଓଡ଼ିଶାରେ ଦୁଇ ଦୁଇ ଥର ହକି ବିଶ୍ବକପ୍ ଆୟୋଜନ କରି ପ୍ରଶଂସା ସାଉଣ୍ଟିଛନ୍ତି ରାଜ୍ୟ ସରକାର । ନିକଟରେ ରାଉରକେଲାରେ ବିଶ୍ବର ସର୍ବବୃହତ ହକି ଷ୍ଟାଡିୟମକୁ ମାତ୍ର ବର୍ଷକରେ ନିର୍ମାଣ କରି ରେକର୍ଡ କରିଥିଲେ ରାଜ୍ୟ ସରକାର । ବିର୍ସାମୁଣ୍ଡା ଅନ୍ତର୍ଜାତୀୟ ହକି ଷ୍ଟାଡିୟମରେ ଏକା ସାଙ୍ଗରେ ୨୦ ହଜାର ଦର୍ଶକ ବସିବାର କ୍ଷମତା ରହିଛି ।
ଏସବୁ କ୍ଷେତ୍ରରେ ରାଜ୍ୟର ଗୌରବ ଦୁଇ ଗୁଣା ହୋଇଛି । କ୍ରୀଡ଼ା କ୍ଷେତ୍ରରେ ଓଡ଼ିଶାର ଅବଦାନ ଆଜି ବିଶ୍ବବିଦିତ । ଏଥିପାଇଁ ମୁଖ୍ୟମନ୍ତ୍ରୀଙ୍କୁ ସମ୍ମାନିତ କରାଯିବ । ଏହାସହ ମୁମ୍ବାଇରେ କିଛି ଶିଳ୍ପପତିଙ୍କୁ ଭେଟିବେ ମୁଖ୍ୟମନ୍ତ୍ରୀ । ଆସନ୍ତାକାଲି ଭୁବନେଶ୍ବର ଫେରିବାର କାର୍ଯ୍ୟକ୍ରମ ରହିଛି ।
ଦିଲ୍ଲୀ ମଦ ଦୁର୍ନୀତି ମାମଲା: ଗିରଫ ପରେ ଆଜି କୋର୍ଟରେ ହାଜର ହେବେ ସିସୋଦିଆ
ନୂଆଦିଲ୍ଲୀ: ବିଜେପିର ଡାର୍ଟି ପଲିଟିକ୍ସ ଯୋଗୁଁ ଫସିଲେ ଦିଲ୍ଲୀ ଉପମୁଖ୍ୟମନ୍ତ୍ରୀ ମନୀଷ ସିସୋଦିଆ । ଦିଲ୍ଲୀ ମଦ ଦୁର୍ନୀତି ମାମଲାରେ ୮ ଘଣ୍ଟା ଧରି ଜେରା ପରେ ସିସୋଦିଆଙ୍କୁ ଗିରଫ କରିଛି ସିବିଆଇ । ଗତ ରାତିରେ ସେ ସିବିଆଇ କାର୍ଯ୍ୟାଳୟରେ ଥିବା ବେଳେ ଆଜି ତାଙ୍କୁ କୋର୍ଟ ଚାଲାଣ କରାଯିବ । ମନୀଷଙ୍କ ଗିରଫ ପରେ ବିଜେପିକୁ ଟାର୍ଗେଟ କରିଛନ୍ତି ମୁଖ୍ୟମନ୍ତ୍ରୀ ଅରବିନ୍ଦ କେଜରିଓ୍ବାଲ । ବିଜେପି ଦିଲ୍ଲୀ ସରକାରଙ୍କ ପ୍ରତି ଇର୍ଷାପରାୟଣ ହୋଇପଡ଼ିଛି । ଦିଲ୍ଲୀର ବିକାଶ ମଡେଲ ଦେଖି ସହିପାରୁନି ବିଜେପି । ଏଥିରେ ବାଧା ଆଣିବା ପାଇଁ ବିଜେପି ଦିଲ୍ଲୀ ଉପମୁଖ୍ୟମନ୍ତ୍ରୀଙ୍କୁ ଗିରଫ କରିଛି ।
ସେପଟେ ଗିରଫ ପ୍ରତିବାଦରେ ସିବିଆଇ କାର୍ଯ୍ୟାଳୟ ଆଗରେ ଆପ କର୍ମୀ ହଙ୍ଗାମା କରିଛନ୍ତି । ୟୁପିରେ ଆଜି ପ୍ରତି ଜିଲ୍ଲାରେ ବିକ୍ଷୋଭ କରିବ ଆମ ଆଦମୀ ପାର୍ଟି । ଗତକାଲି ପଚରାଉଚରା ବେଳେ ଦଳ ପକ୍ଷରୁ ସନ୍ଦେହ କରାଯାଇଥିଲା ଯେ ମନୀଷଙ୍କୁ ଗିରଫ କରାଯାଇପାରେ । ଏଭଳି ଗିରଫକୁ ଦଳ ପକ୍ଷରୁ ସମାଲୋଚନା କରାଯାଇଥିବା ବେଳେ ବିଜେପି ପକ୍ଷରୁ ମିଛରେ ଫଶାଇ ଦିଆଯାଇଛି