ନନ୍ଦିଘୋଷ ବ୍ୟୁରୋ : ଚୋରା ମଦ ବୋଝେଇ କାରକୁ ଗୋଡାଇ ଧରିଲା ଅବକାରୀ ବିଭାଗ । ଅବକାରୀ ବିଭାଗର ଅଧିକାରୀଙ୍କୁ ଚକମା ଦେଇ କାରରେ କଟକ ଜିଲ୍ଲା ତିଗିରିଆ ଥାନା ଅଞ୍ଚଳରୁ ଚାଲାଣ ହେଉଥିଲା ଦେଶୀ ମଦ । ଦୀର୍ଘ ସମୟର ଛକାପଞ୍ଜା ପରେ ଶେଷରେ କାରକୁ ଧରିବାରେ ସଫଳ ହୋଇଛି ଅବକାରୀ ବିଭାଗ । ଆଠଗଡ ଥାନା କୋରଙ୍ଗା ଗ୍ରାମ ଏବଂ ତିଗିରିଆ ଥାନା ପାଇକସାହି ଗ୍ରାମରେ ଆଠଗଡ ଅବକାରୀ ବିଭାଗ ଓ ଆଠଗଡ ପୋଲିସ ଏକ ମିଳିତ ଚଡାଉ କରିଥିଲେ । ଉକ୍ତ ଚଢାଉରେ ସର୍ବମୋଟ ୧୭ ଶହ ୫୦ ଲିଟର ଦେଶୀ ମଦ ସହ ୧୫ ହଜାର ୪୭୦ ଲିଟର ମଦ ପ୍ରସ୍ତୁତ ନିମନ୍ତେ ବ୍ୟବହୃତ ହେଉଥିବା ଗୁଡ ପୋଚ ଉଦ୍ଧାର କରାଯାଇଛି । ସେଗୁଡିକୁ ଘଟଣାସ୍ଥଳରେ ନଷ୍ଟ କରାଯାଇଛି । ଏହାସହ ୨୫ ଗୋଟି ମଦ ରନ୍ଧା ପାଇଁ ବ୍ୟବହୃତ ହେଉଥିବା ଆଲୁମିନିଉମ ଡିସ୍କ ଜବତ କରିବା ସହ ୫ ଗୋଟି ମାମଲା ରୁଜୁ କରାଯାଇଛି।
ଏହି ଗାଁ ରେ ରୁହନ୍ତି ମାତ୍ର ଗୋଟିଏ ପରିବାର : ପରିବାର ସଦସ୍ୟ ସଂଖ୍ୟା ୪୦
ନନ୍ଦିଘୋଷ ବ୍ୟୁରୋ : କେବେ ଶୁଣିଛନ୍ତି ଗାଁ ରେ ଗୋଟିଏ ପରିବାର ରହିବା କଥା । ଏହି ଗାଁ ରେ ରୁହନ୍ତି ମାତ୍ର ଗୋଟଏ ପରିବାର । ପରିବାରର ସଦସ୍ୟ ସଂଖ୍ୟା ୧୦ କିମ୍ବା ୨୦ ନୁହେଁ ୪୦ ଜଣ ରହୁଛନ୍ତି ଗୋଟିଏ ପରିବାରରେ । ଶୁଣିକି ନିଶ୍ଚିତ ଆଶ୍ଚର୍ଯ୍ୟ ଲାଗୁଥିବ ହେଲେ କଥାଟି ସତ । ରାଞ୍ଚିର ଏହି ଅନନ୍ୟ ଗାଁ ଯେଉଁଠାରେ କେବଳ ଗୋଟିଏ ପରିବାର ବାସ କରନ୍ତି ।
ରାଞ୍ଚିରୁ ୪୦ କିଲୋମିଟର ଦୂରରେ ଖୁଣ୍ଟି ଜିଲ୍ଲାର ରାନିଆ ବ୍ଲକରେ ଏକ ଗାଁ ଅଛି, ଯେଉଁଠାରେ କେବଳ ଗୋଟିଏ ପରିବାର ବାସ କରନ୍ତି। ଏହି ଗାଁର ନାମ ଚେଙ୍ଗରେ। ଏହି ଗାଁର ମୋଟ ଚାଷଜମି ୮୭ ହେକ୍ଟର। ସରକାରୀ ଅଧିକାରୀ ମାନେ କୁହନ୍ତି ଯେ ସେମାନଙ୍କ ପାଇଁ ସବୁ ଯୋଜନା ବନେଇବା ପାଇଁ ପଡେ । ସେମାନେ ମଧ୍ୟ ସବୁ ଯୋଜନାର ଉପଯୁକ୍ତି ବ୍ୟବହାର କରିଥାନ୍ତି । ସେମାନେ ପ୍ରଧାନମନ୍ତ୍ରୀ ଆବାସ ଯୋଜନା ଭଳି ଅନେକ ଯୋଜନାର ଲାଭ ପାଇଛନ୍ତି। ସେମାନଙ୍କ ପିଲାମାନେ ପିଡିଏସ୍ ବ୍ୟବସ୍ଥା ମାଧ୍ୟମରେ ମାଗଣା ଶିକ୍ଷା, ରାସନ କାର୍ଡ ଏବଂ ପାଣି ପାଆନ୍ତି।
