ଶ୍ରୀନଗର: ଜାମ୍ମୁ ଓ କାଶ୍ମୀର ଅନ୍ତର୍ଗତ କୁପଓ୍ବାରାରେ ଦମ୍ ଦେଖାଇଲେ ଯବାନ । ମରଣମୁହଁରୁ ୩ ଜଣଙ୍କୁ ଉଦ୍ଧାର କରିଥିବାବେଳେ ଜଣେ ପ୍ରାଣ ହରାଇଛନ୍ତି । କୁପଓ୍ୱାରର ଚୋନ୍ତିଓ୍ୱାରୀ ଗ୍ରାମରେ ଗତକାଲି ବରଫ ଭୂସ୍ଖଳନ ଘଟିଥିଲା । କିଛି ଲୋକ ସେଥିରେ ପୋତି ହୋଇଯାଇଥିବା ସୂଚନା ମିଳିଥିଲା । ବିପନ୍ନଙ୍କୁ ଉଦ୍ଧାର କରିବା ଲାଗି ତୁରନ୍ତ ସେଠାରେ ପୋଲିସ ଓ ଆର୍ମିବାହିନୀ ପହଞ୍ଚିଥିଲେ । ଘନ ତୁଷାରପାତ ଓ ବରଫ ପାହାଡ଼ରୁ ବିପନ୍ନଙ୍କୁ ଉଦ୍ଧାର କରିବା ଲାଗି ଆରମ୍ଭ ହୋଇଥିଲା ମେଗା ମିଶନ । ପୋଲିସ ଓ ଯବାନମାନେ ଜୀବନକୁ ବିପନ୍ନ କରି ୩ ଜଣଙ୍କୁ ଉଦ୍ଧାର କରିଥିବାବେଳେ ଜଣଙ୍କର ମୃତ୍ୟୁ ଘଟିଥିଲା । ମୃତକ ହେଉଛନ୍ତି ଆଇଜାଜ ଅହମ୍ମଦ ତାନ୍ତ୍ରେ । ସେ ଜଣେ ନବ ବିବାହିତ । ଏହି ଦୁଃଖଦ ଘଟଣାରେ ଆଇଜାଜଙ୍କ ମୃତ୍ୟୁ ଘଟିଥିବାବେଳେ ପତ୍ନୀ ଜାରିନାଙ୍କୁ ଉଦ୍ଧାର କରାଯାଇଛି । ପ୍ରାୟ ୧୫ ଫୁଟର ବରଫରେ ଆଇଜାଜ ପୋତି ହୋଇଯାଇଥିଲେ ।
ଦିଲ୍ଲୀ ନିକ୍କି ଯାଦବ ହତ୍ୟା ମାମଲା, ୨୦୨୦ ଅକ୍ଟୋବରରେ ମନ୍ଦିରରେ ବିବାହ କରିଥିଲେ ନିକ୍କି ଓ ସାହିଲ ଗେହଲଟ
ନୂଆଦିଲ୍ଲୀ: ଦିଲ୍ଲୀ ନିକ୍କି ଯାଦବ ହତ୍ୟା ଘଟଣା । ପଦାକୁ ଆସିଲା ଆଉ ଏକ ତଥ୍ୟ । ଗତ ୨୦୨୦ ଅକ୍ଟୋବରରେ ନୋଏଡାର ଏକ ମନ୍ଦିରର ବିବାହ କରିଥିଲେ ନିକ୍କି ଓ ଅଭିଯୁକ୍ତ ସାହିଲ ଗେହଲଟ । ତେବେ ଏହି ବିବାହକୁ ସାହିଲର ପରିବାର ଗ୍ରହଣ କରି ନଥିଲେ ଏବଂ ଅନ୍ୟ ଜଣେ ମହିଳାଙ୍କ ସହ ସାହିଲର ବିବାହ ଠିକ୍ କରିଥିଲେ । ଦୀର୍ଘ ଦିନ ଧରି ଏ ସମ୍ପର୍କରେ ଅବଗତ ନଥିଲେ ନିକ୍କି । ନିକ୍କିଙ୍କୁ ହତ୍ୟା କରି ଫ୍ରିଜ ଭିତରେ ରଖିବା ପରେ ବିଳମ୍ବିତ ରାତିରେ ଘରକୁ ଯାଇ ବିବାହ କରିଥିଲା ସାହିଲ । ହତ୍ୟା ଷଡ଼ଯନ୍ତ୍ର ଅଭିଯୋଗରେ ବୟଫ୍ରେଣ୍ଡ ସାହିଲ ଗେହଲଟର ବାପାଙ୍କୁ ଗିରଫ କରିଛି ଦିଲ୍ଲୀ ପୋଲିସ ।
