ପର୍ଥ: ଟି୨୦ ବିଶ୍ୱ କପରେ ଭାରତ ଦକ୍ଷିଣ ଆଫ୍ରିକା ମଧ୍ୟରେ କଡା ଟକ୍କର । ଭାରତ ପ୍ରଥମେ ବ୍ୟାଟିଂ କରି ଦକ୍ଷିଣ ଆଫ୍ରିକାକୁ ୧୩୪ ରନର ଟାର୍ଗେଟ ଦେଇଛି । ଟିମ୍ ଇଣ୍ଡିଆ ନିର୍ଦ୍ଧାରିତ ୨୦ ଓଭରରେ ୯ ୱିକେଟ ହରାଇ ୧୩୩ ରନ କରିଛି । ସୂର୍ଯ୍ୟକୁମାର ଯାଦବ ଲଢ଼ୁଆ ଅର୍ଦ୍ଧଶତକ ପାଳି ଭାରତକୁ ଆଗକୁ ନେବାରେ ସହାୟକ ହୋଇଛି ।
ପର୍ଥ: ବ୍ୟାଟିଂ ଆରମ୍ଭରୁ ଭାରତର ବିପର୍ଯ୍ୟୟ । ଟି-ଟ୍ବେଣ୍ଟି ବିଶ୍ବକପ ମୁକାବିଲାରେ ଭାର-ଦକ୍ଷିଣ ଆଫ୍ରିକା ମଧ୍ୟରେ ଚାଲିଛି ମ୍ୟାଚ । ହାଇଭୋଲଟେଜ୍ ଟକ୍କର ଭିତରେ ଭାରତ ୪୯ ରନ୍ ସୁଦ୍ଧା ୫ଟି ୱିକେଟ ହରାଇ ସାରିଛି । ରୋହିତ, ରାହୁଲ, କୋହଲି, ପାଣ୍ଡ୍ୟା, ଦୀପକ ହୁଡାଙ୍କ ମଧ୍ୟ ଆୱଟ ହୋଇଛି ।
ଭବାନୀପାଟଣା: ଦୁର୍ଘଟଣାର ଭୟଙ୍କର ଦୃଶ୍ୟ । ଭବାନୀପାଟଣାରେ ଦବିଲା ପୋଲ। ଫସିଲା ଦୁଇଟି କାର । କଳାହାଣ୍ଡି ଭବାନୀପାଟଣା ଭାଗିରଥି ପାର୍କ ପାଖରେ ପୋଲ ଦବି ଯିବାରୁ ଦୁଇଟି କାର ପୋଲ ଭିତରେ ଫସି ଯାଇଥିଲେ । ସୌଭାଗ୍ୟ ବଶତଃ ଯାତ୍ରୀମାନଙ୍କର ବିଶେଷ କ୍ଷୟକ୍ଷତି ଘଟିନାହିଁ । ପୋଲରେ ଦୁଇଟି କାର ଫସିରହିଥିବାବେଳେ ଯାତ୍ରୀ ମାନେ ମଧ୍ୟ ଫସି ରହିଥିଲେ ।
ସ୍ଥାନୀୟ ଲୋକ ଏବଂ ପୋଲିସ ପ୍ରଶାସନର ସହଯୋଗରେ ଫସି ରହିଥିବା ଯାତ୍ରୀଙ୍କୁ ଉଦ୍ଧାର କରାଯାଇ ସ୍ଥାନୀୟ ମେଡିକାଲରେ ଭର୍ତ୍ତି କରାଯାଇଛି । ଭବାନୀପାଟଣା ମୁଖ୍ୟ ଚିକିତ୍ସାଳୟରେ ସମସ୍ତଙ୍କ ଚିକିତ୍ସା ଜାରି ରହିଛି । ମିଳିଥିବା ସୂଚନା ମୁତାବକ ଦୁର୍ଘଟଣାର ଶିକାର ହୋଇଥିବା ଯାତ୍ରୀଙ୍କ ମୁଣ୍ଡରେ ଆଘାତ ଲାଗିଛି । ସେପଟେ କାର୍ଯ୍ୟକାରୀ ପୋଲଟି ହଠାତ କିପରି ଦବିଗଲା ତାବା ବର୍ତ୍ତମାନ ବଡ଼ ପ୍ରଶ୍ନ ।