ଏହି ଗାଁ ରେ ଗୋଟିଏ ପରିବାରରେ ରୁହନ୍ତି ୪୦ ଜଣ ଲୋକ । ହେଲେ ସମୟ ବଢିବା ସହ କିଛି ଲୋକ ସେ ଯାଗା ଛାଡି ଯିବାକୁ ପସନ୍ଦ କରିଛନ୍ତି । କାରଣ ଏଠାରେ ମୌଳିକ ସୁବିଧାର ଘୋର ଅଭାବ ଦେଖା ଦେଉଥିଲା । ତେଣୁ ସେମାନେ ଗାଁ ଛାଡି ଯିବକୁ ପସନ୍ଦ କରୁଥିଲା । ରଣିଆ ବ୍ଲକର ଅଧିକାରୀମାନେ କୁହନ୍ତି ଯେ ଏଠାରେ ରହୁଥିବା ପରିବାରଗୁଡ଼ିକ ପଳୟନ କରିନାହାନ୍ତି । ସେମାନେ କୁହନ୍ତି ଯେ ଆମେ ଏଠାରେ ଶାନ୍ତିରେ ରହୁ, ଗାଈ, ମଇଁଷି ଛେଳି ଚରାଉ ଏବଂ ଖୁସିରେ ରହୁ। ଆମକୁ ବହୁତ ମୌଳିକ ସୁବିଧାର ଆବଶ୍ୟକତା ନାହିଁ। ଜଙ୍ଗଲରୁ ଯାହା ଆସେ ତାହା ଆମ ପାଇଁ ଯଥେଷ୍ଟ। ଆମକୁ କ୍ଷୀର ଦେବା ପାଇଁ ଆମ ପାଖରେ ଗୋଟିଏ ଗାଈ ଅଛି। ଛେଳିକୁ ବିକ୍ରି କରି ଓ କିଛି ଜମି ଚାଷ କରି ଆମର ଜୀବନ ଭଲରେ ଚାଲିଥାଏ।
ଏହି ଗାଁକୁ ପ୍ରଥମ ନଜରରେ ଦେଖିଲେ ଆପଣଙ୍କୁ ଏପରି ଲାଗିବ ଯେପରି ଆପଣ କୌଣସି ଜଙ୍ଗଲକୁ ଆସିଯାଇଛନ୍ତି ଏବଂ ଏଠାରେ କେହି ରହୁନାହାଁନ୍ତି। କିନ୍ତୁ ଏଠାରେ ଏକ ବହୁତ ବଡ଼ ଘର ଅଛି ଯେଉଁଠାରେ ଆପଣ କେବଳ ଗୋଟିଏ ପରିବାରକୁ ହସୁଥିବା ଓ ଖେଳୁଥିବା ଦେଖିବେ।
ଏହି ପରିବାରର ଜଣେ ସଦସ୍ୟ ସୁଦେଶ କୁହନ୍ତି ଯେ ଅନେକ ସମୟରେ ଲୋକମାନେ ଆମକୁ ପଚାରନ୍ତି ଯେ ଆମେ ଭୟ ଲାଗେନାହିଁ ? ସେ ଏହାରଉତ୍ତରରେ କହିଥିଲେ ଏହାର ଠିକ୍ ପାଖରେ ଆଉ ଏକ ଗାଁ ଅଛି ଓ ସେହି ଗାଁ ବହୁତ ଜନଗହଳିପୂର୍ଣ୍ଣ। ଏପରି ପରିସ୍ଥିତିରେ, ଯଦି ଆମେ ଆଗରୁ ଡାକିବା, ତେବେ ସମସ୍ତ ଲୋକ ଆସିଯିବେ। ତେଣୁ ଭୟ ବୋଲି କିଛି ନାହିଁ। ଏଠାରେ, ପଶୁ ଏବଂ ମଣିଷ, ସମସ୍ତେ ଆମର।
ଆଠଟିକିଆ ହାତୀପଲଙ୍କ ଉତ୍ପାତ : ଘର ଭାଙ୍ଗିବା ସହ ଖାଇଗଲେ ୧୦ ବସ୍ତା ଚାଉଳ