ଲିଭ ଇନ୍ ପାର୍ଟନର ଭାବେ ରହିଥିବା ନିକ୍କି ଓ ସାହିଲଙ୍କ ମଧ୍ୟରେ ବିବାଦ କାରଣରୁ ନିକ୍କିଙ୍କ ଗଳାକୁ ଏକ ଚାର୍ଜିଂ କେବଲ ଜରିଆରେ ଚିପି ହତ୍ୟା କରିଥିଲା ସାହିଲ । ପରେ ନିକ୍କିଙ୍କ ଶବକୁ ଏକ ଫ୍ରିଜ୍ ଭିତରେ ରଖିଥିଲା ସାହିଲ । ଗତ ମଙ୍ଗଳବାର ୧୪ ତାରିଖରେ ନିକ୍କିଙ୍କ ଶବକୁ ଜବତ କରିଥିଲା ବୋଲିସ । ଏହି ଘଟଣାରେ ସାହିଲର ବାପାଙ୍କ ସମେତ ଅନ୍ୟ ୩ ଜଣ ପରିବାର ସଦସ୍ୟଙ୍କୁ ବି ପୋଲିସ ଗିରଫ କରିଛି । ଏହି ଘଟଣାରେ ମୋଟ ୫ ଜଣଙ୍କୁ ଗିରଫ କରାଯାଇଥିବା କହିଛନ୍ତି ସ୍ପେଶାଲ ସିପି ରବୀନ୍ଦ୍ର ଯାଦବ । ତେଣେ ହରିୟାଣାସ୍ଥିତ ନିକ୍କିଙ୍କ ବାସଭବନରେ ଜାରି ରହିଛି ନୀରବତା । ଅପରାଧୀଙ୍କୁ ଦଣ୍ଡ ମିଳୁ ବୋଲି ଦାବି କରିଛନ୍ତି ନିକ୍କିଙ୍କ ବାପା ସୁନୀଲ ଯାଦବ ।
ବିରୋଧୀ ଦଳ ନେତା ପଦକୁ ନେଇ ବିବାଦୀୟ ମନ୍ତବ୍ୟ ଦେଲେ ଜୟନାରାୟଣ
ଭୁବନେଶ୍ୱର: ପୁଣି ଜୟନାରାୟଣ ମିଶ୍ରଙ୍କ ବିବାଦୀୟ ମନ୍ତବ୍ୟ । ବିଧାନସଭାରେ ବିରୋଧୀ ଦଳର ନେତାମାନଙ୍କୁ ସରକାର ମ୍ୟାନେଜ କରୁଛନ୍ତି । ହେଲେ ତାଙ୍କୁ ମ୍ୟାନେଜ କରିପାରିଲେ ନାହିଁ, ତେଣୁ ତାଙ୍କ ବିରୋଧରେ ବିଭିନ୍ନ କଥା କହୁଛନ୍ତି ବୋଲି ବିବାଦୀୟ ମନ୍ତବ୍ୟ ଦେଇଛନ୍ତି ଜୟନାରାୟଣ । ଜୟନାରାୟଣ ଏଭଳି କହିବା ପୂର୍ବରୁ ନିଜ ଦଳର ସଭାପତି ଓ ଅନ୍ୟ ନେତାଙ୍କ ସହ ଆଲୋଚନା କରିଛନ୍ତି କି ? କାରଣ ଏହା ପୂର୍ବରୁ ବିରୋଧୀ ଦଳ ନେତା ବିଜେପିର ପ୍ରଦୀପ୍ତ ନାୟକ ଥିଲେ, ସେ ମ୍ୟାନେଜ ହେଉଥିଲେ କି, ଯଦି ହଁ ମ୍ୟାନେଜ ହେବା କ’ଣ ଭାରତୀୟ ଜନତା ପାର୍ଟିର ନେତାଙ୍କ ଚରିତ୍ର । ବିଜେପି ପୂର୍ବରୁ କଂଗ୍ରେସର ନରସିଂହ ମିଶ୍ର ବିରୋଧୀ ଦଳ ନେତା ଥିଲେ, ସେ ବି କ’ଣ ମ୍ୟାନେଜ ହେଉଥିଲେ କି ?