ବୋଲି ଆପ୍ କହିଛି । ଆପ୍ ସରକାରର ଅବକାରୀ ନୀତି ୨୦୨୧-୨୨କୁ ଗତ ବର୍ଷ ଜୁଲାଇ ୩୧ରେ ରଦ୍ଦ କରାଯାଇଥିଲା । ନୂଆ ନୀତିକୁ ରଦ୍ଦ କରିବା ପରେ ଗତ ୨୦୨୦ ନଭେମ୍ବର ୧୭ ପୂର୍ବରୁ ଲାଗୁ ହୋଇଥିବା ପୁରୁଣା ଅବକାରୀ ନୀତିକୁ କାର୍ଯ୍ୟକାରୀ କରିବା ଲାଗି ଦିଲ୍ଲୀ ସରକାର ନିଷ୍ପତ୍ତି ନେଇଥିଲେ । ସିସୋଦିଆଙ୍କ ବିରୋଧରେ ସିବିଆଇ ତଦନ୍ତ ଲାଗି ସୁପାରିସ୍ କରିଥିଲେ ଲେଫ୍ଟନାଣ୍ଟ ଗଭର୍ଣ୍ଣର ଭି.କେ. ସକ୍ସେନା ।
ଦୁନିଆର ସବୁଠାରୁ ବଡ ପରିବାର, ୩୯ ଜଣ ସ୍ତ୍ରୀ, ୯୪ ଜଣ ପିଲା ଏବଂ ୩୩ ଜଣ ନାତିନାତୁଣି
ମିଜୋରାମ: ଦୁନିଆର ସବୁଠାରୁ ବଡ ପରିବାର ବିଷୟରେ ଆପଣ ଜାଣନ୍ତି କି ? କେବଳ ବାପା ମା ଛୁଆଙ୍କୁ ନେଇ ଏହି ପରିବାର। ଏହି ପରିବାରରେ ସଦସ୍ୟଙ୍କ ସଂଖ୍ୟା ଆପଣ ଜାଣିଲେ ଆଶ୍ଚର୍ଯ୍ୟ ହୋଇଯିବେ। ଏହି ପରିବାର ମୁଖିଆଙ୍କର ୩୯ଜଣ ପତ୍ନୀ ୯୪ ଜଣ ପିଲା ଏବଂ ୩୩ ନାତିନାତୁଣି ରହିଛନ୍ତି । ସବୁଠାରୁ ଆଶ୍ଚର୍ଯ୍ୟ କଲା ଭଳି କଥା ହେଉଛି ଯେ, ଏହି ପରିବାରରେ ସମସ୍ତେ ଗୋଟିଏ ଛାତ ତଳେ ରହନ୍ତି। ଏବଂ ଏକାଠି ରହିବା ସହ ଏକାସାଙ୍ଗରେ ଖାଆନ୍ତି । ମିଜୋରାମର ବାଟୱାଙ୍ଗ ଗାଁରେ ଏହି ପରିବାର ବସବାସ କରନ୍ତି ।
ଏହି ପରିବାରକୁ ଜିୟୋନ-ଆ ବୋଲି କୁହାଯାଏ । ଜିୟୋନ-ଆ ପରିବାର ଦୁନିଆର ସବୁଠୁ ବଡ ପରିବାର ବୋଲି କୁହାଯାଏ । ଜିୟୋନ-ଆ ୪ ମହଲା ବିଶିଷ୍ଟ ଏକ ଘର ଯେଉଁଥିରେ ୧୦୦ଟି ବଖରା ରହିଛି । ଏହି ଘରର ପୁଅମାନେ ଚାଷ କରିବା ସହ ପଶୁପାଳନ କରିଥାନ୍ତି । ସେହିପରି ଘରର ମହିଳାମାନେ ଖାଇବା ପ୍ରସ୍ତୁତ କରିବା ସହ ଘର ସମ୍ଭାଳି ଥାନ୍ତି ।
ପରିବାରର ମୁଖିଆ ଜିୟୋଘାକା ୧୭ ବର୍ଷ ବୟସରେ ବିବାହ କରିଥିଲେ । ତାଙ୍କର ଏକ ବଡ ପରିବାର ହେଉ ବୋଲି ସେ ଇଚ୍ଛା କରିଥିଲେ । ସୂଚନା ଅନୁଯାୟା, ସେ ଗୋଟିଏ ପରେ ଗୋଟିଏ ବିହାହ କରି ଏମିତି ୩୯ ଜଣଙ୍କୁ ବିବାହ କରିଥିଲେ । ଏହାସହ ୯୪ ସନ୍ତାନର ବାପା ମଧ୍ୟ ହୋଇଥିଲେ । ସେ ୯୪ ଜଣଙ୍କର ବାପା ହୋଇ ନିଜକୁ ବହୁତ ଭାଗ୍ୟଶାଳୀ ଭାବୁଥିଲେ । କାହିଁକି ନା ତାଙ୍କ ପାଖରେ ନିଜର ବହୁତ ବଡ ପରିବାର ରହିଥିଲା ତାଙ୍କର ଦେଖାଶୁଣା କରିବା ପାଇଁ ।