ନନ୍ଦିଘୋଷ ବ୍ୟୁରୋ : କାମାକ୍ଷାନଗର ପୂର୍ବାଞ୍ଚଳ ରେଞ୍ଜ ମରୁଆବିଲି ପଞ୍ଚାୟତ କମ୍ପୁଲେଇ ଗ୍ରାମରେ ଆଠ ଟିକିଆ ହାତୀପଲଙ୍କ ଉପଦ୍ରବ l ଘର ଭାଙ୍ଗି ଖାଇଗଲେ ଦଶ ବସ୍ତା ଚାଉଳ l ଗତକାଲି ରାତିରେ ଏକ ଆଠ ଟିକିଆ ହାତୀପଲ ସ୍ଥାନୀୟ ଜଙ୍ଗଲରୁ ବାହାରି କମ୍ପୁଲେଇ ଗାଁ ଭିତରେ ପଶି ତାଣ୍ଡବ ରଚିଛନ୍ତି l ଏହି ଗାଁର ବିଭୁତି ସାହୁଙ୍କ କୋଠା ଘରର ତାଜା ଭାଙ୍ଗିବା ସହ ପ୍ରସନ୍ନ ସାହୁଙ୍କ ଆଜବେଷ୍ଟସ ଘରକୁ ସମ୍ପୂର୍ଣ୍ଣ ଭାଙ୍ଗିଦେଇଛନ୍ତି l ପ୍ରସନ୍ନଙ୍କ ଘରେ ଥିବା ଦଶବସ୍ତା ଚାଉଳ ଖାଇବା ସହ ବାଡ଼ିରେ ଥିବା ବିଭିନ୍ନ ଗଛକୁ ଦଳିମକଚି ଦେଇଛନ୍ତି ହାତୀପଲ l ଲୋକଙ୍କ ଠାରୁ ଖବର ପାଇ ବନ କର୍ମଚାରୀମାନେ ପହଞ୍ଚି ହାତୀପଲଙ୍କୁ ଘଉଡ଼ାଇବା ପାଇଁ ଉଦ୍ୟମ କରିଥିଲେ । ବର୍ତମାନ ହାତୀ ପଲ ଗାଁ ନିକଟରେ ଥିବା ରଞ୍ଜାଗଡ଼ ଜଙ୍ଗଲରେ ରହିଥିବା ଜଣା ପଡିଛି l ତେବେ ଏହି ଆଠ ଟିକିଆ ହାତୀପଲଙ୍କ ତାଣ୍ଡବରେ ଗ୍ରାମବାସୀ ଭୟଭୀତ ଅଛନ୍ତି । କ୍ଷତିଗ୍ରସ୍ତ ପରିବାରକୁ ସରକାରୀ ସହାୟତା ଯୋଗାଇବା ପାଇଁ ଦାବି ହୋଇଛି l
ବାଣପୁରରେ ୟୁରିଆ ସାରର କଳାବଜାରୀ : ଚଢା ଦରରେ ଚାଷୀଙ୍କୁ ବିକ୍ରୀ
ନନ୍ଦିଘୋଷ ବ୍ୟୁରୋ : ଖୋର୍ଦ୍ଧା ଜିଲ୍ଲା ବାଣପୁରରେ ୟୁରିଆ ସାରର କଳାବଜାରୀ ଦେଖାଦେଇଛି l ସରକାରୀ ନିୟମଙ୍କୁ ଖୁଲୁମ ଖୁଲା ଉଲଘଂନ କରି ୟୁରିଆ ଓ ଡିଏପି ସାରକୁ କଳାବଜାରୀ କରାଯାଉଥିବା ଅଭିଯୋଗ ହୋଇ ଆସୁଛି l ବିଭିନ୍ନ ସୋସାଇଟି ମାନଙ୍କରେ ସାର ଚଢା ଦରରେ ବିକ୍ରି ଚାଲିଥିବା ବେଳେ ୟୁରିଆ ସାର ସରକାରୀ ମୂଲ୍ୟ ଅନୁଯାଇ ୨ଶହ ୬୬ ଟଙ୍କା ୫୦ ପଇସାରେ ବିକ୍ରି ହେବାକଥା l କିନ୍ତୁ କେତେକ ସମବାୟ ସମିତି ୩୫୦ ରୁ ୫୫୦ ଦରରେ ଚାଷୀଙ୍କୁ ଦେଉଛନ୍ତି l ଅସାଧୁ ବ୍ୟବସାୟୀ ମାନେ ଖୋଲା ମାର୍କେଟରେ ୭୫୦ରୁ ୯୦୦ଟଙ୍କା ଦରରେ ବିକ୍ରି କରୁଛନ୍ତି l ତଥାପି ବଜାରରେ ଇୟୁରିଆ ସାର ମିଳୁନାହିଁ l ଏହି ସାର ଦୁର୍ନୀତି