ନବରଙ୍ଗପୁର: ୨ଦିନ ପରେ ଶବକୁ ମିଳିଲା ଶ୍ମଶାନ । ପ୍ରଶାସନର ହସ୍ତକ୍ଷେପ ପରେ କରାଗଲା ଶେଷକୃତ୍ୟ । ନବରଙ୍ଗପୁର ଜିଲ୍ଲା ଗୁଲିବାଡ଼ନା ଗାଁରେ ବିବାଦର ସମାଧାନ କରି ଜଣେ ମୃତ ବ୍ୟକ୍ତିଙ୍କର ଶବ ସତ୍କାର କରିଛି ପ୍ରଶାସନ । ଅଭିଯୋଗ ଅନୁସାରେ ଶୁକ୍ରବାର ଜିତ୍ରୁ ଭତ୍ରାଙ୍କର ମୃତ୍ୟୁ ହୋଇଥିଲା । କିନ୍ତୁ ସେ ଧର୍ମ ପରିବର୍ତ୍ତନ କରିଥିବାରୁ ଗାଁ ଲୋକ ତାଙ୍କ ମୃତଦେହକୁ ମଶାଣିକୁ ନେବାକୁ ବାରଣ କରିଥିଲେ । ବହୁ ବୁଝାସୁଝା ପରେ ବି ଲୋକ ମାନି ନଥିଲେ । ପରେ ମୃତଦେହଟି ପଡ଼ି ରହିଥିଲା ।
ଏନେଇ ପୋଲିସ ସୂଚନା ପାଇବା ପରେ ଘଟଣାସ୍ଥଳରେ ପହଞ୍ଚି ଲୋକଙ୍କୁ ବୁଝାସୁଝା କରିଥିଲା । ଝରିଗାଁ ତହସିଲଦାର ଓ ଅତିରିକ୍ତ ତହସିଲଦାରଙ୍କ ଉପସ୍ଥିତିରେ ଆଲୋଚନା କରାଯାଇଥିଲା । ଶେଷରେ ଶବ ସଂସ୍କାର ପାଇଁ ରାଜି ହୋଇଥିଲେ ଗ୍ରାମବାସୀ । ପରେ ଭୀମାଗୁଡ଼ା ଶ୍ମଶାନରେ ମୃତକଙ୍କ ଶବ ସଂସ୍କାର କରାଯାଇଛି । ଆଗାମୀ ଦିନରେ ଯେପରି ଏଭଳି ସମସ୍ୟା ସୃଷ୍ଟି ନହେବ ସେଥିପ୍ରତି ଧ୍ୟାନ ଦିଆଯିବ ବୋଲି ପୋଲିସ କହିଛି ।
ବ୍ରିସବେନ: କଥାରେ ଅଛି କିସମତ ବଡି କମିନା ଚିଜ୍ ହେ… । କାହାର ଭାଗ୍ୟ ପରିବର୍ତ୍ତନ କରି ଦିଏ ତ ଆଉ କାହାର ହାତରୁ ଆସିଥିବା ସୁଯୋଗକୁ ଛଡ଼ାଇ ନିଏ । ଯାହା ଦେଖିବାକୁ ମିଳିଥିଲା T20 ବିଶ୍ବକପର ବାଂଲାଦେଶ ଓ ଜିମ୍ବାଓ୍ବେ ମ୍ୟାଚରେ । ଶେଷ ଓଭରର ଦୁଇ ବଲରେ ଦୁଇ ଓ୍ବିକେଟ ହରାଇଲା ଜିମ୍ବାଓ୍ବେ । ମ୍ୟାଚ ହାରିଲା । ହେଲେ ଶେଷ ବଲକୁ ଆମ୍ପେୟାର ନୋ ବଲ୍ ଡାକିବା ପରେ ହାରିବା ମ୍ୟାଚ ଜିତିବାର ସୁଯୋଗ ପାଇଲା ଜିମ୍ବାଓ୍ବେ । ହେଲେ ଭାଗ୍ୟ ଭାଗ୍ୟଦେବୀ ଦେଲେନି ସାଥ୍ । ହାରିଲା ଜିମ୍ବାଓ୍ବେ ।
