ଭଦ୍ରକ: ଧାନ କିଣିବାକୁ ଲାଞ୍ଚ ନେବାବେଳେ ଧରାପଡ଼ିଲେ ଭଦ୍ରକ ଜିଲ୍ଲା ଚଣ୍ଡୀଗାଁ ସେବା ସମବାୟ ସମିତିର ସମ୍ପାଦକ ତପନ ନାୟକ । ଚାଷୀଙ୍କଠୁ ଲାଞ୍ଚ ନେବାବେଳେ ତପନଙ୍କୁ ଧରିଲା ଭିଜିଲାନ୍ସ । ଚାଷୀ ଶ୍ରୀଧର ସାମଲ 240 କୁଇଣ୍ଟାଲ ଧାନ ବିକ୍ରି ପାଇଁ ଟୋକନ ପାଇଥିଲେ । ମାତ୍ର ଏଥିପାଇଁ 9 ହଜାର 6ଶହ ଟଙ୍କା ଲାଞ୍ଚ ମାଗିଥିଲେ ତପନ । ସମ୍ପାଦକ ଜଣଙ୍କ ଟଙ୍କା ନେବାବେଳେ ଧରିଥିଲା ଭିଜିଲାନ୍ସ । ଲାଞ୍ଚ ଅର୍ଥ ଜବତ କରିବା ସହ ତପନଙ୍କୁ ଅଟକ ରଖି ତଦନ୍ତ ଜାରି ରଖିଛି ପୋଲିସ ।
ଭୁବନେଶ୍ୱର: ଅତୀତ ଏବେ ୧୯୯୯ ମସିହାର ଆର୍ଥିକ ଦୁଃସ୍ଥିତି । ସେତେବେଳେ କର୍ମଚାରୀଙ୍କୁ ଦରମା ଦେବାକୁ ୩୬୪ ଦିନ ଓଭରଡ୍ରାଫ୍ଟ୍ ଉପରେ ନିର୍ଭର କରିବାକୁ ପଡ଼ୁଥିଲା । ଏବେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ନେତୃତ୍ବରେ ରାଜ୍ୟରେ ବଢୁଛି ମୁଣ୍ଡ ପିଛା ଆୟ । ଋଣଭାର ତୁଳନାରେ ମୁଣ୍ଡପିଛା ଆୟ ବଢିଛି ୫.୮ ଗୁଣ । ବିଧାନସଭା ପ୍ରଶ୍ନକାଳରେ ରାଜ୍ୟର ଋଣଭାର ସ୍ଥିତି ନେଇ ବିରୋଧୀଙ୍କ ପ୍ରଶ୍ନରେ ଏପରି କଡ଼ା ଉତ୍ତର ରଖିଛନ୍ତି ଅର୍ଥମନ୍ତ୍ରୀ ନିରଞ୍ଜନ ପୂଜାରୀ । ୨୦୦୫ରେ ବିତ୍ତୀୟ ପରିଚାଳନା ଆଇନ ୨୦୦୫ରେ ଆସିଲା ।
କିନ୍ତୁ ତାପୂର୍ବରୁ ଦ୍ବାଦଶ ଅର୍ଥ କମିଶନଙ୍କ ସୁପାରିସ ଆଧାରରେ ରାଜ୍ୟ ସରକାର ଆର୍ଥିକ ଶୃଙ୍ଖଳା ଆଣିବା ପାଇଁ କାର୍ଯ୍ୟକ୍ରମ ଆରମ୍ଭ କରିଦେଇଥିଲେ । ଯେଉଁଥିପାଇଁ ୨୦୦୫ରୁ ୨୦୦୯-୧୦ରେ ତତ୍କାଳୀନ କେନ୍ଦ୍ର ସରକାର ବାର୍ଷିକ ୩୮୧.