ପଛରେ କୃଷି ବିଭାଗର କିଛି ଅଧିକାରୀ ଏବଂ ସେବା ସମବାୟ ସମିତି ଅଧିକାରୀ ମାନଙ୍କ ସମ୍ପୃକ୍ତି ରହିଥିବା ନେଇ କୃଷକ ସଙ୍ଗଠନ ପକ୍ଷରୁ ଅଭିଯୋଗ ହୋଇଛି l ସାର କଳାବଜାରୀକୁ ରୋକିବା ସହିତ ଚାଷୀ ମାନଙ୍କ ପାଖରେ ଉଚିତ ମୂଲ୍ୟରେ ସାର ପହଞ୍ଚିବା ନେଇ ଦାବି ହୋଇଛି l ତେବେ ଚଳିତ ସପ୍ତାହରେ୨୨୨ ବସ୍ତା ଇୟୁରିଆ ସାର ଆସିଛି । ବଡ଼ହନ୍ତୁଆଡ଼ ସେବା ସମବାୟ ସମିତିକୁ ଏହି ସମବାୟ ସମିତିରେ ୧୭୫୦ ଜଣ ଚାଷି ଥିବାବେଳେ l ୨୨୨ ବସ୍ତା କାହାରିକୁ ପାଇବ ନାହିଁ l ଯାହା ଫଳରେ ବଡନ୍ତୁଆଡ଼ ସେବା ସମବାୟ ସମିତିର ଅଧୀନରେ ଥିବା ସହସହ ଚାଷି ଇୟୁରିଆ ସାରପାଇଁ ଭୋର ପାଞ୍ଚଟାରୁ ବର୍ଷା ମାଡ଼ଖାଇ ଲମ୍ବା ଲାଇନରେ ଅଛନ୍ତି l ପ୍ରଶାସନ ସବୁ ଜାଣି ଶୁଣି ଚୁପ ବସିଛି ଥିବା ନେଇ ସାଧାରଣରେ ଆଲୋଚନା ଧରିଛି l
ଜଣେ ଶିକ୍ଷକରେ ଚାଲିଛି ତିନୋଟି ଶ୍ରେଣୀ : ଶିକ୍ଷକ ଅଭାବରୁ ସ୍କୁଲ ଛାଡୁଛନ୍ତି ଛାତ୍ର ଛାତ୍ରୀ
ନନ୍ଦିଘୋଷ ବ୍ୟୁରୋ : ଜଣେ ଶିକ୍ଷକରେ ଚାଲିଛି ତିନୋଟି ଶ୍ରେଣୀ l ଶିକ୍ଷକ ଅଭାବରୁ ସ୍କୁଲ ଛାଡୁଛନ୍ତି ଛାତ୍ର ଛାତ୍ରୀ l କେନ୍ଦୁଝର ଜିଲ୍ଲା ଝୁମ୍ପୁରା ବ୍ଲକର ଧାତିକା ସରକାରୀ ଉଚ୍ଚ ପ୍ରାଥମିକ ବିଦ୍ୟାଳୟରେ ଜଣେ ଶିକ୍ଷକରେ ଚାଲିଛି ପାଠପଢା । ଏହି ବିଦ୍ୟାଳୟରେ ଷଷ୍ଠ, ସପ୍ତମ, ଅଷ୍ଟମ ଶ୍ରେଣୀ ଥିବା ବେଳେ ଏକ ବର୍ଷ ହେବ ଏହି ବିଦ୍ୟାଳୟ ଜଣେ ମାତ୍ର ଶିକ୍ଷକରେ ଚାଲୁଥିବାରୁ ଅଭିଭାବକ ମହଲରେ ଅସନ୍ତୋଷ ଦେଖାଦେଇଛି l ପୂର୍ବରୁ ଏହି ବିଦ୍ୟାଳୟକୁ ଝୁମ୍ପୁରା ବ୍ଲକ ଅସନପାଟ ପଞ୍ଚାୟତର ଧାତିକା, ଗିଧିବାସ, ନିଶାଗଡିଆ ଗ୍ରାମର ପିଲାମାନେ ପଢିବାକୁ ଆସୁଥିଲେ l ମାତ୍ର ଏବେ ଶିକ୍ଷକ ସମସ୍ୟାକୁ ନେଇ ପିଲାମାନେ ଅନ୍ୟ ସ୍କୁଲ ମୁହାଁ ହେଉଥିବା ଦେଖିବାକୁ ମିଳୁଛି ।
ନାବାଳିକା ଝିଅକୁ ଗର୍ଭବତୀ କଲା ବାପା : କଙ୍କଡାହାଡ଼ ଥାନାରେ ଅଭିଯୋଗ କଲା ନାବାଳିକା
ନନ୍ଦିଘୋଷ ବ୍ୟୁରୋ : ନାବାଳିକା ଝିଅକୁ ଗର୍ଭବତୀ କଲା ବାପା । ଏଭଳି ଅଭାବନୀୟ ଘଟଣା ଦେଖିବାକୁ ମିଳିଛି ଢେଙ୍କାନାଳ ଜିଲ୍ଲା କଙ୍କଡାହାଡ଼ ଥାନା ଅଞ୍ଚଳରେ l ନିଜର ଜନ୍ମକଲା ନାବାଳିକା ଝିଅକୁ ବାପା ଗର୍ଭବତୀ କରିଥିବା ଅଭିଯୋଗ ହୋଇଛି l ନାବାଳିକା ଜଣଙ୍କ ତିନି ମାସର ଗର୍ଭବତୀ ହୋଇଥିବା ବେଳେ ଏବିଷୟରେ ବାହାରେ ଜଣାଇଲେ ମାରିଦେବାର ଭୟ ଦେଖାଇଥିଲା ବାପା l କିନ୍ତୁ ଗତକାଲି ନାବାଳିକା ଜଣକ ଏସମ୍ପର୍କରେ କଙ୍କଡାହାଡ଼ ଥାନାରେ ଅଭିଯୋଗ କରିବା ପରେ ଅଭିଯୁକ୍ତ ବାପା ଫେରାର ହୋଇଯାଇଛି l ପୋଲିସ ଏକ ମାମଲା ରୁଜୁ କରି ନାବାଳିକାଙ୍କ ଡାକ୍ତରୀମାଇନା କରାଇଛି । ଏହା ସହ ଅଭିଯୁକ୍ତ ବାପାକୁ ଧରିବା ପାଇଁ ପୋଲିସ ତରଫରୁ ଏକ ସ୍ୱତନ୍ତ୍ର ଟିମ ଗଠନ କରାଯାଇଛି l
ଦରମା ମିଳିଲାନି ବୋଲି ଗଡ଼ିଲାନି ଗାଡ଼ି ; ଷ୍ଟିଅରିଂ ଛାଡିଲେ ‘ଆମ ବସ’ କର୍ମଚାରୀ
ନନ୍ଦିଘୋଷ ବ୍ୟୁରୋ : ଭୁବନେଶ୍ଵରରେ ଆମ ବସ୍ ଡ୍ରାଇଭରଙ୍କ ଷ୍ଟିଅରିଂ ଛାଡ୍ ଆନ୍ଦୋଳନ। ଠିକ ସମୟରେ ଦରମା ନ ମିଳିବା ପ୍ରତିବାଦରେ ସେମାନେ ଆନ୍ଦୋଳନକୁ ଓହ୍ଲାଇଛନ୍ତି। ଆଜି ପୋଖରୀପୁଟ ଡିପୋର ୪୩ ଟି ବସର ଡ୍ରାଇଭର ଷ୍ଟିଅରିଂ ଛାଡ଼ିଛନ୍ତି। ଠିକ ସମୟରେ ଦରମା ନ ମିଳିବାରୁ ଘର ଚଳାଇବା ସମସ୍ୟା ହେଉଥିବା କହିଛନ୍ତି ସେମାନେ। କୌଣସି ସାମାଜିକ ସୁରକ୍ଷା ବିନା ଆମ ବସ ଚାଳକମାନେ ଗାଡ଼ି ଚଳାଉଛନ୍ତି । ବର୍ତ୍ତମାନ ୪୨ ଦିନ ହୋଇଯାଇଥିଲେ ବି ଦରମା ପାଇନଥିବାରୁ ଷ୍ଟିଅରିଂ ଛାଡ଼ ଆନ୍ଦୋଳନ କରିଛନ୍ତି। ପ୍ରତି ମାସ ବିଳମ୍ବରେ ଦରମା ମିଳୁଥିବା ବେଳେ ଏ ମାସର 13 ତାରିଖ ହେଲାଣି ଦରମା ମିଳିନାହିଁ । ତିନି ଦିନ ହେବ ଚକ୍ରା ଟ୍ରାନ୍ସପୋର୍ଟ ପକ୍ଷରୁ କୌଣସି ଅଧିକାରୀ କିଛି ଶୁଣୁନାହାନ୍ତି ବୋଲି ଅଭିଯୋଗ ଆଣିଛନ୍ତି ଡ୍ରାଇଭର଼୍।
ସତ ମାନିଲେ ଟ୍ରମ୍ପ : ଟାରିଫ ଲଗାଇବା ପଡିଲା ମହଙ୍ଗା
ନନ୍ଦିଘୋଷ ବ୍ୟୁରୋ : ଗତ କିଛି ଦିନ ହେବ ଆମେରିକା ଓ ଭାରତ ମଧ୍ୟରେ ଟାରିଫ୍ ଯୁଦ୍ଧର ତୋଫାନ୍ ଲାଗିରହିଛି। ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଶୁକ୍ରବାର ସ୍ୱୀକାର କରିଛନ୍ତି ଯେ ରୁଷିଆ ତେଲ କିଣିବା ପାଇଁ ଭାରତ ଉପରେ ଲାଗୁ ହୋଇଥିବା ୫୦% ଶୁଳ୍କ ଦୁଇ ଦେଶ ମଧ୍ୟରେ ସମ୍ପର୍କକୁ ଖରାପ କରିଛି।
ୟୁକ୍ରେନ ଆକ୍ରମଣ ଉପରେ ପଶ୍ଚିମ କଟକଣାର ଅଂଶ ସ୍ୱରୂପ, ରୁଷିଆରୁ ତେଲ କିଣିବା ପାଇଁ ଟ୍ରମ୍ପ ଏହାର କିଛି ରପ୍ତାନି ଉପରେ ୫୦ ପ୍ରତିଶତ ପର୍ଯ୍ୟନ୍ତ ଶୁଳ୍କ ଲଗାଇବା ପରେ ଭାରତ କ୍ରୋଧିତ ହୋଇଛି। ଯାହାକୁ ଟ୍ରମ୍ପ୍ ବାସ୍ତବରେ ଏକ ବଡ଼ କଥା ବୋଲି ସ୍ବୀମାର କରି ଭାରତ ସହିତ ମତଭେଦ ସୃଷ୍ଟି ହୋଇଛି ବୋଲି ମତ ରଖିଛନ୍ତି।
ମୋଦୀ ଏକ ସାକ୍ଷାତକାରରେ ତାଙ୍କର ମତ ରଖି କହିଛନ୍ତି, ‘‘ଭାରତର ରୁଷିଆ ହେଉଛି ସବୁଠାରୁ ବଡ଼ ଗ୍ରାହକ। ମୁଁ ଭାରତ ଉପରେ ୫୦% ଶୁଳ୍କ ଲଗାଇଛି; କାରଣ ସେମାନେ ରୁଷିଆରୁ ତେଲ କିଣୁଛନ୍ତି। ତଥାପି ଏହା କରିବା ସହଜ ନଥିଲା। ଏହା ଦୁଇ ଦେଶର ସଂପର୍କ ଉପରେ ପ୍ରଭାବ ପକାଇଛି।’’
ଟ୍ରମ୍ପ ପ୍ରଥମେ ଭାରତରୁ ଆମଦାନୀ ଉପରେ ଅତିରିକ୍ତ ୨୫% ଶୁଳ୍କ ଲାଗୁ କରିଥିଲେ, ତା’ପରେ କହିଥିଲେ ଯେ ଅଗଷ୍ଟ ୨୭ ତାରିଖରୁ ଏହାକୁ ଦ୍ୱିଗୁଣିତ କରି ୫୦% କରାଯିବ। ୟୁକ୍ରେନରେ ଯୁଦ୍ଧ ସମାପ୍ତ କରିବାକୁ ଆମେରିକା ଚେଷ୍ଟା କରୁଥିବାରୁ ଭାରତ ରୁଷୀୟ ତୈଳ କ୍ରୟ ବୃଦ୍ଧି କରିଥିବାରୁ ଦଣ୍ଡ ସ୍ୱରୂପ ଏହି ଶୁଳ୍କ ଲାଗୁ କରାଯିବ।
ଆମେରିକା ରାଷ୍ଟ୍ରପତି କହିଛନ୍ତି ଯେ ତାଙ୍କ ପ୍ରଶାସନ ବାଣିଜ୍ୟ ପ୍ରତିବନ୍ଧକ ଦୂର କରିବା ପାଇଁ ଭାରତ ସହିତ ଆଲୋଚନା ଜାରି ରଖିଛି ଏବଂ ସେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ସହ କଥା ହେବେ। ଏହା କିଛି ସପ୍ତାହର କୂଟନୈତିକ ଅଚଳାବସ୍ଥା ପରେ ସମ୍ପର୍କରେ ଉନ୍ନତିର ଏକ ସଙ୍କେତ।
ଆଜି ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ମଣିପୁର ଗସ୍ତ