କ୍ରିକେଟ୍ । ଭଦ୍ର ଲୋକଙ୍କ ଖେଳ କ୍ରିକେଟ ଯେତିକି ମଜାଦାର, ସେତିକି ରୋମାଞ୍ଚକ । ପ୍ରତିଟି ବଲ ଲେଖେ ବିଜୟ ଓ ପରାଜୟର କାହାଣୀ । ଏହା କେବଳ ଟିମ୍ ଓ ତାଙ୍କ ଖେଳାଳିଙ୍କ ଦକ୍ଷତା ଉପରେ ନିର୍ଭର କରିଥାଏ ବଲଟି କାହା ସପକ୍ଷରେ ଯିବ । ଟି ୨୦ ବିଶ୍ବକପରେ ବାଂଲାଦେଶ-ଜିମ୍ବାଓ୍ବେ ମ୍ୟାଚ ମଧ୍ୟ ଥିଲା ଠିକ ସେମିତି । ଶେଷ ଓଭର ନାଟକୀୟ, ରୋମାଞ୍ଚକ । ଯାହା ବଢ଼ାଇ ଦେଇଥିଲା କ୍ରିକେଟ ପ୍ରେମୀଙ୍କ ହୃଦସ୍ପନ୍ଦନ ।
ଶେଷ ଓଭରରେ ଜିମ୍ବାଓ୍ବେକୁ ବିଜୟ ପାଇଁ ଦରକାର ହେଉଥିଲା ୧୬ ରନ୍ । ୪ଟି ବଲରେ ଦଳ ୧୧ ରନ୍ କରି ନେଇଥିଲା । ଲାଗୁଥିଲା ଜିମ୍ବାଓ୍ବେ ମ୍ୟାଚ ଜିତି ଯିବ । ହେଲେ ବାଂଲାଦେଶୀ ବୋଲର୍ ଜବରଦସ୍ତ କମବ୍ୟାକ କରିଥିଲେ । ଶେଷ ଦୁଇ ବଲରେ ଜିମ୍ବାଓ୍ବେର ଦୁଇଟି କ୍ରିକେଟ୍ ନେଇ ଖେଳ ଶେଷ କରିଥିଲେ ବାଂଲାଦେଶ ବୋଲର୍ । ହେଲେ ଏଠି ଜିମ୍ବାଓ୍ବେ ବ୍ୟାଟ୍ସମ୍ୟାନଙ୍କୁ ମିଳିଥିଲା କିସମତ କୀ ସାଥ୍ । ଶେଷ ବଲକୁ ଥାର୍ଡ ଅମ୍ପେୟାର ନୋ ବଲ୍ ଡିକ୍ଲାର କରିଥିଲେ । କାରଣ ବାଂଲାଦେଶ ସ୍ବିକେଟ କିପର୍ ନୁରୁଲ ହସନ ଷ୍ଟମ୍ପ ଆଗରୁ ବଲ୍ କଲେକ୍ଟ କରି ଷ୍ଟମ୍ପିଂ କରିଥିଲେ ।
ଅମ୍ପେୟାରଙ୍କ ନିଷ୍ପତ୍ତି ସତେ ଯେମିତି ଜିମ୍ବାଓ୍ବେ ଡ୍ରସିଂ ରୁମରେ ନୂଆ ଆଶା ସଞ୍ଚାର କରିଥିଲା । ହାରି ସାରିଥିବା ମ୍ୟାଚ୍ ଜିତିବାକୁ ଆଉ ଏକ ସୁଯୋଗରେ ଉତ୍ସାହିତ ହୋଇ ଯାଇଥିଲେ ଜିମ୍ବାଓ୍ବେ ବ୍ୟାଟ୍ସମ୍ୟାନ । ହେଲେ କିସମତରୁ ପାଇଥିବା ଏହି ସୁଯୋଗକୁ ବିଜୟରେ ପରିଣତ କରି ପାରି ନଥିଲେ ଜିମ୍ବାଓ୍ବେ ବ୍ୟାଟ୍ସମ୍ୟାନ । ଶେଷ ବଲରେ ୪ ରନ୍ ଆବଶ୍ୟକ ହେଉଥିବା ବେଳେ ଜିମ୍ବାଓ୍ବେ ମାତ୍ର ଏକ ରନ୍ କରିବାକୁ ସକ୍ଷମ ହୋଇଥିଲା । ଫଳରେ ବାଂଲାଦେଶ ୩ ରନରେ ବିଜୟୀ ହୋଇଥିଲା । ଯାହା ପୁଣି ଥରେ ପ୍ରମାଣିତ କରିଥିଲା କ୍ରିକେଟ ଅନିଶ୍ଚିତତାର ଖେଳ । ଏଠି ସବୁ ସମ୍ଭବ ।
