ଭୁବନେଶ୍ୱର: ମୁଖ୍ୟମନ୍ତ୍ରୀଙ୍କୁ ଭେଟିଲେ ଗ୍ରାମୀ ଆଓ୍ବାର୍ଡ ବିଜେତା ରିକି କେଜ୍ । ନବୀନ ନିବାସରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଭେଟିଛନ୍ତି ରିକି । ବିଶିଷ୍ଟ ସଙ୍ଗୀତକାର ତଥା ପରିବେଶବିତ ଡ. ରିକି କେଜ୍ ଙ୍କୁ ତୃତୀୟ ଥର ପାଇଁ ଗ୍ରାମୀ ଆଓ୍ବାର୍ଡ ମିଳିଛି । ସାକ୍ଷାତକାର ବେଳେ ରିକିଙ୍କୁ ଶୁଭେଚ୍ଛା ଜଣାଇଛନ୍ତୀ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । କିଛି ସମୟ ବାର୍ତ୍ତାଳାପ ହୋଇଥିବା ବେଳେ ରିକିଙ୍କୁ ହକି ଇଣ୍ଡିଆ ଜର୍ସି ଉପହାର ଦେଇଥିଲେ ସିଏମ । ସାକ୍ଷାତକାର ସମୟରେ ମୁଖ୍ୟମନ୍ତ୍ରୀଙ୍କ ମୁଖ୍ୟ ପରାମର୍ଶଦାତା ଆର୍ ବାଲକ୍ରିଷ୍ଣନ, କୃଷି ବିଭାଗ ପ୍ରମୁଖ ସଚିବ ଡ. ଅରବିନ୍ଦ ପାଢ଼ୀ, କୃଷି ନିର୍ଦ୍ଦେଶକ ଡ. ପ୍ରେମଚନ୍ଦ୍ର ଚୌଧୁରୀ, ବିଶିଷ୍ଟ ସିନେ ନିର୍ଦ୍ଦେଶକ ନୀଳମାଧବ ପଣ୍ଡା ପ୍ରମୁଖ ଉପସ୍ଥିତ ଥିଲେ ।
ଢେଙ୍କାନାଳ ମୁଖ୍ୟ ଚିକିତ୍ସାଳୟରେ ବିଷାକ୍ତ ସାପ ଛାଡ଼ି ରୋଗୀ ଛୁ’
ଢେଙ୍କାନାଳ: ହସ୍ପିଟାଲରେ ବିଷାକ୍ତ ସାପ ଛାଡି ରୋଗୀ ଛୁ । ଢେଙ୍କାନାଳ ମୁଖ୍ୟ ଚିକିତ୍ସାଳୟରେ ଏଭଳି ଘଟଣା ଦେଖିବାକୁ ମିଳିଛି । ହସ୍ପିଟାଲ ଓପିଡି ଆଗରେ ଏକପ୍ଲାଷ୍ଟିକ ଡବା ଭିତରେ ସାପଟିକୁ ଛାଡି ଜଣେ ରୋଗୀ ପଳାଇଥିବା ଜଣାପଡିଛି । ଜଣେ ସାପ କାମୁଡା ମହିଳା ରୋଗୀ ଚିକିତ୍ସା ପାଇଁ ହସ୍ପିଟାଲକୁ ଆସିଥିଲ, ସାଙ୍ଗରେ ସେ ସାପଟିକୁ ଏକ ପ୍ଲାଷ୍ଟିକ ଡବା ଭିତରେ ପୁରାଇ ନେଇ ଆସିଥିଲେ ।