ଜୟନାରାୟଣ, ନରସିଂହଙ୍କ ସହ ଆଲୋଚନା କରିବା ପରେ ଏଭଳି ମନ୍ତବ୍ୟ ଦେଇଛନ୍ତି କି ? ବିରୋଧୀ ଦଳ ନେତାଙ୍କ ପଦ ମର୍ଯ୍ୟାଦାହାନୀ ହେବା ଭଳି ମନ୍ତବ୍ୟ ଦେଇ ଜୟନାରାୟଣ କ’ଣ କହିବାକୁ ଚାହୁଁଛନ୍ତି ? ତାଙ୍କ ଭଳି ନେତା ଯାହାଙ୍କ ନାମରେ ୧୬ଟି ସଙ୍ଗୀନ ଫୌଜଦାରୀ ମାମଲା ରହିଛି, କଥା କଥାକେ ମାଡ଼ ମାରିବା, ଖଣ୍ଡାଧରି ଗୋଡ଼ାଇବା, ହତ୍ୟା ଉଦ୍ୟମ ଓ ହତ୍ୟା ଭଳି ସଙ୍ଗୀନ ମାମଲା ରହିଛି ସେଭଳି ଲୋକ ବିରୋଧୀ ଦଳ ନେତା ପଦବୀରେ ରହିବା ଗଣତନ୍ତ୍ର ପ୍ରତି ଠିକ୍ ହେବ ତ ? ଜୟନାରାୟଣ ନିଜକୁ ନିଜେ ପଚାରନ୍ତୁ ବୋଲି ସାଧାରଣରେ ମତ ପ୍ରକାଶ ପାଇଛି ।
ଜୟନାରାୟଣଙ୍କ ପାଇଁ ବଢୁଛି ଅଡ଼ୁଆ, IICଙ୍କୁ ଆକ୍ରମଣ ପ୍ରତିବାଦରେ ପ୍ରଗତି ଫାଉଣ୍ଡେସନ ପକ୍ଷରୁ ବିକ୍ଷୋଭ
ଭୁବନେଶ୍ୱର: ବିରୋଧୀ ଦଳ ନେତା ଜୟନାରାୟଣ ମିଶ୍ରଙ୍କ ପାଇଁ ବଢୁଛି ଅଡ଼ୁଆ । ଧନୁପାଲି ଆଇଆଇସିଙ୍କୁ ଆକ୍ରମଣ ପ୍ରତିବାଦରେ ପ୍ରଗତି ଫାଉଣ୍ଡେସନ ପକ୍ଷରୁ ବିକ୍ଷୋଭ । ଜୟ ନାରାୟଣ ମିଶ୍ରଙ୍କ ଭୁବନେଶ୍ୱରସ୍ଥିତ ସରକାରୀ ବାସଭବନ ଘେରାଉ କରାଯାଇଛି । ବିରୋଧୀ ଦଳ ନେତା ପଦରୁ ବହିଷ୍କାର ଦାବି କରିଛି ଫାଉଣ୍ଡେସନ । ଯଦି ବହସ୍କାର ନକରାଯାଉଛି ତେବେ ଘରୁ ବାହାରି ମହିଳାଙ୍କୁ କ୍ଷମା ମାଗିବାକୁ ଦାବି କରିଛନ୍ତି ପ୍ରଗତି ଫାଉଣ୍ଡେସନର ସଦସ୍ୟ । ଗତକାଲି କିନ୍ନର ସଂଘ ପକ୍ଷରୁ ମଧ୍ୟ ଜୟନାରାୟଣଙ୍କ ବାସଭବନ ଘେରାଉ କରାଯାଇଥିଲା ।
ଦିଲ୍ଲୀ ମଦ ଦୁର୍ନୀତି ମାମଲା, ଉପମୁଖ୍ୟମନ୍ତ୍ରୀ ମନୀଷ ସିସୋଦିଆଙ୍କୁ ପୁଣି ସିବିଆଇ ସମନ