୯୦ କୋଟି ହାରରେ ମୋଟ ୧୯୦୯ କୋଟି ୫୦ ଲକ୍ଷ ଟଙ୍କାର ଋଣ ଛାଡ଼ କରିଥିଲେ । ପରେ ୨୦୧୧-୧୨ରୁ ୨୦୨୦-୨୧ ଆର୍ଥିକ ବର୍ଷ ମଧ୍ୟରେ ବିଭିନ୍ନ ଯୋଜନା ବାବଦରୁ ଛାଡ଼ କରିଛନ୍ତି ୧୩୯କୋଟି ୩୬ ଲକ୍ଷ ଟଙ୍କା । ୧୯୯୯ ମସିହାରେ ରାଜ୍ୟର ମୁଣ୍ଡ ପିଛା ଋଣଭାର ଥିଲା ୪ ହଜାର ୯୧୮ ଟଙ୍କା । ମୁଣ୍ଡ ପିଛା ଆୟ ଥିଲା ୧୩ ହଜାର ୧୨ ଟଙ୍କା । ୨୦୨୨ ମାର୍ଚ୍ଚ ଶେଷ ସୁଦ୍ଧା ମୁଣ୍ଡ ପିଛା ଋଣ ୨୨ ହଜାର ୪୨ ଟଙ୍କା ଥିବାବେଳେ ମୁଣ୍ଡ ପିଛା ଆୟ ୧ ଲକ୍ଷ ୨୮ ହଜାର ୮୭୩ ଟଙ୍କା ରହିଛି ।
ଏଫଆର୍ବିଏମ୍ ଆଇନ ଅନୁଯାୟୀ ରାଜ୍ୟର ଋଣଭାର ସକଳ ଘରୋଇ ଉତ୍ପାଦର ୨୫ ପ୍ରତିଶତ ମଧ୍ୟରେ ରହିବା ଆବଶ୍ୟକ । ଏହାକୁ ହିସାବକୁ ନେଲେ ୨୦୨୧-୨୨ସୁଦ୍ଧା ମହାଲେଖାକାରଙ୍କ ହିସାବ ଅନୁଯାୟୀ ରାଜ୍ୟର ସକଳ ଘରୋଇ ଉତ୍ପାଦ ଅନୁପାତରେ ଋଣ ପରିମାଣ ୧୪.୭ ପ୍ରତିଶତ ରହିଛି । ଏହି ସମୟରେ କେନ୍ଦ୍ର ସରକାର ଲକ୍ଷ ଲକ୍ଷ କୋଟି ଟଙ୍କାର କରଜରେ ବୁଡିଛନ୍ତି । ବିକାଶ ପାଇଁ ଋଣ କରିବା ପାପ ନୁହେଁ । ଓଡ଼ିଶା ସରକାର ମୁଖ୍ୟତଃ ଭିତ୍ତିଭୂମି ବିକାଶ ଯେପରିକି ଜଳସେଚନ, ଶକ୍ତି, ସଡ଼କ, ବିପର୍ଯ୍ୟୟ ପରିଚାଳନା, ସହରାଞ୍ଚଳ ଭିତ୍ତିଭୂମି ନିର୍ମାଣ ପାଇଁ ବିଶ୍ବ ବ୍ୟାଙ୍କ ସମେତ ଏଡିବି, ଆଇଏଫ୍ଏଡି, ଜାଇକା, ବ୍ରିକ୍ସ୍ ବ୍ୟାଙ୍କ, ଏଆଇଆଇବି ସଂସ୍ଥାଠାରୁ ଋଣ କରିଥାନ୍ତି ।
ଦ୍ବାଦଶ ଅର୍ଥ କମିସନଙ୍କ ସୁପାରିସ ଆଧାରରରେ ୨୦୦୫ ମସିହାର ଏପ୍ରିଲ ପହିଲାରୁ ବାହ୍ୟସଂସ୍ଥାଠାରୁ ବ୍ୟାକ୍ ଟୁ ବ୍ୟାକ୍ ଋଣ କରିବାକୁ ରାଜ୍ୟମାନଙ୍କୁ ଅନୁମତି ମିଳିଛି । ୨୦୨୧-୨୨ ସୁଦ୍ଧା ରାଜ୍ୟର ବାହ୍ୟ ଋଣ ପରିମାଣ ୧୮ ହଜାର ୫୦୭ କୋଟି ୮୨ ଲକ୍ଷ ଟଙ୍କା । ରାଜ୍ୟ ସରକାର ୨୦୦୬-୦୭ରୁ ୨୦୧୩-୧୪ ଏବଂ ୨୦୨୧-୨୨ରୁ ଏଯାବତ୍ ଖୋଲାବଜାରରୁ ରାଜ୍ୟ ସରକାର କୌଣସି ଋଣ କରିନାହାନ୍ତି । ଯେଉଁଥିପାଇଁ ଏବେ ଋଣ ଭାର କମିବାରେ ଲାଗିଛି ।
କେବଳ ଓମ୍ବାଡସି ଭଳି ସଂସ୍ଥାରୁ ଅଳ୍ପ ସୁଧରେ ଋଣ ଉଠାଇ ଭିତ୍ତିଭୂମି ବିକାଶ କାର୍ଯ୍ୟରେ ଲଗାଉଛନ୍ତି । ଯେଉଁଥିପାଇଁ ୨୦୨୧-୨୨ ସୁଦ୍ଧା ରାଜ୍ୟର ଋଣଭାର ୯୭ ହଜାର ୨୦୪ କୋଟି ୯୮ ଲକ୍ଷ ଟଙ୍କା ରହିଥିଲା । ଏସବୁ ସମ୍ଭବ ହୋଇପାରିଛି ମୁଖ୍ୟମନ୍ତ୍ରୀଙ୍କ ବଳିଷ୍ଠ ଦୂରଦର୍ଶୀ ପଦକ୍ଷେପ ଯୋଗୁ । ବିକାଶ ପଥରେ ଆଗେଇ ଚାଲିଛି ଓଡ଼ିଶା । କୋଭିଡ ପରି ଆର୍ଥିକ ମାନ୍ଦାବସ୍ଥା ସତ୍ତ୍ବେ ରାଜ୍ୟର ନିଜସ୍ବ ଆୟ କମିଲାନି । ଉତ୍ତମ ବିତ୍ତୀୟ ପରିଚାଳନାକୁ ଭାରତ ସରକାର ବି ପ୍ରଶଂସା କରିଛନ୍ତି । ଖୋଦ ଅର୍ଥ ବିଭାଗର ତଥ୍ୟ କହୁଛି ଧୀରେ ଧୀରେ ରାଜ୍ୟର ଋଣ ପରିମାଣ କମିବାରେ ଲାଗିଛି ।
ଭୁବନେଶ୍ୱର: ଅପରାଧୀଙ୍କ ପ୍ରତି ସହାନୁଭୁତି ଦେଖାଇ ବିରୋଧୀ ହୀନ ରାଜନୀତି କରୁଛନ୍ତି । ମମିତା ମେହେର ହତ୍ୟାକାରୀ ଗୋବିନ୍ଦ ସାହୁର ଜେଲରେ କିପରି ପ୍ରାଣ ଗଲା ସେ ନେଇ ତଦନ୍ତ ଜାରି ରହିଛି । ବିରୋଧୀଙ୍କ ଦ୍ବାରା ଆଗତ ମୁଲତବୀ ଆଲୋଚନାରେ ଭାଗ ନେଇ ଏପରି କଡ଼ା ଜବାବ ଦେଇଛି ବିଜେଡି । ବିଜେଡି ମୁଖପାତ୍ର ଅରୁଣ ସାହୁ ସାମ୍ବାଦିକ ସମ୍ମିଳନୀରେ ବିରୋଧୀଙ୍କ ଉପରେ ବର୍ଷିଛନ୍ତି । ସେ କହିଛନ୍ତି, କ୍ରିମିନାଲ ମାଇଣ୍ଡ୍ କ୍ରିମିନାଲକୁ ସପୋର୍ଟ କରନ୍ତି । ବିରୋଧୀ ଯେପରି ଘଟଣା କିପରି ଘଟିଲା, କାହିଁକି ଏପରି ନ ହୋଇ ଏପରି ହେଲା । ଏଥିରୁ ଜଣାପଡୁଛି ବିରୋଧୀ ପବିତ୍ର ବିଧାନସଭାକୁ କୋର୍ଟରୁମ୍ କରିସାରିଲେଣି ।
କୋଉଠୁ ଏପରି ଉଦ୍ଭଟ ତଥ୍ୟ ବିରୋଧୀ ପାଉଛନ୍ତି ଜଣାନାହିଁ । ରାଜ୍ୟ ସ୍ବାର୍ଥ ପ୍ରସଙ୍ଗରେ ଆଲୋଚନା ପାଇଁ ଅନେକ ପ୍ରସଙ୍ଗ ରହିଛି । କିନ୍ତୁ ବିରୋଧୀଙ୍କୁ ଏହା ଦିଶୁନି । ଜଣେ ହତ୍ୟାକାରୀର ଆତ୍ମହତ୍ୟା ପାଇଁ ସରକାରଙ୍କୁ ସମାଲୋଚନା କରି ନିର୍ବାଚନୀ ବୈତରଣୀ ପାର ହେବାକୁ ଉଦ୍ୟମ ହେଉଛି । ଏଥିରେ ବିରୋଧୀ କେବେ ବି ସଫଳ ହେବେନି । ଗୋଟିଏ ପ୍ରସଙ୍ଗରେ ମୁଲତବୀ ଆଲୋଚନା ପାଇଁ ସମୟ ଧାର୍ଯ୍ୟ ହେଉଛି । କିନ୍ତୁ ବିରୋଧୀ ବିଷୟବସ୍ତୁ ବାହାରକୁ ଯାଇ ଆଲୋଚନା କରୁଛନ୍ତି ବୋଲି ବିଜେଡି ବିରୋଧୀଙ୍କୁ ଟାର୍ଗେଟ୍ କରିଛି ।
ନୂଆଦିଲ୍ଲୀ: ସୋମବାର ସୁପ୍ରିମକୋର୍ଟ ଆହ୍ଲାବାଦ ହାଇକୋର୍ଟ ପରିସସରେ ଥିବା ଏକ ମସଜିଦକୁ ହଟାଇବା ପାଇଁ ନିର୍ଦ୍ଦେଶ ଦେଇଛନ୍ତି । ୩ ମାସ ମଧ୍ୟରେ ଏହି ମସଜିଦକୁ ହଟାଇବା ପାଇଁ ଅଧିକାରୀଙ୍କୁ ନିର୍ଦ୍ଦେଶ ଦେଇଛନ୍ତି ସର୍ବୋଚ୍ଚ ଅଦାଲତ । ମସଜିଦ୍ ହଟାଯିବାକୁ ବିରୋଧ କରୁଥିବା ଆବେଦନକାରୀଙ୍କୁ ସୁପ୍ରିମକୋର୍ଟ କହିଛନ୍ତି ଯେ, ଢ଼ାଞ୍ଚା ଏକ ମିଆଦପୂର୍ଣ୍ଣ ଜମି ଉପରେ ଅବସ୍ଥିତ ଅଛି ଏବଂ ଏହାକୁ ଅଧିକାର ଅନୁଯାୟୀ ବଳବତ୍ତର ରଖିବା ପାଇଁ ଦାବି କରିପାରିବେ ନାହିଁ । ଆବେଦନକର୍ତ୍ତାଙ୍କ ମଧ୍ୟରେ ସାମିଲ ହାଇକୋର୍ଟ ମସଜିଦ ୱକ୍ଫ ଏବଂ ୟୁପି ସୁନ୍ନୀ ସେଣ୍ଟ୍ରାଲ ୱକ୍ଫ ନଭେମ୍ବର ୨୦୧୭ର ଆହ୍ଲାବାଦ ହାଇକୋର୍ଟଙ୍କ ଆଦେଶକୁ ଚ୍ୟାଲେଞ୍ଜ କରିଥିଲେ ।
ହାଇକୋର୍ଟ ସେମାନଙ୍କୁ ମସଜିଦକୁ ପରିସରରୁ ବାହାର କରିବା ପାଇଁ ୩ ମାସର ସମୟ ଦେଇଥଇଲେ । ସୋମବାର ସୁପ୍ରିମକୋର୍ଟ ସେମାନଙ୍କ ଆବେଦନକୁ ଖାରଜ କରିଦେଇଛନ୍ତି । ସୁପ୍ରିମକୋର୍ଟରେ ଜଷ୍ଟିସ ଏମଆର୍ ଶାହ ଏବଂ ଜଷ୍ଟିସ ସିଟି ରବିକୁମାରଙ୍କ ଖଣ୍ଡପୀଠ ଏହି ଶୁଣାଣି କରିଛନ୍ତି । ଖଣ୍ଡପୀଠ ଆବେଦନକାରୀଙ୍କୁ କହିଥିଲେ ଯେ ଜମି ଲିଜରେ ଥିଲା, ଯାହାର ଅବଧି ସମାପ୍ତ ହୋଇଯାଇଥିଲା । ତେଣୁ ସେମାନେ ଅଧିକାର ଅନୁଯାୟୀ ଏହାକୁ କାଏମ ରଖିବାକୁ ଦାବି କରିପାରିବେ ନାହିଁ । ତେଣୁ ଏହି ମସଜିଦକୁ ତିନି ମାସ ଭିତରେ ଭାଙ୍ଗିବା ପାଇଁ ସମୟ ଦିଆଯାଉଛି ଏବଂ ଯଦି ତିନି ମାସ ଅବଧି ଭିତରେ ମସଜିଦ ନହଟାଯାଏ ତେବେ ହାଇକୋର୍ଟ ସମେତ ଅଧିକାରୀମାନଙ୍କ ପାଖରେ ଏହାକୁ ଭାଙ୍ଗିବା ପାଇଁ ସମସ୍ତ ବିକଳ୍ପ ଖୋଲା ରହିବ ।
ସାଲେପୁର: ଲୁଟ ବେଳେ ଧରାପଡି ଛେଚା ଖାଇଲେ ଲୁଟେରା । ସାଲେପୁରରେ ଲୁଟେରାଙ୍କୁ କାବୁ କରି ଉତ୍ତମ ମଧ୍ୟମ ଦେଇଛନ୍ତି ଅଞ୍ଚଳବାସୀ । ଚଳନ୍ତା ଗାଡ଼ିରୁ ଚେନ୍ ଛିଣ୍ଡାଇ ଫେରାର ମାରୁଥିବା ବେଳେ ଗାଡ଼ିରୁ ତେଲ ସରିଯାଇଥିଲା । ତେଲ ପକାଇ ଫେରୁଥିବା ବେଳେ ପିଛା କରିଆସୁଥିବା ଲୋକେ ଦୁଇ ଲୁଟେରାକୁ ମାଡି ବସିଥିଲେ । ସେମାନଙ୍କ ମଧ୍ୟରୁ ଜଣେ ଖସିଯିବାରେ ସକ୍ଷମ ହୋଇଥିବା ବେଳେ ଅନ୍ୟଜଣଙ୍କୁ ଲୋକମାନେ ନିସ୍ତୁକ ମାଡ଼ ମାରିଛନ୍ତି ।
ଲୁଟେରା ଠାରୁ ଗୋଟିଏ ଖେଳଣା ବନ୍ଧୁକ, ଗୋଟିଏ ଛୁରୀ, ନମ୍ବର ପ୍ଲେଟ ସହ ଏକ ବ୍ୟାଗ ଜବତ ହୋଇଛି । କାବୁ ହୋଇଥିବା ଲୁଟେରା ହେଲେ ଯାଜପୁରର ଶଶିକାନ୍ତ ଜେନା । ଖବର ପାଇ ପୋଲିସ ଘଟଣାସ୍ଥଳରେ ପହଞ୍ଚିଛି । ପୂର୍ବରୁ ଅନେକ ରାହାଜାନୀ ମାମଲାରେ ଏମାନଙ୍କ ସମ୍ପୃକ୍ତି ରହିଥିବା କୁହାଯାଉଛି ।
ଭୁବନେଶ୍ୱର: ଆସୁଛି ବଡ ବର୍ଷା ! ଭିଜିବ ଉପାନ୍ତରୁ ଉପକୂଳ । ୧୫ ତାରିଖରୁ ସକ୍ରିୟ ହେବ ଆଉ ଏକ ପଶ୍ଚିମା ଝଡ । ଏହା ପ୍ରଭାବରେ ୧୭ ତାରିଖ ପର୍ଯ୍ୟନ୍ତ ଘଡଘଡି ବିଜୁଳି ସହ ବର୍ଷା ହେବା ସମ୍ଭାବନା ରହିଛି । ଝଡ ପବନ ସହ ବର୍ଷା ନେଇ ସତର୍କତା ଜାରି କରିଛି ପାଣିପାଗ କେନ୍ଦ୍ର । ଉପକୂଳ ଏବଂ ପାର୍ଶ୍ବବର୍ତ୍ତୀ ଜିଲ୍ଲାରେ ଏହାର ପ୍ରଭାବ ପଡ଼ିବ । ୧୫ ତାରିଖରେ ବାଲେଶ୍ବର, ଭଦ୍ରକ, ମୟୂରଭଞ୍ଜ, କେନ୍ଦୁଝର, ଯାଜପୁର, ଢେଙ୍କାନାଳ, କେନ୍ଦ୍ରାପଡା, କୋରାପୁଟ, ରାୟଗଡା, ଗଜପତିରେ ବିଜୁଳି ଘଡଘଡି ସହ ବର୍ଷା ହେବା ସମ୍ଭାବନା ରହିଛି ।
୧୬ରେ କୋରାପୁଟ, ଗଜପତି, କନ୍ଧମାଳ, ବାଲେଶ୍ବର, ଭଦ୍ରକ, ଯାଜପୁର, ଢେଙ୍କାନାଳକୁ କାଳବୈଶାଖି ସତର୍କତା ଜାରି କରାଯାଇଛି । ୧୭ରେ ଦକ୍ଷିଣ ଓଡ଼ିଶାର ଅଧିକାଂଶ ଜିଲ୍ଲାରେ ବିଜୁଳି ଘଡଘଡି ସହ ବର୍ଷା ହେବା ସମ୍ଭାବନା ରହିଛି ବୋଲି ପାଣିପାଗ ବିଭାଗ ପୂର୍ବାନୁମାନ କରିଛି । ଗଞ୍ଜାମ, ଗଜପତି, ମାଲକାନଗିରି, କୋରାପୁଟ, ନବରଙ୍ଗପୁର, କଳାହାଣ୍ଡି, କନ୍ଧମାଳ, ରାୟଗଡ଼ାରେ ବର୍ଷା ସହ ଘଣ୍ଟା ପ୍ରତି ୪୫ ରୁ ୫୦ କିଲୋମିଟର ବେଗରେ ଝଟକା ପବନ ଅନୁଭୂତ ହେବ ବୋଲି ଆଞ୍ଚଳିକ ପାଣିପାଗ କେନ୍ଦ୍ର ସୂଚନା ଦେଇଛି ।
ନୂଆଦିଲ୍ଲୀ: ସମଲିଙ୍ଗୀ ବିବାହକୁ ନେଇ ସୁପ୍ରିମକୋର୍ଟଙ୍କ ବଡ଼ ନିଷ୍ପତ୍ତି । ମାମଲାର ଶୁଣାଣି କରିବେ ୫ଜଣିଆ ସାମ୍ବିଧାନିକ ଖଣ୍ଡପୀଠ । ଆସନ୍ତା ଏପ୍ରିଲ ୧୮ ତାରିଖରେ ମାମଲାରେ ଶୁଣାଣି କରାଯିବ । ସମଲିଙ୍ଗୀ ବିବାହକୁ ନେଇ ହେବାକୁ ଶୁଣାଣିର ଲାଇଭ ଷ୍ଟ୍ରିମିଂ କରିବାକୁ ଦାବି କରିଛନ୍ତି ଆବେଦନକାରୀ । ଗତକାଲି ସମଲିଙ୍ଗୀ ବିବାହକୁ ବିରୋଧ କରି କୋର୍ଟରେ ୫୬ପୃଷ୍ଠାର ସତ୍ୟପାଠ ଦାଖଲ କରିଥିଲେ କେନ୍ଦ୍ର ସରକାର । କେନ୍ଦ୍ର ସରକାର ନିଜ ସତ୍ୟପାଠରେ କହିଥିଲେ ସମଲିଙ୍ଗୀ ବିବାହ ଭାରତୀୟ ସଂସ୍କୃତି ଓ ପରମ୍ପରା ବିରୋଧୀ । ତେଣୁ ଭାରତରେ ଏହାକୁ ଅନୁମତି ନଦିଆଯାଉ । ଆଜି ମାମଲାର ଶୁଣାଣି ସମୟରେ ପ୍ରଧାନ ବିଚାରପତିଙ୍କ ନେତୃତ୍ୱାଧୀନ ତିନି ଜଜ ବିଶିଷ୍ଟ ଖଣ୍ଡପୀଠ ମାମଲାକୁ ସାମ୍ବିଧାନିକ ପୀଠକୁ ପଠାଇବା ପାଇଁ ସୁପାରିଶ କରିଛନ୍ତି । ଆବେଦନକାରୀ ଶୁଣାଣି ସମୟରେ ଲାଇଭ ଷ୍ଟ୍ରିମିଂ ପାଇଁ ମଧ୍ୟ ନିବେଦନ କରିଛନ୍ତି । କେନ୍ଦ୍ର ସରକାରଙ୍କ ସତ୍ୟପାଠ ଉପରେ ଜବାବ ଦାଖଲ କରିବା ପାଇଁ ଆବେଦନକାରୀଙ୍କୁ ତିନି ସପ୍ତାହ ସମୟ ଦିଆଯାଇଛି ।
ଅହମ୍ମଦାବାଦ: ଅହମ୍ମଦାବାଦରେ ୫ ଦିନ ହେବ ଚାଲିଥିବା ଭାରତ-ଅଷ୍ଟ୍ରେଲିଆ ଚତୁର୍ଥ ଟେଷ୍ଟ ମ୍ୟାଚ୍ ଡ୍ର ହୋଇଛି । ଭାରତ ୪ ମ୍ୟାଚ୍ ବିଶିଷ୍ଟ ଏହି ଟେଷ୍ଟ ସିରିଜକୁ ୨-୧ରେ ଜିତିନେଇଛି । ଏହି ବିଜୟ ସହ ଭାରତ ଲଗାତାର ଷଷ୍ଠଥର ପାଇଁ ବର୍ଡର ଗାଭାଷ୍କର ଟ୍ରଫି ନିଜ ନାଁରେ କରିଛି । ସେହିପରି ଲଗାତାର ୪ଥର ଭାରତ ଅଷ୍ଟ୍ରେଲିଆଠୁ ଟେଷ୍ଟ ସିରିଜ୍ ଜିତିଛି । ଏପରି କରିଥିବା ପ୍ରଥମ ଏସୀୟ ଟିମ୍ ଭାବେ ମଧ୍ୟ ରେକର୍ଡ କରିଛି । ପ୍ରଥମ ଏବଂ ଦ୍ୱିତୀୟ ଟେଷ୍ଟ ମ୍ୟାଚରେ ଭାରତ ବିଜୟୀ ହୋଇଥିଲା । ତୃତୀୟ ଟେଷ୍ଟ ମ୍ୟାଚରେ ଅଷ୍ଟ୍ରେଲିଆ ବିଜୟୀ ହୋଇଥିଲା । ଅଷ୍ଟ୍ରେଲିଆ ନିଜର ଦ୍ୱିତୀୟ ଇନିଂସରେ ୭୮.୧ ଓଭରରେ ୨ ୱିକେଟ୍ ବିନିମୟରେ ୧୭୫ ରନ୍ କରିଥିଲା । ଅଷ୍ଟ୍ରେଲିଆ ପକ୍ଷରୁ ଟ୍ରେବିସ ହେଡ ୯୦ ରନ୍, ମାର୍ନସ ଲାବୁସେନ ୬୩ରନର ଅପରାଜିତ ପାରି ଖେଳିଥିଲେ ।
ସେହିପରି ଷ୍ଟିଭ ସ୍ମିଥ ୧୦ ରନ୍ କରି ଅପରାଜିତ ରହିଥିଲେ । ଭାରତ ପକ୍ଷରୁ ଅଶ୍ୱିନ ଏବଂ ଅକ୍ଷର ପଟେଲ ଗୋଟିଏ ଲେଖାଏଁ ୱିକେଟ୍ ଅକ୍ତିଆର କରିଥିଲେ । ଅଷ୍ଟ୍ରେଲିଆ ପ୍ରଥମ ପାଳିରେ ୪୮୦ ରନ୍ କରିଥିଲା । ଜବାବରେ ଭାରତ ପ୍ରଥମ ଇନିଂସରେ ୫୭୧ ରନର ସ୍କୋର କରିଥିଲା । ଯେଉଁଥିରେ ବିରାଟ କୋହଲି ୧୮୬ରନର ଚମତ୍କାର ପାରି ଖେଳିଥିଲେ । ସେହପିର ଶୁଭମନ ଗିଲ୍ ୧୨୮ ରନ୍ କରିଥିଲେ । ପ୍ରଥମ ପାଳିର ଆଧାରରେ ଭାରତ ୯୧ ରନରେ ଆଗୁଆ ରହିଥିଲା । ଅଷ୍ଟ୍ରେଲିଆ ନିଜର ଦ୍ୱିତୀୟ ଇନିଂସରେ ଦୁଇଟି ୱିକେଟରେ ୧୭୫ ରନରେ ଇନିଂସ ଘୋଷଣା କରିଦେଇଥିଲା ଏବଂ ଏଥିସହିତ ମ୍ୟାଚକୁ ଡ୍ର ଘୋଷିତ କରାଯାଇଛି ।
ଚତୁର୍ଥ ଟେଷ୍ଟରେ ଭଲ ପ୍ରଦର୍ଶନ ପାଇଁ ଭାରତୀୟ ଷ୍ଟାର ବ୍ୟାଟର ବିରାଟ କୋହଲିଙ୍କୁ ମ୍ୟାନ ଅଫ୍ ଦ ମ୍ୟାଚ୍ ବିବେଚିତ କରାଯାଇଛି । ସେହିପରି ଭାରତୀୟ ଦଳର ଦୁଇ ଅଲରାଉଣ୍ଡର ରବୀନ୍ଦ୍ର ଜାଡେଜା ଓ ଆର୍ ଅଶ୍ୱିନଙ୍କୁ ମ୍ୟାନ ଅଫ ଦ ସିରିଜ ସମ୍ମାନ ମିଳିଛି । ଆର୍ ଅଶ୍ୱିନ ଚାରି ମ୍ୟାଚର ସିରିଜରେ ମୋଟ ୨୫ଟି ୱିକେଟ୍ ନେଇଥିବା ବେଳେ ରବୀନ୍ଦ୍ର ଜାଡେଜା ମୋଟ ୨୨ ୱିକେଟ୍ ନେଇଛନ୍ତି । ରବୀନ୍ଦ୍ର ଜାଡେଜା ମୋଟ ୧୦୭ ରନ୍ କରିଥିବା ବେଳେ । ଅଶ୍ୱିନ ୭୯ ରନ୍ କରିଥିଲେ ।