ଚିକିତ୍ସା ପାଇଁ ହସ୍ପିଟାଲକୁ ଯାଇ ହଠାତ କୁଆଡେ ଗାୟବ ହୋଇ ଯାଇଥିଲେ । ବହୁ ସମୟ ଧରି ନଆସିବାରୁ ସାପକୁ ଦେଖିବାକୁ ଲୋକଙ୍କ ଭିଡ ଜମିଥିଲା । ତେବେ ସାପଟି ବିଶାକ୍ତ ବାଉଁଶ ନଡିଆବୋଡା ପ୍ରଜାତିର ବୋଲି ଜଣାପଡିଛି । ସ୍ନେକ ହେଲ୍ପ ଲାଇନ ଖବର ପାଇବା ପରେ ସାପଟିକୁ ଉଦ୍ଧାରକରି ମେଘା ସଂରକ୍ଷିତ ଜଙ୍ଗଲରେ ଛାଡି ଦେଇଛନ୍ତି ।
ଭଲ ଲାଗିଲାନି ସାଂସାରିକ ଜୀବନ; ସନ୍ନ୍ୟାସୀ ହୋଇଗଲେ ଦୁଇ ଯୁବକ
ଗଞ୍ଜାମ: ଭଲ ଲାଗିଲାନି ସାଂସାରିକ ଜୀବନ । ପୂର୍ବ ପୁରୁଷଙ୍କୁ ପିଣ୍ଡ ଦାନ କରି ସନ୍ନ୍ୟାସୀ ହୋଇଗଲେ ଦୁଇ ଯୁବକ । ଗଞ୍ଜାମ ଜିଲ୍ଲା ସାନଖେମୁଣ୍ଡି ବ୍ଲକ ବଢିଆଓସ୍ତା ଗାଁର ଶ୍ରୀକାନ୍ତ ଆଚାର୍ଯ୍ୟ ଓ ଛତ୍ରପୁର ନିକଟ ନାରାୟଣପୁର ଗାଁର ମହେନ୍ଦ୍ର ପଟ୍ଟନାୟକ ସାଂସାରିକ ଜୀବନକୁ ଜଳାଞ୍ଜଳି ଦେଇ ଆରମ୍ଭ କରିଛନ୍ତି ଆଧ୍ୟାତ୍ମିକ ଜୀବନ । ଶ୍ରୀକାନ୍ତ ପେସାରେ ଜଣେ ଶିକ୍ଷକ ଭାବେ କାମ କରୁଥିଲେ । ୨୦୦୧ ମସିହାରେ ସେ ସନ୍ୟାସୀ ଭାବେ ଦୀକ୍ଷା ଗ୍ରହଣ କରିଥିଲେ ।
ଗତ ଶିବରାତ୍ରୀରେ ଉଭୟ ଶ୍ରୀକାନ୍ତ ଓ ମହେନ୍ଦ୍ର ଉତ୍ତରାଖଣ୍ଡର ଋଷିକେଶଠାରେ ନିଜର ପୂର୍ବ ପୁରୁଷଙ୍କୁ ପିଣ୍ଡଦାନ କରି ସନ୍ନ୍ୟାସୀ ହୋଇଛନ୍ତି । ଗୃହ ତ୍ୟାଗ କରିବା ସହ ଉଭୟ ଭିକ୍ଷା ବୃତ୍ତି ଆପଣାଇଛନ୍ତି । ସନ୍ନ୍ୟାସୀ ହେବା ପରେ ଏବେ ଶ୍ରୀକାନ୍ତ ସ୍ବାମୀ ରାମାଦତ୍ତ।ନନ୍ଦ ସରସ୍ବତୀ ଓ ମହେନ୍ଦ୍ର ଗୁରୁ ଶରଣାନନ୍ଦ ସରସ୍ବତୀ ଭାବେ ପରିଚିତ ହେଉଛନ୍ତି । ଗାଁରେ ଉଭୟଙ୍କୁ ଲୋକ ଭବ୍ୟ ସ୍ବାଗତ କରିବା ସହ ପୂଜାର୍ଚ୍ଚନା କରିଛନ୍ତି ।
ବଲାଙ୍ଗୀର: ବରଯାତ୍ରୀଙ୍କ ଉପରେ ଚଢ଼ିଗଲା ବରଗାଡ଼ି, ଜଣେ ମୃତ
