ଭୁବନେଶ୍ୱର: ଭୁବନେଶ୍ବର ଇନଫୋଭ୍ୟାଲି ପୋଲିସ କବଜାରେ ହାଇଓ୍ବେ ଲୁଟେରା ଗ୍ୟାଙ୍ଗ । ଲଙ୍କା ଗୁଣ୍ଡ ପିଙ୍ଗି ରାଜରାସ୍ତାରେ କରୁଥିଲେ ଲୁଟ୍ । ଖଣ୍ଡାରେ ଗୋଡାଇ ଗୋଡ଼ାଇ ହାଣୁଥିଲେ ଅଭିଯୁକ୍ତ । ଏଭଲି ହାଇପ୍ରୋଫାଇଲ ଗ୍ୟାଙ୍ଗର ୫ଜଣଙ୍କୁ ଗିରଫ କରିଛି ପୋଲିସ । ସେମାନଙ୍କଠାରୁ ୨ଟି ବାଇକ, ଖଣ୍ଡା, ଲୁହାରଡ, ଲଙ୍କାଗୁଣ୍ଡ ଓ ମଦ ଜବତ ହୋଇଛି । ବିଳମ୍ବିତ ରାତିରେ ଅଭିଯୁକ୍ତମାନେ ଟ୍ରକକୁ କରୁଥିଲେ ଟାର୍ଗେଟ । ଗିରଫ ଅଭିଯୁକ୍ତଙ୍କ ଘର ଖୋର୍ଦ୍ଧା ଅଞ୍ଚଳରେ ବୋଲି ଜଣାପଡ଼ିଛି । ସେମାନଙ୍କ ନାଁରେ ବିଭିନ୍ନ ଥାନାରେ ୫୦ରୁ ଅଧିକ ମାମଲା ରହିଛି ।
ପରୀକ୍ଷାରେ ନମ୍ବର ବଢାଇ ଦେବାକୁ କହି ଛାତ୍ରଛାତ୍ରୀଙ୍କୁ ଠକୁଥିଲା ଠକ, ବାନ୍ଧିଲା ପୋଲିସ
ବାଲେଶ୍ୱର: ପରୀକ୍ଷାରେ ନମ୍ବର ବଢାଇ ଦେବି କହି ଠକୁଥିଲା । ଧରା ପଡିବା ପରେ ଜେଲ ଗଲା । ବାଲେଶ୍ବରରେ 3ଶହ ଛାତ୍ରଛାତ୍ରୀଙ୍କୁ ନମ୍ବର ବଢାଇଦେବାକୁ କହି ଠକିଥିଲା ଠକ ପ୍ରଦୀପ ଦାସ । ଏନେଇ ଥାନରେ ଅଭିଯୋଗ ପରେ ପ୍ରଦୀପକୁ ଗିରଫ କରିଛି ପୋଲିସ । ପ୍ରଦୀପ ଠାରୁ ଏକ ଦାମି କାର୍ ସହିତ 9 ଲକ୍ଷ ଟଙ୍କାର ସୁନା ଅଳଙ୍କାର, 57 ହଜାର ନଗଦ ଟଙ୍କା, ଦାମି ମୋବାଇଲ ଓ ବିଭିନ୍ନ ବ୍ୟାଙ୍କର ଏଟିଏମ୍ କାର୍ଡ଼ ଜବତ କରାଯାଇଛି ।
ଠକ ପ୍ରଦୀପ ପରୀକ୍ଷା ଦେଉଥିବା ଛାତ୍ରଛାତ୍ରୀଙ୍କ ଅଭିଭାବକଙ୍କ ସହିତ ଯୋଗାଯେଗ କରି ନିଜକୁ ଶିକ୍ଷା ବିଭାଗର ଜଣେ ବରିଷ୍ଠ ଅଧିକାରୀ ବୋଲି ପରିଚୟ ଦେଉଥିଲା । ପରେ ଛାତ୍ରଛାତ୍ରୀଙ୍କର ନମ୍ବର ବଢାଇଦେବାକୁ କହି ଜଣକ ପିଛା 1 ହଜାର ଟଙ୍କାରୁ 10 ହଜାର ଟଙ୍କା ପର୍ଯ୍ୟନ୍ତ ଆଦାୟ କରୁଥିଲା । ବାଲେଶ୍ବର ଓ ଭଦ୍ରକ ଜିଲ୍ଲାରୁ ପ୍ରାୟ 3ଶହ ଛାତ୍ରଛାତ୍ରୀଙ୍କ ଠାରୁ 15 ଲକ୍ଷରୁ ଅଧିକ ଟଙ୍କା ଠକି ନେଇଥିବା ଜଣାପଡ଼ିଥିଲା । ପୋଲିସ ଘଟଣାର ତଦନ୍ତକରି ପ୍ରଦୀପକୁ ଗିରଫ କରିବାରେ ସଫଳ ହୋଇଛି ।