ନନ୍ଦିଘୋଷ ବ୍ୟୁରୋ : ଆଜି ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ମଣିପୁର ଗସ୍ତ। ଗତ ମେ ୨୦୨୩ରେ ମଣିପୁରରେ ହିଂସା ପରଠାରୁ ପ୍ରଥମ ଥର ଲାଗି ମଣିପୁର ଗସ୍ତ କରିବେ ମୋଦି। ପ୍ରଧାନମନ୍ତ୍ରୀଙ୍କ ଗସ୍ତକୁ ନେଇ ମଣିପୁରରେ ସୁରକ୍ଷା ବ୍ୟବସ୍ଥା କଡ଼ାକଡ଼ି କରାଯାଇଛି। ମଣିପୁର ମୁଖ୍ୟ ସଚିବ ପୁନୀତ କୁମାର କହିଛନ୍ତି- ମିଜୋରାମ ଆଇଜଲରୁ ପ୍ରଧାନମନ୍ତ୍ରୀ ଚୁରାଚାନ୍ଦପୁର ଆସିବେ। ବିଭିନ୍ନ ପ୍ରକଳ୍ପର ଉଦଘାଟନ କରିବା ସହ ସେ ଶାନ୍ତି ପଡ଼ିଆରେ ଉଦବୋଧନ ଦେବେ। ସେ ଚୁରାଚାନ୍ଦପୁରରେ ୭ ହଜାର ୩୦୦ କୋଟି ଟଙ୍କାର ବିଭିନ୍ନ ପ୍ରକଳ୍ପ ଉଦଘାଟନ କରିବେ। ୨୦୨୩ରୁ ଚାଲିଆସିଥିବା ହିଂସାରେ ଚୁରାଚାନ୍ଦପୁର ସବୁଠାରୁ ବେଶୀ କ୍ଷତିଗ୍ରସ୍ତ ହୋଇଛି। ହିଂସାରେ ରାଜ୍ୟରେ ୨୬୦ ଜୀବନ ଯାଇଛି।ସେପଟେ ପ୍ରଧାନମନ୍ତ୍ରୀଙ୍କ ଗସ୍ତ ପୂର୍ବରୁ ଚୁରାଚାନ୍ଦପୁରରେ ମାତିଛନ୍ତି ଦୁର୍ବୃତ୍ତ। ବିଭିନ୍ନ ସ୍ଥାନରେ କରିଛନ୍ତି ଭଙ୍ଗାରୁଜା। ଚୁରାଚାନ୍ଦପୁରରେ କିଛି ଅସାମାଜିକ ବ୍ୟକ୍ତି କରିଛନ୍ତି ଭଙ୍ଗାରୁଜା। ବିଭିନ୍ନ ରାସ୍ତାରେ ଲଗାଯାଇଥିବା ବ୍ୟାରିକେଡକୁ ସେମାନେ ଭାଙ୍ଗିବା ସହ ରାସ୍ତାର ସୌନ୍ଦର୍ଯ୍ୟକରଣକୁ ନଷ୍ଟ କରିଛନ୍ତି।
ବିହାର ମହାଗଠବନ୍ଧନରେ ଜଟିଳ ହେଉଛି ଆସନ ବୁଝାମଣା : ଉପମୁଖ୍ୟମନ୍ତ୍ରୀ ପଦ ଲାଗି ଆରମ୍ଭ ହେଲାଣି ବିବାଦ
ନନ୍ଦିଘୋଷ ବ୍ୟୁରୋ : ବିହାରରେ ମହାଗଠବନ୍ଧନ ଅଧିକ ଶକ୍ତିଶାଳୀ ହୋଇଥିଲେ ବି ବଢିଛି ସମସ୍ୟା । ମହାଗଠବନ୍ଧନ ଲାଗି ନିର୍ବାଚନ ହେବ ଅଧିକ ଜଟିଳ । ମହାଗଠବନ୍ଧନରେ ଆଉ ଦୁଇ ଦଳ ଝାଡ଼ଖଣ୍ଡ ମୁକ୍ତି ମୋର୍ଚ୍ଚା ଓ ପଶୁପତି ପାରସଙ୍କ ଆରଏଲଜେପି ସାମିଲ ହୋଇଥିବାରୁ ଆସନ ବଣ୍ଟନ ପ୍ରକ୍ରିୟା ଅଧିକ ଜଟିଳ ହେବ ବୋଲି ଆଶଙ୍କା କରାଯାଉଛି । ବର୍ତ୍ତମାନ ମହାଗଠବନ୍ଧନରେ ୮ଟି ଦଳ ରହିଛନ୍ତି । ସେଗୁଡିକ ହେଲା