ପର୍ଥ: ଟସ ଜିତି ବ୍ୟାଟିଂ କରିବ ଭାରତ । ସୁପର ସଣ୍ଡେରେ ହେବ ସୁପର ଫାଇଟ୍ । ଟି-୨୦ ବିଶ୍ବକପର ମହାଟକ୍କର ଦେଖିବାକୁ ମିଳିବ । ପର୍ଥରେ ଦକ୍ଷିଣ ଆଫ୍ରିକାକୁ ବୋଲିଂ କରିବ ଏବଂ ଟିମ୍ ଇଣ୍ଡିଆ କରିବ ବ୍ୟାଟିଂ । ଅପରାହ୍ନ ୪ଟା ୩୦ରୁ ମ୍ୟାଚ୍ ଆରମ୍ଭ ହେବାକୁ ଥିବାବେଳେ ଟସ ଜିତି ବ୍ୟାଟିଂ କରିବା ନେଇ ଭାରତ ନିଷ୍ପତ୍ତି ନେଇଛି । ଚଳିତ ଟ୍ବେଣ୍ଟି-୨୦ ବିଶ୍ବକପ୍ରେ ଭାରତ ପ୍ରଥମ ଦୁଇଟି ମ୍ୟାଚ୍ ଜିତି ସେମିଫାଇନାଲ୍ ଦୌଡ଼ରେ ଆଗରେ ରହିଛି । ଦୁଇଟି ମ୍ୟାଚ ଜିତି ୪ପଏଣ୍ଟ ସହ ପଏଣ୍ଟ ଟେବୁଲର ଶୀର୍ଷରେ ରହିଛି ଦଳ ।
୧୧ ଜଣଙ୍କ ମଧ୍ୟରେ କେବଳ କେ.ଏଲ୍ ରାହୁଲଙ୍କୁ ଛାଡ଼ିଦେଲେ ଅନ୍ୟମାନେ ପ୍ରଭାବୀ ପ୍ରଦର୍ଶନ ଦେଇ ଚାଲିଛନ୍ତି । ହେଲେ ରାହୁଲ ଦୁଇଟି ମ୍ୟାଚ୍ରେ ମାତ୍ର ୧୩ ରନ୍ କରିଛନ୍ତି । ତେଣୁ ଆଜି ଖେଳାଳି ତାଲିକାରେ ପରିବର୍ତ୍ତନ ନେଇ ଆକଳନ କରିଛନ୍ତି କ୍ରୀଡାବିତ୍ । ଅନ୍ୟପକ୍ଷରେ ଦକ୍ଷିଣ ଆଫ୍ରିକା ୨ଟି ମ୍ୟାଚ ଖେଳିଥିବାବେଳେ ଗୋଟିଏ ମ୍ୟାଚ ବର୍ଷା କାରଣରୁ ବାତିଲ ହୋଇଥିଲା । ତେଣୁ ପଏଣ୍ଟ ଟେବୁଲର ଦ୍ବିତୀୟ ସ୍ଥାନରେ ରହିଛି । ପ୍ରଥମ ମ୍ୟାଚ ଜିମ୍ବାଓ୍ବେ ସହ ବାତିଲ ହୋଇଥିଲା । ତେବେ ଦ୍ବିତୀୟ ମ୍ୟାଚରେ ବାଂଲାଦେଶରୁ ହରାଇ ୩ ପଏଣ୍ଟ ହାସଲ କରିଛି । ତେଣୁ ଆଜି ମ୍ୟାଚ ଜିତିବାକୁ ଦଳ ଭରପୂର ଉଦ୍ୟମ କରିବ ।
ନୂଆଦିଲ୍ଲୀ: ମୁଖ୍ୟ ନିର୍ବାଚନ ଅଧିକାରୀଙ୍କ ନିକଟରେ ପୁଣି ଫେରାଦ ହେଲା ବିଜେଡି ଟିମ୍ । ଧାମନଗର ଉପନିର୍ବାଚନ ବେଳେ କେନ୍ଦ୍ରମନ୍ତ୍ରୀ ବିଶ୍ବେଶ୍ବର ଟୁଡୁଙ୍କ ମିଥ୍ୟା ପ୍ରତିଶ୍ରୁତିକୁ ନେଇ ଅଭିଯୋଗ କରିଛି ବିଜେଡି । ଏଭଳି ପ୍ରତିଶ୍ରୁତି ଅବୈଧ ପ୍ରତିଶ୍ରୁତି ବୋଲି ବିଜେଡି କହିଛି । ଏହାସହ ବିଜେପି ବାରମ୍ବାର ନିର୍ବାଚନୀ ଆଚରଣ ବିଧି ଉଲ୍ଲଂଘନ କରିଆସୁଥିବା ଦଳ ଅଭିଯୋଗ କରିଛି ।
ଧାମନଗର ଉପନିର୍ବାଚନକୁ ମୁକ୍ତ, ଅବାଧ ଓ ନିରପେକ୍ଷ କରିବାକୁ ବିଜେଡି ଦାବି କରିଛି । ଏହାସହ ପ୍ରତି ପଞ୍ଚାୟତରେ କଡା ନଜର ରଖିବା ସାଙ୍ଗକୁ ଆଦର୍ଶ ଆଚରଣ ବିଧି ଉଲ୍ଲଂଘନ କରୁଥିବା ନେତାଙ୍କ ବିରୋଧରେ କାର୍ଯ୍ୟାନୁଷ୍ଠାନ ନେବାକୁ ଦଳ ଦାବି କରିଛି । ବିଜେଡି ମୁଖପାତ୍ର ଲେନିନ ମହାନ୍ତିଙ୍କ ନେତୃତ୍ବରେ ଏକ ପ୍ରତିନିଧି ଦଳ ରାଜ୍ୟ ମୁଖ୍ୟ ନିର୍ବାଚନ ଅଧିକାରୀଙ୍କୁ ଭେଟି ଅଭିଯୋଗ କରିଛନ୍ତି ।
ଭୁବନେଶ୍ବର: ଆସନ୍ତାକାଲିଠାରୁ ଓଡ଼ିଶାରେ କଂଗ୍ରେସ ଆରମ୍ଭ କରିବ ଭାରତ ଯୋଡୋ ଯାତ୍ରା । ଭୁବନେଶ୍ୱର ଇନ୍ଦିରା ଗାନ୍ଧୀ ପାର୍କରେ ସକାଳ ସାଢେ ୮ଟା ବେଳେ ଯାତ୍ରା ଆରମ୍ଭ ହେବ । ଏଥିରେ କଂଗ୍ରେସ ପ୍ରଭାରୀ ଚେଲ୍ଲା କୁମାର ଓ ଏଆଇସିସି ସମ୍ପାଦକ ରୁଦ୍ର ରାଜୁ ଯୋଗଦେବେ । ଏହାସହ ଅନ୍ୟ ନେତାମାନେ ମଧ୍ୟ ସାମିଲ ହେବେ । କେନ୍ଦ୍ର ସରକାର ଦରଦାମ ବୃଦ୍ଧି କରି କିପରି ଲୋକଙ୍କୁ ହନ୍ତସନ୍ତ କରୁଛନ୍ତି ସେନେଇ ଘରକୁ ଘର ଯାଇ କଂଗ୍ରେସ ଲୋକଙ୍କୁ ଅବଗତ କରାଇବ । ସାମ୍ବାଦିକ ସମ୍ମିଳନୀରେ ଏନେଇ ପିସିସି ସଭାପତି ଶରତ ପଟ୍ଟନାୟକ ସୂଚନା ଦେଇଛନ୍ତି ।
ଗାନ୍ଧିନଗର: ଗୁଜରାଟରେ ଏକକ ନାଗରିକ ସଂହିତା ବା ୟୁସିସି କାର୍ଯ୍ୟକାରୀ କରିବା ଲାଗି ରାଜ୍ୟ ସରକାରଙ୍କ ନିଷ୍ପତ୍ତି ପ୍ରସଙ୍ଗ । ସରକାରଙ୍କ ନିଷ୍ପତ୍ତି ନେଇ ପ୍ରକାଶ ପାଇଲା ମିଶ୍ରିତ ପ୍ରତିକ୍ରିୟା । ବିଜେପି ମିଛ କହୁଥିବା କହିଛନ୍ତି ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିଓ୍ବାଲ । ଉତ୍ତରପ୍ରଦେଶ, ମଧ୍ୟପ୍ରଦେଶରେ ବି ୟୁସିସି କାର୍ଯ୍ୟକାରୀ କାହିଁକି କରାଯାଉନାହିଁ ବୋଲି ସେ ପ୍ରଶ୍ନ କରିଛନ୍ତି ।