ବଲାଙ୍ଗୀର: ବଲାଙ୍ଗୀର ଜିଲ୍ଲା ଖପ୍ରାଖୋଲ ଥାନା ବାଘଝରନ ଗାଁରେ ଅଭାବନୀୟ ଘଟଣା I ବରଯାତ୍ରୀଙ୍କ ଉପରେ ଚଢିଗଲା ବରଗାଡ଼ି । କାର ଚଢିଯିବା ଫଳରେ ଜଣଙ୍କର ମୃତ୍ୟୁ ହୋଇଥିବାବେଳେ ୯ଜଣ ଆହତ ହୋଇଛନ୍ତି । ୨ ଗୁରୁତରଙ୍କୁ ବଲାଙ୍ଗୀର ବିବିଏମସିଏଚ୍ ହସପିଟାଲରେ ଭର୍ତ୍ତି କରାଯାଇଛି । ଗତକାଲି ବିଳମ୍ବିତ ରାତିରେ ହୁତାଶନ ବରିହାଙ୍କ ବିବାହ ପାଇଁ ବରଯାତ୍ରୀ ବାହାରିଥିଲେ ।
ଗାଁରେ ପୂଜାର୍ଚ୍ଚନା ପରେ ବାଜା ବାଣ ସହିତ ଶୋଭାଯାତ୍ରା ହେଉଥିଲା । ଏହି ସମୟରେ ହଠାତ ବର ବସିଥିବା କାରଟି ଲୋକଙ୍କ ଉପରେ ଚଢିଯାଇଥିଲା । ଗୁରୁତରଙ୍କୁ ତୁରନ୍ତ ଡାକ୍ତରଖାନାରେ ଭର୍ତ୍ତି କରାଯାଇଥିଲା । ଡାକ୍ତରଖାନାରେ ଜଣଙ୍କୁ ମୃତ ଘୋଷଣା କରିଥିଲେ ଡାକ୍ତର । ମୃତକ ହେଲେ ରାଜା ବରିହା । କାର ଡ୍ରାଇଭର ମଦ୍ୟପାନ କରି ଦୁର୍ଘଟଣା ଘଟାଇଥିବା ଅଭିଯୋଗ ହୋଇଛି । ଡ୍ରାଇଭର ଦୁର୍ଯ୍ୟୋଧନ ନାଗକୁ ଅଟକ ରଖି ତଦନ୍ତ କରୁଛି ପୋଲିସ ।
ଆମେରିକାକୁ ଇରାନର ଧମକ; ଟ୍ରମ୍ପଙ୍କୁ ମାରିବାକୁ କ୍ରୁଜ ମିସାଇଲ ପ୍ରସ୍ତୁତ ହୋଇଛି
ନୂଆଦିଲ୍ଲୀ: ଆମେରିକାର ପୂର୍ବତନ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କୁ ମାରିବାକୁ ଯୋଜନା କରୁଛି ଇରାନ । ଇରାନର ଟପ୍ କମାଣ୍ଡର ଟିଭି ସାକ୍ଷାତକାରରେ ଖୁଲମଖୁଲା ଆମେରିକାକୁ ଧମକ ଦେଇଛନ୍ତି । ଧମକ ଦେଇ କମାଣ୍ଡର କହିଛନ୍ତି ଯେ, ପୂର୍ବତନ ଆମେରିକୀୟ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କୁ ମାରିବା ପାଇଁ ଇରାନ ୧,୬୫୦ କିମି ମାରକ କ୍ଷମତା ଥିବା କ୍ରୁଜ ମିସାଇଲ ବିକଶିତ କରିଛି । ଖୁବଶୀଘ୍ର ସେ ନିଜ କମାଣ୍ଡରଙ୍କ ହତ୍ୟାର ପ୍ରତିଶୋଧ ନେବ । ଇରାନର ଶୀର୍ଷ କମାଣ୍ଡରଙ୍କ ଧମକ ପରେ ଆମେରିକା ସମେତ ପାଶ୍ଚାତ୍ୟ ଦେଶର ଚିନ୍ତା ବଢ଼ିଯାଇଛି କାରଣ ରୁଷ୍-ୟୁକ୍ରେନ ଯୁଦ୍ଧରେ ରୁଷ୍ ଇରାନର ଡ୍ରୋନ ସହାୟତାରେ କିଭ ଉପରେ ଲଗାତାର ବୋମାବର୍ଷଣ କରୁଛି ।
ଇରାନର ରିଭଲ୍ୟୁସନାରୀ ଗାର୍ଡସ ଏୟରୋସ୍ପେସ ଫୋର୍ସର ମୁଖିଆ ଅମିରାଲି ହାଜିଜାଦେହ କହିଛନ୍ତି ଯେ, ଇରାନ ଏକ ଶୀର୍ଷ କମାଣ୍ଡରଙ୍କ ହତ୍ୟାର ପ୍ରତିଶୋଧ ନେବା ପାଇଁ ପ୍ରସ୍ତୁତ ଅଛି । ଷ୍ଟେଟ ଟିଭି ଚ୍ୟାନେଲ ସହ ଆଲୋଚନା ବେଳେ ସେ କହିଛନ୍ତି, ଆମେ ପୂର୍ବତନ ଆମେରିକୀୟ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କୁ ମାରିବାକୁ ଚାହୁଁଛୁ । ହଜିଜାଦେହ ଆଗକୁ କହିଥିଲେ, ୧,୬୫୦ କିମିର ରେଞ୍ଜ ଥିବା ଆମର କ୍ରୁଜ ମିସାଇଲକୁ ଇସଲାମିକ ରିପବ୍ଲିକ ଅଫ୍ ଇରାନର ମିସାଇଲ ଶସ୍ତ୍ରଗାରରେ ଯୋଡ଼ାଯାଇଛି । ଇରାନ କେବେ ବି ନିର୍ଦ୍ଦୋଶ ସୈନିକଙ୍କୁ ମାରିବାର ଉଦ୍ଦେଶ୍ୟ ରଖିନଥାଏ ।
କିନ୍ତୁ ଯେତବେଳେ ଆମେରିକା ବଗଦାଦରେ ୨୦୨୦ରେ ଡ୍ରୋନ ଆକ୍ରମଣରେ ଇରାନୀ ସୈନ୍ୟ କମାଣ୍ଡର କାସିମ ସୁଲେମାନୀଙ୍କ ହତ୍ୟା କରିଥିଲା ତେବେ ପାଲଟା ଜବାବରେ ତାକୁ ଆମେରିକୀୟ ସେନା ଉପରେ ବାଲିଷ୍ଟିକ୍ ମିସାଇଲରେ ଆକ୍ରମଣ କରିବାକୁ ପଡ଼ିଥିଲା । ହାଜିଜାଦେହ କହିଥିଲେ ଯେ, ଇଶ୍ୱର ଯଦି ଚାହାନ୍ତି ତେବେ ଆମେ ଟ୍ରମ୍ପଙ୍କୁ ହତ୍ୟା କରିବୁ । ପୂର୍ବତନ ବିଦେଶ ମନ୍ତ୍ରୀ ମାଇକ ପମ୍ପିୟୋ ଏବଂ ସୁଲେମାନୀଙ୍କୁ ମାରିବା ପାଇଁ ଆଦେଶ ଦେଇଥିବା ସୈନ୍ୟ କମାଣ୍ଡରଙ୍କୁ ମାରିଦେବା ଜରୁରୀ । ଇରାନୀ ନେତାମାନେ ସୁଲେମାନୀଙ୍କ ପ୍ରତିଶୋଧ ନେବା ପାଇଁ ବଡ଼ ପଦକ୍ଷେପ ନେବାକୁ ପ୍ରତିଜ୍ଞା ନେଇଛନ୍ତି ବୋଲି କହିଛନ୍ତି ଟପ୍ କମାଣ୍ଡର ।
କେଳୁଚରଣ ପାର୍କ ନିକଟରୁ ମହିଳାଙ୍କ ଝୁଲନ୍ତା ମୃତଦେହ ଜବତ
ଭୁବନେଶ୍ୱର: ଭୁବନେଶ୍ବର କେଳୁଚରଣ ପାର୍କ ନିକଟରୁ ମହିଳାଙ୍କ ଝୁଲନ୍ତା ମୃତଦେହ ଜବତ । ଚନ୍ଦ୍ରଶେଖରପୁର ଡମଣାସ୍ଥିତ କେଳୁଚରଣ ପାର୍କ ନିକଟରୁ ମହିଳାଙ୍କ ମୃତଦେହ ଜବତ ହୋଇଛି । ଏକ ଆପାର୍ଟମେଣ୍ଟ ପଛପାଖେ ଥିବା ପାଇଖାନାରେ ଲୁହା ଶିକୁଳିରେ ମୃତଦେହ ଝୁଲୁଥିଲା । ମୃତକ ହେଲେ ଡମଣାର ଝିଲି ବେହେରା । ସେ ଦୁଇଦିନ ହେଲା ନିଖୋଜ ଥିଲେ ।
ନିଖୋଜ ଥିବାନେଇ ଚନ୍ଦ୍ରଶେଖରପୁର ଥାନାରେ ଏତଲା ଦେଇଥିଲେ ପରିବାର ଲୋକେ । ଝିଲିଙ୍କୁ କେହି ହତ୍ୟା କରି ଝୁଲାଇ ଦେଇଥିବା ପରିବାର ଲୋକ ଅଭିଯୋଗ କରିଛନ୍ତି । ଘଟଣାସ୍ଥଳରେ ମଞ୍ଚେଶ୍ବର ଥାନା ପୋଲିସ ପହଞ୍ଚି ତଦନ୍ତ ଆରମ୍ଭ କରିଛି । ପାରିପାର୍ଶ୍ବିକ ସ୍ଥିତିକୁ ଅନୁଧ୍ୟାନ କରାଯିବା ସହ ଆଖପାଖର ସିସିଟିଭି ଫୁଟେଜକୁ ଯାଞ୍ଚ କରୁଛି ପୋଲିସ ।
ମଧ୍ୟପ୍ରଦେଶର ସିଧିରେ ଭୟଙ୍କର ସଡ଼କ ଦୁର୍ଘଟଣା: ୩ଟି ବସକୁ ଧକ୍କା ଦେଲା ଟ୍ରକ୍, ୧୪ ମୃତ
ଭୋପାଳ: ମଧ୍ୟପ୍ରଦେଶର ସିଧିରେ ଚୁରହଟ-ରିବା ଜାତୀୟ ରାଜପଥରେ ଭୟଙ୍କର ସଡ଼କ ଦୁର୍ଘଟଣା ଘଟିଛି । ଗତକାଲି ରାତିରେ ହୋଇଥିବା ଏହି ମର୍ମନ୍ତୁଦ ଦୁର୍ଘଟଣାରେ ୧୪ ଜଣଙ୍କ ମୃତ୍ୟୁ ହୋଇଯାଇଛି । ୫୦ ଜଣ ଆହତ ହୋଇଛନ୍ତି । ଏଥିମଧ୍ୟରୁ ୧୦ ଜଣଙ୍କ ଅବସ୍ଥା ସଙ୍କଟାପନ୍ନ ରହିଛି । ମୃତକଙ୍କ ମଧ୍ୟରୁ ୮ ଜଣ ଘଟଣାସ୍ଥଳରେ ହିଁ ପ୍ରାଣ ହରାଇଥିଲେ, ଯେତବେଳେ କି ଅନ୍ୟମାନଙ୍କ ମୃତ୍ୟୁ ହସ୍ପିଟାଲରେ ହୋଇଛି । ଟ୍ରକ୍ ଟାୟାର ଫାଟିବା କାରଣରୁ ଏହି ଦୁର୍ଘଟଣା ଘଟିଥିବା କୁହାଯାଉଛି । ରାଜପଥ କଡ଼ରେ ଛିଡ଼ାଥିବା ୩ ବସକୁ ଧକ୍କା ଦେଇଥିଲା ଟ୍ରକ୍ ।
ଏପର୍ଯ୍ୟନ୍ତ ସୁଦ୍ଧା ୭ ମୃତକଙ୍କ ଚିହ୍ନଟ ହୋଇପାରିଛି । ଏହି ୩ ବସ୍ ସତନାରେ ଆୟୋଜିତ କୋଲ ସମାଜର ମହାକୁମ୍ଭରେ ସାମିଲ ହେବା ପରେ ସିଧିକୁ ଫେରୁଥିଲା । ଏହି କାର୍ଯ୍ୟକ୍ରମରେ କେନ୍ଦ୍ର ଗୃହମନ୍ତ୍ରୀ ଅମିତ ଶାହ ଏବଂ ମୁଖ୍ୟମନ୍ତ୍ରୀ ଶିବରାଜ ସିଂ ମଧ୍ୟ ସାମିଲ ହୋଇଥିଲେ । ମୁଖ୍ୟମନ୍ତ୍ରୀ ସିଧିରେ ଥିଲେ । ଏହି ସୂଚନା ମିଳିବା ପରେ ସେ ଘଟଣାସ୍ଥଳରେ ପହଞ୍ଚିଯାଇଥିଲେ । ଏଥିସହିତ ସେ ସ୍ଥିତିର ଅନୁଧ୍ୟାନ କରିଥିଲେ । ପ୍ରତ୍ୟକ୍ଷଦର୍ଶୀଙ୍କ କହିବା ଅନୁଯାୟୀ, ରାତି ୯ଟାରେ ମୋହନିୟା ଟନଲଠାରୁ କିଛି ବାଟ ଦୂରରେ ଏହି ଦୁର୍ଘଟଣା ଘଟିଛି ।
ଏଠାରେ ଦ୍ରୁତ ଗତିରେ ଆସୁଥିବା ଏକ ଟ୍ରକ୍ ତିନି ବସ୍ କୁ ଧକ୍କା ଦେଇଥିଲା । ୩ ବସ୍ ରାଜପଥରେ ଟିଫିନ କରିବା ପାଇଁ ଅଟକିଥିବା ସମୟରେ ଏହି ଦୁର୍ଘଟଣା ଘଟିଥିଲା । ଦୁଇଟି ବସ୍ ୧୦ ଫୁଟ ଗଭୀର ଖାଇକୁ ଖସିପଡ଼ିଥିଲା । ସେହିପରି ଏକ ବସ ରାଜପଥରେ ହିଁ ଓଲଟି ପଡ଼ିଥିଲା । ସିମେଣ୍ଟ ବୋଝେଇ ଟ୍ରକ୍ ଧକ୍କା ଦେବା ପରେ ପଲଟି ଯାଇଥିଲା । ମୁଖ୍ୟମନ୍ତ୍ରୀ ଶିବରାଜ ସିଂ ଚୌହ୍ୱାନ ମୃତକଙ୍କ ପରିବାରକୁ ୧୦ ଲକ୍ଷ ଲେଖାଏଁ, ଗୁରୁତର ଆହତଙ୍କୁ ୨ ଲକ୍ଷ ଲେଖାଏଁ ଟଙ୍କା ଏବଂ ସାଧାରଣ ଆହତଙ୍କୁ ୧ ଲକ୍ଷ ଲେଖାଏଁ ଟଙ୍କାର ଆର୍ଥିକ ସହାୟତା ଦେବା ପାଇଁ ଘୋଷଣା କରିଛନ୍ତି ।