ଆରଜେଡି, କଂଗ୍ରେସ, ସିପିଆଇ, ସିପିଏମ, ସିପିଆଇଏମ(ଏମଏଲ)ଲିବରେସନ, ଭିଆଇପି, ଆରଏଲଜେପି, ଜେଏମଏମ । କଂଗ୍ରେସ ୭୦ରୁ କମ ଆସନରେ ଲଢିବ ନାହିଁ ବୋଲି ଜିଦ୍ ଧରିରହିଛି । ଭିଆଇପି ନେତା ମୁକେଶ ସାହାଣୀ ୬୦ ଆସନ ଦାବି କରୁଥିବାବେଳେ ଉପମୁଖ୍ୟମନ୍ତ୍ରୀ ଆସନ ଦାବି କରିଛି । ସିପିଆଇଏମଏଲ ଅତି କମରେ ୪୦ ଆସନ ଲାଗି ଦାବି କରିଛି । ସେପଟେ ଆରଜେଡି ୧୫୦ ଆସନ ଲାଗି ଜିଦ୍ ଧରିବସିଛି । ମୋଟ ବିଧାନସଭା ଆସନ ୨୪୩ ହୋଇଥିବାବେଳେ ମହାଗଠବନ୍ଧନ କିପରି ୮ଟି ଦଳକୁ ସନ୍ତୁଷ୍ଟ କରିବ ତାହାକୁ ନେଇ ସସପେନ୍ସ ସୃଷ୍ଟି ହୋଇଛି । ଗତ ବିଧାନସଭା ନିର୍ବାଚନରେ ଆରଜେଡି ୧୪୪ଆସନରେ ଲଢି ହାସଲ କରିଥିଲା ୭୫ ଆସନ । କଂଗ୍ରେସ ୭୦ ଆସନରେ ଲଢି ପାଇଥିଲା ୧୯ ଆସନ । ସିପିଆଇଏମଏଲ ୧୯ ଆସନରେ ଲଢି ୧୨ ଆସନ ପାଇଥିବାବେଳେ ସିପିଏମ ୪ ଆସନରେ ଲଢି ପାଇଥିଲା ୨ ଆସନ । ସିପିଆଇ 6 ଆସନରେ ଲଢି ପାଇଥିଲା ୨ ଆସନ । ରାମବିଳାସ ପାଶଓ୍ବାନଙ୍କ ନାମରେ ଥିବା ଭୋଟ ତଥା ରାମବିଳାସଙ୍କ ଖଗରିଆ ସମ୍ପ୍ରଦାୟ ଭୋଟକୁ ବିଭାଜିତ କରିବାରେ ପଶୁପତି ସକ୍ଷମ ହେବା ଆଶା କରାଯାଉଥିବାରୁ ମହାଗଠବନ୍ଧନରେ ପଶୁପତି ପ୍ରମୁଖ ଭୂମିକା ନେବେ । ଖଖରିଆ ସମ୍ପ୍ରଦାୟବହୁଳ ଆଲାଉଲି ବିଧାନସଭା ଆସନରୁ ପଶୁପତି ପ୍ରତିନିଧିତ୍ବ ଅତୀତରେ କରିଥିବାରୁ ତାଙ୍କ ଉପରେ ବିଶେଷ ଭରସା କରିବ ମହାଗଠବନ୍ଧନ । ଯଦି ପଶୁପତିଙ୍କୁ ହାଜିପୁରରୁ ପ୍ରାର୍ଥୀ କରାଯାଏ ତେବେ ରାମବିଳାସଙ୍କ ନାଁରେ ଥିବା ଭୋଟ ବିଭାଜିତ ହେବା ଆଶା ରହିଛି । ଜେଏମଏମକୁ ବାଙ୍କା, ମୁଙ୍ଗେର ଓ ଭାଗଲପୁର ଆସନ ଦିଆଯାଇପାରେ । ପୂର୍ବରୁ ଭିଆଇପି ନେତା ମୁକେଶ ସାହାଣୀଙ୍କୁ ଉପମୁଖ୍ୟମନ୍ତ୍ରୀ ଚେହେରା ଭାବେ ତେଜସ୍ବୀ ଘୋଷଣା କରିଥିବାରୁ ବର୍ତ୍ତମାନ ଉପମୁଖ୍ୟମନ୍ତ୍ରୀକୁ ନେଇ ଦ୍ବନ୍ଦ୍ବ ଉପୁଜିଛି । ଗତ ନିର୍ବାଚନରେ ଭିଆଇପି ୧୧ ଆସନ ଲଢିଥିବାବେଳେ ପାଇଥିଲା ୪ଟି ।