ଜିୟୋଘାକାଙ୍କ ଦେହ ଖରାପ ଯୋଗୁଁ ୭୬ ବର୍ଷ ବୟସରେ ତାଙ୍କର ମୃତ୍ୟୁ ଘଟିଥିଲା । ତାଙ୍କର ମୃତ୍ୟୁରେ ମିଜୋରାମର ମୁଖ୍ୟମନ୍ତ୍ରୀ ଦୁଃଖ ପ୍ରକାଶ କରିଥିଲେ ।
ସୁନ୍ଦରଗଡ଼ ବଣାଇଁ ମାଲଦାରେ ଗୁଳିକାଣ୍ଡ, ବଚସା ପରେ ୪ ରାଉଣ୍ଡ ଗୁଳି ଚଳାଇଲେ ଦୁର୍ବୃତ୍ତ
ସୁନ୍ଦରଗଡ଼: ସୁନ୍ଦରଗଡ଼ ବଣାଇଁ ମାଲଦାରେ ଗୁଳିକାଣ୍ଡ ଘଟଣା । ତିନିଜଣ ଦୁର୍ବୃତ୍ତ ଏକ ନମ୍ଵର ବିହିନ ପଲସରରେ ଆସିଥିଲେ । ଢାବା ମାଲିକ ସହ ବଚସା ପରେ ୪ ରାଉଣ୍ଡ ଗୁଳି ଚଳାଇଥିଲେ । ଗୁଳିମାଡ଼ରେ ଢାବା ମାଲିକ ରମେଶ ଚାତମ୍ବଙ୍କର ମୃତ୍ୟୁ ହୋଇଛି । ଢାବା ମାଲିକଙ୍କ ଘଟଣାସ୍ଥଳରେ ମୃତ୍ୟୁ ହୋଇଥିବାବେଳେ ଜଣେ କର୍ମଚାରୀକୁ ଗୁରୁତର ଅବସ୍ଥାରେ ପ୍ରଥମେ ଯୋଡ଼ା ଓ ପରେ କଟକ ବଡ଼ ଡାକ୍ତରଖାନାକୁ ସ୍ଥାନାନ୍ତର କରାଯାଇଛି । ପୂର୍ବ ଶତ୍ରୁତାକୁ ନେଇ ଏହି ଗୁଳିମାଡ଼ ହୋଇଥିବା ସନ୍ଦେହ କରାଯାଉଛି । କୋଇଡା ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ କରୁଛି ।
ବିଧାନସଭାର ବଜେଟ ଅଧିବେଶନ, ଆଜିଠୁ ୩ ଦିନ ଯାଏ ଗୃହରେ ସାଧାରଣ ଆଲୋଚନା
ଭୁବନେଶ୍ୱର: ୨୦୨୩-୨୪ ଆର୍ଥିକ ବର୍ଷ ପାଇଁ କୃଷି ଓ ସାଧାରଣ ବଜେଟ୍ ମିଶି ୨ ଲକ୍ଷ ୩୦ ହଜାର କୋଟି ଟଙ୍କାର ବ୍ୟୟ ଅଟକଳ ଦେଇଛନ୍ତି ସରକାର । ଆଜିଠାରୁ ୩ ଦିନ ବିଧାନସଭାରେ ବଜେଟ୍ ଉପରେ ସାଧାରଣ ଆଲୋଚନା ହେବ । ଏଥିପାଇଁ ଆଜି, ଆସନ୍ତାକାଲି ଓ ମାର୍ଚ୍ଚ ୧ ତାରିଖ ଧାର୍ଯ୍ୟ କରାଯାଇଛି । ଆଲୋଚନା ଶେଷରେ ଅର୍ଥମନ୍ତ୍ରୀ ନିରଞ୍ଜନ ପୂଜାରୀ ଉତ୍ତର ରଖିବେ । ଏହା ସହିତ ଦୁଇଦିନ ଛୁଟି ପରେ ବିଧାନସଭା ସ୍ବାଭାବିକ ହେବା ନେଇ ଆଶା କରାଯାଉଛି । ପ୍ରଶ୍ନକାଳରେ ଗୃହ, ଅର୍ଥ, ପୂର୍ତ୍ତ, ସ୍ବାସ୍ଥ୍ୟ ଓ ପରିବାର କଲ୍ୟାଣ, ଖଣି ଓ ଇସ୍ପାତ, ସଂସଦୀୟ ବ୍ୟାପାର, ସାଧାରଣ ପ୍ରଶାସନ ଓ ଅଭିଯୋଗ ବିଭାଗର ପ୍ରଶ୍ନୋତ୍ତର କାର୍ଯ୍ୟକ୍ରମ ରହିଛି । ସୋମବାର ଥିବାରୁ ଗୃହରେ ବିଜେପି ପକ୍ଷରୁ ମୁଲତବୀ ପ୍ରସ୍ତାବ ଦିଆଯାଇପାରେ ।