ପୁସ୍ତକ ଲେଖା, ଦୈନନ୍ଦିନ ଜୀବନ, ପ୍ରେରଣା ସମ୍ବନ୍ଧରେ ବର୍ଣ୍ଣନା କଲେ ଲେଖିକା ଗାୟତ୍ରୀବାଳା ପଣ୍ଡା
ନୂଆଦିଲ୍ଲୀ: ନୂଆଦିଲ୍ଲୀରେ କେନ୍ଦ୍ର ସାହିତ୍ୟ ଏକାଡେମୀର ଫେଷ୍ଟିଭାଲ ଅଫ ଲେଟର ବା ସାହିତ୍ୟ ଉତ୍ସବର ତୃତୀୟ ଦିନରେ ୫ଜଣ ଏକାଡେମୀ ପୁରସ୍କାର ବିଜେତାଙ୍କୁ ନେଇ ଫେସ୍ ଟୁ ଫେସ୍ କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି । ପୁସ୍ତକ ଲେଖା, ଦୈନନ୍ଦିନ ଜୀବନ, ପ୍ରେରଣା ସମ୍ବନ୍ଧରେ ଦୀର୍ଘ ୪୫ ମିନିଟ ଧରି ବିଜେତାମାନେ ବର୍ଣ୍ଣନା କରିଥିଲେ । ଓଡ଼ିଶାରୁ କେନ୍ଦ୍ର ସାହିତ୍ୟ ଏକାଡେମୀ ସମ୍ମାନ ପ୍ରାପ୍ତ ପ୍ରଖ୍ୟାତ କବି ଡକ୍ଟର ଗାୟତ୍ରୀବାଳା ପଣ୍ଡାଙ୍କ ସହ ଅନୁବାଦକ ରାଜେନ୍ଦ୍ର ପ୍ରସାଦ ମିଶ୍ର ସିଧାସଳଖ ଆଲୋଚନା କରିଥିଲେ ।
ଏହି ଅବସରରେ ନିଜର କବିତା ସଂକଳନକୁ ନେଇ ପଚରାଯାଇଥିବା ପ୍ରଶ୍ନର ଉତ୍ତର ଦେଇଥିଲେ ଲେଖିକା ଗାୟତ୍ରୀବାଳା ପଣ୍ଡା । ଶ୍ରୀମତି ପଣ୍ଡା କହିଥିଲେ, ଏହି ଦୟାନଦୀ କବିତା ମାଧ୍ୟମରେ ଶାନ୍ତି ମୈତ୍ରୀ ଓ ମାନବିକତାର ବାର୍ତ୍ତା ଦେବାକୁ ଚେଷ୍ଟା କରିଛି । ଯୁଦ୍ଧ ସବୁବେଳେ ବିନାଶ କରେ ଆଉ ଶାନ୍ତି ପ୍ରଗତି ଦେଇଥାଏ । ଇତିହାସକୁ କବିତାରେ ରୂପାନ୍ତର କରି ସାମଜକୁ ସଚେତନ କରାଇବାର କାର୍ଯ୍ୟ କରିଥିବାରୁ ଶ୍ରୀମତି ପଣ୍ଡାଙ୍କୁ ରାଜେନ୍ଦ୍ର ମିଶ୍ର ପ୍ରଶଂସା କରିଥିଲେ । ତେବେ କବିତା ସଂକଳନ ଦୟାନଦୀ ପାଇଁ ଏହି ମର୍ଯ୍ୟାଦାଜନକ ପୁରସ୍କାର ପାଇଛନ୍ତି ଗାୟତ୍ରୀବାଳା ।
କଳିଙ୍ଗ ଯୁଦ୍ଧ ଉପରେ ୬୪ଟି କବିତା ପୁସ୍ତକରେ ସ୍ଥାନ ପାଇଛି । ୨୦୧୭ ମସିହାରେ ଏହି ପୁସ୍ତକ ପକ୍ଷୀଘର ପ୍ରକାଶନ ଦ୍ବାରା ପ୍ରକାଶିତ ହୋଇଥିଲା । ଏହା ପୂର୍ବରୁ ୨୦୧୧ ରେ କବିତା ସଂକଳନ ଗାଆଁ ପାଇଁ କେନ୍ଦ୍ର ସାହିତ୍ୟ ଏକାଡେମୀ ଯୁବ ପୁରସ୍କାର ପାଇଥିଲେ ଗାୟତ୍ରୀବାଳା । କେନ୍ଦ୍ର ସାହିତ୍ୟ ଏକାଡେମୀରୁ ୨ ଥର ପୁରସ୍କୃତ ହେବାରେ ସେ ପ୍ରଥମ ଓଡ଼ିଆ କବି । ସାହିତ୍ୟ ଏକାଡେମୀର ଏଭଳି ଅଭିନବ ପ୍ରୟାସକୁ ସମସ୍ତେ ପ୍ରଶଂସା କରିଛନ୍ତି । ଆସନ୍ତା ୧୬ତାରିଖ ପର୍ଯ୍ୟନ୍ତ କେନ୍ଦ୍ର ସାହିତ୍ୟ ଏକାଡେମୀର ଫେଷ୍ଟିଭାଲ ଅଫ ଲେଟର ବା ସାହିତ୍ୟ ଉତ୍ସବ ଚାଲିବ ।
କାହିଁକି ଜଙ୍ଗଲରେ ଲାଗୁଛି ନିଆଁ ? ଏମିତି କହିଲେ ପିସିସିଏଫ
ଭୁବନେଶ୍ୱର: ଜଙ୍ଗଲି ଜନ୍ତୁ ଶିକାର ଲୋଭରେ ଜଙ୍ଗଲରେ ନିଆଁ ଲଗାଉଛନ୍ତି ଶିକାରୀ। ଗତକାଲି ନିଆଁ ଲଗାଇବା ବେଳେ କନ୍ଧମାଳ ଜିଲ୍ଲାରୁ ଜଣେ ଶିକାରୀ ଧରାପଡିଛି। ପ୍ରାୟ ସବୁ ନିଆଁ ମନୁଷ୍ୟକୃତ ହୋଇଥିବାରୁ ସଚେତନତା କରାଯାଉଛି ବୋଲି କହିଛନ୍ତି ପିସିସିଏଫ ଦେବୀଦତ୍ତ ବିଶ୍ୱାଳ। ନିଆଁ ଲାଗିଲେ ବନ କର୍ମଚାରୀଙ୍କ ମୋବାଇଲକୁ ମେସେଜ ଆସୁଛି।
ନିଆଁ ଲିଭା ଯିବା ପରେ ଫଟୋ ଉଠାଇ ଅପଲୋଡ଼ କରାଯାଉଛି। ନିଆଁ ଲଗାଉଥିବା ବେଳେ ଧରା ପଡିଲେ ମାମଲା ରୁଜୁ କରାଯିବା ସହ ଆକ୍ସନ ନିଆଯିବ ବୋଲି ସତର୍କ କରାଇ ଦିଆଯାଇଛି। ନିଆଁ ଲାଗିବା ନେଇ ଖବର ଦେଲେ ୫ ହଜାରରୁ ୧୦ ହଜାର ପର୍ଯ୍ୟନ୍ତ ପୁରସ୍କାର ବ୍ୟବସ୍ଥା ମଧ୍ୟ କରାଯାଇଛି। ଜଙ୍ଗଲୀ ଜନ୍ତୁ ମାଡି ଆସିବା ନେଇ ଆଲର୍ଟରେ ରହିଛି ବନ ବିଭାଗ। ଯେଉଁଠିକି ଜନ୍ତୁ ଆସୁଛନ୍ତି ବନ କର୍ମଚାରୀଙ୍କୁ ତୁରନ୍ତ ଜଣାନ୍ତୁ ବୋଲି କୁହାଯାଇଛି।