ସିପିଏମ ପକ୍ଷରୁ ରାଜ୍ୟ ସରକାରଙ୍କ ନିଷ୍ପତ୍ତିକୁ ତୀବ୍ର ବିରୋଧ କରାଯାଇଛି । ରାଜ୍ୟ ସରକାରଙ୍କ ଏହି ନିଷ୍ପତ୍ତି ଅନେକ ସନ୍ଦେହ ସୃଷ୍ଟି କରୁଛି ବୋଲି କହିଛନ୍ତି ଦଳର ନେତ୍ରୀ ସୁଭାଷିନୀ ଅଲ୍ଲୀ ।
ୟୁସିସି ପ୍ରସଙ୍ଗରେ କୌଣସି ଚିଠା ପ୍ରସ୍ତୁତ ହୋଇନାହିଁ କିମ୍ବା ଏଥିରେ କି କି ବ୍ୟବସ୍ଥା ରହିଛି ତାହାକୁ ପ୍ରକାଶ କରାଯାଇନାହିଁ । ସମସ୍ତଙ୍କୁ ଅନ୍ଧାରରେ ରଖି ଏହା ପ୍ରସ୍ତୁତ କରାଯାଇଛି । ସେପଟେ କେତେକ ମୁସଲିମ ନେତା ଏହାକୁ ସମର୍ଥନ କରିଛନ୍ତି । ବିଭିନ୍ନ ଦେଶରେ ଏକକ ନାଗରିକ ସଂହିତା ଚାଲୁଥିବାବେଳେ ଭାରତରେ ଏହା କାର୍ଯ୍ୟକାରୀ ହେବା ଆବଶ୍ୟକ ବୋଲି କହିଛନ୍ତି ଦିଲ୍ଲୀର ଧାର୍ମିକ ନେତା ମୌଲାନା ସୁଏବ କାସମୀ ।
ଗୁଜରାଟ ସରକାର ଗତକାଲି ୟୁସିସି କାର୍ଯ୍ୟକାରୀ କରିବା ଲାଗି ନିଷ୍ପତ୍ତି ନେବା ପରେ ଏହାକୁ ନେଇ ବଢିଥିଲା ବିବାଦ । ଜଣେ ଅବସରପ୍ରାପ୍ତ ହାଇକୋର୍ଟ ବିଚାରପତିଙ୍କ ଅଧ୍ୟକ୍ଷତାରେ ଗଠିତ କମିଟି ୟୁସିସିର କାର୍ଯ୍ୟକାରିତା ସମ୍ପର୍କିତ ସମସ୍ତ ଦିଗ ଅନୁଧ୍ୟାନ କରିବାକୁ ସରକାର ନେଇଥିଲେ ନିଷ୍ପତ୍ତି । ସମ୍ବିଧାନର ଧାରା ୪୪ ଅନୁସାରେ ଭାରତୀୟ ନାଗରିକଙ୍କ ଲାଗି ବିବାହ, ବିବାହ ବିଚ୍ଛେଦ, ଉତ୍ତରାଧିକାରୀତ୍ବ, ପୋଷ୍ୟ ଆଦି କ୍ଷେତ୍ରରେ ଗୋଟିଏ ନିୟମ ସାରା ଦେଶରେ ଲାଗୁ ପାଇଁ ୟୁସିସିରେ ରହିଛି ବ୍ୟବସ୍ଥା । ଗତ ମେ’ ମାସରେ ଉତ୍ତରାଖଣ୍ଡ ସରକାର ୟୁସିସି କାର୍ଯକାରୀ କରିବା ଲାଗି ନେଇଥିଲେ ନିଷ୍ପତ୍ତି । ରାଜ୍ୟ ସରକାରଙ୍କ ନିଷ୍ପତ୍ତିକୁ ଗତକାଲି ବିରୋଧ କରିଥିଲା ଅଲ ଇଣ୍ଡିଆ ମୁସଲିମ ପର୍ସନାଲ ଲ ବୋର୍ଡ ବା ଏଆଇଏମପିଏଲବି ।