ଭୁବନେଶ୍ୱର: ଭୁବନେଶ୍ବର ଇନଫୋଭ୍ୟାଲି ପୋଲିସ କବଜାରେ ହାଇଓ୍ବେ ଲୁଟେରା ଗ୍ୟାଙ୍ଗ । ଲଙ୍କା ଗୁଣ୍ଡ ପିଙ୍ଗି ରାଜରାସ୍ତାରେ କରୁଥିଲେ ଲୁଟ୍ । ଖଣ୍ଡାରେ ଗୋଡାଇ ଗୋଡ଼ାଇ ହାଣୁଥିଲେ ଅଭିଯୁକ୍ତ । ଏଭଲି ହାଇପ୍ରୋଫାଇଲ ଗ୍ୟାଙ୍ଗର ୫ଜଣଙ୍କୁ ଗିରଫ କରିଛି ପୋଲିସ । ସେମାନଙ୍କଠାରୁ ୨ଟି ବାଇକ, ଖଣ୍ଡା, ଲୁହାରଡ, ଲଙ୍କାଗୁଣ୍ଡ ଓ ମଦ ଜବତ ହୋଇଛି । ବିଳମ୍ବିତ ରାତିରେ ଅଭିଯୁକ୍ତମାନେ ଟ୍ରକକୁ କରୁଥିଲେ ଟାର୍ଗେଟ । ଗିରଫ ଅଭିଯୁକ୍ତଙ୍କ ଘର ଖୋର୍ଦ୍ଧା ଅଞ୍ଚଳରେ ବୋଲି ଜଣାପଡ଼ିଛି । ସେମାନଙ୍କ ନାଁରେ ବିଭିନ୍ନ ଥାନାରେ ୫୦ରୁ ଅଧିକ ମାମଲା ରହିଛି ।
ବାଲେଶ୍ୱର: ପରୀକ୍ଷାରେ ନମ୍ବର ବଢାଇ ଦେବି କହି ଠକୁଥିଲା । ଧରା ପଡିବା ପରେ ଜେଲ ଗଲା । ବାଲେଶ୍ବରରେ 3ଶହ ଛାତ୍ରଛାତ୍ରୀଙ୍କୁ ନମ୍ବର ବଢାଇଦେବାକୁ କହି ଠକିଥିଲା ଠକ ପ୍ରଦୀପ ଦାସ । ଏନେଇ ଥାନରେ ଅଭିଯୋଗ ପରେ ପ୍ରଦୀପକୁ ଗିରଫ କରିଛି ପୋଲିସ । ପ୍ରଦୀପ ଠାରୁ ଏକ ଦାମି କାର୍ ସହିତ 9 ଲକ୍ଷ ଟଙ୍କାର ସୁନା ଅଳଙ୍କାର, 57 ହଜାର ନଗଦ ଟଙ୍କା, ଦାମି ମୋବାଇଲ ଓ ବିଭିନ୍ନ ବ୍ୟାଙ୍କର ଏଟିଏମ୍ କାର୍ଡ଼ ଜବତ କରାଯାଇଛି ।
ଠକ ପ୍ରଦୀପ ପରୀକ୍ଷା ଦେଉଥିବା ଛାତ୍ରଛାତ୍ରୀଙ୍କ ଅଭିଭାବକଙ୍କ ସହିତ ଯୋଗାଯେଗ କରି ନିଜକୁ ଶିକ୍ଷା ବିଭାଗର ଜଣେ ବରିଷ୍ଠ ଅଧିକାରୀ ବୋଲି ପରିଚୟ ଦେଉଥିଲା । ପରେ ଛାତ୍ରଛାତ୍ରୀଙ୍କର ନମ୍ବର ବଢାଇଦେବାକୁ କହି ଜଣକ ପିଛା 1 ହଜାର ଟଙ୍କାରୁ 10 ହଜାର ଟଙ୍କା ପର୍ଯ୍ୟନ୍ତ ଆଦାୟ କରୁଥିଲା । ବାଲେଶ୍ବର ଓ ଭଦ୍ରକ ଜିଲ୍ଲାରୁ ପ୍ରାୟ 3ଶହ ଛାତ୍ରଛାତ୍ରୀଙ୍କ ଠାରୁ 15 ଲକ୍ଷରୁ ଅଧିକ ଟଙ୍କା ଠକି ନେଇଥିବା ଜଣାପଡ଼ିଥିଲା । ପୋଲିସ ଘଟଣାର ତଦନ୍ତକରି ପ୍ରଦୀପକୁ ଗିରଫ କରିବାରେ ସଫଳ ହୋଇଛି ।