ନୂଆଦିଲ୍ଲୀ: ଦିଲ୍ଲୀ ମଦ ଦୁର୍ନୀତି ମାମଲା । ଉପମୁଖ୍ୟମନ୍ତ୍ରୀ ତଥା ଆପ୍ ନେତା ମନୀଷ ସିସୋଦିଆଙ୍କୁ ପୁଣି ସମନ ଜାରି କରିଛି ସିବିଆଇ । ଆସନ୍ତାକାଲି ସିବିଆଇ ମୁଖ୍ୟାଳୟରେ ହାଜର ହେବା ଲାଗି ଦିଆଯାଇଛି ନିର୍ଦ୍ଦେଶ । ଏନେଇ ସିସୋଦିଆ କହିଛନ୍ତି- ତାଙ୍କୁ ମଦ ଦୁର୍ନୀତି ମାମଲାରେ ସିବିଆଇ ସମନ ଜାରି କରିଛି । ତାଙ୍କ ବିରୋଧରେ ଉଭୟ ପ୍ରବର୍ତ୍ତନ ନିର୍ଦ୍ଦେଶାଳୟ ଓ ସିବିଆଇ ପୂର୍ଣ୍ଣ କ୍ଷମତା ପ୍ରୟୋଗ କରିବାରେ ଲାଗିଛନ୍ତି । ପୂର୍ବରୁ ତାଙ୍କ ଘରେ ରେଡ ହୋଇଥିଲା, ବ୍ୟାଙ୍କ ଲକର ସର୍ଚ୍ଚ କରାଯାଇଥିଲା । ମାତ୍ର କିଛି ପାଇ ନଥିଲେ ।
ଦିଲ୍ଲୀ ପିଲା ଭଲ ପଢ଼ିବା ଲାଗି ସେ ସମସ୍ତ ବ୍ୟବସ୍ଥା କରୁଛନ୍ତି । ମାତ୍ର ଏହା ନ କରିବା ଲାଗି ସିବିଆଇ ଓ ଇଡି ଚାହୁଁଛନ୍ତି । ସବୁ ପ୍ରକାର ତଦନ୍ତ ଲାଗି ସେ ପ୍ରସ୍ତୁତ ବୋଲି କହିଛନ୍ତି ସିସୋଦିଆ । ଗତବର୍ଷ ଅଗଷ୍ଟରେ ମଦ ଦୁର୍ନୀତି ମାମଲାରେ ସିବିଆଇ ସିସୋଦିଆ ଓ ଅନ୍ୟ ୧୪ ଜଣଙ୍କ ବିରୋଧରେ ଆଇପିସିର ଧାରା ୪୭୭, ୧୨୦ ଏବଂ ଦୁର୍ନୀତି ନିବାରଣ ଆଇନର ଧାରା ୭ ଅନୁସାରେ ମାମଲା ରୁଜୁ କରିଥିଲା । ମାମଲାର ସିବିଆଇ ତଦନ୍ତ ଲାଗି ଲେଫଟନାଣ୍ଟ ଗଭର୍ଣ୍ଣର ବିନୟ କୁମାର ସକ୍ସେନା ସୁପାରିସ କରିଥିଲେ ।
ସାମାନ୍ୟ କଥାରେ ଭାଇ ସାଜିଲା ବଇରୀ, ସାନ ଭାଇକୁ ନିର୍ମମ ହତ୍ୟା କରିଛି ବଡ଼ ଭାଇ
ଗଞ୍ଜାମ: ଗଞ୍ଜାମ ଜିଲ୍ଲା ଜଗନ୍ନାଥପ୍ରସାଦ ଖଇରନଟି ଗାଁରେ ବୀଭତ୍ସ ହତ୍ୟାକାଣ୍ଡ l ସାମାନ୍ୟ କଥାରେ ଭାଇ ସାଜିଲା ବଇରୀ । ପଞ୍ଚଭୂତି ଗାଁର ସାନ ଭାଇକୁ ନିର୍ମମ ହତ୍ୟା କରିଛି ବଡ଼ ଭାଇ । ଏଭଳି ଏକ ହତ୍ୟାକାଣ୍ଡରେ ସାଥ୍ ଦେଇଛନ୍ତି ବଡ଼ ଭାଇର ୩ ପୁଅ । ମୃତକ ସାନ ଭାଇ ହେଲେ ରମେଶ ଶତପଥୀ । ପୁରୋହିତ କାମକୁ ନେଇ ଭାଇ ଭାଇ ମଧ୍ୟରେ ଥିଲା ବିବାଦ । ରମେଶ ବାଇକରେ ଘରକୁ ଫେରୁଥିବା ବେଳେ ଅତର୍କିତ ଆକ୍ରମଣ କରି ଛୁରୀରେ ତଣ୍ଟି କାଟି ଦେଇଥିଲେ ନିଜ ଲୋକ । ବାଇକରୁ ପଡ଼ିଯିବା ପରେ ପଥରରେ ଛେଚି ମରଣାନ୍ତକ ଆକ୍ରମଣ କରାଯାଇଥିବା ସୂଚନା ମିଳିଛି । ତେବେ ସୂଚନା ପାଇ ଘଟଣାସ୍ଥଳରେ ଜଗନ୍ନାଥପ୍ରସାଦ ପୋଲିସ ପହଞ୍ଚି ତଦନ୍ତ କରୁଛି ।
ଶିବରାତ୍ରୀରେ ତନ୍ତ୍ର ସାଧାନା ପାଇଁ ସ୍ତ୍ରୀକୁ ବଳି, ହତ୍ୟା ପରେ ଜଙ୍ଗଲରେ ପୂଜା
ଢେଙ୍କାନାଳ: ଶିବରାତ୍ରିରେ ତନ୍ତ୍ର ପାଇଁ ବଳି ପଡ଼ିଲା ସ୍ତ୍ରୀ । ପିଶାଚ ସ୍ୱାମୀର ନାରକୀୟ କାଣ୍ଡ । ଢେଙ୍କାନାଳ ଜିଲ୍ଲା ପରଜଙ୍ଗ ଥାନା ଆମ୍ବପଳାସ ଗାଁରେ ବୀଭତ୍ସ ହତ୍ୟାକାଣ୍ଡ ଘଟିଛି । ସ୍ତ୍ରୀକୁ ହତ୍ୟା ପରେ ଉଲଗ୍ନ କରି ଜଙ୍ଗଲ ମଧ୍ୟରେ ଥିବା ପୀଠରେ ପୂଜା କଲା ପିଶାଚ ସ୍ୱାମୀ। ହତ୍ୟାକାଣ୍ଡର କାରଣ ଅସ୍ପଷ୍ଟ ଥିବା ବେଳେ ତନ୍ତ୍ର ସାଧନା ପାଇଁ ସ୍ତ୍ରୀକୁ ସ୍ବାମୀ ହତ୍ୟା କରିଥିବା ସନ୍ଦେହ କରାଯାଉଛି । ମୃତକ ହେଲେ ଆମ୍ବପଳାସ ଗାଁର ମମତା ଖଟୁଆ । ମମତାଙ୍କ ଦେହରେ ଅନେକ କ୍ଷତ ଚିହ୍ନ ରହିଛି । ପୂର୍ବରୁ ମହିଳା ଜଣଙ୍କ ନିଜ ସ୍ୱାମୀ ଓ ତିନି ପିଲାଙ୍କୁ ଛାଡ଼ି ଅଷ୍ଟମ ଖଟୁଆ ସହିତ ପଳାଇ ଯାଇଥିଲେ । ପାରିବାରିକ ଜୀବନରେ ପ୍ରତିଦିନ କଳହ ହେଉଥିବା ପୋଲିସ ସୂତ୍ରରୁ ସୂଚନା ମିଳିଛି । ପିଶାଚ ସ୍ୱାମୀ ଅଷ୍ଟମ ଖଟୁଆକୁ ପରଜଙ୍ଗ ପୋଲିସ ଅଟକ ରଖିଛି ।
ପଶ୍ଚିମବଙ୍ଗ ଆସନସୋଲ ସେନେରାଲର ହୋଟେଲରେ ଗୁଳିମାଡ଼, ହୋଟେଲରେ ପଶି ମାଲିକଙ୍କୁ ୫ ରାଉଣ୍ଡ ଫାୟାରିଂ