ଆଜି ୧୨୦୦ ପଏଣ୍ଟରେ ନିଆଁ ଲାଗିଛି ଏହା ବଢ଼ିକି ୧୫୦୦ ହୋଇପାରେ। ମାର୍ଚ୍ଚ ୧୨ ତାରିଖ ସୁଦ୍ଧା ୯୭ ପ୍ରତିଶତରୁ ଅଧିକ ରେସପନ୍ସ ମିଳିଛି। ଭୁବନେଶ୍ବର ଶିଖରଚଣ୍ଡୀରେ ଲାଗିଥିବା ନିଆଁ ଆୟତ୍ତ ହୋଇ ସାରିଛି। ଜଙ୍ଗଲରୁ ଚାଲି ଆସିଥିବା ହାତୀକୁ ମଧ୍ୟ ଘଉଡ଼ାଇ ଦିଆଯାଇଛି ବୋଲି ଜଣାଇଛନ୍ତି ପିସିସିଏଫ ଦେବୀଦତ୍ତ ବିଶ୍ୱାଳ ।
ଯନ୍ତ୍ରଣାରେ ଛଟପଟ ହେଉଥିଲା ବୁଲା କୁକୁର, ଚିକିତ୍ସା କରାଇଲେ IT ସଚିବ
ଭୁବନେଶ୍ୱର: ରାଜ୍ୟ ଆଇଟି ସଚିବ ମନୋଜ ମିଶ୍ରଙ୍କ ମହାନତା । ବୁଝିଲେ କୁକୁରର ଯନ୍ତ୍ରଣା, କରାଇଲେ ଚିକିତ୍ସା ବ୍ୟବସ୍ଥା । ଗତକାଲିଠାରୁ ଏକ ବୁଲା କୁକୁର ଗୋଡ଼ ଭାଙ୍ଗି ଯାଇଥିବା ବେଳେ କୁକୁରଟି ଉତ୍କଳ ବିଶ୍ଵବିଦ୍ୟାଳୟର ଫକୀର ମୋହନ ଛାତ୍ରାବାସ ନିକଟରେ ପଡ଼ିରହିଥିଲା । ଛାତ୍ରମାନେ ଖାଇବାକୁ ଦେଲେ ବି ନଖାଇ ଆଖିରୁ ଲୁହ ଗଡାଉଥିଲା ।
ପରେ ଦେବବ୍ରତ ସାହୁ ନାମକ ଛାତ୍ର ଟୁଇଟ ଯୋଗେ ଏକଥା ଜଣାଇଥିଲେ । ଏ ଟୁଇଟ ଆଇଟି ସଚିବ ମନୋଜ ମିଶ୍ରଙ୍କ ନଜରରେ ପଡ଼ିଥିଲା । ସେ ତୁରନ୍ତ ବିଭାଗୀୟ ଟିମକୁ ପଠାଇ କୁକୁରକୁ ଉଦ୍ଧାର କରି ଚିକିତ୍ସା ବ୍ୟବସ୍ଥା କରିଥିଲେ । ଏଥିପାଇଁ ମନୋଜ ମିଶ୍ରଙ୍କୁ ବିଭିନ୍ନ ମହଲରୁ ପ୍ରଶଂସା କରାଯାଉଛି ।
Very prompt and professional response by Secy @farddept Sri Suresh Vashishth sir. Thank you.
— Manoj Mishra ମନୋଜ ମିଶ୍ର (@manojmishrasays) March 13, 2023
ଆକ୍ସନ ମୋଡରେ ବଲାଙ୍ଗୀର ପୋଲିସ, ୧୨ ହଜାରରୁ ଅଧିକ କଫ ସିରପ୍ ବୋତଲ ଜବତ
ବଲାଙ୍ଗୀର: ବର୍ତ୍ତିବେନି କଫ ସିରପ ମାଫିଆ ଓ ବ୍ୟବସାୟୀ। ଆକ୍ସନ ମୋଡରେ ବଲାଙ୍ଗୀର ପୋଲିସI ୧୨ ହଜାରରୁ ଅଧିକ କଫ ସିରପ୍ ବୋତଲ ସହ ଦାମୀ ଗାଡ଼ି ଜବତ କରିଛି ପୋଲିସ I ଘଟଣାରେ ରାଜ୍ୟ ତଥା ରାଜ୍ୟ ବାହାରୁ ୪ ମହିଳାଙ୍କ ସମେତ ୩୭ ବ୍ୟବସାୟୀ ଓ ମାଫିଆଙ୍କୁ ଗିରଫ କରିଛି ପୋଲିସ।