ସରକାରୀ ବିଶ୍ୱ ବିଦ୍ୟାଳୟରେ ଆର୍ଟିଫିସିଆଲ୍ ଇଣ୍ଟେଲିଜେନ୍ସ ଉତ୍କର୍ଷ କେନ୍ଦ୍ର ଖୋଲିବାକୁ ପ୍ରସ୍ତାବ
ଭୁବନେଶ୍ୱର: ସରକାରୀ ବିଶ୍ବ ବିଦ୍ୟାଳୟରେ ଆର୍ଟିଫିସିଲ ଇଣ୍ଟେଲିଜେନ୍ସ ଓ ରୋବୋଟିକ୍ସ ଉତ୍କର୍ଷ କେନ୍ଦ୍ର ଖୋଲିବାକୁ ପ୍ରସ୍ତାବ । ଉଚ୍ଚ ଶିକ୍ଷା ବିଭାଗକୁ ପ୍ରସ୍ତାବ ଦେଇଛି IIT ଭୁବନେଶ୍ବର । ସ୍ନାତକ ଡିଗ୍ରୀଧାରୀ ଛାତ୍ରଛାତ୍ରୀଙ୍କୁ ଟ୍ରେନିଂ ମାଧ୍ୟମରେ ସ୍ୱାବଲମ୍ବୀ ଓ ରୋଜଗାରକ୍ଷମ କରିବା ମୂଳ ଲକ୍ଷ୍ୟ ବୋଲି ପ୍ରସ୍ତାବରେ ଉଲ୍ଲେଖ । IIT ଭୁବନେଶ୍ବରର ପ୍ରସ୍ତାବ ପରେ ରମାଦେବୀ ବିଶ୍ଵବିଦ୍ୟାଳୟ କୁଳପତିଙ୍କୁ ଚିଠି ଲେଖିଛି ଉଚ୍ଚ ଶିକ୍ଷା ବିଭାଗ । ରମାଦେବୀ କ୍ୟାମ୍ପସରେ ଉତ୍କର୍ଷ କେନ୍ଦ୍ର ଖୋଲିବା ନେଇ ବିଶ୍ବବିଦ୍ୟାଳୟ କର୍ତ୍ତୃପକ୍ଷ ମତ ରଖିବାକୁ ଚିଠି ଉଲ୍ଲେଖ ରହିଛି ।
ବଢୁଛି ତାପମାତ୍ରା, ସ୍ବାଭାବିକ ଠାରୁ ୪ରୁ ୬ଡିଗ୍ରୀ ଉପରେ ପାରଦ
ଭୁବନେଶ୍ୱର: ବଢୁଛି ତାପମାତ୍ରା, ସ୍ବାଭାବିକ ଠାରୁ ୪ରୁ ୬ଡିଗ୍ରୀ ଉପରେ ପାରଦ । ଦିନ ଯେତେ ଶୀଘ୍ର ତାତୁଛି ରାତି ସେତେ ଶୀଘ୍ର ଥଣ୍ଡା ହେଉଛି । ରାଜ୍ୟରେ ସୃଷ୍ଟି ହୋଇଥିବା ଗୁରୁଚାପ ବଳୟ ପ୍ରଭାବରେ ଜଳୀୟବାଷ୍ପ ପୂର୍ଣ୍ଣ ବାୟୁ ପ୍ରବାହ ହେଉଥିବାରୁ ଏଭଳି ସ୍ଥିତି ସୃଷ୍ଟି ହୋଇଛି । ଦିନ ତମାମ ତାତି ଏବଂ ରାତିରୁ ଭୋର ପର୍ଯ୍ୟନ୍ତ ଘନ କୁହୁଡି ଅନୁଭୁତ ହେଉଛି । ଆସନ୍ତା ୩ ଦିନ ପର୍ଯ୍ୟନ୍ତ ରାଜ୍ୟରେ ଏଭଳି ପାଗ ଜାରି ରହିବ ବୋଲି ପୂର୍ବାନୁମାନ କରିଛି ଆଞ୍ଚଳିକ ପାଣିପାଗ କେନ୍ଦ୍ର । ଉପକୂଳ ଓଡ଼ିଶାର ବିଭିନ୍ନ ସ୍ଥାନରେ ଝାଞ୍ଜି ପବନ ବହୁଛି ।