କୋଲକାତା: ହୋଟେଲରେ ପଶି ମାଲିକଙ୍କୁ ୫ ରାଉଣ୍ଡ ଗୁଳି ଚାଳନା । ଦୁର୍ବୃତ୍ତ ଫେରାର, ସିସିଟିଭିରେ କଏଦ ହୋଇଛି ହତ୍ୟାର ଦୃଶ୍ୟ । ସିସିଟିଭି ଫୁଟେଜ୍ ଆଧାରରେ ତଦନ୍ତ ଆରମ୍ଭ କରିଛି ପୋଲିସ । ପଶ୍ଚିମବଙ୍ଗର ଆସାନସୋଲ ଜିଲ୍ଲା ସେନେରାଲ୍ ରୋଡରେ ଥିବା ଏକ ହୋଟେଲରେ ପଶି ମାଲିକ ଅରବିନ୍ଦଙ୍କୁ ଗୁଳି କରିଛନ୍ତି ଦୁର୍ବୃତ୍ତ । ହୋଟେଲରେ ଅନ୍ୟ ଦୁଇ ଲୋକଙ୍କ ସହ ଆଲୋଚନା କରୁଥିବା ବେଳେ ଅଚାନକ ହୋଟେଲ ଭିତରେ ଦୁର୍ବୃତ୍ତ ଅରବିନ୍ଦଙ୍କ ପେଟ ଓ ଛାତିକୁ ୫ ରାଉଣ୍ଡ ଗୁଳିକରି ଫେରାର ହୋଇ ଯାଇଛନ୍ତି । ଗୁରୁତର ଓ ରକ୍ତାକ୍ତ ଅବସ୍ଥାରେ ହୋଟେଲ ମାଲିକ ଅରବିନ୍ଦଙ୍କୁ ମେଡିକାଲରେ ଭର୍ତ୍ତି କରାଯାଇଥିଲା । ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଛନ୍ତି ।
‘ସକାଳ’ ଓ ‘ନନ୍ଦିଘୋଷ ଟିଭି’ ପକ୍ଷରୁ ଚିତ୍ରାଙ୍କନ ପ୍ରତିଯୋଗିତା, ୩ଟି କାଟାଗୋରିରେ କୃତୀ ପ୍ରତିଯୋଗୀଙ୍କୁ କରାଗଲା ପୁରସ୍କୃତ
ଭୁବନେଶ୍ୱର: ‘ନନ୍ଦିଘୋଷ ଟିଭି’ ଓ ‘ସକାଳ’ ପରିବାର ପକ୍ଷରୁ ବୁଦ୍ଧ ପାର୍କରେ ଆୟୋଜିତ ହୋଇଛି ହର ହର ମହାଦେବ ଚିତ୍ରାଙ୍କନ ପ୍ରତିଯୋଗିତା । ମହାଶିବରାତ୍ରୀ ଅବସରରେ ଚିତ୍ରାଙ୍କନ ପ୍ରତିଯୋଗିତା ଅନୁଷ୍ଠିତ ହୋଇଛି । କାର୍ଯ୍ୟକ୍ରମରେ ବିଭିନ୍ନ ସ୍କୁଲର ୫୦୦ରୁ ଅଧିକ ଛାତ୍ରଛାତ୍ରୀ ସାମିଲ ହୋଇଥିଲେ । ପ୍ରଥମରୁ ଦଶମ ଶ୍ରେଣୀ ପର୍ଯ୍ୟନ୍ତ ଛାତ୍ରଛାତ୍ରୀମାନେ ଏହି ପ୍ରତିଯୋଗିତାରେ ଅଂଶଗ୍ରହଣ କରିଥିଲେ । ପ୍ରଥମରୁ ତୃତୀୟ, ଚତୁର୍ଥରୁ ଷଷ୍ଠ ଓ ସପ୍ତମରୁ ଦଶମ ୩ଟି ବିଭାଗରେ ପ୍ରତିଯୋଗିତା ହୋଇଥିଲା । ପିଲାମାନଙ୍କ ମଧ୍ୟରେ ଅତ୍ୟନ୍ତ ଉତ୍ସାହ ଦେଖିବାକୁ ମିଳିଥିଲା । ବିଭିନ୍ନ ସମସାମୟିକ ପ୍ରସଙ୍ଗକୁ ନେଇ ଚିତ୍ର ଆଙ୍କିଥିଲେ ଛାତ୍ରଛାତ୍ରୀ । କୃତି ପ୍ରତିଯୋଗୀମାନଙ୍କୁ ଟ୍ରଫି ଓ ପ୍ରମାଣପତ୍ର ଦେଇ ପୁରସ୍କୃତ କରାଯାଇଥିଲା । ଅଂଶଗ୍ରହଣ କରିଥିବା ସମସ୍ତ ପ୍ରତିଯୋଗୀଙ୍କୁ ମଧ୍ୟ ପ୍ରମାଣପତ୍ର ଦିଆଯାଇଥିଲା ।