୪୦ ଲକ୍ଷ ଟଙ୍କାର କଫ ସିରପ, ୪ଟି ଦାମୀ ଗାଡ଼ି, ୭ଟି ବାଇକ, ୨୭ଟି ମୋବାଇଲ, ଗୋଟିଏ ବନ୍ଧୁକ ଓ କିଛି ସୁନା ଜବତ କରିଛି ପୋଲିସ। କଫ ସିରପ ଯୋଗାଉଥିବା କୋଲକାତାର ଡେଫୋଡିଲ ପ୍ରାଇଭେଟ ଲିମିଟେଡ କମ୍ପାନୀର ୨ କୋଟି ଟଙ୍କା ଥିବା ଆକଉଣ୍ଟକୁ ଫ୍ରିଜ କରିଛି ବଲାଙ୍ଗୀର ପୋଲିସ।
ଖୁବଶୀଘ୍ର କମ୍ପାନୀର ନିର୍ଦ୍ଦେଶକଙ୍କ ଉପରେ କାର୍ଯ୍ୟାନୁଷ୍ଠାନ ପାଇଁ ପ୍ରକ୍ରିୟା ଆରମ୍ଭ କରାଯିବ। ଏହାସହ ପୂରା ନେଟଓ୍ବର୍କକୁ ଧରିବା ପାଇଁ ପ୍ରକ୍ରିୟା ଜାରି ରହିବ ବୋଲି କହିଛନ୍ତି ବଲାଙ୍ଗୀର ଏସପି। ଆଗକୁ ଗିରଫଦାରୀଙ୍କ ସଂଖ୍ୟା ମଧ୍ୟ ବଢିବାର ସମ୍ଭାବନା ରହିଛି। କୋଲକତା, ହରିୟାଣା, ହିମାଚଳ ପ୍ରଦେଶରୁ କଟକ, ବଲାଙ୍ଗୀର ଓ ବରଗଡ଼ ଆଦି ଜିଲ୍ଲାକୁ ଏହି କଫସିରପ ମାଫିଆଙ୍କ ଚେର ଲମ୍ବିଥିଲା ବୋଲି ଏସପି କହିଛନ୍ତ ।
ବିଶ୍ବ ଟେଷ୍ଟ ଚାମ୍ପିଅନସିପ ଫାଇନାଲରେ ଟିମ୍ ଇଣ୍ଡିଆ
ନୂଆଦିଲ୍ଲୀ: ନୂଆ ଇତିହାସ ରଚିଛି ଟିମ ଇଣ୍ଡିଆ। ଲଗାତର ଦ୍ବିତୀୟ ଥର ଲାଗି ବିଶ୍ବ ଟେଷ୍ଟ ଚାମ୍ପିଅନସିପ ଫାଇନାଲରେ ପ୍ରବେଶ କରିଛି ଟିମ ଇଣ୍ଡିଆ । ନ୍ୟୁଜିଲାଣ୍ଡଠାରୁ ଶ୍ରୀଲଙ୍କାର ପରାଜୟ ପରେ ଭାରତକୁ ଫାଇନାଲ ଖେଳିବାକୁ ଟିକେଟ ମିଳିଛି । ଫାଇନାଲରେ ଅଷ୍ଟ୍ରେଲିଆ ସହ ମୁକାବିଲା କରିବ ଟିମ ଇଣ୍ଡିଆ ।
ଏହି ଫାଇନାଲ ଟେଷ୍ଟ ମ୍ୟାଚ ଜୁନ ୭ରୁ ୧୧ ମଧ୍ୟରେ ଲଣ୍ଡନର ଓଭାଲ ଗ୍ରାଉଣ୍ଡରେ ଖେଳାଯିବ। କିଛି ସମସ୍ୟା ଉପୁଜିଲେ ଏଥିପାଇଁ ୧୨ ତାରିଖକୁ ରିଜର୍ଭ ଡେ ରଖାଯାଇଛି। ଗତଥର ଫାଇନାଲରେ ନ୍ୟୁଜିଲାଣ୍ଡ ଭାରତକୁ ପରାସ୍ତ କରି ଚାମ୍ପିଅନ ହୋଇଥିଲା। ଏବେ ଭାରତରେ ଖେଳାଯାଉଥିବା ବର୍ଡର-ଗାଭାସ୍କର ଟ୍ରଫିର ତୃତୀୟ ଟେଷ୍ଟ ମ୍ୟାଚ ହାରିବା ପରେ ଫାଇନାଲ ଖେଳିବା ନେଇ ଆଶଂକା ସୃଷ୍ଟି ହୋଇଥିଲା । କିନ୍ତୁ ଇନ୍ଦୋର ମ୍ୟାଚ ଜିତି ଅଷ୍ଟ୍ରେଲିଆ ଫାଇନାଲ ଟିକେଟ ପାଇଥିଲା। ଏବେ ଅହମ୍ମଦାବାଦରେ ୪ର୍ଥ ଟେଷ୍ଟ ଖେଳାଯାଉଛି । ଯେଉଁଥିରେ ଭାରତର ପଲ୍ଲା ଭାରି ରହିଛି।
ବଢ଼ିବାରେ ଲାଗିଛି H3N2 ଭାଇରସ ଚିନ୍ତା, ସତର୍କ ରହିବାକୁ ପରାମର୍ଶ
ଭୁବନେଶ୍ୱର: ଚିନ୍ତା ବଢ଼ାଇଲା H3N2 ଭାଇରସ। ସବୁ ଜିଲ୍ଲାର ସିଡିଏମଓ ଓ କ୍ୟାପିଟାଲ ହସ୍ପିଟାଲ ନିର୍ଦ୍ଦେଶକଙ୍କୁ ଆଲର୍ଟ ରହିବାକୁ ଚିଠି ଲେଖିଲା ଜନସ୍ୱାସ୍ଥ୍ୟ ବିଭାଗ । ଭାଇରସ ସଂକ୍ରମଣ ଭିତରେ ପୁଣି ଘାରିଲା କୋଭିଡ ଭୟ। ଥଣ୍ଡା କାଶ ଥିଲେ କୋଭିଡ଼ ଟେଷ୍ଟ କରିବାକୁ ପରାମର୍ଶ ଦେଇଛି ସ୍ବାସ୍ଥ୍ୟ ବିଭାଗ ।
ସର୍ଭିଲାନ୍ସ ବଢାଇବା ସହ ଅକ୍ସିଜେନ ଓ ଆଇସିୟୁ ପ୍ରସ୍ତୁତ ରଖିବାକୁ ନିର୍ଦେଶ ଦିଆଯାଇଛି । ଇଂଫ୍ଲୁଏଞ୍ଜାର ନାହିଁ ନିର୍ଦ୍ଧିଷ୍ଟ ଚିକିତ୍ସା । ଜର କାଶ କିଛି ଦିନ ରହିବ, ତାପରେ ଆପେ ଭଲ ହୋଇପାରେ । ଗୁରୁତର ହୋଇ ନିମୋନିଆରେ ସଂକ୍ରମଣ ହୋଇପାରନ୍ତି କିଡ଼ନୀ, ହାର୍ଟ ଓ଼ ସ୍ୱାଶ୍ୱ ରୋଗୀ । ତେଣୁ ଲକ୍ଷଣ ଥିଲେ ନିଜକୁ ଆଇସୋଲେଟ କରିବା ସହ ମାସ୍କ ପିନ୍ଧିବା ଓ ହାତ ଧୋଇବାକୁ କହିଛନ୍ତି ଜନ ସ୍ୱାସ୍ଥ୍ୟ ନିର୍ଦ୍ଦେଶକ ନିରଞ୍ଜନ ମିଶ୍ର। ରୋଗ ଭଲ ନହେଲେ ଡାକ୍ତରଙ୍କ ପରାମର୍ଶ ନେଇ ମେଡିକାଲରେ ଆଡମିଟ ହେବାକୁ ଦେଇଛନ୍ତି ପରାମର୍ଶ ।
୭୧ ହଜାରରୁ ଉର୍ଦ୍ଧ୍ୱ ଛାତ୍ରଛାତ୍ରୀଙ୍କୁ ଦିଆଯିବ ମେଧାବୃତ୍ତି, ପୁରସ୍କୃତ ହେବେ ଶିକ୍ଷକ