ଗୋଲାପଲ୍ଲୀ: ତେଲେଙ୍ଗାନାରେ କଂଗ୍ରେସ ସାଂସଦ ରାହୁଲ ଗାନ୍ଧୀଙ୍କ ଭାରତ ଯୋଡୋ ପଦଯାତ୍ରା । ଆଜି ସକାଳୁ ଧରମାପୁରରୁ ପଦଯାତ୍ରା ଆରମ୍ଭ ହୋଇଛି । ରାହୁଲଙ୍କ ସହ ହଜାର ହଜାର ସମର୍ଥନ ପଦଯାତ୍ରାରେ ସାମିଲ ହୋଇଛନ୍ତି । ସୋସିଆଲ ମିଡିଆରେ ରାହୁଲଙ୍କ ତମାମ ଫଟୋ, ଭିଡିଓ ଭାଇରାଲ ହେଉଛି ।
ଏଥିରେ ରାହୁଲଙ୍କୁ ବିଭିନ୍ନ ମୁଡ଼ରେ ଦେଖିବାକୁ ମିଳିଥିଲା । କୋମୁ କୋୟା ଆଦିବାସୀଙ୍କ ସହ ମିଶି ରାହୁଲ ସାଂସ୍କୃତିକ ନୃତ୍ୟ ପରିବେଷଣ କରିଥିବା ବେଳେ ଗୋଲାପଲ୍ଲୀରେ ସ୍ଥାନୀୟ ଲୋକଙ୍କ ସହ ପାରମ୍ପରିକ ବାଥ୍ୟୁକାମ୍ମା ନୃତ୍ୟ କରିଥିଲେ । ସେହିପରି ପଦଯାତ୍ରା ବେଳେ ରାହୁଲ ଗାନ୍ଧୀ ସ୍କୁଲ ପିଲାଙ୍କ ସହ ଦୌଡୁଥିବାର ଏକ ଭିଡିଓ ଟ୍ବିଟରରେ ଟ୍ରେଣ୍ଡ କରୁଛି । ସ୍କଲ ପିଲାଙ୍କ ସହ ରହୁଲ ହଠାତ୍ ଦୌଡ଼ିବା ଆରମ୍ଭ କରିବା ପରେ ସିକ୍ୟୁରିଟି ଓ ସମର୍ଥକମାନେ ମଧ୍ୟ ଦୌଡ଼ିଥିଲେ । ଭିଡିଓ ଅପଲୋଡ ହେବାର ମାତ୍ର କିଛି ସମୟ ମଧ୍ୟକୁ ୫୦ ହଜାର ଲାଇକ ମିଳିଛି ।
ସେପଟେ ତାମିଲ ଅଭିନେତ୍ରୀ ପୁନମ କୌର କଂଗ୍ରେସ ପଦଯାତ୍ରାରେ ସାମିଲ ହୋଇଛନ୍ତି । ପଦଯାତ୍ରା ବେଳେ ରାହୁଲ ଗାନ୍ଧୀ ପୁନମଙ୍କ ହାତ ଧରିଥିବା ଫଟୋକୁ ନେଇ ବିଜେପି ନେତ୍ରୀ ଟୁଇଟ କରିଛନ୍ତି । ଯାହାକୁ ନେଇ ବିଜେପି ନେତ୍ରୀ ପ୍ରୀତି ଗାନ୍ଧୀଙ୍କୁ ଟାର୍ଗେଟ କରିଛି କଂଗ୍ରେସ । ଏଭଳି ଦୁର୍ବଳ ମାନସିକତା ନିଜ ପରିବାର ଓ ବନ୍ଧୁଙ୍କ ପାଇଁ ମଧ୍ୟ କ୍ଷତିକାରକ ବୋଲି କଂଗ୍ରେସ କହିଛି । ସେହିପରି ବିଜେପି ନେତ୍ରୀଙ୍କ ଏଭଳି ପୋଷ୍ଟକୁ ନେଇ ବର୍ଷିଛନ୍ତି ଶିବସେନା ସାଂସଦ ପ୍ରିୟଙ୍କା ଚତୁର୍ବେଦୀ ।