ପ୍ରଥମରୁ ତୃତୀୟ ଶ୍ରେଣୀ ଛାତ୍ରଛାତ୍ରୀଙ୍କୁ ନେଇ ହୋଇଥିବା କାଟାଗୋରୀ-୧ରେ ପ୍ରିୟାଂଶୀ ମହାପାତ୍ର ପ୍ରଥମ ସ୍ଥାନ ଅକ୍ତିଆର କରିଥିବା ବେଳେ, ନମନ ପଣ୍ଡା ଦ୍ବିତୀୟ ଓ ଚେରି ସାହୁ ଓ ଅମ୍ରିତା ପ୍ରଧାନ ତୃତୀୟ ସ୍ଥାନ ହାସଲ କରିଛନ୍ତି । ସେହିପରି ଚତୁର୍ଥରୁ ଷଷ୍ଠ ଶ୍ରେଣୀ ଛାତ୍ରଛାତ୍ରୀଙ୍କୁ ନେଇ ହୋଇଥିବା କାଟାଗୋରୀ-୨ରେ ଶ୍ରୀୟାଂସ ଦାସ ପ୍ରଥମ ସ୍ଥାନ ହାସଲ କରିଛନ୍ତି । ସେହିପରି ଦ୍ୱିତୀୟରେ ଚିତ୍ରାଞ୍ଜଳି ପ୍ରିୟଦର୍ଶିନୀ ଥିବା ବେଳେ ତୃତୀୟରେ ମନିଷା ପ୍ରିୟଦର୍ଶିନୀ ନାୟକ ଓ ଚତୁର୍ଥରେ ନିଖିଲରାଜ ନାୟକ ଓ ସଚିକା ମହାନ୍ତିଙ୍କୁ ପୁରସ୍କୃତ କରାଯାଇଛି । ତୃତୀୟ କାଟାଗୋରିରେ ଆୟୁଷ୍ମାନ ଦେହୁରି ଓ ଅନ୍ୱେଷା ମିଶ୍ର ପ୍ରଥମ ସ୍ଥାନ ହାସଲ କରିଛନ୍ତି । ସେହିପରି ଦ୍ୱିତୀୟରେ ଶୁଭଙ୍କର ଦାସ, ତୃତୀୟରେ ଲକ୍ଷ୍ମୀ ମହାରଣା ଓ ଚତୁର୍ଥ ସ୍ଥାନ ହାସଲ କରିଛନ୍ତି ଶ୍ରବଣ କୁମାର ସାହୁ ।
ଏହି ପ୍ରତିଯୋଗିତାର ବିଚାରକ ଦାୟିତ୍ୱ ତୁଲାଇଥିଲେ ବିକେ ଆର୍ଟ କଲେଜର ଅଧ୍ୟକ୍ଷ ଗଜେନ୍ଦ୍ର ପାଢ଼ୀ, ଚିତ୍ରଶିଳ୍ପୀ ଚିନ୍ତାମଣି ବିଶ୍ୱାଳ, ପ୍ରିୟଙ୍କା ସାହାଣୀ ଓ ଶୁଦ୍ଧସତ୍ତା ମିଶ୍ର । ନନ୍ଦିଘୋଷ ଟିଭିର ମୁଖ୍ୟ ସମ୍ପାଦକ ଶିଶିର ଭଟ୍ଟମିଶ୍ରଙ୍କ ସଂଯୋଜନାରେ ପ୍ରତିଯୋଗିତା ଆୟୋଜିତ ହୋଇଥିବାବେଳେ ସକାଳର ସିଇଓ ସୁବ୍ରତ ଦାସ, ପ୍ରକାଶକ ଅମିତ କୁମାର ମଲ୍ଲିକ, ବ୍ୟୁରୋ ମୁଖ୍ୟ ରଞ୍ଜିତ ମହାନ୍ତି ପ୍ରମୁଖ ଉପସ୍ଥିତ ରହି ପ୍ରତିଯୋଗୀଙ୍କୁ ଉତ୍ସାହିତ କରିଥିବାବେଳେ ବିଚାରକମଣ୍ଡଳୀଙ୍କୁ ଉପଢ଼ୌକନ ଦେଇ ସମ୍ବର୍ଦ୍ଧିତ କରିଥିଲେ । ନନ୍ଦିଘୋଷ ଟିଭି ଓ ସକାଳ ପରିବାରର କର୍ମଚାରୀମାନେ ଉପସ୍ଥିତ ରହି ପ୍ରତିଯୋଗୀଙ୍କୁ ଉତ୍ସାହିତ କରିବା ସହ ସହଯୋଗ କରିଥିଲେ । ପବିତ୍ର ଶିବରାତ୍ରୀରେ ଏହି ଚିତ୍ରାଙ୍କନ ପ୍ରତିଯୋଗିତାରେ ଅଂଶ ଗ୍ରହଣ କରିବାକୁ ଛାତ୍ରଛାତ୍ରୀଙ୍କ ମଧ୍ୟରେ ବେଶ୍ ଉତ୍ସାହ ପରିଲିକ୍ଷିତ ହୋଇଥିଲା । ବହୁ ସଂଖ୍ୟାରେ ଅଭିଭାବକ ଉପସ୍ଥିତ ରହି ପିଲାମାନଙ୍କୁ ଉତ୍ସାହିତ କରିଥିଲେ ।
କାଳ ସାଜିଲା ଜେନେରେଟର ଧୂଆଁ, ଘରେ ଶୋଇଥିବା ବେଳେ ଶ୍ୱାସରୁଦ୍ଧ ହୋଇ ଚାଲିଗଲା ୨ ଜୀବନ
ଗଜପତି: ବାହାଘର ଭୋଜି ଚାଲିଥିବା ବେଳେ ଅଘଟଣ । ଘରେ ଶୋଇଥିବା ବେଳେ ଶ୍ୱାସରୁଦ୍ଧ ହୋଇ ଚାଲିଗଲା ୨ ଜଣଙ୍କ ଜୀବନ । ଜଣେ ଗୁରୁତର ମେଡିକାଲରେ ଭର୍ତ୍ତି । ଘଟଣା ଘଟିଛି ଗଜପତି ଜିଲ୍ଲା ଆର୍ ଉଦୟଗିରି ଥାନା ବେତାରସିଂ ଗାଁରେ । ଗାଁର କମଳ ନାୟକଙ୍କ ପରିବାରରେ ବାହାଘର ଭୋଜି ଚାଲିଥିଲା । ବାପା ମାଧବ ନାୟକ, ଭାଇ ଗଣେଶ ନାୟକ ଓ ଦୁଇଝିଅ ଅମ୍ବିକା ଓ ଝୁମୁରି ନାୟକ ଭୋଜି ଭାତ ଖାଇ ଘରେ ଶୋଇଥିଲେ । ଘର ସମୁଖରେ ଗୋଟିଏ ଜେନେରେଟର୍ ଲାଗିଥିଲା । ଜେନେରେଟରରୁ ବାହାରୁଥିବା ଧୂଆଁରେ ଅଣନିଶ୍ବାସୀ ହୋଇ ଭାଇ ଗଣେଶ ନାୟକ ଓ ଝିଅ ଅମ୍ବିକା ନାୟକଙ୍କ ମୃତ୍ୟୁ ହୋଇଛି । ବାପା ମାଧବ ସୁସ୍ଥ ଥିବା ବେଳେ ଗୁରୁତର ଅନ୍ୟ ଏକ ଝିଅ ଝୁମୁରିଙ୍କୁ ବ୍ରହ୍ମପୁର ମେଡିକାଲକୁ ସ୍ଥାନାନ୍ତର କରାଯାଇଛି । ଚନ୍ଦ୍ରଗିରି ପୋଲିସ ଫାଣ୍ଡି ଅଧିକାରୀ ଘଟଣାସ୍ଥଳରେ ପହଞ୍ଚି ଘଟଣାର ଅନୁଧ୍ୟାନ କରୁଛନ୍ତି ।