ଆସନ୍ତା ୪ ଦିନ ପର୍ଯ୍ୟନ୍ତ ପାଗରେ କୌଣସି ପରିବର୍ତ୍ତନ ସମ୍ଭାବନା ନଥିବାରୁ ଭୁବନେଶ୍ବର ସମେତ ମାଲକାନିଗିରି, ସୋନପୁର, ଝାରସୁଗୁଡା, ବୌଦ୍ଧ, ତାଳଚେର, ଅନୁଗୁଳ ଏବଂ ନୟାଗଡରେ ସ୍ବାଭାବିକ ଠାରୁ ୬ଡିଗ୍ରୀ ପର୍ଯ୍ୟନ୍ତ ଅଧିକ ରହିବ ତାପମାତ୍ରା। ଅନ୍ୟପଟେ ଜଳୀୟବାଷ୍ପପୂର୍ଣ୍ଣ ବାୟୁ ପ୍ରବାହ ପାଇଁ କିଛି ସ୍ଥାନରେ ଘନ କୁହୁଡି ଦେଖିବାକୁ ମିଳିଛି। ଆସନ୍ତା ୨ ଦିନ ଯାଏଁ ଉପକୂଳ ଏବଂ ଉତ୍ତର ଓଡ଼ିଶାରେ ଘନକୁହୁଡି ଅନୁଭୁତ ହେବ ।
ଗୋରୁ ବୋଝେଇ କଣ୍ଟେନରକୁ ଅଟକାଇବାରୁ ପୋଲିସ ଉପରକୁ ମାଫିଆଙ୍କ ଆକ୍ରମଣ
ଆଠଗଡ଼: ପୋଲିସକୁ ଗୋରୁ ମାଫିଆଙ୍କ ଆକ୍ରମଣ । ଆଠଗଡ଼ ତିଗିରିଆ ଥାନା ଗୋପୀନାଥପୁର ଶାସନ ଛକରେ ଘଟିଛି ଘଟଣା । ଗତ ବିଳମ୍ବିତ ରାତିରେ ତିଗିରିଆ ପୋଲିସ ପାଟ୍ରୋଲିଂ କରୁଥିବା ସମୟରେ ଏକ ଗୋରୁ ବୋଝେଇ କଣ୍ଟେନରକୁ ଅଟକାଇବା ପାଇଁ ଚେଷ୍ଟା କରିବାରୁ ଗୋରୁ ଚୋରା ଚାଲାଣ କରୁଥିବା ମାଫିଆ ମାନେ ପୋଲିସ ଉପରକୁ ଅତର୍କିତ ଆକ୍ରମଣ କରିଥିଲେ । ଆକ୍ରମଣରେ ତିଗିରିଆ ଥାନା ଅଧିକାରୀ ସୁଚିତ୍ରା ଜେନା, ଏସ୍ ଆଇ ସନ୍ତୋଷ ପ୍ରଧାନଙ୍କ ସହ ଲକ୍ଷ୍ମୀଧର ବେହେରା ଗୁରୁତର ଆହତ ହୋଇଛନ୍ତି । ଆକ୍ରମଣ କରି ଗୋରୁ ମାଫିଆ ମାନେ ଫେରାର ଥିବା ଜଣାପଡିଛି । ସେପଟେ ଆହତ ମାନେ ତିଗିରିଆ ଡ଼ାକ୍ତରଖାନାରେ ଚିକିତ୍ସିତ ହେଉଛନ୍ତି ।