ଭୁବନେଶ୍ୱର: ୨୦୨୩-୨୪ରେ ଶିକ୍ଷା ବିଭାଗକୁ ୨୨ ହଜାର କୋଟି ଟଙ୍କା ମଞ୍ଜୁର ହୋଇଛି। ଯାହାକି ଗତବର୍ଷ ତୁଳନାରେ ୫ ପ୍ରତିଶତ ଅଧିକ ରହିଛି । ଏନେଇ ପ୍ରେସମିଟ୍ କରି ସୂଚନା ଦେଇଛି ଗଣଶିକ୍ଷା ବିଭାଗ । ଗଣ ଶିକ୍ଷା ବିଭାଗରେ ୫୧ ହଜାର ୫୩୫ଟି ପଦବୀ ସୃଷ୍ଟି ହୋଇଛି ।
୫ ଜିଲ୍ଲାର ୨୨୧ ବହୁଭାଷୀ ଶିକ୍ଷକଙ୍କ ଦରମା ୫ହଜାର ୩୭୯କୁ ବୃଦ୍ଧି ପାଇଛି । ୧୯୨୦ ପ୍ରଶିକ୍ଷକ ଓ ପ୍ରଶିକ୍ଷକାଙ୍କ ମାସିକ ପାରିତୋଷିକ ବଢ଼ାଯାଇଛି । ଓଡ଼ିଶା ଆଦର୍ଶ ବିଦ୍ୟାଳୟରେ ୨୩୭ ଛାତ୍ରାବାସ ପ୍ରତିଷ୍ଠା ପାଇଁ ଅର୍ଥ ମଂଜୁର ହୋଇଛି । ମୁଖ୍ୟମନ୍ତ୍ରୀ ଶିକ୍ଷା ପୁରସ୍କାର ପାଇଁ ୧୩୯ କୋଟି ଟଙ୍କା ଦିଆଯାଇଛି ।
୭୧ ହଜାର ୬୧୮ ଛାତ୍ରଛାତ୍ରୀଙ୍କୁ ଦିଆଯିବ ମେଧାବୃତ୍ତି । ଶିକ୍ଷକ ଓ ଶିକ୍ଷୟିତ୍ରୀଙ୍କ ସହ ସ୍କୁଲକୁ ମଧ୍ୟ ପୁରସ୍କୃତ କରାଯିବ । ଗ୍ରାମ ପଞ୍ଚାୟତ, ଏସଏଚଜିଙ୍କୁ ମଧ୍ୟ ପୁରସ୍କୃତ କରାଯିବ । ଛାତ୍ରଛାତ୍ରୀଙ୍କୁ ସାଇକେଲ ପାଇଁ ଦିଆଯିବ ସାଢ଼େ ୩ ହଜାର ଟଙ୍କା । ସ୍କୁଲ ୟୁନିଫର୍ମ ପାଇଁ ୬୦୦ ପରିବର୍ତ୍ତେ ଦିଆଯିବ ୧ ହଜାର ଟଙ୍କା । ଶିଶୁଲେଖା ପାଇଁ ଆର୍ଥିକ ବ୍ୟବସ୍ଥା କରାଯାଇଛି । ଛାତ୍ରଛାତ୍ରୀଙ୍କୁ ନୋଟବୁକ୍ ସହ ଡାଏରୀ ଦିଆଯିବା ସହ ନବନିଯୁକ୍ତ ଶିକ୍ଷକଙ୍କୁ ପ୍ରଶିକ୍ଷଣ ଦିଆଯିବ ବୋଲି ସୂଚନା ଦେଇଛନ୍ତି ଗଣଶିକ୍ଷା ମନ୍ତ୍ରୀ ସମୀର ଦାଶ ।
ଆକାଶରେ ପୁଣି ଶୁଭିଲା ପ୍ରଚଣ୍ଡ ଶବ୍ଦ, ଥରିଲା କୋଠାଘର
ବାଲେଶ୍ବର: ସୁନ୍ଦରଗଡ଼, ବାଲେଶ୍ବର, ଭଦ୍ରକ ଓ କେନ୍ଦୁଝର ଆକାଶରେ ଶୁଭିଛି ଭୟଙ୍କର ଶବ୍ଦ। କୋଠାଘର ଥରିବା ସାଙ୍ଗକୁ କବାଟ ଓ ଝରକା ହଲିବାକୁ ଲାଗିଥିଲା। ଶବ୍ଦ କେଉଁଠୁ ଆସିଲା ସେନେଇ ସ୍ପଷ୍ଟ ସୂଚନା ମିଳିପାରିନାହିଁ । ତେବେ ଦୁଇ ସପ୍ତାହ ପୂର୍ବରୁ ଆକାଶରେ ଏହିପରି ପ୍ରଚଣ୍ଡ ଶବ୍ଦ ଶୁଭିଥିଲା ।